Idoan ganbera taldea Miramongo Matinéetan ariko da otsailaren 28 larunbatean. Aurkeztuko duten egitarauan, pianodun kuartetoaren ikuspegi bikoitza. Batetik, erromantizismo garaiaren erakusgarri den Robert Schumannena eta, bestetik, Ludwig Van Beethovenena; klasizismo berantiarraren eta erromantizismo goiztiarraren artean sortua, azken honen obra ondare unibertsala da.

Beethovenen Pianodun 4. Kuartetoa mi bemol maiorrean bere Hari eta haizeetarako kintetoaren moldaketa da eta, W.A. Mozarten ondoren, genero honen adibide zaharrenetakoa dugu. Ia mende bat beranduago estreinatu zuen Schumannek bere Pianodun kuartetoa, Leipzigen eskainitako agur-kontzertuan; musikalan liluragarri honek gerora Brahms edo Fauréren lanean eragina izango zuen ikuspegi berri bat ireki zuen.

Idoan taldeko kide dira Maialen Rezabal, biolina eta Euskadiko Orkestrako kidea; Asier Arabolaza, biola; Jon Larraz, biolontxeloa eta hau ere Euskadiko Okrestrako kidea, eta Amaia Zipitria pianista. 2010ean Miramongo Matinéetan estreinakoz aritu zirenetik, askotariko musika eskaini dute Euskadiko Orkestraren egoitzan: Mozart, Schumann, Brahms, Fauré, Turina eta baita Elvis Costello eta The Brodsky Quartet-en The Juliet Letters lanaren bertsioa ere.

Bihar ostirala, hilak 27an hasi eta martxoaren 4 asteazkenera bitartean, Euskadiko Orkestra Sinfonikoak bere Abonu Denboraldiari dagokion kontzertu-programa berri bat eskainiko du. Oraingoan hiru izango dira arreta-gune nagusiak: Jun Märkl titularraren itzulera Orkestraren podiora, EOSko kidek osatutako laukote bat Haydnen Sinfonia Kontzertantean bakarlari ariko dela eta Musikeneko ikasle talde ba Straussen Heroi-bizitzan ariko dela. 14/15 Abonu Denboraldiko 7. Programa honi dagozkion kontzertuak izango dira otsailaren 27 eta martxoaren 2an Donostiako Kursaal Auditorioan, otsailaren 28an Gasteizko Principal Antzokian, martxoaren 3an Bilboko Euskalduna Jauregian eta, amaitzeko, hilaren 4an Iruñeako Baluarte Auditorioan.

Euskadiko Orkestrako lau kide bakarlari gonbidatu: Lorenz Nasturica-Herschcowici, kontzertino gonbidatu iraunkorra; Juan Ignacio Emme, biolontxelo bakarlaria; Hervé Michaud, oboe bakarlaria, eta Marco Caratto, fagot bakarlaria, laurek Haydnen Sinfonia Kontzertantea interpretatuko dute Orkestrarekin batera. Orkestrako musikariek atriletan betetzen duten lekua utzi eta Abonu-programa batean bakarlari aritzea sarritan gertatzen den zerbait da. Baina ez da hain ohikoa Orkestrako lau musikari elkarrekin obra beraren interpretazioan bakarlari aritzea. Izan ere, Joseph Haydnen Oboe, fagot, biolin eta biolontxelorako sinfonía kontzertantea si bemol maiorrean, opus 84 obran ematen den bakarlarien konbinazioa -biolina, oboea, fagota eta biolontxeloa- ez da bat ere ohikoa, eta Londresen antolatutako kontzertu-ziklo batean aipatutako instrumentuak jotzen zituzten birtuosoak elkartzean sortu zen zirkunstantzialki. Mikel Chamizo konpositore eta kritikoaren hitzetan, "Haydnek, bere maisutasu n tekniko paregabearekin, tinbreen konbinazio leun hori musika fresko eta xarmagarri baten zerbitzura orekatzen asmatu zuen, sakontasun gehiegi eman gabe -ez dadila ulertu gutxiespen gisa-, orkestrari nabarmenki gailentzen zaion ganbera-musikaren diskurtso liluragarri batean, non, noizean behinka, biolina nabarmentzen den".

Jun Märkl Euskadiko Orkestraren zuzendari titularraren zuzendaritzapean, egitaraua osotuko dute C. Saint-Saënsen Martxa heroikoa eta Phaéton eta R. Straussen Heroi-bizitza poema sinfonikoa. Heroi-bizitza interpretatzeko 110 musikari bilduko dira eszenatoki gainean; horietatik 27 Musikeneko ikasleak izango dira, Aula Jordá Gela EOS eta Musikeneren arteko lankidetza-hitzarmenaren baitako programari esker Euskadiko Orkestraren organikoan ariko direnak.

Ikasleei zuzendutako entsegu irekia. Euskadiko Orkestraren Musika Gelaren programazioaren baitan, otsailaren 27 ostiralean goizez, ikastetxe ezberdinetako hainbat ikasle taldek Kursaal Auditorioan Abonu-programa honen entsegu orokorrean izateko aukera izango dute. Entsegu hauetarako sarrera doakoa da eta jarduera interpretatuko diren obren ingurukoa azalpen labur batek osotzen du.

EMUSIK 2016 jaialdiak badu jadanik kantuen errepertorioa. Kantuok maiatzaren 9an interpretatuko dira aurreneko aldiz, jaialdiaren laborategi-entseguan, eta une gorena 2016an izango dute. Errepertorioa gaur goizean aurkeztu dute: lau kantuk osatzen dute, eta milaka musikari gazte europarrek aldi berean interpretatuko dituzte. Musikatu bizitza jaialdiaren kantu ofizialaz gain, beste hiru kantu hauek interpretatuko dituzte: Txanton Piperri, San Sebastian martxa (zati bat hip hopa) eta Europako ereserkia (zati bat tecno-a).

Naiara Sampedro Hezkuntza zinegotziak adierazi du lan hori EMULAGUN entitateei esker egin ahal izan dela: "EMUSIKek gero eta laguntzaile gehiago ditu, eta erakunde horiek, batera zein bestera, musika jaialdi handi honetan laguntzen ari dira. Horregatik, eskerrak eman nahi dizkiet proiektu honetan laguntzeagatik, herritarren energia olatuak baitira, kasu honetan 2016ra iritsiko den musika energia". Sampedrok EMULAGUN egitera gonbidatu ditu hala erakunde publiko eta pribatuak nola norbanakoak: "EMULAGUNen bidez, jaialdian laguntzeko sare bat osatu nahi dugu; izan ere, laguntzeko modu asko daude proiektu zirraragarri hau errealitate izan dadin".

Gaur egun, EMULAGUN dira, besteak beste, Euskadiko Orkestra Sinfonikoa, Donostiako Orfeoia, Easo Abesbatza, Andra Mari Abesbatza, Musika Hamabostaldia, Jazzaldia, Musikene eta lurraldeko beste musika erakunde batzuk. Entitate horiei esker grabatu ahal izan da errepertorioa, hain zuzen ere horietako batzuen parte hartzearekin. Euskadiko Orkestra Sinfonikoaren egoitzan egin dute grabazioa, Juan Jose Oconen zuzendaritzapean. Partiturak otsailean ezagutarazi zituzten, eta martxoaren 15ean argitaratuko dituzte grabazioak, aurtengo entseguan zein hurrengo urteko jaialdian parte hartuko duten musikariak ikasten joan daitezen.

Juan Jose Ocon Udalaren Musika Eskolako irakasleak esan du jaialdia erronka handi bat dela: "Denok amestutako erokeriak, pixkanaka-pixkanaka, errealitate bihurtzen ari dira. EMUSIK 2016 jaialdiak errepertorio berezia izango du, ikasleen eta zaleen zailtasunei egokitua eta instrumentu sinfonikoetarako, gitarrarako, txisturako, trikitirako eta akordeoirako moldatua; denok ezagutzen ditugun obrak dira, baina bertsio bereziak dituzte: tradizioa eta berrikuntza txertatzen dituzte, hip hop eta tekno erritmoekin". Zuzendari musikalaren arabera, jaialdian sorpresak izango dira, betiere musika eta dantza nagusi direla. "Aste honetan gogotik egin dugu lan, baina lan gogor horrek badu saria; izan ere, ikasleek eta zaleek izugarrizko poz aurpegia jartzen duten Anoetan egingo denaren moduko jardueretan parte hartzen dutenean". Moldaketak Xabier Zabalak egin ditu.

Oriol Roch Euskadiko Orkestra Sinfonikoaren zuzendari nagusiak adierazi du ohore handia dela EMULAGUN kanpainaren lehen lekukoa hartzea: "EMUSIK Musika Eskolen Europako Jaialdiak EOSen babes guztia dauka. Eta babestu ere, uste osoz babesten du, ekimen handi eta laudagarri honetan lagundu nahi duelako eta musikak komunikatzeko eta gizartean integratzeko tresna gisa nolako garrantzia eta ahalmena duen erakutsi nahi duelako".

EMULAGUN gisa, Euskadiko Orkestrak laguntza eman dio EMUSIK jaialdiari eta, hedaduraz, Donostia 2016 Kultur Hiriburutzari. Errepertorioa haren egoitzan grabatu izana babes horren etsenplu argia da. Oriol Rochek beste ekintza batzuk egiteko ere eskaini du egoitza: "Egoitza hau musikari gazteen arteko kolaboraziorako gune nagusi gisa eskaintzen dugu eta EMUSIK 2016 jaialdia antolatzeko behar diren 70 mikroegoitzetako bat izango da".

Jun Märkl orkestraren zuzendari titularrak ere eman dio babesa ekimenari. Oriol Rochek helarazi digu haren mezua: "Zuzendariak atsegin du eta biziki gustatzen zaio EMULAGUN izateko ideia. Bera ere egongo da Anoetan EMUSIK 2016 ospatzeko eta Europako 32.000 musikari gazteen aurrean modu aktiboan parte hartzeko".

Donostiako Orfeoia, Easo Abesbatza eta Andra Mari Abesbatza ere badira EMULAGUN. Antolatzaileek eskerrak eman nahi dizkiete abesbatza horiei egindako ekarpenarengatik. Lana otsailaren 1ean hasi zen, partiturekin, eta abesbatzen grabazioa denbora errekorrean egin dute: otsailaren 19an, bi kantu grabatu zituzten Easok eta Andra Marik; 27an, beste bi kantu grabatuko ditu Orfeoiak; eta martxoaren 3an, haurren partea grabatuko dute Easo Txikik eta Orfeoi Txikik.

Musika Hamabostaldiak, Jazzaldiak eta Musikenek ere bat egin dute proiektuarekin, eta ahal duten neurrian lagunduko dute zabaltzen eta parte hartzea areagotzen. Horretarako, "MUSIKATU BIZITZA" Garazi Zabaleta musikagileak sortutako jaialdiaren abestia zabaldu eta erabiliko dute entitateok. Abesti hori herritar guztientzako kultur ondarearen parte izango da.

Bihar, otsailaren 14an, Diatessaron taldea ariko da Miramongo Matinéetan, "Barroko garaiko emakume musikagileak" izenburudun kontzertua eskainiko duelarik. Besteak beste, Isabella Leonarda italiarraren partiturak interpretatuko dituzte, XVII. mendeko Italian garrantzi handikoak izan zen eta gerora ere fenomeno berezia izan zen emakume musikagile talde baten ordezkari gisa. XVIII. mendekoa da Élisabeth Jacquet de la Guerre, bere lan artistikoa Luis XIV.aren gortean burutu zuen frantziar konpositorea.

Beranduagokoak izan arren, gure ingurukoak izanagatik eta bere lana ia ezezaguna zaigulako interesgarriak gertatzen diren emakumeen musika ere izango da entzungai: esaterako, Mme. Mazarredok sinatuako Zortziko bat. Partitura hau Mª Antonia de Moyua y Mazarredo edo bere alabari egotzi zaie; XVII. eta XVIII mende arteko euskal burgesiako kideak biak, musika kultura oso errotua zuen gizarte bateko kideak, beraz. Egitaraua osotuz, Eresbilen gordetzen den Mª Josefa Marcoren eskuizkribu batetik ateratako Fandangoa.

Kontzertua goizeko 11etan hasiko da eta sarrerak (7€) www.euskadikoorkestra.eus eta www.kutxabank.es webguneetan eros daitezke, eta kontzertu egunean baita Orkestraren egoitzan ere, 10.30etatik aurrera. Halaber, gogorarazten dizuegu doako autobus zerbitzua dagoela egoitzara etortzeko, 10.25etan Gipuzkoa Plaza, 4tik atera eta Antso Jakituna, 18an eta Madrilgo Hiribidea, 34ean geldialdiak egiten dituelarik.

Larunbata honetan, hilak 31, Euskadiko Orkestraren egoitza Miramongo Matinéea berri bat izango da. Irene Echeveste biolinjotzaileak, Juan Ignacio Emme biolontxelojotzaileak (biak Euskadiko Orkestrako kideak) eta Javier Pérez de Azpeitia pianistak osatutako hirukotearen eskutik, emanaldi hau Astor Piazzolla argentinar konpositore eta bandoneonistari omenaldia bihurtuko da.

Cambalache, trukea, lunfardo izenez ezaguna den eta XX. mende hasieran tangoaren alorrean erabili ohi zen hizkeran, hori da kontzertu hau aurkezteko aukeratutako hitza. Izan ere, aukeratutako egitaraua Astor Piazzollaren eta beste konpositore batzuren musika-lanen arteko cambalachea baita, nolabait esateko. Batetik, Alberto Ginastera eta Carlos Guastavino, argentinarrak biak eta Piazzollaren belaunaldi berekoak; eta bestetik, Enrique Fernández Arbós eta Joaquín Turina, espainiarrak hauek eta aurreko belaunaldikoak.

Piazzollaren ekoizpenetik hautatuak, Milonga del ángel, La muerte del ángel eta Cuatro Estaciones Porteñas obrak izango dira entzungai; eta hauekin batera, Fernández Arbósen Tres piezas originales al estilo español, Turinaren "Círculo", Fantasía para violín y violonchelo; Ginasteraren Danzas argentinas para piano eta Guastavinoren "La rosa y el sauce".

Kontzertua goizeko 11etan hasiko da eta sarrerak (7€) www.euskadikoorkestra.eus eta www.kutxabank.es webguneetan eros daitezke, eta kontzertu egunean baita Orkestraren egoitzan ere, 10.30etatik aurrera. Halaber, gogorarazten dizuegu doako autobus zerbitzua dagoela egoitzara etortzeko, 10.25etan Gipuzkoa Plaza, 4tik atera eta Antso Jakituna, 18an eta Madrilgo Hiribidea, 34ean geldialdiak egiten dituelarik.

Oskar Tejedorren "NOTAS EN MOVIMIENTO" dokumentala Príncipe zinematan estreinatuko da urtarrilaren 30 ostiralean eta bertan ikusi ahalko da hurrengo egunetan ere. Dokumental honek S. Prokofieven "Errauskine" balleta 2013ko ekainan Euskadiko Orkestraren Abonu Denboraldian eta, ondoren, Versalleseko Opéra Royal antzokian aurkezteko nola prestatu zen islatzen du.

Malandain Ballet Biarritz eta Euskadiko Orkestra Sinfonikoak bat egin zuten musikari zein dantzarien bizitzen egunerokoa alderdi pertsonalenetik agertzen duen egitasmo hau gauzatzeko.

Príncipe Zinemak, urtarrilarn 30etaik Aurrera.

Frank Peter Zimmermannek "Euskadiko Orkestrarekin batera emozio mordoa" eskainiko duela hitz ematen du Orkestrarekin berrelkartzean. "Euskadiko Orkestrarekin jotzea nire familiartean egotea da ia", hitz hauekin ireki zuen Frank Peter Zimmermannek Euskadiko Orkestraren estreinako 25 urteetako historia biltzen duen eta 2006an plazaratu zen "Primo Tempo" liburuan jasotako bere ekarpena. Orain, "Berrelkartzeak" izenburudun denboraldi honetan, alemaniar biolinjotzaileak Orkestrarekin eszenatokia partekatuko du berriz ere. 14/15 Abonu Denboraldira itzuli den Carlo Rizzik zuzenduta, J. Sibeliusen Biolinerako kontzertua interpretatuko du. Abonu programa berri hau urtarrilaren 26 astelehenean abiatuko da Iruñeako Baluarte Auditorioan eta 27 eta 29 Donostiako Kursaalean jarraituko du eta 30ean amaituko da Gasteizko Principal Antzokian.

Sibeliusen Biolinerako kontzertua EOSekin bosgarren elkarlanerako. EOSren Abonu Denboraldiko bakarlari gonbidatu estreinakoz 2002an aritu ostean, Frank Peter Zimmermann (Duisburg, 1965) 2004, 2006 eta 2010 urteetan itzuli da gurera. Gilbert Varga, Cristian Mandeal eta Lawrence Rennesen zuzendaritzapean, Bartok, Mendelssohn, Brahms eta Dvoraken lanak interpretatu ditu Orkestrarekin batera. Oraingoan Jean Sibeliusen (1865-1957) Biolinerako kontzertua aurkeztuko du, Hannover, Bremen eta Kolonian interpretatu berri, laster Taipei, Seul eta Tokiora eramando duena. Duela gutxi Melbournen kontzertu hau interpretatu ostean argitaratutako kritikatako batek honela laburbildu zuen Zimmermannen lana: "Bere tonuaren indarrak eta bere interpretazioaren danda tristeak elurrak zuritutako eskandinaviar basoetan barrena garamatzate, etsi-etsian galdutako maitasunaren bila". Jean Sibeliusen lan onenatzat jotzen den partitura hau egun munduan gehien programatzen den biolinerako kontzertua dugu.

Jada ibilbide luze zein arrakastatsua egina duela, Frank Peter Zimmermann egungo biolinjotzailerik onenen artean kokatzen dute askok. Bakarlari gailen honen inguruan zera idatzi dute: "Dena irabazi du, dena grabatu du eta denekin jo du". Zimmermannek iraganean Fritz Kreislerrena izandako 1711ko Lady Inchiquin Stradivarius biolina jotzen du, Portigon AG erakundeari esker.

"Sibeliusen ahotsa" izenburudun programaren egitaraua finlandiar konpositorearen 5. Sinfoniak osotuko du. Sibelius diskurtso sinfonikoari bide berriak irekitzen murgilduta zegoen, eta ikerketa horren emaitza onenak agerian utzi zituen lan honek. Esku-egitaraua osotzen duten testuetan Mikel Chamizo konpositore eta kritikoak idatzitakoaren arabera, "1915 eta 1919 urte bitartean sarritan berrikusi zen sinfonia honetan, musikagile gisa bere ahots propioa bilatzen Sibeliusek egindako ahalegina islatzen da, izan ere, Debussyren, Stravinskyren edo Schoenbergen modernismoaren aurrerakuntzak ikusita, krisian zegoela uste zuen artistak".