3.000 pertsona baino gehiago bildu ziren Konstituzio Plazan Orkestraren doako kontzertua gertutik jarraitzeko
Pasa den ostiralean, hilak 13, ospatu zen kontzertua Donostiako Konstituzio Plazan, Donostia 2016 urtean kulturaren europear hiriburu izateko hautagaitzaren aldeko jardueren artean. Aste Nagusiaren hitzaurrea izan zen doako kontzertu hau eta Juan José Ocón maisu donostiarrak zuzen zuen.
Egitaraua musika klasikotik eratorritako doinu ezagunak, filmatako soinu banden zein zarzuelatako zatiak eta Donostiako kantu herrikoiek osatu zuten. Kontzertua amaitzeko, Orkestrak bisak ekaini zituen, hauen artean europar himnoa, Donostiako martxa eta Errealeko himnoa.
Bertara hurbildu ziren 3.000 pertsona baino gehiagok kontzertu honetarako jarri ziren 1.500 eserlekuetatik edo eta Konstituzio Plazako arkupetatik jarraitu ahal izan zuten kontzertua.
Orkestrak Donostia 2016 hautagaitzaren alde eskainiko duen kontzertua aurkeztu da
Donostiako Udalean aurkeztu berri da datorren ostiralean, hilak 13, Euskadiko Orkestrak Donostiako Konstituzio Plazan, Donostia 2016 urtean Europako Kultur Hiriburua izateko hautagaitzaren alde eskainiko duen kontzertua.
Aste Nagusiaren hitzaurre izango den emanaldi honekin jarriko du abian Orkestrak 2010/2011 denboraldiko bere jarduera. Kontzertua, Juan José Ocón maisu donostiarrak zuzenduko du eta 90 musikarik interpretatuko duten egitaraua musika klasikotik eratorritako doinu ezagunak, filmatako soinu banden zein zarzuelatako zatiak eta Donostiako kantu herrikoiek osatuko dute. Konstituzio plazan 1500 lagunentzat eserlekuak jarriko dira.
Hiritar guztiei zuzendutako doako kontzertu hau Orkestrako zuzendari nagusi Iñigo Alberdi eta Odón Elorza, Donostiako alkateak joan zen otsailean sinatutako lankidetza-akordoioaren emaitza da eta Orkestrak Donostiako bizitza kulturalaren sustapenarekiko duen konpromezuari erantzuten dio. Izan ere, bertan bere egoitza ofiziala izateaz gain, Orkestrak lau kontzertu ziklo eskaintzen ditu Donostian: Abonu-Denboraldia, Miramongo Matinéeak deritzon ganbera-musika zikloa eta entzulego gazteenari zuzenduriko Musika Familian zikloa eta Eskola-haurrentzako kontzertuen ziklo berria. Honetaz gain, Euskadiko Orkestra Sinfonikoa hiriko kultur-erakunde ezberdinekin lankidetza estuan aritu ohi da, horren eredu irailaren 2an Donostiako Musika Hamabostaldiaren baitan eskainiko duen kontzertua.
Donostia 2016 hautagaitzaren aldeko kontzertua
Abuztuak 13: Konstituzio plaza, Donostia-San Sebastián. 22.30etan
Juan José Ocón, zuzendaria
Egitaraua
J. Guridi: El Caserío. Preludio
J. Williams: Jurassic Park. Tema
H. Mancini-J. Mason: Tribute to Henry Mancini
L. Bernstein: West Side Story. Orkestrarako aukeraketa
J. Williams: Star Wars. Orkestrarako suitea
P.I. Tchaikowsky: 4. Sinfonia. Allegro con Fuoco
P. Ugalde: Parte vieja donostiarra
P.I. Tchaikovsky: 1812 Obertura
Orkestrak bizi-bizi ekingo dio 2010/2011 denboraldiari
"Mirentxu" zarzuelaren mendeurrena ospatuz denboraldia gorenean amaitu ostean, datorren denboraldiaren hasiera bizi bizia izango da Orkestrarentzat. Izan ere, uda honetan aukera ugari izango da Euskadiko Orkestraren musika entzuteko: Donostia 2016 hautagaitzaren aldeko doako kontzertu bat abuztuaren 13an, Orkestra Herrietan ekimenaren baitako emanaldiak Deba, Zarautz eta Saran, abuztuaren 19 eta 25 bitartean, Donostiako Musika Hamabostaldian kontzertu bat irailaren 2an eta KlasikAt proiektua abian jarriz, Michel Camilok Orkestrarekin batera eskainiko dituen kontzertuak, esaterako. Azken hauek irailaren 7an Bilbon, 8an Iruñean, 9an Donostian eta 10ean Gasteizen izango dira. Eszenatoki ezberdinetan eta askotariko musikak argudio harturik, Orkestraren musika entzule orori helarazteko eskaintza anitza osatzen dute guztiek.
Gainera, uda partean Orkestrak bi diska berri grabatuko ditu: batetik, iaz abiatutako "Gaurko Musika" ildoari jarraiki Sofia Gubaidulina konpositoreari eskainitako monografikoa eta, bestetik, Pedro Sanjuanen lana biltzen duen diska, Claves-ek argitaratutako Euskal Konpositoreen Bildumako 14.a.
Orkestrak “Mirentxu” zarzuela Arriaga Antzokian interpretatzearekin amaituko du 2009/2010 denboraldia
Orkestrak Jesús Guridiren Mirentxu euskal idilio lirikoaren interpretazioarekin itxiko du 2009/2010 denboraldia. Lan obra honen bertsio berri hau erabateko estreinaldiaren mendeurrena ospatzearekin batera izango da ikusgai Arriaga Antzokian. Emilio Sagiren eszena zuzendaritzari y Daniel Bianco-ren eszenografiari esker aire berriztatu eta modernoa izango duen zarzuela honen emanaldiak ekainaren 19, 22, 24 eta 26an izango dira.
David Giménez Carreras maisuaren musika-zuzendaritzarekin, "Mirentxu" Arriaga Antzokiaren euskarazko ekoizpen bat da, Euskadiko Orkestra Sinfonikoarekin koprodukzioan egina. Ekoizpen berri honen jantzitegiaren egilea Miriam Ocariz bilbotar diseinugilea da eta argitzapenaz Eduardo Bravo arduratu da; bertan parte hartzen dute, halaber, Bilboko Koral Elkartea, erakunde honen Kontserbatorioko Abesbatza eta Alejandro Zabala, errepertorioko irakasleak.
Jesús Guridiren (Gasteiz, 1886 - Madril, 1961) musikarekin eta Alfredo de Etxaberen libretoarekin, euskal antzerki lirikoaren altxora da "Mirentxu". 1910eko maiatzaren 31n estreinatu zen Bilboko Campos Elíseos Antzokian. Ekoizpen hau Jesús María de Arozamena eta Alfredo de Etxaberen 1947ko libretoan oinarritzen da, Ramon Lazkanoren edizio kritikoan.
María Bayo soprano bikainak beteko du protagonistaren papera, eta berarekin izango dira, baita ere, Andeka Gorrotxategi, Christopher Robertson, Fernando Latorre eta Axier Sánchez bakarlariak. Axier Sánchez-ek izan ezik, gainerako guztiek hainbat alditan aritu dira Euskadiko Orkestrarekin batera. Abeslari taldearen buru den María Bayo Donostiako Musika Hambostaldian eta Operaren Lagunen Bilboko Elkartearen (OLBE) denboraldian zenbaitetan aritu da Orkestrarkein batera. Gainera, Claves-ek argitaratzen duen Euskal Konpositoreen Bildumako hirugarren diskan, Jesús Arámbarriri eskainitakoan esku hartu zuen 1999an. Iragan abenduan, María Bayok goraipamen berri bat lortu zuen, zeren Kultura Ministerioak ematen duen 2009ko Musika Sari Nazionala irabazi baitzuen, Interpretazioaren eta Konposizioaren modalitateetan. Opera anitzekoatako paperak interpretatzeko gai den soprano horrek Mirentxu gazte maiteminduaren paper protagonista beteko du.
Euskal antzerki lirikoa. "Mirentxu" zarzuelak eman zion hasiera Euskal operaren urrezko aldiari; Jesus Guridi gasteiztarra izan zen aro horretako musikaririk aipagarriena, eta arlo hau behin eta berriz garatu zuen, bestelako zarzuela batzuekin: "Amaya" edota "El Caserío". Guridik zera esan zuen "Mirentxu" obraren inguruan: "22 urte nituenean egin nuen, itxurakeriarik gabe, eta euskal giro nabaria ematen saiatu nintzen". Melodia eta erritmoen aniztasuna dira, bestalde, Euskal zarzuela honetan askok goraipatu dutena.
Alfredo de Etxabe da libretoaren egilea. Bertan, Manu eta horren alaba Mirentxu agertzen dira Errotatxiki antzinako ola zahar batean. Beraiekin Raimundo bizi da, errotariaren iloba. Mirentxuk bere lehengusuarenganako sentitzen duen maitasunak oztopoak izango ditu, azken hori Prexen-etaz maiteminduta baitago, hau da, Mirentxurik lagun onena. Hirukote honen historia, Mirentxuren heriotza gozoarekin amaituko da.
Bertsio berri honetan, errota eta burdinola desagertzen dira, eta haien ordez tonu urrekara eta berdeak nabarmentzen dituen eszenografia bat jartzen da; bertsio berri honek Guridiren musikaren eta idilio liriko honen dramaren alderdirik onenari eusten dio eta eszenarako berriztatzen du, talde artistiko azpimarragarri batez. Miriam Ocarizen jantzitegiak ukitu modernoa eransten dio "Mirentxu"ren bertsio honi, Eduardo Bravoren argiztapenarekin.
Euskadiko Orkestraren abonatuek %25-eko beherapena izango dute ikuskizun honetarako sarrerak erosterakoan.
Orkestra bat miniaturan: Ezohiko talde instrumental batek itxiko du Miramongo Matinéeak zikloa
Larunbat honetan, hilak 12, itxiko da Orkestraren egoitzan Miramongo Matinéeak zikloaren 2009/2010 denboraldia. Honela, Franz Schubert-en Klarinete, fagot, tronpa eta harirako oktetoa oinarri izango duen ganbera kontzertuak emango dio amaiera ziklo honen hemezortzigarren denboraldiari. Irailetik askotariko musikak bildu ditu ziklo honek: hasi Cello Octet Amsterdam-ek, Bilbaoko Udal Txistulari Bandak eta Alos Quartet-ek, Iruñeako Orfeoiaren Eskolaniak edo Euskadiko Orkestrak berak bere titular Andrés Orozco-Estradaren zuzendaritzapean eskainitako musikatik, Orkestrako kideek interpretatutako ganbera-lanen katalogo zabal eta aberatseraino. Proposamen orok, hamasei guztira, Matinéen izendatzaile komun bilakatutakoa izan dute ezaugarri: garaiei eta estiloei dagokionez askotarikoa den kalitatezko musika giro lasaiean eskaintzea.
Itxiera honetarako, "Haize eta hari" izenburupean, Euskadiko Orkestrako kide zein lankideek osatutako okteto batek Beethoven-ek abian jarritako musika-erromantizismoaren jarraitzaile izandako Schubert-ek 1824ean konposatutako Oktetoa interpretatuko du. Partitura hau ezohikoa den instrumentu talde batentzat dago idatzia: bi biolin eta biola, biolontxelo, kontrabaxu, klarinete, fagot eta tronpa banak osatutako orkestra miniaturan, nolabait esateko. Musika lan honek Oktetoaren ezaugarri diren indar eta originaltasunak Schubert-ek eredu klasikoengandik urrun egoteko zuen grina islatzen dute. Partiturak Beethoven-ek mi bemol maiorrean idatzitako Septetoari omenaldia egiten badio ere, haren sei mugimenduak biltzen dituelarik, birtuositate, adierazpen-intentsitate eta zabaltasun handiagoz egiten du.
Honako hauek dira Oktetoa interpretatuko duten musikariak: Iskandar Komilov eta Cristina Lixandru, biolinak; Jean Michel Nougué, biola; Gabriel Mesado, biolontxeloa; Arkadiusz Maciejski, kontrabaxua; Sara Zufiaurre, klarinetea; Anne Charlotte Lacroix, fagota eta Arnaud Guicherd, tronpa.
Denboraldiko azken kontzertu honetarako sarrerak Servikutxa, Telekutxa (943 00 12 00), www.kutxa.net eta www.euskadikoorkestra.es helbideetan eskura daitezke, eta baita Egoitzaren leihatilan, kontzertu egunean 10:30etatik aurrera. Halaber, doako autobus zerbitzua dago Miramongo Egoitzera etortzeko, 10:25etan Gipuzkoako Plazako 4.zenbakitik atera eta Antso Jakituna Hiribideko 18. zkian eta Madrilgo Hiribideko 34.ean geldialdiak egiten dituelarik.
2009/2010 Denboraldiko azken Matinéea
2010eko ekainaren 12an, Euskaidko Orkestraren Egoitza, Miramon. 11.00etan
Haize eta hari
Orkestra bat miniaturan
Egitaraua
Franz Schubert (1797-1828)
Klarinete, fagot, tronpa eta harirako oktetoa, op. postumo 166, D 803
Informazio gehiago
Esku-egitarauaKLASIKAT: KONTZERTU ZIKLO BERRIA
Michel Camilo pianojolea, aurtengo irailean, eta Jorge Drexler, kantautorea, 2011ko ekainean, Euskadiko Orkestrarekin batera arituko dira bakarlari bezala ziklo honek eskainiko dituen programa bakoitzean. Donostiako Kursaala, Bilboko Arteria Campos Antzokia, Gasteizko Principal Antzokia eta Iruñako Baluarte Auditorioa izango dira ekimen berri honen eszenatoki.
Sarrerak ohiko kanaletan erosi daitezke Donostiako, Gasteizko eta Iruñeako kontzertuetarako eta Bilborako kasuan, Arteria Campos Antzokiko leihatilan eta BBKn. Hauen prezioa 15 € koa da kontzertuko.
KlasikAt denboraldi berri honetako apustu handienetako bat izango da. Ziklo honek, Klasikoaz at dauden musikazko proposamen interesgarriez gozatzeko aukera eskainiko du.
RHAPSODY IN SCHOOL: DANIEL MÜLLER-SCHOTT DONOSTIAKO ALEMANIAR IKASTETXEAN
Donostiako San Alberto Magno Alemaniar ikastetxeko DBHko 1. eta 2. mailako ikasleek Euskadiko Orkestraren azkeneko abonu programan parte-hartzen ari den Daniel Müller-Schott biolontxelo-jolearen bisita jaso dute gaur goizean. Müller-Schotten bisita hau "Rapsody in School International" programak antolatu du. Lars Vogt pianojotzaileak abian jarria eta Arteen Alemaniar Lurralde Fundazioaren laguntza duen ekimen honek gazteen artean musika klasikoa bultzatzea du helburu, musikari nabarmenak gertutik ezagutzeko aukera emanez.
PIANOA ETA HAIZEA: EUSKADIKO ORKESTRAKO ETA BILBAO ORKESTRA FINFONIKO ZENBAIT HAIZE BAKARLARIK ETA MARTA ZABALETA PIANOJOTZAILEAK MOZART ETA BEETHOVEN-EN LANAK INTERPRETATUKO DITUZTE MATINÉE BERRI BATEAN
Larunbatean, hilak 5, Miramongo Matinéeak zikloari dagokion kontzertu berri bat ospatuko da Euskadiko Orkestraren egoitzan. "Pianoa eta haizea" izenburupean, Euskadiko Orkestra Sinfonikoko bakarlari Hervé Michaud, Juan Navarro eta Marco Carattok eta Bilbao Orkestra Sinfonikoko bakarlari Juan Manuel Gómezek bat egin dute Marta Zabaleta pianojotzailearekin musika klasikoaren bi sortzaile handiren lanak interpretatzeko, Mozart eta Beethoven-enak, hain zuzen ere. Klasikoak entzuteak beti eragiten duen gozamenaz gain, hitzordu goiztiar honek izaera pedagogikoa ere badu, Mozart-en obrek Beethoven-en ekoizpenean izandako eragina agertuko baitu.
Egitaraua Mozar-ten Oboe, klarinete, tronpa, fagot eta pianorako kintetoa mi bemol maiorrean, K. 452 eta Beethoven-en Oboe, klarinete, tronpa, fagot eta pianorako kintetoa mi bemol maiorrean, opus 16 partiturek osatzen dute. Azken hau Mozart-i omenaldi esplizitu gisa pasa da historiara eta K452 delakoari lotu izan zaio aho batez. Talde instrumental ezohikorako idatzitako bi obren arteko simetriak ukaezin zein nabarmenak gertatzen dira, baita obra sakonki ezagutzen ez dutenentzat ere; eta ez bakarrik formari dagokionean, hau da, hiru mugimendutan banatutako egitura klasikoari (Allegro-Andante-Rondó) dagokionean, ezta arlo tekniko, taldeari zein tonalitateari dagokionean bakarrik, simetria horiek obraren joera estilistikoa eta adierazkortasunean ere antzematen baitira. Izan ere, Beethoven-en kintetoan Mozart-enean atzemangarri den utzikeria lasaiaren giroa aurki daiteke, arintasuna eta gogogabeko dotorezia bera.
Matinée honetan arituko diren interpreteak eskarmentu handikoak dira musika sinfonikoari dagokionean; izan ere, Hervé Michaud (oboea), Juan Navarro (klarinetea), Marco Caratto (fagota), eta Juan Manuel Gómezek (tronpa) hogei urtetik gora daramatzate beren orkestratako bakarlari gisa, eginkizun hau ganbera-musikarekin tartekatzen dutelarik. Marta Zabaleta pianojotzaileak, berriz, nazioarte mailako ibilbide nabaria egina du jada, orkestra nagusienetakoekin eta Colin Davis, Comissiona, Pfaff, Chmura, Pehlivanian, Wilson, Encinar, Mena, Wilkins, Spinosi edo Gatti maiduen zuzendaritzapean aritu delarik. Duela gutxi Euskadiko Orkestraren Abonu-Denboraldiaren baitan aritu zen, bilbao Orkestra Sinfonikoarekin eta Günter Neuholden zuzendaritzapean.
Kontzertu honetarako sarrerak Servikutxa, Telekutxa (943 00 12 00), www.kutxa.net eta www.euskadikoorkestra.es helbideetan eskura daitezke, eta baita Egoitzaren leihatilan, kontzertu egunean 10:30etatik aurrera. Halaber, doako autobus zerbitzua dago Miramongo Egoitzera etortzeko, 10:25etan Gipuzkoako Plazako 4.zenbakitik atera eta Antso Jakituna Hiribideko 18. zkian eta Madrilgo Hiribideko 34.ean geldialdiak egiten dituelarik.
Egitaraua
Haize barkalariak bai, baina ez bakarrik
Pianoa eta haizea
Wolfgang Amadeus Mozart (1756-1791)
Oboe, klarinete, tronpa, fagot eta pianorako kintetoa mi bemol maiorrean, K. 452 [26']
Ludwig van Beethoven (1770-1827)
Oboe, klarinete, tronpa, fagot eta pianorako kintetoa mi bemol maiorrean, opus 16 [27']
Hervé Michaud* oboea
Juan Navarro* klarinetea
Marco Caratto* fagota
Juan Manuel Gómez, tronpa
Marta Zabaleta, pianoa
*EOSeko kidea
Informazio gehiago
Esku-egitarauaEUSKADIKO ORKESTRAK MIKHAIL AGREST-EN ZUZENDARITZAPEAN ETA DANIEL MÜLLER-SCHOTT BAKARLARI GONBIDATU DUELA EMANGO DIO AMAIERA ABONU-DENBORALDIARI
Euskadiko Orkestra 2009/2010 Abonu-Denboraldiko azken programa prestatzen ari da egunotan, Orkestraren zuzendari gonbidatu gisa debuta egingo duen Mikhail Agrest maisuaren zuzendaritzapean. Agrest estreinakoz aritzeaz gain, Daniel Múller-Schott biolontxelo-jotzailea ere lehenbiziko aldiz arituko da Orkestrarekin, Elgar-en Biolontxelo eta orkestrarako kontzertua interpretatuko duelarik. Joseba Torreren Haizea alde lanaren estreinaldia ere programa honen argudioetariko bat dugu. Kontzertuak, Aurretiko Hitzaldi bana izango dutenak, maiatzaren 31 eta ekainaren 3 Donsotia, 1 Iruñean, 2 Bilbon eta 3an Gasteizen izango dira, azken honek denboraldia itxiko duelarik.
Nazioarte mailako sona eta ibilbide nabarmena dira Mikhail Agrest eta Daniel Müller-Schott-en ezaugarriak. Lehena 2001.etik Mariinsky Antzokian ari da eta Leipzig Gewandhaus Orchestra, BBC-ko Orkestra Sinfonikoa edo Londreseko Orkestra Filarmonikoa zuzendu ditu, besteak beste. Müller-Schott, berriz, New Yorkeko Orkesta Filarmonikoa, Chicagoko Orkestra Sinfonikoa, Bostongoa, Filadelfiako Orkestra, BBC-ko Orkestra Filarmonikoa, Philharmonia edo Frantziako Orkestra Nazionalarekin aritu da Ashkenazy, Eschenbach, Dutoit, Previn edo Masur-en zuzendaritzapean. Gainera, Müller-Schott "Rapsody in School International" proiektuaren lankide da. Lars Vogt-ek abian jarria eta Arteen Alemaniar Lurralde Fundazioaren laguntza duen ekimen honek gazteen artean musika klasikoa bultzatzea du helburu, musikari nabarmenak gertutik ezagutzeko aukera emanez (www.rhapsody-in-school.de). Ekintza honen baitan, ostegunean, hilak 3, eskola bat emango die Donostiako San Alberto Magno Alemaniar Ikastetxeko ikasleei.
Haizea alde obraren erabateko estreinaldia. Kontzertu hauen egitarauan Euskadiko Orkestrak Joseba Torre bilbotarrari eskatutako Haizea alde lana izango da. Partitura honek "parametroak bateratzea, tonu anitz eta kontrastedunari itxura ematen dion sintesia, bizia, sakona eta ustekabekoa, itsasoa bezalakoa. Itsasoaren etengabeko orainak irudimenerako eta desiorako gaitasunarekin lotzen den etorkizuna du, haizea alde duela nabigatzekoa irrikia" adierazten du, egilearen beraren hitzetan. Enkargu honek Euskadiko Orkestrak euskal musikaren sorkuntza eta hedapenarekiko duen konpromisoari erantzuten dio. Konpromiso honen ondorio zuzena dira 1986tik hasi eta gaurdaino Carmelo Bernaola, Félix Ibarrondo, Luis de Pablo, Antón Larrauri, Francisco Escudero, Rafael Castro Peña, Tomás Aragüés, Ramon Lazkano, Gabriel Erkoreka, Zuriñe Fernández Gerenabarrena, Antonio Lauzurika eta Joseba Torrek berak sortutako hamahiru musikalanak. Kontzertuen egitaraua Schumannen 1, Sinfoniak, "Udaberria", osotuko du.
Aurretiko Hitzaldiak. Azken programa honen kontzertu bakoitza ospatu baino lehenago aurretiko hitzaldi bana izango da. Donostian Itziar Larrinaga musikologoa, Iruñean Nafarroako Unibertsitate Publikoko irakasle Marcos Andrés Vierge, Bilbon Carlos Villasol kritikoa eta Gasteizen Sabin Salaberri musikagilea izango dira hizlari.
Kontzertuak
Maiatzaren 31 eta ekainaren 3a: Kursaal Auditorioa. Donostia, 20:00etan.Aurretiko Hitzaldia. Kursaaleko Foyer-ean. 18.45h
Ekainaren 1a: Baluarte Auditorioa, Iruñea. 20:00etan. Aurretiko Hitzaldia. Baluarteko Gola aretoa. 18.45h
Ekainaren 2a: Euskalduna Jauregia, Bilbao. 20:00etan. Aurretiko Hitzaldia. Hiria-Gunea aretoa (Antzokiaren aurrean).18.45h
Ekainaren 4a: Principal Antzokia. Gasteiz. 20:00etan. Aurretiko Hitzaldia. Euskaldunako B-Terraza aretoa. 18.45h
Egitaraua
Joseba Torre (1968): Haizea alde [14'] (Euskadiko Orkestraren enkarguz, erabateko estreinaldia)
Edward Elgar (1857-1934): Biolontxelo eta orkestrarako kontzertua mi minorrean, opus 85 [30'] *
Robert Schumann (1810-1856): 1. Sinfonia si bemol maiorrean, opus 38, "Udaberria" [30']
*EOSek lehenbiziko aldiz interpretaturiko obra
Mikhail Agrest, zuzendaria
Daniel Müller-Schott, biolontxeloa
Informazio gehiago
Esku-egitarauaEUSKADIKO ORKESTRA LUIS DE PABLO KONPOSITOREARI MADRILGO AUDITORIO NAZIONALEAN EGINGO ZAION OMENALDIAN ARITUKO DA
Bilbao Orkestra Sinfonikoa bere Abonu-denboraldian aritzearekin batera, Euskadiko Orkestrak maiatzaren 20an kontzertu bat eskainiko du Madrilgo Auditorio Nazionalean. Autore eta Editoreen Elkarte Nagusiak (SGAE), Autore Fundazioak eta Auditorio Nazionalak antolatua, Luis de Pabloren omenez, bere 80. urtebetetzea dela eta, ospatuko den kontzertu hau José Ramón Encinar maisuak zuzenduko du eta bakarlari gisa Asier Polo biolontxelojolea eta Cécile Daroux txirula-jotzailea arituko dira. Lehenak bilbotar musikagilearen Frondoso misterio joko du eta bigarrenak, berriz, Figura en el mar partitura.
Luis de Pabloren lana (Bilbo, 1930) Euskadiko Orkestraren ibilbideari lotuta egon da honen 28 urteetan. 1983an Orkestrak Elephant ivres III interpretatu zuen bere Abonu-Denboraldian eta honen ondoren Kiu. Intermezzo 1994an, Latidos 1995ean eta Tréboles 1998an. 1991 urtean, euskal musikagileei enkarguak egitearen bere egitasmoaren baitan, Euskadiko Orkestrak obra baten enkargua egin zion Luis de Pablori eta honela sortutako Impromptus 1990/1991 abonu-denboraldian estreinatu eta, beranduago, 1999an Audiovisuales de Sarriá diskoetxeak kaleratutako Espainiar Musika Sinfoniko Garaikidea bildumaren barruan grabatu zen. Juanjo Menaren zuzendaritzapean, honekin batera Orkestraren enkarguz Félix Ibarrondo, Rafael Castro Peña, Carmelo Bernaola, Francisco Escudero eta Antón Larraurik sortutako lanak biltzen ditu bilduma honek. Orkestraren 25. urteurrena ospatzeko burututako egitasmoen artean, bestalde, enkargu berezi bat egin zitzaion Luis de Pablori eta honek harpa eta orkestrarako Danzas Secretas idatzi zuen. 2007/2008 Abonu-Denboraldian estreinatu zen, Arturo Tamayoren zuzendaritzapean eta Frédérique Cambreling bakarlari zela. Partitura hau 2008an Luis de Pablori eskainitako Euskal Konpositoreen Bildumako XI. bolumenean jaso zen, Asier Polok interpretaturiko biolontxelo eta orkestrarako Frondoso misterio lanarekin batera.
Kontzertua José Ramón Encinar maisuak zuzenduko du. Zuzendari honek lotura estua du Luis de Pabloren lanarekin, izan ere berari eskaini zion konpositore bilbotarrak "El viajero indiscreto" opera. Egitaraua Vendaval obraren Potpourri-rekin irekiko da; 199an konposatua, Orkestrak estreinako aldiz interpretatuko du. Ondoren Asier Polo bakarlari izango duen biolontxelo eta orkestrarako Frondoso misterio izango da entzungai, 2001ean Luis de Pablok Asier Polori berari eskainitakoa. Jada bigarren zatian, De Pablok 1989an sortutako flauta eta orkestrarako Figura en el mar lana interpretatuko da. Cécile Daroux frantziar flauta-jotzailearekin batera interpretatuko duen partitura hau orain gehituko du Euskadiko Orkestrak bere errepertoriora.
Kontzertu sinfoniko hau ospatzeaz gain, Luis de Pabloren 80. urtebetetzea ospatzeko antolatutako ziklo monografikoaren baitan maiatzaren 21ean ganbera-kontzertu bat izango da eta egun horratan bertan Luis de Pablok berak maisu-eskola bat emango du.
Kontzertua
Maiatzak 20: Auditorio Nazionala, Madril. 19.30etan.
Egitaraua
Luis de Pablo (1930)
Vendaval. Potpourri [5']*
Frondoso misterio [29']
Figura en el mar [31']*
*EOSek lehenbiziko aldiz interpretaturiko obra
Euskadiko Orkestra Sinfonikoa
José Ramón Encinar, zuzendaria
Asier Polo, biolontxeloa
Cécile Daroux, flauta