Gaur asteartea, hilak 17, Iruñeako Baluarte Auditoriumean, Euskadiko Orkestra Sinfonikoak abian jarriko du 2017/2018 kontzertu denboraldia eta ongietorria egingo dio Robert Treviño zuzendari titular berriari. Estatu batuar zuzendariak kontu handiz diseinatu ditu orain hasiko den denboraldiaren bide estetikoak. Asmo handiko programazioa, egitarau sinfoniko-koral eder batekin hasiko da; horretan Iruñeko Orfeoia izango du alboan, gure herrialdeko abesbatza antzinakoenetako bat. Igor Ijurrak zuzentzen duen erakundeak azken urteotan hainbat orkestra nabarmenekin abestu du, San Petersburgoko Mariinsky antzokikoa edo New Yorkeko Filarmonikoarekin, esaterako.

Denboraldiaren aurkezpena Iruñean. Estreinako kontzertuaren harira, Kontzertu Denboraldia aurkeztu da gaur Iruñeako Baluarten. Hizlari jardun dira Orkestrako zuzendari nagusi Oriol Roch eta kontzertu horretan ariko den Iruñeko Orfeoiaren zuzendari Igor Ijurra.

Lehenbiziko kontzertuan, Treviñoren gidaritzapean, "Itxaropen-zukua" egitaraua osatzen duten piezak dira Brahmsen "Patuaren kanta", Bernsteinen "Chichesterreko salmoak" (non Easo Eskolaniako Markel Murillo haur kantariak beteko duen bakarlari papera) eta Mahler-en Lehenbiziko Sinfonia: espiritualtasuna eta desirak, orkestraren soinu handiaren bitaminek indartuak. Egitarau honetan jainkotiarren eta gizatiarren, erlijiozkoaren eta lurtarraren, gorenaren eta herritarraren arteko dualtasuna ikertzen da. Robert Treviñoren esanetan, kontzertuaren lehenengo zatiak kontrastea mahaigaineratzen du: bere buruari maitasunaren eta patuaren inguruko galderak egiten dizkion Brahms mistikoaren eta ezohiko partitura batean entzungo dugun Bernstein baikorraren arteko kontrastea; bigarren zatiak Mahler gaztea aurkezten digu: eragin ugariren pean, "kantuz" beste zuen bere 1. Sinfonia; sinfonia koral bat da, nolabait esateko, baina ez du ez ahotsik ez hitzik. Gaur Iruñean izango den kontzertuarekin itxiko da lehenbiziko kontzertu programa; aurreko emanaldiak izan dira 10ean Gasteizen, 11n Bilbon eta 13an eta bart arratsean Donostian.

Sarrerak salgai (10€tik 35€ra). Kontzertu hauetarako sarrerak, eta baita Denboraldiko gainerako kontzertuetarako sarrerak ere, salgai daude HEMEN eta www.baluarte.com webguneetan, Baluarteko leihatilan eta 902 54 05 39 telefonoan (Ticketmaster). Azken ordu gaztea (10 euro): 30 urtetik beherako lagunek aukera izango dute gune guztietako sarrrak 10 eurotan erosteko, kontzertua hasi baino 30 min. lehenago Baluarteko leihatilan. Prezio orokorren gaineko tarifa berezia ere badago, leihatilan aplikagarri 65 urtetik gorakoei, 30 urtetik beherakoei, EOS abonamendudunei eta langabetuei.

Larunbat honetan, hilak 14, goizeko 11:00etan, Judith Jáuregui donostiar pianojotzailea lehenbiziko aldiz izango da Miramongo Matinéen eszenatokian. Orkestra gailenekin nahiz errezitalean, bakarlari gisa nazioarteko ibilbide nabarmena egina duela, "X" bere azken diskoko lanak eta laster Londresen aurkeztuko dituen piezak eskuartean dituela aurkeztuko da Euskadiko Orkestraren ganbera-zikloaren publikoaren aurrean.

Kritikak artista bikain, dotore eta pertsonaltzat hartua, Judith Jáuregui (Donostia, 1985) espainiar musika-panoramako izen nabarmenetakoa da. Sarritan aritzen da espainiar areto nagusienetan eta baita nazioarteko erreferentziazko areto zein jaialditan: La Roque d'Anthéron, La Folle Journée (Nantes), Montpelliereko Jaialdia edo Schloss Elmau-ko Kammermusikwoche eta abar. Duela gutxi arrakasta handiz amaitu zuen Espainiako Orkestra Nazionalarekin Japonian barrena egindako bira. Grabaketak planteatzerakoan askatasunez jokatzearren, 2013an BerliMusic disko-etxea sortu zuen. Horrekin argitaratu ditu "Aura", musika inpresionista biltzen duena; "Para Alicia, inspiración española", Alicia de Larrochari omenaldia, eta "X", Scriabinen estasia hizpide duena, Chopin eta K. Szymanovski osagarri hartuta. Laster beteko dituen konpromezuen artean daude debutak Londresen (Southbank Centre) eta Parisen (Auditorio del Louvre), eta baita Txinara itzulera ere.

Matinéean interpretatzeko aukeratutako egitaraua anitza da: berau osatzen duten lanak dira, batetik "X" bere azken diskoan jasotako A. Scriabinen 5. Sonata pianorako eta F. Chopinen 1. Balada; eta, bestetik, azaroaren 1ean Londresen Southbank Centre aretoan debuta egitean joko dituen E. Granadosen "Doce danzas españolas"obratik ateratako "Danza oriental" eta "Danza andaluza", F. Mompouren "Haurren eszenak" eta C. Debussyren "Irudiak" eta "Uharte alaia".

Miramongo Matinéetara eroso joateko, Euskadiko Orkestrak doako autobus zerbitzua eskaintzen dio bertaratu nahi duen orori. 10:25etan abiatzen da Gipuzkoa Plaza 4 zkitik eta geldialdiak egiten ditu Antso Jakituna 18an eta Madril Hiribidea 34an.

Sarrera solteak (7€) salgai daude HEMEN eta Kursaal Auditoriumeko leihatilan. Gainera, aforo librerik balego, Orkestraren egoitzako leihatilan bertan erosi ahalko dira dagokion kontzertuaren egunean.

Urriaren 10etik 17ra, Euskadiko Orkestra Sinfonikoak 35. kontzertu denboraldia jarriko du abian eta ongietorria egingo dio Robert Treviño zuzendari titular berriari.

Abonu denboraldi berri honetan, Orkestrak 10 kontzertu eskainiko ditu Bilboko, Donostiako (bi saio), Gasteizko eta Iruñako egoitza bakoitzean. Guztira, 50 kontzertu, Abonu Denboraldian bakarrik.

Treviñok asmo handiko etorkizunari emango dio hasiera gure Orkestrarekin batera. Zuzendari titular berria indarrez, kemenez eta pasioz beteta dator, Euskadiko Orkestra goi mailara igotzeko asmoz. Denboraldi osoan zehar nabarmenduko da bere eragina da (sei kontzertu-programa zuzenduko ditu) eta kontzertu zein proiektu bakoitza ekitaldi aparta bihurtuko du.

2017/2018 denboraldiaren irudia sinboloen sinfonia da, konposizio metaforikoa, denboraldi ikusgarria, magikoa, zirraragarria eta era orotako ikusleei irekia islatzen duen irudien doinua: betiko entzuleei zuzenduko gara, baina baita zale berriei ere. Horiek erakarri nahi ditugu eta atsegin handiz hartuko ditugu gurean.

Kontzertu oro 20:00etan hasiko da.

Sarrerak salgai (10€tik 35€ra). Kontzertu hauetarako sarrerak, eta baita Denboraldiko gainerako kontzertuetarako sarrerak ere, salgai daude HEMEN, dagokion aretoko webguneetan zein leihatiletan eta gainerako ohiko salguneetan.

Urriaren 10etik 17ra, Euskadiko Orkestra Sinfonikoak 35. kontzertu denboraldia jarriko du abian eta ongietorria egingo dio Robert Treviño zuzendari titular berriari. Estatu batuar zuzendariak kontu handiz diseinatu ditu orain hasiko den denboraldiaren bide estetikoak. Asmo handiko programazioa, egitarau sinfoniko-koral eder batekin hasiko da; horretan Iruñeko Orfeoia izango du alboan, gure herrialdeko abesbatza antzinakoenetako bat. Igor Ijurrak zuzentzen duen erakundeak azken urteotan hainbat orkestra nabarmenekin abestu du, San Petersburgoko Mariinsky antzokikoa edo New Yorkeko Filarmonikoarekin, esaterako.

Orkestra, Treviñoren gidaritzapean, entseatzen ari da jada, Miramongo bere egoitzan, kontzertu horietako egitaraua. "Itxaropen-zukua" izenburupean, berau osatzen duten piezak dira Brahmsen "Patuaren kanta", Bernsteinen "Chichesterreko salmoak" (non Easo Eskolaniako Markel Murillo haur kantariak beteko duen bakarlari papera) eta Mahler-en Lehenbiziko Sinfonia: espiritualtasuna eta desirak, orkestraren soinu handiaren bitaminek indartuak. Programa honetan jainkotiarren eta gizatiarren, erlijiozkoaren eta lurtarraren, gorenaren eta herritarraren arteko dualtasuna ikertzen da. Robert Treviñoren esanetan, kontzertuaren lehenengo zatiak kontrastea mahaigaineratzen du: bere buruari maitasunaren eta patuaren inguruko galderak egiten dizkion Brahms mistikoaren eta ezohiko partitura batean entzungo dugun Bernstein baikorraren arteko kontrastea; bigarren zatiak Mahler gaztea aurkezten digu: eragin ugariren pean, "kantuz" beste zuen bere 1. Sinfonia; sinfonia koral bat da, nolabait esateko, baina ez du ez ahotsik ez hitzik.

Ez da kasualitatea Robert Treviñok Mahlerren sinfonia bat aukeratu izana Euskadiko Orkestrarekin batera ibilbideari ekiteko. Mahlerren musika izan du ondoan bere ibilbidearen oinarrizko uneetan, 2016an Municheko Filarmonikoarekin debuta egin zuenean (5. Sinfonia) edo iragan ekaineko London Symphony Orchestrarekin egindako aurkezpen arrakastatsuan (Hirugarren sinfonia). Mahlerrekin, halaber, Treviñok gure Orkestrarekin batera asmo handiko etorkizunari emango dio hasiera. Zuzendari titular berria indarrez, kemenez eta pasioz beteta dator, Euskadiko Orkestra goi mailara igotzeko asmoz. Denboraldi osoan zehar nabarmenduko da bere eragina da (sei kontzertu-programa zuzenduko ditu) eta kontzertu zein proiektu bakoitza ekitaldi aparta bihurtuko du.

2017/2018 denboraldiaren irudia sinboloen sinfonia da, konposizio metaforikoa, denboraldi ikusgarria, magikoa, zirraragarria eta era orotako ikusleei irekia islatzen duen irudien doinua: betiko entzuleei zuzenduko gara, baina baita zale berriei ere. Horiek erakarri nahi ditugu eta atsegin handiz hartuko ditugu gurean.

Sarrerak salgai (10€tik 35€ra). Kontzertu hauetarako sarrerak, eta baita Denboraldiko gainerako kontzertuetarako sarrerak ere, salgai daude www.sarrerak.euskadikoorkestra.eus webgunean, dagokion aretoko webguneetan zein leihatiletan eta gainerako ohiko salguneetan.

Kontzertu oro 20:00etan hasiko da.

Urriaren 2an eta 3an,  Bilboko BBK Salan, Euskadiko Orkestra Sinfonikoak musikaz jantziko du Grigori Kozintsev eta Leonid Trauberg zinemagileen "La Nueva Babilonia" filmaren proiekzioa. Orkestra lehenbiziko aldiz zuzenduko duen Mélanie Lévy-Thibaut frantziarraren agindupean, Dmitri Xostakovitxek sobietar propagandaren adierazlerik onenetakoa den luzemetrai horretarako idatzitako partitura interpretatuko du, 1917ko Errusiako Iraultzaren mendeurrena ospatzen ari garen honetan.

"Babilonia Berria", 1929. urtean lehen aldiz emana, sobietar zinemaren 20ko urteetako aro modernistaren titulu handietako bat da. Benetako artelan, 1871n Parisko Komunan komunisten aurka egindako sarraskia kontatzen du.

Soinu-banda, batez ere bals, polka eta leloz osatua, Xostakovitxek gazte zela idatzi zuen, 23 urte baino ez zituenean. Partiturak, autorearen lehenengoa zinema-mundurako, pisu sinfoniko handia du eta bere ardatza filmeko pertsonaien barne-emozioak eta sentimenduak ikusleari hurbilaraztea da, dramatismoaren bidez. Euskadiko Orkestra Sinfonikoak interpretaturiko soinu bikainek zuri-beltzeko mundu batean, murgilaraziko dute ikuslea bi orduz. Xostakovitxen erritmo zirraragarri eta gogora ekarleek onduriko munduan. Errusiar musikagilea aitzindaria izan zen irudiak musikarekin uztartzen zinemaren historian.

Euskadiko Orkestra Sinfonikoak proiekzio honetan izango duen parte-hartzea musika sinfonikoa jendartean ezagutarazteko apustuaren baitan kokatzen da, eta hori soinu-banda ospetsuen interpretazioaren bidez. Besteak beste, "The crowd" eta "Wings" film mutuen emanaldietan musika jarri du Orkestrak, eta azken urteotan zuzenean eman du, adibidez, "Lo imposible" arrakastatsuaren soinu-banda.

Urriaren 24an, Tabakaleran. Euskadiko Orkestra Sinfonikoak Donostiako Tabakalerako patioan ere aurkeztuko du "Babilonia Berria" filmaren musika. Kultura garaikideko nazioarteko zentroarekin, kutxa Kultur-ekin eta Euskadiko Filmategiarekin elkarlanean, zuzeneko musikadun proiekzioaren aurretik hitzaldi bat izango da: "Iraultzak: sobietar zinemaren kanona birpentsatzen".

Larunbat honetan, hilak 30, goizeko 11:00etan, Euskadiko Orkestra Sinfonikoaren egoitzak bere ateak irekiko dizkio berriz ere Miramongo Matinéen publikoari. Basilio Astulezek zuzentzen duen Leioa Kantika Korala haurren abesbatzak irekiko du Orkestraren ganbera-zikloaren 26. denboraldia. Matinéek eskaintza eklektikoa eta erakargarria plazaratu dute berriz ere, askotariko ikus-entzuleentzat aproposa.

"Kaleido", Leioa Kantika Koralaren musika-unibertsoa osatzen duten koloreek eta formek osatutako mosaikoa. Basilio Astulezek berak egitarauari oharretan adierazten du "aldakortasuna eta askotarikotasuna" direla "Kaleido egitaraua hobekien definitzen duten ezaugarriak". Egile garaikideen lanen aukeraketa da eta horien jatorria anitza da: Finlandia, Suedia, Eslovenia, Estatu Batuak, Kanada, Singapur, Letonia, Melilla eta Euskadi; imajinario kaleidoskopiko bat eratzen dute: maitemindutako bikote baten topaketa irlandar baso batean, udaberriko elurte bat loretutako sagarrondoen artean, lilurak, Lorcaren poemak, iluntzean sortutako izaki fantastikoen asiar exotismoa edo marokoar ezkontza tradizional baten hotsanditasuna eta poza.

Leioa Kantika Korala nazioarteko mailan ospe handien duten haurren abesbatzen artean dago. Horren erakusle dira irailaren 20tik 24ra izan berri den XI Rimini International Choral Competition delakoan Folk/Spiritual/Gospel sailetan abesbatza gazte onenari saria eta maila absolutuan lortutako saria. Bere aztarna artistikoa utzi du jada Europako, Amerikako eta Asiako hamabost herrialdetan barrena, ezin konta ahala kontzertuei, jaialdiei, birei, sariei eta disko-grabaketei esker. Zirrara eragiten dute bere maila artiskoak, soinu-kalitate zein musikaltasun gorenak, programazio berritzaileak eta baita koreografia koloretsu nahiz dinamikoek ere. 2000. urtean Leioako Musika Kontserbatorioaren baitan sortua, espezialitate eta adin ezberdinetako berrogeita bost musika-ikasle gaztek osatzen dute. 2014ko irailan Euskadiko Orkestra Sinfonikoaren 2014/2015 Abonu Denboraldiaren irekieran esku hartu zuen. 

Miramongo Matinéetara eroso joateko, Euskadiko Orkestrak doako autobus zerbitzua eskaintzen dio bertaratu nahi duen orori. 10:25etan abiatzen da Gipuzkoa Plaza 4 zkitik eta geldialdiak egiten ditu Antso Jakituna 18an eta Madril Hiribidea 34an.

Sarrera solteak (7€) salgai daude HEMEN eta Kursaal Auditoriumeko leihatilan. Gainera, aforo librerik balego, Orkestraren egoitzako leihatilan bertan erosi ahalko dira dagokion kontzertuaren egunean.

Matinéen denboraldia osatzen duten 16 kontzerturako abonamenduak 84 euroko prezioa du, eta 64 eurokoa tarifa bereziko onuradunentzat. Eros daiteke Orkestraren bulegoetako telefonora deituz (943 01 32 32) edo inprimaki hau betez.

Facebook eta You Tuben daude jada Euskadiko Orkestra Sinfonikoak Zea Mays eta Dr. Deseorekin batera grabatutako azken bideoklipak. Azkenerako utzi ditugu "Negua joan da ta" eta "Corazón de tango" ezagunen bertsio sinfonikoak, Fernando Velázquezek eginak. Goza eta parteka itzazu!

Bi bideo berri horiekin osatu dugu jada sarean Orkestraren Miramongo egoitzan Jabi Elortegiren zuzendaritzapean, eta Fernando Velázquez musika-zuzendari zela, grabatutako sei bideoen segida. Aurrez plazaratutako doinuak dira Zea Maysen "Elektrizitatea" eta "Gaur" eta Dr. Deseoren "Cuánto frío hace en Saturno" eta "Una mirada distinta". Sare sozialetan hedatzen hasi zirenetik hona, 110.400 biderretik gora izan dira erreproduzituak.

Irailaren 30 larunbatean abiatuko da, Euskadiko Orkestra Sinfonikoaren egoitzan, Miramongo Matinéen 2017/2018 denboraldia. Orkestraren ganbera-zikloa, 26. denboraldira iritsi dena, klasiko bat da asteburuetako kultur-eskaintzan. Matinéek etengabean berritzen dute euren soinu-katalogo zabala; horrela, ezin konta ahala lurrinek eta forma melodikoek kontakizun oroitarazlea erakitzen dute. Sortu zenetik Kutxa Fundazioaren laguntza duen ziklo honen denboraldia 16 kontzertuk osatzen dute.

Denboraldian gonbidatu ariko diren interpreteen artean, aipagarriak dira bakarlari gisa (orkestra gailenekin nahiz errezitalean) nazioarteko ibilbide nabarmena egina duen Judith Jáuregui donostiar pianista, Matinéetan estreinazkoz ariko dena, "X" bere azken diskoko lanak eta laster Londresen aurkeztuko dituen piezak eskuartean dituela; eta, halaber, donostiarra den Ainara Ortega eta Iñaki Salvador, elkarrekin egindako lan eskergaren emaitza (Kantaginjazz proiektua, esaterako) ahots zein pianorako errezital batean erakutsiko dute, hainbat partitura, jazzaren ikuspegitik berreskutatuko dute; eta Leioa Kantika Korala haurren abesbatza bizkaitarra, hilaren 30ean denboraldia irekiko duena, egile euskaldunen zein Rautavaara bezalako abesbatza-musikako klasikoen lanek osatutako errepertorio garaikidea hizpide hartuta. Zikloaren ardatz nagusi den ganbera-musika eskaintza eratortzen da Euskadiko Orkestra Sinfonikoko musikariek euren jarduera sinfonikoarekin batera egiten duten lanetik. Denboraldi honetan, aurkeztuko dituztenen artean daude Stravinskiren Soldadu baten istorioa, ganbera-talde batek interpretatua eta Andoni Aleman narratzaile dela; orkestra-ganberarako diseinatutako "Estilo galantetik klasizismora" kontzertua, Mozarten lan baten transkripzioaren estreinaldia hartuko duena; eta baita haize- zein hari-talde txikien emanaldiak ere, non konpositoreen bikote bereziak sortuko diren: Joaquín Turina eta Johannes Brahms edo Philipp Glass eta Dmitri Xostakovitx, esaterako.

Kontzertuak larunbateetan izango dira, goizeko 11:00etan, Euskadiko Orkestra Sinfonikoaren Miramongo egoitzan. Horietara eroso joateko, Euskadiko Orkestrak doako autobus zerbitzua eskaintzen dio Matinéetara bertaratu nahi duen orori. 10:25etan abiatzen da Gipuzkoa Plaza 4 zkitik eta geldialdiak egiten ditu Antso Jakituna 18an eta Madril Hiribidea 34an.

Abonamenduak. 16 kontzerturako abonamenduak 84 euroko prezioa du, eta 64 eurokoa tarifa bereziko onuradunentzat (65 urtetik gorakoei, 30 urtetik beherakoei, Orkestrako beste zikloetako abonatuei, Kursaal Eszenako abonatuei, Kutxabankeko K26 eta K26+ txartelen Titularrei, Eureka! Zientzia Museoko lagunei eta Musikene). Jada eskuragarri daude Orkestraren bulegoetako telefonora deituz (943 01 32 32) edo inprimaki hau bidaliz. 

Sarrera solteek 7 euroko prezio bakarra dute eta salgai daude hemen eta www.kutxabank.es webguneetan eta Kursaal Auditoriumeko leihatilan. Gainera, aforo librerik balego, Orkestraren egoitzako leihatilan bertan erosi ahalko dira dagokion kontzertuaren egunean.

Irailaren 22 ostiralean "Submergence" (Murgilketa), Wim Wendersen azken filmaren proiekzioarekin hasiko da Donostiako 65. Zinemaldia. Alemaniaren, Frantziaren eta Espainiaren arteko koprodukzio horren Europako estreinaldia izango da; aurrez Toronton izan da. Filma Urrezko Maskorra lortzeko lehiatuko da Sail Ofizialean, eta James McAvoy eta Alicia Vikander dira aktore nagusiak.

Fernando Velázquezek sortu eta Euskadiko Orkestra Sinfonikoak grabatutako soinu-banda. Martxoaren 13an, Euskadiko Orkestra Sinfonikoaren Miramongo egoitzan, Wim Wenders zuzendariak gertutik jarraitu zuen bere azken pelikularako musikaren grabaketa. Partitura Goya saridun Fernando Velázquezek idatzi du. Saritua izandako "A Monster Calls" eta beste hainbat pelikulatarako musikarekin egin bezala, konpositore eta zuzendariak Euskadiko Orkestra Sinfonikoari eman nahi izan zion musika hori grabatzeko ardura. Wim Wendersek berak grabaketa-prozesuan esku hartu nahi izan zuen. Hala, Fernando Velázquezekin eta Euskadiko Orkestra Sinfonikoarekin partekatu zuen "Submergence" bere filmarako soinu-bandaren sorkuntza.

"Submergence" suspense pelikula erromantikoa da. Alemaniar, frantziar eta espainiar ekoizpena da. Atresmedia Cine-k aurkeztua, Lila 9th-ren produzkioa Neue Road Movies-ekin, BacKup Studio-rekin, Morena Fims-ekin, Submergence A.I.E-rekin eta UMedia-rekin lankidetzan, eta Atresmedia eta Movistar+-en parte-hartzearekin. Nazioartean Embankment Films enpresak banatuko du, eta Espainian, berriz, Entertainment One Films Spain (eOne Films Spain) enpresak.

Hurrengo egunean, "Ikus-entzunezko gozamena" Belodromoan, Euskadiko Orkestraren eskutik. Gainera, Euskadiko Orkestra Sinfonikoa zuzenean ere ariko da Zinemaldian: irailaren 23an jada ohikoa den eta zinemarako musika hizpide duen kontzertua emango du Anoetako Belodromoan. Doako sarrerak eskuragarri daude jada Zinemaldiaren informazio-guneetan eta Donostia Turismoaren bulegoan.

Aste honetan bertan bidali ditugu abonu-txartelak gure abonatuen helbideetara. Lehenengo abonu-programaren egunak hauek dira: urriak 10 Gasteizen, urriak 11 Bilbon, urriak 13 eta 16 Donostian, eta urriak 17 Iruñean.