Urriaren 30etik azaroaren 5a bitartean, Euskadiko Orkestra Sinfonikoak bere Abonu Denboraldiko kontzertu-programa berri bat burutuko du. Kontzertu hauetan Luis de Pablo konpositorearen Pensieri, flauta eta orkestrarako rapsodiaren estreinazko emanaldia izango da osagai nagusia. Erabateko estreinaldi hau joan zen urtarrilan 85 urte bete zituen bilbotar sortzaileari omenaldia izango da. Gainera, Orkestrak luxuzko bi musikari izango ditu lankide: batetik, José Ramón Encinar; musika garaikidean aditua den zuzendari honek 2014an Biennale di Venezia ospetsuan debuta egin zuenean zuzendu zuen Orkestra; eta bestetik, Roberto Fabbriciani flautista: Luis de Pablok lankide eta lagun handi honentzat idatzi zuen Pensieri, hain zuzen ere.

Hirugarren Abonu-programa honi dagozkion kontzertuak izango dira urriaren 30ean Donostiako Kursaalean, azaroaren 2an Gasteizko Principal Antzokian, 3an Iruñeako Baluarten, 4an Bilboko Euskaldunan eta hilaren 5ean, berriz ere, Donostiako Kursaalean.

Jakiunderekin lankidetzan, lehenbiziko kontzertuaren aurretiko entsegu orokorraren ondoren, urriaren 30ean Luis de Pablo ikasle talde batekin bilduko da erakunde horren "Topaketak" egitasmoaren baitan.

Pensieri, flauta eta orkestrarako rapsodia 2013 eta 2014 urte bitartean konposatu zuen De Pablok. Konpositoreak berak zera esan du partitura honen inguran: "Musika-lan hau adiskidetasunetik eta mirespenetik sortua da, Roberto Fabbriciani flautista handiarenganako zein bere emazte Luisellarenganako [Botteon] adiskidetasun nahiz mirespenetik, alegia. Ez da Robertorentzat sortu dudan lehenbiziko lana: aurrez ere eskaini izan diot flauta bakarlarirako sortutako beste hainbat. Pensieri rapsodia bat da, hau da, birtuosismoa azpimarratzen duen pieza askea; izan ere, merezi du berau interpretatuko duen flautistaren trebetasun tekniko eta artistikoak kontuan izatea. Partitura lau zati edo "pentsamendutan" banatzen da: "Sekretua", "Bakartia", "Fugak" eta "Misteriotsua". Izenburuek egilearen malenkonia iradoki dezakete apika, baina ez da horrela: "Lana ospakizun gisa idatzi nuen; umorez eta, aldi berean, misterioz beteta dago". Izenburuaren inguruan honako gogoeta egiten du De Pablok: "bakarlaria da pentsatzen duena, orkestrarekin pentsalariaren goibeherak milaka modu ezberdinetan iruzkintzen dituen kolore anitzeko solasaldia eraikita". Orkestra handirako idatzitako obra honetan, flauta-mota ezberdinak etengabe agertzen dira (bakarlariak lau mota erabiltzen ditu: zehar flauta, piccoloa, altua eta kontralta).

Euskadiko Orkestrak 1983an interpretatu zuen lehenbiziko aldiz Luis de Pabloren obra bat eta, ordutik, hauen ibilbideak sarritan gurutzatu izan dira. Esaterako, aurrez Orkestrak estreinatuak dira Impromptus (1991) eta Danzas secretas (2008), Luis de Pablok Orkestraren beraren enkarguz idatziak. Gainera, Orkestrak bere beste hainbat lan interpretatu du, bai Abonu Denboraldian eta baita bestelako aretoetan ere (Madrilgo Auditorio Nazionalean eta La Biennale di Venezian, adibidez). Abangoardiako musikaren nazioarteko sortzaile honen ekoizpenari iraupena emateko asmoz, Orkestrak De Pabloren obrari eskaini zion Euskal Konpositoreen Bildumako zenbakietako bat (Claves, 2008).

Mozarten Txirula magikoa operaren Obertura eta Fallaren Hiru puntako kapela, kontzertuetako egitaraua osotzeko. Lehena opera errepertorioko oberturararik ezagunena da, ziur asko. Bigarrena Dhiagileven Errusiar Balletentzako idatzi zuen Fallak eta berau interpretatzeko Orkestrak Lola Casariego izango du lankide. Oviedoar soprano hau Raquel Lojendioren ordez ariko da, honek, Orkestrari ez dagozkion arrazoiengatik, bertan behera utzi baitu bere esku-hartzea. Lola Casariego estreinakoz ariko da Euskadiko Orkestraren Abonu Denboraldian.

Hari instrumentuentzat lehenengo master ofiziala, Musikenek Euskadiko Sinfonikoaren laguntzaz sortua, errealitate da. Sarrera probak gainditu ondoren, biolin, biola eta biolontxelo hamar ikaslek aktiboan dauden profesional handiekin ikasiko dute eta praktika ordainduak egingo dituzte euskal orkestran, bizitza profesionalean murgilduz. Ikasleek ezagutu dute jada Miramar Jauregia, egun Euskal Herriko Goi Mailako Ikastegiaren egoitza, eta lehenengo bilera izan dute masterraren arduradunarekin.

Euskadiko Orkestra Sinfonikoak, Donostiako Orfeoiak, Andra Mari Abesbatzak, Easo Abesbatzak eta La Salle Anaidiak, beste hainbat erakunderen laguntzarekin, Tomás Aragüés Bernad konpositorearen omenez kontzertu bat antolatu du, hark 80 urte betetzen dituen honetan. Euskal musika garaikideko sortzaile emankorrenetakoa dugun honi merezitako omenaldia eta eskertza adierazteko eskainiko den kontzertua urriaren 22 ostegunean izango da, Donostiako Kursaal Auditorioan, arratsaldeko 20:00etan.

Eszenatokian aipatu lau erakundeak bilduko dira. Diego Martin Etxebarria eta José Antonio Sáinz Alfaroren zuzendaritzapean, Aragüés Bernad maisuaren Min eresia, Sinfonía versus ochenta obrako Te Deum eta Euskal Requiema interpretatuko dituzte, azken honetan Ainhoa Zubillaga, Xabier Anduaga eta Pablo Ruizen ahots bakarlariak lagun dituztela. Nabarmentzekoa da Euskal Requiemaren bietako ahotsen abesbatzarako bertsioa estreinatuko dela eta Sinfonía versus ochenta, bere azken sinfoniaren azken zatia den Te Deum-aren erabateko estreinaldia izango dela. Tomás Aragüés Bernad berak bere obra nabarmen hauen interpretazioaz gozatzeko aukera izango du.

Miramongo Matinéeak Euskadiko Orkestra Sinfonikoko kideen musika jardunaren dibertsifikaziorako euskarri dira funtsean. Ildo horretatik, urriaren 17 larunbatean Orkestrako hari-taldeetako zenbait musikarik eta Aitzol Iturriagagoitia biolinistak osatutako Leipzig Oktetoak, F. Mendelssohnen Harientzako oktetoa, opus 20 interpretatuko dute.

Egitaraua. Mendelssohnek erromantizismo goiztiarraren irudi irrifartsua eskaintzen digu Oktetoan. Ganbera-musikaren eta orkestra-musikaren arteko nahastea izatean datza partitura honen ekarpen berriztatzaileenak. Obraren edizioaren hitzaurrean jasotako oharrean, konpositoreak zera dio: "Okteto hau estilo sinfonikoz jo behar dute instrumentu guztiek. Piano zein forteak zorrotz betetzeaz gain, izaera honetako piezatan ohikoa dena baino gehiago azpimarratu behar dira". Horren aurretik, Oktetoaren preludio gisa, Aitzol Iturriagagoitiak B. Bartoken Biolin bakarrerako sonatako bi mugimendu interpretatuko ditu: Ciaccona eta Fuga. 1944. urtean Yehudi Menuhin biolinistaren eskariz sortua, birtuosismo handiko obra hau bakarlari ezagun honen errepertorioko pieza garrantzitsuenetako bat bihurtu zen.

Aitzol Iturriagagoitia eibartarra, orkestra nabarmenekin bakarlari aritzeaz gain, Euskadiko Orkestrako kontzertino gonbidatu gisa ere jarduten da eta irakasle da Leipzigeko Hochschule für Musik und Theater "Felix Mendelssohn-Bartholdy" ikastegian eta Musikenen.

Miramonera autobusez. Euskadiko Orkestrak Matinéetako publikoaren esku doan jartzen duen autobus zerbitzua da Miramongo egoitzara heltzeko biderik erraz eta erosoena. 10:25etan abiatzen da Gipuzkoa Plaza 4tik eta geldialdiak egiten ditu Antso Jakituna 18 eta Madrilgo Hiribideko 34ean.

Sarrerak. Matinée guztietarako sarrerak www.euskadikoorkestra.eus eta www.kutxabank.es webguneetan eta Kursaal zein Orkestraren egoitzako leihatiletan eros daitezke. 7 euroko prezio bakarra dute.

Urriaren 13 asteartetik larunbata hilak 17ra bitartean, Euskadiko Orkestra Sinfonikoak bere Abonu Denboraldiko bigarren kontzertu-programa eskainiko du ohiko lau hiriburuetan. Boris Belkin biolinista ospetsua Karen Gomyoren ordez ariko da kontzertu hauetan, honek arazo fisikoak direla eta bertan behera utzi baititu Euskadiko Orkestrarekin hitzartutako kontzertuak. Belkinek gure zuzendari titular Jun Märklekin batera: Shostakovitchen Biolinerako 1. kontzertuari egingo dio aurre. Egitaraua osatuz, Stravinskyren Petroushka eta Fallaren Azti-maitasuna obrako Suaren dantza ezaguna izango dira entzungai.

Kontzertuak urriaren 13 asteartean Gasteizko Principal Antzokian, 14an Iruñeako Baluarten, 15 eta 16an Donostiako Kursaalean eta, amaitzeko, urriaren 17 larunbatean Bilboko Euskaldunan izango dira.

Boris Belkin (Sverdlovsk, Errusia, 1948) errusiar eskolako kide nabarmena da. Bere ibilbide luzean zehar, mundu osoan barrena, orkestra ospetsuenekin batera aritu da biolin bakarlari; orkestra horien artean, Bostongo Orkestra Sinfonikoa, New Yorkeko Orkestra Filarmonikoa, Pittsburgh, Berlin, Israelgo Orkestra Filarmonikoa, Los Angelesko Orkestra Filarmonikoa, Bayerischer Rundfunk, Concertgebouw, eta abar. Lehen mailako zuzendariekin aritu da: Bernstein, Ashkenazy, Mehta, Maazel, Muti, Ozawa, Temirkanov, Dohnnanyi, Dutoit, Rattle, Haitink, ... Udan maisu-eskolak eman ohi ditu Sienako Accademia Chigiana entzutetsuan eta bere ikasle izana da Janine Jansen biolinista famatua. Boris Belkin 1993an aritu zen Euskadiko Orkestraren Abonu-Denboraldian, Gabriel Chmuraren zuzendaritzapean. J. Sibeliusen Biolierako kontzertua interpretatu zuen orduan.

Shostakovitchen Biolinerako 1. kontzertua instrumentu honetarako idatzitakoen artean fisikoki zorrotzenetakoa dugu; izan ere, bakarlariak ia ez dio jotzeari uzten 35 minututan. Partitura honek, konpositorearen aro bereko beste hainbatek bezala, haren lan sinfonikoen ehundura-aberastasuna eta bakarlariak adierazitako barneko ahotsa uztartzen ditu. Kontzertuaren bigarren zatian, Stravinskyk bere Petroushkaren gainean 1947an egindako bertsioa interpretatuko du Orkestrak; egileak piano eta orkestrarako kontzertu gisa irudikatutakoa balet bilakatu zen Serge Diaghilev, Errusiar Baleten sortzailearen iradokizunari jarraiki, eta honela estreinatu zen 1911 urtean. Eta emanaldia bukatzeko, Manuel de Fallaren Azti-maitasuna musika-lanaren zatirik ezagunena: Suaren dantza.

Sarrerak 7 eurotik gora salgai. Kontzertu hauetarako sarrerak www.euskadikoorkestra.eus webgunean, aretoetako leihatiletan eta beste ohizko salmenta bideak erabiliz eros daitezke.

ICMA 2016 sariak Donostian hartuko dituzten erakundeak, Donostia / San Sebastián 2016 Europako Kultur Hiriburua eta Euskadiko Orkestra, eta ICMAko presidente Remy Frank Orkestraren egoitzan bildu dira gaur ekitaldiaren prestaketa lanetan aurrera egiteko.

Apirilaren 1ean Donostiako Kursaal Auditorioan izango diren ICMA Awards sari banaketa gala eta ondorengo kontzertuak Donostia eta, hedaduraz, Euskadi musika klasikoaren europar erdigune bilakatuko dituzte 2016 udaberrian.

Urtero 15 sari banatzen dira CD eta DVD formatuetan argitara emandako ekoizpen onenen artean (musika barrokoa, abesbatzarako musika, sinfonikoa eta abar). 2016 sari hauetarako hautagaitzen proposamenak jasotzeko epea urriaren 31an amaitzen da.

Gainera, mundo osoko artisten ibilbideak ere saritzen ditu epaimahaiak. Musika ibilbide osoari saria emateaz gain, urteko artista, errebelazioa den artista edo urteko disko etxea ere saritzen dira. 2016ko edizioko sarituak urtarrilaren 21ean emango ditu ezagutzera epaimahaiak berak.

Epaimahaia 13 herrialde ezberdinetako musika kritikok osatzen dute, musika klasikoaren alorrean erreferentziazkoak diren honako 17 komunikabide paperezko zein digitalen ordezkariak: Andante (Turkia), Classic Radio eta Rondo Classic (Finlandia), Crescendo (Belgika), Fono Forum (Alemania), Gramofon (Hungaria), IMZ (Austria), Kultura (Errusia), MDR-Figaro (Alemania), Musica (Italia), Musik & Theater (Suitza), Orpheus Radio (Errusia), Opera (Erresuma Batua), Pizzicato eta Radio 100,7 (Luxemburgo), ResMusica (Frantzia) eta Scherzo (Espainia).

Lehenbiziko sari banaketa ekitaldia Tampere-n (Finlandia) izan zen 2011. urtean eta Tampereko Orkestra Filarmonikoak antolatu zuen. Hurrengoa Nantes-en izan zen, Orchestre National des Pays de la Loire orkestrak antolatua. 2013. urtean, berriz, Milanen izan zen ekitaldia, Orchestre Sinfonica di Milano Giuseppe Verdi-k sustatuta. 2014an Varsovian izan zen, Ludwig van Beethoven Aste Santuko Jaialdiaren baitan eta aurten, berriz, Ankaran, Bilkent Symphony Orchestra-ren Auditoriumean.

Abian da Miramongo Matinéen 2015/2016 denboraldia eta lehenbiziko emanaldirako Euskadiko Orkestraren egoitzara etorri eta musika koral handiaz gozatzea da luzatzen dugun proposamena: KUP Taldeak eta Kaabestri Ensemble ganbera taldeak Johann Sebastian Bachen kantatetara hurbilduko gaituzte, hauetako lau interpretatuz. Errepertorio zail bezain interesgarri honi aurre egiteko, gainera, Miren Urbieta sopranoa, Marta Infante mezzoa, Xabier Anduaga tenorea eta Mikel Zabala baxua ariko dira bakarlari lanetan eta Borja Rubiñosek joko du organoa. Hirtzordua, irailaren 26 larunbatean, goizeko 11:00etan Euskadiko Orkestraren Miramongo egoitzan.

Egitaraua. Gaztarako konposizioak dira, 1704 eta 1714 urte bitartean idatziak. Baliteke lehenbizikoa, BWV 131 (Sakontasunetik erregutzen dut, Jauna, zuretzat) Bachek sortutako lehenengo kantata izatea; bigarrena, BWV 150 (Zuretzat, oi Jauna, irrika dut) paregabea da duen orkestrazio urriagatik eta abesbatzaren nagusitasunagatik; hirugarrena, aldiz, BWV 182 (Ongietorria, zeruko erregea), gainerakoak baino beranduxeago sortua da, Bachek Weimarren Konzertmaister lanetan emandako garaikoa; amaitzeko, BWV 196 kantata (Jaunak gogoan gauzka) "lan labur, eguzkitsu eta jaigiroko"tzat hartua izan da.

KUP Taldea + Kaabestri Ensemble. KUP ahots taldea 2003 urtean sortu zen Gabriel Baltésen zuzendaritzapean. Bai teknikoki duten zailtasunagatik eta baita musikaren historian duten garrantziagatik obra nabarmenak interpretatzen eskarmentu handidun 30 kantarik osatzen dute. Atal instrumentalari dagokionez, ardura Euskadiko Orkestrako hainbat kidek osatutako Kaabestri Ensemblerena izango da. Talde egokikorra da Kaabestri eta honek askotariko errepertorioa lantzea ahalbidetzen dio, eszenatoki anitzetan: San Telmo Museoa, Donostia 2016ko egoitza, Zinemaldia edo BBK Live, esaterako. Besteak beste, lankide izan ditu Xabier Zabala, Glen Hansard edo Landarbaso Abesbatza eta Malandain Ballet Biarritz.

Miramonera autobusez. Euskadiko Orkestrak Matinéetako publikoaren esku doan jartzen duen autobus zerbitzua da Miramongo egoitzara heltzeko biderik erraz eta erosoena. 10:25etan abiatzen da Gipuzkoa Plaza 4tik eta geldialdiak egiten ditu Antso Jakituna 18 eta Madrilgo Hiribideko 34ean.

Sarrerak. Matinée guztietarako sarrerak www.euskadikoorkestra.eus eta www.kutxabank.es webguneetan eta Kursaal zein Orkestraren egoitzako leihatiletan eros daitezke. 7 euroko prezio bakarra dute.

Euskadiko Orkestra Sinfonikoak bihar irailaren 24ean abiatuko du Gasteizko Principal Antzokian bere 2015/2016 Abonu Denboraldia. Eta hasteko Euskal Herrian lehenbiziko aldiz interpretatuko den obra handi bat dakar Orkestrak: Sibeliusen Kullervo sinfonia korala. Aukera ezinhobea da konpositorearen unibertso finladiarrean murgiltzeko, haren jaiotzaren mendeurrena betetzen den honetan. Ari Rasilainen maisuaren zuendaritzapean, Orkestrak Marjukka Tepponen zein Markus Nieminen bakarlariak eta Xalbador Rallok zuzentzen duen Easo Abesbatza izango ditu lagun.

Euskadiko Orkestra bihar osteguna, hilak 24, Gasteizko Principal Antzokian, 25ean Iruñeako Baluarten, 28 eta 29an Donostiako Kursaalean eta 30ean Bilboko Euskalduna Jauregian ariko da.

Egitaraua. Kullervo finlandiar musikaren kondairazko sorkuntza da. Sibeliusek 25 urterekin idatzi zuen, lau interpretazio oso izan ziren 1892-93an eta, ostean, kaxoi batean gorde zuen 1957. urtera arte. Gaztetan idatzitako lanen artean ukigabe geratutako bakarrenetakoa dugu, Sibeliusek ia bere lehen ekoizpen guztia suntsitu edo sakonki berrikusi baitzuen. Sinfonia koraltzat joa, Kullervo lanak Kalevala Finlandiako olerki epiko handiaren pertsonai izenkidearen istorio tragikoa azaltzen du. Hirurogeita hamar minutuko iraupena izanik, bere tamaina eta hizkuntzak eragiten dituen arazoak direla eta, oso gutxitan entzun ohi da Finlandiatik kanpo. Orkestrak hango hiru espezialista handiren laguntza izango du: Marjukka Tepponen sopranoa, Markus Nieminen baritonoa eta Ari Rasilainen zuzendaria. Beraiekin batera, Easo Abesbatzako gizonezko ahotsak. Aurrez Finlandia izango da entzungai; 1889. urtean Finlandiaren independentziaren aldeko ikur bilakatuta, poema sinfoniko honek nazioarteko ospea eman zion Sibeliusi.

2015/2016 Abonu Denboraldia. Orkestrak kontzertu gehiago eskainiko ditu Denboraldi honetan. Honela, iragan denboraldietan emandako abonu kontzertu kopuru berbera eskainiko du, bultzada berria emanaz denboraldiari eta harreman estuagoa sendotuz Bilbo, Donostia eta Iruñeko zikloekin. Halaber, zuzendari eta bakarlari berriak ekartzeko apustua egin du. Gehienak izen berriak dira euskal eszenatokietan, zenbaiten kasuan baita estatuan ere, baina guztiek ere ospe eta entzute handia lortu dute nazioartean. Kontrastea izango da Denboraldi honetako programen ezaugarri nagusia: kontrastea musikagile, lan, estilo eta formatu ezberdinen artean. Orkestrak eskainiko duen musika-katalogo zabalean, errepertorio sinfonikoaren funtsezko lanez gain, musika garaikidea eta eszena sartuko ditugu ere.

Bihartik, hilak 12tik aurrera jaso ahalko dira, Euskadiko Orkestra Sinfonikoak eta SGAE Fundazioak antolatuta, Zinemaldiaren baitan Euskadiko Orkestrak irailaren 19an (12:00etan) Donostiako Belodromoan eskainiko duen filmetako soinu-banden kontzerturako sarrerak.

Sarrera doakoa da eta beharrezkoa izango da aurrez gonbidapena jasotzea, irailaren 12tik 18ra, Zinemaldiak Kursaal Elkargunean eta Okendo Plazan dituen informazio guneetan, 9:00etatik 20:00etara eta 10:00etatik 20:00etara, hurrenez hurren; eta baita Donostia Turismoa bulegoan, astelehenetik larunbatera 9:00etatik 20:00etara eta igandean, aldiz, 10:00etatik 19:00etara. Kontzertu egunean sarrerarik balego, Belodromoan jaso ahalko dira.