Maiatzaren 24 larunbat honetan eta maiatzaren 31an izango dira Miramongo Matinéeak zikloaren 2013/2014 denboraldiaren baitan programatutako azkeneko bi kontzertuak. Eta bi hitzordu hauetan britainiar giroa izango da: larunbat honetan Euskadiko Orkestrako kide zein lankideek osatutako Britten Ensemble ganbera taldeak XX. mendeko britainiar musikaren adierazgarri diren Benjamin Britten, Ralph Vaughan Williams eta Arthur Bliss konpositoreen obren aukeraketa bat interpretatuko dute. Eta maiatzaren 31an, berriz, Benjamin Grosvenor pianista ingelesak errezitaldi bat eskainiko du denboraldiaren itxiera kontzertuan.

Britten Ensemble Nathalie Dabadie eta Itziar Prieto biolinjotzaileek, Justyna Janiak eta Pawel Krymer biolajotzaileek, Beatriz Linares biolontxelojoleak eta Pedro José Rodríguez pianistak osatzen dute.

Ensemble honek larunbatean Euskadiko Orkestraren egoitzan aurkeztuko duen egitaraua Ralph Vaughan Williamsek (1872-1958) 1912an idatzitako 2 biolin, 2 biola eta biolontxelorako hari kintetoa, "Phantasy Quintet" obrak irekiko du; Berlinen Max Bruchen ikasle eta Parisen, berriz, Maurice Ravelena, Vaughan Williamsek berehala garatu zuen bere berezko estilo bat eta arrakasta nabarmena izan zuen. Ondoren, Benjamin Brittenen (1913-1976) "Simple Symphony" izango da entzungai; 1934an sortutako obra honek Brittenek azken ikasturtean konposizio-bide berrietan barrena abiatzeko egindako saiakerak islatzen ditu. Azkenik, Britten Ensemblek Arthur Blissen (1891-1975) Pianodun kuartetoa la minorrean obra interpretatuko du; hau ere obra goiztiarra dugu, joera esperimentalduna eta Elgar, Fauré, Ravel eta Vaughan Williams beraren eragina agerian uzten duena.

Kontzertu honetarako sarrera solteek 7€ko prezio bakarra dute eta www.kutxabank.es eta, kontzertuaren egunean, Orkestraren egoitzako leihatilan erosi ahalko dira.

Miramonera autobusez. Euskadiko Orkestrak Matinéetako publikoaren esku jartzen duen autobus zerbitzua da Miramongo egoitzara heltzeko biderik erraz eta erosoena. 10:25etan abiatzen da Gipuzkoa Plaza 4tik eta geldialdiak egiten ditu Antso Jakituna 18 eta Madrilgo Hiribideko 34ean. 

Aurten 150 urte betetzen dira Miguel de Unamuno jaio zenetik. Bilbotar idazle eta pentsalari hau gogora ekarria izango da Euskadiko Orkestra Sinfonikoaren hurrengo Abonu programan. Kontzertu bakarra izango da, maiatzaren 22an Bilbon. Egitarauan, Valentín de Zubiaurreren Ledia eta Fernando el Emplazado operetako preludioak. Bi piezen artean, Ramón Bareak ahotsa jarriko die Unamunok Diario íntimo, 1897an argitaratutako bere egunkarian musikaren inguruan jasotako hainbat hausnarketei. Ondoren Weberren Fagot eta orkestrarako kontzertua izango da entzungai, Euskadiko Orkestrako fagot bakarlari François Prouden eskutik. Eta egitaraua osotzeko, Schumannen 3. Sinfonia, "Renaniarra". Guillermo García Calvo estreinakoz ariko da Orkestraren podiumean.

Unamuno eta Ramón Barearen eskutik, Orkestrak musika eta literatura bat eginik berriz ere. "Hizkuntza Unibertsala" lelopean azken hilabeteotan gertatu den bezala, kontzertu honetan ere musikak hitza izango du lagun. Horretarako, Orkestrak lankide bikaina izango du: Ramón Barea, ibilbide luze zein emankorra egina duen aktore, zuzendari eta antzerki idazlea (2013ko Antzerki Sari Nazionala). Ildo berean, denboraldi honetan Orkestraren lankide izanak dira Harkaitz Cano, Amaia Zubiria eta baita zuzendari printzipal gonbidatu Andrey Boreyko ere, berak irakurri baitzuen errusieraz Stravinskyren egunkariaren zati bat.

François Proud Euskadiko Orkestrako fagot bakarlariak gau batez haize-zura ataleko bere tokia utzi eta Orkestraren bakarlari gonbidatu ariko da, Carl Maria von Weberren Fagot eta orkestrarako kontzertua interpretatuko duelarik. Instrumentu honen errepertorio murritzean ezin bestekoa, partitura honek agerian uzten du bere egileak opera konpositore gisa duen trebezia. Izan ere, fagotak tenore izaera du, zenbait pasartetan bakarlariaren birtuosismo erakustaldiak eskatzen dituzten pertsonaia ezberdinak interpretatzen dituelarik.

Guillermo García Calvok lehenbiziko aldiz zuzentzen du Euskadiko Orkestra. Madrildar zuzendariak, Abonu kontzertu honetan zuzentzeaz gain, maiatzaren 24an Errenteriako Musikaste-ko itxiera kontzertuan ere zuzenduko du Orkestra. García Calvok harreman estua izan du Vienako Estatu Operarekin 2004. urtetik, opera errepertorioko 50 lanetik gora prestatu dituelarik. Besteak beste, Vienako Orkestra Filarmonikoa, London Symphony Orchestra, Mexikoko Orkestra Nazionala, ORF Radio-Symphonieorchester Viena eta Esloveniako Orkestra Filarmonikoa zuzendu ditu eta baita espainiar orkestra nagusienak ere. Etorkizunerako bere konpromezuen artean, Vienako Estatu Opera Berlineko Deutsche Oper erakundearekin elkarlanak eta Espainiako Orkestra Nazioanalarekin debuta. 

Joan zen apirilaren 12an Varsovian izandako International Classical Music Awards (ICMA) 2014 sarien ekitaldian eman zen ezagutzera 2016 urtean musika klasikoaren europar sarien gala Donostian izango dela. Hautagaitza hau Euskadiko Orkestra Sinfonikoak bultzatu zuen Donostia/San Sebastián 2016 Fundazioaren laguntzarekin.
Musika klasikoaren "Grammy" sarien pareko, gala hau lehenbiziko aldiz izango da Espainian; ondorioz, Donostia eta, hedaduraz, Euskadi musika klasikoaren europar erdigunea bilakatuko dira.

Epaimahaia 13 herrialde ezberdinetako musika kritikok osatzen dute, musika klasikoaren alorrean erreferentziazkoak diren honako 17 komunikabide paperezko zein digitalen ordezkariak: Andante (Turkia), Classic Radio eta Rondo Classic (Finlandia), Crescendo (Belgika), Fono Forum (Alemania), Gramofon (Hungaria), IMZ (Austria), Kultura (Errusia), MDR-Figaro (Alemania), Musica (Italia), Musik & Theater (Suitza), Orpheus Radio (Errusia), Opera (Erresuma Batua), Pizzicato eta Radio 100,7 (Luxemburgo), ResMusica (Frantzia) eta Scherzo (Espainia).

Urtero 15 sari banatzen dira CD eta DVD formatuetan argitara emandako ekoizpen onenen artean (musika barrokoa, abesbatzarako musika, sinfonikoa eta abar) eta mundo osoko artisten ibilbideak ere saritzen dira; horrela musika ibilbide osoari saria emateaz gain, urteko artista, errebelazioa den artista edo urteko disko etxea ere saritzen dira.

Lehenbiziko sari banaketa ekitaldia Tampere-n (Finlandia) izan zen 2011. urtean eta Tampereko Orkestra Filarmonikoak antolatu zuen. Hurrengoa Nantes-en izan zen, Orchestre National des Pays de la Loire orkestrak antolatua. 2013. urtean, berriz, Milanen izan zen ekitaldia, Orchestre Sinfonica di Milano Giuseppe Verdi-k sustatuta. 2014an Varsovian izan berri da, Ludwig van Beethoven Aste Santuko Jaialdiaren baitan eta 2015ean Ankaran izango da, Bilkent Symphony Orchestra-ren Auditoriumean. Varsovian eman zen ezagutzera hain zuzen ere 2016an sari banaketa ekitaldia eta ondorengo gala kontzertua Donostian izango direla, Euskadiko Orkestra Sinfonikoaren eskutik eta Donostia/San Sebastián 2016 Europar Kultur Hiriburutzaren baitan.

Euskadiko Orkestra Sinfonikoa bere Abonu Denboraldiko hamaikagarren programarako entseguetan murgildurik dago egunotan. Jun Märklek zuzenduta, Wolfgang Amadeus Mozarten lanaren inguruko egitarau sinfoniko-korala eskainiko du. Obra nagusi Meza do maiorrean edo "Koroatze Meza" izango da; honen aurretik, La Clemenza di Tito operaren obertura eta 36. Sinfonia, "Linz" izango dira entzungai. Maiatzaren 12 eta 15ean Donostiako Kursaal Auditorioan, 13an Iruñeako Baluarten eta 15ean Gasteizko Principal Antzokian.

"Koroatzetarako musika" da Meza do maiorrean obraren inguruko programa honen izenburua; XIX. mende hasieratik "Koroatze Meza" bezala ere ezaguna da vienar gorte inperialean koroatze ekitaldietan erabilia izateagtik. Partitura hau interpretatzeko Orkestrak lankide izango ditu Marta Ubieta sopranoa, Marifé Nogales mezzosopranoa, Gustavo Peña tenorea eta Iñaki Fresán baxua. Xalbador Rallok zuzendutako Easo Schola ere ariko da, Easo Eskolaniako haurrek eta Easo Abesbatzako kideek osatzen dutena. Gainera, mezaren interpretazioan tartekatuta, Orkestrak Organo eta orkestrarako KV328 eta KV329 sonatak interpretatuko ditu estreinakoz, Oscar Candendo organojolearekin batera.

Mozarti eskainitako gau hauetako egitaraua osotzeko, kontzertua irekiz La Clemenza di Tito operako obertura izango da. Mozartek Leopold II Bohemiako Errege koroatze ekitaldirako konposatu zuen 1791. urtean, egitarauari oharretan jasotzen denaren arabera; obra hau ez zen bere garaian entzulegoaren oso gustoko izan eta duela gutxi ekin diote opera aretoetako programazioetan txertatzeari. Ondoren 36. Sinfonia izango da entzungai, Mozartek idatzi zueneko hiriari erreferentzia eginez "Linz" izenez ezaguna dena.

Aula Jordá Gela. Euskadiko Orkestrak eta Musikenek izenpetutako lankidetza hitzarmenaren baitan, Euskal Herriko Goi Mailako Musika Ikastegiko zuzendaritza ikasle talde batek Abonu programa honetarako entseguen esperientzia Jun Märkl maisuarekin partekatzeko aukera du egunotan. 

Euskadiko Orkestra Sinfonikoa eta Pirritx, Porrotx eta Marimotots estreinako aldiz ariko dira elkarrekin entzulego gazteenari pailazo-taldeak bere ibilbidean zehar jasotako doinuak oinarri harturik sortutako ikuskizuna eskaintzeko. Eszenatokian bat eginik, Pirritx, Porrotx eta Marimotots, Juan Luis Díaz-Emparanza, Esteban Urzelai eta Leticia Vergarak zuzendutako Orfeoi Txiki eta Orfeoi Gazte, Euskadiko Orkestra Sinfonikoa eta baita ezusteko gonbidaturen bat ere, guztiak Xabier Zabalaren musika zuzendaritzapean; bera da, izan ere, orkestrarako moldaketen eta hainbat doinuren egilea.

"Sentitu, pentsatu, ekin!" da ikuskizunaren izenburua eta 15 doinutik gora biltzen ditu, bertsio sinfonikoan. Hauen artean, "Maite Zaitut" kantu ezaguna eta baita "Abuela Maria Luisa", "Muxu-truk" eta "Eutsi goiari, ijito!".

Bost emanaldi 8.300 ikuslerentzat. Kontzertuak ekainaren 13tik 20ra izango dira, Gasteizko Principal Antzokian (13), Bilboko Euskalduna Jauregian (14), Iruñeako Baluarte Auditorioan (18) eta Donostiako Kursaal Auditorioan (20- 2 saio). Musika Familian zikloaren baitan, ikasturte amaierako festa bilakatutako emanaldi hauek emango diote amaiera Euskadiko Orkestraren Musika Gelaren denboraldiari. "Barrokino", "Gerra eta Pakea", "Sinfokeritan" eta "Serenata" dira ikasturte honetan zehar aurkeztutako ikuskizunetariko batzuk; azken hilabeteotan, itxiera festa honetara bertaratuko direla aurreikusitako 8.300 ikusleak kontutan izanik, guztira 12.800 pertsona izango dira Orkestraren Hezkuntza Departamentuak antolatutako jardueraren batean aritu direnak, haur, familia zein hezkuntza arloko ikusentzuleak.

Elkarlanean eta babesle. Azken kontzertu-sorta hau Donostian KURSAAL ESZENArekin eta Gasteizen bertako Udal Antzokien Sarearekin elkarlanean antolatzen da. Gainera, EUSKALTEL du babesle orokorra eta Donostiako bi saioek El Diario Vasco-ren babesa dute halaber.

Sarrerak salgai. Bilbo eta Donostiako kontzertuetarako sarrerak ohiko salmenta guneetan eros daitezke. Gasteiz eta Iruñeako kontzertuetarako sarrerak, aldiz, agorturik daude.

*Euskadiko Orkestra+FEVAS jarduera. Aipatu kontzertuez gain, "Sentitu, pentsatu, ekin!" ikuskizuna Euskadiko Orkestrak eta FEVASek (Adimen edo Garapen Ezintasuna dutenen aldeko Elkarteen Euskal Federazioa) aurten elkarlanean garatuko duten jardueraren ardatza izango da. Talde honetako 150 haurrei zuzendutako sei sentsibilizazio tailer burutuko dira eta, ondoren, ekainaren 12an, haur hauek "Sentitu, pentsatu, ekin!" ikuskizunaren entsegu orokorraz gozatzeko aukera izango dute. 

"Ametserako bariazioak" da maiatzaren 3an Trío Kalume hirukoteak Miramongo Matinéetan eskainiko duen kontzertuaren izenburua. Egitarauan Johann Sebastian Bachen Goldberg Bariazioak obraren hari hirukoterako bertsioa; baina kontzertuak izango du gehigarri bat, irudien proiekzioa, partitura ezagunaren interpretazioa ikusentzunezko emanaldi bilakatuz.

Musika lo ezaren kontra. Izan ere, Bachen hainbat biografiak diotenaren arabera, Goldberg Bariazioen jatorria alemaniar konte batek bere lo egiteko arazoei aurre egiteko asmoz eskatu zion partituran datza: musika hura kontearen klabikordista Johann Gottlieb Goldbergek interpretatuko zuen aristokrataren lorik gabeko gau luzeetan. Hortik Bariazioen izenburua, hasiera batean Bachek berak la partitura "Aria bariazio ezberdinekin bi teklatudun klaberako" izenburua eman bazien ere. Bariazioak oinarri harturik sortutako ezin konta ahala bertsioen artean, hari hirukoterako hau gehien interpretatzen direnen artean dugu eta jatorrizko partitura zehazki jarraitzen du.

Kalume hari hirukotea osatzen dute Takeshi Kanazawa (biolina), Gareth Lubbe (biola) eta Gabriel Mesadok (Euskadiko Orkestra Sinfonikoko biolontxelo bakarlaria). Goldberg Bariazioen interpretazio hau osotzeko espreski sortutako irudiak Birgit Rampe publizistaren lana dira.

Kontzertu honetarako sarrera solteek 7€ko prezio bakarra dute eta www.kutxabank.es eta, kontzertuaren egunean, Orkestraren egoitzako leihatilan erosi ahalko dira.

Miramonera autobusez. Euskadiko Orkestrak Matinéetako publikoaren esku doan jartzen duen autobus zerbitzua da Miramongo egoitzara heltzeko biderik erraz eta erosoena. Matinéea dagoen egunetan bakarrik erabilgarri den garraiobide hau 10:25etan abiatzen da Gipuzkoa Plaza 4tik eta geldialdiak egiten ditu Antso Jakituna 18 eta Madrilgo Hiribideko 34ean.

Vicomtech-IK4 (Ikus-elkarrekintzako eta Komunikazioko Teknologien Zentroa) erakundeak eta Euskadiko Orkestra Sinfonikoak lankidetza akordio bat izenpetu dute, gure gizartearen bizimoduaren garapena zein garapen profesionala ahalbidetuko duten ikerketa-bide berriak aztertzeko asmoz.

Bi erakundeek, Vicomtech-IK4 eta Euskadiko Orkestra Sinfonikoak, hurrenez hurren, gure komunitatearen garapen teknologikoarekiko eta hezkuntza nahiz kultur garapenarekiko duten konpromezua partekatzen dute. Horregatik, batasun honi esker lankidetza arlo garrantzitsuei bide egingo zaie, esaterako, musika egun garatzen ari diren aukera teknologiko berrien zerbitzura jarri eta erabiliz.

Apirilaren 29 asteartean Euskadiko Orkestraren Miramongo egoitzan master class berri bat izango da, Orkestrak Aula Jordá Gela izena harturik Euskal Herriko Goi Mailako Musika Ikastegiarekin (Musikene) izenpetutako lehentasunezko lankidetzarako hitzarmenaren baitan burutzen dituen jardueren artean.

Egunotan Abonu Denboraldian bakarlari gonbidatu ari den Alexandre Da Costa biolinjotzaile kanadarra Musikeneko zortzi ikaslerekin elkartuko da, hauei nazioarte mailan ibilbide zabala duen bakarlari batekin aritzeko aukera eskainiz.

Denboraldi honetan zehar Aula Jordá Gela ekimenaren baitan aurrez antolatutako master class ezberdinetan aritu dira Milos guitarrista, Emmanuelle Bertrand biolontxelojotzailea eta José Miguel Pérez Sierra eta Michal Nesterowicz orkestra zuzendariak. Egun gutxi barru Jun Märkl zuzendariak itxiko du master class ziklo hau.

Bideoan Alberto Palacín Musikeneko ikaslea Euskadiko Orkestra zuzentzen, José Miguel Pérez Sierra zuzendariak eskainitako master class-ean.

"Inspirazioaren bila" izenburu harturik, Euskadiko Orkestrak bere Abonu Denbolradiko hamargarren kontzertu-programari ekingo dio. Apirilaren 28tik maiatzaren 3ra bitartean, EOS estreinakoz zuzenduko duen John Axelrod maisuaren zuzendaritzapean ariko da, Alexandre Da Costa biolinjotzailea bakarlari gonbidatu dela. Atriletan, P. I. Tchaikovskyren Biolin eta orkestrarako kontzertua eta R. Schumannen 4. Sinfonia. Apirilaren 28an Iruñeako Baluarten, apirilaren 29an eta maiatzaren 3an Donostiako Kursaalean, apirilaren 30ean Bilboko Euskaldunan eta maiatzaren 2an Gasteizko Principalean.

Alexandre Da Costa biolinjotzailea (Montreal, 1979) Charles Dutoit zuzendariak eman zuen ezagutzera oso gazte zela. Milatik gora dira bakarlari gisa eskaini dituen kontzertuak Europa, Asia, Australia eta Ipar Amerikan, Vienako Musikverein, Berlingo Philharmonie edo New Yorkeko Carnegie Hall areto ospetsuetan, Royal Philharmonic, Berliner Symphoniker eta Wiener Symphoniker orkestrekin lankidetzan, besteak beste. Hautes-Laurentides-eko (Kanada) Jaialdi Klasikoko zuzendari artistikoa da.

2013/2014 denboraldi honetan errezital bat eskaini du Miramongo Matinéeak zikloaren baitan eta Orkestraren lehenbiziko biolin gisa aritu da bi Abonu-programatan. Orain bakarlari gonbidatu dator gurera, Piotr Ilich Tchaikovskyren Biolinerako kontzertua re maiorrean interpretatuko duelarik. Errepertorioko obrarik ezagunenetariko bat, partitura hau "Le Concert" filman da entzungai; luzemetrai arrakastatsu honek Bolshoieko musikari zaharrek Parisen eskainiko duten kontzertu baten prestaketa kontatzen du. Alexandre Da Costak egun 1730eko Guarnerius Del Gesu biolina jotzen du, Sartory arku batekin, Canimex erakundeari esker.

Aula Jordá Gela egitasmoaren barnean burutzen diren jardueren artean, Alexandre Da Costak master class bat eskainiko die Musikeneko zortzi ikasleri. Topaketa apirilaren 29an izango da, Euskadiko Orkestraren egoitzan.

John Axelrod zuzendaria Milango Giuseppe Verdi orkestraren zuzendari printzipala da egun. Aurrez Lucernako Orkestra Sinfonikoaren zuzendari printzipal eta Orchestre National des Pays de la Loire orkestraren musika zuzendari gisa nabarmendu zen. Zuzendari gonbidatu bezala, ehun orkestra baino gehiago zuzendu ditu eta musika profesional gazteekiko duen konpromezua aipatzekoa da halaber, Orchestra Giovanile Italiana, Accademia della Scala, Nord Deutsche Junge Philharmonie, Sinfonia Iuventus eta Vienna Jeunesse Orchester.

Kontzertuetako egitaraua osotuz, Robert Schumannen 4.Sinfonia izango da entzungai bigarren zatian.

Kontzertu hauetarako sarrerak internet bidez eros daitezke, www.kutxabank.es webgunean Donostia, Bilbo eta Gasteizko kontzertuetarako sarrerak eta www.ticketmaster.es webgunean, berriz, Iruñeako kontzerturako sarrerak; halaber, kontzertu aretoetako leihatiletan ere eskura daitezke. 7 eurotik aurrera.

Miramongo Matinéeak zikloak Urval Ensemble klarinete-laukotearen proposamena hartuko du berean apirilaren 12 larunbatean. "Esentzia da gauzen natura, haietan etengabe eta aldagaitz dena, eraketa ororen funtsezko printzipioa". Honela aurkezten du Urval Ensemblek larunbatean Miramonen eskainiko duen emanaldia.

Urval Ensemblek Euskadiko Orkestraren egoitzako eszenatokira dakarren egitarauan, hasteko Aita Donostia eta Jesús Guridi: bi euskal musikagileok folkloreak euren lanetan izan duen garrantziaren adibide argiak dira, gustu ona, inspirazio berezia, dotoretasuna eta originaltasunarekin aberastuz. Jean Françaix, berriz, estilo argi eta burutsu batekin, klarinetearen alorrean, mundu osoan gehien interpretatu den frantziar musikagileetako bat da. Eta gaur egun, irratia eta telebista ere esentzial bilakatu diren honetan, Patrick Hiketick polifazetikoak musika asko sortzen du horietara bideratuta, antzerkirako idatzi eta baleterako konposizio sinfonikoak burutzeaz gain. Horiek guztiak bilduko ditu Urval Ensemblek Miramongo Matinéetan eskainiko duen estreinako kontzertuan.

Urval Ensemble Jasone Etxebeste, Marixi Sesma, Carlos Casadó eta Mikel Emezabal klarinete-jotzaileek osatzen dute. Lau musikariek Zumaiako "Klarinete Maratoia" hezkuntza-egitasmoaren baitan egin zuten bat. 2002an sortua, ekimen honek klarinetearen zabalkundea eta irakaskuntza ditu helburu nagusi. Aita Donostiaren kantuak aitzaki hartuta, bere eremu geografikotik kanpo euskal kultura sustatzeko eta hedatzeko asmoz, kontzertuak eskaintzeko hainbat lekutan gonbidatua izan da Urval Ensemble, bai Euskal Herrian eta baita kanpoan ere; León, Ávila, Lincoln (Estatu Batuak), Gante (Belgika) eta Assisi (Italia) besteak beste.

Kontzertu honetarako sarrera solteek 7€ko prezio bakarra dute eta www.kutxabank.es eta, kontzertuaren egunean, Orkestraren egoitzako leihatilan erosi ahalko dira.

Miramonera autobusez. Euskadiko Orkestrak Matinéetako publikoaren esku doan jartzen duen autobus zerbitzua da Miramongo egoitzara heltzeko biderik erraz eta erosoena. Matinéea dagoen egunetan bakarrik erabilgarri den garraiobide hau 10:25etan abiatzen da Gipuzkoa Plaza 4tik eta geldialdiak egiten ditu Antso Jakituna 18 eta Madrilgo Hiribideko 34ean.