Euskadi Irratiko "Faktoria" saiokoak Euskadiko Orkestraren Miramongo egoitzan izan dira eta saioa bertatik emititu dute, auditorioan laurehun bat haur IV. Eskola Kontzertuen azken emanaldiaz gozatzen ari zirela. Manu Etxezortu, Maite Artola eta gainerako lankideak egoitzako sarreran kokatu dira bertan gertatzen zena zuzenean bizitzeko eta saioaren ohiko atalez gain, auditorioan gertatzen ari zenaren berri emateko sartu-ateraldiak egin dituzte eta baita haurren iritziak jaso ere. Gainera, saioa irekitzeko Iñigo Alberdi, Orkestrako zuzendari nagusia elkarrizketatu dute eta "Neguko Menua" kontzertua amaitu ostean Jon Malaxetxebarria zuzendaria, Jon Gómez Garai aurkezlea eta Maialen Rezabal Euskadiko Orkestrako biolinjotzailearekin solasaldian aritu dira.

Jorge Drexler eta berak sortutako "n" aplicanción delakoa aurtengoan musika eta teknologiaren inguruan gertatutako fenomenoetako bat bilakatu dira. Erabiltzaileari zuzenean bere abestietan esku hartzeko aukera ematea arrakasta itzela izan da. Izan ere, Espainian musika app-en artean 1. postua lortu du eta berrogeitik gora herrialdetan arrakasta nabarmena izan eta aldeko kritikak merezi izan ditu.

App-ak gailu mugikorretan erabilgarri izateko espreski sortutako 3 abesti biltzen ditu: "Habitación 316", "Madera de deriva" eta "Décima a la décima". Hauek interakziorako aukera berri harrigarriak eskaintzen dituzte, orkestra sinfoniko batekin eta artista gonbidatuekin lankidetza ahalbidetzeaz gain. Hiru kantuak Samsung Apps-ek bakarrik eskainiko ditu doan.

Berrikuntza musikal zein teknologiko hau etengabean musika sortzeko bide berrien bila ari den Jorge Drexler artista apartaren eskutik datorkigu. Proiektu honetan Samsung izan du lankide, garapenean aktiboki lan egin duelarik. Lehenengo aplicanción honi Samsung App-en euskarri esklusiboa eman dio, estreinakoz musika eta kultur-munduaren alde apostu eginez.

"Madera de deriva" gauzatzeko, Jorge Drexlerrek Euskadiko Orkestra Sinfonikoa eta KUP Taldea tolosar abesbatza izan zituen lagun. Fernando Velázquezen zuzendaritzapean ("Lo Imposible, "Lope", eta abarren soinu banden konpositorea), Orkestrak Donostian duen egoitzan grabatu zuten. Egitasmoan esku hartu zuten laurogeitik gora musikariek emanaldi ezohiko batean grabatu zuten Drexler-en kantua.

Jorge Drexler eta mundu mailan konbergentzia digitalaren teknologian lider Samsung Electronics Co., Ltd, konpainiaren arteko elkarlanak, Warner Music Spain eta Wake App entrepresekin lankidetzan, n mundu osoan zehar milaka smartphone zein tabletetan egotea ahalbidetu du.

Nola funtzionatzen du n2 - Madera de deriva kantuak? Kantua 12 pistatan banatzen da (gehi ahotsa) eta hauek guztiak batera entzutean erabat instrumentaturiko tema osatzen dute. Aplikazio hau erabili ahal izateko terminalak "lokalizazio" funtzioa aktibaturik izan behar du, horren arabera aktibatuko baitira orkestraren zenbait sekzio. Erabiltzaileak ahotsaren pista soilik aktibatuta duela ekingo dio aplikazioa erabiltzeari eta bere lokalizaioaren arabera instrumentu talde berri bat (pista bat) izango du, non eta aurretik ez duen. Erreproduzioan erabiltzaileak desblokeatutako pistak aktibatu edo desaktibatzeko aukera izango du. Aldiro erabiltzaileari gertuen duen hurrengo instrumentua zein noirabidetan eta gutxi gora-behera zein distantziara dagoen adierazten zaio. Gainera erabiltzaileak jardueraren bista bat izango du. Honetan, desblokeatutako pistei dagokionez, instrumentu horiek abestiaren zein unetan nabarmentzen diren ikus ahalko du. Kantu bakoitza amaitzean, erabiltzaileari kantua berriz ere erreproduzitu edo partekatu ahal izateko audio-artxibo bat sortzeko aukera emango zaio. Ezaugarri hau in-app ordainketa bidez desblokeatu behar da. Zerbitzarian egiten denez, sortutako artxiboa sare sozialetan partekatu daiteke.

Datorren larunbatean, hilaren 15ean, Recercada_Ensemble Diatessaron datorkigu Miramongo Matinéeak ziklora. Aintzinako musika hizpide hartuta eta Gabonak gertu ditugun honetan, Arcangelo Corelliren "Fatto per la note de Natale" kontzertuaren inguruan kontzertu ederra eraiki dute. Barrokoko maisu honen ondoan barrokoko konpositorerik ezagunena: Antonio Vivaldi. Eta hirukoa osatzeko Johann Sebastian Bach; alemaniarrak ere izan baitzuen alde italiarrik. Eta barrokoko musikaz gozatzeko, zer hobeto instrumentu barrokoekin interpretatua izatea baino?

Recercada_Diatessaron taldeak, kontzertuaren esku-egitarauan adierazten dutenaren arabera, "musika puru eta alaiaz gozatu eta gozamena eragin" nahi dute kontzertu honen bidez, "atsegin eman eta aldi berean hunkituko gaituen musikaz baliatuz". Talde honen helburua interpretazio historikoa egun zentzua izango duen zerbait bizia bihurtuko duten bide berriak jorratzea da; Idatzitako musika, interpretearen eta entzulearen artean sorturiko energia eta emozioak zabaltzea da beren asmoa.

Arcangelo Corelli (1653-1713) biolinerako italiar konpositoreen eredu nagusi dugu, ia bizitza osoa eman baitzuen instrumentu honetarako idazten. Corelliren artea teknika eta espresioaren sintesia da. Larunbatean entzungai izango diren Concerti Grossi (op.6) argitaratzeke zeudela hil zen. Antonio Vivaldik (1678-1741) formazio ezberdinetarako ezin konta ahala musika lan sortu zituen eta bere "Lqau urtaroak" obrari esker barrokoko konpositore entzutetsuena da. Johann Sebastian Bach-en (1685-1750) "Kontzertu Italiarra" 1735ean argitaratutako "Clavierübung" delakoaren bigarren zatiari dagokio, klabezin bakarrerako, argitalpen horretan bertan jasotako "obertura frantziarra"ri kontrajarria.

Kontzertua goizeko 11etan hasiko da eta sarrerak www.kutxasarrerak.net eta Telekutxa (943 00 12 00) bidez eros daitezke, eta kontzertu egunean baita Orkestraren egoitzan ere, 10.30etatik aurrera. Gogoratu Euskadiko Orkestraren sarrerak erosterakoan KULTURA BONUA erabili daitekela. 

Hasi dira dagoeneko IV. Eskola Kontzertuak. Donostiako Jakintza Ikastola, San Alberto Magno eta Ekintza, Legazpiko Haztegi, Hernaniko Langile Ikastola eta Gasteizko Geroa Eskolako haurrek ederki dastatu dute Euskadiko Orkestra Sinfonikoak eskainitako "Neguko Menu" oparoa. Hasteko arrain zopa hotsduna, txuleta patatekin eta, postrerako, bizkotxo erraldoia, guztia musika ederrez onduta, pentagramaren sukaldari onenen eskutik: Mendelssohn, Grieg, Offenbach, Rossini, Aita Donostia, ... 

26 ikastetxetako 1800 haur etorriko dira Euskadiko Orkestraren egoitzan izango diren kontzertu hauetara. Orkestrak Donostiako Udaleko Hezkuntza Atalarekin lankidetzan antolatutako IV. Eskola Kontzertuen lehenengo txandan, "Neguko Menua" izenburudun kontzertu sinfonikoa izango da. Lehen Hezkuntzako ikasleei zuzendutako kontzertu honek izaera ludikoa du eta musikaren eta gure ikaslegoari oso gertuko zaion beste arte baten, hau da, gastronomiaren ezaugarrien arteko kidetasun zein antzekotasunekin jolastuko du.

Abenduaren 1 larunbatean Kaleido ganbera taldeak XIX eta XX. mendeen arteko mugan kokatuko du beste behin Miramongo Matinéeak zikloa. Oraingoan garai hartako frantziar musika zein parametrotan mugitzen zen ezagutzeko: beste diziplina artistikoekin harreman zuzenean, dantza, literatura eta bestelako musikekin lotuta, munduari irekia eta unibertso artistiko aberats horretatik sortutako hots-aukera anitzari zabalik aurkezten da. Horren erakusle, Euskadiko Orkestra Sinfonikoaren ganbera zikloko hitzordu goiztiar honetan entzungai izango ditugun Claude Debussy, Darius Milhaud eta Ernest Chausson-en obren aukeraketa.

Kontzertuaren muina Ernest Chaussonen Piano, biolin, eta hari-laukoterako kontzertua re maiorrean, opus 21. Bi formazio klasiko biltzen ditu: piano-biolin duo-sonata eta hari-laukotea. Emaitza, indar itzela duen talde ezohikoa. Bere garaikideen artean "Wagner frantziarra" izenez ezaguna, konpositore post-erromantiko hau XIX. mende amaierako frantziar musikarien (Massenet, Franck, D'Indy, ...) eta XX. mendearen hasierako konpositoreen arteko (Saint-Saëns edo Debussy) nolabaiteko giltzarri izan zen.

Chausson-en inguruan, Kaleido taldeak Debussyren 3. Sonata biolin eta pianorako sol minorrean aukeratu du; hasiera batean XVIII. mendeko erara idatzitako sei sonata aurreikusten zituen proiektu baten azken obra izan zen hau konpositorearen partiturarik perfektuena bilakatu zen askorentzat.Eta bi menderen arteko garai honi botatako begirada berezi hau osotzeko, Milhauden 4. Kuartetoa; sortzaile honek musika forma ugaritan bilatu zuen etorria eta bere etiloak, liriko zein alaiak, folklorearen eta jazzaren kutsua du.

Kaleido taldea osatzen dute Irene Echeveste, Emeline Pierre eta Nathalie Dabadie, biolinak, Natacha Dupuy-Scordamaglia, biola, eta Natalia Díaz, biolontxeloa, guztiak Euskadiko Orkestrako kide, eta Patricia Azanza pianojotzailea.

Euskadiko Orkestra Sinfonikoaren bosgarren programari dagozkion kontzertuak azaroaren 29an Gasteizko Principal Antzokian eta abenduaren 5ean Iruñako Baluarte Auditorioan izango dira. Rubén Gimeno zuzendari, perkusioa, joan zen denboraldian Martin Grübinger edo Oreka TX interprete gailenen eskutik Orkestraren programazioan bereziki nabarmendu zena, Abonu-Denboraldian izango dugu berriz ere; oraingoan Euskadiko Orkestraren perkusio eta tinbal bakarlari Anthony Lafargueren eskutik.

Anthony Lafargue (Cahors, 1972) 1999. urtetik da Euskadiko Orkestraren perkusio eta tinbal bakarlari. New Yorkeko Juilliard School eta Filadelfiako Curtis Music Institute famatuetan ikasle izana, Tolosako (Frantzia) Capitoleko orkestra, Varsoviako Orkestra Filarmonikoa, Filadelfiako Orkestra, Frantziako Orkestra Nazionala edo Bayerische Kammerphilharmonie orkestrekin ari izan da, besteak beste. Orkestra sinfonikoekin aritzeaz gain, konposizioan ere jarduten da eta bere hainbat lan estreinatu du EOSen Miramongo Matinéeak edo Musika Familian zikloen baitan.

Rubén Gimeno (Valentzia, 1972) estreinakoz ariko da zuzendari gonbidatu EOSen Abonu-Denboraldian, baina Orkestra 2007/2008 denboraldian zuzendu zuen lehenbiziko aldiz, Musika Familian zikloko kontzertu batean; beranduago Euskal Konpositoreen Bilduman Beltrán Pagolari eskainitako bolumenean (Claves), 2009ko Musikasten eta 2010ean Michel Camilo bakarlari zela egindako lehenengo KlasikAT kontzertu-sortan zuzendu du Orkestra.

William Kraft-en (Chicago, 1923) Tinbal eta orkestrarako 1. kontzertua izango da Anthony Lafarguek behingoagatik Orkestraren organikoan duen postua utzi eta Abonu-Denboraldian bakarlari gonbidatu aritzeko aukeratutako obra. Konpositore estatubatuarrak 1983an sinatutako kontzertu hau inflexio-puntu izan zen perkusiorako errepertorioan; aurrez XX. mendeko 30eko hamarkadan Kalifornian perkusioa bakarrik bere tokia betetzen joan zen mendebaldeko musikan, John Cage edo Lou Harrisonek horren alde egindako lanari esker. Kraftek berak Debussy eta Ravelen lengoaia modala jazzaren indar eta fraseo modalari egokitu dion inpresionista amerikartzat jo du bere burua. Kontzertu honetan interpretatzerakoan zenbait teknika berri darabil eta tinbalaren erregistro lirikoan barneratzen da, efektu handiko obra sortuz.

Egitaraua osotuz, José María Usandizagaren Las Golondrinas zarzuelako, gero bere anaia Ramonek opera bilakatuko zueneko zatirik ezagunena, Pantomima, interpretatuko du Orkestrak, Ramon Lazkanok egindako edizioan. Eta bigarren zatian Beethovenen 1. Sinfonia, Bonn-eko genioak Mozarti eta bereziki Haydni egindako omenaldia.

Euskadiko Orkestra Eusko Jaurlaritzaren Kultura Sailak abian jarritako KULTURA BONUA kanpainari atxiki zaio laugarren urtez.

Programa honi esker, 25 eurorekin 40 euroko balioa duen KULTURA BONUArekin Euskadiko Orkestraren kontzertuetarako sarrerak eros daitezke. 

Sarrerak KULTURA BONUA erabiliz 2012ko abenduaren 10etik 2013ko urtarrilaren 20a bitartean eros ahal izango dira, honako salmenta-guneetan:

-Abonu-Denboraldia: Donostiako Kursaal Auditorioko, Bilboko Euskalduna Jauregiko eta Gasteizko Principal Antzokiko leihatiletan.
- Musika Familian Donostian (urtarrilaren 15etik aurrera salgai):Kursaal elkarguneko leihatilan.
- Miramongo Matinéeak: Orkestraren Miramongo Egoitzako leihatilan eta Kursaal elkarguneko leihatilan.

Larunbata honetan, hilak 17an Miramongo Matinéeak zikloak Sigma Project saxofoi laukotea hartuko du Euskadiko Orkestraren egoitzako eszenatokian. Kontzertua, "Utopiak" izenburupean, tradizioa eta gaurkotasuna ehuntzen dituen sare baten gisa aurkezten da: saxofoia sonoritateen itzultzaile bilakaturik agertzen da esperientzia honetan, aintzinako zentzuak lengoaia berrien bidez adierazteko bide bihurturik.

Transkribapena "musika errenazimendu" bezala ulerturik, SIGMA PROJECT-ek Salvatore Sciarrino konpositore garaikide italiarrak burututako XIV, XVI eta XVII. mendeko piezen transkribapenak interpretatuko ditu. Musikagileak Pagine zikloan (2001) eta Canzionere da Scarlatti bilduman (2002) jasotako hauetan originalarekiko konpromezu ia didaktikoa gailentzen da.

Egitaraua osotuz, Félix Ibarrondo eta Ramon Lazkanok SIGMA PROJECT-i eskainitako lanak. Aikan, Félix Ibarrondok 2009an sortua, eta aurten estreinatu berri den Ramon Lazkanoren Jalkin obrek osotzen dute "Utopiak". Ibarrondoren beraren esanetan, Aikan (asmaturiko terminoa) modu naturalean kokatzen da bere obraren mosaikoan; "hotsean adierazi eta gainezka egiten duten barne bultzadak dira, saxofoiarena bezalako tinbre berezian errealitate bihurturik". Ramon Lazkanok honela definitzen du bere Jalkin, BBVA Fundazioak SIGMA PROJECT-entzat eskatua: "gure oroimenarekin lotu eta denboran kokatzen gaituen hots baten arrastoa harrapatzeko ahalegina". Larunbatean bi konpositoreak EOSen egoitzako eszenatokira igoko dira lan hauek entzulegoari aurkezteko.

SIGMA PROJECT izenez, 2007an egungo sorkuntzarekin erabat lotutako Andrés Gomis, Josetxo Silguero, Ángel Soria eta Miguel Romero saxofoi bakarlariek espainiar ganbera-musikaren panoraman iraultza bat bultzatzea erabaki zuten, Saxofoirako errepertorioa zein espazioa eta kontzertuen eszenaratzea berritzearen alde egindako apostuak konpositoreen interesa piztu du eta, musikariekin lankidetza estuan, ohi ez bezalako estreinaldiak burutu dituzte. Beti erronka berriei aurre egin, lankidetzan ari eta beste diziplinekin uztartzeko prest, SIGMA PROJECT-ek hotsaren inguruko hausnarketa, azterketa zein ikerketan aritzeagatik nabarmentzen darrai, etengabeko bilaketan eta teknologia berriak erabiliz. Aurki estreinatuko dituzten obren artean, Félix Ibarrondoren IZARBIL ORCAM-ekin eta Josep Maria Mestres Quadreny-ren Concert per a quatre OBC-rekin, biak saxofoi laukote eta orkestra sinfonikorako idatziak eta SIGMA PROJECT-i eskainiak.