Urtarrilaren 27tik otsailaren 2ra, Euskadiko Orkestra Sinfonikoak bere Abonu Denboraldiko programa berri bat aurkeztuko du. Ainars Rubikis letoniar zuzendariak gidatuta, Nicholas Angelich pianista estatubatuarra izango da bakarlari Beethovenen Pianorako 4. kontzertuan.

Gainera, Tchaikovskyren Romeo eta Julieta; eta horren aurretik, bilbo eta Iruñean 2013an AEOS-BBVA Fundazioaren Konposizio Saria irabazi zuen Fragmentos del Satiricón, Fernando Buiderena; eta donostia eta Gasteizen Soinu Mosaikoa proiektuaren emaitza.

-

"Apaltasunez eta oso serioski heldu diot ardura honi". Horrela zuzendu zaie komunikabideei gaur goizeko prentsaurrekoan 2017/2018 Denboralditik aurrera Euskadiko Orkestra Sinfonikoko zuzendari titular izango den Robert Treviño. Nabarmen hunkituta, Treviñok azaldu du txikitandik egin duela borroka orkestra baten titular izendatua izateko unea bizitzera iristeko eta oso "serioski" hartu duela egiteko hori. Zentzu horretan, Kultura sailburu eta Orkestrako presidente Bingen Zupiriaren hitzak bere egin ditu eta "gizarteak berea duen orkestra bat zuzentzearen garrantzia eta harrotasuna" partekatu ditu. Jarraian, zera esan du: "Orkestrarekiko harreman hori ez da ustekabean sortu, oinarri ditu elkarrekin egindako talde-lana eta guztiek norabide berean arraun egiteko beharra". Bere hitzaldia amaitzeko, adierazi du: "Nire lana amaitzean, espero dut Euskadiko Orkestra Sinfonikoaren ibilbidea jarraitzen dutenek esatea Orkestra indartsuago dagoela zentzu orotan".

Bestalde, Kultura sailburu Bingen Zupiriak Orkestrako presidente gisa emandako lehenbiziko prentsaurrekoa baliatu du Treviño maisuari ongietorria eman eta Euskadiko Orkestra autogobernuaren estreinako fruituen artean kokatzeko. Bere hitzetan, "Herri honetan maitea da Orkestra, gizarteak harrotasunez hartzen du eta lagungarria da lurraldeak batzeko". -gainera, pozik agertu da Robert Treviñoren izendapen berriarekin, bere lanak "euskal enbaxadore gisa duen paper garrantzitsua kontuan izanik, Orkestraren izaera indartzeko" balioko baitu; izan ere, Orkestra are "trinkoagoa eta harmoniatsuagoa bihurtzeko" aukera izango da.

Euskadiko Orkestrako zuzendari nagusi Oriol Rochek "itxaropentsu eta zirraragarritzat" jo du aro berria. Hilabete asko daramatzate horretan lanean eta azpimarratu ditu 2017/2018 Denboralditik aurrera zuzendari titular berria izango denak bere lanean agertzen dituen ardura, zintzotasuna eta etengabe hobetzeko grina.

Hori adierazi zuen Orkestrak bart Bordelen emandako kontzertura bertaratutakoek. Eta 1200 pertsona ziren Auditoriumean bildu zirenak, ONBAren, hau da, euren orkestraren Denboraldiko emanaldi berri batez gozatzeko prest. Elkartruke berri batean, Orchestre d'Euskadi zen atzokoan entzun zutena. Goiz hasi ziren txaloak eta ugari eta etengabekoak izan ziren, entzulegoak orkestra gonbidatuari bere onespena adierazi nahiko balio bezala. Javier Perianes izan zen hortaz jabetu zen lehenbizikoa, Saint-Saënsen Pianorako 2. kontzertua bakarlari gisa interpretatu ostean. Biziki, maisuki aritu ondoren, hainbestekoa izan zen Perianesek jasotako txalo-zaparrada non hainbat alditan atera behar izan zuen eszenatokira. Bere esker ona adierazteko, pianistak Chopinen azken nokturno ederra oparitu zion publikoari. Horrek gehiago nahi zuen, baina ez zen izan. Iruditzen zaigu Perianesek karta bat gorde zuela hurrengo bisitarako.

Atsedenaldiaren ondoren, jada bakarka, Orkestrak Debussyri eman zion bigarren zati osoa: Jun Märklek frantziar errepertorioaren ezagutza erakutsi zuen; eroso agertu zen, hasiera batean, Frantzian egonik, konprometitua zirudien egitaraua interpretatzerakoan. Kontuan hartzekoa da Euskadiko Orkestrak egitarau erabat frantziarra aurkeztu zuela, Saint-Saëns eta Debussyren obrek osatua. Baina Orkestrak arrakastaz burutu zuen emanaldia eta, publikoaren eskariari erantzunez, Suitea re minorrean, opus 49 jo zuen, entzuleen gozamenerako. Märkl behin eta berriz atera zen eszenatokira, Bordeleko entzuleen pozari erantzuteko, bi orduren ostean kontzertua amaitutzat eman zuen arte. Gaur kontzertu berri bat izango da egitaraua bera hizpide hartuta, gehiago eta gehiago izango da, beraz.

Henri Marquier entzule. Pozarren hartu genuen Henri Marquier entzule izatea. 80ko hamarkadan ONBAko zuzendari nagusi izandakoa, Euskadiko Orkestrak, abiatu zenean, aholkulari izan zuen administrazio zein kudeaketa gaietan.

Aretoa. Duela hiru urte inauguratu zen. 1440 pertsonentzat du lekua eta, akustika txundigarria izateaz gain, Orkestrak aretoaren erdian kokatzen dira, entzuleriak erabat inguratuta. Oso areto moderno eta erosoa da; harrigarria gertatzen da, Bordeleko erdigunean, denda eta bulegoz inguratutako eraikin batean, oharkabean gertatzen dela kontuan izanik.

Urtarrilaren 14 larunbatean, Donostiako Orfeoi Gaztea ariko da Euskadiko Orkestra Sinfonikoaren egoitzak hartzen dituen Miramongo Matinéetan. Kontzertu honetarako aukeratutako izenburuak dioen bezala, "20 urte, bada zerbait!" eta hori erakutsi nahaian tauklaratuko dira Donostiako Orfeoiko kantari gazteak. Hori da, gutxi gora-behera, kantari jardungo dutenen adina eta azken hogei urteotan konposatutakoak dira abestuko dituzten piezak. Eta honela aurkezten digute larunbateko emanaldia: "gaztaroaren indarraren eta bizitasunaren isla izango da; guztia bizitzeke, sentitzeke eta egiteke dugunean gugan nagusitzen den bizipozaren isla, alegia".

1997tik gaurdaino idatzitako lanen aukeraketa + M. Lauridsenen "Lux aeterna". Emanaldia bi zatitan banatuko da. Lehenbizikoan, bertako zein nazioarteko hainbat konpositorek azken bi hamarkadetan sortutako lanak izango dira entzungai; hala, Javier Bustoren "Urepel doinua" edo Xabier Sarasolaren "Neskatx'ederra" piezekin uztartuko dituzte Z. Randall Stroope-ren "The conversion of Saul", Eriks Esenvalds-en "Only in sleep", Guy Forbes-en "O nata lux", Jim Papoulis-en "Sing of peace", Juan Pablo de Juan-en "Nawba Isbahan" eta Karl Jenkins-en "Rain dance" obraren moldaketa bat. Bigarren zatian, berriz, Morten Lauridsen daniar jatorridun musikagile estatubatuarraren "Lux aeterna" abestuko dute Orfeoi Gazteko neska-mutilek. Abesbatza eta organorako bertsioan interpretatuko duen horretan, Orfeoi Gazteak Alize Mendizalbal organista izango du lagun. Emanaldian ariko da, halaber, Jon Zaldua perkusionista.

10 urteko ibilbidea. Haur abesbatzaren eta Donostiako Orfeoiaren arteko zubi lanak egiteko asmoarekin, 2006an sortu zen Donostiako Orfeoi Gaztea. Egun, 14 eta 19 urte bitarteko berrogei neska-mutilek osatzen dute. Esteban Urzelai eta Leticia Vergara dira Orfeoi Gaztearen zuzendariak. Informazio gehiago www.orfeondonostiarra.org webgunean.

Sarrerak agortuta. Jada ez dago salgai kontzertu honetarako sarrerarik, duela aste batzuk agortu baitziren.

Miramongo Matinéek Kutxa Fundazioaren babesa dute.

Euskadiko Orkestra Sinfonikoak Bordelera bidaia egingo du gaur, bihar osteguna (12) eta etzi (13) kontzertu bana emango baitu bertako Auditoriumean. Orchestre National Bordeaux Aquitaine (ONBA) delakoarekin elkartrukea eginez, horren Abonu Denboraldian gonbidatu gisa ariko da Orkestra.

Bere titular Jun Märkl zuzendari duela, Orkestra Javier Perianes pianista bidaide duela abiatuko da Bordelera. Elkarrekin joko dute Camille Saint-Saënsen Piano eta orkestrarako 2. kontzertua, Orkestrak estreinakoz interpretatuko duena. Javier Perianesek berak ere aurten gehitu du obra hori bere errepertoriora. Zentzu horretan, zera adierazi du pianojotzaileak: "Oso pozik nago lanean lortutako orekarekin eta nire ibilbidearen bilakaerarekin. [...] Nire errepretorioan txertatzeko aukeratutako obren artean badago logika bat, berez sortutakoa aurrez sarritan interpretatutako piezatatik. Esaterako, taxuzkoa da Saint-Saënsen 2. Kontzertua haren Bosgarrena interpretatzerakoan lortutako eskarmentuaz baliatuta jotzea".

Bordelen emango dituzten kontzertu hauen aurretik, Euskadiko Orkestrak eta Javier Perianesek elkarrekin jardun zuten Donostiako Kursaal Auditoriumean: batetik, joan zen apirilean, International Classic Music Awards (ICMA) sarien galan eta, bestetik, 2008ko Musika Hamabostaldian. Azken hilabeteotan, Perianesek hainbat kontzertu eman du Erresuma Batuan eta berriz itzuliko da EOSekin lankidetzan aritu ostean. Errezital-interprete legez, datorren apirilean bira bat egingo du Ameriketan barrena; Washington D.C., New York, Vancouver, San Francisco, Quito, Bogotá, Santiago de Chile eta Buenos Airesen emango ditu errezitalak. Informazio gehiago www.javierperianes.com webgunean.

Saint-Saëns gehiago eta Debussyren Images piezatako bi egitaraua osatzeko. Orkestrak, bakarka, frantziar errepertoriotik hautatutako beste bi obra interpretatuko ditu. Izan ere, Jun Märkl maisua oso aditua da frantziar konpositoreen lanean. Emanaldia irekitzeko, Saint-Saënsen Suite algérienne interpretatuko du eta, bigarren zatian, Claude Debussyren Images (Irudiak) osatzen duten piezatako bi izango dira entzungai: Rondes de Printemps eta Ibéria.

Euskadiko Orkestra Sinfonikoaren eta Orchestre National Bordeaux Aquitaine delakoaren arteko harremana klasiko bilakatu da eta ohikoak dira bi orkestren arteko elkartrukeak. Euskadiko Orkestrak Bordelera egingo duen bisita berri honi erantzuteko, ONBAk itxiko du gure Abonu Denboraldia, ekainaren 17tik 22ra ohiko lau hiriburuetan. Bere titular Paul Danielek zuzenduta ariko da, Vadim Gluzman biolinista bakarlari gonbidatu duela.

IKASTETXEAK atalean, eskuragarri dago "Romeo eta Julieta" Eskola Kontzertuen gida didaktikoa. Ikuskizun hori lehen eta bigarren hezkuntzako ikasleei zuzenduta dago.

Romeo eta Julieta. Txotxongilo erraldoiak eta, aldi berean, arinak; horiekin batera,
ezinezko maitasuna bizi duen bikote gazte baten istorioa kontatzen duen narratzailea
eta orkestra sinfoniko bat, Euskadikoa. Ikuskizunak edertasuna eta indarra irudikatuko ditu, Prokofievek Romeo eta Julietaren betiereko istorioa ezagutu zuenean, hau
da, amore emateko ezintasunez eta aurreiritziez jositako istorioa ezagutu zuenean irudikatu zituen edertasuna eta indarra, hain zuzen ere.

Euskadiko Orkestra Sinfonikoak Zuhar Iruretagoiena artista zarauztarraren lana aukeratu du aurten Gabonak zoriontzeko. "Seigarren mugimendua" osatzen duten sei grabatu originalak eskuz egindako serigrafiarekin inprimatu dira, 17,5 x 11,5 zmko neurria duen paperean, Bilboko La Taller-en. Grabatu ezberdin bakoitzeko 1000 aleko edizioa egin da. Artistak sinatu eta 1/1000tik 1000/1000ra zenbatu ditu.

Zuhar Iruretagoiena Labeaga Arte Ederren doktoregoa egiten ari da eta irakaslea laguntzailea da Euskal Herriko Unibertsitateko Arte Ederren Fakultateko Arte eta Teknologia Sailan. Pompeu Fabra Unibertsitatean Arte Digitalen Masterra. Bere lanaren funtsa dira ikerketa eta praktika artistikoa. Performatiboa denaren jarduna zabaldutako eremu gisa ulertu eta horrek gainerako diziplinekin dituen tirabirak ditu aztergai. Egun EHUko hainbat ikerketa proiektutan dihardu lanean.

Bere lana erakutsi duten erakundeen artean daude Guggenheim Museum (Bilbo), San Telmo Museoa (Donostia), NY Space (Manchester, Reino Unido), Bildraum Bodensee (Bregenz´, Austria), Pinta (Londres, Erresuma Batua), La Casa Encendida (Madril), Art Galerie Prantl&Boch (Bregenz, Austria), Rekalde Aretoa (Bilbo), Cristóbal Balenciaga Museoa (Getaria), KM (Donostia), Gabarron Fundation (New York), Espainiako Kulturgunea Tegucigalpan (Honduras), San José (Costa Rica), Mexico DF (Mexico), Montevideo (Uruguay), Córdoba (Argentina), Managua (Nicaragua) eta La Taller (Bilbo).

Zenbait sari eta beka jaso ditu. Horien artean aipagarrienak dira Generación 2008 Caja Madrid, Ertibil 2009, Gipuzkoako Artista Berriak 2010, Muro Guggenheim, beka-egonaldia KUNSTHAUS Bregenz (Austria), beka-egonaldia (epe baterako espazioa) Bilbao Arte Fundazioan, beka-egonaldia Rekalde Aretoan, Nekatoenea Artistes en Résidence Hendaia (Frantzia), beka-egonaldia LABORE, DSS2016.