Azaroak 2an kobratuko dira 2009/2010 denboraldiko abonu-txartelen ordainagiriak.

Abonu-Denboraldiarekin batera, Miramongo Matinéeak zikloak kalitatezko musika funtsatzat duen beste eskaintza aurkezten darrai larunbataz larunbata, ganbera-musikaren inguruko proposamen interesgarriak taularatuz. Larunbata honetan (urriak 24), "Matiegkaren mamua" izenburu iradokitzailearen pean, EOSeko kide diren Carlos Rosat, Pascal Arnaud eta Jon Larrazek eta Eduardo Baranzano gitarrajoleak osatutao BRAL Laukoteak J. Kreutzer, F. Molino eta F. Schubertek flauta, gitarra, biola eta biolontzelorako idatzitako hainbat lan interpretatuko ditu. Kontzertua, Matinéen zikloko oro bezala, goizeko 11etan izango da Euskadiko Orkestrak Miramonen duen egoitzan.  

Miramongo Matinéea. "Matiegkaren mamua". Urriaren 24, 11.00etan Orkestrak Miramonen duen Egoitzan.

Euskadiko Orkestra Sinfonikoak egunotan jarriko du abian bere 28. Abonu-Denboraldia (bihar 23 Iruñean, osteguna 24 Gasteizen, ostirala 25ean Bilbaon eta 28 eta 29an Donostian), jada bere zuzendari titularra den Andrés Orozco-Estradaren eskutik. Estreinako kontzertu-programa Euskadiko Orkestra Sinfonikoak orain hastenb duen aro berriaren erakusle argia da. Titular gisa bere lehenbiziko parte-hartzean, Andrés Orozco-Estradak estreinaldiz betetako arratsalde bat egituratu nahi izan du, horretarako Beethoven eta Mahlerrek idatzitako lehenbiziko sinfoniak, hau da, sinfoniaren arloan bi musikagile hauen debuta izan ziren obrak programatuz.

Zentzu honetan, aipagarria da programazio berriaren ezaugarrietako bat denboraldi oso sinfonikoa marraztu izana dela, etengabe asmo honi erantzuten dioten eta errepertorio erromantiko zein klasikotik eratorriak diren obra handien interpretazioarekin. Horien artean, Denboraldia irekiko duten Beethoven eta Mahlerren lehenbiziko sinfoniak.

2009/2010 Denboraldia. Guztira hamalau kontzertu-programa izango dira denboraldi osoan zehar, ekaina bitartean, Gasteiz, Bilbao, Donostia eta Iruñean aurkeztuko direnak. Denboraldia kontzertu-programa inspiratuek eta musika-eszenaren izen handiek osatuko dute, azken hauen artean Hélène Grimaud, Janine Jansen edo Frank Peter Zimmermann bezalako bakarlarikak eta Paul McCreesh, Yakov Kreizberg edo Lawrence Foster zuzendari gonbidatuak  izango direlarik. Gainera, Andrey Boreyko Orkestraren Zuzendari Printzipal Gonbidatu berriak Denboraldi berriko bi programa zuzenduko ditu.

Denboraldiko gainerako jarduerei dagokienez, Euskadiko Orkestrak irteera bakar bat burutuko du, Madrilgo Auditorio Nazionalera. Gainera, ekimen ugari burutzen jarraituko du, horien artean nobedade garrantzitsuak, esaterako "Musika Laborategi" baten sorkuntza, diska-ekoizpenen ildo berri baten hasiera eta J. Guridiren "Mirentxu" operaren aurkezpnea eta ondorengo grabaketa.

Euskadiko Orkestra Sinfonikoak Estatuko orkestra sinfonikoen artean erreferentziazkoak diren zenbakiekin ekingo dio denboraldi berriari. 7.000 abonatu fideletaz gain, %92ko okupazioa du bere jardueretan eta baita 600 lagun inguruko itxarote-zerrenda ere. Euskadiko Orkestrak 3 milioi ikusle hartzera eta 3.000 ikusgarri ematera iristear dagoela ekingo dio bere 28. denboraldiari. 

Euskadiko Orkestra Sinfonikoa bere Abonu-Denboraldiko hirugarren programa prestatzen dihardu egunotan. Honi dagozkion kontzertuak Donostiako Kursaalean (urriaren 15 eta 16an) eta Iruñeako Baluarten (urriaren 17 larunbata) izango dira soilik.

Lehenbiziko aldia da David Guerrier tronpeta eta tronpajole frantziar gaztea Euskadiko Orkestrarn denboraldian aritzen dela. Birtuoso hau orkestra handiekin aritu da jada lankidetzan, horien artean Bordeleko Nazionala Hans Grafekin, Capitole de Toulouse, Moskuko Ganbera Orkestra, Ensemble Orchestral de Paris, Radio Franceko Filarmonikoa Christian Zachariasekin, Frantziako Nazionala Yoel Levi eta Kurt Masurekin, Luxembourgeko Filarmonikoa Emmanuel Krivinekin, Belgradokoa Gabriel Chmurarekin, NDR Hannover eta abar. Oraingo honetan, Guerrierek J. Haydnen Tronpeta eta orkestrarako kontzertua mi bemol maiorrean, HOB VII:1 (H.C. Robbins Landonek argitaratua) interpretatuko du Orkestrarekin batera. Kontzertu honena da gaurdaino gorde diren Haydnen haizerako kontzertuetako bi eskuizkribuetako bat.   

Kontzertuak Paul McCreesh britainiarrak zuzenduko ditu. Hirugarren aldia da Gabrieli Consort and Players taldearen sortzaile eta zuzendari artistikoa den maisu gailen honek Euskadiko Orkestra zuzentzen duela. McCreeshen lana instrumentu orijinalen arloan bakarrik ez, musika sinfonikoaren eta operan alorrean ere da aipagarria, bere interpretazio sendo zein berriztatzaileei esker. Gabrieli Consort and Players taldearekin batera kontzertu areto garrantzitsuenetan eta mundu osoko jaialditan aritzeaz gain, hainbat diska grabatu du Deutsche Grammphon disko etxearekin.

Kontzertuen egitaraua Walk to the Paradise Garden lanak irekiko du. Frederick Deliusen laugarren opera den A Village Romeo and Juliet-en bosgarren eta seigarren eszenen arteko interludio orkestral hau "obra honen zatirik ezagunena da", Egitarauari oharren egile den Juan Manuel Vianaren hitzetan. Jarraian Haydnen Tronpeta eta orkestrarako kontzertua izango da entzungai eta, jada kontzertuaren bigarren zatian, Edward Elgarren Lehenbiziko Sinfonikoak osotuko du egitaraua. Partitura hau "garai modernoetako sinfonia hadiena"tzat jo zuen bere garaian Hans Richter austriar zuzendariak eta estreinatu ostean lortu zuen arrakasta hainbestekoa izan zen non urte bakar batean ia ehun bider izan baitzen interpretatua mundu osoan barrena.

Estreinako kontzertuan musika garaikidean murgildu ostean, Miramongo Matinéeak zikloak oraingoan begirada atzera botako du, Ma non troppo ganbera orkestraren eskutik, musikaren historian erabakiorra izan zen garai baten oihartzunak Euskadiko Orkestraren egoitzara ekartzeko: Barrokoarenak, hain zuzen ere.

Hastapenetan "barroko" adjektiboa arte edo estilo hura modu gutxiesgarrian definitzeko erabili zen, ondoren iritsiko zen garai klasikoko ezaugarri ziren simetria eta orekaren ikuspuntutik, Barrokoko musika oparoegi eta grotesko samartzat jo baitzuen hainbat musikarik. Baina egun zentzu hori gainduturik dago erabat eta musikaren historiako aro iraultzaleenetariko bat bezala hartzen da Barrokoa. Larunbata honetan, hilak 10, garai emankor haren berri izango dugu orduko instrumentu ezberdinak entzunez.

Honela, kontzertu honek ahaztutako instrumentu ezberdinak berreskuratuko ditu, halanola oboe d'amore delakoa, EOSeko kide den Rafael Alonsok interpretatuko duena, Georg Philip Telemannek musika-tresna honentzat idatzitako kontzertuaren bidez, eta baita klabea, Pedro José Rodríguezek joko duena, eta Eli Podolakek interpretatuko duen aintzinako zeharkako flauta ere, hauek biak Johann Sebastian Bachen Bradenburgeko 5. kontzertuaren bidez. Musika-instrumentu hauek XVII. mendean eta XVIII.aren lehenbiziko erdian bizi izan zuten beren goreneko aldia, gerora tresna garatuagoek ordezkatuak izatean hauek erabiltzeko ohitura galdu zelarik. Emanaldia irekitzeko entzungai izango den Antonio Vivaldiren bi biolontxeloentzako kontzertuaren bidez, berriz, Barrokoan gailendu eta, besteek ez bezala, bere garrantzia gaur arte mantendu duen biolontxeloaz gozatzeko aukera izango dugu. Oraingo honetan EOSeko kide den Jon Larraz eta orkestra honen lankide sarria den Elena Escalza biolontxelojoleak izango dira "Ma non troppo" orkestrarekin bakarlari gisa arituko direnak.

Sarrera solteak salgai. Miramongo Matinéeak zikloaren 2009/2010 denboraldia osatzen duten 16 kontzertuetarako sarrera solte bakoitzaren salneurria 6,00 €koa da eta Servikutxa, Telekutxa (943 00 12 00), www.kutxa.net eta www.euskadikoorkestra.es helbideetan eskura daitezke, eta baita Egoitzaren leihatilan, kontzertu egunean 10:30etatik aurrera.

Denboraldi berri honek ere doako autobus zerbitzua izaten jarraituko du, 10:25etan Gipuzkoako Plazako 4.zenbakitik atera eta Atso Jakituna Hiribideko 18. zkian eta Madrilgo Hiribideko 34.ean geldialdiak egingo dituelarik.

Euskadiko Orkestra Sinfonikoak bere bigarren kontzertu‑programari ekingo dio, orain dela egun batzuk hasi zen Abonu Denboraldiaren baitan. Kontzertuak hilaren 5ean eta 8an izango dira Donostian, hilaren 6an Gasteizen, 7an Bilbon, eta, azkenik, urriaren 10ean Iruñean. Denboraldia Andrés Orozco‑Estradak inauguratu zuen; aldiz, bigarren programa, Hélène Grimaud pianista protagonista nagusi duena, Andrey Boreyko orkestraren zuzendari printzipal gonbidatuak zuzenduko du.

Hélène Grimaud (www.helenegrimaud.com), nazionalitate frantsesekoa eta Estatu Batuetan bizi dena, nazioarteko pianistarik garrantzitsuenetakotzat jotzen dute adituek. Bakarlari aritzen da munduko orkestrarik onenetan eta ospe handieneko zuzendariekin. Deutsche Grammophon diskoetxearentzat soilik grabatzen du 2002 ezkero, eta artista polifazetiko eta karismatiko hutsa da. Harentzat, musika mugarik gabeko pasioa da; ez, ordea, pasio bakarra. Izan ere, interpretatzaile handi horrek, aparteko marketin‑estrategia garatu duenak, otsoekiko pasioa ere badu; haren esanetan, lotura berezia du otsoekin. Wolf Conservation Center otso‑haztegia sortu zuen Estatu Batuetan, espeziea babesteko.

Hélène Grimaudentzat izango da, hain zuzen ere, Rachmaninov‑en piano eta orkestrarako bigarren kontzertuan bakarlari‑lanak egingo ditu. Kontzertu hori zailenetako bat da adituen esanetan. Izan ere, konpositorea pianoa jotzen aparteko birtuosoa zen eta pianorako nahiz orkestrarako izugarrizko pasarteak idatzi zituen partituran.

Hélène Grimauden emanaldiaren ondoren, orkestrak beste errusiar baten, P.I. Txaikovskiren, Lehen Sinfonia joko du kontzertuaren bigarren zatian. Txaikovskik gaztetan idatzi zuen sinfonia hori, San Petesburgoko Kontserbatorioan ikasketak amaituta Moskun eskolak ematen hasi eta handik urtebetera. Errusiar peto‑petoa izango den programa honetan, batutarik onenak hartuko du parte, Andrey Boreyko Euskadiko Orkestra Sinfonikoaren zuzendari printzipal gonbidatuarenak, alegia.

Bigarren Abonu Programako kontzertuak
Urriaren 5a eta 8a: Kursaal Auditoriuma. Donostia. 20:00.
Urriaren 6a: Principal Antzokia. Gasteiz. 20:00.
Urriaren 7a: Euskalduna Jauregia, Bilbo. 20:00.
Urriaren 10a: Baluarte Auditoriuma, Iruñea. 20:00.

Programa
S. Rachmaninov: Piano eta orkestrarako 2. kontzertua
P. I. Txaikovski: 1. sinfonia "Neguko ametsak"

Andrey Boreyko, zuzendaria   
Hélène Grimaud, pianoa

Euskadiko Orkestra Sinfonikoak ia bazkalostean, arratsaldeko lauretan aurreko emanaldietan hain harrera beroa merezi izandako orkestra gonbidatuaz gozatzeko, Milango Auditorioan bildutako entzulegoaren babespean interpretatu zituen bira honetako azken akordeak. Bertan bildutako melomanoen artean, bat berezia benetan: Antonello Allemandi orkestra-zuzendari milandarra. Jende kopuru handiena bildu zuen kontzertu honetan, EOSek bere zuzendari Andrés Orozco-Estradarekin konplizitate bizian ederki defendatu zuen beste behin Yura Lee hegokorearrak biolinaz interpretaturiko Sibeliusen, Lauzurikaren eta Brahmsen obrek osatutako egitaraua.

Konplizitate hori, Maisuaren eta Orkestraren arteko enpatia sakon hori ageriko egin zen, ez bakarrik eszenatokian, baita kontzertua amaitu ostean, hainbat musikari Orozco-Estrada Maisuari zoriondu eta egindako lanagatik eskerrak ematera hurbildu baizitzaizkion. Zuzendariaren eta musiakarien arteko sintonia biribilak arrakastaz eta lorpenez beteriko etorkizun oparoa iragartzen du Euskadiko Orkestra Sinfonikoarentzat.

Euskadiko Orkestra Sinfonikoak bikain gaindutu zuen bart arratsean Milango Auditorioan ospatutako kontzertua. Italian barrena burutzen ari den lehenbiziko birako kontzertuetan nagusiena zen hau Orchestra di Milano Giuseppe Verdi delakoaren Abonu-Denboraldiaren baitan ospatutako bigarrena izan zen. Kontzertu ederrak eta Orkestrari erabat emandako entzulegoaren erantzun atseginak Orkestraren zuzendari titular berria den Andrés Orozco-Estradak emanaldia amaitu ostean agertutako poz eta gogobetetasunean izan zuten isla.

Soinu biribil eta trinkoa. Maisuak Orkestrak lortutako soinu biribil eta trinkoa musikarien eta bere artean, elkar ezagutuz doazen heinean, sortuz doan konplizitate artistiko sakonaren emaitza dela adierazi zuen atseginez. Etorkizun handiko eta erabat emankor gertatuko den konplizitate hau ziztu bizian ari da finkatzen, bart Milanen euskal musika eta unibertsala, egungoa eta klasikoa ederki uztartu zituen kontzertuan entzundakoaren arabera. Kontzertu gogoangarri hau txalo-zaparrada luze bati erantzun gisa interpretatutako Guridiren "Amorosa"rekin amaitu zen. Orozco-Estrada maisuaren hitzetan "zerutiarra, beti hunkigarria" gertatzen den partitura honen interpretazioa bikaina izan zen eta hunkigarritasun hori Orkestrarekin bat egin zuen entzulegora iritsi zen. Milandar entzulegoa txunditurik gelditu zen ordurarte ezezaguna zitzaion Euskadiko Orkestrarekin eta, kontzertuaren ostean esandakoaren arabera, aurrerantzean ere gure Orkestraren oroimen ederra gordeko du. L'Unitá egunkariaren kritikoa den Paolo Petazzi bera ere, munduko orkestra gailenenak entzutera ohitua, Orkestraren kalitateak liluraturik agertu zen.

Kontzertua Antonio Lauzurikaren "Cuaderno de viaje" lanak ireki zuen. Italian barrena burutzen den bira honetarako hain izenburu aproposa duen obra hau duela gutxi estreinatu zuen EOSek. Ondoren Sibeliusen "Biolinerako kontzertua" izan zen entzungai eta Yura Lee biolinjole hegokorearrak Bachi eskainitako pieza batekin eskertu zuen jasotako txalo-zaparrada eskerga. Egitaraua Brahmsen 1. Sinfoniak itxi bazuen ere, bart gauetik Euskadiko Orkestraren historian mugarri berri bilakatu den kontzertu bikaina jada aipatu "Amorosa"k itxi zuen.

Gau instituzionala. Atzoko kontzertua erakunde ezberdinen ordezkarien topagune izan zen. Bertan izan ziren Eusko Jaurlaritzako Kultura Sailburua eta Orkestraren Presidentea den Miren Azkarate, Kultura Sailburuordea den Gurutz Larrañaga, Milanen Espainiako Kontsula, Santiago Salas, Milango Cervantes Institutuko Zuzendaria, Víctor Andresco, Giuseppe Verdi Orkestrako presidentea den Corbani jauna eta biraren babesle den Ingeteam taldeak bertan dituen ordezkari gorenak, taldeko Marketing Korporatiboko Zuzendaria den Eduardo Giménez buru zutela.

Kontzertuaren aurretik, Orkestrako kideek Teatro alla Scala delakoa bisitatzeko aukera izan zuten, hiriko beste hainbat toki aipagarriren artea, esaterako Il Duomo edo Vittorio Emmanuelle galeriak.

Gaur larunbata, Orkestra Cremonara abiatuko da bertako Teatro Comunalle A. Ponchielli delakoan kontzertu bat eskaintzeko. Hiri hau musika klasikoaren alorrean hainbesteko garrantzia izan zuten Stradivari eta Guarneri familien jaioterri izateagatik da ezaguna. Bihar igandea Orkestrak hirugarren kontzertua ospatuko du Milango Auditorioan eta emanaldi honekin itxiko du Italian barrena egindako lehenbiziko bira.