Datozen egunotan Euskadiko Orkestra Sinfonikoak Aurrera pausu bat emango du 2011/2012 Abonu-Denboraldian. Hamargarren programak interesgarriak diren argudio ezberdinak biltzen ditu, horien artean venezuelar sistema emankorretik sortua den eta Europan ibilbide nabarmena burutzen ari den Diego Matheuz zuzendariaren debuta espainiar estatuan eta Mario Lavistaren Tres cantos a Edurne obraren erabateko estreinaldia Tesela proiektuaren baitan. Kontzertuak izango dira apirilaren 14an Bilbon, 16 eta 19an Donostian, 17an Gasteizen eta 18an Iruñean.

27 urterekin, Diego Matheuz, Gustavo Dudamelen urratsei jarraiki, venezuelar sistema ospetsuaren fruitua da. Haur zein gazte orkestra-sare nazional baten bidez, musika-talentu berrien harrobi garrantzitsua da sistema hau. José Antonio Abreuk duela 36 urte abian jarritako hezkuntza-egitura honen erakusle nagusi Gustavo Dudamelek Los Angeles eta Gotemburgeko Orkestra Sinfonikoen titular gisa bere ibilbidean aurrera doan moduan, Diego Matheuz Claudio Abbadoren eskutik heldu da Europara eta Veneziako La Fenice antzoki mitikoaren musika-zuzendaria da egun. Europar orkestra onenak zuzentzen dituen bitartean, Matheuz Europa, Txina eta Japonian barrena ari da lanean eta orain estreinako aldiz dator espainiar estatura Euskadiko Orkestra Sinfonikoa zuzentzera. Gaurtik aurrera Diego Matheuz Euskadiko Orkestra Sinfonikoaren buru arituko da programa osatuko dute bost kontzertuak prestatu eta zuzentzeko. Atriletan izango dira aipatu Mario Lavistaren Tres cantos a Edurne, Saint-Saënsen Biolontxelo eta orkestrareko 1. kontzertuaren biolarako moldaketa eta Rimsky-Korsakoven Sheherazaderen suite sinfonikoa.

Tres Cantos a Edurne, Tesela proiektuaren hirugarren estreinaldia. Kontzertuak Tesela proiektuaren baitan sortutako obra berri baten estreinaldiarekin irekiko dira. BBVA Fundazioaren lankidetza esklusiboa duen proiektu honekin Euskadiko Orkestraren 30. urteurrena ospatzen da konpositore nabarmenei egindako enkarguen bidez. Eduardo Lavista mexikarrak sortua, Tres cantos a Edurne obra erlijiosoa da. Bata bestearen atzetik etenik gabe doazen hiru atal labur ditu. Triptiko piktoriko baten antzera, kantu bakoitzak adierazpide berezia du, sentimendu propioa, baina aldi berean, kantu bakoitzak beste bien ezaugarri komunak ditu.

Gramophone Magazine britainiarrak, musika klasikoaren alorrean munduko aldizkari ospetusenetako batek, bere apirileko zenbakian, Kadenza diskoa aukeratu du Editor's Choice delakoa osatzen duten hamar DK-en artean. Aukeraketa hau aldizkariak urtero banatzen dituen Gramophone Awards sarien atarikoa da. Sarritan musika klasikoaren "Oscar"-ak deituak, sari hauek industria diskografikoaren baitan, musika klasikoaren alorrean banatzen diren sari garrantzitsuenak dira.

Zenbaki honetan Kadenza diskoarekin batera garaileen zerrenda honetan agertzen dira Helsinkiko Orkestra Filarmonikoak Rautavaa-ri eskainitako grabaketa bat; Tchaikovsky-ren lanak biltzen dituen DK bat, Tugan Sokhiev-en zuzendaritzapean Orchestre National du Capitole de Toulouse-ek grabatua; eta Lutoslawski-ri eskainitako monografiko bat, BBC Symphony Orchestrak interpretatua eta Edward Gardinerrek zuzendua. Lehen mailako edizioak dira zalantzarik gabe, orkestra zein zuzendari gailenek burutuak.

Kadenza Euskadiko Orkestrak lehen mailako musika garaikidearen alde egindako apostuaren emaitza da, oraingoan Sofia Gubaidulinaren (Cristopol, Tartaristango Errepublika, Errusiar Federazioa, 1931) lana bildu duelarik.

Iñaki Alberdi akordeoijotzailea eta Asier Polo biolontxelojotzailea aritu dira bakarlari grabaketa honetan, Euskadiko Orkestrako ganbera talde batekin batera. Disko honen balio nagusienetako bat biek Sofia Gubaidulinarekin berarekin José Ramón Encinar maisuaren egindako elkarlan nabarmena da.

ET'CETERA disko etxe holandarrak argitaratutako disko honek Seven Words, In Croce, Kadenza eta Et exspecto obrak jasotzen ditu eta aukeraketa hau ezin hobea gertatzen da Sofia Gubaidulinaren obrara hurbiltzeko.

Kadenza 2011ko abenduaren 20an aurkeztu zen komunikabideen aurrean, Donostiako Iesu elizan. Ekitaldi hartan dikoko hainbat zati zuzenean interpretatu zituzten Iñaki Alberdi, Asier Polo eta Euskadiko Orkestrako ganbera taldeak.

Larunbatean, hilak 24, Miramongo Matinéeak zikloaren programazioak musikaren historiako izen handienetako bat hartuko du berean, baina bere nortasunari eutsiz honen obraren alderdi ezezagunena berreskuratuko du. Händel izango da hain zuzen ere egitarauaren funtsa. Baina ez da Mesias edo oratorio handien Händel izango, ganbera musika intimista eta delikatuaren sortzaile den Händel baizik. Kontzertuaren izenburuak, "Händel with care", musika-instrumentuen kaxatan agertu ohi den "handle with care", hauskorra, oharrari erreferentzia egiten dion hitz jokoa da; aldi berean, aukeratutako egitarauaren izaerari ere so egiten dio.

Händel Elena Sancho sopranoaren, Borja Rubiños klabe-jotzailearen eta Euskadiko Orkestra Sinofnikoko kide diren Irene Echeveste biolin-jotzailea eta Gabriel Mesado biolontxelo-jotzailearen eskutik dator Matinéetara.

Georg Friedrich Händel konpositorea barroko garaiko sortzaile nagusienetako bat dugu eta baita mendebaldeko musikan artista eraginkorrenetako bat ere. Bera dugu bere sorkuntza noblezia zein mezenasei eskaini beharrean entzulegoaren gustura egokitu eta zuzendu zuen lehenbiziko konpositore modernoa. Italian emandako lehenbiziko urteetatik Londresen pasatako azken egunetaraino ia bere ibilbide osoa hartzen duen bere ganbera-musika ekoizpen interesgarritik, Bederatzi aria alemaniar entzungo ditugu. Oratorio sendoengandik urrun, Händelen katalogo guztiko lan pertsonal zein ederrenetariko bat bilakatu ziren. Testuek, Barthold Heinrich Brockes-ek idatzitako poemek, naturaren edertasunaren eta honek gizakiekiko duen eraginaren inguruko irudi poetiko ugari biltzen dituzte. Horren emaitza dira aria malenkoniatsu, samur zein lirismo gozodunak. Egitaraua osotuz, 3. Sonata la maiorrean, opus 1, eta 13. Sonata re mariorrean, opus 1. Maisu-lan txikiak dira, bere oratorio erraldoiengatik ezaguna den konpositoreak ustekabean sortutako bitxiak.
Kontzertua goizeko 11etan hasiko da eta sarrerak www.kutxasarrerak.net eta Telekutxa (943 00 12 00) bidez eros daitezke, eta kontzertu egunean baita Orkestraren egoitzan ere, 10.30etatik aurrera. Halaber, gogorarazten dizuegu doako autobus zerbitzua dagoela egoitzara etortzeko, 10.25etan Gipuzkoa Plaza, 4tik atera eta Antso Jakituna, 18an eta Madrilgo Hiribidea, 34ean geldialdiak egiten dituelarik. 

Larunbatean Gasteizko García Lorca Antzokian eta igandean Donostiako Kursaaleko ganbera-aretoan, Musika Familian zikloko "Sorpresa kutxa" kontzerturako sarrerak agortu egin ziren. Perkusioa sortzeko mila eta bat bide erabiliz, umorez beteta eta ikuslegoarekin erabateko konplizitatean, haur eta helduekin bat egitea lortu zuten Stick Dance Quartet taldekoek ordu eta laurdenean. Ikusgai duzuen bideo honetaz gain, webguneko ARTXIBOAn Donostiako kontzertuko argazkiak topatuko dituzue.

Hemen da KlasikAT. Kepa Junkera eta Euskadiko Orkestra, Enrique Ugartetk zuzenduta, asteazkenetik aurrera eskainiko dituzten kontzertuen programari azken ukituak ematen ari dira jada. Asteazken honetan Orkestra eta Kepa Iruñeako Baluarte Auditorioan arituko dira estreinakoz eta ondoren 22an Donostiako Victoria Eugenia Antzokian, 23 eta 24an Bilboko Arriaga Antzokian eta, amaitzeko, martxoaren 28 asteazkenean Gasteizko Principal Antzokian izango diren kontzertuak etorriko dira. Guztiak iluntzeko zortziretan hasiko dira eta sarrerek 15€-tako prezio bakarra dute. 

Ez galdu aukera, garaiz zabiltza oraindik zure sarrera eskuratzeko!

-Baluarte Auditorioa, Iruña: Auditorioko leihatilan (948 06 60 60), ServiCaixa (902 33 22 11), ServiCaixa kutxazainetan, www.baluarte.com. 
-Victoria Eugenia Antzokia, Donostia: Antzokiko leihatila (943 48 18 18), Telekutxa (943 00 12 00) eta www.kutxasarrerak.net.
-Arriaga Antzokia, Bilbao: Antzokiko leihatila (944 310 310), BBKren orotariko kutxazainetan eta www.bbk.es.
-Principal Antzokia, Gasteiz: Antzokiko leihatilan, Udaletxeko telefono zerbitzua (945 16 10 45) eta http://entradas.cajavital.es, www.vitoria-gasteiz.org/teatros.

Euskadiko Orkestraren 2011/2012 Abonu-Denboraldia 9. programara helduko da ostiral honetan, hilak 16, Gasteizko Principal Antzokian. Kontzertu bakarrean, nazioarte mailako tronpa-interprete nagusienetako bat den Radovan Vlatkovic berriz ere lankidetzan arituko da Euskadiko Orkestrarekin. Baina oraingoan zuzendari gisa arituko da.

Radovan Vlatkovic (Zagreb, 1962), Berlingo Irratiko Orkestra Sinfonikoko tronpa bakarlari izan zen eta postu hau bere ibilbidea bakarlari gisa jarraitzeko utzi zuen. Egun tronpa-jotzaile ospetsuenetakoa da eta jarduera pedagogikoari dagokionez irakasle da Salzburgeko Mozarteumean eta Madrilgo Sofia Erregina Goi Mailako Musika Ikastegian. Vlatkovicek 2009an egin zuen debuta Euskadiko Orkestraren Denboraldian, Krzysztof Pendereckiren zuzendaritzapean bakarlari aritu zela, eta orain Orkestraren Haize-Sekzioa zuzentzeko itzuli da gurera.

Kontzertu honetako egitaraua Mendelssohnen Nokturnoa haizeentzako, Dvoráken Serenata haizeentzako eta Mozarten Gran Partita obrek osatzen dute. Juan Manuel Viana, egitarauari oharren egile kritikariak hitz hauekin laburbildu du: "Haize instrumentuetarako Gran Partita izugarrizkoarekin, garaiko serenatek eta divertimentoek ezaugarri zuten izaera arina, adeitsua eta gorte girokoa gainditu zuen Mozartek. Berak utzitako ondarea 1824an jaso zuen Mendelssohn nerabeak haren obra ezezagunetako baten bitartez eta, mende erdi geroago, Dvorákek, bere sustrai eslovakiarrei tinko eutsi zien Serenata zoragarrian jaioterriko folklorearen arrastoa eta musika herrikoia jotzen zuten talde haien nortasun landatarra konbinatzean".

Kontzertua Bilboko Juan Crisóstomo de Arriaga Musika Kontserbatorioan. Bezperan, osteguna hilak 15ean, Orkestrako Haize-Sekzioak, kroaziar birtuosoaren zuzendaritzapean, egitarau hori bera interpretatuko du Bilboko Juan Crisóstomo de Arriaga Musika Kontserbatorioan, erakunde honen kontzertu-programazio interesgarriaren baitan.

Asteburu honetan "Musika Familian" zikloa etxeko txikienentzako hitzordu berri batekin itzuliko da: martxoaren 17 larunbatean Gasteizko Udalarekin koprodukzioan arabar hiriburuko García Lorca Antzokian eta igandean, hilak 18, Kursaal fundazioarekin koprodukzioan Kursaaleko ganbera-aretoan. Stick Dance Quartet perkusio-taldeak ia edozein objektu musika-instrumentu bilakatu daitekela erakutsiko digu "Sorpresa kutxa" egitarauaren bidez. Xamurra, egunerokoa, umorezkoa eta, betiere, perkusioaren munduari darion sentsibilitatez eta dituen aukera espresiboez betetako proposamena izango da; bizitza bera sorpresa kutxa baita. Donostian adin guztietarako kontzertua izango den bitartean, Gasteizkoa bereziki haurtxoentzako prestatutako bertsioa izango da.

Kalitatea eta dibertsioa. Stick Dance Quartet taldeak, Euskadiko Orkestrako kide zein lankidek osatua, bere gaitasun dramatiko zein musikazko oro erabiliko ditu entzulegoarentzat dibertigarria eta interpreteentzat musikalki konplexua den muntaia honetan.

Donostiako kontzertuaren aurretik, Sentsibilizazio Tailerra. Kursaaleko ganbera-aretoko kontzertuaren aurretik, 16:45etan sentsibilizazio tailerra izango da. Entzute aktiboa bultzatzera zuzendutako jarduera honetan ondorengo kontzertuarekin erlazioa izan dezaten diseinatutako ariketak lantzen dira. Oraingoan Ana Eguiazabalek zuzenduko duen tailer hau doakoa du kontzerturako sarrera duen ororentzat, baina tokia mugatua da. Bertaratu ahal izateko Kursaal Elkarguneko Bulegoetako 943 00 31 80 telefonoan izena eman behar da.

Aurkeztu berri da Bilboko Arriaga Antzokian KlasikAT zikloaren hirugarren kontzertu-sorta. Prentsaurrekoan aritu dira Iñigo Alberdi, Euskadiko Orkestraren zuzendari nagusia, Kepa Junkera, konpositore eta trikitilaria, Emilio Sagi, Arriaga Antzokiko zuzendari artistikoa, eta Nerea Lupardo, kontzertu hauen babesle den Euskaltel-en izenean. Guztiak bat etorri dira ekimen honetan esku-hartzeak eragin dien poza adierazterakoan.

Guztira bost kontzertu izango dira: martxoaren 21ean Iruñeako Baluarten, 22an Donostiako Victoria Eugenia Antzokian, 23 eta 24an Bilboko Arriaga Antzokian eta amaitzeko, martxoaren 28an Gasteizko Principal Antzokian.

Proiektu hau 2010 urtean Orkestra eta Keparen arteko estreinako elkarlanaren ondorioz sortu zen. Topaketa hura orain KlasikAT zikloaren kontzertu-sorta berri bat bihurtuko den lanaren oinarria izan zen. Euskadiko Orkestraren aldaberatasuna ezinbestekoa izan da jatorri, genero eta erritmo ezberdinen arteko fusioa inspirazio iturri duen musikari autodidakta honen obrari aurre egiteko garaian.

Aurrekoan bezala, Orkestrak Enrique Ugarte maisuaren gain utzi du KlasikAT berri hau zuzentzearen ardura. "Swing Gaua" zuzentzeaz gain, Alemanian bizi den tolosar zuzendari hau sarritan aritu da Euskadiko Orkestrarekin lankidetzan, esaterako Mike Oldfield-en "Music of the Spheres" diskoaren mundu-mailako aurkezpenean edo Benito Lertxunidrekin batera gauzatutako "Auhen Sinfonikoa" diskoaren grabaketan.

"Ipar Haizea". Kontzertu hauetan aurkezten den egitaraua HiriRecords-ek argitaratutako "Ipar Haizea" diskoan jaso da. Egunotan salmentan jarriko den lan hau Kepa Junkerak burututako estreinako disko sinfonikoa da.

KlasikAT egitasmoarekin Orkestrak bere musika eskaintza publiko anitzei zabaltzea du helburu, musika klasikoaz urrun geratzen diren eta orkestra baten ibilbide sinfonikoan arrotzak diren errepertorioak landuz. Horretarako Orkestrak beren musika-alorrean nabarmenak diren artista ospetsuekin bat egiten du. Honela, Michel Camilo pianojotzailearen eskuetatik irtendako latindar jazz onena eta Swing Gaua izan ziren 2010 eta 2011 urteetan egindako proposamenak.

Euskaltel-en babesa izango duten kontzertu hauetarako sarrerek 15 eurotako prezio bakarra dute eta ohiko salmenta-bideetan eros daitezke:

-Baluarte Auditorioa, Iruña: Auditorioko leihatilan (948 06 60 60), ServiCaixa (902 33 22 11), ServiCaixa kutxazainetan, www.baluarte.com.
-Victoria Eugenia Antzokia, Donostia: Antzokiko leihatila (943 48 18 18), Telekutxa (943 00 12 00) eta www.kutxasarrerak.net.
-Arriaga Antzokia, Bilbao: Antzokiko leihatila (944 310 310), BBKren orotariko kutxazainetan eta www.bbk.es.
-Principal Antzokia, Gasteiz: Antzokiko leihatilan, Udaletxeko telefono zerbitzua (945 16 10 45) eta http://entradas.cajavital.es, www.vitoria-gasteiz.org/teatros.

Martxoaren 10 larunbatean Miramongo Matinéeak zikloak Idoan ganbera-taldearen kontzertu bat hartuko du berean. Idoan ohikoa dugu jada Euskadiko orkestraren ganbera-zikloan. Oraingoan, "Udaberria, uda, udazkena, negua... Udaberria" izenburupean, Johannez Brahms eta Astor Piazzollaren partitura bana aukeratu dute. Lehena lehenbiziko emanalditik dute lagun eta bigarrenaren lanak taldeak bere errepertorio modernoa zabaltzeko asmoari erantzuten dio.

Idoan taldea ganbera musikarenganako maitasunak bultzaturik errepertorio klasiko, erromantiko eta modernoa sakonki lantzea erabaki zuten euskal musikari talde batek otsatzen du. Errepertorio oso zabala du taldeak, klasizismotik hasi, besteak beste Mozarten obrak bilduz, eta minimalismora, Philip Glass eta abarren lanak barne. Formazio ezberdinak hartzen ditu gainera, hari-hirukotea edo laukotea zein boskotea pianoarekin, esaterako. Bost bakarlariak hari-instrumentuen eskola onenetatik datoz eta ganbera-musikaren arloan kohesio nabarmena lortu dute, bai hotsari dagokionez eta baita teknika interpretatiboari dagokionez ere. Eskaini dituzten kontzertuen artean aipagarriak dira Miramongo Matinéeak zikloaren baita aurrez eskainitakoak eta Bilboko Orkestra Sinfonikoaren ganbera-musika zikloan, Euskalduna Jauregian, El Cuartito del Arriaga zikloan, Arriaga Antzokain, Oñatiko Santa Ana Komentuan edo Astigarragako Musika Eskolan eskainitako kontzertuak, besteak beste.

Kontzertua goizeko 11etan hasiko da eta sarrerak http://www.kutxasarrerak.net eta Telekutxa (943 00 12 00) bidez eros daitezke, eta kontzertu egunean baita Orkestraren egoitzan ere, 10.30etatik aurrera. Halaber, gogorarazten dizuegu doako autobus zerbitzua dagoela egoitzara etortzeko, 10.25etan Gipuzkoa Plaza, 4tik atera eta Antso Jakituna, 18an eta Madrilgo Hiribidea, 34ean geldialdiak egiten dituelarik.