Bihar asteartea, hilak 30, Donostiako Kursaalean abiatuko da Euskadiko Orkestraren 3. Abonu-programa. IX. Cadaquéseko Nazioarteko Lehiaketako irabazle eta Tenerifeko Orkestra Sinfonikoaren zuzendari titular eta artistiko Michal Nesterowicz-ek zuzenduta, Orkestrak erabateko estreinaldi berri bat burutuko du: Ekaitza, biolontxelo eta orkestrarako kontzertua. Partitura hau EOSek bere 30. urteurrena ospatzeko egindako enkarguari erantzunez sortu du Gabriel Erkorekak. Estreinaldi honetan Orkestrak nazioarte mailako ospea duen Asier Polo biolontxelojolea izango du lankide bakarlari gonbidatu gisa. Kontzertuak izango dira urriaren 30ean eta azaroaren 2an Donostiako Kursaalean, 31ean Gasteizko Principalean eta 1ean Bilboko Euskaldunan.

Ekaitzak, etenik gabe loturiko hiru ataletan banatuta, orkestra eta instrumentu bakarlariaren muturrezko erregistroen erabileran sakontzen du, erregistro baxuenean batez ere, Erkorekaren aburuz "naturalena dena biolontxeloan". Instrumentua orkestra-egituran murgildu edo bertatik aldenduko da etengabe, agitazio-gradu ezberdinetan. "Honela, tentsio-harreman bat sortzen da, non orkestra eraso- eta erresonantzia-efektu ezberdinak luzatu eta aurreratzen dituen erresonantzia-kutxa erraldoia bilakatzen den", dio bilbotar musikagileak. Asier Polo biolontxelo-jolearekin batera estuki lan egin zuen Erkorekak Ekaitza idazteko. Berari eskaini dio lana, "bere interpretazio-gaitasun bikainak bereziki aintzat hartuz".

Kontzertu hauetako egitaraua osotuz, lehendabizi Benjamin Brittenen Lau Itsaso Interludioak izango dira entzungai. 1945ean sortua, genero lirikoko maisulan handi honek nazioarte mailako sona eman zion bere bere egileari. Orkestra-suiteko formako Lau Itsas Interludioek itsasoak Peter Grimesen dituen parte-hartze sinfoniko nagusienetako lau islatzen dituzte. Jada bigarren zatian, britainiar errepertorioko obra ezagunenetakoa den Enigma Variations interpretatuko du Orkestrak. Hauetan Edward Elgarrek bere lagunen musikazko erretratua burutu zuen: Jatorrizko doinuaren ondorengo hamalau bariazioek lagun horien izaera edo lanaren alderdi zehatzak islatzen dituzte. Guztia Euskadiko Orkestraren Abonu Denboraldian bigarren aldiz ariko den Michal Nesterowiczen zuzendaritzapean.

Abono Denboraldirako sarrerak izango dira. Donostian, Gasteizen, Iruñean eta Bilbon ospatuko diren kontzertuetarako. Facebook-en Euskadiko Orkestra Sinfonikoaren laguna egin, eta kontzertu guztien informazioa izateaz gain, proposatzen dizkizuegun ideiatan parte hartu zuen iritzia emanaz. Honela zuek aukeratzen duzuen kontzertuaren bi sarrera irabazi ditzakezue.

Lehen zozketa honako hau dugu: Azaroan 9an Donostiako edo azaroak 10ean Bilboko kontzertuetarako sarrerak nahi dituzue? "Zer da Euskadiko Orkestra Sinfonikoa zuretzat?" Zure eritzia eman eta esaldi hauen artean bi sarrera zozketatuko ditugu. Anima zaitez!!

Facebookeko gure helbidea: 
https://www.facebook.com/EuskadikoOrkestra?ref=hl

Euskadiko Orkestra Sinfonikoak jakinarazten du datorren abendurako aurreikusitako KlasikAT kontzertu sorta urtebete beranduago izango dela, hau da, 2013. urteko abenduan. KEN ZAZPI euskal rock taldearekin egindako fusioan oinarrituta, konpaktu baten grabaketa eta Gasteiz, Bilbo, Donostia eta Iruñan kontzertu bana biltzen dituen KlasikAT proiektu honen datak atzeratu egin ditu Euskadiko Orkestrak. Oso ezberdinak diren bi estilo konplexuki uztartzen dituen ekimen berri honen tamaina dela-eta 2013ko abendura arte atzeratzeko erabakia hartu da.

Urriaren 24 asteazkenean Euskadiko Orkestra Donostiako Orfeoiak urtero bere adiskideei eskaintzen dien kontzertuan ariko da. Orfeoiaren zuzendari José Antonio Sainz Alfarok zuzenduta, Beethovenen Bederatzigarren Sinfonia interpretatuko dute. Kursaal Auditorioan izango da, arratseko 20:00etatik aurrera.

Kontzertu honetan Orfeoiak ateak ireki dizkie Euskal Autonomia Erkidego osoko abeslariei, Euskal Herriko Abesbatzen Elkartearen bidez egindako gonbidapenaren bidez. 350 ahots biltzea espero da, Orfeoi Txiki eta Orfeoi Gazteko haur eta gaztetxoenak barne. Gainera bakarlari ariko dira Elena Barbé (sopranoa), Ainhoa Zubillaga (mezzosopranoa), Antonio Vázquez (tenorea) eta Elías Benito Arranz (baxua).

Apurka apurka Euskadiko Orkestrako Musika Gela ari da denboraldi berriko jardueren antolaketa amaitzen. Motorrak berotzen joateko, ireki da jada "Neguko menua" izenburupean abenduaren 11 eta 14a bitartean izango diren Eskola-haurrentzako Kontzertuetara joateko izena emateko epea eta baita 2012/2013 ikasturte honetan zehar publikoari irekiko diren Entsegu Orokorrerako izena emateko epea ere.

Euskadiko Orkestra Sinfonikoaren Musika Gelak Donostiako Udaleko Hezkuntza Atalaren lankidetzarekin antolatzen dituen IV. Eskola-haurrentzako Kontzertuetan, "NEGUKO MENUA" izenburudun kontzertu sinfonikoa proposatzen dizuegu. Kontzertu hau Lehen Hezkuntzako ikasleei zuzenduta dago eta izaera ludikoa du, musikaren eta gure ikaslegoari oso gertuko zaion beste arte baten, hau da, gastronomiaren ezaugarrien arteko kidetasun zein antzekotasunekin jolastuko du. Eskola haurrentzako Kontzertu honetara bertaratu nahi duten ikastetxeek Donostiako Udalaren Hezkuntza Sailaren bidez eman behar dute izena azaroaren 9a baino lehen (tel: 943 48 14 02; e-mail: hezkuntza_educacion@donostia.org, www.donostiahezkuntza.org). Eskola haurrentzako Kontzertuetara joateko, ezinbesteko baldintza izango da ikastetxeko musika-irakaslea 2012ko azaroaren 12 ostiralean 12.30etan Orkestraren egoitzan izango den Irakasleentzako Tailerrera bertaratzea. Ikasle bakoitzeko prezioa 3 € izango da.

Taldeen Bisitak eta Publikoari Irekitako Entsegu Orokorrak ikasle-taldeei eta bestelako taldeei zuzentzen zaizkie, doain betiere. Jarduera honen kalitatea hobetu asmoz, entsegu ireki edo Orkestraren egoitzara bisita gehi entsegu ireki hauek nori zuzentzen zaizkien zehaztu dugu. Harremana educativos@orquestadeeuskadi.es posta elektronikoaren bidez egingo da.

Larunbat honetan, hilak 20, Euskadiko Orkestra Sinfonikoko kideek osatutako Opus 64 haize boskotea Miramongo Matinéeak ziklora itzuliko da, oraingoan XX eta XXI. mendeen artean idatzitako bi musikalan antagoniko atriletan dituztela: Francisco Escuderoren Gnosis (musikagilearen jaiotzaren mendeurrena betetzen den honetan) eta Windows to Autumn, Christian Lindberg suediarrarena.

François Proud, Euskadiko Orkestrako fagot bakarlari eta Opus 64 taldeko kidearen hitzetan, kontzertu honetarako aukeratutako egitarauak "natura eta naturan gizakiaren izatea agertzen duten bi ideia kontrajarriak" islatzen ditu. Gnosis obrak Antzinako Grezian garatutako ideia filosofikoak hartzen ditu oinarri. Partitura "oso zerebrala, iluna da; eta iluntasun horretatik sortzen da instrumentu bakoitzaren melodía". Francisco Escuderok 1997an sortu zuen, Quinteto Pablo Sorozábal boskotearen enkarguz. Honi kontrajarrita, Prouden arabera, "Windows to Autumn poesi hutsa da". Lan honetan testu poetiko batzuei hitza emango dien errezitadorea, kasu honetan Mikel Cañada, eta horren hitzei hotsezko irudiak ematen dizkien musikarien artean solasaldi bat sortzen da. Konpositore honen beste hainbat parituratan bezala, "Windows to Autumn-ek erritmo asko du, kolore asko". Lindberg bera izana da Miramongo Matinéetan tronboijotzaile gisa. (Jarrai lotura honi Matinéearen aurkezpenaren bideoa osorik ikusteko).

Kontzertua goizeko 11etan hasiko da eta sarrerak www.kutxasarrerak.net eta Telekutxa (943 00 12 00) bidez eros daitezke, eta kontzertu egunean baita Orkestraren egoitzan ere, 10.30etatik aurrera. Halaber, gogorarazten dizuegu doako autobus zerbitzua dagoela egoitzara etortzeko, 10.25etan Gipuzkoa Plaza, 4tik atera eta Antso Jakituna, 18an eta Madrilgo Hiribidea, 34ean geldialdiak egiten dituelarik.

"Osasún iturriyá" da Donostiako San Telmo Museoak urriaren 18 eta 19ko kontzertuetan Kursaal Auditorioko hallean ikusgai izan dadin utzitako koadroaren izenburua. Donostiar museoarekin adostutako lankidetza honekin osotzen da Orkestrak, Mussorgskyren "Erakusketa bateko koadroak" interpretatzearen harira, artea beste formatutan kontzertu aretoetara eramatearen ekimena. San Telmo Museoarekin lankidetza prentsaurrekoan aurkeztu berri da.

San Telmo Museoko ekitaldi aretoan izandako aurkezpenean aritu dira Iñigo Alberdi, Orkestrako zuzendari nagusia, Susana Soto, San Telmo Museoko zuzendaria, Andrés Orozco-Estrada, Orkestrako titular eta 2. Abonu-programako kontzertuen zuzendari, eta kontzertuotan bakarlari gonbidatu Michel Camilo pianojotzailea.

Andrés Orozco-Estradaren esanetan, Modest Mussorgskyren "Erakusketa bateko koadroak" partitura entzutearekin norberak benetan erakusketa batean barrena pasiatzearen sentsazioa du. Sinesgaitza da koadro batetik bestera eginiko ibilbidea nola islatzen duen. BBVA Fundazioaren lankidetza esklusibodun Tesela proiektuaren baitan estreinatutako "The Gliding of the Eagle in the Skies" obrari buruz, zera adierazi du Orozco-Estradak: "une oso euskaldunak helaraztea lortzen du, euskal jakintza eta melodiak".

Michel Camilok, berriz, George Gershwinen inguruan jardun du: "New York hiriaren energia da, Broadwayeko giro jazziztikoaren ikuspuntutik".

Bilboko Arte Ederren Museoko Mogrobejo hallean aurkeztu da Euskadiko Orkestra eta bilbotar museoaren arteko lankidetza berri bat. Iñigo Alberdi, Orkestraren zuzendari nagusiak eta Javier Viar, Museoaren zuzendariak lankidetza hau zertan datzan azaldu diete komunikabideei: urriaren 17an Euskalduna Jauregian Modest Mussorgskyren "Erakusketa bateko koadroak" interpretatzearekin batera, sarreran Ignacio Díaz Olanoren (1860-1937) "Sonata" margoa izango da ikusgai. Museoak 1991. urtean erositako obra honek argi erakusten du gasteiztar margolariaren estiloa; konposizio zaindua eta marrazki zehatzaz baliatuz, irudikapen kostumbristak, erretratua eta paisaia landu zituen bere koadroetan.

"Erakusketa bateko koadroak" interpretatzearen ildotik, Orkestra lankidetzan aritu da halaber Jorge Oteiza Fundazio Museoarekin Iruñan, ARTIUMekin Gasteizen eta San Telmo Museorekin Donostian.

ARITUMen aurkeztu berri dira 2012/2013 Abonu Denboraldia Gasteizen eta gazteiztar museoarekin lankidetza berri bat. Prentsaurrekoan aritu dira Iñigo Alberdi, EOSen zuzendari nagusia, Daniel Castillejo, ARTIUMeko zuzendaria, eta Marta Monfort, Udal Antzoki Sarearen zuzendaria.

Urriaren 15etik 19ra, Euskadiko Orkestra Sinfonikoak bere Abonu Denboraldiko bigarren programa aurkezten du. Kontzertu sorta berri honek interesgarri egingo dituen askotariko hainbat argudio biltzen ditu. Bere zuzendari titular Andrés Orozco-Estradaren zuzendaritzapean, Orkestrak bere 30. urteurrena ospatzeko abian jarritako Tesela proiektuaren baitan sortutako partitura baten erabateko estreinaldia burutuko du, oraingoan musika garaikidearen nazioarteko erreferente Peter Eötvösen eskutik; bestalde, Michel Camilo pianojotzaile eta konpositoreak, hau ere bere jardueran izen nabarmena, debuta egingo du Abonu Denboraldian; eta M. Mussorgskyren Erakusketa bateko koadroak obraren harira Orkestra ARTIUM, Arte Garaikideko Euskal Zentro-Museoarekin lankidetzan arituko da Gasteizen (Jorge Oteiza Fundazio-Museoarekin Iruñan, Arte Ederren Museoarekin Bilbon eta San Telmo Museoarekin Donostian). Kontzertuak izango dira urriaren 15ean Iruñako Baluarten, 16an Gasteizko Principal Antzokian, 17an Bilboko Euskaldunan eta 18 eta 19an Donostiako Kursaalean.

The Gliding of the Eagle in the Skies obrarekin Peter Eötvösek bat egiten du Tesela osatzen duten konpositore taldearekin. Orkestrak bere 30. urteurrenarekin batera garatutako Tesela konposizio-proiektua da eta BBVA Fundazioaren lankidetza esklusiboari esker gauzatu da. Orkestraren enkargua burutzeko, Stockhausen-en ensembleko kide izana eta jada elektroakustikaren klasiko bihurtutako obren egile Eötvösek (Transilvania, Errumania, 1944) bere konposizio-prozesuan ohikoa den moduan, hots-irudi bat aukeratu zuen; kasu honetan "arrano bat zeruan hegaka, goialdean flotatzen hegalak zabalduta dituelarik, mugitu gabe; arranoaren begirada, bere hegalen kontaktua haizearekin; mugarik gabeko espazioa, erabateko askatasunaren sentsazioa". Hori izan zen The Gliding of the Eagle in the Skies (Arranoa zeruan hegaka) lanaren iturria.

Michel Camilo, Grammy, Emmy, Grammy Latino zein Premios de la Música sarien irabazle eta Spain eta Spain again diska arrakastatsuen egile, estreinakoz arituko da Orkestraren Abonu Denboraldian. 2010ean KlasikAT, EOSen crossover zikloaren lehenbiziko kontzertuetan protagonista izan zena ohiko lau hiriburuetako eszenatokietan izango da orain, George Gershwinen Piano eta orkestrarako kontzertua fan interpretatuko duelarik.

Gainera, kontzertuaren bigarren zatian interpretatuko den Modest Mussorgskyren Erakusketa bateko koadroak partitura abiapuntu harturik, Euskadiko Orkestrak, beste erakundeekin zubiak eraiki eta bere jarduera beste diziplina artistikoekin uztartzeko etengabeko ahaleginean, beste formatutan sortutako artea eramango du lau hiriburuetako auditorioetara. Gasteizen, ARTIUM, Arte Garaikidearen Euskal Zentro-Museoarekin lankidetzan, bideoarteak bere lekua izango du Principal Antzokiko ambigúan kontzertuaren egunean, urriaren 16an. Shahryar Nashat-ek (Geneva, 1975) 2005 urteko Veneziako Biurtekoan Suitzaren izenean aurkeztutako The Regulating Line bideoa erakutsiko da.

Abonu Denboraldia, Matinéeak, Musika Familian eta abar zikloez eta kultur erakunde ezberdinekin lankidetzan aritzeaz gain, denboraldiro Orkestrak gure lurraldeko herri ezberdinetara eramaten du bere musika, ohiko zirkuitutik at geratzen diren eszenatokietara heltzeko asmoz. "Orkestra Herrietan" izenburupean garatzen duen ekimen honen baitan, Orkestrak urriaren 6an kontzertu bat eskainiko du Barakaldoko Barakaldo Antzokian.

Emanaldia Lorenz Nasturica-Herschcowikik zuzenduko du eta aukeratutako egitarauak Beethoven eta Mozarten lan ezagunak bilduko ditu. Lorenz Nasturica-Herschcowici Euskadiko Orkestra Sinfonikoaren kontzertino iraunkor gonbidatua eta, 1992.etik, Municheko Orkestra Filarmonikoko kontzertinoa da; 1996an Trio Celibidache sortu zuen eta 2004tik aurrera Municheko Ganbera Orkestraren zuzendaria da. Vanessa Goikoetxea sopranoak Orkestrarekin batera debuta egingo du kontzertu honetan.