Lauder Ensemble-k XX. mende hasierako kafeetako hotsak berreskuratuko ditu 1. Miramongo Matinéean
Urriaren 6 larunbatean Euskadiko Orkestra Sinfonikoaren egoitzak Miramongo Matinéeak zikloaren 2012/2013 denboraldiko lehenbiziko kontzertua hartuko du. Orkestraren ganbera musika zikloa den honek musika emanaldi askotarikoak proposatzen ditu, larunbatetako kultur eskaintza osotuz. Lauder Ensemble taldearen eskutik, Matinéearen izenburuak, "Truebako boskoteari omenaldia", XX. mendearen hasieran Bilboko Trueba kafean aritu ohi zen talde egonkorrari egiten dio erreferentzia. Izan ere musika hori, 1900 urtearen inguruan kafeak betetzen zituen musika izango da kontzertu honetan berreskuratuko dena.
Trueba Bilbon edo Café de la Marina Donostian gertuko ditugun kafeen adibideak dira: burgesia berri bat garatzearekin batera sortutako espazio publiko hauek hirietako kultur bizitzaren erdigune bilakatu ziren XX. mendearen lehenbiziko urteetan. Musikari dagokionez, konpositoreen belaunaldi berri baten obraren zabalkunderako plataforma bilakatu ziren. Musikagile horien artean larunbatean Miramonen entzungai izango ditugun Arámbarri, Gorostiaga eta Sorozábal. Egitaraua osotuz, Ravel eta Lyadoven lanak izango ditugu, Arámbarrik berak moldatuak.
Lauder Ensemble osatzen dute Euskadiko Orkestrako kide Itziar Prieto eta Oscar López, biolinak, Pascal Arnaud, biola, Jon Larraz, biolontxeloa, Victor Bogdanov, kontrabaxua, eta Orkestraren lankide den Javier Pérez de Azpeitia pianojotzailea.
Kontzertua goizeko 11etan hasiko da eta sarrerak www.kutxasarrerak.net eta Telekutxa (943 00 12 00) bidez eros daitezke, eta kontzertu egunean baita Orkestraren egoitzan ere, 10.30etatik aurrera. Halaber, gogorarazten dizuegu doako autobus zerbitzua dagoela egoitzara etortzeko, 10.25etan Gipuzkoa Plaza, 4tik atera eta Antso Jakituna, 18an eta Madrilgo Hiribidea, 34ean geldialdiak egiten dituelarik.
Aurkeztu berri da 2012/2013 Abonu-Denboraldia Iruñan
Euskadiko Orkestrak Iruñan garatuko duen 2012/2013 Abonu-Denboraldia aurkeztu berri da Baluarteko prentsa-aretoan. Orkestraren zuzendari nagusi Iñigo Alberdik Orkestrak gaurtik 2013ko maiatzaren 25a bitartean nafar hiriburuan eskainiko dituen hamar kontzertuen edukia agertu du. Lagun izan du Igor Ijurra, gaur bertan, hilaren 2an Baluarten 20:00etatik aurrera lehenbiziko Abonu-kontzertuan protagonista izango den Iruñako Orfeoiaren zuzendaria.
Euskadiko Orkestra Sinfonikoak liburutegi, funts handi bat izan nahi du, non nobedadeek, klasikoek, musikari nabarmenek eta beren ibilbideen hastapenetan dauden musikariek beren tokia duten. Honela aurkezten da 2012/2013 Abonu-Denboraldi berria. Horretarako sakonki hausnartutako artista taldea, zuzendari zein bakarlari gonbidatuak izango ditugu gurean. Guztiek galdu behar ez den musika-denbora bilakatuko dute denboraldia.
Iruñan eskainiko den Abonu-programazioaren inguruan:
- Kolore askodun mosaikoa osatzen duten askotariko 10 proposamen izango dira: "Rossini serioa"ren adibide bat, Wagnerri omenaldia edo izaera erlijioso nabarmena duen programa bat, kutsu finlandiarra duen beste bat,... musika-panoraman agertu berri diren gazteak eta obra ezezagunak, ametsak, gauak, abenturak... ekarriko dizkiguten musikari gailenak. Kolore askodun mosaikoa izango da, anitza eta irekia, kalitate gorena helburutzat izango duena.
- Estreinaldiak: TESELA proiektuaren baitan, hiru obra berri estreinatuko dira; horiekin batera lehenbiziko aldiz entzungai izango da Lorenzo Ondarraren Padre Nuestro, Iruñako Orfeoiarekin.
- Ana María Valderrama biolinjotzaileak, XI. Pablo Sarasate Nazioarteko Biolin Lehiaketako irabazleak Saint-Saënsen Biolin eta orkestrarako 3. Kontzertua interpretatuko du, Ilych Rivas gaztearen zuzendaritzapean.
- Tinbalak instrumentu bakarlari gisa aurkeztuko dira Euskadiko Orkestrako tinbal-bakarlari Anthony Lafargueren eskutik.
- Ezohikoak diren obrak errepertorioko obra ezagunekin tartekatuko dira.
- Errepertorio klasikoa lantzearen apostuari eutsiz, L.V. Beethoven eta bere 1., 7. eta 8. Sinfoniak nabarmentzen dira.
- Orkestrak lehenbiziko aldiz interpretatuko du G. Mahlerren Seigarren Sinfonia erraldoia. Obra honetan Abonu-Denboraldian estreinako aldiz MUSIKENEko ikasleekin lankidetzan arituko da.
Lehenbiziko Abonu-programan, Iruñako Orfeoiak Euskadiko Orkestraren Denboraldia irekiko du, Lorenzo Ondarra nafarraren Padre Nuestro eta Fauréren Requiema interpretatuz.
Bigarren Abonu-programan, Modest Mussorgskyren "Erakusketa bateko koadroak" obra interpretatzearekin batera, Orkestrak beste diziplina artistikoak eraman nahi ditu lau hiriburuetako auditorioetara. Iruñan, Oteiza Museoarekin lankidetzan, Jorge Oteizaren Combinación binaria de dos longitudes en el espacio obra erakutsiko da Baluarteko sarreran kontzertuaren egunean, urriaren 15ean.
Informazio gehiago
Euskadiko Orkestraren 2012/2013 Denboraldia Iruñan. Prentsa-txostenaMiramongo Matinéen 2012/2013 denboraldia: Berrikuntzatik tradiziora
Orkestraren Miramongo egoitzan aurkeztu berri dira XXI. Miramongo Matinéeak. Orkestraren zuzendari nagusi Iñigo Alberdik, zikloaren babesle Kutxaren ordezkari Mikel Mendartek eta kontzertuetan arituko diren hainbat musikarik beste behin tradiziora berrikuntzaren bidetik hurbilduko den denboraldiaren nondik norakoa agertu dute komunikabideen aurrean.Miramongo Matinéeak Orkestraren jarduera sinfonikoaren osagarrizko ganbara-ziklo gisa jaio baziren ere, larunbatetan gure Egoitzara datozen entzuleak liluratzen dituen nortasun propioa lortu zuten berehala.
Matinéen 2012/2013 Denboraldiak Arambarri, Madina, Donizetti edo Bacewicz bezalako musikagile ezezagunen musika zein aro guztietako ganbera-errepertorioaren lan nagusiak entzuteko aukera eskainiko du. Iñaki Fresánen edo Olatz Saituaren ahotsek, Martin Fröst eta Asier Polo bakarlari ospetsuak eta Sigma Project edo Ensemble Diatessaron bezalako ganbera-taldeak entzuleen bidaideak izango dira Erdi Arotik XXI. Mendera doan musika-aurkikuntzako bidai honetan.
Kutxari bere Gizarte Ekintzaren bidez Miramongo Matinéeak zikloari, sortu zenetik, hogeita bat denboraldietan emandako laguntza eskertzen diogu, musika erreferente bilakatu arte ziklo honek bizitako bilakaera ahalbidetu duen laguntza, hain zuzen ere.
Abonuen salmenta. Hamasei kontzertuetarako abonuak salgai daude jada Euskadiko orkestraren telefono zenbakiaren bidez (943 01 32 32). Abonuaren prezioa 76,50€-koa da. Orkestraren beste zikloetako abonatuek, Kursaal Fundazioko abonatuek, Eureka! Zientzia Museoaren lagunek eta Gazte Kutxa eta Urrezko Txartelaren titularrek deskontua izango dute.
Denboraldi honetan ere doako autobus zerbitzua izango da abonatuentzat, 10:25etan Gipuzkoako Plazako 4. zenbakitik atera eta Antso Jakituna Hiribidea, 18an eta Madrilgo Hiribidea, 34an geldialdiak egiten dituena.
Sarreren salmenta. Sarrera solteak urriaren 1etik aurrera daude salgai. Sarrera bakoitzaren prezioa 7€-koa izango da eta Telekutxa (943 00 12 00), www.kutxasarrerak.net helbidean eskura daitezke; Kursaal Auditorioko leihatilan (EOSen kontzertu egunetan 12:00etatik 14:00etara eta 18:00etatik 20:00etara eta Kursaal Fundazioaren emankizun egunetan 17:00etatik 20:00etara); Egoitzaren leihatilan, halaber, kontzertu egunean 10:30etatik aurrera, aforo librerik balego.
Informazio gehiago
Miramongo Matinéeen 2012/2013 Denboraldiaren prentsa-txostenaEuskadiko Orkestrak Andrey Boreykoren eskutik irekiko du Abonu Denboraldia
Irailaren 28 ostiralean Gasteizko Principal Antzokian abiatuko da Euskadiko Orkestra Sinfonikoaren 2012-2013 Abonu Denboraldia. Orkestrak ohiko lau hiribiruetan orain hasi eta 2013ko ekainaren 17a bitartean eskainiko dituen 54 kontzertuetatik lehena izango da. "Requiem atsegina, sinfonia klasikoa" izenburudun programan, bere zuzendari printzipal gonbidatu Andrey Boreykoren zuzendaritzapean eta Iruñako Orfeoia, Arantza Ezenarro sopranoa eta José Antonio López baritonoa lagun dituela, Orkestrak L. Ondarraren Padre Nuestro, G. Fauréren Requiema eta J. Brahmsen 2. Sinfonia intepretatuz abiatuko du denboraldi berria. 28an Gasteizen, urriaren 1an eta 3an Donostian, 2an Iruñan eta 4an Bilbon.
Lorenzo Ondarraren (Bakaiku, 1931-Pamplona, 2012) Padre Nuestro obraren orkestrarako bertsioaren erabateko estreinaldia duela gutxi zendutako konpositoreari omenaldia bilakatuko da kontzertuaren hasieran. Orkestrarekin batera Igor Ijurrak zuzentzen duen Iruñako Orfeoia arituko da. Ondoren, Fauréren Requiem txalotua bertsio sinfoniko-koralean izango da entzungai. Honetan Arantza Ezenarro sopranoa eta José Antonio López baritonoa arituko dira, Iruñako Orfeoiaz gain. Egitaraua osotzeko, bigarren zatian Brahmsen 2. Sinfonia re maiorrean izango da atriletan. Partitura hau alemaniar konpositorearen katalogoa osatzen duten obren artean klasikoenetakoa dugu.
Andrey Boreyko Belgikako Orkestra Nazionaleko musika zuzendaria da irailaren 1etik eta bost urtetan zehar zuzenduko du berau. Halaber, Düsseldorfeko Orkestra Sinfonikoko zuzendari titularra eta Euskadiko Orkestraren zuzendari printzipal gonbidatua da 2009 urtetik. Boreyko maisua joan zen uztailan New Yoreko Orkestra Filarmonikoa zuzednu ondoren itzuli da EOSen podiumera eta datorren azaroan ere lau kontzertutan zuzenduko du, Frank-Peter Zimmermann biolinjotzailea bakarlari gonbidatu dela. Bestalde, New York izan da Iruñako Orfeoiaren azken helburuetako bat: ekainan Lincoln Center-era itzuli eta arrakasta nabarmena lortu zuen (2010ean gainera Carnegie Hall aretoan aritzen zen estatuko lehen abesbatza bilakatu zen). Orfeoia emanaldi ezberdinetan izan da Orkestraren lankide, bai abonuan eta baita beste formatutan ere. Arantza Ezenarro eta José Antonio López estreinakoz arituko dira Abonu Denboraldian.
Informazio gehiago
Esku-egitarauaEuskadiko Orkestrak kontzertu bat eskainiko du XX Otoño Musical Soriano jaialdian
Euskadiko Orkestra estreinakoz arituko da aurtengoan hogeigarren aldia duen Otoño Musical Soriano jaialdian. Irailaren 20a ostegunean Palacio de la Audiencia kulturguneko Odón Alonso aretoan ariko da. Lorenz Nasturica-Herschcowicik zuzenduta, Judith Jáuregui donostiar pianojotzailea ariko da bakarlari. Emanaldi honetarako aukeratutako egitarauak Beethovenen Coriolan-en obertura eta Mozarten Piano eta orkestrarako 9. Kontzertua eta 40. Sinfonia biltzen ditu.
Hogeigarren edizioan, Otoño Musical Soriano jaialdiak omenaldia egingo dio 2011ko otsailan zendutako Odón Alonso sortzaileari. Odón Alonsok lotura estua izan zuen Euskadiko Orkestrarekin honen hastapenetan, 80ko hamarkadan. Izan ere, bera izan zen Orkestran Abonu Denboraldiaren historian lehenbiziko zuzendari gonbidatua. Irailaren 7tik 23ra jaialdian ariko dira Madrilgo Capilla Real, Orquesta Sinfónica de Castilla y León edo Estrella Morente flamenko-kantaria, besteren artean.
Euskadiko Orkestrak kontzertino printzipal gonbidatu eta Municheko Orkestra Filarmonikoko kontzertino Lorenz Nasturica-Herschcowocik zuzenduta egingo du debuta Sorian. Mozarten Pianorako 9. Kontzertua interpretatzerakoan Judith Jáuregui izango du bakarlari gonbidatu. 2011ko azaroan Abonu Denboraldian debuta eta orain Simón Bolívar Orkestrarekin Diego Matheuzen zuzendaritzapean debuta egin ostean ariko da berriz ere Orkestrarekin.
Euskadiko Orkestraren kontzertua Côte Basque jaialdian
Euskadiko Orkestra Musique en Côte Basque jaialdira itzuliko da irailaren 11 asteartean. Jun Märkl maisuaren zuzendaritzapean, kontzertu bat emango du Donibane Lohitzuneko Elizan 21:00etatik aurrera. Bakarlari lanetan, Thomas Ospital organo-jotzaile gaztea eta atriletan euskal eta frantziar musika, Aita Donostia, Claude Debussy (bere jaiotzaren 150 urteurrenean) eta Camille Saint-Saënsen obrak izango direlarik entzungai.
Musique en Côte Basque jaialdi entzutetsuaren 53. edizioa da aurtengoa eta honetarako Claude Debussy konpositore frantziarraren jaiotzaren 150. urteurrena aukeratu da argudio nagusi. Abuztuaren 22an, musikagilearen jaiotza egunean hasi eta irailaren 14a bitartean, Euskadiko Orkestra Sinfonikoaz gain, Askain, Angelu, Miarritze, Baiona eta Ziburuko eszenatoki ezberdinetan Bruselako Orkestra Filarmonikoa, Hervé Niquet-ek zuzendua, Quattuor Debussy, Isabelle Faust eta Alexander Melnikov edo Jean Yves Thibaudet ariko dira, besteak beste.
Euskadiko Orkestrak "The Impossible" filmaren soinu-banda aurkeztuko du Zinemaldiaren baitan
Euskadiko Orkestra Sinfonikoak, Telecinco Cinema eta Apaches Entertainment-en eskutik, "The Impossible" filamaren soinu-banda originala aurkeztuko du Zinemaldiaren baitan irailaren 22an izango den kontzertuan.
Euskadiko Orkestrak "The Impossible" pelikularen soinu-banda honen egile Fernando Velázquezen zuzendaritzapean interpretatuko du. Egitaraua osotuz, "El Orfanato", J.A. Bayonaren aurreko filmaren eta zuzendari honen "El hombre esponja" laburmetraiaren soinu-bandak izango dira entzungai, hauek ere Fernando Velázquezek idatziak.
"The Impossible" filmaren soinu-bandaren aurkezpen-kontzertuak filma honek Donostiako Zinemaldian izango duen presentzia osatuko du: luzemetraia sail ofizialean emango da eta protagonista den Ewan McGregor aktoreak Donostia Saria jasoko du bere karrera osoaren aintzatespen gisa.
Euskadiko Orkestra Sinfonikoak aurrez Zinemarenganako gerturatze ezberdinak egin ditu dagoeneko, hauetako batzuk Donostiako Zinemaldiaren barruan: Carmelo Bernaolaren musika zuen King Vidorren The crowd filmaren eta Zamecniken Wings filma mutuen soinu-banden grabaketa adibidez. Lalo Schifrin Misión Imposible filmaren soinu-bandaren egile argentinarraren zuzendaritzapean hainbat kontzertu eskaini ditu film ezberdinen soinu-bandak interpretatuz. Eta 1991 eta 1992 urteetako edizioetan erabili zen Zinemaldirako sintonia grabatu zuen eta baita El mal ajeno luzemetraiaren soinu-banda ere; hau ere The Impossible-ren soinu-bandaren egile Fernado Velázquez-ek sortua.
Kontzertua irailaren 22an izango da, 12:00etan Euskadiko Orkestrak Donostian duen egoitzan (Miramon Pasealekua, 124). Sarrera doakoa izango da eta beharrezkoa izango da aurrez gonbidapena jasotzea Zinemaldiak Donostiako Okendo Plazan izango duen karpan ("info-shop" informazio gunean), irailaren 15etik 21era 10:00etatik 20:00etara. Sarrerak aforoa bete arte eskuragarri. Bat pertsona bakoitzeko.
The Impossible filma 2012ko urriaren 12an estreinatuko da Espainian Warner Bros Pictures Intl. España-ren eskutik.
IV. Musika Laborategia aurkeztu berri da, egungo konposizioa ardatz izango duena
Miramonen aurkeztu berri da IV. Musika Laborategia. Konposizio garaikidea ardatz nagusi izango du eta MUSIKAGILEAK, Euskal Herriko Musikagileen Elkartearekin lankidetzan burutuko da. Prentsaurrekoan aritu dira EOSeko Zuzendari Nagusia, Iñigo Alberdi; Iñigo Aizpiolea Musikagileak Elkartearen ordezkari: Laborategiaren Zuzendari Nacho de Paz, proiektuan esku hartuko duten bost konpositoreak eta Josetxo Silguero, interpretatuko diren obratako baten bakarlaria.
IV. Orkestrak Euskadiko musikarien esku jartzen duen esperimentazio artistikorako gunea da Musika Laborategia. Aurreko hiru alditan bakarlari gazteak, zuzendari hasiberriak eta profesionalizatze bidean ari ziren biolajotzaileak izan dira Orkestrarekin alor bakoitzean adituen gidaritzapean lan egiteko aukera izan dutenak. Orain, berriz, Musikagileak elkarteko bost konpositoreren txanda izango da. Mikel Urquiza, Aurélio Edler-Copes, Javier Jacinto, Juan José Eslava eta Mª Eugenia Luc-ek beren sorkuntza berrienak Orkestrak interpretaturik entzun ahal izango dituzte.
Musika Laborategia Orkestraren zuzendari titular Andrés Orozco-Estradaren ekimenez sortu zen, musikari gazteei beren ibilbide profesionalaren hasieran laguntza ematea helburu harturik. Lehenbiziko edizioan, 2010eko apirilean, Euskal Herriko Gazte Orkestrako (EGO) hainbat bakarlarik Andrés Orozco-Estrada maisuarekin lan egiteko aukera izan zuten. Zenbait lan-aldiren ostean, Euskadiko Orkestrarekin debuta egin zuten Miramongo egoitzan izandako kontzertu batean. Bigarren Laborategian, aurtengo martxoan, jatorri ezberdinetako zuzendari gazte talde batek Andrés Orozco-Estradarekin lan egin zuen hainbat egunetan eta ondoren Orkestra zuzendu zuten Miramongo Matinéeak zikloaren baitan. 2011ko udazkenean hirugarren Musika Laborategia ospatu zen. Hogei urtez Berlingo Orkestra Filarmonikoko biola bakarlari eta zuzendari Wolfram Christek zuzendu zuen eta Musikeneko ikasleekin lankidetzan burutu zen.
Orain konposizioaren txanda da, MUSIKAGILEAK Euskal Herriko Konpositoreen Elkartearen eskutik. Irailaren 5eko topaketan konferentzia/mahai inguru bat izango da; arratsaldeko 18:00etatik aurrera, Laborategian arituko diren bost konpositoreak "XXI. mendean orkestrarako idaztearen erronka: paradoxa, utopia edo aukera?". Jardunaldi honen ondoren, 20:00etan Euskadiko Orkestrak kontzertu bat eskainiko du, aukeratutako bost obrak interpretatuz. Hauetako batean Josetxo Silguero ariko da bakarlari. Guztiak Nacho de Paz-ek zuzenduta. Sarrera doakoa da.
Euskal Konpositoreen Bilduma itxiko duen Bernaolaren diska grabatzen
Denboraldiko lehenbiziko kontzertuen ostean, abuztuaren 29tik hasi eta irailaren 1 larunbatera bitartean, Euskadiko Orkestra Miramongo egoitzara bilduko da bere Euskal Konpositoreen Bildumako 15. zenbakiaren grabaketa burutzeko. Carmelo Bernaolaren lanari eskainitako CD monografiko honek Orkestraren proiektu diskografiko nabarmenena itxiko du. Hamabost emanalditan bilduma honek euskal musikaren partitura nabarmenenak bildu ditu etorkizunerako, ezinbesteko erreferente bilakatu delarik.
Diskaren musika zuzendaritza Bernaolaren beraren dizipulu eta 90. hamarkadaren amaiera aldera Orkestraren zuzendari elkartu izandako Juanjo Menaren esku izango da eta Leticia Moreno biolinjotzailea arituko da bakarlari.
1997. urtean abian jarritako Bilduma Pedro Sanjuán, Valentín de Zubiaurre, Beltrán Pagola, Luis de Pablo, Juan Crisóstomo de Arriaga, Aita Madina, Tomás Garbizu, Aita Donostia, Pablo Sorozábal, Francisco Escudero, Andrés Isasi, Jesús Arámbarri, José Mª Usandizaga eta Jesús Guridiri eskainitako bolumenek osotzen dute.
Aurreko diskak bezala, hamabosgarren hau ere Claves suitzar diskoetxeak kaleratuko du eta hasieratik bilduma osoaren babesle izandako MONDRAGON erakundearen babesa izango du.
Diska datorren abenduan kaleratuko da.
Euskadiko Orkestrak doako bi kontzertu eskainiko ditu irailan
Irailaren 5ean eta 22an doako kontzertu bana eskainiko du Orkestrak Miramongo bere egoitzan. Publiko orori irekiak izango dira, aretoa bete arte (ez da gonbidapenik behar).
Irailaren 5ean: MUSIKA LABORATEGIA. Musika Gairaikidearen Inguruko Topaketa, Musikagileak Euskal Herriko Musikagileen Elkartearekin lankidetzan. "XXI.mendean orkestrarako idaztearen erronka"ren inguruko topaketa bati amaiera emateko, Euskadiko Orkestrak egungo konpositoreen obrak bilduko dituen kontzertua eskainiko du, Nacho de Paz zuzendari gaztearen gidaritzapean. 20:00etan Miramongo Egoitzan. Doako sarrera aretoa bete arte.
Irailaren 22an: "Lo Imposible" filmaren Soinu Bandaren aurkezpena. Zinemaldiaren baitan. "Lo Imposible" filma urrian estreinatuko da zinematan eta aurrez emanaldi bat izango da Donostiako Nazioarteko Zinemaldian. Estreinaldiarekin batera, Euskadiko Orkestrak filmaren soinu banda aurkeztuko du. Fernando Velázquezek sortutako soinu banda honekin batera Velézquezek berak "El Orfanato" edo "El hombre esponja" pelikuletarako idatzitako soinu bandak ere interpretatuko ditu Orkestrak. Fernando Velázquez izango da gainera kontzertuaren zuzendari arituko dena. 12:00etan. Miramongo Egoitzan. Doako sarrera aretoa bete arte.