Iker Sánchez zuzendaria estreinako aldiz arituko da Abonu-Denboraldian
Asteazken honetan Euskadiko Orkestraren 4. Abonu-programari dagokion kontzertua izango da Iruñeako Baluarte Auditorioan. Iker Sánchez-en zuzendaritzapean, Orkestrak Pascual Aldave lesakar konpositorearen Nerabe sorta lanarekin hasiko den egitaraua interpretatuko du. Entzungai izango dira, halaber, Darius Milhaud-en Le boeuf sur le toit, opus 58a eta Felix Mandelssohn-en 1. Sinfonia, orkestrak lehenbiziko aldiz interpretatuko duena.
Euskadiko Orkestrak, Pascual Aldaveren Akelarre lana estreinatu zuenak, honen Nerabe sorta lana berreskuratzen du orain, berau Orkestra Herrietan zikloan interpretatu ondoren. Orkestraren errepertorioan badira Aldaveren beste hainbat musikalan, Cristo ibérico eta Seaska Abesti, esaterako. Pascual Aldaveren (Lesaka, 1924) ibilbidea ertsiki lotua dago Iruñeari, 1973 eta 1983 urte bitartean nafar hiriburuko Pablo Sarasate Kontserbatorioko zuzendaria izan baitzen. Urte haietan Kontserbatorioko ganbera-orkestra eta abesbatza sortu zituen Aldavek. 2009an Nafarroako Goi Mailako Musika Kontserbatorioko Urrezko Domina jaso zuen lehendabiziko pertsona izan zen, musikagile zein irakasle bezala egindako ekarpen aberatsagatik. 1990an konposatutako Nerabe sorta haur-suitea Lesakako amek beren seme-alabei abesten zizkieten doinu herrikoietan oinarritzen da funtsean.
Iker Sánchez zuzendaria (Irun, 1976) estreinako aldiz arituko da Euskadiko Orkestraren Abonu-Denboraldian zuzendari gonbidatu gisa. Baina ez da Orkestra zuzentzen duen lehenbiziko aldia izango, izan ere Orkestra Herrietan zikloko hainbat kontzertutan, Argia aldizkariaren 90. urteurrenean, Euskadiko Kutxaren 50. urteurrenean eta, Musika Familian zikloaren baitan, Txirulajotzaile miresgarria eta Astindu gorputza Euskadiko Orkestrarekin kontzertuetan zuzendu izan baitu. Zuzendari gisa, Iker Sánchezek 2004an ekin zion bere ibilbideari eta ordutik Vassily Petrenko, Raymond Leppard edo Juanjo Menaren lankide izan da. 07/08 eta 08/09 denboraldietan BOS-eko zuzendari laguntzailea izan zen. Denboraldi honetan L'Orchestre de Bayonne Côte Basque, Orquesta Joven de Valencia (Venezuela) edo Tenerifeko Orkestra Sinfonikoa zuzenduko ditu. Gainera, hainbat talderen sortzaile eta zuzendari ere bada, horien artean T.I. 04, Musikeneko instrumentu-taldea, KABOS Ensemble, CRE-ART PROYECT (Londres), musika zuzendari duen KRATER Ensemble. 08/09 Denboralditik Euskadiko Kontserbatorioetako ikasleek osaturiko Euskalherriko Ikasleen Orkestraren musika zuzendaria da.
Kontzertua
Azaroaren 10a: Baluarte Auditorioa, Iruñea. 20:00etan.
Egitaraua
P. Aldave: Nerabe sorta, opus 33 [26']
D. Milhaud: Le boeuf sur le toit, opus 58a [19']
F. Mendelssohn: 1. Sinfonia do minorrean, opus 11* [37']
Iker Sánchez, zuzendaria
Informazio gehiago
Esku-egitarauaEugene Ugorski arituko da Daniel Hope-n ordez Orkestrak aste honetan eskainiko dituen kontzertuetan
Osasun-arazoak direla eta, Daniel Hope biolinjotzailea ezin izango da Orkestrarekin aritu Abonu-Denboraldiko hirugarren programaren baitan azaroaren 3, 4 eta 5ean Gasteiz, Iruñea eta Bilbon izango diren kontzertuetan. Bere ordez, Eugene Ugorski biolinjotzaile errusiarra izango da kontzertu hauetan Orkestrarekin arituko dena. Egitarauan ez da aldaketarik izango, Andrey Boreykoren zuzendaritzapean, Ugorski gazteak aurrez iragarritako Shotakovitchen Biolinerako 1. kontzertua interpretatuko baitu, Julian Rachlin-ek joan zen astean Donostian egin bezala, orduan ere orain gainerako hiriburuetan jarraipena izango duen 3. Abonu-programaren baitan. Jada bigarren zatian Orkestrak lehenbiziko aldiz interpretatzen duen Vassily Kalinnikov-en 1. Sinfonia izango da entzungai.
Eugene Ugorski, Euskadiko Orkestrarekin debuta egingo duen talentu gaztea. 1989an San Petersburgon jaioa, Eugene Ugorski egungo biolinjotzaile gazte miresgarrienetako bat dugu. Zortzi urte besterik ez zituela San Diegoko Orkestra Sinfonikoarekin debuta egin zuenetik, Errusia zein beste europar herrialdetako orkestra ezberdinekin eta baita Kanada, Estatu Batuak, Hegoamerika eta Ekialde Urruneko hainbat orkestrakin aritu izan da, Valery Gergiev, Eri Klas, Vasily Petrenko, Tugan Sokhiev, Keith Lockhart, Roberto Minezuk eta Andrey Boreykoren beraren zuzendaritzapean. Ugorski Gergiev-ek 2005 urtean Moskuko Pazko Jaialdian aritzeko gonbitea luzatu ostean heldu zen nazioarte mailan ezaguna izatera. Ugorskik Rotterdam eta Dortmund-eko Orkestra Filermonikoekin eta Bournemouth-eko Orkestra Sinfonikoarekin eskainitako azken emanaldiek "interpretazio bikaina", "kontrol eta doitasun izugarriak", "oreka egokia" edo "maisutasun liluragarria" bezalako hitzak merezi izan dituzte. Eugene Ugorskik Euskadiko Orkestrarekin debuta egitean interpretatuko duen Shotakovitchen 1. Biolinerako kontzertua "batzuetan inprobisazio rapsodiko baten itxura hartzen duen partitura labirintikoa" da, egitarauari oharren egile den Juan Manuel Vianaren hitzetan. Shostakovitchek biolinerako konposatutako bi kontzertuetan lehenak arrakasta itzela izan zen musikagilearentzat.
Kontzertu hauek zuzenduko dituen Andrey Boreyko maisua, halaber, Belgikako Orkestra Nazionaleko zuzendari titular izendatu berri dute, kargu hau 2012ko irailetik aurrera beteko duelarik. Azkenaldian izandako konpromezuen artean, alemaniar telebistako bigarren katea den ZDF telebistaren Echo der Stars 2010 Kontzertuan aritu zen, Essen Philharmonic Orchestra delakoa zuzenduz.
Kontzertuak
Azaroaren 3a: Principal Antzokia, Gasteiz. 20:00etan.
Azaroaren 4a: Baluarte Auditorioa, Iruñea. 20:00etan.
Azaroaren 5a: Euskalduna Jauregia, Bilbo. 20:00etan.
Egitaraua
D. Shostakovitch: Biolin eta orkestrarako 1. kontzertua la minorrean, opus 77 [39']
V. Kalinnikov: 1. Sinfonia sol minorrean [35']
Andrey Boreyko, zuzendaria
Eugene Ugorski, biolina (Daniel Hope-n ordez)
Orkestraren webgunea Diariovasco.com Sarietan finalista
Orkestraren webgunea Diariovasco.com V. Sarietarako finalista da, erakunde baten webgune onenaren atalean. Epaimahaiaren erabakia azaroaren 10eran emango da ezagutzera. Sari hauetarako proposatuak izateak Orkestrak sarean bere presentzia indartzeko ahalegina bultzatzera dator. Ahalegin hori 1998an sortua, estatu mailan orkestra sinfoniko batek plazaratutako estreinako webgunea bilakatu zen honetan islatzeaz gain, Orkestrak sare sozialetan duen presentzian eta sortu berri den EUSKOR digitalean gauzatzen da. Duela urte bete, webgunea berdiseinatua izan zen bizi dugun garai berrira egokitu eta tresna erabilgarri zein dinamikoagoa bilakatzeko, Euskadiko Orkestraren jarduera publikoari helarazteko asmoz.
Epaimahaiak emandako sariaz gain, Publikoaren Sari Berezia banatuko da, Diariovasco.com webgunearen erabiltzaileek emango dutena. Hemendik, merezi dugula uste baduzu, gure webgunearen alde bozkatzera animatzen zaitugu eta, bide batez, baita berau hobetzen laguntzera ere, zure iradokizunak webgunearen beraren edo sare sozialen bidez helaraziz.
Webgunean dago jada "Musika Familian zikloaren programazio berria
Bere Hezkuntza Departamentuaren bidez, Euskadiko Orkestrak bere egitekoaren ardatz nagusienetakoa den hezkuntza-jarduera sakontzen darrai. 2010/2011 denboraldirako Musika Gelaren programazioak, besteak beste, bost muntaia ezberdinen estreinaldia biltzen du, Musika Familian eta Eskola-haurrentzako Kontzertuak zikloen baitan, eta baita jarduera berrien abiaraztea ere. Estreinako aldiz, bederatzi hilabetetatik beherako haurrentzat eta haurdun dauden emakumeentzat kontzertu bat izango da.
Aurtengoan ere Kontzertu bakoitzaren aurretik ondorengo emanaldiaren hitzaurre bilakatuko den Sentsibilizazio-Tailer bana izango da.
JULIAN RACHLIN ETA DANIEL HOPE BIOLINJOTZAILEAK ARITUKO DIRA HIRUGARREN ABONU-DENBORALDIAN
Urriaren 28tik aurrera, Euskadiko Orkestrak bere Abonu-Denboraldiko hirugarren programari egingo dio aurre ohiko lau hiriburuetan. Bere zuzendari printzipal gonbidatu Andrey Boreykoren gidaritzapean, Orkestrak bakarlari gailenekin ekingo die kontzertu hauei: Jualian Rachlin, Donostian izango diren kontzertuetan arituko dena, eta Daniel Hope, Gasteiz, Iruñea eta Bilbon arituko dena. Biek Shostakovitch-en Biolin eta orkestrarako 1. kontzertua interpretatuko dute dagozkien kontzertuetan eta egitaraua Vassily Kalinnikov-en 1. Sinfoniak osotuko du. Orkestrak obra hau interpretatzen duen lehenbiziko aldia izango da.
Julian Rachlin, urriaren 28 eta 29an Kursaal Auditorioan izango diren kontzertuetan bakarlari gonbidatu gisa arituko dena, estreinako aldiz arituko da Euskadiko Orkestrarekin. Orkestra gorenekin kontzertuak eskaini dituen biolinjotzaile honen proiektuen artean honakoak daude: Philharmonia Orkestrarekin emanaldiak, NHK Orkestrarekin eta Chung maisuarekin, Gewandhaus Leipzig eta Marriner, Budapesteko Jaialdiko Orkestra eta Sokhiev, Bavierako Irratiko Orkestra Sinfonikoa eta Jansons eta Scala-ko Orkestra Filarmonikoa eta Hardingekin bira. Europar jaialdi ugaritan aritzen da, horien artean Salzburg, Verbier, Schleswig Holstein, BBC Proms eta Lucernakoa. Azken bederatzi urteetan, Rachlin-ek berak ganbera-musikako jaialdi bat antolatzen du Dubrovniken eta honen "lagunen" artean Leif Ove Andsnes, Janine Jansen, Maxim Vengerov, Mischa Maisky, Martin Fröst, Martin Grubinger, Sir Roger Moore, John Malkovich, Krysztof Penderecki, Daniele Gatti, Academy of Saint Martin in the Fields eta Royal Philarmonic Orchestra daude.
Daniel Hope, bestalde, aritua da lehen ere Orkestraren Abonu-Denboraldian eta oraingoan Gasteizko Principal Antzokian (azaroak 3), Iruñeako Baluarte Auditorioan (azaroak 4) eta Bilboko Euskalduna Jauregian (azaroak 5) arituko da. Hope-ek bira luze bat egin berri du Anne Sofie von Otter eta Bengt Forsberg-ekin, Deutsche Grammophon diskoetxearentzat grabaketa bat eginez abiatutako lankidetzaren baitan eta udazken honetan bira berri bat burutuko dute Europan barrena. Aurreko denboraldian Lucernan Beaux Arts Trio-rekin azken kontzertua eskaini ostean, Hope-ek Deutsche Grammophon-ekin eginiko azken lana kaleratu du, Vivaldiren kontzertuak biltzen dituena, Europako Ganbera Orkestrarekin. Bere ibilbidean aipagarriak dira halaber Kristallnacht delakoaren 70.urteurrena zela eta Berlingo Tempelhof aireportuan Daniel Hopek berak antolatu zuen kontzertua, Stravinskyren Soldadu baten istorioa New Yorken Klaus Maria Brandauer aktorearekin, Sting-ekin lankidetza eta baita Belgikako Queen Elisabeth lehiaketan epaimahikide izana ere.
Kontzertu hauek zuzenduko dituen Andrey Boreyko maisua Belgikako Orkestra Nazionaleko zuzendari titular izendatu berri dute, kargu hau 2012ko irailetik aurrera beteko duelarik. Azkenaldian izandako konpromezuen artean, alemaniar telebistako bigarren katea den ZDF telebistaren Echo der Stars 2010 Kontzertuan aritu zen, Essen Philharmonic Orchestra delakoa zuzenduz.
Abonu-Denboraldiko 3. programa
Urriaren 28 eta 29a: Kursaal Auditorioa, Donostia. 20:00etan.
Azaroaren 3a: Principal Antzokia, Gasteiz. 20:00etan.
Azaroaren 4a: Baluarte Auditorioa, Iruñea. 20:00etan.
Azaroaren 5a: Euskalduna Jauregia, Bilbo. 20:00etan.
Egitaraua
D. Shostakovitch: Biolin eta orkestrarako 1. kontzertua la minorrean, opus 77 [39']
V. Kalinnikov: 1. Sinfonia sol minorrean [35']
Andrey Boreyko, zuzendaria
Julian Rachlin, biolina (Donostian)
Daniel Hope, biolina (Gasteiz, Iruñea eta Bilbon)
Miramongo Matinéeak zikloak Chopin-en jaiotzaren bigarren mendeurrena ospatuko du
Urriaren 23 larunbatean Miramongo Matinéeak zikloaren baitan aurten betetzen den Frédéric Chopin konpositore eta pianojotzailearen jaiotzaren bigarren mendeurrena ospatuko da. Daniel del Pino pianojotzaileak eta musikari gazteek osatutako hari laukote batek Chopinek 1830.ean konposatutako Piano eta orkestrarako 1 . eta 2. kontzertuen ganbera musikarako moldaketak interpretatuko dituzte. Jatorriz piano eta orkestra handirako konposatutako obren murrizketak interpretatzea ohizkoa zen XIX. mendean, garaiko aristokrazia zein burgesiaren bileretan. Chopin bera sarritan aritu zen tankera honetako kontzertuetan, hauetan bere interpretatzeko teknikarekin bat zetorren kontzertuen ikuspegi gertuagoko eta goxoago bat ahalbidetzen baitzuten.
Daniel del Pino (Beirut, Libano, 1972) bost kontinenteetan barrena aritu da kontzertuak eskaintzen. Honela Europako areto ugaritan izan da, besteak beste Pariseko Salle Gaveau, Sofiako Bulgaria Hall, Bucaresteko G. Enescu Ateneoa, Sevillako Maestranza Antzokia, Madrilgo Auditorio Nazionala, Bartzelonako L'Auditori, Valentziako Palau de la Música, Granadako Manuel de Falla Auditorioa, Terniko Verdi Antzokia; eta Maroko, Jordania, Siria, Libano, Gabon, Israel, Palestina, Brasil, Mexiko, Taiwan, Japonia, Australia eta Estatu Batuetan (New Yorkeko Carnegie Hall) ere eskaini ditu kontzertuak. Lankide gisa RTVE, Sevilla, Galizia, Gaztela eta León, Valentzi, Malaga, Bucaresteko G. Enescu, Brasov eta Trnsilvaniako (Errumania) orkestra sinfonikoekin aritu da eta baita Sofia Erregina Ganbera Orkestrarekin, Solisti di Praga eta Orchestra d'Camara d'Umbria-rekin ere, Max Bragado, Jesús Amigo, Alejandro Posada, Enrique García-Asensio, Juan Luis Pérez, Bernard le Monnier, Robert Carter Austin, Marco Gatti, Rubén Gimeno eta Alfonso Saura-ren zuzendaritzapean. José Zárate, Francisco Lara, Elena Kats-Chernin, Nicolai Kapustin eta Antón García Abril-en lanak estreinatu ditu.
Matinée honetan Del Pino-k lagun izango duen hari-kuartetoa Espainiako eta Euskal Herriko Gazte Orkestretako kide den David Otto eta Gustav Mahler Orchestrako kide den Andrés Ortiz biolin-jotzaileek, Mª Angeles Herrero biola jotzaileak, hau ere Gustav Mahler Orchestrako kide, eta Alvaro Llorente biolontxelojotzaileak osatzen dute. Azken hau Donostiako Musika Hamabostaldian, Bilboko Elkarte Filarmonikoan eta Gironako Auditorioan aritu da, besteak beste, Miramar Laukotearen kide gisa.
Frédéric Chopin 1810-2010. Pianorako kontzertuak
2010eko Urriaren 23an, Euskadiko Orkestraren Egoitza, Miramon. 11.00etan
Egitaraua
Frédéric Chopin (1810-2010)
Piano eta orkestrarako 2. kontzertua fa minorrean, opus 21, ganbera-bertsioa
Piano eta orkestrarako 1. kontzertua mi minorrean, opus 11, ganbera-bertsioa
Daniel del Pino, pianoa; Hari kuartetoa: David Otto eta Andrés Ortiz, biolina; Mª Ángeles Herrero, biola; Álvaro Llorente, biolontxeloa
Euskadiko Orkestraren zuzendari titularrak, Andrés Orozco-Estradak, arrakasta handiz zuzendu zuen Vienako Orkestra Filarmonikoa
Euskadiko Orkestra Sinfonikoaren zuzendari titular Andrés Orozco-Estradak arrakasta handiz munduko orkestra nagusienen artean kokatzen den Vienako Orkestra Filarmonikoa zuzendu zuen pasa den asteburuan, orkestra horren Abonu-Denboraldiaren irekieran, austriar hiriburuko Musikverein aretoan. Andrés Orozco-Estrada maisua Esa-Pekka Salonen zuzendari eta konpositore finlandiar gailenaren ordez aritu zen. Musika-zuzendaritzan nazioarte mailako erreferente den Salonen maisua musikagile gisa ere da ezaguna halaber.
Joan zen apirilean Andrés Orozco-Estrada maisuak mundu mailan garrantzizkoenetakoa den beste orkestra bat zuzendu zuen, Municheko Orkestra Filarmonikoa, Christoph Eschenbach maisuaren ordez.
Orozco-Estrada 2009/2010 denboralditik da Euskadiko Orkestra Sinfonikoaren zuzendari titularra. Berak zuzendu du Orkestra ireki berri den 2010/2011 Abonu-Denboraldian. Denboraldi honetan, gainera, L.V. Beethovenen 9. Sinfoniaren eta G. Mahlerren 4. Sinfoniaren interpretazioan zuzenduko du Orkestra eta baita Alemanian barrena burutuko duen bira garrantzitsuan eta Extremadurara eramango duen biran ere.
Andrés Orozco-Estrada estreinakoz Vienako Orkestra Filarmonikoaren zuzendari gisa
Urriaren 16 eta 17an Vienako Musikverein aretoan
Egitaraua
F. Mendelssohn: Meeresstille und glückliche Fahrt
R. Wagner: Tristan und Isolde, Vorspiel und Liebestod
A. Dvorak: 7. Sinfonia
Vienako Orkestra Filarmonikoa
Andrés Orozco-Estrada, zuzendaria
Opus 64 taldeak Don Juan, Figaroren ezteiak eta Txirula miragarria interpretatuko ditu
Urriaren 2 larunbatean Miramongo Matinéeak zikloaren denboraldiko emanaldi berri bat izango da. Oraingo honetan, Euskadiko Orkestra Sinfonikoko haize-taldeko hainbat musikarik osatutako Opus 64 taldeak Wolfgang Amadeus Mozart-en hiru opera ezagunen haize oktetorako moldaketak interpretatuko ditu, Don Juan, Figaoren ezteiak eta Txirula miragarriarenak, hain zuen ere.
Eszenatoki honetan bertan Miramongo Matinéeak zikloaren aurreko denboraldietan XIX. eta XX. mendeetako musikari so egin ostean, kontzertu honetan Opus 64 taldeak XVIII. mendearen azken urteetan jarriko du arreta. Garai hartan Jose II.ak, Austriako Enperadoreak, haize-oktetoa bultzatu zuen oturuntzak eta orduko aristokraziaren bilera orotan izaten ziren kontzertuetan. Instrumentu talde horretarako idatzitako moldaketen artean, Opus 64 oktetoak testuinguru horretan Mozarten beraren garaikideak ziren musikari zein konpositoreek moldatutako operak aukeratu ditu: Johann Nepomuk Went bohemiar oboe-jotzaileak moldatu zuen Figaroren ezteiak, beste berrogei bat obren artean, Salzburgeko jenioaren beste lau opera barne; Josef Triebensee oboe-jotzaile eta konpositoreak Don Juan moldatu zuen eta Txirula miragarria operaren moldaketa, berriz, Josef Heindenreich-ek egina da. Larunbateko hau berealdiko aukera izango da operaren gailurra izateagatik ongi ezagunak diren musikalan hauen ezohiko bertsio bat zuzenean entzuteko.
Opus 64 haize-oktetoko kide dira Pascal Laffont eta Francisco Javier Lecumberri oboe-jotzaileak, Stephan Langlois eta Juan Navarro klarinete jotzaileak, Tomás Ruti eta François Proud fagot-jotzaileak eta Jean-Luc Casteret eta Peter Gryp tronpa-jotzaileak.
Kontzertu honetarako sarrerak Servikutxa, Telekutxa (943 00 12 00), www.kutxa.net eta www.euskadikoorkestra.es helbideetan eskura daitezke, eta baita Egoitzaren leihatilan, kontzertu egunean 10:30etatik aurrera. Halaber, doako autobus zerbitzua dago Miramongo Egoitzera etortzeko, 10:25etan Gipuzkoako Plazako 4.zenbakitik atera eta Antso Jakituna Hiribideko 18. zkian eta Madrilgo Hiribideko 34.ean geldialdiak egiten dituelarik.
Opus 64
Wolfgang Amadeus Mozarten operen moldaketak haize oktetorako
2010eko Urriaren 2an, Euskadiko Orkestraren Egoitza, Miramon. 11.00etan
Egitaraua
Wolfgang Amadeus Mozart (1756-1791)
Don Juan, K 527. Josef Triebensee-ren transkripzioa (1772-1846)
Figaroren ezteiak, K 492. Johann Nepomuk Went-en transkripzioa (1745-1801)
Txirula miragarria, K 620. Joseph Heidenreich-en transkripzioa (1753-1821)
Informazio gehiago
Esku-egitarauaJoana Carneiro zuzendariak eta Momo Kodama piano-jotzaileak irekiko dute Abonu-Denboraldia Iruñean eta Donostian
Joan zen astean Bilbon eta Gasteizen abiatu ostean, aste honetan hasiko da Euskadiko Orkestraren Abonu-Denboraldia Iruñea eta Donostian. Asteazkenean, hilak 29, Baluarten eta hilak 30 eta urriak 1ean Kursaalean, Berkeley-ko Orkestra Sinfonikoaren musika zuzendaria (Kent Nagano ordezkatuz) eta Lisboako Gulbenkian Orkestrako zuzendari gonbidatu ofiziala den Joana Carneiro portugaldarrak zuzenduko du Orkestra. Kontzertu hauek badute gainera erakargarri egiten dituen beste argudio bat: bakarlari gisa, Momo Kodama piano-jotzaileak Frédéric Chopin-en Piano eta orkestrarako 2. kontzertua interpretatuko duela, poloniar musikagilearen jaiotzaren bigarren urteurrena ospatzen den honetan. Egitaraua kontzertua irekiko duen Valentín de Zubiaurreren Ledia operaren Preludioak eta Bartók-en Orkestrarako kontzertuak osotuko dute.
Joana Carneiroren ibilbidean aipagarria da 2005 eta 2008 urte bitartean Los Angeles-eko Orkestra filarmonikoaren zuzendari izana, Salonen-ekin lankidetzan aritu zelarik. Opera-zuzendari gisa sarritan aritzen da eta 2011.ean Cincinnatin egingo du debuta jada Chicago eta Parisen zuzendu duen J. Adams-en A Flowering Tree zuzenduz. Stravinsky-ren Edipus Rex-en P. Sellars-en muntaia zuzendu zuen. Aurretik Salonen-en zuzendari-laguntzailea izan zen Parisen K. Saariaho-ren Adriana Mater operaren estreinaldian. Momo Kodama, berriz, 1991an Münich-eko Nazioarteko Piano Txapelketako irabazle gazteena bilakatu zen. Orkestra ugarirekin aritu da bakarlari gonbidatu gisa, horien artean Berlingo Filarmonikoa, Boston, Montreal eta Berlingo Irratiko orkestra sinfonikoak, Royal Liverpool Philharmonic, RAI-ko Orkestra eta abar, Ozawa, Barshai, Dutoit, Inbal, Gergiev, Nagano eta Norrington maisu ospetsuek zuzendu dutelarik.
Abonu-Denboraldiko 2. programa
Irailaren 29a: Baluarte Auditorioa, Iruñea. 20:00etan.
Irailaren 30a eta urriaren 1a: Kursaal Auditorioa, Donostia. 20:00etan.
Egitaraua
V. Zubiaurre: Ledia. Preludio [4']
F. Chopin: 2. Kontzertua piano eta orkestrarako fa minorrean, opus 21* [32']
B. Bartók: Orkestrarako kontzertua [37']
Joana Carneiro, zuzendaria
Momo Kodama, pianoa
Orkestraren Abonu-Denboraldia Iruñean aurkeztu da
Baluarte Auditorioan aurkeztu dira nafar hiriburuan Orkestraren 2010/2011 Abonu-Denboraldia osatuko duten kontzertuak, zuzendari nagusiak, Iñigo Alberdik eta zuzendari teknikoak, Joxe Inazio Usabiagak denboraldi berriaren xehetasunak ezagutzera eman dituzte. Irailaren 29an hasi eta 2011 urteko ekainaren 15a bitartean, guztira hamaika izango dira Orkestrak eskainiko dituen kontzertuak. Bere titular Andrés Orozco-Estradaren eta Andrey Boreyko, zuzendari printzipal gonbidatuaren zuzendaritzapean arituko da, baina baita zuzendari gonbidatu gailenek zuzendurik eta bakarlari ezagunak lagun dituela ere.
Denboraldi honetako estreinako kontzertua Iruñean datorren asteazkenean, hilak 29, izango da Baluarte Auditorioan. Honetan, Joana Carneiro portugaldar zuzendariak gidaturik, Momo Kodama piano-jotzailea arituko da bakarlari gonbidatu gisa.