Larunbat honetan, hilak 15, Miramongo Matinéeak zikloak 2011 urteari hasiera emango dio ganbera-musikazko kontzertu interesgarii bat argudio harturik. Klasikoenetatik urrun, XIX eta XX. mendeen arteko bi belaunaldietako bi konpositore errusiar dira emanaldi honetan protagonista.

Sexteto Arquitectónico taldeak Belliniren "Lo-ibiltaria" operaren gaien gaineko dibertimentu dirdiratsua eta Gran sestetto originale, Mijail Glinkarenak biak, eta Anton Arenskyren Tchaikovskyren gai baten gaineko bariazioak interpretatuko ditu. egitarauan agertzen ez bada ere, Tchaikovsky bera izango da kontzertu honetako beste protagonista bat. Izan ere, batetik Anton Glinkak eragin nabaria izan zuen Tchaikovskyren musika-ekoizpenean eta, bestetik, Tchaikovskyk berak izan zuen isla Arenskyren lanean.

Mijail Glinka errusiar musikaren aitatzat hartzen da eta bere harrialdetik aratago oihartzuna izan zuen lehendabiziko errusiar konpositorea izan zen; horren harira, Mussorgsky, Rimsky-Korsakov, Borodin, Kui eta Balakirev-ek osatzen zuten eta errusiar musikaren baitan nabermena izan zen "Bosten taldea"ren sorreran eragina izan zuen. Anton Arensky, berriz, Skriabin edo Rachmaninov bezalako sortzaile gailenen maisu izan zen.

Sexteto Arquitectónico, Euskadiko Orkestraren baitan sortua, Raquel Cortinas eta Ricardo Ruiz biolinjotzaileek, Delphine dupuy biolak, Gabriel Mesado biolontxelojoleak, Victor Bogdanov eta Euskadiko Orkestraren lankide sarria den Javier Pérez de Azpeitia pianojotzaileak osatzen dute.

Kontzertu honetarako sarrerak Servikutxa, Telekutxa (943 00 12 00), www.kutxa.net eta www.euskadikoorkestra.es helbideetan eskura daitezke, eta baita Egoitzaren leihatilan, kontzertu egunean 10:30etatik aurrera. Halaber, doako autobus zerbitzua dago Miramongo Egoitzera etortzeko, 10:25etan Gipuzkoako Plazako 4.zenbakitik atera eta Antso Jakituna Hiribideko 18. zkian eta Madrilgo Hiribideko 34.ean geldialdiak egiten dituelarik.

Egitaraua
Mijail Ivanovich Glinka (1804-1857)
Divertimento brillante sobre temas de la ópera "La Sonámbula" de Bellini para quinteto de cuerda y piano
Anton Arensky (1861-1906)
Variaciones sobre un tema de Tchaikovsky para quinteto de cuerda, opus 35A
Mijail Ivanovich Glinka (1804-1857)
Gran sestetto originale para quinteto de cuerda y piano

Sexteto Arquitectónico
Raquel Cortinas*, Ricardo Ruiz, biolina
Delphine Dupuy*, biola
Gabriel Mesado*, biolontxeloa
Victor Vogdanov*, kontrabaxua
Javier Pérez de Azpeitia, pianoa

*EOSeko kidea

Informazio gehiago

komunikabideen aurrean aurkeztu berri da Euskadiko Orkestraren Musika Gelaren 2010/2011 denboraldia.  Iñigo Alberdi eta Mikel Cañadaz gain, prentsaurrekoan izan dira Musika Familian zikloan koproduktore diren Gasteizko Antzokien Sarearen zuzendari Marta Monfort eta Kursaal Fundazioaren zuzendari artistiko José Antonio Echenique eta babesle den El Diario Vascoko ordezkari Shanti Ipiñazar; eta baita Eskola Haurrentzako Kontzertuetan lankide dugun Donostiako Udaleko Hezkuntza Ataleko ordezkari Ana Eskisabel.

Musika Gela Euskadiko Orkestrako Hezkuntza Departamentuak diseinatzen dituen jarduera guztiak biltzen dituen marka da; jada finkatutako Musika Familian zikloko kontzertuak, Gasteiz eta Donostian, Ikastetxeentzako jarduerak izenburupean sortutako ekimenak, horien artean Egoitzara Bisitak, Tailerrak Ikastetxeetan, eta Eskola-haurrentzako kontzertuak eta aurtengoan estreinako aldiz burutuko diren Entsegu Irekiak. Honela, denboraldi honetan guztira hogeita sei izango dira Euskadiko Orkestra Sinfonikoa lokailu harturik gauzatuko diren musika-ekitaldiak.

Musika Familian zikloa, duela hamabost urte burutzen dena, Donostian Kursaal Fundazioarekin eta Gasteizen Udal Antzoki Sarearekin koprodukzioan burutuko da aurtengoan ere. Zikloa argudio ezberdinak erabilliz musika ezagutzen jarraitzeko sortutako bost proposamen interesgarrik osatuko dute. Kontzertu hauen sarrera-jarduera gisa, Sentsibilizazio Tailerrak izango dira, emanaldi bakoitza baino ordu batzuk lehenago eta ondoren entzun eta ikusiko denarekin lotura zuzena dutela.

Ikastetxeentzako Jardueren artean, denboraldi honetan ere azpimarragarriak dira Eskola-haurrentzako Kontzertuak. Ekimen honek 2000 haurretik gora bildu zituen iaz Orkestraren egoitzan. Jarduera hau Miramonen izango da berriz ere eskola-orduetan. Bere egiturak jarduera aurretik gelatan prestatzea ahalbidetuko du, Hezkuntza Departamentuak burutu eta kontzertuetara etorriko diren ikastetxeetako musika-irakasleei aurkeztuko dizkien gida didaktikoak oinarri harturik. Orkestrak gainera Egoitzara bisitak eta Ikastetxeetan Tailerrak ere jartzen ditu ikasle, irakasle eta bestelako taldeen eskura.

Denboraldi honetan Entsegu Irekiak dira berrikuntza nagusia. Hauek Derrigorrezko Bigarren Hezkuntza, Batxilergo, musika eta dantza eskola zein kontserbatorioetako eta Musikeneko irakasle eta ikasle eta irakasleei daude zuzendurik. Denboraldi honetan doako bi Entsegu Ireki programatu dira: lehenbizikoa joan zen azaroan burutu zen eta bigarrena otsailaren 17an izango da, 16.00etan Donostiako Kursaal Auditorioan. Euskadiko Orkestra Sinfonikoak zulogonean eta Malandain Ballet Biarritz eszenatokian, biek bat egingo dute "Magifique" ikuskizuna aurkezteko, Thierry Malandainen koreografiaz eta Eduardo Portal musika-zuzendari dela. Jarduera hau Derrigorrezko Bigarren Hezkuntza, Batxilergo, musika eta dantza eskola zein kontserbatorioetako eta Musikeneko irakasle eta ikasle eta irakasleei soilik zuzentzen zaie eta doakoa izango da.

Informazio gehiago

Euskal Konpositoreen Bildumak Valentín de Zubiaurre (Garai, 1837-1914) musikagile bizkaitarrari eskaini dio bere 13. zenbakia. Zubiaurrek bere garaiko musikan mailarik bikainenetan jardun zuen. 1873an, San Fernandoko akademiko eta Espainiako Arte Ederretako Akademiaren Erromako egoitzako merituko lehen musikari pentsiodun izendatu zuten. Adituen esanetan Espainiako opera sorkuntzako bultzatzaile nagusietako bat izan zen, baita bere bi opera Errege Antzokian taularatzea lortu zuen konpositore ez italiar bakanetako bat ere.

Zubiaurreren konposizio katalogoak berrehun obra baino gehiago biltzen ditu: operak, zarzuelak, mezak, orkestrarako obrak, ahots talderako konposizioak, ganbera, piano eta organokoak, baita Errege Kaperako langune hainbat oposizio ariketa ere. Jaioterriarekin izan zuen harreman estuaren ondorioz euskarazko obra adierazgarriak ere konposatu zituen.

Disko honetan, Sinfonia mi eta Ecos de Oiz (biolontxelorako melodia, orkestra akonpainamendua duena) obrak eta Don Fernando el Emplazado (hiru ekitaldiko tragedia lirikoa) eta Ledia (hiru ekitaldiko drama lirikoa) operen preludioak biltzen dira. Diska laguntzen duen liburuxkak Zubiaurreren obraren inguruan ikerlana egin duen Patricia Sojo musikologoak idatzitako testuak biltzen ditu.

Orkestraren ohiko kolaboratzailea den Juan José Ocón maisuak parte hartu du Bilduma honetan lehen aldiz. Eta Roman Jablonski biolontxelo jotzaileak ere bai; azken honek bakarlari lanak egin ditu Ecos de Oiz obraren grabazioan.

Bilduma honi gehitu zaion azken konpositorea da Valentin de Zubiaurre. Bertan, dagoeneko, honako konpositoreak bildu dira: Beltrán Pagola, Luis de Pablo, Juan Crisóstomo Arriaga, Aita Madina, Tomás Garbizu, Aita Donostia, Pablo Sorozabal, Francisco Escudero, Andrés Isasi, Jesús Aranbarri, José Mª Usandizaga eta Jesus Guridi. Bildumaren hurrengo bi monografikoak Pedro Sanjuán eta Carmelo Bernaolari eskainiko zaizkio.

Bilduma honen disko guztietan bezala, honetan ere gure esker ona azaltzen diegu bai euskal musikako ekoizpen-proiektu hau bultzatu zuen Eusko Jaurlaritzako Kultura Sailari eta baita MONDRAGON korporazioari ere, erreferentziazko soinuzko artxibo bilakatu den bilduma honen bidez Orkestraren diskografia zabaltzearekin irmoki konprometiturik baitago.

Informazio gehiago

Larunbat honetan, 18, 2010. urteko azken Miramongo Matinéea izango da Euskadiko Orkestraren Egoitzan. Abesbatzarako musika Orkestrak bere egoitzan antolatzen duen ganbera-zikloaren zimentarrietariko bat dugu, zalantzarik gabe, gure artean ahotserako musikaren tradizioaren errotzearen erakusle. Azken urteotan gurean izan dira Iruñeako Ganbera-Abesbatza, Vocalia Taldea, Kea Ahots Taldea, Bilboko Koral Elkartea, Iruñeako Orfeoiaren Eskolania edo Orfeoi Txiki. Oraingoan, berriz, Landarbaso Abesbatza izango da Miramongo Matinéetan arituko dena, "Tradizioa eta berrikuntza abesbatzarako musikan. Oraina eta etorkizuna" izenburu duen kontzertua eskainiz.

Landarbaso Abesbatza 1991. urte bukaeran sortu zen Errenterian, musika egiteko gogo handia zuen gazte talde baten eskutik. Gaur egun 49 abeslarik osatzen dute abesbatza, batez besteko 29 urterekin. Abesbatza, hasieratik, Iñaki Tolaretxipiren zuzendaritza musikalaren menpe egon da. Landarbasok oso errepertorio zabala lantzen du, garai eta estilo desberdinetako bai obra profano eta baita eliz obrak ere abestuz. Landarbaso Abesbatzak sorkuntza lana eta euskal folklorearen harmonizazio lana egiten du, bai abesbatza eta baita gaur egungo musika munduari ere lan ildo berriak eskainiz. Azken urte hauetan ziklo, lehiaketa eta kontzertu askotan parte hartu du abesbatzak Penintsula barnean eta 2001. urtetik aurrera abesbatza nazioarte mailako lehiaketetatik gonbiteak jasotzen hasi da, sari garrantzitsuak eskuratuz

Landarbaso Abesbatzak Matinée honetan aurkeztuko duen egitaraua XX eta XXI. mendeetan idatzitako lanek osatzen dute. Honetan tradiziozkoa dena landu eta berrikuntzarekin uztartzen da. Honela, joan zen Musikasten, Errenteriako Euskal Musikaren Astean Hiru Damatxo obraren lehenbiziko zatia estreinatu zen eta larunbatean, berriz, bere osotasunean gozatzeko aukera izango da, estreinako aldiz. Urteko zein sasoian gauden kontutan izanik, Landarbaso Abesbatzak Tomás Aragüés-en Gabonetako Suitean biltzen diren gabon-izaeradun obrez osatutako sarrera batekin emango dio hasiera emanaldiari. Ondoren, Jubilate Deo edo The Sounding Sea partituretan zortzi, hamar edo hamabi ahotsez osatutako abesbatza bidez soinu-kolore ezberdinak garatzen dira, bai legato eskema bidez eta baita erritmo bizien bidez ere. Euskal folkloreak ere izango du bere lekua kontzertu honetan, euskal konpositore garaikideek doinu herrikoiak oinarri harturik egindako moldaketak entzungai izango baitira, horien artean Xabier Sarasolaren Neskatx ederra, esaterako.

Kontzertu honetarako sarrerak Servikutxa, Telekutxa (943 00 12 00), www.kutxa.net eta www.euskadikoorkestra.es helbideetan eskura daitezke, eta baita Egoitzaren leihatilan, kontzertu egunean 10:30etatik aurrera. Halaber, doako autobus zerbitzua dago Miramongo Egoitzera etortzeko, 10:25etan Gipuzkoako Plazako 4.zenbakitik atera eta Antso Jakituna Hiribideko 18. zkian eta Madrilgo Hiribideko 34.ean geldialdiak egiten dituelarik.

Egitaraua
Tomás Aragüés (1935-): Suite de Navidad
Urmas Sisask (1960-): Heliseb väljadel
Eric William Barnum (1979-): The sounding sea
Xabier Sarasola (1960-): Neskatx ederra
Albert Alcaraz (1978-): Artzainaren kantu; Hiru damatxo (estreno de la versión íntegra)
Ko Matsushita (1962-): Jubilate Deo
Eric Whitacre (1972-): Cloudburst
Morten Lauridsen (1943-): Nocturnes. III.- Sure on this shining night [4']

Landarbaso Abesbatza
(Zuzendaria: Iñaki Tolaretxipi)

Informazio gehiago

Kulturaren sustaketaren inguruan bere egitekoaren baitan, Euskadiko Orkestra Eusko Jaurlaritzak abian jarritako KULTURA BONUA programari atxiki zaio aurtengoan ere.

KULTURA BONUA Kutxazainek ematen dituzten sarrera-txartelen moduko dokumentu bat da. Honek establezimendu bakar batean kultura-produktuetan 40 euro kontsumitzeko ematen du, nahiz eta erosleak txartela bera 25 euro ordaindu. Bonua abenduaren 13tik 2011ko urtarrilaren 5a bitartean edo hornidura agortu arte egongo da salgai, Gipuzkoan Kutxaren orotarako kutxazainetan, Bizkaian BBKren orotarako kutxazainetan eta Araban, berriz, Vital Kutxaren interneteko salmenta elektronikoko zerbitzuaren bidez.

KULTURA BONUAren erabilera abenduaren 13tik 2010eko urtarrilaren 20ra bitartean luzatuko da. Euskadiko Orkestraren kasuan bonua Abonu Denboraldiko kontzertuetarako sarrerak Donostiako Kursaal Auditorioko, Bilboko Euskalduna Jauregiko eta Gasteizko Principal Antzokiko leihatiletan erosterakoan erabili ahal izango da bonua; Miramongo Matinéeak zikloaren kasuan, hauetarako sarrerak Orkestraren bulegoetan erosterakoan ere erabili ahal izango da Kultura Bonua.

Informazio gehiago