Maiatzaren 9 larunbatean Opus 64 taldeak kontzertu goiztiar berri bat eskainiko du Miramongo Matinéetan. Ohi bezala, Euskadiko Orkestraren Miramongo egoitzan, 11:00etan. Opus 64 Euskadiko Orkestra Sinfonikoko haize-sekzioetako hainbat kidek osatzen dute eta larunbatean Pedro José Rodríguez pianista izango dute lankide.

Opus 64 taldeak larunbatean aurkezten duen egitarauak sextetoaren inguruko hiru bariazio proposatzen ditu. Batetik, Francis Poulenc eta Jean Françaix musikagile frantziarren paristar bizimodua islatzen duten bi sexteto, haize boskote eta pianorako idatziak; eta, bestetik, Leos Janacek txekiarrak haize boskote eta klarinete baxurako konposatutako pieza berezi bat; honetan, bere bizitzaren azken uneetan dagoela, Janacekek bere gaztaroa dakar gogora.

Kontzertu honek haize-instrumentuek eta hauentzako musikak XIX eta XX. mende biartean bizitako garapena jarriko du agerian. Haize instrumentuak XIX. mendean zehar teknikoki nabarmen hobetzearekin batera hauentzako sortutako errepertorioa asko aberastu zen. XX. mende hasieran, Maurice Ravel edo Claude Debussy konpositoreek tinbre hauek eskaintzen zizkieten aukerekin jokatu zuten, beren obra paleta kromatiko bereziaz jantzi zutelarik. Ondoren, Frantzian, eta baita Europa osoan, haien oinordekoak berrikuntza hauetaz baliatu ziren haize instrumentuetarako idatzitako musikaren historian ezinbesteko bihurtu diren partitura ederrak sortzeko.

OPUS 64 dira Hélène Billard, flauta; Pascal Laffont, oboea; Juan Navarro eta Stéphane Langlois, klarinete; Jean Luc Casteret, tronpa; François Proud, fagota; eta Pedro José Rodríguez, pianoa.

Aste honetan zehar eta datorrenaren astelehena bitartean, Euskadiko Orkestra Sinfonikoak Eskola Kontzertuak eskainiko ditu beste behin, oraingo honetan I. Stravinskyren Suzko Txoria obraren inguruko bi ekoizpen eskainiko dituelarik: SUZKO TXORIA eta STRAVINSKY EZAGUTU. Besteak beste, Eibar, Mendaro, Deba, Mutriku, Zumarraga, Legazpi, Urretxu, Beasain, Ordizia, Abaltzizketa, Hernani, Donostia eta Gasteizko eskola-haurrek, Stravinskyren musikarekin batera, Carmen Santonjak idatzi eta Belén Otxotorena aktoreak euskaraz kontatuko duen ipuina oinarri hartzen duen musikazko esperientzia biziko dute.

Suzko txoria musika eta ipuina erabat uztartzen dituen ekoizpen landua da. Ipuin tradizionalen elementuak erabiliz, irudimena lantzen eta garatzen laguntzen du gainera. Stravinsky ezagutu emanaldian, berriz, ikasleek Orkestraren atriletatik aurkeztuko dituzte Stravinskyren inguruan espreski prestaturiko lanak eta solasaldi bat izango dute Iker Sánchez zuzendariarekin.

Eskola Kontzertuen helburuak anitzak dira: orokorrean musikaren bidez alor ezberdinak lantzea, musikazko adierazpen artistikoa ezagutu eta balioetsi; sormen eta pentsamendu gaitasuna, sentimenduak, zentzua eta sentiberatasuna garatu, hautemate mailako garapen fisikoa sustatu, hotsak eskaintzen dituen aukerak aztertu, entzutea eta esku-hartzeko gogoa sustatu eta entzute molde egokia eta arduratsua garatu.

Kontzertua, lan prozesuaren azken urratsa. Aipatu arlo guztiak lantzeko garaian, kontzertua aurrez ikasgeletan hasitako lan-prozesuaren azken urratsa da. Jarduera horretan erabilgarri, Musika Gelak proiektu bakoitzaren inguruan espreski sortutako gida didaktikoa eta irakasleentzako tailerrak eskaintzen ditu osagarri gisa.

Eskola Kontzertuak otsailean abiatu ziren, Haur Hezkuntzako ikasleei (2-5 urte) zuzendutako Galdutako Musikaren Bila ikuskizunarekin. Orain Lehen Hezkuntza (6-12 urte) y eta Bigarren Hezkuntzako (12-16 urte) ikasleen txanda izango da, Suzko Txoria eta Stravinsky Ezagutu ikuskizunekin, hurrenez hurren. Ziklo hau Donostiako Udalaren Hezkuntza Atalaren eta Gipuzkoako Batzar Nagusien lankidetzarekin burutzen da.

Suzko Txoria ekoizpena Musika Familian zikloaren baitan ikusi eta entzuteko aukera izango da, halaber, maiatzaren 23an Donostiako Kursaalean eta maiatzaren 29an Gasteizko Principal Antzokian.

Apirilak 25 larunbatean goizeko emankizun berri bat izango da Euskadiko Orkestraren Miramongo egoitzan. XXI. mendeko oboerako musikaren euskarri izan ostean, historian barrena goaz Miramongo Matinéetan. Wolfgang Amadeus Mozart eta Benjamin Britten, biak ala biak mugarri dira oboe eta ganbera talderako errepertorioan, Dominik Quarteten eskutik.

Larunbatean entzungai izango den egitarauan aipagarriak dira Wolfgang Amadeus Mozarten Kuartetoa mi maiorrean eta Benjamin Brittenen Oboe eta hari triorako fantasia. 24 urterekin, Mozart Idomeneo operan ari zen lanean eta Munichera joan zen entseguak eta estreinaldia bertatik bertara jarraitzeko asmoz. Garai hartan, 1781. urtean, konposatu zuen Kuartetoa. Haize-zurarako obra ugari idatzi bazituen ere, oso musika gutxi sortu zuen oboerako. Oboe eta harirako kuartetoa kontzertu bat bailitzan oboeari gainjartzen uzten dion obra bikaina da.

Benjamin Brittenen musika ezin hobeto kontrajartzen zaio kuartetoari. Brittenek 19 urte besterik ez zituen entzungai izango den kuartetoa konposatu zuenean, Walter Wilson Cobbetek sortutako mugimendu bakarreko ganbera musikako lehiaketarako. Sonata eta fantasia musika-moldeak konbinatzen dituen pieza hau Londresen estreinatu zuten 1932. urtean Leon Goosensek eta International String Quartet taldeko kideek.

Egitaraua osatuz, entzungai izango da Malcolm Arnolden Oboerako kuartetoa; XX. mendeko bigarren erdiko konpositore britainiar hau ezagunagoa da zinerako idatzitako musikagatik, izan ere, Oscar saria merezi izan zuen Kwai ibaiaren gaineko zubia filmerako sortutako soinu-bandak. Eta azkenik, Mozarten Korno ingeles eta hari triorako adagioa.

Dominik Quartet osatzen duten musikariak dira Raquel Cortinas (biolina), Natacha Dupuy-Scordamaglia (biola) eta Beatriz Linares (biolontxeloa), hirurak Euskadiko Orkestra Sinfonikoko kideak, eta Miriam Olga Pastor (oboea eta korno ingelesa).

Apirilaren 24tik 30era bitartean, Euskadiko Orkestra Sinfonikoak bere Abonu Denboraldiari dagokion kontzertu-programa berri bat aurkeztuko du ohizko hiriburuetan. José Miguel Pérez-Sierrak zuzenduta, aipagarria da Angel Illarramendiren 9. Sinfoniaren erabateko estreinaldia. Egitaraua osatzeko, Jose Maria Usandizagaren jaiotzaren mendeurrenaren oroigarri berri bat (haren Cuarteto sobre temas populares vascos laneko Moderato) eta Antonin Dvoraken 7. Sinfonia. Apirilaren 24an Gasteizko Principal Antzokian, 27 eta 30ean Donostiako Kursaal Auditorioan, 28an Iruñeako Baluarte Auditorioan eta 29an Bilboko Euskalduna Jauregian.

Angel Illarramendi: estreinaldia eta diskoa. Beste behin euskal musika sustatu eta zabaltzea helburu harturik, Euskadiko Orkestra Sinfonikoak Angel Illarramendiren (Zarautz, 1958) 9. Sinfonia estreinatuko du. Gainera, estreinaldiaren ondoren, honen zuzeneko grabaketa eta estudioan jasotako Illarramendiren 4. Sinfonia, "Ingenua" bilduko dituen diskoa plazaratuko da. 4. Sinfonia duela aste batzuk grabatu zuen Orkestrak Miramongo bere egoitzan, José Miguel Pérez-Sierraren zuzendaritzapean. Illarramendi, zinerako idatzitako musikagatik ezaguna bada ere (besteak beste, Gracia Querejeta, Pedro Olea, Juan José Campanella edo Manuel Gutiérrez Aragón zuzendariekin egin du lan), ez du alde batera uzten kontzerturako musika. Euskadiko Orkestrak interpretatu dituen Angel Illarramendiren obren artean, 3. Sinfonia, "Harri zuria" (hau ere Karontek 2009an disko batean argitaratua), "Troaiarrak" edo "Una historia reciente" zinerako musikaz osatutako suitea.

2012an Euskadiko Orkestraren podiumean debuta egin zuenetik, José Miguel Pérez-Sierra maisuak hainbat alditan zuzendu du Orkestra, Abonu Denboraldian, Musique en Côte Basque jaialdian eta baita OLBE ren opera denboraldian ere.

Sarrerak 7 eurotik gora salgai. Kontzertu hauetarako, eta baita Abonu Denboraldiko gainerako kontzertuetarako sarrerak ere, www.euskadikoorkestra.eus webgunean, kontzertu aretoetako leihatilatan eta beste ohizko salmenta bideak erabiliz eros daitezke, 7 eurotik gora.

Gordan Nikolic biolinista serbiar entzutetsua, London Symphony Orchestran kontzertino, buru izango dugu, kontzertino-zuzendari modura, Musikenek Euskadiko Orkestra Sinfonikoarekin elkar lanean egiten duen Orkestra Ikasketa Masterreko orkestra errepertorio irakasgaiaren barruan hari orkestrarekin egingo den egitasmo batean. Hezkuntza, Kultura eta Kirol Ministerioak 2014ko ekainaren 2an homologatua, hari instrumentu jotzaileentzat lehenengo Masterra da Estatuan. Orkestra baten mundu profesionalean sartzeko heziketa espezializatua emateaz gain, praktika ordainduak jasotzen ditu Euskadiko Sinfonikoan. Izen-ematea zabalik egongo da maiatzaren 16 arte, sarrera probak ekainaren 15 eta 17a bitartean egingo dira eta matrikulazioa berriz, online, uztailean. 

Apirilaren 11 larunbatean, Miramongo Matinéeak bertako konpositoreen musika-sorkuntza berriaren zabalkunderako plataforma bilakaturik beste behin. Euskadiko Orkestra Sinfonikoaren egoitzan Gabriel Loidiren Oboe eta harirako kuarteoa, María Eugenia Lucen Luma galdu bat bezala eta Joaquín Ángel Lecumberriren ZAZPI BARIAZIOAK: Amodioa zein den zoroa izango dira entzungai estreinakoz. Guztiek oboea dute oinarri eta horietatik bi interprete ariko den Irauli Laukoteak egindako enkarguei erantzuten diete.

Gabriel Loidiren Oboe eta harirako kuartetoa 2012ko urtarrilan zendutako Juan Manuel González Lumbreras oboejotzaile handiari eskainita dago. Konpositoreak zera esan du bere obraren gain: "Idatzi nuen bitartean, hura hil baino urtebete lehenago, Juan Manuel beti izan nuen nire irudimenean. 2011ko udan telefonoz esan nion kuarteto bat idatzi niola eta ilusio handiz hartu zuen. Baina ez zen interpretatzera iritsi. Musikarako bizi izan zen gizon berezko, hipersentibera, begirada garbi eta espresio argitsudun horri nire omenaldia da honako hau. Bera bertan izate hutsak mundua hobetzen zuen. Juan Manuel González Lumbreras betirako izango da nire bihotzean".

Luma galdu bat bezala, Eusko Jaurlaritzaren laguntzaz sortua, Javier Lecumberri, Irauli laukoteko kideak Miramongo Matinéetan estreinatzeko asmoz egindako enkarguari erantzuten dio. María Eugenia Luc musikagilearen hitzetan, Joseba Sarrionaindiaren Sorterriko koplak poematik hartzen du izenburua: "... Isiltasuna abailtzen da luma galdu bat bezala..."; nostalgia, malenkonia eta edertasun biziko irudiz betetako poema honek iradokitu zidan obra hau. Musika lanak oboeak ematen dion bultzadan du oinarria, haizeak sorgindutako luma baten ibilbidea marrazten duelarik. Konposizio tratamendua oboearen materiala laukoteko instrumentu bakoitzean lantzean datza, horretarako simetria mota ezberdinak erabiliz".

Azkenik, ZAZPI BARIAZIOAK, hau ere larunbateko kontzerturako Irauliren enkarguz idatzia, Amodioa zoin den zoroa nafar kantu zaharretik sortutako zazpi musika-inpresio dira. Hala ere, haren haria azaldu beharrean, izenburua osatzen duten hitzen esanahai zabala du hizpide. Joaquín Ángel Lecumberriren hitzetan, "batez ere pertsonak maite ditugu, baina baita tokiak, ohiturak eta, orokorrean, gogora oroitzapen eta bizipen zoriontsuak dakarkizkigun oro ere. Maitasunaren bidez zoriontasuna bilatzeko egindako bidean bizitzak eragindako askotariko egoeratatik igarotzen gara, eta egoera hauetatik zerbait jasotzen da bariazio bakoitzean. Grinaz maite dugu eta grinaz egiten ditugu maitasunak bultzatutako erokeriak".

Irauli laukotea dira Javier Lecumberri (oboea), Ricardo Ruiz (biolina), Delphine Dupuy (biola) eta Gabriel Mesado (biolontxeloa). Guztiak Euskadiko Orkestra Sinfonikoko kideak dira.

Martxoaren 16tik maiatzaren 16ra zabalik dago Orkestra Ikasketen Master Ofizialerako izena emateko epea. Musikenek antolatutako, Aula Jordá Gela lankidetza hitzarmenaren baitan Euskadiko Orkestra Sinfonikoarekin lankidetzan, 2015-2016 ikasturtetik aurrera hogeita hamar hari instrumentistek Orkestra Ikasketen Irakaskuntza Artistikoa masterra (hari instrumentuak) egin ahal izango dute, lehenengoa eta bakarra, Hezkuntza, Kultura eta Kirol Ministerioak homologatua.

Master aitzindaria da, aktiboan dauden profesionalen tutoritzapean banakako eskolak eta kolektiboak uztartuz. Euskadiko Orkestra Sinfonikoarekin elkarlanean egingo den orkestra praktika ordaindua izango da eta orkestra bateko lan esparruan benetako prestaketa bermatzen du. Master honek, halaber, tituludunak gaituko ditu ondoren ikerketari lotutako ikasteka ofizialak egiteko.

Joan zen martxoaren 20an Cristina Uriarte, Eusko Jaurlaritzako Hezkuntza, Hizkuntza Politika eta Kultura sailburu eta Euskadiko Orkestraren presidenteak, Euskalerriaren Adiskideen Elkartearen presidente Juan Bautista Mendizabalen eskutik jaso zuen Orkestra erakunde honen Adiskide Kolektibo bilakatzen duen domina.

Aurten 250 urte betetzen dituen Euskalerriaren Adiskideen Elkarteak euskadiko Orkestrak euskal kultura sustatu eta zabaltzearen alde egindako ibilbidea aintzatetsi du honela. Orkestraz gain, Elkarteko adiskide kolektibo dira halaber Manuel Iradier Abesbatza, Donostiako Orfeoia, Donosti Ereski abesbatzako Schola Gregorianista eta Peñaflorida Kapera.

Martxoaren 21 larunbatean, Euskadiko Orkestra Sinfonikoaren egoitzan Miramongo Matinée berri bat izango da. Egitarauan, Jean Yves Daniel-Lesur eta Agustí Charles Solerrek sortutako erlijio musika garaikideko obrak, KEA Ahos Taldeak interpretatuak. KEA taldearekin batera ariko dira gainera Rennier Piñero (errezitatzailea), Elena Martínez de Murguía (viola da gamba), Robert Pajewski (viola d'amore) eta Ander Telleria (akordeoia).

Le Cantique des Cantiques partiturak, Jean Yves Daniel- Lesurek (1908-2002) 1952. urtean sortutakoak, honek André Jolivet eta Olivier Messiaenekin batera sortutako La Jeune France taldearen idealei erantzuten die: konposizio-molde gizatiarrago bat, ez hain abstraktua, berrezartzea, musikaren betiereko balio espiritualak berreskuratzea eta mistizismoaren eta ekiladeko joeradun erotismoaren bidez aberastea, alegia; zenbaitek neo-inpresionismo izena eman dio estetika honi.

Requiem de l'oubli (Ahaztearen requiema), Agustí Charles Solerrek (1960) KEA Ahots Taldearen enkarguz eta INAEMaren laguntzaz 2011an konposatua, 6 ahotsetarako abesbatza mistorako, viola de gamba, viola d'amore, akordeoi eta errezitatzaile batentzat dago idatzia. Testuak Lucreciorenak, Rilkerenak eta kristau requiemetik hartutakoak dira eta jarraitasunik gabe txandakatzen dira, ahotsen eta instrumentuen arteko etengabeko elkarrizketan.

KEA Ahots Taldea Tolosan sortu zen 1997an eta ordutik gaurdaino azken mendeko koru-musika hedatzeko lan garrantzitsu eta sendoa egin du, musikagile gazteen hamaika lan enkargatuz eta estreinatuz. Enrique Azurzak zuzentzen duen talde hau osatzen dutenak dira Ana Otxoa, Marije Ugalde, Miren Garikano, Isabel Lácar, Ainara Hernández, Mario Hernández, Xabier Barriola, Iñigo Vilas, Javier Alberdi, Josu López-Soraluze, Xabier Sarasola eta Pablo Azpeitia.

Kontzertua goizeko 11etan hasiko da eta sarrerak (7€) www.euskadikoorkestra.eus eta www.kutxabank.es webguneetan eros daitezke, eta kontzertu egunean baita Orkestraren egoitzan ere, 10.30etatik aurrera. Halaber, gogorarazten dizuegu doako autobus zerbitzua dagoela egoitzara etortzeko, 10.25etan Gipuzkoa Plaza, 4tik atera eta Antso Jakituna, 18an eta Madrilgo Hiribidea, 34ean geldialdiak egiten dituelarik.