Jakizu, Euskadiko Orkestraren abonatu zarenez, azaroan zehar sarrerak tarifa berezian erosteko aukera ematen dizula Bilboko Arte Ederren Museoak, honako erakusketa hauetarako: “Hiperrealismoa 1967-2013”, “Prado Museoa eta artista garaikideak” eta “Mimmo Paladino Grabatuak”.

Aukera aprobetxatu.

Orfeoiak urtero eskaintzen die kontzertu bat beren lagun eta bazkideei, eta aurten urrian 30ean izango da, Donostiako Kursaal Auditorioan. Brahmsen Requiem alemaniarra aukeratu dute. Euskadiko Orkestra Sinfonikoak eta Elena Barbé (sopranoa) eta Garry Magee (baritonoa) solistek lagunduko diote koruari kantataren eta oratorioaren artean kokatzen den lan horretan. Jainkoari eginiko aipamen urriak direla eta -zuzenean behintzat- "requiem ateoa" deitu izan diote, Brahmsen helburua ez baitzen izan kutsu liturgikoko requiem bat konposatzea. Zazpi zatitan banaturiko obra honetan, testua Lutherrek eginiko Bibliaren itzulpen alemanetik dago hartuta, eta ez latinetik, ohikoa zen bezala.

Obra Orfeoiaren errepertorioan dago 1913tik, eta ordutik, honako zuzendari hauen gidaritzapean interpretatu du: Lorin Maazel, Frühbeck de Burgos, López Cobos, Ataúlfo Argenta, Víctor Pablo Pérez, Michel Plasson, Fernández Arbós eta Ramón Usandizaga, besteak beste, eta honako orkestra hauekin: Berlingo eta Londreseko Orkestra Sinfonikoak, Hanburgoko irratiko orkestra, Galiziakoa, Espainiako Orkestra Nazionala eta Euskadiko Orkestra Sinfonikoa. Euskadiko Orkestrarekin abestu zuen azken aldia 2004an izan zen, Musika Hamabostaldian. Aldi hartan bi kontzertu eskaini zituzten bi taldeek Gilbert Vargaren zuzendaritzapean.

Jakinarazten dizuegu aste honetan 14/15 denboraldiko abonuen ordainagiriak kobratuko ditugula.

Elisabeth Leonskaja pianista, 2014/2015 denboraldian Euskadiko Orkestraren artista gonbidatua, Miramongo Matinéen eszenatokian ariko da berriz ere. Oraingoan hari laukote bat izango du lagun eta eskainiko duten egitaraua gaztetan Moskun ikasle emandako urteetan gertutik ezagututako Dmitrien obrek osatuko dute. Atriletan, konpositore eta pianista gailen honen Biolontxelo eta pianorako sonata, opus 40, Biolin, biolontxelo eta pianorako 2. Trioa eta Piano eta harientzako kintetoa sol minorrean. Elisabeth Leonskajarekin batera ariko dira Alexandre Da Costa eta Irene Echeveste biolinjotzaileak, Pascal Arnaud biolajotzailea eta Roman Jablonski biolontxelojolea.

Kontzertu honen inguruan, Elisabeth Leonskajak zera adierazi du: "Dmitri Shostakovitchen musika nire aberriaren, Errusiaren sinboloa da niretzat. Shostakovitch XX. mendeko klasiko handia da, oso tragikoa eta bere garaiko poeta handia. Berak idatzitako musika oso gertukoa zait eta primeran ulertzen dut. Moskun ikasten eman nuen garaian haren 13, 14 eta 15. Sinfonien estreinaldietan izan nintzen eta baita Biolinerako sonataren estreinako emanaldian ere. Gainera, ikasle ginela, bere etxean harentzat pianoa jo eta bere iritzi zein kritikak entzuteko aukera izan genuen. Ez dut sekula ahaztuko. Shostakovitchen musika, sinfonikoa nahiz ganbera musika, mundo osoan da estimatua. Horregatik Donostian, hiri eder honetan ere entzungai izatea nahi nuen; hemen jendeak berau bihotzera heltzeraino antzemateko den behar adina zaletasuna eta ezagutza baitu.

Halaber, bere esker ona adierazi nahi izan die Alexandre Da Costa, Irene Echeveste, Pascal Arnaud eta Roman Jablonskiri "musika hau lantzerakoan agertutako maitasunagatik eta emandako denboragatik". Irene Echeveste eta Pascal Arnaud Euskadiko Orkestrako kideak dira, Alexandre Da Costa Abonu Denboraldian kontzertino gonbidatu ari da egunotan eta Roman Jablonski bakarlari gisa aritu izan da EOSren proiektu ezberdinetan.

Elisabeth Leonskajak Miramongo Matinéen baitan eskainiko duen bigarren emanaldi honek 2014/2015 denboraldian Euskadiko Orkestraren artista gonbidatu izateari erantzuten dio. Hori dela eta, Abonu Denboraldian ere bakarlari ariko da, 2015ko maiatzan Andrey Boreykoren zuzendaritzapean.

Kontzertua goizeko 11etan hasiko da eta sarrerak (7€) www.euskadikoorkestra.es eta www.kutxabank.es webguneetan eros daitezke, eta kontzertu egunean baita Orkestraren egoitzan ere, 10.30etatik aurrera. Halaber, gogorarazten dizuegu doako autobus zerbitzua dagoela egoitzara etortzeko, 10.25etan Gipuzkoa Plaza, 4tik atera eta Antso Jakituna, 18an eta Madrilgo Hiribidea, 34ean geldialdiak egiten dituelarik.

Irekita dago jada Eskola Kontzertuetara bertaratu nahi duten ikastetxeek izena emateko epea. Kontzertu hauek Donostiako Udalaren Hezkuntza Atalarekin eta Gipuzkoako Batzar Nagusiekin lankidetzan antolatuko ditu Euskadiko Orkestra Sinfonikoaren Musika Gelak, 2015eko otsaila eta maiatza bitartean.

12 kontzertu izango dira guztira, Haur Hezkuntza, Lehen hezkuntza eta Bigarren Hezkuntza ikasleei zuzenduak. GALDUTAKO MUSIKAREN BILA, Lehen Hezkuntzako ikasleentzat diseinatua, lau eskutara jotako piano, aktore eta txotxongilorako kontzertua da. Igor Stravinskyren SUZKO TXORIA, berriz, Lehen Hezkuntzako eta Bigarren Hezkuntzako lehen zikloko ikasleei zuzendutako kontzertu sinfonikoa da. MUSIKARIAK ETA DANTZARIAK ZINEAN, Bigarren Hezkuntzako ikasleentzat egokitua, zinerako musika eta klakea uztartzen dituen kontzertu sinfonikoa da. 

Parte hartzeko baldintzak. Eskola Kontzertu hauetako batetara bertaratu nahi duten ikastetxeek Donostiako Udalaren Hezkuntza Atalaren bidez eman behar dute izena 2014ko urriaren 1a eta abenduaren 1a bitartean.

Tel: 943 48 14 02
E-Mail: hezkuntza_educacion@donostia.org
Web: www.donostiahezkuntza.org

Eskola Kontzertuetara joateko, ezinbesteko baldintza izango da ikastetxeko musika-irakaslea dagokion Irakasleentzako Tailerrera bertaratzea.
Ikasle bakoitzeko prezioa 3 €koa izango da.

Biharko Bilbao Night Marathon dela eta, eskertuko dizugu garraio publikoa erabiltzea eta Euskalduna Jauregira garaiz iristea.

Urriaren 18an, Elisabeth Leonskaja, pianoaren izen handia eta 2014/2015 denboraldian Euskadiko Orkestraren artista gonbidatua, bakarkarka ariko da Miramongo Matinéeak zikloaren bigarren emanaldian. L.V. Beethoven eta A. Bergen lanak aitzakia ezin hobea izango dira pianista honek, errezitalean zein orkestra handienekin munduko areto ospetsuenetan jardutean agertzen dituen talentu eta grinaz gozatzeko. Hau izango da kritikaren arabera "Sobietar Eskolaren azken dama handia" den honek Orkestraren Miramongo egoitzan eskainiko dituen bi emanaldietatik lehenbizikoa. Bigarrena astebete beranduago izango da, hilaren 25ean, orduan Orkestrako kideek osatutako hari laukote batek lagunduta.

Frantziar prentsak eta espainiar kritikak bete betean asmatu zuten Elisabeth Leonskaja "La dernière grande Dame de l´Ecole Soviétique" eta "Anti-Diva" bezala deskribatzerakoan. Duela hamarkada asko gure garaiko pianista ospetsuenetako bat dugu. Bere bibilbide osoan zehar bere buruari eta musikari leial izan zaizkio, aro sobietqarreko musikari handien urratsei jarraiki; bizi izan zute giro politikoa erabat korapilatsua izan arren, haiek ez zuten sekula begirada musikaren hobe-goienetik aldendu, Eszenatokian agertu bezain laster, publikoak berehala antzematen du Leonskajaren indarra, izan ere musika da, eta beti izan da, bere bizitza.Tblisi-n (Georgia) errusiar familia baten baitan jaioa, haur miraritzat hartua izan zen. Bere musika garapenean eragin erabakiorra izan zuen S. Richter-ekin lankidetzan aritu izanak. Elisabeth Leonskaja mundo mailako orkestra garrantzitsuenekin aritu da bakarlari gisa, K. Masur, C. Davis, C. Eschenbach, C. von Dohnanyi, K. Sanderling, M. Jansons, Y. Temirkanov eta abarren zuzendaritzapean. Bakarlari aritzeak bere agenda betetzen duen arren, ganbera musikak toki berezia izan du beti bere sorkuntza-lanean eta sarritan izaten da Emerson, Borodin eta Artemis laukoteekin lanean. Andre Boucourechliev-ek zera idatzi zuen behin "Diapason" frantziar aldizkarian: "elisabeth Leonskajaren ibilbidea gailurrez gailur egindako ibilbidea da. Bere burua gainditzeko gaitasunak, exigentzia-mailak, grinak eta adimenak musikari handienen mailan kokatzen dute, ez egun bakarrik, baita aro oso batean ere; Clara Haskil edo Lipattiren mailan, alegia. Eta gainera, modernotasuna".

Miramongo Matinéetan aritzeaz gain, Elisabeth Leonskaja bakarlari ariko Euskadiko Orkestraren Abonu Denboraldian. 2015.eko maiatzan izango da, Andrey Boreykoren zuzendaritzapean.

Ostiral gauean La Biennale di Venezia-ko Teatro alle Tese antzokian bildutako entzulegoak Euskadiren, bere hotsen eta esentzien inguruko irudipen ezberdinak eraman zituen. Jaialdi handi honetan gure bigarren kontzertuaren atarikoan entzundako basoen hotsak, Mikel Chamizok jasotakoak, egitarauan bildutako konpositoreek Euskadi irudikatzeko erabilitako askotariko interpretazio, irudipen eta agerpenen hitzaurrea izan zen. Tesela proiektuaz ari gara, Euskadiko Orkestrak bere 30. urteurrena ospatzeko BBVA Fundazioaren lankidetza esklusiboarekin burututako konposizio-egitasmoaz, alegia. Bertan Euskadi, gure herriaz mintzo zaizkigun nazioarteko zortzi konpositoreren begirada labur, aske eta berezia jasotzen da. Eta emaitza adierazpen bakan eta ez-ohikoak dira, esaterako egun La Biennaleko Musika Atalaren zuzendari eta Orkestrak musika garaikideko jailadi honen 58. aldian izatearen arduradun Ivan Fedeleren "Txalaparta" obran txalaparta eta orkestra sinfonikoa bat eginik agertzea, Oreka TX eta Orkestraren eskutik.

• Joan Birako argazki bildumara.

Tesela dira Mario Lavistaren "Tres cantos a Edurne", Michael Finnissyren "Zortziko", Ivan Fedeleren "Txalaparta-Folkdance II", Gérard Pessonen "Ravel à son âme", James Dillonen "White Numbers", Peter Eötvösen "The Gliding of he eagle in the skies", Isabel Mundryren "Calles y sueños" eta Mauricio Soteloren "Urrutiko urdin". Zortzi obrak laburrak dira eta eszenaratzea oso konplexua gertatzen da, hauek jotzeko eszenatokian batetik bestera mugitu beharreko instrumentu ezberdin ugari behar direlako. Hori dela-eta, Encinarrek "Tesela" proiektuaren aurkezpenean guztien arteko hari bat sortzea erabaki zuen, "ekitaldi bakarreko antzezlana izango balitz bezala", eta obra-multzoen artean egitarauari batasuna emango zioten "hotsen bidezko zubiak" eraikitzea erabaki zuen. Eta hortik Mikel Chamizo euskal konpositorearen esku-hartzea, Encinar maisuaren hitzetan, "lehen mailako konpositore izatera deitua dagoen" musikagilea. Toki ezberdinetan grabatutako musikaren bidez, Mikel Chamizok Tesela proiektua haratago eraman eta basoko hotsez, bertsolaritzaz (Maialen lujanbio eta bere aitona, Txirrita ospetsuaren bidez), Luis de Pabloren musika elektronikoaz (WE obraren zati bat) hornitzen du. "Antzezlan" honi amaiera emateko, Encinar maisuak, aurrerapausu berri bat eman eta gaueko protagonista bilakatutako txalapartaren inprobisazioari bide egiten dio.

Eta honela, kanpotik gure irudia osotzen duen bestearen begirada izanik sortu zen Tesela proiektua gure herriak, hau da, bizi dugun espazio fisiko gisa ulerturik, berezko dituen hotsez, eta gure kultura antzinako zein garaikidearen hotsez jantzita aurkeztu zen bart.

Oreka TX protagonista handi bihurtu eta milaka urteko instrumentu honen xarmaz liluraturiko entzulegoaren arretagune bilakatu zen, Euskadiko Orkestrarekin bat eginik eta musika garaikidearen gailurra den jaialdi hau bezalako eszenatoki nagusietan dabilen honetan. Jeniozko lan hau Ivan Fedeleren ideia izan da. Konpositoreak bikaintzat jo zituen Euskadiko Orkestra, bere Tesela proiektua eta, jaialdiaren zuzendari lez, 58. edizio honetan Orkestraren esku-hartzea. Eta zera gaineratu zuen: "Txalaparta" obrak bigarren zati bat izango du.

Hiru astez prestakuntza lan bizia egin ostean, amaieran José Ramón Encinar "oso pozik" agertu zen hain proiektu erraldoiari aurre nola egin zitzaion ikusita, "%200era buru-belarri jardun zuen" Orkestrarekin elkarlanean.

Eserlekuetatik, Orkestrarekin izan ziren Venezian eskainitako lehenbiziko emanaldian protagonista izandako Luis de Pablo, Ramon Lazkano, Gabriel Erkoreka eta Asier Polo.

Cristina Uriartek, Orkestraren presidente eta Eusko Jaurlaritzako Hezkuntza, Hizkuntza Politika eta Kultura sailburuak Euskadiko Orkestra La Biennale bezalako nazioarteko eszenatoki garrantzitsuetan aritzeak Orkestraren beraren eta gure herriaren posizionamendu bikainaren adierazgarri dela nabarmendu zuen; bertan zen halaber Joxean Muñoz, Kultura sailburuordea. Sailburuaren hitzak berresteaz gain, Euskadiko Orkestraren zuzendari nagusi Oriol Rochek zera adierazi zuen: "mugarri hauek lagungarri zaizkigu gure proiektua etxean azaltzerako garaian ere" .

Eta 58 Festival Internazionale di Musica Contemporanea - La Biennale di Venezia jaialdian bitan aritu ostean, etxera itzultzeko ordua heldu zaigu jada. Atzerabegirakoa egiterakoan, pozik gaude Venezian lortutakoarekin: musika garaikidearen epizentroa den honetan neurri handi batean egun gure herrian musika zer den adierazi izanak pozten gaitu. Entzulego zorrotzenaren aurrean Orkestra gisa agertzeaz gain, kulturarekiko gure konpromezua defendatu dugu: sorkutzarekiko konpromezua (Orkestraren enkarguz sortutako lanak aurkeztuz), gure herriko interpreteekiko konpromezua eta tradizio antzinakoenaren zati izanagatik ere gaur erabat garaikideak diren kultur adierazpenekiko konpromezua. Orkestra sinfoniko gisa kalitate maila gorena lortzea helburu izateaz gain, euskal kulturaren sustaketa eta zabalkuntzan eragile aktiboa izatea Euskadiko Orkestra Sinfonikoaren nortasunaren ezaugarrietako bat baita.

• Joan Birako argazki bildumara.