Historia eta kondairaren arteko erdi bidean, Gaetano Donizzetiren Lucrezia Borgia operak irekiko du OLBEren denboraldia, datorren urriaren 22an. Italiar konpositorearen lanik nabarmenetakoa, operak Victor Hugoren izenburu bereko obra du iturburu, italiar noble ezaguna oinarri duena. 15 urte igaro dira opera hori Bilboko operan azkenezkoz antzeztu zenetik. Urriare n22an abiatuta, opera ikusgai izango da, halaber, 25ean, 28an eta 31n, Bilboko Euskalduna Jauregian.

Kantari-talde handiak lirikako bi izar handi ditu buru: Elena Mosuc, egun soprano gailenetakoa, eta Celso Albelo; horrek berriki arrakasta itzela lortu du Vienan eta Metropolitanen. Gainera, OLBEn debuta egingo dute Marko Mimica eta Teresa Iervorlinok.

Zulogunean, errepertorio hau oso ondo ezagutzen duen José Miguel Pérez-Sierrak zuzenduko du Euskadiko Orkestra Sinfonikoa. Duela bi denboraldi Puritani gogoangarria eszenaratu ostean, berriz ere elkarrekin ariko dira Pérez-Sierra, Mosuc eta Albelo. Ikusgai izango den bertsioa Bergamoko Antzokiaren eta Sassariko Antzokiaren ekoizpena da. Izaera klasikoduna, gorpuzduna eta dotorea, jauregiko barnealdea irudikatzen du. OLBEn estrainezkoz jardungo duen Francesco Bellotto da egilea.

Urriaren 8 larunbatean, goizeko 11etan, Euskadiko Orkestra Sinfonikoaren egoitzak Miramongo Matinée berri bat hartuko du berean. Orkestraren ganbera zikloaren emanaldi berri horretan Haydn, Mozart eta Bach musikagile ezagunek hari laukote eta flautarako idatzitako hiru pieza izango dira entzungai, EOSeko kideek osatutako Ensemble Familian taldearen eskutik. "Udazkeneko Matinéea" izenburudun kontzertuak programazioan iragarritako "Américas" emanaldia ordezkatuko du.

Larunbat goizeko musika-saioak Miramongo Matinéen errora jotzen du berriz ere: Euskadiko Orkestrako kideek, errepertorio sinfonikoa alde batera utzita, bestelako musikak jorratzeko aukera izan dezatela, alegia. Horrela aitortzen du Ensemble Familian taldeak ere egitarauari oharretan: "Euskadiko Orkestra Sinfonikoko kide diren heinean, musikari hauek errepertorio handiko obrak lantzen dituzte heuren bizitzan zehar. Jardun hori oso aberasgarria bada ere, espirituarentzako etengabeko elikagai hura ez da nahikoa musikarien arima asebetetzeko. Maite dituztenen artean, lagun zein senitartekoekin aurrera darraite bilatze-prozesuan. Honenbestez, "Familian" taldeak une kutun bat partekatzeko gonbidapena luzatzen dizue, Haydn, Mozart eta Bachen musika abiapuntu hartuta". Une kutun horretarako aukeratutako musikalanak dira Haydnen Divertimentoa sol maiorrean flauta, biolin eta biolontxelorako, Mozarten Flautadun hari-kuartetoa re maiorrean eta Bachen Orkestrarako 2. suitea si menorrean (Obertura si menorrean).

Ensemble Familian dira Hélène Billard-Alirol flautajotzailea, Nathalie Dabadie eta Cristina Vértiz biolinistak eta Justyna Janiak biola (guztiak Euskadiko Orkestra Sinfonikoko kideak), eta baita Rachel Seyrac biolontxelojotzailea ere.

Urriaren 3 astelehenean, bere titular Jun Märklek zuzenduta, Euskadiko Orkestra Sinfonikoak 16/17 Abonu Denboraldia abiatuko du; ohiko lau hiriburuetan emango duen 35. Denboraldia izango da. Irekiera programak proposatzen ditu Orkestrak bere kideetako bati eskatutako obraren erabateko estreinaldia, Toshio Hosokawa japoniarraren lan bat eta Carl Orffen Carmina Burana ezaguna, azken horretan Orkestrarekin batera ariko dira Donostiako Orfeoia, Susanne Elmark sopranoa, Carlos Mena kontratenorra eta Peter Schöne baritonoa.

Kontzertuak. Urriaren 3an Gasteizen izango den kontzertuaren ondoren, Orkestra izango da 4an Iruñeako Baluarten, 5ean Bilboko Euskaldunan eta, amaitzeko, urriaren 7an eta 8an Donostiako Kursaalean.

ESTREINALDIA: bere historian lehenbiziko aldiz, Euskadiko Orkestrak bere kideetako bati eskatutako obra bat estreinatuko du. Fanfarria #3308 izango da Orkestrak denboraldi berrian interpretatuko duen lehenengo musikalana. Orkestrak Xabier Sarasari (Donostia, 1969) eskatutakoaren erabateko estreinaldia izango da; Xabier EOSko tronpajotzailea da duela 25 urte eta konpositorea ere bada. Metal eta perkusiorako idatzia, eta Coplanden Fanfare for the Common Man oinarri hartuta, Sarasak bere atril-lagunak aintzat hartuta konposatu du Fanfarria. Horrek izaera berezia ematen dio. Sortzailearen hitzetan, "jada ez dira soilik tronpa edo flautak; Mario, Salvador, Peter, Bruno, Oihana edo Carlos dira".

OROITZAPENA: Meditation. To the victims of Tsunami obrarekin omentzen ditu Toshio Hosokawak (Hiroshima, 1955) 2011ko martxoan Japoniako kostaldearen zati bat suntsitu zuen tsunamiak eragindako biktimak. Hosokawaren ekoizpen sinfonikoa lehenbiziko aldiz iritsiko da Euskadira. Japoniar musikagilea azken hamarkadatan sortutako konpositore gailenetakotzat hartzen da. Toru Takemitsu eta Isang Yunen ikasle, hirurogeita hamarreko azken urteotan sortutako lehenengo obrei esker jada Ekialdearen eta Mendebaldearen arteko bidegurutzean ahots nahasezin gisa nabarmendu zen. Donostia 2016 eta EU-Japan Fest erakundearen laguntza duen interpretazio hori izango da Hosokawa Proiektuaren lehenbiziko mugarria; egitasmo hori osatzen duten gainerako jarduerak dira japoniarraren beste zenbait lan aurkeztea Abonu Denboraldian eta Naxos nazioarteko disko etxearekin grabatuko den monografikoa.

OSPAKIZUNA: Carmina Burana kantata eszenikoarekin iritsiko da. Carl Orffen partitura ezaguna interpretatzeko, eszenatokian bilduko dira Euskadiko Orkestra Sinfonikoa, Donostiako Orfeoia, Susanne Elmark danimarkar sopranoa, Carlos Mena gasteiztar kontratenorra eta Peter Schöne baritonoa. Orkestrak lagun izango duen bakarlari hirukoteak eskarmentu handia du XX. mendeko errepertorioan eta, Orfeoiak ongi ezaguntzen du obra hori; izan ere, 1960. urtetik dago bere errepertorioan eta ordutik ezin konta ahala alditan abestu du.

Larunbatean, hilak 24an abiatuko dira Miramongo Matinéeak. Euskadiko Orkestra Sinfonikoaren ganbera zikloa den horrek 25. urteurrena ospatuko du datozen hilabeteotan. Denboraldi honetako lehenbiziko kontzertua hasiera izango da zentzu bikoitzean: Miramongo Matinéen txanda berri baten abiapuntua izango da eta, era berean, Euskadiko Orkestrako biolinista izandako Carlos Ocaña musikariaren orkestra zuzendari ibilbidearen lehenengo urratsetako bat izango da; eta Orkestrako musikariek osatutako Tantris Ensemble ganbera orkestra izango du lagun.

Matinade izenburudun topaketa berezi honek ezin hobeto irudikatzen du Matinéen oinarrizko euskarrietako bat den helburua: Euskadiko Orkestra Sinfonikoko kideen esku eszenatoki egokia jartzea interprete gisa garatzea ahalbidetuko dieten programak diseinatu ditzaten, beren eginkizun sinfonikotik at. Horrela agertzen du Carlos Ocaña biolinista eta zuzendariak hitzordu honek zer garrantzi duen bere ibilbidean: "Niretzat oparia da Orkestrak hain denboraldi bereziaren irekiera zuzendu dezadan onartu izana. Asko estimatzen diot, batetik, Irene Echevesteri, berak luzatu baitzuen proposamena, eta baita zuzendaritzari ere; eta biolinista lana orkestra zuzendaritza ikasketekin uztartu ditudaneko azken lau urte hauengatik aitortza legez hartzen dut. Gainera, Musikenen ikasle garaiaren eta orkestra zuzendari ibilibidearen hasieraren arteko lokailua izango da. Izan ere, aurten egin baitut azken azterketa". Kontzertu honen ondoren, Carlos Ocaña musika zuzendari izango da Madrilgo Erkidegoko Orkestra Gazteak C. Saint-Saënsen "Animalien inauteria" hizpide hartuta emango dituen kontzertu didaktikoetan.

Tantris Ensemblek joko duen egitarauak garai erromantikoan serenata nola landu zen aztertuko du, E. Elgar, A. Arensky eta A. Dvorák konpositoreen ikuspegitik. Kontzertuetarako obra bilakatuta, "konpositore askok erabili zuten serenata entzuleen gozamenerako, behar bada sinfonia baino bide apalagoa", Carlos Ocañak berak egitarauari oharretan jasotakoaren arabera.

Miramonera autobusez. Euskadiko Orkestrak Matinéetako publikoaren esku doan jartzen duen autobus zerbitzua da Miramongo egoitzara heltzeko biderik erraz eta erosoena. 10:25etan abiatzen da Gipuzkoa Plaza 4tik eta geldialdiak egiten ditu Antso Jakituna 18 eta Madrilgo Hiribideko 34ean.

Sarrerak. Matinée guztietarako sarrerak www.euskadikoorkestra.eus eta www.kutxabank.es webguneetan eta Kursaal zein Orkestraren egoitzako leihatiletan eros daitezke. 7 euroko prezio bakarra dute.

Miramongo Matinéek Kutxa Fundazioaren babesa dute.

Ostiralean, hilak 23, VII. "Musikagileak" Musika Garaikidearen Zirkuitua abiatuko da Euskadiko Orkestra Sinfonikoan Miramongo egoitzan. Lehenbiziko ekitaldiak izango dira Orkestraren beraren kontzertua, Manuel Nawrik zuzenduko duena, eta horren aurreko mahai ingurua. Bietarako sarrera doakoa izango da, aretoa bete arte.

Manuel Nawriren gidaritzapean, Euskadiko Orkestrak Miguel Matamoro, María Eugenia Luc, Ramon Lazkano eta Michael Jarrellen lanak joko ditu. Kontzertua Miguel Matamoro konpositore gazteak 2012an idatzitako "Brétema" lanaren erabateko estreinaldiarekin irekiko da. Ondoren, entzungai izango dira Ensemble Kuraiaren sortzaile eta zuzendari artistiko María Eugenia Lucek 2014an sortutako "Hu"; Ramon Lazkanoren "Mugarri", musikagileak Parisko Udazkeneko Jaialdiak eskainitako monografikoan Ravelen inguruko operaren aurrerapena aurkeztu berri duela; eta, azkenik, "... le ciel, tout à l'heure encore si limpide, soudain se trouble horriblement..." (... zerua, duela gutxi hain garbi zegoena, ikaragarri ilundu da bapatean...) pieza, mundu mailan musika garaikidearen izen eztabaidaezinetako bat den Michael Jarrell suitzarrarena. Egitarau hori Manuel Nawri alemaniar maisuak zuzenduko du. Estreinako aldia du Euskadiko Orkestraren podiumean eta bertara dator Koloniako WDR Sinfonie-Orchester eta Berlingo Deutsches Symphonie-Orchester orkestrak nahiz Ensemble Modern, Ensemble musikFabrik edo Australiako Elision Ensemble taldeak zuzendu ostean. Guztiak ariko dira kontzertuaren atariko mahai inguruan. >Musikagileak-ek emandako biografiak.

Musikagileak, Euskal Herriko musikagileen Elkartearekin burutuko den proiektu berri honek berresten du Euskadiko Orkestra Sinfonikoaren helburu nagusienetako bat, euskal sortzaileentzako akuilu izan eta horien lanaren zabalkuntzarako plataforma bilakatzea, alegia. Horri lotuta, oraingoan Orkestrak bide egingo dio, halaber, nazioartean punta puntakoa den ekoizpenari. Aurrez, bi erakundeon arteko elkalanaren emaitza izan zen, besteak beste, "Laboari Oihartzun" egitasmoa, 2014an Euskal Herriko Unibertsitatearen Mikel Laboa Katedraren eskutik estreinatu zena.

Irekiera honez gain, VII. "Musikagileak" Musika Garaikidearen Zirkuituaren baitan izango dira gune ezberdinetan emango diren hainbat kontzertu, konposizio ikastaro bat eta jarduera osagarriak. Irailaren bukaeran hasi eta urriaren azken egunetaraino luzatuko dira.

Salgai daude Abonu Denboraldiko kontzertuetarako (Donostia, Bilbo, Gasteiz eta Iruña) eta Miramongo Matinéetako emanaldietarako sarrera solteak. Abonu Denboraldiari dagokionez, sarreren prezioa 7 eurotik 31 euro bitartekoa da. Miramongo Matinéetarako sarrerek, berriz, 7 euroko prezio bakarra dute.

Sarrera guztiak webgune honetan eros daitezke ("ticket" botoia"). Gainera, honako salmenta-bideetan ere eskuragarri daude:

-Abonu Denboraldia:
Bilbo: www.euskalduna.eus / www.kutxabank.es / Euskalduna Jauregiko leihatila.
Donostia: www.kursaal.eus / www.kutxabank.es / Kursaal Auditoriumeko leihatila.
Gasteiz: www.principalantzokia.org / www.kutxabank.es / Principal Antzokiko leihatila.
Iruña: www.baluarte.com / Ticketmaster (902 15 00 25)/ Baluarte Auditoriumeko leihatila.

-Miramongo Matinéeak:
www.kutxabank.es / Kursaal Auditorioko eta Euskadiko Orkestraren Miramongo egoitzako leihatiletan.

Azken abonuak salgai.
-Abonu Denboraldia: Bilborako abonuak. Prezioa: 11 kontzerturako abonuak 62 eurotik gorako prezioa du (kontsultatu deskontuak).

-Miramongo Matinéeak: 16 kontzertutarako abonuak 64 euroko prezioa du (kontsultatu deskontuak).

Abonu oro www.euskadikoorkestra.eus gure webgunean eros daiteke edo baita Euskadiko Orkestraren Miramongo bulegoetara telefonoz dei eginez ere (943 01 32 32).

Jaso ahal dira, Euskadiko Orkestra Sinfonikoak, SGAE Fundazioak eta Zinemaldiak antolatuta, Orkestrak irailaren 17an (12:00etan) Donostiako Belodromoan eskainiko duen filmetako soinu-banden kontzerturako sarrerak.

Sarrera doakoa da eta beharrezkoa izango da aurrez gonbidapena jasotzea, irailaren 10etik 16ra, Zinemaldiak Kursaal Elkargunean eta Okendo Plazan dituen informazio guneetan, 9:00etatik 20:00etara eta 10:00etatik 20:00etara, hurrenez hurren; eta baita Donostia Turismoa bulegoan, astelehenetik larunbatera 9:00etatik 20:00etara eta igandean, aldiz, 10:00etatik 19:00etara. Kontzertu egunean sarrerarik balego, Belodromoan jaso ahalko dira.

ZINEMA MUSIKA: KONTZERTUA & PROIEKZIOA
Irailaren 17 larunbata, 12:00etan. Belodromoa.

Roque Baños: Alatriste (Agustín Díaz Yanes)
Joan Valent: Mi gran noche (Alex de la Iglesia)
Sergio Moure Lobos de Arga (Juan Martínez Moreno)
Pascal Gaigne: El ladrón de sueños (Ángel Alonso)
José Nieto Pasión revolucionaria "Libertarias" (Vicente Aranda)
Mikel Laboa Txoria-Txori/Baga, biga, higa "La pelota vasca" (Julio Medem)

EUSKADIKO ORKESTRA SINFONIKOA
Donostiako Orfeoia
David Hernando Rico, zuzendaria

Musikeneko irakasle entzutetsuekin trebatu, Euskadiko Orkestra Sinfonikoan jotzeko esperientzia izan eta eskenatokian Gordan Nikolic bezalako maisuekin edo bandArt taldeko musikariekin egon nahi duten gazteek aukera dute Orkestra Ikasketen Masterrean izena emateko. Ezaugarri horietako master ofizial bakarra Estatuan, bigarren edizioa izango du 2016/17 ikasturtean. 60 ECTS ditu eta urte beten edo bi urtetan egin daiteke. Euskadiko Orkestra Sinfonikoan praktikak egiten dira 1.400 eurokin ordainduak, AIE elkarteak 1.500 euroko bi beka ematen ditu, eta berrikuntza modura, Beasaingo Udalaren Igartza beka, 3.000 eurokoa. Izen ematea datorren irailaren 18a arte dago zabalik, eta sarrera probak hilabete horretako 20 eta 23a bitartean egingo dira.