Ahotsa berriz ere Miramongo Matinéeak zikloaren denboraldian. Apirilaren 13 larunbatean Federico García Lorca poeta ardatz izango duen errezital eskainiko dute Iñaki Fresán barítono nafarrak eta Juan Antonio Álvarez Parejo pianojotzaileak. Konpositore ezberdinek idazle handi honen ekoizpena oinarri harturik idatzitako kantuak interpretatuko dituzte "Federicoren mundua: hitza kantu" izenburudun kontzertuan.

Larunbateko Miramongo Matinéerako esku-egitarauan honela laburbiltzen da Euskadiko Orkestraren egoitzako auditorioan entzun ahal izango dena: "Asko dira Federico García Lorcaren (1989-1936) poesia pentagramara eraman duten konpositoreak. Entzungai izango den egitaraua horren adierazgarri da. Revueltas mexikarraren abestietatik hasi eta Miquel Ortegaren aukeratutako testuetara, Caamaño txiletarra, Salvador Moreno mexikarra eta García Leoz, Oltra eta García Abril ahaztu gabe. Guzti hauen obrek, Luis Antonio de Villenak esan bezala, berrogei urte eskasetan bere izena poesiaren izen garrantzitsuenen artean kokatu zuen poeta hobeto ezagutzen lagunduko digute".

Iñaki Fresán nazioarteko lehiaketa ezberdinetn saritu dute eta areto nabarmenetan ari izan da: Parisko Gaveau, Champs Elyseés eta Opera Komikoan, Niza eta Montpelliereko Operan, Gulbenkian eta San Carlo Lisboan, Konzerthaus Vienan, Queen Elisabeth Hall eta Barbican Hall Londresen, Zutabeen Aretoa Moskun, Riga eta San Petesburgoko Filarmonikak, Glocke aretoa Bremenen, Avenida Buenos Airesen, Nezahualkoyolt Mexiko DFen, Treviso, Lyon, Parma, Roma eta Regio Calabriako antzokietan eta abarretan. Santander, Granada, Peralada, Cadaqués edo Nafarroako jaialdietan, Bartzelonako Grec, Cuencako Aste Erlijiosoa edo Donostiako Musika Hamabostaldian aritu da. Sarriki aritzen da orkestra sinfonikoekin lankidetzan eta Claves, Melodía, Harmonía Mundi, Auvidis eta Elkar disko etxeentzat egin ditu grabaketak..

Juan Antonio Álvarez Parejok 1980an egin zuen debuta Teresa Berganza mezzosopranoarekin, Valentziako Principal Antzokian. Ordutik haren pianista laguntzaile bilakatu eta elkarrekin aritu dira munduko auditorio eta antzoki garrantzitsuenetan: Carnegie Hall, Covent Garden eta Albert Hall Londresen; Scala Milanon, Musikverein eta Konzerthaus Vienan, Concertgebouw Amsterdamen, La Fenice Venezian, Champs Elysées, Salle Pleyel eta Opera Parisen, Teatro Real Madrilen, Bartzelonako Liceu, Colón Buenos Airesen, eta abar. Beste hainbat kantari espainiar zein atzerrikoekin egin du lan eta lirikan etorkizun handiko interprete gazteekin aritzen da. Ganbera musikari dagokionez, duoan aritu da, besteak beste, Víctor Martín, Wladimiro Martín, Juan Llinares, José Antonio Campos eta Víctor Ambroarekin.

Iñaki Fresán eta Juan Antonio Álvarez Parejok Buenos Aires, Jerusalén eta espainiar hiri ezberdinetan eskaini diutzte errezitalak, kritika zein entzulegoaren aldetik arrakasta handia lortu dutelarik. Bereziki aipagarria da Madrilgo Auditorioan Schuberten "Schwanengesang" zikloaren interpretazioak izandako harrera bikaina.

Apirilaren 11 eta 12an Euskadiko Orkestra Sinfonikoak kontzertu bana eskainiko du Bordeleko Auditorioan, Orchestre National Bordeaux Aquitaine orkestraren denboraldiaren baitan, elkartruke berri bat eginez. Euskadiko Orkestra ireki berri den Bordeleko Auditorioko eszenatokian ariko den lehenbiziko orkestra atzerritarra izango da honela. Carlo Rizzi maisuaren zuzendaritzapean, Orkestrak Luis Fernando Pérez pianojotzailea izango du lagun Bordelen. Orkestra interprete honekin lankidetzan aritzen den estreinako aldia da. Orkestrak Bordelera eramango duen egitarauak Guridi, Bizet eta Fallaren lanak biltzen ditu, azken honena Mirare disko etxeak zuzenean grabatuko duelarik. Aurrez, partitura sorta hau apirilaren 9an Gasteizen eta 10ean Bilbon aurkeztuko da, Abonu Denboraldiko 11. programaren barnean. Kontzertu hauek ere Carlo Rizzi italiarrak zuzenduko ditu eta Luis Fernando Pérez izango da bakarlari gonbidatu.

Elkartruke politika, kultura elkartrukea. Euskal kultura munduan zehar zabaltzea xedetzat harturik, Schleswig-Holstein edo Mozarteum Brasileiro bezalako jaialdi zein ziklo gailenen gonbidapenei erantzuteaz gain, beste orkestrekin elkartrukeek ezinbesteko garrantzia izan dute Euskadiko Orkestraren ibilbidean. Bi noranzkoko politika honek modu bikoitzean zabaldu du Orkestraren ikuspegi artistikoa, izan ere, batetik, urruneko eszenatoki eta entzulegoengana hurbildu eta, bestetik, bere Abonu Denboraldiko eszenatokietara beste orkestra sinfonikoen musika erakarri baitu. Nazioarte mailan, elkartruke politika honek Euskadiko Orkestrak Orchestre National Bordeaux Aquitaine orkestrarekin duen harremanean izan zuen jatorria eta ondoren garatuz joan zen: 2009an Orkestrak Italian barrena bira bat egin zuen Orchestra Sinfonica di Milano Giussepe Verdi orkestrarekin elkartrukean eta 2011. urtean Alemanian hainbat kontzertu eskaini zuen Düsseldorfer Symphoniker orkestraren eskutik.

Euskadiko Orkestra sei bider Bordelen. Bordeletik mundura. 1984. urtean Bordele Euskadiko Orkestra Sinfonikoaren nazioarte mailako lehenbiziko helmuga bilakatu zen. Sortu zenetik, munduan zehar euskal kulturaren enbaxadore izatea bereziki nabarmendu da Orkestraren helburuen artean. Lehenengo irteera horren ondoren, akitaniar hiriburura hainbat alditan itzultzeaz gain, bere hogeita hamaika urteetan Orkestrak hamalau nazioarteko bira burutu ditu: Europan Alemania, Austria, Suitza, Frantzia, Britainia Handia eta Italiako aretoetan eta Amerikan Argentina, Txile eta Brasilgo aretoetan aritu da Euskadiko Orkestra; horien artean, Vienako Konzerthaus, Municheko Herkulesaal, Berlingo Konzerthaus, Zuricheko Tonhalle, Sala Sao Paulo, Auditorium di Milano, Buenos Aireseko Teatro Colón eta abar. Ehun bat kontzertu izan dira, milaka kilometro Orkestraren musika eta garai guztietako euskal sortzaileen ekoizpena ezagutzera emateko asmoz egindakoak. Horiei esker, alde batetik europar musika zirkuituan eta, bestetik, Atlantikoaz bestaldeko euskal komunitatearekin harremanak estutuz, latinoamerikar eremuan kokatu gara. 

Martxoaren 23 larunbatean Kaabestri taldea, ia bere osotasunean Euskadiko Orkestrako kideek osatua, Miramongo Matinéeak zikloan ariko da berriz ere. Ziklo honetan jarduten den hirugarren aldia izango da. Estreinako aldian John Coriglianoren "Biolin Gorria" estreinatu zuten Espainia mailan eta 2012an, "Battalia" izenburupean, XVII eta XVIII. mendeetako musika eskaini zuten. Oraingoan "La Notte" aurkezten dute. Emanaldi honetan Kaabestri taldeak herrialde eta aro ezberdinetan barrena bidaia egingo du egunotan Euskadiko Orkestra Sinfonikoaren abonu programan kontzertino gonbidatu Andoni Mercero ezinbesteko gidari duela.

Kontzertuak italiar barroko berantiarrean izango du abiapuntua, "il Prete Rosso" ezizenez ezagun Antonio Vivaldik, kontzertuaren garapenean funtsezkoa izanik, lau biolin bakarlarirako sortutako kontzertuarekin, alegia. Ondoren, Francesco Durante, tradizio barrokoa eta veneziar maisuen estilo berria batzen dituen napolitar eskolaren sortzailearen obra bat. Hamburgen, aldiz, preklasizismoko arketipo batekin egingo dugu topo, barrokoaren eta klasizismoaren artean kokatzen den sinfonia bat izango da entzungai. Honen egilea, Carl Philipp Emmanuel Bach, Johann Sebastian Bachen semea, Telemannen semebitxia, Haydn, Mozart eta Beethovenek mirestu zuten musikagile ezaguna. Bidaia Austrian amaituko da, musikazko pieza ezberdin batekin: serenata. Sortzailea, Mozart, klasizismoan funtsezkoa izan zen konpositorea, eta nola ez, musikaren historian ere ezin baztertukoa.

Andoni Mercerok (Donostia, 1974) biola zein biolin interprete gisa garatu du bere ibilbide profesionala. Besteak beste Pablo Sarasate Nazioarteko Biolin Lehiaketako irabazle, ganbera musikaren alorrean Trío Alzugaray, Ensemble Pandora, Musica Ficta, Pasamezzo Antico edo Cuarteto Casals taldeekin aritu da. Bakarlari gisa, Camerata Strumentale di Prato eta Mantuako (Italia) Ganbera Orkestrarekin ari izan da Brasil, Chile, Argentina, Italia eta Albanian. Kontzertino bezala, berriz, Sevillako Orkestra Barrokoaren eta Al Aire Español taldearen lankide da eta Oviedoko Operak eta Euskadiko Orkestrak gonbidatu dute. Azken honekin ari da egunotan, Donostia eta Gasteizen kontzertuak eskainiz. Hiru urtetan Granada Hiria Orkestrako biola bakarlari, Milango Giuseppe Verdi Orkestra Sinfonikoa, RTVE eta OBC orkestrekin aritu da gonbidatu gisa. Halaber, hari-laukote irakaslea da Musikenen.

Martxoaren 20 eta 21ean Donostian eta 22an Gasteizen, Euskadiko Orkestra Sinfonikoa Joana Carneiro zuzendari portugaldarren gidaritzapean ariko da Abonu Denboraldiko 10. programan. Kontzertu hauetan Rafal Blechacz pianojotzailea izango da bakarlari estreinakoz, eta Isabel Mundry alemaniarraren "Calles y Sueños" partituraren erabateko estreinaldia izango da, Tesela proiektuko azkena.

"Calles y Sueños", Tesela ekimenaren baitako azken erabateko estreinaldia. Euskadiko Orkestrak 2012an bere 30. urteurrena betetzearekin abian jarritako Tesela egitasmoa gauzatu da jada: Isabel Mundryk (Schlüchtern, 1963) Orkestraren eskariz sortutako "Calles y Sueños" obraren erabateko estreinaldiarekin osotzen da 2011/2012 denboraldian abiatutako estreinaldi-sorta. Orkestrak egungo sormenarekiko duen konpromezuaren erakusle, 2011/2012 eta 2012/02013 denboraldietan guztira zortzi obra labur estreinatu dira, EOSek berak eskatuta nazioarte mailako ospea duten konpositoreek euskal kultura oinarri harturik sortuak. Horien artean, Ivan Fedeleren "Txalaparta" eta Peter Eötvosen "The Gliding of the Eagle in the Skies" partiturak nazioarte mailan hedatzen hasiak dira gainera, bata Orchestra Sinfonica Nazionale della RAI eta bestea Orchestre National Bordeuax Aquitaine orkestrek interpretatu baidituzte jada. Obra guztien estreinaldiak grabatu egin dira eta laister diska batean bilduta emango dira argitara. "Tesela" gauzatzeko ezinbestekoa izan da BBVA Fundazioaren lankidetza esklusiboa.

Rafal Blechacz pianojotzaileari (Naklo nad Notecia, Polonia, 1985) 2005ean Varsoviako 15. Frédéric Chopin Nazioarteko Lehiaketa irabazteak munduko areto garrantzitsuenen ateak ireki zizkion: Royal Festival Hall eta Wigmore Hall Londresen, Philharmonie Berlinen, Herkulessaal Munichen, Liederhalle Stuttgarten, Konzerthaus Vienan, Tonhalle Zurichen, Concertgebouw Amsterdamen, Pariseko Salle Pleyel, Avery Fisher Hall New Yorken. Nazioarte mailako orkestra gailenekin aritu da Gergiev, Pletnev edo Dutoit-en zuzendaritzapean. 2006tik Deutsche Gramophone-entzat grabatzen du esklusiban. EOSekin batera Beethovenen Pianorako 2. kontzertua interpretatuko du.

Joana Carneiro (Lisboa, 1976), Berkeley Symphony Orchestrako musika zuzendari eta Gulbenkian Orchestrako zuzendari gonbidatu ofiziala, bigarren aldiz ariko da Euskadiko Orkestraren Abonu Denboraldian. Aurrez, 2010eko urrian 2010/2011 denboraldia ireki zuen. Besteak beste zuzendari gonbidatu gisa Pariseko Ensemble Orchestral, London Philharmonic Orchestra Norkopping Symphony, Prague Philharmonia, Fenice antzokiko orkestra, Indianápolis, Los Angeles, New World Symphony eta abarrekin aritu da.

DONOSTIAutism Fundación Policlínica Gipuzkoa Fundazioaren ekimenak maiatzean Donostian izango den International Meeting for Autism Research (IMFAR) topaketen inguruan antolatutako jardueren baitan, martxoaren 19an, arratsaldez, FEVAS-en barne Gautena, Gipuzkoako autismoaren elkarteko kide, familiarteko eta lagunek EOSen egoitzara bisitaldia egingo dute, Beethovenen Seigarren Sinfonia entzuteko aukera izango dutelarik. Orkestrak bere Abonu Denboraldiko 10. programaren barnean interpretatuko du obra hau, Joana Carneirok zuzenduta, hilaren 20 eta 21ean Donostiako Kursaalean eta 22an Gasteizko Principalean.

Ondoren, IMFARen hasieran, maiatzaren 1ean, Orkestra autismoaren ikerketaren inguruko mundu mailako kongresuaren inaugurazio kontzertuan ariko da Kursaalean. Musika adimen ezintasuna dutenei hurbiltzeko ahaleginean, Euskadiko Orkestrak

2009.etik dihardu FEVAS, Adimen Ezintasuna dutenen aldeko Elkarteen Euskal Federazioarekin lanean. Orkestraren Musika Gelak denboraldiro tailer zein jarduera ezberdinak burutzen ditu.

Martxoaren 15 ostiralean Euskadiko Orkestra Sinfonikoa Iruñako Baluarte Auditoriora itzuliko da, bere Abonu Denboraldiko 9. programa osatzen duen kontzertu bakarra eskaintzeko. Orkestrarekin batera ariko dira gonbidatu Ilyich Rivas zuzendaria, lehenbiziko aldiz espainiar estatuan, eta Ana María Valderrama biolinjotzailea. Hauen gaztetasun, grina eta talentua nabarmenak dira: bien adinak batuta ozta-ozta heltzen dira berrogeita hamar urtetara, baina lehenak Londresko Orkestra Filarmoniko ospetsuaren zuzendari laguntzaile gisa debuta egindo du denboraldi honetan eta bigarrena Pablo Sarasate Nazioarteko Biolin Lehiaketa irabazi duen lenebiziko biolinjotzaile espainiarra dugu, berriz ere Iruñan ariko dena. Biak ala biak estreinakoz ariko dira Euskadiko Orkestarekin batera.

Ilyich Rivas venezuelarra Euskadiko Orkestraren podiumera zuzendari gonbidatu gisa igoko da, espainiar estatuan eskainiko duen lehenbiziko kontzertuan. Zuzendari gazte honek Londresko Orkestra Filarmonikoan zuzendari laguntzaile gisa debuta egingo du denboraldi honetan, Vladmir Jurowskiren aginduetara. Arrakastaz betetako ibilbidean mugarri berri bat izango da. Izan ere, hogei urterekin Baltimore eta Atlantako orkestra sinfonikoak edo Youth Orchestra of Americas eta Stuttgarteko Irratiko Orkestra, Lucernako Orkestra Sinfonikoa, Royal Philharmonic Orchestra eta Stockholmeko Orkestra Filarmonikoa zuzendu ditu, besteak beste. Gainera, Marin Alsopen ikasle izandako Ilyich Rivasek Suediako Irratiko Orkestra eta Frankfurteko Irratiko Orkestra Sinfonikoa zuzenduko ditu laister estreinakoz.

Ana María Valderrama biolinjotzaile madrildarrak Zubin Mehta maisuaren zuzendaritzapean egin zuen debuta 2008an eta ordutik nazioarte mailako bakarlari gazte gailenen artean kokatu da. 2011an XI. Pablo Sarasate Nazioarteko Biolin Lehiaketan sari nagusia eta publikoaren sari berezia merezi izan zituen, lehiaketa ospetsu hau irabazi duen lehenbiziko biolinjotzaile espainiarra izan delarik. Bakarlari gisa nazioarte mailan Ingalaterra, Alemania, Frantzia, Portugal, Errusia, Mexiko, Kolonbia eta Estatu Batuetan aritu da eta lagun izan dituen orkestren artean RTVEko Orkestra Sinfonikoa, Gaztela eta León eta Nafarroakoa, St. Petersbourg's Academic Symphony Orchestra, Novosibirskeko Orkestra, Nottingham Symphony Orchestra, Niederbayerischen Philharmonie, Sinfónica del Vallés edo Filarmónica de Medellín daude, Ros Marbá, Salvador Brotons, Alejandro Posada, Yuki Kakiuchi edo Max Valdések zuzenduta.

Euskadiko Orkestrarekin batera Ana María Valderramak Iruñako Baluarten Camille Saint-Saënsek Pablo Sarasate nafarrari eskainitako Biolin eta orkestrarako 3. kontzertua interpretatuko du. Mendelssohnenarekin parekotasunak dituen partitura honek pasarte liriko eder luzeak ditu, trebezia erakusteko aproposak, baina frantziarrek espainiar izaerarekiko zuten ideiari erantzuten dioten pasiozko suminaldiak tartekatzen dira. Gainera, egitaraua osotuz, kontzertuaren atarikoan Orkestrak Dvoráken Barizio Sinfonikoak interpretatuko ditu lehenbiziko aldiz, Elgarren Enigma Bariazioak eta Brahmsen Haydnen gai baten gaineko bariazioekin batera orkestra-errepertorioko nabarmenenak. Eta bigarren zatian Shostakovitchen 1. Sinfonia izango da entzungai. Oraingoan ere gaztetasuna izpide: konpositoreak hemezortzi urte besterik ez zituen heldutasun eta iaiotasun tekniko handia islatzen dituen obra hau sortu zuenean (sinfonia honekin eskuratu zuen konposizio gradua Petrogradoko Kontserbatorioan, Glazunoven babespean).

Euskadiko Orkestraren Musika Gelak, Donostian Kursaal Fundazioarekin eta Gasteizen bertako Udalarekin lankidetzan, "Arratsalde on, Swing" familiarteko kontzertua aurkezten du. Musikenekin lankidetzan, Euskal Herriko Goi Mailako Musika Ikastegiko Jazz Departamenduko ikasleek New Orleansen, Estatu Batuetan sortutako musika-genero berezi hau modu entretenigarri eta pedagogikoan emango digute ezagutzera. Sei urtetik gorako hauerrentzat diseinatua, kontzertuak Scott Joplin, Glen Miller edo Charlie Parker-en musika edo Harriketarren soinu banda ezaguna bilduko ditu, besteak beste. Swingez betetako notak, betiere, jazzarekiko grina duten musikari gazteek interpretatuak. Nor hauek baino hobeto grina hori haurtxoei helarazteko? Bluesa, erritmoa, ragtime-a, inprobisazioa eta, noski, swing-aren inguruan ariko zaizkigu. Swing-a zer den? Jolas egitea, musikarekin, notekin, kortxeekin, puntilloekin eta abarrekin jolas egitea. Eta hori da "Arratsalde on, Swing" kontzertuaren helburua: musikarekin jolas eginez jazzaren xarma geureganatzen laguntzea, alegia.

Kontzertuaren aurretik, Sentsibilizazio Tailerra. Kontzertu bakoitzaren aurretik, Ana Eguizabal biolontxelojoleak zuzenduta, Sentsibilizazio Tailerra izango da. Jarduera honetan ondoren kontzertuan entzungai izango diren doinuak landuko dira, entzumen aktiboaren bidez. Tailerrak doakoak dira "Arratsalde on, Swing" kontzerturako sarrera dutenentzat, baina aurrez izena eman behar da, Donostiako kontzertuaren aurretiko tailerrerako 943 00 31 80 telefonora dei eginez eta Gasteizko kontzertuaren aurreko tailerrerako izen emateko, berriz, 945 16 10 45 telefonora.

Sarrerak salgai. Martxoaren 9 larunbatean Kursaaleko ganbera aretoan izango den kontzerturako sarrerak Kursaaleko leihatilan (EOS edo Kursaal Fundazioaren emankizun egunetan) eta www.kutxasarrerak.net webgunean eros daitezke. Martxoaren 10ean Gasteizko Principal Antzokian izango den kontzerturako sarrerak antzokiko leihatilan bertan, Udaleko teléfono zerbitzuan (945 16 10 45) edo www.vitoria-gasteiz.org/teatros eta http://entradas.cajavital.es webguneetan eros daitezke.

Martxoaren 9 larunbatean Miramongo Matinéeak zikloan gaurtik salgai dagoen "Begirada bi- dos miradas" diskaren zuzeneko aurkezpena izango da. Euskal errepertorio herrikoiaren zati, oso ezagunak hainbat kanturen berrirakurketa proposatzen duen diska hau duela hilabete batzuk Miramonen, Orkestraren egoitzako Auditorioan bertan grabatu zuten Ainhoa Zubillaga mezzoak, Olatz Saitua sopranoak eta Iñaki Salvador pianojoleak. Orain eszenatoki hori bera aukeratu dute grabaketa haren emaitza entzulegoari ezagutzera emateko.

1971. urtean Donostiako Aurrezki Kutxa Munizipalak "Donostiko kantu zarrak" liburua argitaratu zuen, Tomás Garbizuk harmonizatu eta Jesús María Arozamenak glosa literarioz osatutako partituratan gauzatutako kantu herrikoi ezagunen bilduma. Garbizuk ahots eta pianorako egindako moldaketa hauek dira "Betiko kantak - Canciones de siempre" proposamenaren jatorrizko ideiaren oinarria. Olatz Saitua, Ainhoa Zubillaga eta Iñaki Salvadorren lana bultzada horretatik sortua da, baina hiru musikariek urrats bat haratago joan nahi izan dute. Doinu hauetariko askoren inguruan Salvadorrek egindako moldaketa berri eta berezkoek Garbizuren jatorrizko lana osatu eta osotzen dute, kantu herrikoien gaineko bi begirada elkarbizitzan, beraz. Berrirakurketa honetan euskal kantu herrikoia, musika klasikoa eta jazza uztartzen dira.

Saitua, Zubillaga eta Salvadorren erronka berri honen emaitza jaso duen "Begirada bi - dos miradas" diska Kutxaren babesarekin plazaratu da gaur bertan. Komunikabideen aurrean atzo aurkeztu ostean, zuzenean entzuteko aukera larunbatean izango da, Miramongo Matinéeak zikloaren baitan. Hauek dira biziberrituta entzungai izango diren kantak: Kaia barrenian, Ilargi eder, Donostiako hiru damatxo, Gabonetan, Mari Domingi, Pello Joxepe, Habanera del Guría, Goizeko izarra, Haurtxo txikia, Loa, loa, Beltzarana, Aitak semeari, Itsasoa laino dago, Ume eder bat, Petra txardin saltzailea, Zure besoetan, Idiarena eta Ilunabarra.

Kontzertua goizeko 11etan hasiko da eta sarrerak www.kutxasarrerak.net bidez eros daitezke, eta kontzertu egunean baita Orkestraren egoitzan ere, 10.30etatik aurrera. Halaber, gogorarazten dizuegu doako autobus zerbitzua dagoela egoitzara etortzeko, 10.25etan Gipuzkoa Plaza, 4tik atera eta Antso Jakituna, 18an eta Madrilgo Hiribidea, 34ean geldialdiak egiten dituelarik.

Andrés Orozco-Estrada hr-Sinfonieorchester Frankfurteko Irratiko Orkestra Sinfonikoaren musika zuzendari izango da 2014/2015 denboralditik aurrera.

1929an sortutako alemaniar orkestra honekin 2017/2018 denboraldira bitartean lotuta, Andrés Orozco-Estradak bere aurretik zazpi urtez hr-Sinfonieorchester delakoaren zuzendari izandako Paavo Jarvik finkatutako bideari jarraituko dio. Jarvik nabarmen garatu du orkestrak nazioarte mailan zuen oihartzuna. Musika zuzendari gisa lehenbiziko kontzertua 2014ko abuztuan zuzenduko du. Aurrez, 2013/2014 denboraldian zuzendari gonbidatu ariko da.

Izendapen hau Orozco-Estrada 2014/2015 denboralditik aurrera Houston Symphony estatubatuar orkestraren musika zuzendari gisa aurkeztu eta aste gutxira heldu da.

DONOSTIAutism IMFAR kongresuaren inguruan antolatu diren ekitaldiak aurkeztu dira gaur. Ekitaldi horien artean, Euskadiko Orkestraren eskuartzea bi jardueratan gauzatuko da. Batetik martxoaren 19an Orkestraren egoitzan autismoa duten haur eta helduekin nahiz haien senide eta lagunekin egindako entsegu berezia izango da eta, maiatzaren 1ean, berriz, Euskadiko Orkestrak kontzertu berezia eskainiko du, International Meeting for Autism Research maiatzaren 2tik 4ra Donostian egingo den topaketari harrera egiteko.

Nazioarte mailako topaketa hau maiatzaren 1ean aurkeztuko da mundura, aldi berean Donostia eta New Yorketik zabalduko den ekitaldian. IMFAR urtero egiten den topaketa bat da eta kontinente guztietako ehunka ikertzaile bertaratu ohi dira. Aurten, lehenengoz, Europa kontinentalean garatuko da eta ingelesa hitz egiten ez den herrialde batean. 2008. urtean soilik ospatu zen Ipar Amerikatik at. Orduan Londresen garatu zen. Horrenbestez, Donostia leku historikoa izango da, autismoaren ikerketan "munduko gailurtzat" jo ohi diren zientzia-ekitaldi garrantzitsu horiekin lotuta.

Donostiako Udalean izandako aurkezpenean izan dira Juan Karlos Izagirre, Donostiako alkatea, Txelo Perez, Mendekotasun Arretarako zuzendaria, Iñigo Pombo, Eusko Jaurlaritzako Gizarte Gaietako kontseilariordea, Joaquin Fuentes, IMFAReko presidentea eta Gipuzkoako Poliklinika Fundazioko idazkaria, Juan Cid, Gautenako presidentea, Iñigo Alberdi, Euskadiko Orkestra Sinfonikoko zuzendari nagusia, Carlos Ruiz, Kutxako Gizarte Ekintzako zuzendaria, Josu Ruiz, Kirola, Garapen Ekonomikoa eta Sustapeneko zinegotzia, eta Manu Narvaez Donostia Turismoko zuzendari nagusia.