EUSKAL KONPOSITOREEN BILDUMA: VALENTIN Mª DE ZUBIAURRE
Euskadiko Orkestrak erreferentzia berri bat du dagoeneko bere katalogo diskografikoan: euskal musikagileen bildumako hamahirugarren alea, oraingo honetan Valentín Mª de Zubiaurreri eskainitakoa. Konpositore bizkaitarra mailarik bikainenetan jardun zen bere garaiko musikan. Lan berri honetan Orkestrak lau obra aurkezten ditu Juan José Ocón maisuaren zuzendaritzapean. Obra hauetako batean, Roman Jablonski biolontxelo-jotzaileak ere parte-hartzen du Orkestrarekin batera.
Babesle MONDRAGON taldea duen ale berriaren aurkezpena urte-amaieran izango da, eta une horretan bertan egingo zaie bidalketa eskuratu nahi duten abonatuei.
Abonatu zaren aldetik Orkestrak aukera eskaintzen dizu abenduaren 15a baino lehen CDa erreserbatzeko, 12,00 €ko prezioan.
Valentín Mª de Zubiaurreren CDa eskatzeko, markatu hemen. Lotura honek kontaktu inprimakira bideratuko zaitu. Markatu "Abonuak eta sarrerak" eta ondoren zure eskaera egin "Iruzkina edo kontsulta" leihoan. Amaitzeko "Bidali" sakatu. Orkestrako Abonatu Sailak zure eskaera erregistratuko du. Eskerrak zerbitzu hau erabiltzeagatik.
Orkestrak Beethovenen 9. Sinfonia interpretatuko du bere Abonu-Denboraldiko hurrengo programan
Euskadiko Orkestra bere hurrengo Abonu-programa prestatzen ari da egunotan, Beethovenen 9. Sinfonia hizpide harturik. Bere zuzendari titular Andrés Orozco-Estrada maisuak zuzendurik, Orkestrak Ainhoa Germendia sopranoa, Itxaro Mentxaka mezzosopranoa, José Ferrero tenorea eta Attila Jun baxuak osatutako bakarlari taldea eta Bilboko Koral Elkartea izango ditu lagun kantatutako ataletan. Kontzertuak azaroaren 26 ostiralean Gasteizen, 29an Donostian, 30ean Iruñean, abenduaren 1ean Bilbon eta, amaitzeko, 3an berriz ere Donostian izango dira.
Ludwig Van Beethovenek Bederatzigarren Sinfonia ezagunarekin, Friedrich von Schiller alemaniarraren poema batean oinarrituriko "Pozari ereserkia" entzutetsuarekin amaitzen denarekin, forma klasikoen sintesi paregabea eratuz nolabaiteko errito profano bat, egitea lortu zuen: senidetasun unibertsalaren laudorio kartsua, [...] gatazka existentzialak gainditzea irudikatzen duena", Juan Manuel Vianak egitarauari oharretan islatzen duenaren arabera. Bonn-go maisuaren ekoizpeneko unerik gorenetako hainbat biltzen duen partitura honek arkitektura monumental bat du oinarri.
Andrés Orozco-Estrada maisua estreinako aldiz Vienako Filarmonikoa bertako Konzerthaus aretoan arrakasta handiz zuzendu eta Mahler Chamber Orchestra-rekin Hego Amerikan barrena bira bat burutu ostean dator Euskadira. Azaroaren 11 eta 18a bitartean, Colombian, Medellín eta Bogotán, eta Brasilen, Sao Paulo eta Vitória hirietan, eskani dituzte kontzertuak.
Bederatzigarrena Orkestrarekin batera interpretatuko duten abeslariei dagokionez, Ainhoa Germendia, Jesús López Cobos, Mauricio Benini, Christophe Rousset, Ottavio Dantone, Ros Marbá, Julia Jones, Herbert Blomstedt, Ivan Fischer, Pablo González, Miguel Ángel Gómez Martínez edo Víctor Pablo Pérezen zuzendaritzapean aritu dena, aritua da Orkestrarekin hainbat emanalditan, horien artean, Attila Jun hegokorear baxuarekin batera, 2005eko Donostiako Musika Hamabostaldian, hala ere Orkestraren denboraldian aritzen diren lehenbiziko aldia da bientzat. Itxaro Mentxaka, Madril, Sevilla, Bilbo edo Valentziako opera-denboraldietan, Peraladako Nazioarteko Jaialdian, Donostiako Musika Hamabostaldian, Toulouse, Trieste edo Parisen sarritan aritzen den mezzosopranoa, aldiz, aritu da Abonu-Denboraldian, Doron Salomonen zuzendaritzapean, hain zuzen ere. Duela gutxi Sevillako Maestranza Antzokian Rineko Urrea-ko Froh interpretatuz arrakasta izan duen José Ferrero tenorea lehenbiziko aldiz izango da Orkestrarekin batera. 1985an Bilboko Koral Elkartea Orkestrarekin batera lehenbiziko aldiz aritu zenetik, bi erakundeen arteko harreman estuak emaitza nabariak izan ditu, horien artean, Francisco Escuderoren Gernika operaren lehenbiziko grabaketa, Decca (Universal) diskoetxearentzat; Mike Oldfielden Music of the Spheres diskoaren mundu-mailako aurkezpena, Abonu-kontzertuak, Miramongo Matinéeak edo Orkestraren Euskal Konpositoreen Bildumak Sorozabali eskainitako diska.
Abonu-Denboraldiko 6. programa
Azaroaren 26a: Principal Antzokia, Gasteiz. 20:00etan.
Azaroaren 29a eta abenduaren 3a : Kursaal Auditorioa, Donostia. 20:00etan.
Azaroaren 30a: Baluarte Auditorioa, Iruñea. 20:00etan.
Abenduaren 1a: Euskalduna Jauregia, Bilbo. 20:00etan.
Egitaraua
L.V. Beethoven: 9. Sinfonia re minorrean, opus 125, "Korala" [65']
Andrés Orozco-Estrada, zuzendaria
Ainhoa Garmendia, sopranoa
Itxaro Mentxaka, mezzosopranoa
José Ferrero, tenorea
Attila Jun, baxua
Bilboko Koral Elkartea (zuz. Julio Gergely)
Euskadiko Orkestrako biola Taldea Miramongo Matinéeak zikloan arituko da larunbat honetan
Larunbat honetan, hilak 20, Miramongo Matinéeak zikloaren emanaldi berri bat izango da Euskadiko Orkestraren Egoitzan. Euskadiko Orkestrako Biola Taldea osatzen dutenentzat gozamena da musika egitea, sinfonikoa zein ganberakoa izan, eta gozamena da halaber, Miramongo Matinéeak zikloak eskaintzen dien aukeraz baliatuz, zenbaitetan publiko zabalarentzat oharkabean gertatzen diren dohainen jabe den instrumentu honen inguruan pedagogia egitea. Horregatik denboraldi honetan ere bueltan dira larunbatean Miramonera hurbiltzen den orori biolak eragiten dien grina kutsatzeko asmoarekin.
Instrumentu hau, biolinaren oso hurbileko senide, orkestra sinfonikoaren baitan altu eta baxuen artean giltzarri gisa aritzen da, ezinbesteko elementua da guztiak harmoniaz bat egin dezan. Honela, duen garrantzia duela ere sarri askotan ia ezezagun gertatzen den instrumentu honek bere tokia aldarrikatzen du eta gaurkoan protagonista eztabaidaezin bilakatzen da merezimendu osoz. Aurrera pauso bat eman eta Miramongo Matinéeak zikloaren entzulegoari askotariko lanen katalogoa eskaintzera dator, biolarako errepertorio original urria dela eta bilaketa-lan eskerga burutuz ondutako katalogoa. Batetik, obra klasikoak, Charpentier, Pachelbel, Stradella eta Telemann barrokoenak, Schumann erromantikoaren partitura bat edo XIX. mende amaierako Crisantemi puccinitarra. Baina biolaren sonoritatea, aldabera eta ñabarduratan aberatsa, haratago doa eta XX. mendeko hotsekin ere ausartzen da: XX. mendearen bigarren erdian tangoaren sortzaile gailena izan zen Astor Piazzollaren sortzelanak ere izango dira entzungai: Contrabajeando, Sens Unique edo La vi llegar, esaterako. Mende horretako amaiera alderakoak dira halaber egitaraua osotuko duten Ian Gammie-ren Bratschentanz eta Bruce Fraser-en Fun For Five.
Kontzertu honetarako sarrerak Servikutxa, Telekutxa (943 00 12 00), www.kutxa.net eta www.euskadikoorkestra.es helbideetan eskura daitezke, eta baita Egoitzaren leihatilan, kontzertu egunean 10:30etatik aurrera. Halaber, doako autobus zerbitzua dago Miramongo Egoitzera etortzeko, 10:25etan Gipuzkoako Plazako 4.zenbakitik atera eta Antso Jakituna Hiribideko 18. zkian eta Madrilgo Hiribideko 34.ean geldialdiak egiten dituelarik.
Egitaraua
M.A. Charpentier: Preludio
J. C. Pachelbel: Canon
G. P. Telemann: 1. Kontzertua
G. Puccini: Crisantemi
R. Schumann: Gaztarorako albuma, biolarako moldaketa
A. Stradella: Aria di chiesa
B. Fraser: Fun For Five
A. Piazzolla: Contrabajeando, Sens Unique, La vi llegar, Preparense, Cafetín de Buenos Aires
Ian Gammie: Bratschentanz
Euskadiko Orkestrako Biola Taldea
Pascal Arnaud, Delphine Dupuy, Stela bucataru, Natacha Dupuy-Scordamaglia, Justyna Maria Janiak, Grzegorz Kawka, Arkaitz Martínez, Elena Martínez de Murguía, Cástor Narvarte, Jean Michel Nougué, Yann Seyrac.
Informazio gehiago
Esku-egitarauaGilbert Varga eta Arcadi Volodos Orkestrako Denboraldian izango da berriz ere
Datorren astelehenetik aurrera, hilak 15, Euskadiko Orkestrak bere Abonu Denboraldiko 5. programari helduko dio. Berraurkitzerako programa izango da, hamar urtetan zehar, 1998 eta 2008 bitartean, Orkestraren musika zuzendari izandako Gilbert Varga orkestraren podiumera itzuliko baita, oraingoan zuzendari gonbidatu gisa. Bakarlari gonbidatua ere, Arcadi Volodos pianojotzailea, ezaguna da Orkestraren entzulegoarentzat, aurretik ere izana baita bere denboraldian, orduan ere Gilbert Vargaren zuzendaritzapean. Izan ere, Orkestrak eta Vargak zein Volodosek osatutako tandemak arrakasta nabarmena lortu zuten elkarrekin aritutako bi alditan, 2006ko Donostiako Musika Hamabostaldian eta 2007/2008 denboraldian. Kontzertuak azaroaren 15 eta 17an Donostiako Kursaal Auditorioan, 16an Gasteizko Principal Antzokian eta 18an Bilboko Euskalduna Jauregian izango dira.
Gilbert Vargak bete berri dituen edo epe laburrean beteko dituen konpromezuen artean aipatzekoak dira Berlingo Irratiko Orkestra Sinfonikoa, DSO Berlin, Berlin Konzerthaus Orchestra, Frankfurt Museumgesellschaft, MDR Leipzig, Gürzenich, Oslo Philharmonic, Hungarian National Philhamonic, Espainiako Orkestra Nazionala edo Belgikakoa. Erresuma Batuan, 2009/2010 denboraldian City of Birmingham Symphony Orchestra zuzendu zuen berriz ere eta 2010/2011 denboraldian bere debuta egingo du Royal Scottish National Orchestrarekin. Ipar Amerikan, sarritan aritzen da lankidetzan Minnesota, Filadelfia, Atlanta, St. Louis, Dallas, Milwakee edo Indianapoliseko orkestrekin; 2009/2010 denboraldian Seattle-eko Orkestra Sinfonikoarekin egin zuen debuta eta joan den urrian Baltimore-koarekin. Bestetik, duela gutxi Taipei-eko Orkestra Sinfonikoa, Malaisiako Orkestra Filarmonikoa eta Pekingo CNPA Orkestra zuzendu ditu estreinako aldiz. 2011. urtean Adelaidako Orkestra Sinfonikoa zuzenduko du (Australia).
1996an debuta egin zuenetik, Arcadi Volodos (San Petersburgo, 1972) orkestra gailenenekin eta zuzendari ezagunenekin aritu da mundu osoan zehar. Azkenaldiko bere ibilbideari dagokionez, 2009an Liszten errezital bat aurkeztu zuen Salzburgeko Jaialdian, ondoren Hego Amerikan barrena eginiko bira batean interpretatu zuelarik. 2010/2011 denboraldiko bere konpromezuen artean Korea, Londres, Zurich, Viena, Madrid, San Petersburgo, Amsterdam, Varsovia, Ruhr Klavierfestival, La Roque d'Antheron, Salzburgeko Jaialdia eta Leipzigeko Gewandhaus Orkestrarekin, Pariseko Orkestrarekin eta Berlingo Orkestra Sinfonikoarekin kontzertuak daude. Oraingo honetan, Volodosek pianoarako errepertorio erromantikoaren ezinbesteko obra den Piotr Ilich Tchaikovskyren Piano eta orkestrarako 1. kontzertua interpretatuko du Orkestrarekin batera.
Kontzertu hauetako egitaraua Kodályren Galántako Dantzak eta Straussen Don Juan obrek osotzen dute. Egitarauari Oharren egile den Juan Manuel Vianaren hitzetan, Dantzak Zoltan Kodályk "bere ibilbide sortzaile luzeko helduaroan ondutako orkestra-lan gogokoenen (eta, ondo merezita, ospetsuenen) artean daude". Don Juan-ek bultzada erabakigarria eman zion benetan joria izandako hamarkada batean (1889-1899) mamitutako poema sinfonikoaren arloko bere lorpen handienetarantz: Heriotza eta itxuraldaketa, Hartara hitz egin zuen Zaratustrak, edo Heroi-bizitza bat, esaterako.
Abonu-Denboraldiko 5. programa
Azaroaren 15a eta 17a : Kursaal Auditorioa, Donostia. 20:00etan.
Azaroaren 16a: Principal Antzokia, Gasteiz. 20:00etan.
Azaroaren 18a: Euskalduna Jauregia, Bilbo. 20:00etan.
Egitaraua
P.I. Tchaikovsky: Piano eta orkestrarako 1. kontzertua si bemol minorrean, opus 23 [32']
Z. Kodaly: Galántako Dantzak [16']
R. Strauss: Don Juan, opus 20 [17']
Gilbert Varga, zuzendaria
Arcadi Volodos, pianoa
Gure webguneak Erakunde baten Webgune Onenari Diariovasco.con Saria eskuratu du
Orkestrak Erakunde baten Webgune Onenari Diariovasco.com Saria jaso zuen Donostiako Miramon Parke Teknologikoan izandako festan. El Diario Vasco egunkariaren webguneak antolatutako sarien bosgarren edizioaren baitan emandako sari honek berrikuntza, diseinua, erabilgarritasuna, tresna sozialen erabilpena eta erabilerraztasuna ditu oinarri.
Sari hau Orkestrak sarean bere presentzia indartzeko egiten duen etengabeko ahalegina bultzatzera dator. Ahalegin hori 1998an sortua, estatu mailan orkestra sinfoniko batek plazaratutako estreinako webgunea bilakatu zen honetan islatzeaz gain, Orkestrak sare sozialetan duen presentzian eta sortu berri den EUSKOR digitalean gauzatzen da. Duela urte bete, webgunea berdiseinatua izan zen bizi dugun garai berrira egokitu eta tresna erabilgarri zein dinamikoagoa bilakatzeko, Euskadiko Orkestraren jarduera publikoari helarazteko asmoz.
Iker Sánchez zuzendaria estreinako aldiz arituko da Abonu-Denboraldian
Asteazken honetan Euskadiko Orkestraren 4. Abonu-programari dagokion kontzertua izango da Iruñeako Baluarte Auditorioan. Iker Sánchez-en zuzendaritzapean, Orkestrak Pascual Aldave lesakar konpositorearen Nerabe sorta lanarekin hasiko den egitaraua interpretatuko du. Entzungai izango dira, halaber, Darius Milhaud-en Le boeuf sur le toit, opus 58a eta Felix Mandelssohn-en 1. Sinfonia, orkestrak lehenbiziko aldiz interpretatuko duena.
Euskadiko Orkestrak, Pascual Aldaveren Akelarre lana estreinatu zuenak, honen Nerabe sorta lana berreskuratzen du orain, berau Orkestra Herrietan zikloan interpretatu ondoren. Orkestraren errepertorioan badira Aldaveren beste hainbat musikalan, Cristo ibérico eta Seaska Abesti, esaterako. Pascual Aldaveren (Lesaka, 1924) ibilbidea ertsiki lotua dago Iruñeari, 1973 eta 1983 urte bitartean nafar hiriburuko Pablo Sarasate Kontserbatorioko zuzendaria izan baitzen. Urte haietan Kontserbatorioko ganbera-orkestra eta abesbatza sortu zituen Aldavek. 2009an Nafarroako Goi Mailako Musika Kontserbatorioko Urrezko Domina jaso zuen lehendabiziko pertsona izan zen, musikagile zein irakasle bezala egindako ekarpen aberatsagatik. 1990an konposatutako Nerabe sorta haur-suitea Lesakako amek beren seme-alabei abesten zizkieten doinu herrikoietan oinarritzen da funtsean.
Iker Sánchez zuzendaria (Irun, 1976) estreinako aldiz arituko da Euskadiko Orkestraren Abonu-Denboraldian zuzendari gonbidatu gisa. Baina ez da Orkestra zuzentzen duen lehenbiziko aldia izango, izan ere Orkestra Herrietan zikloko hainbat kontzertutan, Argia aldizkariaren 90. urteurrenean, Euskadiko Kutxaren 50. urteurrenean eta, Musika Familian zikloaren baitan, Txirulajotzaile miresgarria eta Astindu gorputza Euskadiko Orkestrarekin kontzertuetan zuzendu izan baitu. Zuzendari gisa, Iker Sánchezek 2004an ekin zion bere ibilbideari eta ordutik Vassily Petrenko, Raymond Leppard edo Juanjo Menaren lankide izan da. 07/08 eta 08/09 denboraldietan BOS-eko zuzendari laguntzailea izan zen. Denboraldi honetan L'Orchestre de Bayonne Côte Basque, Orquesta Joven de Valencia (Venezuela) edo Tenerifeko Orkestra Sinfonikoa zuzenduko ditu. Gainera, hainbat talderen sortzaile eta zuzendari ere bada, horien artean T.I. 04, Musikeneko instrumentu-taldea, KABOS Ensemble, CRE-ART PROYECT (Londres), musika zuzendari duen KRATER Ensemble. 08/09 Denboralditik Euskadiko Kontserbatorioetako ikasleek osaturiko Euskalherriko Ikasleen Orkestraren musika zuzendaria da.
Kontzertua
Azaroaren 10a: Baluarte Auditorioa, Iruñea. 20:00etan.
Egitaraua
P. Aldave: Nerabe sorta, opus 33 [26']
D. Milhaud: Le boeuf sur le toit, opus 58a [19']
F. Mendelssohn: 1. Sinfonia do minorrean, opus 11* [37']
Iker Sánchez, zuzendaria
Informazio gehiago
Esku-egitarauaEugene Ugorski arituko da Daniel Hope-n ordez Orkestrak aste honetan eskainiko dituen kontzertuetan
Osasun-arazoak direla eta, Daniel Hope biolinjotzailea ezin izango da Orkestrarekin aritu Abonu-Denboraldiko hirugarren programaren baitan azaroaren 3, 4 eta 5ean Gasteiz, Iruñea eta Bilbon izango diren kontzertuetan. Bere ordez, Eugene Ugorski biolinjotzaile errusiarra izango da kontzertu hauetan Orkestrarekin arituko dena. Egitarauan ez da aldaketarik izango, Andrey Boreykoren zuzendaritzapean, Ugorski gazteak aurrez iragarritako Shotakovitchen Biolinerako 1. kontzertua interpretatuko baitu, Julian Rachlin-ek joan zen astean Donostian egin bezala, orduan ere orain gainerako hiriburuetan jarraipena izango duen 3. Abonu-programaren baitan. Jada bigarren zatian Orkestrak lehenbiziko aldiz interpretatzen duen Vassily Kalinnikov-en 1. Sinfonia izango da entzungai.
Eugene Ugorski, Euskadiko Orkestrarekin debuta egingo duen talentu gaztea. 1989an San Petersburgon jaioa, Eugene Ugorski egungo biolinjotzaile gazte miresgarrienetako bat dugu. Zortzi urte besterik ez zituela San Diegoko Orkestra Sinfonikoarekin debuta egin zuenetik, Errusia zein beste europar herrialdetako orkestra ezberdinekin eta baita Kanada, Estatu Batuak, Hegoamerika eta Ekialde Urruneko hainbat orkestrakin aritu izan da, Valery Gergiev, Eri Klas, Vasily Petrenko, Tugan Sokhiev, Keith Lockhart, Roberto Minezuk eta Andrey Boreykoren beraren zuzendaritzapean. Ugorski Gergiev-ek 2005 urtean Moskuko Pazko Jaialdian aritzeko gonbitea luzatu ostean heldu zen nazioarte mailan ezaguna izatera. Ugorskik Rotterdam eta Dortmund-eko Orkestra Filermonikoekin eta Bournemouth-eko Orkestra Sinfonikoarekin eskainitako azken emanaldiek "interpretazio bikaina", "kontrol eta doitasun izugarriak", "oreka egokia" edo "maisutasun liluragarria" bezalako hitzak merezi izan dituzte. Eugene Ugorskik Euskadiko Orkestrarekin debuta egitean interpretatuko duen Shotakovitchen 1. Biolinerako kontzertua "batzuetan inprobisazio rapsodiko baten itxura hartzen duen partitura labirintikoa" da, egitarauari oharren egile den Juan Manuel Vianaren hitzetan. Shostakovitchek biolinerako konposatutako bi kontzertuetan lehenak arrakasta itzela izan zen musikagilearentzat.
Kontzertu hauek zuzenduko dituen Andrey Boreyko maisua, halaber, Belgikako Orkestra Nazionaleko zuzendari titular izendatu berri dute, kargu hau 2012ko irailetik aurrera beteko duelarik. Azkenaldian izandako konpromezuen artean, alemaniar telebistako bigarren katea den ZDF telebistaren Echo der Stars 2010 Kontzertuan aritu zen, Essen Philharmonic Orchestra delakoa zuzenduz.
Kontzertuak
Azaroaren 3a: Principal Antzokia, Gasteiz. 20:00etan.
Azaroaren 4a: Baluarte Auditorioa, Iruñea. 20:00etan.
Azaroaren 5a: Euskalduna Jauregia, Bilbo. 20:00etan.
Egitaraua
D. Shostakovitch: Biolin eta orkestrarako 1. kontzertua la minorrean, opus 77 [39']
V. Kalinnikov: 1. Sinfonia sol minorrean [35']
Andrey Boreyko, zuzendaria
Eugene Ugorski, biolina (Daniel Hope-n ordez)
Orkestraren webgunea Diariovasco.com Sarietan finalista
Orkestraren webgunea Diariovasco.com V. Sarietarako finalista da, erakunde baten webgune onenaren atalean. Epaimahaiaren erabakia azaroaren 10eran emango da ezagutzera. Sari hauetarako proposatuak izateak Orkestrak sarean bere presentzia indartzeko ahalegina bultzatzera dator. Ahalegin hori 1998an sortua, estatu mailan orkestra sinfoniko batek plazaratutako estreinako webgunea bilakatu zen honetan islatzeaz gain, Orkestrak sare sozialetan duen presentzian eta sortu berri den EUSKOR digitalean gauzatzen da. Duela urte bete, webgunea berdiseinatua izan zen bizi dugun garai berrira egokitu eta tresna erabilgarri zein dinamikoagoa bilakatzeko, Euskadiko Orkestraren jarduera publikoari helarazteko asmoz.
Epaimahaiak emandako sariaz gain, Publikoaren Sari Berezia banatuko da, Diariovasco.com webgunearen erabiltzaileek emango dutena. Hemendik, merezi dugula uste baduzu, gure webgunearen alde bozkatzera animatzen zaitugu eta, bide batez, baita berau hobetzen laguntzera ere, zure iradokizunak webgunearen beraren edo sare sozialen bidez helaraziz.
Webgunean dago jada "Musika Familian zikloaren programazio berria
Bere Hezkuntza Departamentuaren bidez, Euskadiko Orkestrak bere egitekoaren ardatz nagusienetakoa den hezkuntza-jarduera sakontzen darrai. 2010/2011 denboraldirako Musika Gelaren programazioak, besteak beste, bost muntaia ezberdinen estreinaldia biltzen du, Musika Familian eta Eskola-haurrentzako Kontzertuak zikloen baitan, eta baita jarduera berrien abiaraztea ere. Estreinako aldiz, bederatzi hilabetetatik beherako haurrentzat eta haurdun dauden emakumeentzat kontzertu bat izango da.
Aurtengoan ere Kontzertu bakoitzaren aurretik ondorengo emanaldiaren hitzaurre bilakatuko den Sentsibilizazio-Tailer bana izango da.
JULIAN RACHLIN ETA DANIEL HOPE BIOLINJOTZAILEAK ARITUKO DIRA HIRUGARREN ABONU-DENBORALDIAN
Urriaren 28tik aurrera, Euskadiko Orkestrak bere Abonu-Denboraldiko hirugarren programari egingo dio aurre ohiko lau hiriburuetan. Bere zuzendari printzipal gonbidatu Andrey Boreykoren gidaritzapean, Orkestrak bakarlari gailenekin ekingo die kontzertu hauei: Jualian Rachlin, Donostian izango diren kontzertuetan arituko dena, eta Daniel Hope, Gasteiz, Iruñea eta Bilbon arituko dena. Biek Shostakovitch-en Biolin eta orkestrarako 1. kontzertua interpretatuko dute dagozkien kontzertuetan eta egitaraua Vassily Kalinnikov-en 1. Sinfoniak osotuko du. Orkestrak obra hau interpretatzen duen lehenbiziko aldia izango da.
Julian Rachlin, urriaren 28 eta 29an Kursaal Auditorioan izango diren kontzertuetan bakarlari gonbidatu gisa arituko dena, estreinako aldiz arituko da Euskadiko Orkestrarekin. Orkestra gorenekin kontzertuak eskaini dituen biolinjotzaile honen proiektuen artean honakoak daude: Philharmonia Orkestrarekin emanaldiak, NHK Orkestrarekin eta Chung maisuarekin, Gewandhaus Leipzig eta Marriner, Budapesteko Jaialdiko Orkestra eta Sokhiev, Bavierako Irratiko Orkestra Sinfonikoa eta Jansons eta Scala-ko Orkestra Filarmonikoa eta Hardingekin bira. Europar jaialdi ugaritan aritzen da, horien artean Salzburg, Verbier, Schleswig Holstein, BBC Proms eta Lucernakoa. Azken bederatzi urteetan, Rachlin-ek berak ganbera-musikako jaialdi bat antolatzen du Dubrovniken eta honen "lagunen" artean Leif Ove Andsnes, Janine Jansen, Maxim Vengerov, Mischa Maisky, Martin Fröst, Martin Grubinger, Sir Roger Moore, John Malkovich, Krysztof Penderecki, Daniele Gatti, Academy of Saint Martin in the Fields eta Royal Philarmonic Orchestra daude.
Daniel Hope, bestalde, aritua da lehen ere Orkestraren Abonu-Denboraldian eta oraingoan Gasteizko Principal Antzokian (azaroak 3), Iruñeako Baluarte Auditorioan (azaroak 4) eta Bilboko Euskalduna Jauregian (azaroak 5) arituko da. Hope-ek bira luze bat egin berri du Anne Sofie von Otter eta Bengt Forsberg-ekin, Deutsche Grammophon diskoetxearentzat grabaketa bat eginez abiatutako lankidetzaren baitan eta udazken honetan bira berri bat burutuko dute Europan barrena. Aurreko denboraldian Lucernan Beaux Arts Trio-rekin azken kontzertua eskaini ostean, Hope-ek Deutsche Grammophon-ekin eginiko azken lana kaleratu du, Vivaldiren kontzertuak biltzen dituena, Europako Ganbera Orkestrarekin. Bere ibilbidean aipagarriak dira halaber Kristallnacht delakoaren 70.urteurrena zela eta Berlingo Tempelhof aireportuan Daniel Hopek berak antolatu zuen kontzertua, Stravinskyren Soldadu baten istorioa New Yorken Klaus Maria Brandauer aktorearekin, Sting-ekin lankidetza eta baita Belgikako Queen Elisabeth lehiaketan epaimahikide izana ere.
Kontzertu hauek zuzenduko dituen Andrey Boreyko maisua Belgikako Orkestra Nazionaleko zuzendari titular izendatu berri dute, kargu hau 2012ko irailetik aurrera beteko duelarik. Azkenaldian izandako konpromezuen artean, alemaniar telebistako bigarren katea den ZDF telebistaren Echo der Stars 2010 Kontzertuan aritu zen, Essen Philharmonic Orchestra delakoa zuzenduz.
Abonu-Denboraldiko 3. programa
Urriaren 28 eta 29a: Kursaal Auditorioa, Donostia. 20:00etan.
Azaroaren 3a: Principal Antzokia, Gasteiz. 20:00etan.
Azaroaren 4a: Baluarte Auditorioa, Iruñea. 20:00etan.
Azaroaren 5a: Euskalduna Jauregia, Bilbo. 20:00etan.
Egitaraua
D. Shostakovitch: Biolin eta orkestrarako 1. kontzertua la minorrean, opus 77 [39']
V. Kalinnikov: 1. Sinfonia sol minorrean [35']
Andrey Boreyko, zuzendaria
Julian Rachlin, biolina (Donostian)
Daniel Hope, biolina (Gasteiz, Iruñea eta Bilbon)