Orkestraren Abonu Denboraldia amaitzearekin batera, joan zen ostiralean bukatu zen Musikenek EOSekin lankidetza estuan abiatutako Orkestra Ikasketen Master ofizialaren lehenbiziko aroa. Masterreko ikasleek eta Orkestrako musikariek eszenatokia, eta atrilak, partekatu zituzten azkeneko aldia izan zen. Eta bai batzuek zein besteek familia argazki polit baterako paratu nahi izan zuten, esperientzia horren oroigarri.

Zalantzarik gabe, lanerako zein gozamenerako hilabeteak izan dira, zati berdinetan, bai orain ikasturtea amaitu dutenentzat: Felicia Pasca, Soraya Ballestero, Rocío López, Álvaro Calero, Jana García y Catarina Martins, biolinak; Catarina Santos, biola; Nerea Aizpurua eta Stine Staub, biolontxreloak; eta baita horien tutore izan diren Orkestrako musikarientzat: Itzir Prieto, Ortzi Oihartzabal, Igor Torre, Oscar López eta Ludwik Hamela, biolinak; Arkaitz Martínez, biola; Jacek Grabe-Zaremba eta Beatriz Linares, biolontxeloak.

Akabera hau mugarri berri bat da Euskadiko Orkestra Sinfonikoak eta Musikenek Aula Jordá Gelaren baitan sortutako egitasmo asmo handikoenaren ibilbidean. Estatu mailan aintzaindari eskaintza akademiko honek aurrera darrai eta egunotan bigarren txandarako izena eman duten hautagaiak sarrera frogak egiten ari dira egunotan.

Gaur astelehena, ekaninaren 20an hasi eta 21a arte, Euskadiko Orkestra Sinfonikoa Fernando Velázquezek Oriol Pauloren Contratiempo ("Ustekabekoa") pelikularako idatzitako soinu banda grabatzen ari da. Warner Bros. Pictures España, Atresmedia Cine, Think Studio, Colosé Producciones eta La Habitación Cerrada A.I.E.-ek Nostromo Pictures-ekin lankidetzan aurkeztutako luzemetrai honen protagonista dira Mario Casas, Ana Wagener, José Coronado eta Bárbara Lennie. Thrilerra hau joan zen udazkenean errodatu zuten Bartzelonan, Bizkaian, Terrassako Parc Audiovisual delakoan eta Vall de Núrian.

Oriol Paulo zuzendari berri onenarentzako Goya sarirako izendatu zuten "El Cuerpo" bere lehenbiziko filmeari esker. "Contratiempo" pelikularen gidoia ere berak idatzi du. Lankide bereziak izan ditu Francesc Orella, Paco Tous eta David Selvas eta horretan aritu da, halaber, Iñigo Gastesi.

Sinopsia. Hilketa bat leporatzen dioten arren, Adrián Doria enpresari arrakastatsuak errugabea dela dio eta lekukoen prestatzaile onena den Virginia Goodmanen zerbitzuak kontratatu ditu. Gau batean, kartzelaz libratuko duen arrazoizko zalantza baten bila lanean ariko dira. Orduan akusazioaren lekuko berri bat agertu eta kolokan jarriko du defentsaren estrategia; horrek ezinezko puzzle bateko piezak berrantolatzera behartuko ditu, erlojuaren kontra.

Contratiempo filmearen ekoizle dira Eneko Lizarraga (Think Studio), Mercedes Gamero eta Mikel Lejarza (Atresmedia Cine), Colosé Producciones eta La habitación cerrada A.I.E, Nostromo Pictures-ekin elkarlanean eta Atresmedia, Movistar +, Televisió de Catalunya, Cosmo eta abarrekin lankidetzan eta ICAA eta ICEC erakundeen babesarekin. Warner Bros. Pictures España-k banatuko du eta Film Factory Entertainment-ek merkaturatuko du naziortean.

Besteak beste, Fernando Velázquezek Euskadiko Orkestra zuzendu du El mal ajeno (2009), Ocho apellidos vascos (2014), Pride, Prejuice and Zombies eta Un monstruo viene a verme (2015) filmetarako berak idatzitako soinu banden grabaketan eta Jorge Drexlerren Madera de deriva doinuaren grabaketan, "n" proiektuaren baitan (2012); gainera, KlasikAT zikloan EOS, Ken Zazpi eta Fernando Velázquez bera bildu zituen proiektua gauzatu zuten elkarrekin; diska baten grabaketa eta bost kontzertu izan ziren. Berriki Velázquezen hainbat soinu banda biltzen dituen eta EOSrekin grabatu zuen "Concert suites. Music for films" diskoa plazaratu dute.

Contratiempo filmearen jatorrizko soinu bandaren grabaketa

Ekainaren 20an eta 21ean. Euskadiko Orkestra Sinfonikoaren egoitza, Miramon. Donostia

Fernando Velázquez (1976)
Contratiempo

Fernando Velázquez, zuzendaria
Euskdiko Orkestra Sinfonikoa

Ekainaren 18an, larunbatean, "Venezia. Italiar inspirazioak" izenburudun kontzertuak emango die amaiera Miramongo Matinéei. Euskadiko Orkestrako musikariek osatutako ganbera-talde batek italiar giroa sortzea asmo harturik, Giochino Rossini eta Antonio Vivaldiren lana ekarriko dute Miramongo egoitzako oholtzara. Proposatzen dutena iradokitzailea da oso: haien musika entzunez, entzuleria Veneziaren xarma ehuntzen duten kalezulo eta ubideek osatutako labirintoan barrena eramatea.

Egitaraua. Interpretatuko dituzten lanak dira, batetik, Rossiniren "La scala di seta. Obertura" (flauta, fagot eta klaberako) eta Bi biolin, biolontxeloa eta kontrabaxurako kuartetoa si bemol maiorrean; eta, bestetik, Vivaldiren Flauta, oboe, biolin, fagot eta baxu jarraiturako kontzertua sol minorrean (RV 105), Flauta, oboe, biolin, fagot eta baxu jarraiturako kontzertua re maiorrean (RV 94) eta "Il gardellino" deritzon 3. Kontzertua flauta, hari eta baxu jarraiturako re maiorrean.

Kontzertuan ariko diren Euskadiko Orkestra Sinfonikoko kideak dira Hélène Billard (flauta), Pascal Laffont (oboea), Stéphane Langlois (klarinetea), François Proud (fagota), Itziar Prieto eta Anne Marie Harmat (biolinak), Yann Seyrac (biola), Pascale Michaud (biolontxeloa) eta Pierre Torrent (kontrabaxua). Horien lankide ariko den Charo Indartek klabea joko du.

Miramonera autobusez. Euskadiko Orkestrak Matinéetako publikoaren esku doan jartzen duen autobus zerbitzua da Miramongo egoitzara heltzeko biderik erraz eta erosoena. 10:25etan abiatzen da Gipuzkoa Plaza 4tik eta geldialdiak egiten ditu Antso Jakituna 18 eta Madrilgo Hiribideko 34ean.

Datorren astelehenetik, hilaren 13tik, aurrera, Euskadiko Orkestra Sinfonikoak 15/16 Abonu Denboraldiarari dagozkion azken kontzertuak emango ditu. Itxiera horretan, Orkestra nazioarteko orkestra nagusienei lotutako ibilbidea duen Juraj Valcuha eslobakiarrak zuzenduko du lehenbiziko aldiz. Horrekin batera, eszenatokia partekatuko du EOSekin Jennifer Koh biolinista estatubatuarrak. Abonu Denboraldian estreinakoz, Orkestrarekin, Koh-ek Leonard Bernsteinen Serenade biolinerako kontzertua interpretatuko du; lan hori sortu zuenean, konpositoreak eginak zituen jada klasiko bilakatutako opera, musikal zein filamatako soinu-bandak, horien artean, Candide, West Side Story eta Isiltasunaren legea.

Kontzertuak izango dira 13an eta 17an Donostiako Kursaal Auditoriumean, 14an Iruñeako Baluarten, 15ean Bilboko Euskalduna Jauregian eta 16an Gasteizako Principal Antzokian.

Juraj Valcuha Orchestra Sinfonica Nazionale della Rai Torino-ko zuzendari titularra da 2009tik. Podiumean 2005. urtean egin zuen debuta, Frantziako Orkestra Nagusiaren zuzendari. Ordutik, lehen mailako taldeak zuzendu ditu, hala nola New York, Berlin eta Municheko orkestra filarmonikoak, Orchestra di Santa Cecilia eta Vienako Orkestra Sinfonikoa. Eta gorengo bakarlariak izan ditu lankide, esaterako, Yo-Yo Ma edo Arcadi Volodos. Operaren arloan, Pucciniren Madama Butterfly eta Prokofieven Hiru laranjen maitasuna operen ekoizpenak zuzendu ditu zulogunetik, Florenciako Maggio Musicale delakoan. 16/17 denboraldirako bere konprmozuen artean, azpimarrgarria da Chicagoko Orkestra Sinfonikoa zuzenduko duela lehenbiziko aldiz.

Jennifer Koh biolinista, grina eta musikaren inguruko jakin-nahia ezaugarri dituena, iradokitzaile zaizkion eta beretzat erronak diren lanak aukeratzu ari da bere bidea egiten. Bere errepertorioa aro guztiak bilduz, musika tradizionaletik garaikideraino doa, iraganak eta orainak osotasuna eratzen dutela sinesturik. Interpretatzen dituen obren arteko loturak aztertzen ditu, halaber. Horretarako, konpositore ezberdinen ahotsean artean antzekotasunak bilatzen ditu eta autore beraren piezen arteko harremanak arakatzen ditu. Jennifer Koh 2016 Urteko instrumentu Interprete izendatu du Musical America iparramerikar argitalpen ospetsuak. Sari horrek aintzat hartzen du musika klasikoarekiko hurbiltzerakoan begirada etokizuenan jarri izana, askotariko errepertorioa lantzea eta diziplina anitzekin lan kidetzan aritzea. 2015eko urrian, Minnesotako Orkestra Sinfonikoaren emandako kontzertuetan, Minneapolisen (EEBB) lelkarrekin izan ziren Juraj Valcuha eta Jennifer Koh.

Egitaraua. Serenade jotzeaz gain, Euskadiko Orkestrak Prokofieven 5. Sinfonia interpretatuko du; izan ere, Juraj Valcuha bereziki aditua da konpositore horren lanean. 1944an sortua, Bigarren Mundu Gerra pil-pilean zela, ukrainar musikariak sortutako zapi sinfonien artean diztiratsuena eta heroikoena da eta gehien interpretatzen direnen artean dago egun. Jakinarazten dizuegu, halaber, aurreikusitako Iñaki Estradaren "... laino argidun artean..." lana ez dela kontzertu hauetan interpretatuko.

Ekainaren 4an, larunbatean, ganbera-musika izango da Miramongo Matinéetan nagusi. Klasikoenetik hasi eta XX. mendeak utzitako formetarainoko ibilbidea egingo du Kaabestri taldeak. Xedea izango da fagota, biolontxeloa eta kontrabaxua instrumentu bakarlari legez aldarrikatzea. Hortaz, eskuarki orkestra sinfonikoaren baitan betetzen duten paperaren oso bestelakoa den modu batean arukeztuko dituzte: beti bigarren mailako lekuan aritzen diren instrumentuok erabateko protagonista bihurturik entzuteko aukera izango da. Modu horretan hobeto hautemango da horietako bakoitzaren tinbrea.

Egitaraua. Kaabestri taldeko kideek barrokoko, klasizismoko eta XX. mendeko partiturak hautatu dituzte. Horietan uztartuko dira ganbera-musika hutsena, hari-kuarteto klasikoaren eskutik; barrokorik birtuosoena, biolontxelo zein kontrabaxuak osatutako duoarekin; edo gerra-garaian (1942) sortutako XX. mendeko molde berriak, fagotak joko dituenak, hari-boskoteak lagunduta.

Kaabestri Euskadiko Orkestra Sinfonikoko lau kidek bestelako errepertorioak jorratzeko zuten interesetik sortu zen. Jatorrizko kideak dira Igor Torre eta Óscar López, biolinak;; Arkaitz Martínez, biola; eta Jon Larraz, biolontxeloa. Askotariko proiektuetan esku hartzen dute; esaterako, soinu-banden grabaketak, haurrentzako ikuskizunak, BBK Live jaialdia eta abar. Horretarako, musikaren beharren arabera moldatzen dute taldearen organikoa eta musikari ugari dituzte lankide. Oraingoan, François Proud (fagota) eta Victor Bogdanov izango dituzte lagun. Biak ala biak Euskadiko Orkestra Sinfonikoko kideak dira.

Miramonera autobusez. Euskadiko Orkestrak Matinéetako publikoaren esku doan jartzen duen autobus zerbitzua da Miramongo egoitzara heltzeko biderik erraz eta erosoena. 10:25etan abiatzen da Gipuzkoa Plaza 4tik eta geldialdiak egiten ditu Antso Jakituna 18 eta Madrilgo Hiribideko 34ean.

Bihar ostirala, Euskadiko Orkestrak Santanderrera bidaia egingo du, Kantabriako Jaialdi Jauregiaren programazioaren baitan musika sinfonikoari emandako atalean aritzeko. Oliver Díazek zuzenduta, Miguel Trápaga kantabriar gitarrista izango du lagun. Egitarauan, Claude Debussyren Fauno baten siestaren preludioa; Joaquín Rodrigoren Concierto de Aranjuez, Frank Martinen Guitare eta Leo Brouwer-en Concierto de Benicassim.

Miguel Trápaga gitarrista kantabriarrak lankide izan ditu Moskuko hari-laukotea, Lola Casariego mezzosopranoa, Cecilia Lavilla Berganza sopranoa, Óscar Herrero gitarrista, Alexander Detisov biolinista, Óliver Díaz, Miguel Roa, Igor Palkin, Theodore Kuchar zein Leo Brouwer orkestra-zuzendariak eta abar. Gainera orkestra ugarirekin aritu da; horien artean, Porto Alegreko Fundarte Orkestra (Brasil), Thailand Philarmonic Orchestra, Canberra Symphony Orchestra , Real Orquesta Sinfónica de Sevilla, Orquesta Ciudad de Gijón, Sinfónica de Madrid, ORCAM, Ukrainako Orkestra Nazionala eta Venezuelako Orquesta Sinfónica Simón Bolívar. Bakarlari jarduteaz gain, irakaslea ere bada Madrilgo Goi Mailako Musika Errege Kontserbatorioan.

Oliver Díaz Madrilgo Teatro de la Zarzuela antzokiko musika-zuzendaria eta Barbieri Symphony Orchestra delakoaren zuzendari titularra da. Orkestra-zuzendaritzako "Bruno Walter" beka jaso duen espainiar bakarra da. Horri esker, New Yorkeko Juilliard School of Music ospetsuan ikasi ahala izan zuen, Otto Werner Mueller, Charles Dutoit edo Yuri Temirkanov-en mailako maisu handiekin. Bere errepertorioak hartzen ditu barrokotik egungo musikaraino eta Espainia, Portugal, Frantzia, Alemania, Errumania, Estatu Batuetan eta Hegoamerikan zuzendu ditu kontzertuak.

Maiatzaren 21ean, larunbatean, Euskadiko Orkestra Sinfonikoko kideek osatu Hemiola hari-laukotea protagonista izango da Miramongo Matinéen emanaldian. Orkestraren baitan burutzen duten lan sinfonikoarekin batera, musikariek ganbera-musikako interprete gisa jarduteko euskarri egokia Miramongo Matinéeak. Horietan biltzen diren entzuleentzat, ikertu, hautatu eta egitarau bereziak diseinatzen dituzte. Oraingoan, Hemiolak F. Mendelssohn eta W.A. Mozarten hari-kuarteto bana aurkezten du. Lehena konpositorea opera baten sorkuntzan buru-belarri ziharduela sortu zen eta bigarrena aurrez sortutako konposizio-materialen berrerabilpenaren eredu da.

Matinéearen izenburua, "Egia al da?", Felix Mendelssohnek bere 2. Hari-kuartetoa, opus 13, larunbatean entzungai izango dena, idazteko erabilitako lied-aren izenburua da jatorriz. Bertso hori ustez Johann Heinrich Voss alias J.G.Droysen-ek edo, ziur aski, Mendelssohnek berak idatzitako "Frage" (Galdera) poeman agertzen da; poema hori baliatu zuen musikagileak 1829 eta 1830 urte bitartean sortutako lieder-etako bat konposatzerakoan. Egitaraua osatzen duen beste partitura Wolfgang Amadeus Mozarten 6. Hari-kuartetoa, KV 159 da. 1773an Milanen sortu eta estreinatua, Milandar kuartetoak izenez ezaguna den sei kuarteto-sortako bosgarrena dugu. Milanen Lucio Silla operan lanean ari zela idatzi zituen kuarteto horiek.

Hemiola laukotea dira Raquel Cortinas eta Larraitz Oiarzabal, biolinak; Natacha Dupuy, biola, eta Gabriel Mesado, biolontxeloa.

Miramonera autobusez. Euskadiko Orkestrak Matinéetako publikoaren esku doan jartzen duen autobus zerbitzua da Miramongo egoitzara heltzeko biderik erraz eta erosoena. 10:25etan abiatzen da Gipuzkoa Plaza 4tik eta geldialdiak egiten ditu Antso Jakituna 18 eta Madrilgo Hiribideko 34ean.

Maiatzaren 19tik 25era Euskadiko Orkestra Sinfonikoa bere zuzendari printzipal gonbidatuaren gidaritzapean ariko da berriz ere. Kontzertu horietan lagun izango du gainera Alban Gerhardt biolontxelo-jotzailea. Egun instrumentu horren erreferentetzat jotzen den alemaniar musikariak eta Orkestra estreinakoz izango dira lankide. Emanaldi horietarako egitarauan, D. Shostakovitchen Biolontxelorako 2. kontzertua eta J. Brahmsen 3. Sinfonia.

Kontzertuak izango dira maiatzaren 19 eta 20an Donostiako Kursaalean, 23an Gasteizko Principal Antzokian, 24an Iruñeako Baluarten eta, azkenik, hilaren 25ean Bilboko Euskalduna Jauregian.

Alban Gerhardtek (Berlin, 1969) 1991. urtean eman zuen bere nazioarteko bakarlari-ibilbide oparoaren lehenbiziko urratsa, Berlingo Orkestra Filarmonikoa eta Semyon Bychkovekin. Alde batera utzi zuen horrela orkestra handi bateko kide izateko bere betiko asmoa, betiere free-lance bakarlari bihurtzeak emango zion askatasunaren aldeko hautua eginez. Ordutik iragandako hogeita bost urteetan Gerhardtek argiki erakutsi ditu, mundu osoko aretoetan, bere musikaltasun bizia, oholtza gainean sendotasuna eta jakinmin artistiko aseezina; bide horretan lagun izan Royal Concertgebouw, Londresko Orkestra Filarmonikoa, NHK edo Cleveland, Philadelphia zein Chicagoko sinfonikoak eta baita Kurt Masur, Christian Thielemann, Christoph Eschenbach, Esa-Pekka Salonen nahiz Vladimir Jurowski bezalako zuzendariak. Bere helburua da, batetik, obra ezagunei aire berria ematea eta, bestetik, pasatako garaietako edo egungo errepertorio berriak bilatzea. Musika klasikoaren inguruko ohiko aukerak gainditzeko asmoz, eguneroko tokietatik atera eta askotariko entzuleei helarazteko gogor lan egiten du; horren adierazgarri, Deutsche Bahn, alemaniar tren konpainia nagusiarekin lankidetza. Alban Gerhardtek egindako grabaketa ugari izan dira sarituak; merezitako en artean dago 2015eko ICMA saria (musika garaikidearen sailean) . 1710eko Matteo Gofriller biolontxelo bat jotzen du.

Master class-a, Aula Jordá Gelaren baitan. Egunotan Euskadiko Orkestrarekin aritzearekin batera, Alban Gerhadtek master class bat emango dio Musikeneko biolontxelo ikasle-talde bati. Maiatzaren 20an, ostiralean, izango da, Orkestraren Miramongo egoitzan. Topaketa hori Musikenek eta Euskadiko Orkestra Sinfonikoak 2012tik lankidetzan garatutako Aula Jordá Gelaren programazioaren zati da.

Andrey Boreyko apirilaren amaieran Baltimoreko Orkestra Sinfonikoa lehenengo aldiz zuzendu ondoren eta, duela egun bakar batzuk, Torontoko Orkestra Sinfonikoarekin Shostakovitchen beste lan handi bat, Babi Yar sinfonia ezaguna interpretatu ostean itzuli da gurera.