Irailaren 23 ostegunean eta ostiralean, hilak 24, Bilbo eta Gasteizen izango dira Euskadiko Orkestraren 2010/2011 Abonu-Denboraldiaren estreinako kontzertuak. Lehendabiziko Abonu-programa honetan, Vadim Repin biolinjotzaile gailenak debuta egingo du Euskadiko Orkestraren bakarlari gonbidatu gisa, Andrés Orozco-Estrada maisuaren zuzendaritzapean. Vadim Repin-ek nazioarte mailako orkestra nabarmenenekin jo du, esaterako Berlin, New York eta San Petesburgoko filarmonikoak edo Londres, Boston eta Chicagoko orkestra sinfonikoak zein Scala-ko Orkestra. Zuzendu dutenen artean, berriz, Ashkenazy, Boulez, Dutoit, Chailly, Eschenbach, Gergiev, Masur, Mehta, Nagano, Rattle eta abar. Oraingo honetan, Repinek L.V. Beethovenen Kontzertua biolin eta orkestrarako re maiorrean, opus 61 interpretatuko du. Kontzertu hauetako egitaraua A. Dvorák-en 7. Sinfonia re minorrean, opus 70 obrak osotuko du.

Joana Carneiro eta Momo Kodamak irekiko dute Abonu-Denboraldia Iruñea eta Donostian. Irailaren 29an Iruñean eta irailaren 30 eta urriaren 1ean Donostian, Orkestrak Abonu-Denboraldiari hasiera emango dio bi hiri hauetan Berkeleyko Orkestra Sinfonikoko musika-zuzendaria eta Gulbenkian Orkestrako zuzendari gonbidatu ofiziala den Joana Carneiroren zuzendaritzapean eta Momo Kodama pianojotzailea bakarlari gonbidatua izanik.

Orain hastear dagoen Abonu-Denboraldia Andrés Orozco-Estrada zuzendari titular gisa eta Andrey Boreyko zuzendari printzipal gonbidatua dela abian jartzen den bigarrena da. Biek zuzenduko dituzten programez gain, hainbat zuzendari gonbidatu etorriko da gurera: Howard Griffiths, Oleg Caetani, Jean-Christophe Spinosi, Eduardo Portal, Iker Sánchez, IX. Cadaqués-ko Nazioarteko Zuzendari Lehiaketan garaile suertatutako Michal Nesterowicz eta hamar denboralditan Orkestraren zuzendari titular izandako Gilbert Varga. Repin eta Kodamaz gain, datozen hilabeteotan bakarlari nabarmenak entzuteko aukera izango dugu: Julian Rachlin, Daniel Hope eta Luis Esnaola biolin-joleak, Arcadi Volodos eta Khatia Buniatishvili piano-joleak, Johannes Moser biolontxelojolea eta Branford Marsalis iparramerikar saxofoi-jotzaile handia. Honetaz gain, Euskadiko Orkestrako bakarlari diren Bruno Claverie (flauta) eta Pascal Laffont-ek (oboea) programetako bat interpretatuko dute. Errepertorio sinfoniko-koralari dagokionez, azpimarragarria da Beethoven-en 9. Sinfonia interpretatuko duen lehen mailako abeslari-taldea: Ainhoa Garmendia, Itxaro Mentxaka, José Ferrero eta Attila Jun eta Bilboko Koral Elkarteak osatzen dutena, alegia. Bestalde, Christiane Karg sopranoa Orkestrarekin batera arituko da Mahler-en 4. Sinfonian. Goreneko unetariko bat Malandain Ballet Biarritz -en "Magifique. Suites Tchaikovsky" ikuskizunarekin helduko da. Aparteko aukera izango da zuzeneko musikaz jantzitako dantzaz gozatzeko, Orkestrak zulogunean dela interpretatuko baititu Tachaikovskyren balleten suiteak. Euskal konpositoreei dagokienean, aipagarriak dira Jesús Eguigurenek Orkestraren enkarguz idatzitako Kindly Symphony obraren erabateko estreinaldia, Pascual Aldaveren Nerabe sorta lanaren interpretazioa eta baita Valentín de Zubiaurreren bi obra laburrena ere. Azken bi obra labur hauek Orkestrak grabatutako azken diskan agertzen dira. Programatariko batek Euskadiko Orkestraren lehenengo zuzendari eta bultzatzaile izandako Enrique Jordá omenduko du, bere jaiotzaren mendeurrena betetzearekin batera. Guzti honetaz gain, Orkestraren Abonu-Denboraldian bi orkestra gonbidatu arituko dira: Extremadurako Orkestra, bere zuzendari titular Jesús Amigorekin eta Alexandre da Costa biolin-jolearekin arituko dena, eta Düsseldorfer Symphoniker orkestra, bere zuzendari titularra den Andrey Boreykok berak zuzenduko duena, Khatia Buniatishvili bakarlari dela.

Abonu-Denboraldiko 1. programa
Irailaren 23a: Euskalduna Jauregia, Bilbo. 20:00etan.
Irailaren 24a: Principal Antzokia, Gasteiz. 20:00etan.

Egitaraua
Antonin Dvorák (1841-1904)
7. Sinfonia re minorrean, opus 70 [36']
Ludwig Van Beethoven (1770-1827)
Kontzertua biolin eta orkestrarako re maiorrean, opus 61 [42']

Andrés Orozco-Estrada, zuzendaria
Vadim Repin, biolina

Euskadiko Orkestra, zuzendari titular Andrés Orozco-Estradaren zuzendaritzapean, bere Euskal Konpositoreen Bildumako hamalaugarren bolumena izango denaren grabaketan murgildurik dago aste honetan, Pedro Sanjuán musikagile eta zuzendariari eskainitako monografikoaren grabaketan, hain zuzen ere.

Euskal Konpositoreen XIV. bolumena, Pedro Sanjuán (1886-1976). Donostian jaiotako konpositore eta zuzendari honek oso gaztetan ekin zion solfeo eta biolina ikasteari Madrilen. Madrilgo Orkestra Sinfonikoko kide bilakatu eta berehala lehenbiziko biolin izatera iritsi zen. Ondoren Parisera aldatu zen ikasketak jarraitzeko. Madrilera bueltatu zenean bere lana orkestra-zuzendaritzaren alorrean garatzea erabaki zuen. Madrilgo Orkestra Sinfonikoa eta Filarmonikoa zuzendu zituen eta hauekin bere hainbat musika-lan estreinatu zuen, horrela bere burua konpositore gisa ere ezagutzera eman zuelarik. 1923an Kubara aldatzea erabaki zuen eta urtebete beranduago Habanako Orkestra Filarmonikoa sortu zuen, hamar urtez zuzendu zuena. Kubatar musikaren bultzatzaile izan zen, idazten zituen lanetan erritu eta melodia beltzak islatuz, eta kubatar konpositore handien eskola eratu zuen. Guzti honengatik, Kuban bertako musikaren mugimenduaren sortzailetzat jotzen dute eta kubatar egileek Pedro Sanjuán-ek Habanako Orkestra Filarmonikoa sortu izana kokatzen dute kubatar musika garaikidearen sorburu gisa. Kuban idatzi zituen bere obra nagusiak eta horien artean aipagarria da Liturgia negra, honekin lortu baitzuen 1934an Espainiako Musika Sari Nazionala. Espainiar gerra zibila hasi zenean Pedro Sanjuán Parisen zegoen eta, errepublikaren aldekoa izanik, Estatu Batuetara erbesteratzea erabaki zuen. Bertan bizi izan zen hil zen arte.

Sanjuánen musika lanak Orkestraren Euskal Konpositoreen Bildumaren zati izatera pasako dira orain. Honela, bere zuzendari titularra den Andrés Orozco-Estradaren zuzendaritzapean, Orkestra Rondo fantástico, Castilla, Macumba eta Liturgia Negra grabatzen ari da.

Euskal Konpositoreen Bildumako gainerako bolumenak bezala, diska hau Claves disko etxeak argitaratuko du, MONDRAGON KORPORAZIOAren babespean. Baina aurretik, udazkenean Bildumako XIII. bolumena aurkeztuko da, Valentín Zubiaurreri eskainitakoa.

Grabaketa
2010eko irailaren 13tik 17ra, Orkestraren Miramongo Egoitzan.

Egitaraua
Pedro Sanjuán (1886-1976)
Rondo fantástico
Castilla
Macumba
Liturgia negra

Euskadiko Orkestra Sinfonikoa
Andrés Orozco-Estrada, zuzendaria
Disko-etxea: Claves

Datorren ostegunean, hilak 2, Orkestrak kontzertu bat eskainiko du 71. Donostiako Musika Hamabostaldiren programazioaren barruan. Kursaal Auditorioan 20.00etan izango den kontzertua Aris Rasilainen maisuak zuzenduko du Andrés Orozco-Estradaren ordez, azken hau gaixorik baitago. Zuzendari finlandiar honek Orkestra zuzentzen duen lehenbiziko aldia da. Rasilainen eskandinabiar zuzendarien artean onenetarikoa da. Bere irakasle izan ziren Jorma Panula, Jansons (zuzendaritza) eta Alexander Labko (biolina), besteak beste. 1989an, Kopenhageko Nicolai Malko nazioarteko lehiaketan bigarren saria lortu zuen. Zuzendari karrera hasi baino lehen, biolinista izan zen Finlandiako Irratiko Orkestra Sinfonikoan eta Helsinkiko Orkestra Filarmonikoan (1980-1986). 2002ko urtarrilaz geroztik Alemaniako Ludwigshafen-go Staatsphilharmonie Rheiland-Pfalz Orkestrako zuzendari titular eta artistikoa da.

Orkestrarekin batera José Manuel Tifek zuzentzen duen Andra Mari Abesbatza arituko da. Bi erakunde hauek Musika Hamabostaldian elkarrekin aritzen diren hamazazpigarren aldia dugu honako hau. Halaber, Károly Szmerédy baritono hungariar gaztea arituko da bakarlari gisa.

Egitarauak protagonista bakarra izango du: Sergei Rachmaninov. Bera izan zen errusiar musikaren tradizio erromantikoko azken musikagilea. Errusiar Iraultzaren ondoren, 1917an Errusia utzi baino lehen osatu zituen lan gehienak. Musikagile horren ‘Spring' kantatarekin emango diote hasiera kontzertuari. Musikagileak 1902an idatzi zuen lan hori. Mugimendu bakarreko lana da, korua, orkestra eta baritonorako idatzia. Károly Szmerédy baritonoa izango da Andra Mari Abesbatzarekin batera jardungo duen bakarlaria. Lana Nikolay Nekrasov idazlearen poema batean oinarritua da. Rachmaninoven ‘2. sinfonia' lanarekin iritsiko da kontzertua une gorenera. Musikagile askok orkestrarako lan onentzat dute obra hori.

71. Donostiako Musika Hamabostaldia
2010eko irailak 2: Kursaal Auditorioa, Donostia-San Sebastián. 20.00etan.

Egitaraua
S. Rachmaninov
Cantata Spring*
2. Sinfonia mi minorrean, opus 27

Ari Rasilainen, zuzendaria
Karoly Szmerédy, baritonoa
Coral Andra Mari Abesbatza (zuz. José Manuel Tife)

Bihar larunbata, hilak 28, ETB1-en 22.00etan Orkestrak otsailaren 26an, Euskadiko Kutxaren 50. urteurrena dela-eta, Donostiako Kursaal Auditorioan eskainitako kontzertua ikusteko aukera izango da. Iker Sánchezen zuzendaritzapean, Orkestrarekin batera Kepa Junkera eta bere taldea arituko dira: José Luis Canal pianojotzailea, Argibel Euba (kaxa flamenkoa eta txalaparta) eta Iñigo Olaizola (kaxa flamenkoa, txalaparta eta alboka), lau ahots: Ginesa Ortega, Eliseo Parra, Lidia Pujol eta Xabier Díaz. Kepa Junkera eta Euskadiko Orkestra estreinako aldiz airtu ziren lankidetzan.

Kontzertuaren lehenbiziko zatian, Junkerak aurten idatzitako hainbat kanta izango dira entzungai, esaterako "Bihar arte", "Hiri" eta "Berhueta", Marc Goldfeder, Emmanuel Martín eta Frederick Manoukian armeniarraren moldaketekin. Ondoren, Etxea proiektua osatzen duten abestietako batzuk interpretatuko dituzte, hauen moldaketen egile den Emilio Aragónen zuzendaritzapean.

Michel Camilo, latindar jazzeko musikari entzutetsua izango da Euskadiko Orkestraren KlasikAT ziklo berria abian jarriko duena. KlasikAT ekimena Orkestrak denboraldi berrirako eginiko apostu handia da eta, izenburuak berak iradokitzen duen bezala, musika klasikoaz aratago doazen errepertorioak lantzea du helburu, horretarako Orkestrak artista ezagunak bidelagun izango dituelarik.

Orkestrarekin batera, Michel Camilok lau kontzertu eskainiko ditu: irailaren 7an Bilbon, Arteria Campos Elíseos Antzokian; 8an Iruñean, Baluarte Auditorioan; 9an Donostian, Kursaal Auditorioan; eta 10ean Gasteizen, Principal Antzokian.

Rubén Gimeno maisuak zuzenduko ditu kontzertu hauek eta sarrerak salgai daude jada ohiko salmenta bideetan eta auditorioetako leihatiletan, prezio bakarrarekin: 15€.

Michel Camilo, pianoa

Santo Domingon (Dominikar Errepublika) jaioa den Michel Camilo-ren teknika liluragarria da eta bere melodiak afrokaribetar erritmoz eta jazz-harmoniaz jazten ditu bere melodiak. Bere musikak jazz-korronte tradizionalekin bat egiten du nagusiki eta latindar ñabardura kutsakor batek eta bere izaera alai eta bizitasunez betea islatzen duen swing-aren zentzu garaikideak bultzatzen dute.

Estatu Batuetan, Europan, Japonian, Asian, Ekialde Ertainean, Hego Amerikan eta Karibean sarritan aritzen da jaialdia ezberdinetan. Orain arte kaleratutako hemezortzi grabaketek nazioarte mailan sari ugari merezi izan dituzte: Grammy bat, bi Latindar Grammy, Grammy sarietarako bi proposamen, Dominikar Errepublikan hainbat Casandra sari eta Soberano sari bat eta Espainian bi Musikaren Sari. Bakarlari gisa, duoa, hirukotea zein seikotea osatuz, Big Band batekin edo orkestrekin grabatu izan du eta baita filmetarako soinu-bandak grabatu ere. Michel Camilo eroso mugitzen da jazzean, latindar musikan eta musika klasikoan murgildurik.

Merezi izandako sarien artean, bereziki aipagarria da 2000 urtean Tomatito gitarra-jotzaile flamenkoarekin grabatutako "Spain" diskak "Latindar Jazzeko Diska Onenari" irabazitako Grammy saria. 2009an, Caribe - Michel Camilo Big Band izenburudun bere CD-DVDa Espainian argitaratu zuten Calle 54 Records eta Sony Music/BMG disko etxeek. Honetan agerturiko zuzeneko kontzertua Altos de Chavón Anfiteatroan grabatu zen, Dominikar Errepublikan, eta filmazioa Fernando Trueba espainiar zuzendari sarituak zuzendu zuen.

Orkestra sinfoniko ospetsuekin eskaini ditu kontzertuak. Horien artean Detroit eta Cleveland-ekoak, Los Angeles-eko Orkestra Filarmonikoa, Atlanta, Gulbenkian, BBC, Espainiako Nazionala, RTVE, Bartzelona, Nafarroa, Cadaqués, Sevilla, Bilbao eta Tenerifeko orkestrak, New Japan Copenhague-ko Orkestra Filarmonikoa, besteak beste.

Gainera, Michel Camilok filme garrantzitsuen soinu bandak konposatu ditu, esaterako Emilio Martínez-Lázaroren Amo tu cama rica eta Los peores años de nuestra vida eta Fernando Truebaren Two Much filmeena.

Kontzertuak
Irailak 7: Arteria Campos Elíseos Antzokia. Bilbo. 20:00 h.
Irailak 8: Baluarte Auditorioa. Iruñea. 20:00 h.
Irailak 9: Kursaal Auditorioa. Donostia-San Sebastián. 20:00 h.
Irailak 10: Principal Antzokia. Vitoria - Gasteiz. 20:00 h.

Egitaraua
Arturo Márquez (1950): Danzón nº 2* [10']
Michel Camilo (1954): Piano, hari eta harparako suitea* [25'] (Joseph Gianono-ren orkestrazioa)
Michel Camilo: (1954): Piano eta orkestrarako 1. kontzertua* [32']

*Lehenbiziko aldiz interpretaturiko obra

Michel Camilo, pianoa
Rubén Gimeno, zuzendaria

Euskadiko Orkestrak kontzertu bana eskainiko du gaur eta bihar Deba eta Zarautzen, Orkestra eskuarki musika sinfonikoaren eremuetatik kanpo geratzen diren euskal herrietara eramanez ahalik eta gizarteratze zabalago bat lortzeko abian jarritako "Orkestra Herrietan" jardueraren baitan. Bi kontzertu hauek Gipuzkoako Foru Aldundiarekin eta bi herrietako udalekin lankidetzan burutuko dira jada hogei urtetik gora dituzten Udako Musikaldien programazioaren barnean. Aurtengoan, Orkestraren kontzertuaz gain, besteak beste, Jordi Savall eta Ana Mª Sánchez arituko dira ziklo hauetan.

Kontzertuak Euskadiko Orkestraren kontzertino gonbidatu eta Municheko Orkestra Filarmonikoaren kontzertino den Lorenz Nasturica Herschcowici biolinjoleak zuzenduko ditu eta hauetan Grieg, Haydn eta Mozarten partituren aukeraketa bat izango da entzungai.

Deba eta Zarautzen kontzertuak eskaintzeaz gain, abuztaren 25ean Orkestra Saran arituko da estreinako aldiz. Emanaldi hau ere Lorenz Nasturica Herschcowikik zuzenduko du.

Orkestra Herrietan
Abuztuak 19: Andre Maria Eliza, Deba. 20:30etan.
Abuztuak 20: Andre Maria Eliza, Zarautz. 22:00etan.
Abuztuak 25: San Martingo Eliza, Sara. 20:00etan.

Egitaraua
E. Grieg: Aus holbergs Zeit, opus 40
W.A. Mozart: 29. Sinfonia la maiorrean, KV 201
J. Haydn: 49. Sinfonia fa minorrean, Hob I:49, "Pasioa"

Lorenz Nasturica Herschcowici, kontzertinoa/zuzendaria

Sofia Gubaidulina konpositoreak Euskadiko Orkestra bere obrak bilduz egunotan Miramonen burutzen ari den monografikoaren grabaketan esku hartu du gaur goizean. Diska hau Asier Polo biolontxelo-jotzailea eta Iñaki Alberdi akordeoilariak Orkestrarekin batera interpretatuko duten Sieben Worte eta Polok eta Alberdik interpretatuko duten In croce musikalanek osatzen dute, guztia José Ramón Encinar-en zuzendaritzapean. 

Grabaketa hau, gainera, musika garaikidearen edizioan izen handikoak diren Morese eta Botterrek sortu berri duten MorBo disko etxeak kaleratuko duen lehenbizikoa izango da. Nazioarte mailako musikagile gailenetariko bati eskainitako diska honek Euskadiko Orkestraren diskografiaren baitan sortutako "Gaurko Musika" atala osotzen du.

1931.ean Chistopol-en jaioa (Tatarstan, Errusiar Federazioko Errepublika), Sofia Gubaidulina musika garaikidearen konpositore ospetsuenetakoa dugu. Bere jatorriagatik eta bere formakuntza Kazan (Tatarstan) eta Moskun osatu izanagatik, errusiar eragina argi islatzen dute bere musikalanek. Konposatzerakoan duen maisutasunak europar zein amerikar abangoardia oinarri izanik bilakatutako teknika garaikideak erabiltzeko aukera eman dio. Bere musikaren zenbait arlotan, halaber, Ekialdeko filosofiaren kutsua antzeman daiteke.

Ehun obratik gora sortu ditu eta mundu osoan zehar sari ugari merezi izan ditu.

Grabaketa
2010eko abuztuaren 18tik 21era, Euskadiko Orkestraren Miramongo egoitzako auditorioan.

Egitaraua
Sofia Gubaidulina (1931)
Sieben Worte, biolontxelo, akordeoi eta harietarako
In croce, akordeoi eta biolontxelorako

Euskadiko Orkestra Sinfonikoa
Asier Polo, biolontxeloa
Iñaki Alberdi, akordeoia
José Ramón Encinar, zuzendaria
Disko etxea: MorBo