Andrés Orozco-Estradak zuzednari gazteei eskainitako II Musika Laborategia zeuzentzen du egunotan
Martxoaren 10etik 12a bitartean Euskadiko Orkestraren Miramongo egoitzan izango den bigarren Musika Laborategia orkestra zuzendari gazteen lanari zuzentzen zaio. Jasotako eskaera guztien artetik, Orozco-Estrada Maisuak bost aukeratu zituen, Orkestrarekin hainbat lan-aldi burutu ostean Euskadiko Orkestraren podiumean arituko direnenak: Georgina Sánchez, Marius McGuinness, Carlos Garcés, Asier Zabalza eta Antonio Lajara-k Mozart, Arriaga, Mendelssohn eta Beethoven-en lanak zuzenduko dituzte Miramongo Matinéetan izango den kontzertu berezi batean. Gainera, ekimen honek izandako arrakasta dela eta, Musikeneko orkestra-zuzendaritzako lau ikasle entzule gisa izango dira Laborategian.
Partaideak. Aukeratutako bost partaideek 21 eta 31 urte bitarteko adinak dituzte eta Bartzelona, Alacant, Soria, Iruñea eta Valladolid-etik datoz. Guztiak goi mailako Zuzendaritza ikasketak burutzen ari dira edo amaitu dituzte, Musikene, Madrilgo Errege Kontserbatorioan edo Escola Superior de Música de Catalunya delakoan.
Lan-plana. Zuzendarien Laborategia Euskadiko Orkestraren Miramongo egoitzan izango da (Donostian), martxoaren 10a eta 12a bitartean. Hilak 10 eta 11ean, goizez zuzendari gazteek lan-aldi bana burutuko dute Orozco-Estrada Maisuarekin, pianojotzaileak lagundurik. Ostiralean, hilak 11, goizean eta arratsaldean Euskadiko Orkestrarekin entseguak egingo dituzte. Amaitzeko, Laborategia Miramongo Matinéeak zikloaren baitan larunbatean, hilak 12, goizeko 11etan EOSen egoitzan izango den kontzertuarekin itxiko da (kontzertu honetarako sarrerak ohiko salmenta-bideetan eros daitezke).
Informazio gehiago
Miramongo Matinéearen esku-egitarauaEGITARAU-ALDAKETA
Datorren martxoaren 14an Iruñean eskainiko den abonu-egitarauan, Jesus Guridiren Hamar Euskal Melodiak obraren ordez Juan Crisóstomo de Arriagaren Symphonie à grand orchestre (Sinfonia en Re) interpretatuko du Euskadiko Orkestrak, Gustav Mahlerren 4. Sinfoniarekin batera; egitarau hau berbera interpretatuko da Orkestrak martxoaren 17tik 20ra Extremaduran barrena egingo duen biran.
Enrique Jorda gogoan 10. Abonu-propgraman
Abonu-Denboraldiaren 10. programaren baitan, martxoaren 8 eta 9an Donostiako Kursaalean, 10ean Gasitezko Principal Antzokian eta eta 15an Bilboko Euskaldunan izango diren kontzertuetan, Euskadiko Orkestrak Enrique Jordá zuzendaria donostiarra gogoratuko du. Izan ere bere lehenbiziko zuzendari izandakoaren jaiotzaren mendeurrena betetzen da aurten.
Enrique Jordák (Donostia, 1911- Brusela,1996) nazioarte mailan ibilbide nabarmena burutu zuen, bost urtetan Madrilgo Orkestra Sinfonikoaren zuzendari titular, bost urtez Lurmutur Hiriko sinfonikoaren titular eta hamarkada bat baino gehiagoz San Franciscoko Orkestra Sinfonikoaren zuzendari titular izan zelarik. Bost kontinenteetan barrena arrakasta itzela lortu ostean, Jordá bere jaioterrira itzuli zen, Euskadiko Orkestra Sinfonikoaren sorreran eta lehendabiziko urteetan pertsoanaia garrantzitsua bihurtuz. Honela, 1982an Orkestraren podiumean aritu zen estreinako zuzendaria bilakatu zen. Musika-aholkulari izan ostean, 1983an ohorezko zuzendari izendatu zuten eta ondoren, 82 urterekin erretiratu zen arte, hainbat alditan zuzendu zuen Orkestra.
Mahler Chamber Orchestrarekin Hego Amerikan barrena eta Vienako Tonkünstler-ekin Erresuma Batuan aritu ostean itzuli den Orkestraren titular Andrés Orozco-Estradaren zuzendaritzapean, Jesús Guridiren "Diez melodías vascas" lana bere lehenbiziko zuzendariari zuzendutako omenaldi ederrena bilakatu da. Egitarauari oharren egile den Juan Manuel Vianaren hitzen egileak "bere herriarekiko zuen maitasunaren ezaugarri den" partitura hau Enrique Jordári eskaini zion gasteiztar konpositoreak eta Jordák berak estreinatu zuen 1941ean. Egitaraua osotzeko, orkestrak gustav Mahler-en 4. Sinfonia soprano eta orkestrarako interpretatuko du, bakarlari-ataletan Christiane Karg alemaniar sopranoa lagun duela.
Informazio gehiago
Esku-egitaraua"Soinutik... bihotzera" bidaia emakume haurdunentzat eta haurtxoentzat
Larunbat honetan, hilak 26, Orkestraren Miramongo egoitzan, Musika Familian zikloak kontzertu berriztatzaile bat aurkezten du, "Soinutik... bihotzera" izenburupean emakume haurdunentzat eta bederatzi hilabeterainoko haurtxoentzat bereziki diseinatutako musika-emanaldia.
Isiltasunetik abiatuta, Carles Pérez Collado eta Andreu Ubach musikari eta musikoterapeutek bibrazio, erritmo eta sentsazioen mundu batean zehar ibilbidea proposatzen dute, kontzertura bertaratutakoak naturaren zikloekin eta norbere bihotzarekin bat egitea helburu harturik. Horretarako, sorkuntza eta inprobisazio bidez, Baschet instrumentuek eskiantzen dituzten aukeratan sakonduko da eta entzulegoaren elkarlana beharbizikoa gertatuko da kontzertuaren garapenean.
Baschet instrumentarium-a perkusio, hari eta kristalezko hamalau soinu-egiturek osatzen dute. Instrumentu-multzo hau François eta Bernard Baschet anaiek, bata eskultorea eta ingeniaria bestea, 1952an aurkitutako printzipio akustikoa oinarri harturik garatu zen, instrumentu-familia berri bat sortuz. Baschet soinu-egiturek eskaintzen duten metalaren barnetik ateratako soinuen aberastasun eta aniztasunak soinu- eta musika-fenomenoaren estereotipoetatik at geratzen den zabalkundea proposatzen dute, irudimena, ikusmira eta musika-adierazpena garatzea xedetzat dutela. Egitura hauek, nolabaiteko musikazko-eskultura modukoak, Miróren margolan batetik edo Calder-en mobiletako batetik ateratako koloredun formak bailitzan, Londreseko Barbican Centre, New Yorkeko Arte Modernoko Museoan edo Sofia Erregina Arte Garaikidearen Museoan izandako hainbat erakusketatan izan dira ikusgai.
Euskadiko Orkestraren Musika Gelak antolatutako emakume haurdunentzat eta bederatzi hilabeterainoko haurtxoentzako lehendabiziko kontzertu honetarako sarrerak egun gutxitan agortu ziren. Esperientzia berri hau martxoaren 27an errepikatuko da Gasteizko Principal Antzokian.
Informazio gehiago
Esku-egitarauaSINFOKIDSen lehenbiziko denboraldia webgunean
Joan zen otsaila eta martxoa bitartean eskaini zen Etb3n, Euskal Telebistak kultur arloko eta haurrei zuzendutako edukiei eskainitako katean, SINFOKIDS, Euskadiko Orkestrak, EITB eta Eusko Jaurlaritzako Hezkuntza, Unibertsitate eta Ikerketa Sailak garatutako musikazko saio hezitzailearen lehendabiziko denboraldia emitituko da. Bost emisio izango dira eta hauetan, formatu berriztatzaile baten bidez, musikaren funtsezko oinarrien berri izan eta orkestra sinfoniko bat zer den ezagutzeko aukera izan dugu. Orain lehenbiziko denboraldi hau osatzen duten bost atalak gure webgunean ikus daitezke oso osorik.
Hauek izango dira SInfokids-en lehendabiziko denboraldian landuko diren gaiak:
1. Ahotsa: altuera, intentsitatea, tinbrea eta iraupena.
2. Hotsen tinbrea, hotsen paisaia eta musika tresnen entzumena.
3. Orkestra Sinfonikoa: instrumentu familiak.
4. Musika-idazkera.
5. Orkestraren musika.
Musika klasikoaren zabalkuntzan erabat berriztatzailea den ikusentzunezko material hau Euskal Autonomi Erkidegoko ikastetxeetan banatu da eta bigarren denboraldiaren prestaketa abian da jada.
Euskadiko Orkestra Donostiako Parke Teknologikoan
Joan zen astean sinatu zen Euskadiko Orkestra Miramonen kokatutako Donostiako Parke Teknologikoaren parte izatea ofizial egiten duen akordioa. Parkea egun 74 entrepresa, zentru teknologiko eta unibertsitate-eskolek osatzen dute eta bertan 3000tik gora pertsonek egiten du lan. Orkestra polo artistiko bilakatzen da garapen sozio-ekonomiko zein kulturalean lagundu eta honela gure inguruan bizi diren pertsonen bizi-kalitatea hobetzea xede nagusi duen parke teknologikoan.
Donostiako Parke Teknologikoan kokatzen dira, halaber, Basque Culinary Center, Euskal Irrati Telebista, Zientziaren Kutxagunea edo Balenciaga Fundazioa.
Telemanndik Vivaldira, larunbat honetan Miramongo Matinéean
Egun munduak zapia dirudi. Ia edonon gauza berak entzun, ikusi, irakurri edo jaten ditugu. Edo beste modu batean adierazteko, egun ez da Japoniara bidai egin behar sushia jateko eta japoniarrek flamenkoa maite dute. Gure kultur erreferentziak bateratze aldera doaz.Baina gauzak oso bestelakoak ziren XVII eta XVIII. mende bitartean. Barroko garaian alemaniarra edo italiarra izateak kultur-errealitate oso ezberdinak bizitzea suposatzen zuen. IZAI Ganbera Taldeak hilak 19 larunbateko Miramongo Matinéerako prestaturiko egitarauak argi erakusten ditu Georg Philipp Telemann alemaniarraren eta Antonio Vivaldi italiarraren arteko ezberdintasunak. Biak garaikideak baziren ere, musika-kontzepzioari dagokionez urrun zeuden bata bestearengandik.
Georg Philipp Telemann musikaren arloan oso pertsonaia nabarmena izan zen alemaniar barrokoaren garaian; bere ekoizpen ugariak musika-kontzepzio dotorea, fina eta garaiko gustuarekin bat egiten zuen soinu-tratamendua erakusten du. Antonio Vivaldiren izaera, berriz, oso bestelakoa zen; bere musika-diskurtsoa zuzenagoa da erabat, oldartsuagoa, elektrikoagoa. "Apaiz gorria"ren ekoizpen eskergak garaiko Veneziaren errealitatearen ikuspegi ia piktorikoa eskaintzen digu; birtuosismoa nabariagoa da, bizitasuna nabarmenagoa eta argia, aldiz, biziagoa.
Kontzertu honetarako sarrerak Servikutxa, Telekutxa (943 00 12 00), www.kutxa.net eta www.euskadikoorkestra.es bidez eta kontzertu-egunetan 10.30etatik aurrera Egoitzako leihatilan eros daitezke. Gainera, dorako autobus zerbitzua dago Matinéetara joateko, 10.25etan Gipuzkoa Plazako 4.zkitik atera eta Antso Jakitunaren Etorbidea, 18 eta Madrid Etorbidea, 34an geldialdiak egiten dituelarik.
Informazio gehiago
Esku-egitarauaAbonu-Denboraldiak Malandain Ballet Biarritz-en "Magifique. Tchaikovsky Suites" ikuskizuna hartuko du berean
Abonu-Denboraldiaren bederatzigarren programaren baitan, Euskadiko Orkestrak eta Malandain Ballet Biarritzek bat egingo dute "Magifique. Tchaikovsky Suites" ikuskizunaren eszenaratzean. Orkestraren Abonu-Denboraldiaren programazioak honelako izaera duen proiektu bat aurkezten duen lehenbiziko aldia da: eszenatoki gainean, Malandain Ballet Biarritz osatzen duten hemezortzi dantzariek Tchaikovskyren baleten suiteen inguruan Thierry Malandainek duen ikuspegi berezia interpretatuko dute eta zulogunetik Euskadiko Orkestrak, Eduardo Portalen zuzendaritzapean, ikuskizunak oinarri dituen errusiar konpositorearen partituren aukeraketa interpretatuko ditu.
Tchaikovskyren musika dantzagarri eta miragarriari Nicolas Duperior-en musika-zati labur batzuk gehitzen zaizkio eta Malandain Ballet Biarritz Zentro Koreografiko Nazionalaren zuzendari eta koreografo Thierry Malandainek oroitzapenak ñabardura sentikorrekin eta Tchaikovskyren baleten zantzuekin batzen saiatzen den ikuskizuna sortu du. "Magnifique n gabe, asmatutako hitz horrek, zirkuitulabur hau ezinhobea da sorkuntza honen helburuak islatzeko: magia sortu edo, izan ere, bizitzaren materia gordina forma adierazkor eta poetikoean birziklatu", Malandainen hitzetan. 2009an estreinatu zenean izandako arrakasta lagun duela, ikuskizun hau orkestra sinfoniko baten zuzeneko musikak dantzari, muntaia bisual zein eszenikoari ematen dion handitasunak jantzirik dator oraingoan.
Estreinaldiaren aurretik, entsegu ireki bat. Bihar, hilak 17, Abonu-Denboraldian estreinatu baino ordu batzuk lehenago eta Orkestraren Musika Gelaren jardueren baitan, lehen hezkuntzako hirugarren zikloko eta derrigorrezko bigarren hezkuntzako lehen zikloko milatik gora ikasle Kursaal Auditorioan bilduko dira "Magifique" ikuskizunaren entsegu irekia ikusteko. Publikoarekin bat egiteko aukera oso berezia izango da zalantzarik gabe.
Gaur asteazkena, hilak 16, Orkestra Miarritzera, Malandain Ballet Biarritz-en egoitza den Gare du Midi-ra abiatuko da baletarekin batera publikoari irekitako entsegu bat burutzera, 19.00etan.
Biolin gorria Miramonen entzungai
Larunbat honetan, hilak 5, Miramongo Matinéeak zikloaren baitan, oraingoan Orkestrako kide zein lankide diren hogeita bat musikarik osatutako Kaabestri taldeak kontzertu bat eskainiko du, hari-instrumentuak erabateko protagonistatzat harturik. Egitarauak XX. mendeko musika biltzen du, egile oso ezberdinena baina, besteak beste, Joaquín Turina zein Karl Jenkins nahastuz. Aipagarria da Oscar saridun John Coriglianok Biolin gorria filmerako idatzitako soinu-bandaren suitearen interpretazioa. Honetan Kaabestri taldeak bakarlari gailen bat izango du lankide, Raphael Christ biolinjotzailea.
Hari-instrumentuen aukera guztiak erakusteko, Biolin gorriaz gain, egungo musika hautatu dute, barrokoaren zantzuak dituena, jazz eta rock musikari gisa ere ezaguna den Karl Jenkins konpositore galestarraren obraren kasuan; pasodoble baten antzaldatzea, zezen plaza bateko algara eta bizitza arriskuan jarriko dutenen eraspenaren arteko kontrastea, musikazkoa zein espresiboa, jasotzen duen otoitz lanbrotsu eta poetiko batean, Joaquín Turinaren eskutik; amerikar folklore herrikoiaren berrikusketa Aaron Copland estatubatuarraren partituran; eta azkenik XVI. mendeko dantza-bilduma ingeles baten berridazketa, Peter Warlock musikagile zein aditu polemikoak egina.
Euskadiko Orkestrak Jesús Egigurenen "Kindly Symphony" estreinatuko du
Euskadiko Orkestra ohiko lau hiriburuetan kontzertuak eskaintzera eramango duen bere Abonu Denboraldiko zortzigarren programa prestatzen ari da egunotan. Orkestraren entzulegoarentzat jada ezaguna den Oleg Caetaniren zuzendaritzapean, EOS-ek Jesús Egiguren durangar konpositoreari eskatutako Kindly Symphony obraren erabateko estreinaldiari egingo dio aurre. Partitura hau Okrestrak sortu zenetik irmoki garatu duen euskal konpositoreen ekoizpenaren sorkuntza eta zabalkuntza bultzatzeko politikaren baitan enkargatutako obren katalogoari batzen zaio. Abonu-programa berri honi dagozkion kontzertuak izango dira otsailaren 5ean Gasteizen, 7 eta 10ean Donostian, 8an Iruñean eta 9an Bilbon.
Jesús Egigurenen (Durango, 1945) "Kindly Symphony" "sinfonia klasiko ohikoa da, bizi dugun garaiaren ezberdintasunekin eta egileak zilegi dituen lizentziekin betiere", egilearen beraren hitzetan. Lizentzia horietako bat "tratamendu laburra" da, sinfonia "kotzentratutzat" jo dezakegularik. Zuzendari izan zuen Durangoko Orfeoiarekin harremana dela eta, bere konposizio-katalogoan nagusi dira abesbatzarako lanak, berrogeita hamarretik gora dira eta horien artean aipagarriak 12 apuntes a un tema vasco (1987), Et j'aime uniquement... (1994), Kometak haizetan (1996) eta Ad festivitatem Corpus Christi (2004). Kindly Symphony Euskadiko Orkestraren enkarguen katalogoari gehitzen zaio, Carmelo Bernaola, Felix Ibarrondo, Luis de Pablo, Anton Larrauri, Francisco Escudero, Rafael Castro, Tomás Aragüés, Ramon Lazkano, Gabriel Erkoreka, Zuriñe F. Gerenabarrena, Antonio Lauzurika, Joseba Torre eta hemendik aurrera Jesús Egigurenen beraren lanak biltzen dituen katalogoari, alegia.
Erabateko estreinaldi honetaz gain, kontzertuen egitaraua, "Formaren laudorioa" izenburu duena, beste bi sinfoniak osotzen dute, Schuberten bigarrenak eta Francken Sinfonia re minorrean.