"EDERRA ETA PIZTIA" ipuinaren magia errealitate bihurtu zen gau batez, ikuslegoaren bihotzeraino helduaz; txalo zaparrada izan zen zirrara horren saria. Gaua magikoa izan zen, areto ireki batean, Pereladako gaztelu parean, ilargi eta izarren azpian, bai zeru oskarbian ageri zirenak eta bai Jaialdiko eszenatokian zeudenak ere.

Badira urte batzuk Malandain Ballet Biarritz eta gure Orkestra ekoizpen ezberdinak lantzen hasi zirela. Atzokoa ibilbide horren hirugarren atala izan zen eta, beste behin, elkarren arteko lanaren emaitzari distira zerion une guztietan. Izan ere, aipatu ibilbide emankor horren ondorio izan zen ipuin klasiko baten bertsio modernoaren atzoko aurkezpena, energia eta edertasunez betea. Batetik, Thierry Malandain koreografoak dantzari taldearekin proposatzen dituen ideiekin, eta bestetik, Ainars Rubikis maisuak Tchaikovskyren musikarekin egindako aukeraketarekin. Eszenategiko fosoan Euskadiko Orkestra Sinfonikoak bikain aritu zen bere gidaritzapean.

80 minutuko ikuskizunaren ondoren, auditorian elkartu ziren 1700 ikusleek txalo zaparradarekin saritu zuten Orkestraren lana. Modu honetan eman zitzaion amaiera gau magiko honi. Kultura sailburua eta Orkestrako Presidentea, Bingen Zupiria, estrenaildi bikoitz honen lekuko izan genuen: alde batetik Ederra eta Piztiaren ekoizpen bateratuarena Kataluinian eta, bestetik, Euskadiko Orkestrarena Peralada Jaialdian, urteen joan-etorrian uda kataluiniarraren klasiko bat bilakatu dena.

-

Master ofiziala, Hezkuntza, Kultur eta Kirol Ministerioak homologatua.
Treba zaitez Europako irakasle onenekin.
Egin ezazu bat Euskadiko Orkestra Sinfonikoko musikariekin entsegu, kontzertu eta biretan.
Presta zaitez orkestra probak egiteko.
Murgil zaitez orkestra musikaren inguruko ikerketan eta, hala nahi baduzu, presta zaitez ondoren doktoretza ikasketak egiteko.

Izen-ematea: 2017ko uztailaren 14tik irailaren 14ra (Sarbidea eta onarpena).
Sarrera-probak: 2017ko irailaren 18tik 22ra bitartean.
Matrikulazioa: on line. 2017ko irailaren 27tik 29ra.
Plaza-eskaintza: 30 ikasturteko.
Plazen berezitasunak: biolina: 12; biola: 6; biolontxeloa: 6; kontrabaxua: 6.

Egutegi akademikoa: 2017ko urritik 2018ko ekainera.

Ekainaren 30 ostiralean eta uztailaren 1 larunbatean, Valentziako Palau de la Música delakoak Hezkuntza- eta Gizarte-Kontzertuen Antolatzaileen Sarearen (ROCE) VIII. Topaketak hartuko ditu. "ExperimentArtes" izenburupean, hausnarketa eta eztabaidarako gune izango da, musikaren funtzio sozialaren bilakaeraren inguruan, sorkuntza garaikidea interdisziplinarioa den honetan.

Topaketen edukia garatuko da txostenen aurkezpenen, mahai-inguruen, tailerren, debateen eta beste hainbat jardueraren bidez. Besteak beste, jardungo dira Mikel Cañada (Euskadiko Orkestra Sinfonikoko Hezkuntza Departamentuko koordinatzailea eta ROCEko presidentea), Fernando Velázquez (konpositorea), Ana Hernández (antzerki-alorreko hezkuntza-proiektuak), Yaron Traub (Valentziako Orkestrako zuzendari titular eta artistikoa), Sira Torrecillas (Bartzelonako Liceu antzokiko harreman instituzionaletako zuzendaria), Toni Aparisi (dantzari eta koreografoa).

ROCE irabazteko asmorik gabeko elkartea da, 2010 urtean hainbat erakundek sortutakoa (horien artean Euskadiko Orkestra Sinfonikoa). Egun erakunde publiko zein pribatu ugarik osatzen dute. Helburuen artean ditu elkartutako erakundeen hezkuntza zein gizarte jarduerak koordinatzea eta euren arteko lankidetza bultzatzea, hezkuntza- edo gizarte-departamentuen sorrera sustatzea, kultura-erakundeen baitan, eta arlo horretan proiektu interdisziplinarioen diseinua eta garapena.

ROCEk antolatutako estreinako topaketak Granadan izan ziren 2010. urtean. Ordutik izan dira Donostian (2011), Valladoliden (2012), Bartzelonan (2013), Kanaria Handiko Las Palmasen (2014), Madrilen (2015) eta Bilbon (2016).

Ekainaren 17 larunbatean amaituko da, halaber, Miramongo Matinéen 2016/2017 denboraldia. Azken emanaldi horretan, Euskadiko Orkestra Sinfonikoaren ganbera zikloak hirukote bat hartuko du berean. Berau osatzen duten musikarik dira Orkestrako kide Pascal Laffont (oboea) eta François Proud (fagota), eta Pedro José Rodríguez (klabea). Joan zen denboraldian XIX eta XX. mendeetan oboerako eta fagoterako idatzitako musika landu ostean, kontzertu honetan begirada atzera bota eta alemaniar barrokoko musika joko du Trío Doble-k. Georg Philipp Telemann eta Philipp Friedrich Böddecker-ek mihi bikoitzeko instrumentuentzat sortutako piezak interpretatuko ditu.

Georg Philipp Telemann da, ziur aski, da, ziur aski, barrokoko konpositore alemaniar ezagunena eta musikaren historian emankorrena. Bere katalogoak 6000 lan inguru biltzen ditu, horietako asko desagertutakoak. Haizerako sonata eta instrumentu bakarlarirako fantasia ugari sortu zituen. Larunbateko emanaldian entzungai izango dira horren bi sonata eta bi fantasia, Böddeckeren sonata "Sopra La Monica" eta, bukatzeko, behar bada sonata hori oinarri hartuta Telemannek idatzitako sonata metodikoa.

Sarrerak. Azken Matinée horretarako sarrerak eros daitezke webgune ahonetako TICKET atalean, www.kutxabank.es webgunean eta Kursaal zein Orkestraren egoitzako leihatiletan. 7 euroko prezio bakarra dute.

Amaitzear da Euskadiko Orkestra Sinfonikoaren 2016/2017 kontzertu denboraldia eta oraingoan Orchestre National Bordeaux Aquitaine (ONBA) orkestrak itxiko du, orkestra gonbidatu gisa. Itxiera horretan, Bordeleko orkestrak lehen mailako bakarlari bat izango du lagun: Vadim Gluzman biolinista; Txaikovskiren Biolinerako kontzertua joko du. Egitaraua osatzeko, William Waltonen 1. Sinfonia izango da entzungai. ONBAren kontzertuak abiatuko dira ekainaren 17 larunbatean Bilbon (Euskalduna Jauregia) eta ondoren izango dira 19an Donostian (Kursaal), 20an Iruñean (Baluarte), 21ean Gasteizen (Principal Antzokia) eta, azkenik, 22an berriz ere Donostian.

Seigarren aldia da Euskadiko Orkestra Sinfonikoaren entzuleen aurrean aurkezten dela, bi orkestren arteko elkartruke politika emankor baten ondorioz. Egun, Bordeleko Auditoriumeko denboraldi sinfonikoaren eta bertako Opera Nazionalaren opera eta ballet emanaldietan protagonista izateaz gain, oso lotuta dago hainbat frantziar jaialdirekin 2013tik Paul Daniel britainiarra du zuzendari titular. Filharmonía de Galicia orkestrako zuzendari titular eta Londres eta New Yorkeko orkestra filarmonikoek, BBC delakoak edo Pariseko Orkestrak sarritan gonbidatua, Danielek 1991/1992 denboraldian jardun zuen Euskadiko Orkestra Sinfonikoaren zuzendari gonbidatu. ONBAren bisitaldi berri honi erantzuteko, Euskadiko Orkestra urrian itzuliko da Bordeleko Auditoriumera.

Vadim Gluzmanek ederki ezagutzen du biolinerako errusiar errepertorioa. Bere ibilaldi emankorrean orkestra nabarmenek gonbidatu dute: Berlingo Orkestra Filarmonikoa, Londresko Sinfonikoa, Leipzigeko Gewandhaus edo Boston, Cleveland, Filadelfia eta Chicagoko orkestrak, esaterako. Izan ere, Grant Park Festival jaialdia ireki zuen bart Chicagon; eta, Euskadin barrena aritu ostean, Jelena Firssowaren lan bat estreinatuko du Berlinen, Johannes Moser biolontxelojotzailearekin, Deutsches Symphonie-Orchester Berlin orkestrarekin eta Tugan Sokhiev zuzendari dela.

Euskadiko Orkestra Sinfonikoak IX Premios Fundación BBVA Fronteras del Conocimiento sarien irabazleen omenezko kontzertu berezia eman du Madrilen; emanaldi garrantzitsu horretan Robert Treviño Euskadiko Orkestra Sinfonikoaren zuzendari titular aritu da estreinakoz eta bere debuta izan da Madrilen. Orkestra osoki eman zen eta arrakasta itzela lortu zuen. Estreinaldi bikaina izan da, beraz.

Kontzertuan izan ziren Eusko Jaurlaritzako kultura eta hizkuntza politikako sailburu eta Euskadiko Orkestra Sinfonikoaren presidente Bingen Zupiria, BBVA bankuko presidente Francisco González, Ikerketa, Garapen eta Berrikuntzako Estatu Idazkari Carmen Vela eta BBVA Fundazioko zuzendari Rafael Pardo. Musikaren esparruan, Euskadiko Orkestra Sinfonikoak lagun izan zituen Joaquín Achúcarro pianojotzailea eta bere emazte Emma, Gabriel Erkoreka eta Fernando Velázquez konpositoreak, Iñaki Alberdi soinujolea eta José Ramón Encinar, Víctor Pablo Pérez eta Pedro Halffter orkestra zuzendariak.

Euskadiko Orkestra Sinfonikoa Madrilen dago eta bertan, gaur arratsaldean, Teatro Real antzokian, kontzertu berezia emango du IX Premios Fundación BBVA Fronteras del Conocimiento delakoetan sarituak izan direnen omenez. Bigarren aldia da Orkestra ospe handiko sari horien banaketaren atariko kontzertuan aritzen dela; aurrez, 2015 urtean jardun zuen ekitaldi horretan.

Kontzertu honekin abiatuko du Robert Treviñok bere ibilbidea Euskadiko Orkestra Sinfonikoaren zuzendari titular gisa. Jada Orkestraren arduradun artistikoa den zuzendariak 2020. urtera arte beteko du eginkizun hori. Gainera, Treviñok debuta egingo du Madrilen Premios Fundación BBVA Fronteras del Conocimiento sarien kontzertuarekin; hitzordu horren ezbairik gabeko garrantzia kontuan izanik, madrildar bizitza kultural, ekonomiko zein politikoko izen nabarmen asko izango dira bertan. Horrela, Robert Treviño Europan, Amerikan eta Asian berrena burutzen ari den nazioarteko ibilbide azpimarragarriari Madril gehituko zaio orain; ibilbide horri esker zuzendari errebelaziotzat hartua izan da dagoeneko. Zuzendari titular gisa lehenbizikoz aritu ostean, urrian Treviñok Euskadiko Orkestra Sinfonkoaren 2017/2018 kontzertu-denboradia irekiko du Gasteiz, Bilbo eta Iruñean.

Egitarauan, Wagner-en eta Strauss-en lanak eta musika garaikidearen alorrean Fronteras del Conocimiento sariaren irabazle Sofia Gubaidulinaren The Light of the End partituraren estreinaldia Espainian. Euskadiko Orkestra Sinfonikoak hizpide izango du berriz ere Sofia Gubaidulina musikagilearen ekoizpena. Orkestrak 1996ean jo zuen lehenengo aldiz horren pieza bat eta 2010. urtean lotura berezia sortu zen euren artean, Orkestrak Kadenza izenburudun monografikoa eskaini zionean. Disko horren grabaketa gertutik gainbegiratu zuen Sofia Gubaidulinak berak. Musika garaikidean aditu José Ramón Encinar-en gidaritzapean, goi mailako bi bakarlarik ere esku hartu zuten: Iñaki Alberdi (akordeoia) eta Asier Polo (biolontxeloa). Orain, BBVA Fundazioaren eskutik, berriz ere bat egingo dute konpositore gailenak eta Euskadiko Orkestra Sinfonikoak, Espainian estreinako aldiz haren The Light of the End aurkezteko. Kontzertuko egitaraua osatuz, entzungai izango dira Richard Wagner-en Nürembergeko maisu kantariak laneko 1. ekitaldiko Preludioa eta Richard Strauss-en Heroi bizitza poema sinfonikoa.

Ekainaren 17tik 22ra, 2016/2017 kontzertu denboraldiko azken programa, Orchestre National Bordeaux Aquitaine orkestra gonbidatuaren eskutik. Euskadiko Orkestra Sinfonikoa Madrilen dagoen bitartean, Orchestre National Bordeaux Aquitaine entseatzen ari da ekainaren 17tik aurrera Euskadiko Orkestraren denboraldiaren baitan emango dituen kontzertuak prestatzeko.

Datorren igandean, arratsaldeko 18:00etan, Tabakalerako Patioan Euskadiko Orkestrako Sinfonikoko ganbera boskote batek J. S. Bach-en "Kafearen kantata" lanaren lau berrinterpretazio garaikide eskainiko ditu. Kontzertu honen bitartez, amaiera emango zaio joan zen otsailaren 17tik ikusgai izan den Bizigarriak: zirkulazioa eta euforia erakusketari.

Bizigarriak: zirkulazioa eta euforia erakusketari joan zen otsailaren 17an hasiera eman zion kontzertuaren erreplika batek emango dio itxiera datorren igandean, ekainak 11. Berriz ere, J.S Bach-en lana baliatuko da horretarako, baina oraingo honetan, Euskadiko Orkestra Sinfonikoko ganbera boskote batek lau konposatzaile gaztek ekitaldi honetarako propio idatzitako berrinterpretazioak joko ditu: Mikel Chamizo, Julia Eckhardt, Agnes Pè eta Xabier Otaolea dira konposatzaile horiek.

Kontzertuan izango dira halaber, Ane Rodríguez Armendariz, Tabakalerako Kultura zuzendaria, Oriol Roch Euskadiko Orkestra Sinfonikoko zuzendaria eta Xabier Erkizia musikaria. Azken honek egingo ditu piezen, konposatzaileen eta musikarien aurkezpen lanak. Kontzertua irekia eta doakoa izango da.
Azken lau hilabeteotan makina bat ibilbide eta eztabaida sorrarazi ditu Bizigarriak: zirkulazioa eta euforia erakusketak, kafea, kakaoa, azukrea eta tabakoa gisako substantzia bizigarriek geure gizarteetan izan duten eta duten eraginaren inguruan. Hori dela eta, bai erakusketaren irekierarako eta baita itxierarako ere kafeaz diharduen musika lan baten hautua.

J.S. Bachi maiz egokitu zitzaion bere garaian kafe-edaleen aisialdia alaitzea, eta azkar ulertu zuen musikaren eta kafearen arteko lotura, emanaldi honetan protagonista den obra horren adierazgarri da. Konposatzaile alemaniarrak musikan topatu zuen kafeari buruz hitz egiteko aitzakia, kafean musika egitekoa, eta biekin garaiko gizarte patriarkalari kritika zorrotza egitekoa, beti ere, pizgarriak gehitzen hasita, umore dosi haundiarekin.

Euskadiko Orkestra Sinfonikoak kontzertu programa berri bat abiatu du eta berau Leticia Moreno biolinistarekin partekatuko du, Orkestraren zuzendari printzipal gonbidatu Andrey Boreykoren gidaritzapean. Leticia Moreno Euskadiko Orkestraren bakarlari gonbidatu gisa bueltan da bost urteren buruan, nazioarteko arrakasta ugari lortu ostean. Arrakasta horiek lehen mailako orkestra zein zuzendariekin lankidetzan merezi izan ditu; esate baterako, Vienako Orkestra Sinfonikoarekin, Mariinsky Antzokiko Orkestrarekin, Errusiako Orkestra Nazionalarekin edo San Petersburgokoarekin jardun du, Zubin Mehta, Christoph Eschenbach, Yuri Temirkanov eta Valery Gergiev maisuekin.

Kontzertuak. Ostiralean, hilak 2, Kursaalean izango den kontzertuaren ondoren, programak jarriatuko du ekainaren 5 astelehenean Gasteizko Principal Antzokian, 6an Bilboko Euskalduna Jauregian, 7an Iruñeko Baluarten eta, amaitzeko, 9an Orkestra berriz ere Kursaalean izango da. Emanaldi guztiak 20:00etan hasiko dira.

Leticia Moreno (Madril, 1985) biolinistak bukatu berri du Espainiako hainbat hiritan zehar San Petersburgoko Orkestra Filarmonikoarekin eta Yuri Temirkanovekin egindako bira; kontzertu horietan musika errusiarra aurkeztu du. Duela gutxi egindako elkarrizketa batean, madrildar biolin-jotzaileak aitortu du: "Errusiar musika nire ama-hizkuntza da". Izan ere, nazioartean ibilbide ikusgarria egin duen musikaria Mstislav Rostropovitxen ikasle izan zen, Zakhar Bron eta Maxim Vengerov biolin-jotzaileak irakasle izan eta gero. Euskadiko Orkestra Sinfonikoarekin batera 2010ean egin zuen debuta. E. Laloren Espainiar sinfonia jo zuen eta, besteak beste, "Adierazkortasun indartsua" eta "Koloreen eta grinaren inguruan" idatzi zituzten kritiken izenburu. 2012an itzuli zen Denboraldira eta Saint-Saëns, Ravel eta Sarasateren lanak jo zituen. Urte hartan bertan plazaratu zen Orkestraren Euskal Konpositoreen Bildumako azken diskoa, Carmelo Bernaolaren inguruko monografikoa; horretarako Piezas caprichosas grabatu zuen Leticia Morenok. Orain, ordutik bost urte igaro direnean, Aram Khatxaturianen Biolin eta orkestrarako kontzertua aurkeztuko du Euskadiko Orkestra Sinfonikoaren eszenatokietan. Mikel Chamizok egitarauari oharretan idatzi duenaren arabera, "Khatxaturianen erritmo intentsitatea eta birtuosismo idiomatikoa oso egokiak dira Morenoren jotzeko moduarentzat, pasio handiz jotzen baitu pieza oro, eta bere errepertorioa ez da errusiar obretara mugatzen".

Andrey Boreykok berriki zuzendu ditu Varsoviako Orkestra Filarmonikoarekin eta Herbeheretako Orkestra Filarmonikoarekin kontzertuak Amsterdameko Concertgebouwen eta, gure Denboralditik igaro ondoren, Gotemburgoko Sinfonikoarekin, Stockholmeko Real Filarmonikoarekin edo Cincinnati eta Houstonekoekin ditu kontzertuak hitzartuta. Gainera, Belgikako Orkestra Nazionalean egiten du lan, eta baita Napleseko Sinfonikoan ere, non zuzendari titularra eta musika-zuzendaria den 2012 eta 2014az geroztik, hurrenez hurren. Euskadiko Orkestra Sinfonikoarekin aurkezten duen egitaraua osatzeko, Boreykok hain ongi ezagutzen duen errusiar errepertorioko izen saihetsezin bat berreskuratu du. Prokofieven Romeo eta Julieta balleta osatzen duten zenbakien aukeraketa bat egin du, kontzertu hauetarako espreski. Entzun ahal izango den hautaketak Shakespeareren klasikoa oinarri duen piezaren argumentuaren haria errespetatzen du.

Azken aurreko Abonu programa honetakoak izango dira Euskadiko Orkestrak bere Denboraldian emango dituen azken kontzertuak, orkestra gonbidatu ariko den Orchestre National de Bordeaux Aquitaine-k itxiko baitu Denboraldia.