Miramongo Matinéeak zikloaren baitan, Maiatzaren 11 larunbatean Izai ganbera taldea Euskadiko Orkestraren egoitzako eszenatokira itzuliko da. Oraingoan André Jolivet frantziar konpositorearen obrek osatutako egitaraua eskainiko du. Aukeraketak biola, flauta, fagot eta harparako 1936 eta 1965 urte bitartean sortutako piezak biltzen ditu. Miramongo Matinéeak zikloaren hitzordu berri bat, lengoaia hausle batean konposatzeko beharrak eraginda, bere burua genero zehatz bati lotzeari uko egin zion sortzaile baten lana ezagutzeko aproposa.

Izai ganbera taldea duela urte batzuk sortu zuen Euskadiko Orkestra Sinfonikoko musikari talde batek eta 2006. urtetik gaurdaino Miramongo Matinéen azken edizioetan Barroko, Klasizismo eta garai erromantikoko musikak aurkeztu dituzte, betiere ziklo honen ezaugarri funtsezkoenetakoa den helburu pedagogikoari erantzunez. Bach, Vivaldi, Telemann, Händel, Beethoven, Playel edo Devienne bezalako konpositoreen lanak uztartuz egitarau interesagarriak ekarri dituzte Miramongo larunbat goizetara. Oraingoan berriz denboran aurrera egin eta XX. mendera begira jarrita, instrumentu talde oso bitxietarako sortutako partiturak dakartza larunbateko Matinéera, André Joliveti eskainitako monografikoan.

"Musikari antzinatik zuen zentzu jatorrizkoa ematea, lehenbiziko giza-taldeen erlijiosotasunaren adierazpen magikoa izan zenetik, alegia". André Jolivet (Paris, 1905-1974) frantziar konpositorearen hitz hauek azaltzen dute bere artearen gakoetako bat. Ez zuen bere burua eskola jakin batean sailkatzerik nahi izan, lengoaia ezkonformista batean, publiko ororentzat idazteko beharra sentitzen baitzuen. Honetan datza bere mezua, humanismoa eta unibertsaltasuna uztartzean. André Jolivetek musika genero guztiak landu zituen, ganbera talde berriztatzaileak aztertuz eta estiloak askotuz, horretarako iturri ugariz baliatuz, jazza, dodekafonismoa, instrumentu elektrikoak, musika tradizional ez europarra eta abar luze bat. Beti xede berberarekin: musika dimentsio unibertsalera goratzea.

Euskadiko Orkestra Sinfonikoak aurrera darrai bere Abonu Denboraldian eta maiatzaren 11 larunbatetik aurrera 13. programari dagozkion kontzertuak eskainiko ditu ohiko lau hiribiruetan. Andrey Boreykoren zuzendaritzapean, Orkestrak estreinako aldiz Sergej Krylov errusiar biolinjotzailea izango du bakarlari gonbidatu. Kontzertuak izango dira maiatzaren 11 larunbatean Bilboko Euskalduna Jauregian, astelehena 13 eta asteazkena 15 Donostiako Kursaalean, 14 asteartean Iruñako Baluarten eta, amaitzeko, osteguna 16an Gasteizko Principal Antzokian.

Andrey Boreyko, Euskadiko Orkestraren zuzendari printzipal gonbidatuak zuzenduko du 13. Abonu programa hau. 2009. urtetik Orkestraren zuzendari printzipal gonbidatu, joan zen apirilan Floridako (Estatu Batuak) Naples Philharmonic Orchestrako musika zuzendari izendatu berri dute Andrey Boreyko. 2014/2015 denboralditik aurrera, bost urtez ariko da bertan. Gainera, Belgikako Orkestra Nazionaleko eta Düsseldorfer Symphoniker orkestrako musika zuzendari ere bada. Zuzendari gonbidatu gisa bete berri edo betetzear dituen konpromezuen artean, Parisko Orkestra, Londresko Orkestra Filarmonikoa eta beste hainbat iparramerikar orkestrekin, halanola New Yorkeko Orkestra Filarmonikoa, Los Angeleskoa eta San Francisco eta Toronto Orkestra Sinfonikoekin emanaldiak ditu, besteak beste.

Sergej Krylov biolinjotzaileak (Mosku, 1970) debuta egingo du Euskadiko Orkestrarekin. Orain Euskadiko Orkestraren Abonu Denboraldian estreinakoz izango dugun interprete honen ibilbide artistikoa areto nagusienetan lortutako arrakasta ugariz beteta dago: Vienako Musikverein eta Konzerthaus, Parisko Campos Elíseos antzokia, Municheko Herkulessaal eta Filarmonika, Berlingo Filarmonika, Milango Teatro alla Scala eta abar. Bakarlari gonbidatu aritu da Dresdeneko Staatskapelle, San Petersburgoko Orkestra Filarmonikoa, Royal Philharmonic, DSO Berlin eta Errusiako Orkestra Nazionalarekin, beste askoren artean, Mikhail Pletnev, Vladimir Ashkenazy, Vladimir Jurowski, Yuri Temirkanov, Valery Gergiev edo kontzertu hauetan ere zuzendari izango duen Andrey Boreykoren beraren zuzendaritzapean. EOSekin debuta egiteko, Sau-Wing Lam bildumako "Scotland University" Stradivarius bioina (1734) jotzen duen Sergej Krylovek Béla Bartóken Biolin eta orkestrareko bigarren kontzertua interpretatuko du.

Egitaraua osotuz, Wagnerren Lohengrin operako III. ekitaldiko Preludioa eta Orkestrak bere errepertorioari gehituko dion Tchaikovskyren 3. Orkestra-suitea entzungai. Kontzertuaren hasieran Lohengrin operako 3. ekitaldiko Preludioa alemaniar konpositorearen jaiotzaren bigarren mendeurrenaren oroigarri; bost minututan, pieza labur honek Wagnerren azken opera erromantikoaren handitasun guztia biltzen du. Eta kontzertuaren bigarren zatian, Euskadiko Orkestrak Tchaikovskyren 3. Orkestra-suitea interpretatuko du lehenbiziko aldiz. 

Maiatzaren 1 asteazkenean, Euskadiko Orkestra Sinfonikoak, Fernando Velázquez konpositoreak zuzenduta, hilaren 2, 3 eta 4ean Donostian izango den International Meeting for Autism Research (IMFAR) 2013 topaketaren harrera kontzertua eskainiko du. Emanaldiaren aurretik Yoko Onoren bideo-agurra emitituko da auditorioan eta kontzertuan, halaber, James Hobley autismoa duen britaniar dantzaria ariko da.

Euskadiko Orkestrak askotariko egitaraua eskainiko du, Beethoven, Rossini, Fauré edo Bizeten lanak John Lennon, John Williams edo Fernando Velázquezenekin batera. Fernando Velázquezek berak zuzenduko du Orkestra. Bi bider Goya sarietan nominatua, Ojo Crítico 2012 saria eta Malagako Zinema Jaialdian saritu berri duten getxotar konpositorea sarritan aritzen da Euskadiko Orkestrarekin lankidetzan. 2009an "El mal ajeno" pelikularen soinu banda grabatu zuten elkarrekin eta ondoren "Madera de deriva" doinua, Jorge Drexler kantautoreak gailu mugikorretarako sortutako "n" aplikaziorako. Joan zen irailan izandako Zinemaldian Juan Antonio Bayonaren "Lo Imposible" filmeko soinu bandaren zuzeneko estreinaldia burutu zuten EOS eta Fernando Velázquezek.

James Hobley dantzaria, lehenbiziko aldiz Kursaal Auditoriko eszenatokian. Kontzertuan gainera James Hobley autismodun britaniar dantzari gaztea ariko da. Komunikabideek "benetako Billy Elliot" gisa ezagutzera eman dutena, "Britain's Got Talent" britaniar telebistako saio arrakastatsuko finalista izan zen 2011. urtean.

IMFAR 2013 topaketak kontinente guztietako ehundaka zientzilari bilduko ditu eta Gipuzkoako hiriburua autismoaren mundu mailako hiriburu bihurtuko du. Urtero izaten den kongresu hau, oraingoan Fudazioa/Fundación Policlínica Gipuzkoak antolatua eta Joaquín Fuentes doktorea presidente izango duena, autismoaren inguruko munduko talde onenak biltzen dituen topaketa zientifikoa izaten da eta aurrerakuntza eta itxaropena eskaintzen dizkie pertsona zein familia ugariri.

Lehen mailako topaketa zientifiko hau Europa kontinentalean eta anglohiztuna ez den herrialde batean ospatzen den lehenbiziko aldia da honako hau; izan ere, 2008an bakarrik izan zen Ipar Amerikatik kanpo, Londresen.

Yoko Onoren bideo-agurra kontzertuaren atariko. Kontzertua hasi aurretik, ekitaldiari hasiera emateko Yoko Ono artista plastikoak IMFAR 2013ra bertaratutakoei zuzendutako bideo-agurra emitituko da. Autismoaren inguruko ikerkuntzarekiko arduratuta, 2010eko apirilan Yoko Ono "Global Autism Ambassador" izendatu zuen Autism Speaks erakundeak, izendapen hau jasoz zuen lehenbiziko pertsona izan zelarik.

Euskadiko Orkestraren bigarren lankidetza DONOSTIAutism-en baitan. Joan zen martxoaren 19an, orduan ere IMFAR 2013 kongresuaren inguruan Fundazioa/Fundación Policlínica Gipuzkoak sustatutako DONOSTIAutism hiritar ekimenaren barruan antolatutako jardueren artean, Gautena, FEVASeko kide Gipuzkoako autismo elkarteko kide, familiarteko eta lagunak EOSeko egoitza bisitatu eta Beethovenen Seigarren Sinfoniaren interpretazioa entzutzeko aukera izan zuten. Esperientzia hunkigarria izan zen benetan, bai Orkestrarentzat eta baita entzulegoarentzat ere; Joana Carneiro portugaldar zuzendari nabarmena gogotsu aritu zen gainera, egun haietan zuzentzen ari zen Denboraldiko 10. programaren nondik norakoaren inguruan azalpenak ematen.

Korporazio Erantzunkizun Sozialaren alorrean, 2009. urtetik Euskadiko Orkestra FEVAS, Ezintasun Intelektuala duten Pertsonen aldeko Elkarteen Euskal Federazioaren lankide da, musika ezintasun intelektuala duten pertsonei helaraztea helburu harturik. Xede horri erantzunez, denboraldiro tailer eta jarduera ezberdinak burutzen dituzte Orkestraren Musika Gelaren bidez. Elkarrekin burutuko duten hurrengo egitasmoa datorren ekainean gauzatuko da.

Miramongo Matinéeak zikloaren baitan, apirilaren 27 larunbateko emanaldian gonbidatu berezia izango dugu, Asier Polo biolontxelojotzailea. Euskadiko Orkestrako musikariekin batera askotariko egitaraua eskainiko digu, intentsitate eta emozio handiduna. Errepertorioa bakoitzari dagokion generoan monumentalak diren obrek osatzen dute. Lehenbiziko zatian Gaspar Cassadóren Biolontxelo bakarrerako suitea izango da entzungai eta bigarrengoan, berriz, Franz Schuberten Harietarako kintetoa do maiorrean. Lagun izango ditu Irene Echeveste eta Larraitz Oiartzabal biolinjotzaileak, Delphine Dupuy biolajotzaileta eta Juan Ignacio Emme biolontxelojotzailea.

Asier Polo eta Euskadiko Orkestra 1995.ean, Abonu Denboraldian, lehenbiziko aldiz elkarlanean aritu zirenetik, ugariak izan dira elkarrekin gauzatutako proiektuak: kontzertuak Abonu Denboraldian, errezitalak Miramongo Matinéetan, haurrentzako kontzertuak, estatu zein nazioarte mailako birak (horien artean 2007an Brasilera egindakoa) edo grabaketa ezberdinak, Claves disko etxeak argitaratutako Euskal Konpositoreen Bilduman J.M. Usandizaga, Francisco Escudero eta Luis de Pablori eskainitako diskak eta, duel gutxi, Et'Cetera-k plazaratutako Sofia Gubaidulinaren inguruko monografikoa.

Bere belaunaldiko biolontxelojotzaile onenen artean dugu Asier Polo (Bilbo, 1971) eta bakarlari gisa estatu zein nazioarteko orkestra garrantzitsuenekin ari ohi da lankidetzan. Pinchas Steinberg, Christian Badea, Rafael Frühbeck de Burgos, Claus Peter Flor, Günther Herbig, Antoni Wit edo Anne Manson-en zuzendaritzapean aritu da eta baita estatuko zuzendari gailenekin batera ere. Josep Colom, Eldar Nebolsin, Gerard Caussé, Janáček laukotea edo Alfredo Kraus izan ditu lagun eszenatokian; azken honekin Maggio Fiorentino, Londresko Covent Garden, Zuricheko Tonhalle eta Vienako Musikverein-ean eta Japoniako areto nagusienetan izan zen. Obra berrien sustatzaile, Gabriel Erkoreka, Luis de Pablo eta Antón García Abrilek obra ezberdinak eskaini dizkiote. Bere diskografia Claves, RTVE, Marco Polo edo Naxos disko etxeek argaitaratutako hamalau erreferentziek osatzen dute guztira. Egun Euskal Herriko Goi Mailako Musika Ikastegiko irakasle da. Asier Polok Francesco Rugieri biolontxelo bat (Cremona, 1689) jotzen du, Banestoren lankidetzarekin eskuratua.

Matinéerako aukeratutako programari dagokionez, Gaspar Cassadóren (Bartzelona, 1897-Madril, 1966) Suitea bere garai emankorrenean sortua da, 1920ko hamarkadaren erdialdera. Dantza izaeradun hiru mugimenduk osatzen dute, Kodaly eta Ravelen eragina gordetzen dutenak. Hungariar jatorriko Janos Starker biolontxelojotzaile estatubatuarrak eman zuen ezagutzera. Franz Schuberten (Viena, 1797-Viena, 1828) Harietarako kintetoa do maiorrean, opus 163, D956 bere ganbera obrarik ederrena da eta, behar bada, bere obra guztien artean handiena, emoziori, landutako materiaren kalitateari eta perfekzio formalari dagokionean.

Madrildik itzuli berria dela, Euskadiko Orkestra Sinfonikoak bere Abonu Denboraldiko 12. Programari dagozkion kontzertuak eskainiko ditu aste honetan. Bihar asteazkena, hilak 24, Iruñako Baluarte Auditorioan ariko da, ostegunean Bilboko Euskalduna Jauregian eta ostiralean, programa amaituz, Gasteizko Principal Antzokian. Orkestrak joan zen larunbatean Madrilgo Auditorio Nazionalean eskainitako kontzertuan lankide izandako Miguel Angel Gómez Martínez maisua eta Josu De Solaun pianojotzailea izango ditu, hurrenez hurren, gidari eta bakarlari gonbidatu. Egitaraua ere Madrilen eskaini berri dena izango da, Beethoven oinarri harturik: Egmont Obertura, Piano eta orkestrarako 5. kontzertua "Enperadorea" eta 7. Sinfonia. Obra hauen interpretazioak harrera bikaina izan zuen Auditorio Nazionalean.

Miguel Angel Gómez Martínez, Euskadiko Orkestraren zuzendari titular 1989tik 1993ra, une garrantzitsuetan zuzendu du berau, esaterako Alemania eta Austrian barrena nazioarte mailako bira garrantzitsuenetako batean eta Claves disko etxeak argitaratutako Euskal Konpositoreen Bildumako lehenbiziko diskoa, Jesús Guridiren obra bilduz. Gainera, opera antzoki eta orkestra sinfoniko zein filarmoniko nabarmenenek gonbidatu ohi dute. RTVE, Teatro Lírico Nacional La Zarzuela, GMD Nationaltheater, Manheim, GMD National Opera Helsinki, HSO Hamburgo, Valentzia eta Bernako Opera. Suite Burlesca, Sinfonía del Descubrimiento, Cinco canciones sobre poemas de Alonso Gamo, Sinfonía del Agua, Amaneciendo, Cartas de un Enamorado konposatu ditu, besteak beste, eta DECCA, ORFEO, RCA, BONGIOVANNI, HISPAVOX, CLAVES, TELDEC, NAXOS, PHILIPS, ONDINE eta abarrekin grabatu du.

Josu De Solaun estreinakoz Euskadiko Orkestraren Abonu Denboraldian. 2006an Josu De Solaunek XV. José Iturbi Nazioarteko Piano Lehiketako Lehenengo Sari Nagusia eskuratu zuen. Lehiaketaren ia 40 urtetan sari hau merezitako lehenengo pianojotzaile espainiarra bilakatu zen. Europa, Amerika eta Asiako herrialde ezberdinetan aritu da (Kennedy Center, Carnegie Hall, Metropolitan Opera, Merkin Hall, Steinway Hall, Teatro Monumental, Chicago Cultural Center, Palau de la Música, Palau de les Arts, ...). Ryan Haskins, Paul Daniel, Ormsby Wilkins, Ramón Tébar, Francesco Angelico eta Max Bragado maisuekin aritu da, askoren artean, eta Leos Janacek Filharmonic, Real Filharmonia de Galicia, Ciudad de México, Monterey Symphony, New York Sinfonietta, Moskuko Rudolf Barshai Ganbera Orkestra, New Yorkeko North Shore Symphony Orchestra, Valentziako eta Bariko Orkestrekin, American Ballet Theatre Orchestra eta abarrekin batera.

Bordeletik, bueltan bigarren bidaia oso denbora gutxian. Madrilera oraingoan, Auditorio Nazional ederrera eta gure Orkestraren zuzendari titular izandako Miguel Angel Gómez Martínez maisuak zuzenduta, David Ballesteros bere bigarrena kontzertino eta Josu De Solaun pianojotzailea bakarlari gonbidatu.

Arratsaldeko lauetan entsegu orokorrean, emozioa antzematen da jada eta telebista kamaraz inguratuta gaude, literalki. Batetik TVE-k kontzertua gerora emititzeko auditorioan jarritako bosta kamarak; Orkestrak zein bis interpretatuko duen galdetu eta partiturak eskatzen dizkigute, honela instrumentuen sarrerak aurreikusiz grabaketa on bat egiteko. Profesionaltasuna.

Eta bestetik, Donostiatik etorriak dira Oscar Tejedor errealizadorea eta Sincro-ko bere lantaldea. Orkestra baten funtzionamenduaren eta berau osatzen duten musikarien inguruko dokumental bat prestatzen ari dira, Orkestraren jarduera publiko zabalari helarazteko asmoz. Aurrerago emango dizkizuegu proiektu berri honen xehetasunak.
Gertu da kontzertuaren ordua. Ludwig Van Beethovenen (1770-1827) genialtasuna da gaurko egitarauaren ardatza: Egmont. Obertura, opus 84; Piano eta orkestrarako5. Kontzertua mi bemol maiorrean, opus 73, "Enperadorea" izenez ezagunagoa; eta 7. Sinfonia la maiorrean, opus 92. Monografikoa osatzen duten hiru maisulan hauek 1810-1812 urte bitartean sortu ziten Beethovenek, bere gorreria azken fasean zegoela.
Sarreran ezagun berri zein aspaldikoen agur beroak hasi dira. Auditorioaren 2324 eserlekuak ia bete dituzten entzuleen artean, Ainhoa Arteta sopranoa, Antón García Abril, José Peris, Agustín González Acilu eta Fernando Velázquez konpositoreak eta Lionel Morales eta Josu Okiñena pianojotzailea.

Egmont-ekin abiatu da kontzertua. Partiturak bederatzi zati ditu, gudu-triunfalismoaren eta bigarren maila batean dagoen amodiozko tramaren emozioaren artean dabiltzanak. Aurretik obertura dugu, heroitasun transzendenteduna; drama osoaren psikologia-antolaera zortzi minututan trinkotzen du. Ondoren, zera entzuten da auditorioan: "Orkestraren hotsa tinkoagoa eta goxoagoa da, geroz eta nortasun handiagoa du", hasiera bikaina iruditzen zaigu.

Ondoren Josu De Solaun pianojotzailea igo da eszenatokira, Pianorako kontzertua opus 73, Enperadorea izenez ezagunagoa dena interpretatzeko. Goitizen hau antza denez Johann Baptist Cramer konpositoreak eman zion, errepertorioko kontzertuen artean nabarmentzen duten dotorezia eta noblezia goraipatzeko.

Ezohikoa da Beethovenek pianoaren eta orkestraren artean sortutako oreka, orekarekin zuzenki lotuta, orkestrazio-aberastasuna dugu, pianoarekin harreman ezohikoa ezartzen duten instrumentu-aurkikuntzez betea. Lana ixten duten neurrietan ematen den piano-tinbal duoa horren adierazle da. Josu De Solaunen hatz arinak pianoan zehar doaz. Amaitzean ezntzulegoarengandik jasotako txaloak Granadosen La maja y el ruiseñor interpretatuz eskertu ditu.

Atsedenaldiaren ostean, 7. Sinfoniaren txanda da. "Dantzaren apoteosia" zela esan zuen Wagnerrek. Izan ere, erritmo-indarra sinfoniaren diskurtsoa sortzen duen osagaietako bat da, garai klasikoaren ezaugarri den erritmoaren estilizazio intelektuala apurtzen duen sakontasuna hartzen baitu. Carl Maria von Weber bezalako musikariak txundituta gelditu ziren. "Sinfonia honek Beethoven bere onetik aterata dagoela baieztatzen du" esan zuen Weberrek. Walther Krugek honela dio ere, 7. Sinfoniaren inguruan, Beethoveni buruzko bere kritika-testu ospetsuan: "Erabat neurrigabea; eldarnio bat; ez dago melosaren, harmoniaren, soinuaren eta hautemangarritasunaren zantzurik". Hori bera da, ziurrenik, sinfonia bikain honek sortu duen -eta egun ere sortzen duen- miresmenaren iturria.

Bravo eta txaloak gainezka auditorioan, bertaratutako entzulegoak Gómez Martínezen batuta birtuosoak Orkestra beste behin zuzentzea lortzen du, Juan Crisóstomo de Arriagaren Los Esclavos Felices obraren Oberturaren interpretatzioan. Emanaldiak gaina jo du!

Joan zen astean Bordeleko Auditorioa Orchestre National Bordeaux Aquitaine orkestraren denboraldian emanaldi bikoitzarekin estreinatu ondoren, aste honetan Euskadiko Orkestra Sinfonikoak Madrilera bidaia egingo du. Apirilaren 20 larunbatean kontzertu bat eskainiko du bertoko Auditorio Nazionalean, Unibertsitate Politeknikoaren kontzertu-zikloaren baitan. Miguel Angel Gómez Martínezek zuzenduta, Orkestrak Beethovenen inguruko egitarau monografikoa interpretatuko du, Josu De Solaun pianojotzailea bakarlari gonbidatu izango duen Pianorako 5. kontzertua, "Enperadorea" barne. Egitarau hau bera Iruña, Gasteiz eta Bilbon eskainiko du ondoren, Abonu Denboraldian.

Auditorio Nazionalera zazpigarren bisitaldia. 1989an Gabriel Chmuraren zuzendaritzapean Auditorio Nazionalean debuta egin eta gero, Euskadiko Orkestra beste bost alditan aritu da eszenatoki honetan. Azkena 2010ean, José Ramón Encinarren gidaritzapean eta egitarauan Luis de Pabloren obraren monografikoa zela, konpositorearen 80. urtebetetzea zela eta. Oraingoan Orkestra Beethoven oinarri duen egitarauarekin doa Madrilera: Egmont Obertura, Piano eta orkestrarako 5. kontzertua "Enperadorea" eta 7. Sinfonia.

Miguel Angel Gómez Martínez, Euskadiko Orkestraren zuzendari titular 1989tik 1993ra, une garrantzitsuetan zuzendu du berau, esaterako Alemania eta Austrian barrena nazioarte mailako bira garrantzitsuenetako batean eta Claves disko etxeak argitaratutako Euskal Konpositoreen Bildumako lehenbiziko diskoa, Jesús Guridiren obra bilduz. Gainera, opera antzoki eta orkestra sinfoniko zein filarmoniko nabarmenenek gonbidatu ohi dute. RTVE, Teatro Lírico Nacional La Zarzuela, GMD Nationaltheater, Manheim, GMD National Opera Helsinki, HSO Hamburgo, Valentzia eta Bernako Opera. Suite Burlesca, Sinfonía del Descubrimiento, Cinco canciones sobre poemas de Alonso Gamo, Sinfonía del Agua, Amaneciendo, Cartas de un Enamorado konposatu ditu, besteak beste, eta DECCA, ORFEO, RCA, BONGIOVANNI, HISPAVOX, CLAVES, TELDEC, NAXOS, PHILIPS, ONDINE eta abarrekin grabatu du.

Josu De Solaun estreinakoz Euskadiko Orkestrarekin. 2006an Josu De Solaunek XV. José Iturbi Nazioarteko Piano Lehiketako Lehenengo Sari Nagusia eskuratu zuen. Lehiaketaren ia 40 urtetan sari hau merezitako lehenengo pianojotzaile espainiarra bilakatu zen. Europa, Amerika eta Asiako herrialde ezberdinetan aritu da (Kennedy Center, Carnegie Hall, Metropolitan Opera, Merkin Hall, Steinway Hall, Teatro Monumental, Chicago Cultural Center, Palau de la Música, Palau de les Arts, ...). Ryan Haskins, Paul Daniel, Ormsby Wilkins, Ramón Tébar, Francesco Angelico eta Max Bragado maisuekin aritu da, askoren artean, eta Leos Janacek Filharmonic, Real Filharmonia de Galicia, Ciudad de México, Monterey Symphony, New York Sinfonietta, Moskuko Rudolf Barshai Ganbera Orkestra, New Yorkeko North Shore Symphony Orchestra, Valentziako eta Bariko Orkestrekin, American Ballet Theatre Orchestra eta abarrekin batera.

Baita Abonu Denboraldian ere. Hilaren 20an Madrilgo Auditorio Nazionalean izan ostean, Orkestrak, Gómez Martínez eta Josu De Solaun lankide dituela, egitarau bera 12. Abonu-programaren baitan joko du, 24an Iruñeako Baluarten, 25ean Bilboko Euskaldunan eta 26an Gasteizko Principal Antzokian.

Euskadiko Orkestraren Musika Gelaren 2012/2013 denboraldiaren komunikazio kanpainarako Patio-k egindako ilustrazioak sarituak izan dira 2013ko Anuaria Veredictas Excellence Standards sarietan. Nota abeslariak, begiratzen gaituzten ur tanta hankadunak, sui generis samarra den kantaria, musikazko ontziteria eta flauta haizetsuek osatzen dute aurtengoan Musika Gelaren komunikazio-euskarri ezberdinetan agertzen den askotariko pertsonairen familia dibertigarria. Familia berezi hau Espainian diseinu grafikoaren alorrean ospe handikoak diren sari hauetan ilustrazio onena izendatu dute. Zorionak!

Osteguneko kontzertuaren arrakastaren ondoren, ostiralean maisu, bakarlari eta orkestrako profesoreen aldarte ona antzematen da, baina baita nekea ere. Hala ere, eguraldi onak, goizean logeletan ikasi eta kontzentratu ostean, Bordele ederreko kaleetan barrena pasiatzera bultzen du, bigarren kontzertua eskaintzeko Auditoriora itzuli aurretik.

Lehenbiziko ezustekoa, arratsaldeko laurak inguruan. Bart izandako arrakastaren ondoren, arratsaldeko lehenengo orduetan gaurko kontzerturako sarrerak agortu direla esan digute Auditorioko arduredunek. Zoragarria! Zein ederki! Poz pozik gaude!

Eta pozarren, jada arratsaldeko zazpiak inguruan auditorio eder honetako atzealdea instrumentu-hots, irrifarrez eta solasaldiz bete da.

Zazpi eta erdietan ateak ireki eta ohiko abonatuez gain, badirudi aurpegi ezberdinak ikus daitezkela, Bordeleko Kontserbatoriko ikaslez betetako bi autobus gainera! Gazte eta nerabeak elkarrizketa eta barrez bete dute auditorioko sarrera. Musika klasikoak helduak bakarrik erakartzen dituela esaten dute gero!

Guridin Orkestra Carlo Rizzi italiarraren batutari leial, Falla Luis Fernando Pérez pianojotzailearen hatz miragarriek interpretaturik eta Gabriel Mesadoren biolontxeloare, Aitzol Iturriagagoitiaren biolinaren eta Luis Fernandoren pianoaren arteko elkarrizketa malenkoniatsuaren unean.

Eta gaueko lehenbiziko ezustekoa... bart ez bezala, lehenbiziko bisean, Fallaren "Danza del molinero" interpretatzerakoan, Rafa Alonsoren korno ingelesaren eta Luis Fernando Pérezen pianoarekin solasaldia obraren hasieran. Bravo eta txaloen ostean, atsedenaldi labur bat eta Bizeti heltzeko ordua!

Hasteko, Bizeten "L'Arlésinne". Bizetek saxofoia gehitu zion pieza honi, une ezberdinetan hots bereziak lortzeko. 1840. urte inguruan, lehenbiziko orkestra sinfonikoa sortu eta 100 bat urte beranduago sortutako instrumentu honek ere badu bere tokia konpositore ospetsuaren lanetan.

Eta atzo Bruno Claverieren flauta-soloa aipatu bagenuen (entzulegoak berriz ere bravo eta txalo bidez eskertu duena), gaurkoan Hervé Michauden oboe-soloa nabarmenduko dugu, kontzertuan zehar entzuten den bigarren oboe-soloa.

Eta gaueko hurrengo sorpresa Carlo Rizzi maisuaren eskutik datorkigu. Bisean ezezaguna zaigun alderdi bat erakusten digu, barre eginarazten digun umoredun showmanarena, alegia: une batez Bizeten "Toreador" ezaguna zuzentzeari utzi eta txantxetan lehen lerroetako batean eserita dagoen andre batekin flietean ibili da. Kontzertua barre eta txalo artean amaitzeko modua!

Frantziar entzulegoak gehiago nahi zuen, baina bi ordu eta erdiren ondoren, ikuskizuna besarkada eta zorionen artean amaitu zen eszenatokian. Etxera itzultzeko ordua zen.
Zoragarria, leiala eta gertukoa Bordeleko entzulegoa, itzultzeko irrikitan gaude!

Bidaia ederra izan dugu Carlo Rizzi maisua eta Luis Fernando Pérez pianojotzailearekin hiru orduz Bordeleko auditorio berriaz, bertoko pianoaz, erdiko zuloguneaz, akustikaz eta abarrez hitz egiten solasaldi atseginean. Pasadizo eta barreak izan dira, baita etengabeko hizkuntza aldaketengatik (gaztelaniatik italiarrera eta, helmugara hurbiltzen goazen heinean, ingelesetik frantsesera); Heldu gara Bordelera. Euria ari du, baina hiriak hain berea duen modernitatearen eta pasatako garaien nahasketa hori islatzen darrai

Hotelean atseden apur bat eta zentzu guztietan bizi bizia izango den arratsalde bati aurre egiteko prest. Hasteko, gure kontzertuetan gero eta sarriago, Alemanian bizi den eibartar kontzertino Aitzol Iturriagagoitiari elkarrizketak. Zuzendaria eta bakarlariarekin hitz bakar batzuk ondoren, haukein elkarrizketa kontzertu osterako utziko dugu, lehenengo iritziak emateko aukera izan dezaten.

Eta Auditoriora hurbildu gara, obra arkitektoniko ederra benetan. Etxadi-patio handi batean eraikia balego bezala, bere xarma guztia gordetzen duen Bordele horren erakusle diren etxebizitzen artean eskutatuta. Aurrealde estua ikustean, ezin imajina barrualdearen handitasuna. Erdiguneko Ganbetta plazan kokatua, 1440 ikuslerentzat tokia duen Auditorioa Michel Pétuaud-Létang arkitektoak sortu zuen, zimenduetatik bertatik hasita la ederra egin ere. Izan ere, auditorioa behekalderuntz eraikita dago, frantziar hiri eder honen sakonean.

Eta gaur Euskadiko Orkestra Sinfonikoa estreinakoz ariko da zulogune zirkularra duen auditorio honetan. Orkestra entzulegoaren erdialdean kokatzen da. Gertuko zein erosoa da bai musikarientzat eta baita entzuleentzat ere.

Kontzertuan hasi eta Guridiren "On Kixoteren Abentura" obraren lehenengo neurriak entzutearekin batera hotsak guztiok biltzen gaitu... Auditorioaren akustika ezin sinetsizkoa da! Musikarien eta entzulegoaren arteko gertutasuna are nabarmenagoa bilakatzen da! Rizzi maisua Guridiren zerbait interpretatzeko irrikitan zegoen, lehenbiziko aldia baitzuen egile horren "Melodías vascas"en miresle zuzendariak. "Exotiko eta distiratsua", zioten bertaratutako ikusle ugarietako askok atsedenaldian.

Fallaren "Gauen" txanda ondoren. Luis Fernando Pérezen pianoak Orkestrarekin erabat bat egin eta guztien artean hegoaldeko udako lorategietara garamatzate. EOSko biolontxelo bakarlari Gabriel Mesadoren soloa flamenko bihurtzen da kontzentratutako entzulegoaren aurrean. Bravo eta txaloak frantziar erara, bisa eskatzeko guztiak batera txalo eginez. Eta bis bakarra, bi bis Luis Fernando birtuosoak eskainitakoak: Fallaren "Danza del Molinero" eta Carlos Guastavito argentinarraren "El bailecito". Munduan zehar bidaia...

Bizet da kontzertuaren bigarren zatiaren protagonista. Bruno Claverieren flauta-soloak eta Elisabeth Colarden harpa-soloek "L'Arlésienne"en ondoren bravo oihukatzera bultzatu zuten entzulegoa. Eta Bizet ongi interpretatzeko beharrezkoa den zehaztasun milimetrikoaren inguruan Carlo Rizzik esandakoaren harira, bart horrelakorik izan zela esan genezake, berriz ere gogotsu eta gertuko agertu zen frantziar entzulegoaren jarrera kontutan harturik. Jarrera horri erantzunez, zuzendariak "Toreador" azpitituluaz ezaguna den Carmen operako preludioa opari. Bordeleko lehenbiziko kontzertuari amaiera bikaina, bai horixe! Eta gaur gehiago!