Euskadiko Orkestra, Jun Märklek zuzenduta, Donostiako Orfeoia eta Olena Tokar sopranoa: "Agur Itzela"
Euskadiko Orkestra Sinfonikoak, joan den ostiralean 2015/2016 denboraldia aurkeztu berri duela, 2014/2015 Abonu Denboraldiari amaiera emateko ahots-musikaren bi obra eder interpretatuko ditu: Aita Madinaren Aita Gurea eta F. Poulencen Gloria; gainera, H. Berliozen Sinfonia Fantastikoa. Amaiera distiratsu honetan, Jun Märkl bere titularrak zuzenduko duen Orkestrarekin batera ariko dira Donostiako Orfeoia eta Olena Tokar sopranoa. Bihar ekainak 8 astelehena Iruñeako Baluarten, 9an Bilboko Euskaldunan, 10ean Gasteizko Principal Antzokian eta 11 eta 12an Donostiako Kursaalean.
"Agur itzel" baten neurrira egindako egitaraua. Aita Madinak 1947an Argentinan idatzitako Aita Gurea obra laburrak, baina emozio handikoak, abiatuko du emanaldia. Kritikak ""itzela da bere soiltasunean" esana du partitura eder honen gain. Jarraian, Francis Poulencen Gloria XX. mendeko klasiko sinfoniko-koralari utziko dio lekua. Aldi berean serioa eta jostagarria den obra honek Donostiako Orfeoiaren ahotsetan izango du itzultzaile onena, sarri askotan eta eszenatoki ugaritan interpretatu baitute. Olena Tokar ukrainiar soprano gaztea, Bartzelonako Francisco Viñas eta BBC Singer of the World Competition lehiaketetan finalista izandakoak bere gain hartuko du bakarlariaren paper eztia.
Programa osatzeko, Héctor Berliozen obra ezagunena izango da entzungai, Sinfonia Fantastikoa edo Artista baten bizitzaren pasartea -jatorrian, frantziarrak izen hori jarri zion-. Musika programatikoaren adibide goiztiar honek musikagilearen maitasunezko abenturak eta opioarekiko harremana biltzen ditu, Orkestrak franko-alemaniar tradizioako errepertorio sinfonikoan oso aditua den Jun Märkl zuzendari titularraren aginduetara burutuko duen erronka sinfoniko izugarri honetan. Gainera, Aula Jordá Gela hitzarmenaren baitan, Musikeneko ikasle talde bat istrumentista gisa ariko da sinfonia honetan.
Informazio gehiago
Esku-egitarauaEuskadiko Orkestraren 2015/2016 Denboraldia: kontzertu gehiago, presenteago, indartsuago, sendoago eta konektatuago
Euskadiko Orkestra Sinfonikoaren 2015/2016 Denboraldia aurkeztu da Orkestraren Miamongo Egoitzan. Kultura Sailburu eta Orkestraren Presidente Cristina Uriarte, Zuzendari Titular Jun Märkl eta Zuzendari Nagusi Oriol Rochek datozen hilabeteetarako jardueraren lerro nagusiak eman dituzte ezagutzera.
Kontzertu gehiago, presenteago, indartsuago, sendoago eta konektatuago izan dira Euskadiko orkestraren hiru arduradun gonerek gehien erabilitako hitzak.
Hezkuntza, Hizkuntza Politika eta Kultura Sailburu eta Orkestrako Presidente Cristina Uriartek, proiektuari bere erabateko babesa agertuz, Euskadiko Orkestra "indartsuagoa, sendoagoa eta gure Herrialdean musikaren alorrean funtsezko tresna izatea helburu harturik" dagoen erakundea dela adierazi du. "Gure herriko konpositore, abesbatza eta kultur gertakariekin estuki lotuta egoteko asmo tinkoa erakusten duen Denboraldi berriko programazioak islatzen duen bezala", gaineratu du.
Euskadiko Orkestrako zuzendari titular Jun Märklek adierazpen honi eutsi eta bi kontzeptu gehitu ditu: "taldearen ahal handia eta berau osatzen duten musikarien kalitatea lantzea, Orkestra nazioarte mailan kokatuko duten obra handiak interpretatzeko". "Hezkuntzak Orkestraren estrategia nagusi gisa duen garrantzia" azpimarratu du, horren inguruan "Anoetako Estadioan EMUSIK 2016 egitasmoan esku hartuko dugu" ere esan du Jun Märklek.
Ausartago, konplizeago, konektatuago, eta presenteago. Hauek dira Euskadiko Orkestrako zuzendari nagusi Oriol Rochek Denboraldi berria aurkezteko erabilitako adjektiboetako batzuk. Ondoren, sakonki azaldu ditu. Guztiek partekatzen dute, Uriarte eta Märklek ere bai, Euskadiko Orkestra bere euskarri den gizartearekin lotzeko asmoa, "jendeak Euskadiko Orkestra gehiago nahi duelako".
Ausartagoa Abonu Denboraldian eskainiko dituen kontzertuen kopurua handitu delako, programazioan etengabeko kontrastea bilatu izanagatik edo maila gorenekoak badira ere gure eszenatokietan aritzen ez diren artistak aurkezteagatik; bide batez, Orkestraren jarraitzaile den ikuslegoari eta, bereziki, abonatuei programazioaren diseinuan konfidantza izan dezatela eskatu die. Bebesle edo lankide diren erakundeei, komunikabideei eta publikoari eta bereziki abonatuei eskertza ere etengabekoa izan da prentsaurrekoan. Bertan eman da ezagutzera gainera Orekestrak 2015/2016 Denboraldian lagun izango duen irudia.
Euskadiko Orkestra Sinfonikoaren 2015/2016 Denboraldia
Euskadiko Orkestra Sinfonikoak kontzertu gehiago eskainiko ditu bere 34. denboraldian. Honela, iragan denboraldietan eman abonu kontzertu kopuru berbera eskainiko du, bultzada berria emanaz denboraldiari eta harreman estuagoa sendotuz Bilbo, Donostia eta Iruñeko zikloekin. Halaber, zuzendari eta bakarlari berriak ekartzeko apustua egin du. Gehienak izen berriak dira euskal eszenatokietan, zenbaiten kasuan baita estatuan ere, baina guztiek ere ospe eta entzute handia lortu dute nazioartean. Kontrastea izango da Denboraldi honetako programen ezaugarri nagusia: kontrastea musikagile, lan, estilo eta formatu ezberdinen artean. Musika-katalogo zabala eskainiko du Euskadiko Orkestrak. Bertan, errepertorio sinfonikoaren funtsezko lanez gain, musika garaikidea eta eszena sartuko ditugu ere.
"Errauskine" lanarekin egin debuta eta gero, Euskadiko Orkestra Versailleseko Errege Operara bueltatuko da. Oraingoan "Ederra eta Piztia" izango da ekoizpena, abenduan estreinatuko duguna Malandain Ballet Biarritzekin batera. Honela, Orkestra Frantziako jaialdi ospetsuenetako batera bueltatuko da.
Euskadiko Orkestra gure herriko musika eta kultura arloko ondasun nagusia bilakatzeko bidean da. Ondorioz, ohiko lau hirietan eginiko abonu zikloez gain, formatu ezberdineko jarduera eta kontzertu ugari eskainiko ditu, mota guztietako entzuleentzat. Iraganean egindakoari jarraiki, baina gure eskaintza urtero berrituz, arlo ezberdinekin daukagun konpromiso irmoaren isla: hezkuntza arloa, Musikenekin batera, Aula Jordá Gelaren bidez. Orkestra Ikasketen Lehen Masterraren lehen promozioa izango dugu Denboraldi honetan. Eta heziketa arloa, Musika Gelaren bidez. Miramongo Matinéeak formatu txikiko kalitatezko musika eskaintzen duen zikloa da eta Orkestra Herrietan ekimenak formatu handiko musika ezohiko eszenatokitara eramango ditu. Eta, halaber, bere eginkizun sozial eta kulturala gure herriko jaialdi nagusienetan duen partaidetzarekin osatuko du Orkestrak: Bilboko OLBE eta Musika-Música, Donostiako Musika Hamabostaldia eta Zinemaldia, Festival de Musique en Côte Basque eta Musikaste.
Nabarmentzekoa ere Donostia 2016 Kultur Hiriburutza ospatuko dugun urtean Euskadiko Orkestrak EMUSIK eta ICMA bezalako ekitaldi ezberdinetan izango duen inplikazioa. Azken horretan Europako Musika Klasikoaren Sariak banatuko dira Donostian eta Euskadiko Orkestra anfitrioia izango da.
Dionysus hari laukoteak Sibelius eta Schubert intimistenak hizpide
"Voces Intimae" da Dionysus Laukoteak Miramongo Matinéen baitan eskainiko duen kontzertua aurkezteko aukeratutako izenburua. Hori baita, izan ere, Jean Sibelius jaio zela mende bat eta erdi bete dela gogora ekartzeko hautatutako harientzako kuartetoa. Sibelius erreferentziazko konpositorea da, bai Finlandian eta baita haren jaioterriko mugetatik haratago ere. Egitarau goiztiarra osatuz, hari kuartetorako sortutako ekoizpenean saihestu ezineko beste partitura bat: Heriotza eta Dama, Franz Schubertek idatzia. Beste behin, Miramongo Matinéeak beren leitmotiv-a aintzat hartuta: kalitatezko musika formatu txikian. 11etatik aurrera Euskadiko Orkestra Sinfonikoaren egoitzan.
Dionysus Laukotea osatzen duten musikariak dira Irene Echeveste eta Larraitz Oiarzabal, biolinak; Delphine Dupuy, biola, eta Juan Ignacio Emme, biolontxeloa. Guztiak Euskadiko Orkestrako kideak dira.
Jean Sibelius Hameenlinna hirian jaio zen, Finlandian, 1865eko abenduaren 8an eta 1957ko irailaren 20an zendu zen. Ezinbesteko papera bete izan zuen XIX. mendearen bukaera eta XX. mendearen hasiera bitartean, bere berariazko musika-estiloa sortu baitzuen. Bere garaikideetariko askok bezala, Wagnerrenen miresle izan zen, baina aro batean bakarrik, azkenean musika-molde ezberdin bat aukeratu baitzuen. Sibeliusen obran islatzen diren beste eragin garrantzitsuak Busoni eta Tchaikovskyrenak dira. Azken honen eragina bereziki nabarmena da Kullervo sinfonia koralean (1891), bere Lehenbiziko Sinfonian eta, beranduago, 1903. urtean idatzitako Biolinerako kontzertuan. 1909an sortutako Voces Intimae harientzako kuartetoa pieza aipagarria da Sibeliusen ganbera-musika errepertorioan.
Franz Schubert Vienan (Austria) jaio zen 1737ko urtarrilaren 31an eta hiri hartan bertan hil zen, 1828ko azaroaren 18an. Erromantizismo musikalaren eta ezaugarri zuen forma laburraren sartzailetzat hartua, aldi berean sonata klasikoaren jarraitzaile ere izan zen halaber, Ludwig van Beethovenen ereduari jarraituz. Lieder, pianorako musika, ganbera eta orkestra musika sortzaile handia izan zen. 14. Harientzako kuartetoa re minorrean, D. 810, Heriotza eta Dama izenburuaz ezagunagoa, 1824an konposatu zuen Schubertek.
Sarrerak (7€) www.euskadikoorkestra.eus eta www.kutxabank.es webguneetan eros daitezke, eta kontzertu egunean baita Orkestraren egoitzan ere, 10.30etatik aurrera. Halaber, gogorarazten dizuegu doako autobus zerbitzua dagoela egoitzara etortzeko, 10.25etan Gipuzkoa Plaza, 4tik atera eta Antso Jakituna, 18an eta Madrilgo Hiribidea, 34ean geldialdiak egiten dituelarik.
"SUZKO TXORIA", ipuin sinfonikoa, maiatzaren 29an Gasteizko Principal Antzokian
Euskadiko Orkestra Sinfonikoak eta Gasteizko Udal Antzoki Sareak koprodukzioan aurkezten dute "Suzko Txoria" ipuin sinfonikoa. Eszenatokian, Euskadiko Orkestra osorik, Iker Sánchezen zuzendaritzapean, Igor Stravinskyren "Suzko txoria" interpretaturko duelarik; eta Belén Otxotorena aktorea ipuin kontalari ariko da, Carmen Santonja konpositore, kantari eta margolariak idatzitako fantasiazko ipuina euskaraz kontatuko baitu. Maiatzaren 29 ostiralean, arratsaldeko 7tan, Gasteizko Principal Antzokian.
"Suzko Txoria" ekoizpenean, musika sinfonikoak eta ipuin tradizionalen elementuek bat egiten dute publiko orori zuzendutako ikuskizunean. Helburua gaztetxoenak orkestra-musikaren bidean abiarazi eta irudimena garatzea da. Orkestraren hotsak Maurice Latour tximeleta-ehiztari ausartak ibiltzen duen bidea marrazten du, entzulegoa ezustekoz betetako ipuinak eragiten dituen emozioetan barrena eramanez. Maitasuna, beldurra, zalantza, jolasa, poza, tristura, izu-ikara eta abar islatzen dituzten melodaik bata bestearen ondotik gertatzen dira eta Maurice gazteak La Gomera uharteko basoaren sakonean biziko duen abenturan murgiltzen gaituzte.
Musika Familian zikloko emanaldi hau izan aurretik, "Suzko Txoria" ekoizpenak arrakasta handia izan du Eskola Kontzertuak zikloaren eta Donostiako Musika Familian zikloaren baitan. Guztira, 3000 pertsona inguruk izan dute jada ipuin sinfoniko honekin gozatzeko aukera, Euskadiko Orkestraren Miramongo egoitzan zein Kursaal Auditorioan.
Kontzertuaren aurretik, Sentsibilizazio Tailer bat izango da ondorengo ikuskizunaren edukian sakontzeko. Jarduera osagarri hau doakoa da ondorengo kontzerturako sarrera duen ororentzat. Nahitaezkoa da aurrez izena ematea, 945 16 10 45 telefonora dei eginez.
Sarrerak. "Suzko Txoria" ikuskizunerako sarreren prezioa 6€koa da eta www.ticket.kutxabank.es/principalantzokia, www.euskadikoorkestra.eus eta Principal Antzokiko leihatilan eros daitezke.
Honako hau Euskadiko Orkestraren Musika Gelak aurten Gasteizen aurkeztutako bigarren ikuskizuna dugu. Aurrez, joan zen otsailean, "Galdutako musikaren bila", 0tik 5 urte bitarteko haurtxoei zuzendutako ekoizpena eszenaratu zen Principal Antzokian. Honetan, Maite Esteban eta Mikel Cañadak pianoaz interpretaturiko askotariko partiturak abiapuntu hartuta, Iker Ortiz de Zarate aktore gasteiztarrak teklen, argien eta itzalen artean galdutako musikaren bila eraman zituen haurrak.
Euskadiko Orkestra Sinfonikoaren kontzertua gaur, maiatzak 20, Kursaalen
Gaur Musikarik Gabeko Eguna izateko deialdia bultzatu duten arrazoiekin bat etorri arren eta abonatu zein gainerako publikoari ordezko irtenbide bat emateko ezintasuna dela-eta, Euskadiko Orkestrak gaur asteazkena, hilaren 20rako aurreikusitako kontzertua eskainiko du. Arratsaldeko 8etan, Donostiako Kursaal Auditorioan.
Euskadiko Orkestra Sinfonikoa + FEVAS: Musika lantzeko tailerrak
Euskadiko Orkestra Sinfonikoak eta Adimen Ezintasuna dutenen aldeko Elkarteen Euskal Federazioak (FEVAS) elkarlanean darraite "Berdintasuneko melodiaren alde", kultura eta arteen alorrean ere gizarteratzearen alde. Aste honetan Aspace, Gautena, Gorabide y Apnabi elkarteetako ehun kidek esku hartuko dute gure Hezkuntza Departamentuak antolatutako bi tailerretan, bata Euskadiko Orkestraren Miramongo egoitzan eta bestea Bilboko Euskalduna Jauregian.
“Suzko Txoria” ipuin sinfonikoa maiatzaren 23an Donostian eta 29an Gasteizen
Euskadiko Orkestra Sinfonikoa eta Kursaal Eszenak koprodukzioan aurkezten dute "Suzko Txoria" ipuin sinfonikoa. Eszenatokian, Euskadiko Orkestra osorik, Iker Sánchezen zuzendaritzapean, Igor Stravinskyren "Suzko txoria" interpretatuko duelarik; eta Belén Otxotorena aktorea ipuin kontalari ariko da, Carmen Santonja konpositore, kantari eta margolariak idatzitako fantasiazko ipuina euskaraz kontatuko baitu. Maiatzaren 23 larunbatean, eguerdiko 12:00etan, Donostiako Kursaal Auditorioan.
Ekoizpen hau bera Gasteizen aurkeztuko da maiatzaren 29 ostiralean, arabar hiriburuko Udal Antzoki Sarearekin lankidetzan. 19:00etan Principal Antzokian.
"Suzko Txoria" ekoizpenean, musika sinfonikoak eta ipuin tradizionalen elementuek bat egiten dute publiko orori zuzendutako ikuskizunean. Helburua gaztetxoenak orkestra-musikaren bidean abiarazi eta irudimena garatzea da. Orkestraren hotsak Maurice Latour tximeleta-ehiztari ausartak ibiltzen duen bidea marrazten du, entzulegoa ezustekoz betetako ipuinak eragiten dituen emozioetan barrena eramanez. Maitasuna, beldurra, zalantza, jolasa, poza, tristura, izu-ikara eta abar islatzen dituzten melodiak bata bestearen ondotik gertatzen dira eta Maurice gazteak La Gomera uharteko basoaren sakonean biziko duen abenturan murgiltzen gaituzte.
Musika Familian zikloko emanaldia izan aurretik, "Suzko Txoria" ekoizpenak arrakasta handia izan du Eskola Kontzertuak zikloaren baitan. Lehen eta bigarren hezkuntzako 2.200 ikaslek izan zuten Euskadiko Orkestraren Miramongo egoitzan ipuin sinfoniko honekin gozatzeko aukera.
Kontzertuaren aurretik, Sentsibilizazio Tailer bat izango da ondorengo ikuskizunaren edukian sakontzeko. Jarduera osagarri honetarako lekuak beteta daude.
Sarrerak. Donostian, "Suzko Txoria" ikuskizunerako sarreren prezioa 7€koa da, eta 3€koa 12 urtetik beherakoentzat. www.sarrerak.kursaal.eus, www.euskadikoorkestra.eus eta Kursaaleko leihatilan eros daitezke. Gasteizen, aldiz, prezio bakarra dute, 6€, eta www.ticket.kutxabank.es/principal webgunean, egitarauaren xehetasunean dagoen loturari jarraituz eta Principal Antzokiko leihatilan eros daitezke.
Elisabeth Leonskaja Euskadiko Orkestraren bakarlari gonbidatu
Maiatzaren 20tik 26ra, Euskadiko Orkestra Sinfonikoak kontzertu-programa berri bat eskainiko du bere Abonu Denboraldiko lau egoitzetan. Aipagarria da kontzertu-sorta honetan Elisabeth Leonskaja izango dela bakarlari gonbidatu. Kritikaren esanetan, "sobietar eskolako azken dama handia" denak Robert Schumannen Piano eta orkestrarako kontzertua la minorrean interpretatuko du, Andrey Boreykoren zuzendaritzapean. Maiatzaren 20 eta 22an Donostiako Kursaalean, 21ean Bilboko Euskaldunan, 25ean Gasteizko Principal Antzokian eta 26an Iruñeako Baluarten.
Elisabeth Leonskaja Euskadiko Orkestrarekin. 14/15 Denboraldian Euskadiko Orkestra Sinfonikoaren artista gonbidatu izendatua izateari esker, Elisabeth Leonskajak, orain Abonu Denboraldian aritzeaz gain, bi errezital eskaini zituen joan zen udazkenean Miramongo Matinéetan. Hamarkadak dira jada, Elisabeth Leonskaja gure garaiko pianista ospetsuenetako bat dela. Bere buruari eta bere musikari leial, aro sobietarreko musikari handien bideari jarraitu dio, David Ostraikh, Sviatoslav eta Richterrek irekitako bideari, alegia. Andre Boucourechliev konpositoreak zera esan zuen: "Elisabeth Leonskajaren ibilbidea gailurrez gailur egindako ibilbidea da. Bere burua gainditzeko gaitasunak, exigentzia-mailak, grinak eta adimenak musikari handienen mailan kokatzen dute, ez egun bakarrik, baita aro oso batean ere". Bakarlari gisa, lehen mailako orkestra guztiekin aritu da, besteak beste, Kurt Masur, Sir Colin Davis, Christoph Eschenbach, Christoph von Dohnanyi, Kurt Sanderling, Maris Jansons eta Yuri Temirkanoven zuzendaritzapean.
Andrey Boreyko, Euskadiko Orkestrako zuzendari printzipal gonbidatu eta Naples Philharmonic zein Belgikako Orkestra Nazionalaren musika zuzendaria, Seattle Symphony orkestrarekin batera arrakasta berri bat lortu ondoren itzuliko da Orkestraren podiumera. Joan zen apirilan Shostakovitch eta Schnittke interpretatu ostean, kritikak esan zuen: "adi adi dagoen zuzendaria da, magnetikoa; bere ezkerreko esku adierazkorrak esaldi bakoitzaren forma zehatza adierazten du, nahi duena musikariei zehatz-mehatz agertuz".
"Pinturak eta collageak" izenburu hartuta, kontzertu hauetako egitarauak askotariko obren paleta bat eskaintzen du. Atariko gisa, Orkestrak Arvo Párten Fratres interpretatuko du; berau da minimalismo mistikoaren adierazle nagusia den konpositorearen partiturarik interpretatuena. Andrey Boreykok Johann Sebastian Bachen Wachet auf, ruft uns die Stimme (Esnatu, Ahotsa ari zaigu deika) erabiliko du estoniarraren erlijiotasunaren kontrapuntu bezala. Eta erlijiosotasun sakoneko bi pieza hauen artean, errepertorioko bi mugarri: Schumannen Piano eta orkestrarako kontzertua eta Paul Hindemithen Matias Pintorea Sinfonia; izenburu bereko operatik hartutakoa, bertan azalerazi zituen Hindemithek bere kezka moral eta politikoak nazismoaren oldarraren aurrean.
10. Abonu-Egitaraua _ 2015. maiatzaren 20tik 26ra
Arvo Pärten "B-A-C-Hi buruzko collagea" obraren ordez, konpositore beraren Fratres interpretatuko da. Egitarauaren gainerako obrak aurrez iragarritakoak izango dira.