Ekainaren 18an, larunbatean, "Venezia. Italiar inspirazioak" izenburudun kontzertuak emango die amaiera Miramongo Matinéei. Euskadiko Orkestrako musikariek osatutako ganbera-talde batek italiar giroa sortzea asmo harturik, Giochino Rossini eta Antonio Vivaldiren lana ekarriko dute Miramongo egoitzako oholtzara. Proposatzen dutena iradokitzailea da oso: haien musika entzunez, entzuleria Veneziaren xarma ehuntzen duten kalezulo eta ubideek osatutako labirintoan barrena eramatea.

Egitaraua. Interpretatuko dituzten lanak dira, batetik, Rossiniren "La scala di seta. Obertura" (flauta, fagot eta klaberako) eta Bi biolin, biolontxeloa eta kontrabaxurako kuartetoa si bemol maiorrean; eta, bestetik, Vivaldiren Flauta, oboe, biolin, fagot eta baxu jarraiturako kontzertua sol minorrean (RV 105), Flauta, oboe, biolin, fagot eta baxu jarraiturako kontzertua re maiorrean (RV 94) eta "Il gardellino" deritzon 3. Kontzertua flauta, hari eta baxu jarraiturako re maiorrean.

Kontzertuan ariko diren Euskadiko Orkestra Sinfonikoko kideak dira Hélène Billard (flauta), Pascal Laffont (oboea), Stéphane Langlois (klarinetea), François Proud (fagota), Itziar Prieto eta Anne Marie Harmat (biolinak), Yann Seyrac (biola), Pascale Michaud (biolontxeloa) eta Pierre Torrent (kontrabaxua). Horien lankide ariko den Charo Indartek klabea joko du.

Miramonera autobusez. Euskadiko Orkestrak Matinéetako publikoaren esku doan jartzen duen autobus zerbitzua da Miramongo egoitzara heltzeko biderik erraz eta erosoena. 10:25etan abiatzen da Gipuzkoa Plaza 4tik eta geldialdiak egiten ditu Antso Jakituna 18 eta Madrilgo Hiribideko 34ean.

Datorren astelehenetik, hilaren 13tik, aurrera, Euskadiko Orkestra Sinfonikoak 15/16 Abonu Denboraldiarari dagozkion azken kontzertuak emango ditu. Itxiera horretan, Orkestra nazioarteko orkestra nagusienei lotutako ibilbidea duen Juraj Valcuha eslobakiarrak zuzenduko du lehenbiziko aldiz. Horrekin batera, eszenatokia partekatuko du EOSekin Jennifer Koh biolinista estatubatuarrak. Abonu Denboraldian estreinakoz, Orkestrarekin, Koh-ek Leonard Bernsteinen Serenade biolinerako kontzertua interpretatuko du; lan hori sortu zuenean, konpositoreak eginak zituen jada klasiko bilakatutako opera, musikal zein filamatako soinu-bandak, horien artean, Candide, West Side Story eta Isiltasunaren legea.

Kontzertuak izango dira 13an eta 17an Donostiako Kursaal Auditoriumean, 14an Iruñeako Baluarten, 15ean Bilboko Euskalduna Jauregian eta 16an Gasteizako Principal Antzokian.

Juraj Valcuha Orchestra Sinfonica Nazionale della Rai Torino-ko zuzendari titularra da 2009tik. Podiumean 2005. urtean egin zuen debuta, Frantziako Orkestra Nagusiaren zuzendari. Ordutik, lehen mailako taldeak zuzendu ditu, hala nola New York, Berlin eta Municheko orkestra filarmonikoak, Orchestra di Santa Cecilia eta Vienako Orkestra Sinfonikoa. Eta gorengo bakarlariak izan ditu lankide, esaterako, Yo-Yo Ma edo Arcadi Volodos. Operaren arloan, Pucciniren Madama Butterfly eta Prokofieven Hiru laranjen maitasuna operen ekoizpenak zuzendu ditu zulogunetik, Florenciako Maggio Musicale delakoan. 16/17 denboraldirako bere konprmozuen artean, azpimarrgarria da Chicagoko Orkestra Sinfonikoa zuzenduko duela lehenbiziko aldiz.

Jennifer Koh biolinista, grina eta musikaren inguruko jakin-nahia ezaugarri dituena, iradokitzaile zaizkion eta beretzat erronak diren lanak aukeratzu ari da bere bidea egiten. Bere errepertorioa aro guztiak bilduz, musika tradizionaletik garaikideraino doa, iraganak eta orainak osotasuna eratzen dutela sinesturik. Interpretatzen dituen obren arteko loturak aztertzen ditu, halaber. Horretarako, konpositore ezberdinen ahotsean artean antzekotasunak bilatzen ditu eta autore beraren piezen arteko harremanak arakatzen ditu. Jennifer Koh 2016 Urteko instrumentu Interprete izendatu du Musical America iparramerikar argitalpen ospetsuak. Sari horrek aintzat hartzen du musika klasikoarekiko hurbiltzerakoan begirada etokizuenan jarri izana, askotariko errepertorioa lantzea eta diziplina anitzekin lan kidetzan aritzea. 2015eko urrian, Minnesotako Orkestra Sinfonikoaren emandako kontzertuetan, Minneapolisen (EEBB) lelkarrekin izan ziren Juraj Valcuha eta Jennifer Koh.

Egitaraua. Serenade jotzeaz gain, Euskadiko Orkestrak Prokofieven 5. Sinfonia interpretatuko du; izan ere, Juraj Valcuha bereziki aditua da konpositore horren lanean. 1944an sortua, Bigarren Mundu Gerra pil-pilean zela, ukrainar musikariak sortutako zapi sinfonien artean diztiratsuena eta heroikoena da eta gehien interpretatzen direnen artean dago egun. Jakinarazten dizuegu, halaber, aurreikusitako Iñaki Estradaren "... laino argidun artean..." lana ez dela kontzertu hauetan interpretatuko.

Ekainaren 4an, larunbatean, ganbera-musika izango da Miramongo Matinéetan nagusi. Klasikoenetik hasi eta XX. mendeak utzitako formetarainoko ibilbidea egingo du Kaabestri taldeak. Xedea izango da fagota, biolontxeloa eta kontrabaxua instrumentu bakarlari legez aldarrikatzea. Hortaz, eskuarki orkestra sinfonikoaren baitan betetzen duten paperaren oso bestelakoa den modu batean arukeztuko dituzte: beti bigarren mailako lekuan aritzen diren instrumentuok erabateko protagonista bihurturik entzuteko aukera izango da. Modu horretan hobeto hautemango da horietako bakoitzaren tinbrea.

Egitaraua. Kaabestri taldeko kideek barrokoko, klasizismoko eta XX. mendeko partiturak hautatu dituzte. Horietan uztartuko dira ganbera-musika hutsena, hari-kuarteto klasikoaren eskutik; barrokorik birtuosoena, biolontxelo zein kontrabaxuak osatutako duoarekin; edo gerra-garaian (1942) sortutako XX. mendeko molde berriak, fagotak joko dituenak, hari-boskoteak lagunduta.

Kaabestri Euskadiko Orkestra Sinfonikoko lau kidek bestelako errepertorioak jorratzeko zuten interesetik sortu zen. Jatorrizko kideak dira Igor Torre eta Óscar López, biolinak;; Arkaitz Martínez, biola; eta Jon Larraz, biolontxeloa. Askotariko proiektuetan esku hartzen dute; esaterako, soinu-banden grabaketak, haurrentzako ikuskizunak, BBK Live jaialdia eta abar. Horretarako, musikaren beharren arabera moldatzen dute taldearen organikoa eta musikari ugari dituzte lankide. Oraingoan, François Proud (fagota) eta Victor Bogdanov izango dituzte lagun. Biak ala biak Euskadiko Orkestra Sinfonikoko kideak dira.

Miramonera autobusez. Euskadiko Orkestrak Matinéetako publikoaren esku doan jartzen duen autobus zerbitzua da Miramongo egoitzara heltzeko biderik erraz eta erosoena. 10:25etan abiatzen da Gipuzkoa Plaza 4tik eta geldialdiak egiten ditu Antso Jakituna 18 eta Madrilgo Hiribideko 34ean.

Bihar ostirala, Euskadiko Orkestrak Santanderrera bidaia egingo du, Kantabriako Jaialdi Jauregiaren programazioaren baitan musika sinfonikoari emandako atalean aritzeko. Oliver Díazek zuzenduta, Miguel Trápaga kantabriar gitarrista izango du lagun. Egitarauan, Claude Debussyren Fauno baten siestaren preludioa; Joaquín Rodrigoren Concierto de Aranjuez, Frank Martinen Guitare eta Leo Brouwer-en Concierto de Benicassim.

Miguel Trápaga gitarrista kantabriarrak lankide izan ditu Moskuko hari-laukotea, Lola Casariego mezzosopranoa, Cecilia Lavilla Berganza sopranoa, Óscar Herrero gitarrista, Alexander Detisov biolinista, Óliver Díaz, Miguel Roa, Igor Palkin, Theodore Kuchar zein Leo Brouwer orkestra-zuzendariak eta abar. Gainera orkestra ugarirekin aritu da; horien artean, Porto Alegreko Fundarte Orkestra (Brasil), Thailand Philarmonic Orchestra, Canberra Symphony Orchestra , Real Orquesta Sinfónica de Sevilla, Orquesta Ciudad de Gijón, Sinfónica de Madrid, ORCAM, Ukrainako Orkestra Nazionala eta Venezuelako Orquesta Sinfónica Simón Bolívar. Bakarlari jarduteaz gain, irakaslea ere bada Madrilgo Goi Mailako Musika Errege Kontserbatorioan.

Oliver Díaz Madrilgo Teatro de la Zarzuela antzokiko musika-zuzendaria eta Barbieri Symphony Orchestra delakoaren zuzendari titularra da. Orkestra-zuzendaritzako "Bruno Walter" beka jaso duen espainiar bakarra da. Horri esker, New Yorkeko Juilliard School of Music ospetsuan ikasi ahala izan zuen, Otto Werner Mueller, Charles Dutoit edo Yuri Temirkanov-en mailako maisu handiekin. Bere errepertorioak hartzen ditu barrokotik egungo musikaraino eta Espainia, Portugal, Frantzia, Alemania, Errumania, Estatu Batuetan eta Hegoamerikan zuzendu ditu kontzertuak.

Maiatzaren 21ean, larunbatean, Euskadiko Orkestra Sinfonikoko kideek osatu Hemiola hari-laukotea protagonista izango da Miramongo Matinéen emanaldian. Orkestraren baitan burutzen duten lan sinfonikoarekin batera, musikariek ganbera-musikako interprete gisa jarduteko euskarri egokia Miramongo Matinéeak. Horietan biltzen diren entzuleentzat, ikertu, hautatu eta egitarau bereziak diseinatzen dituzte. Oraingoan, Hemiolak F. Mendelssohn eta W.A. Mozarten hari-kuarteto bana aurkezten du. Lehena konpositorea opera baten sorkuntzan buru-belarri ziharduela sortu zen eta bigarrena aurrez sortutako konposizio-materialen berrerabilpenaren eredu da.

Matinéearen izenburua, "Egia al da?", Felix Mendelssohnek bere 2. Hari-kuartetoa, opus 13, larunbatean entzungai izango dena, idazteko erabilitako lied-aren izenburua da jatorriz. Bertso hori ustez Johann Heinrich Voss alias J.G.Droysen-ek edo, ziur aski, Mendelssohnek berak idatzitako "Frage" (Galdera) poeman agertzen da; poema hori baliatu zuen musikagileak 1829 eta 1830 urte bitartean sortutako lieder-etako bat konposatzerakoan. Egitaraua osatzen duen beste partitura Wolfgang Amadeus Mozarten 6. Hari-kuartetoa, KV 159 da. 1773an Milanen sortu eta estreinatua, Milandar kuartetoak izenez ezaguna den sei kuarteto-sortako bosgarrena dugu. Milanen Lucio Silla operan lanean ari zela idatzi zituen kuarteto horiek.

Hemiola laukotea dira Raquel Cortinas eta Larraitz Oiarzabal, biolinak; Natacha Dupuy, biola, eta Gabriel Mesado, biolontxeloa.

Miramonera autobusez. Euskadiko Orkestrak Matinéetako publikoaren esku doan jartzen duen autobus zerbitzua da Miramongo egoitzara heltzeko biderik erraz eta erosoena. 10:25etan abiatzen da Gipuzkoa Plaza 4tik eta geldialdiak egiten ditu Antso Jakituna 18 eta Madrilgo Hiribideko 34ean.

Maiatzaren 19tik 25era Euskadiko Orkestra Sinfonikoa bere zuzendari printzipal gonbidatuaren gidaritzapean ariko da berriz ere. Kontzertu horietan lagun izango du gainera Alban Gerhardt biolontxelo-jotzailea. Egun instrumentu horren erreferentetzat jotzen den alemaniar musikariak eta Orkestra estreinakoz izango dira lankide. Emanaldi horietarako egitarauan, D. Shostakovitchen Biolontxelorako 2. kontzertua eta J. Brahmsen 3. Sinfonia.

Kontzertuak izango dira maiatzaren 19 eta 20an Donostiako Kursaalean, 23an Gasteizko Principal Antzokian, 24an Iruñeako Baluarten eta, azkenik, hilaren 25ean Bilboko Euskalduna Jauregian.

Alban Gerhardtek (Berlin, 1969) 1991. urtean eman zuen bere nazioarteko bakarlari-ibilbide oparoaren lehenbiziko urratsa, Berlingo Orkestra Filarmonikoa eta Semyon Bychkovekin. Alde batera utzi zuen horrela orkestra handi bateko kide izateko bere betiko asmoa, betiere free-lance bakarlari bihurtzeak emango zion askatasunaren aldeko hautua eginez. Ordutik iragandako hogeita bost urteetan Gerhardtek argiki erakutsi ditu, mundu osoko aretoetan, bere musikaltasun bizia, oholtza gainean sendotasuna eta jakinmin artistiko aseezina; bide horretan lagun izan Royal Concertgebouw, Londresko Orkestra Filarmonikoa, NHK edo Cleveland, Philadelphia zein Chicagoko sinfonikoak eta baita Kurt Masur, Christian Thielemann, Christoph Eschenbach, Esa-Pekka Salonen nahiz Vladimir Jurowski bezalako zuzendariak. Bere helburua da, batetik, obra ezagunei aire berria ematea eta, bestetik, pasatako garaietako edo egungo errepertorio berriak bilatzea. Musika klasikoaren inguruko ohiko aukerak gainditzeko asmoz, eguneroko tokietatik atera eta askotariko entzuleei helarazteko gogor lan egiten du; horren adierazgarri, Deutsche Bahn, alemaniar tren konpainia nagusiarekin lankidetza. Alban Gerhardtek egindako grabaketa ugari izan dira sarituak; merezitako en artean dago 2015eko ICMA saria (musika garaikidearen sailean) . 1710eko Matteo Gofriller biolontxelo bat jotzen du.

Master class-a, Aula Jordá Gelaren baitan. Egunotan Euskadiko Orkestrarekin aritzearekin batera, Alban Gerhadtek master class bat emango dio Musikeneko biolontxelo ikasle-talde bati. Maiatzaren 20an, ostiralean, izango da, Orkestraren Miramongo egoitzan. Topaketa hori Musikenek eta Euskadiko Orkestra Sinfonikoak 2012tik lankidetzan garatutako Aula Jordá Gelaren programazioaren zati da.

Andrey Boreyko apirilaren amaieran Baltimoreko Orkestra Sinfonikoa lehenengo aldiz zuzendu ondoren eta, duela egun bakar batzuk, Torontoko Orkestra Sinfonikoarekin Shostakovitchen beste lan handi bat, Babi Yar sinfonia ezaguna interpretatu ostean itzuli da gurera.

Bihar asteazkena Bilbon hasi eta hilaren 12ra bitartean, Euskadiko Orkestra Sinfonikoak eskainiko duen kontzertu-programan bi bakarlari gonbidatu izango ditu lagun: batetik, Orkestrarekin estreinakoz ariko den Viviane Hagner biolinista eta, bestetik Zoe Nicolaidou sopranoa; bigarren hau joan zen irailan Festival Musique en Côte Basque jaialdian Orkestrarekin jardun bazen ere, lehenbiziko aldiz izango da Abonu-Denboraldian. Emanaldiok Orkestraren titular Jun Märklek zuzenduko ditu.

Kontzertuak izango dira bihar asteazkena, maiatzak 4, Bilboko Euskalduna Jauregian, 9 eta 12an Donostiako Kursaal Auditorioan, 10ean Iruñeako Baluarte Auditorioan eta 11n Gasteizko Principal Antzokian.

Viviane Hagner eta Alban Bergen Biolinerako kontzertua. Egun XX. mendeko biolinerako musikan aditu, Viviane Hagnerrek (Munich, 1977) 13 urterekin egin zuen nazioarteko debuta, Zubin Mehtak zuzenduta, Berlin eta Israelgo orkestra filarmonikoekin batera eskaintako kontzertu gogoangarrian. Ordutik orkestra nabarmenekin eta zuzendari ospetsuenekin aritu da bakarlari mundu osoan zehar: Berlin eta Municheko Orkestra Filarmonikoak, Boston Symphony, Cleveland Orchestra, Chicago Symphony Orchestra, New York Philharmonic, Leipzig Gewandhaus, Londresko Philharmonia eta abar, Claudio Abbado, Vladimir Ashkenazy, Daniel Barenboim, Ricardo Chailly, Charles Dutoit, Esa-Pekka Salonen, Lorin Maazel zein Kent Naganok zuzenduta; azkenaldiko emanaldien artean, aipatzekoa da iaz debuta egin zuela Dresdengo Staatskapelle delakoarekin, Christoph Eschenbachek zuzenduta. Orkestrekin bakarlari jarduteaz gain, ganbera-musika lantzen du eta biolin-irakasle ere bada Mannheimgo Musika eta Arte Eszenikoen Kontserbatorioan; horrezaz gain, haur zein erretiratuentzat ere egiten ditu emanaldiak. 1999tik Nippon Foundation erakundeak utzitako "Sasserno" Stradivarius biolina jotzen du.

Euskadiko Orkestra Sinfonikoarekin lehenbiziko aldiz ariko den honetan, Viviane Hagnerrek Alban Bergen Biolin eta orkestrarako kontzertua interpretatuko du. Konpositorearen azken lan instrumantala, eta ezagunena, den honetan Bergek bere lagun Alma Mahlerren alabaren izaera eta hura heriotzera eraman zuen gaixotasunaren bilakaera islatzen ditu.

Zoe Nicolaidou eta Mahlerren 4. Sinfonia. Txipretar soprano gaztea Parisko Operako Artista Gazteen Programan aritu zen 2009 urtetik 2011 urtera bitartean. Hor ekin zion bere ibilbideari, Philippe Jordan, Bernharndt Kontarsky edo Dan Ettinger maisuek zuzenduta. 2011.ean denboraldiko artista gazte nabarmenari Le Prix Lyrique du cercle Carpeaux saria merezi izan zuen. Opera abeslari gisa Fantzian, Estatu Batuetan, Suitzan, Austrian eta abarretan aritu da eta kontzertu-abeslari gisa bere errepertorioak oratorioak zein lan sinfonikoak hartzen ditu; horretan jardun du Portoko Orkestra Nazioanalaren denboraldian, La Roque D'Antheron nahiz Echternach jaialdietan eta beste hainbatetan. Halaber, errezitalak eskaini ditu Parisko Palais Garnier, Vienako Musikverein, Erromako Villa Medicis, Txipreko Arts Foundation eta abarretan.

Gustav Mahlerrek bere 4. Sinfoniako azken mugimenduan berreskuratutako Gazteriaren adar magikoa bildumako kanta interpretatuko du Zoe Nicolaidouk.

Apirilaren 30ean, larunbatean, Trio Mediciren emanaldia Miramongo Matinéetan. Vera Lopatina (biolina), Olga Kirpicheva (pianoa) eta Adrien Bellom-ek (biolontxeloa) osatutako hirukote honek Grand Prix de l'Académie Ravel saria eskuratu zuen 2014.ean. Kontzertuak Donibane Lohitzuneko erakunde honen eta Euskadiko Orkestraren arteko lankidetza-hitzarmenari erantzuten dio.

Trio Medici 2013an Parisko Musika eta Dantza Kontserbatorio Nazionalean sortu zen. 2014ko irailan Donibane Lohitzuneko Académie Ravel erakundearen Sari Nagusia merezi izan zuten. Eta ondoren jasotako sarien artean, Vienako 6. J. Haydn Nazioarteko Ganbera Musika Lehiaketan 2. saria eta 2. Saria, halaber, Melbouneko 7. Nazioarteko Ganbera Musika Lehiaketan. Horiei esker, nazioarte mailan nabarmendu dira. 2015etik Belgikako Elisabeth Erregina Musika Kaperako artista egoiliarrak dira eta teknika hobetzeko eskolak eman dizkiete M. Da Silva eta Artemio laukoteak, R. Pasquier, I. Golan, P. Bernold eta Ébène laukoteak. Kontzertuak eman dituzte Parisko La Philharmonie, Salle Gaveau eta Auditórium del Louvre-en eta Melbourne Recital Centre zein Vienako Haydn Saal delakoan; eta baita honako jaialdietan ere: La Roque d'Anthéron, Festival de l'Orangerie de Sceaux, Festival Ravel de Monfort l'Amaury, Russian Classics de Flagey, Bruselan, eta abar.

Egitaraua. Trio Medicik intepretatuko ditu Beethovenen Pianodun 1. trioa mi bemol maiorrean, opus 1; Franz Schuberten Adagioa mi bemol maiorrean, "Notturno", D.897, eta Maurice Ravelen Pianodun trioa la minorrean.

Euskadiko Orkestrako kideek osatutako haize-boskote bat, igandean Donibane Lohitzuneko Ravel Auditoriumean. Acádemie Ravel eta Euskadiko Orkestraren arteko lankidetza-hitzamenaren baitan, halaber, maiatzaren 1ean, igandean, Orkestrako haize-taldeetako bakarlariek osatutako boskote batek kontzertu bat emango du Donibane Lohitzuneko Auditoriumean. ariko diren musikariak dira Hélène Billard (flauta), Pascal Laffont (oboea), Juan Navarro (klarinetea), François Proud (fagota) eta Jean-Luc Casteret (tronpa). Pianoan lagun izango dute Phillip Hattat Colin, 2012an Acádemie Ravel-en sari nagusia irabazi zuena. Poulenc eta Mozarten lanak interpretatuko dituzte.