Guridi eta Aita Donostiaren jaiotzaren 125. urteurrena Miramongo Matinéetan
Larunbatean, hilak 22, Jesús Guridi eta Aita Donostia izango dira Miramongo Matinéen emanaldi bateko protagonista. Aurten 125 urte betetzen dira biak jaio zirela eta Erro hari laukoteak ez du haiek omentzeko aukera galdu nahi izan eta beren ganbera-musika ekoizpeneko aukeraketa interesgarri bat ekarriko dute Euskadiko Orkestraren egoitzako eszenatokira.
Erro hari-laukotea Euskadiko Orkestrako lau musikarik ganbera-musikaren alorrean nagusi den generoarekiko, hari-laukotearekiko, alegia, duten interesaren ondorioz sortu da. Alor honetan, Nahatalie Dabadie eta Irene Echeveste biolinjotzaileak, Arkaitz Martínez biolajotzaileta eta Jon Larraz biolontxelojoleak, guztiak Euskal Herrian jaioak, apostu argia egiten dute euskal musikaren alde, beren erroetara jotzearen alde (hortik Erro izena aukeratu izana).
Kontzertu goiztiar honen egitaraua Aita Donostiaren Hari-laukoterako Lied-a eta Kuartetoa Min eta Jesús Guridiren 1. Kuartetoa sol-en obrek osatzen dute. Musikagile hauek leku garrantzitsua dute euskald musikaren historian, izan ere bertako XX. mendeko musika konpositorerik garrantzitsuenetakoak ditugu. Aita Donostia, hau da, Gonzalo Zulaika konpositore, organujotzaile eta musikologoa euskal folklorista handienetakotzat hartua izan da eta Jesús Guridi Fallaren belaunaldiko konpositore-taldeko kide izan zen, Conrado del Campo, Joaquín Turina, Julio Gómez eta Oscar Esplá-rekin batera. Orduko abangoardietatik at, erromantizismo sinfonikoaren ildoa euskal sinfonismoarekin uztartzen jakin zuen.
Kontzertua goizeko 11etan hasiko da eta honetarako eta Miramongo Matinéeak zikloko kontzertu guztietarako sarrerak www.kutxa.net, Servikutxa eta Telekutxa (943 00 12 00) bidez eros daitezke eta kontzertu egunean baita Orkestraren egoitzan ere, 10.30etatik aurrera.
Urriaren 20an zabaltzen da Euskadiko Orkestraren Eskola-haurrentzako Kontzertuetarako izena emateko epea
Ostegunean, hilak 20an zabaltzen da Euskadiko Orkestraren III. Eskola-haurrentzako Kontzertuetarako izena emateko epea. Oraingoan Orkestrak Diego Martín Etxeberriak zuzenduta eskainiko duen kontzertuak, Sheherazade eta beste ahots batzuk izenburu harturik, multikulturalitatea eta bizikidetza izango ditu hizpide, horretarako Rimsky-Korsakov, Borodin, Guridi, Brahms, Rossini eta abarren musikaz baliatuz. Kontzertu hau Lehen Hezkuntzako bigarren eta hirugarren zikloetako ikasleentzat izan da diseinatua.
Sheherazade eta beste ahots batzuk 2012ko maiatzaren 8, 9 eta 10ean helduko da Orkestrak Miramonen duen egoitzara, eguneko bi emanaldi izango direlarik. Eskola-haurrentzako Kontzertu hauetara joateko, ezinbesteko baldintza izango da ikastetxeko musika-irakaslea aurrez, 2012ko martxoak 9 ostiralean 12.00etan, Orkestraren egoitzan izango den Irakasleentzako Tailerrera bertaratzea.
Kontzertu hauetara etorri nahi duten ikastetxeek Donostiako Udalaren Hezkuntza Sailaren bidez eman behar dute izena 2011ko urriaren 20tik abenduaren 19ra bitartean (tel: 943 48 3384; posta elektronikoa: hezkuntza_educacion@donostia.org; www.donostiahezkuntza.org). Ikasle bakoitzeko prezioa 2,50 € izango da.
Orkestrako hiru kide bakarlari Euskadiko Orkestraren bigarren Abonu-programan
Bere titular Andrés Orozco-Estradaren zuzendaritzapean, Orkestra bere 2011/2012 Abonu-Denboraldiko bigarren programa osatzen duen obra-aukeraketa entseatzen ari da egunotan. Mendelssohndarra izenburu harturik, berezitasun bat dauka: Orkestra bi talde ezberdinetan banatuko dela, honela Mendelssohnen sinfonien integrala eskaini ahal izateko, aurretik jada interpretatua duen Bigarren Sinfonia.
Lehenbiziko taldeak (A), urriaren 20an Donostiako Kursaalean, 24an Euskaldunan eta 27an Principal Antzokian arituko denak EOSeko biolontxelo-taldeko bakarlari Gabriel Mesado izango du bakarlari. Egitaraua Mendelssohnen 1. Sinfonia eta 4. Sinfoniak ("Italiarra") eta Tchaikovskyren Rococó bariazioak izango dira entzungai, azken hau Gabriel Mesadok interpretatuko duena. Bartzelonan jaio arren, Alemanian bizi izan den musikari hau Kolonia eta Aachen-eko Kontserbatorioetan izan zen ikasle, C. Kanngieser eta H.C. Schweiker irakasleekin, eta baita Basileako Goi Mailako Kontserbatorioan ere. "Collegium Musicum Wiesbaden" Orkestra Sinfonikoko biolontxelo-bakarlari izan zen, honekin orain Euskadiko Orkestrarekin interpretatuko dituen Rococo bariazioak bakarlari gisa interpretatu zituelarik.
Bigarren taldea (B) 21ean Kursaalean eta 26an Iruñekoa Baluarten arituko da. Honetan Sara Zufiaurre Orkestrako klarinetejotzailea estreinakoz arituko da bakarlari gisa: Mendelssohnen Klarinete, corno di bassetto eta orkestrarako bi pieza intepretatuko ditu, Orkestrako klarinete-taldeko bakarlari Juan Navarrorekin batera. Mendelssohnek bere lagun Heinrich Joseph Baerman klarinetejolearentzat eta honen semearentzat idatzitako pieza hauen zailtasunaz gain, aipagarria da eszenatoki gainean bakarlari gisa irakaslea eta bere ikaslea ikusteko aukera emango digula. Izan ere, Juan Navarro, 1982an sortu zenetik Euskadiko Orkestrako kide izateaz gain irakasle moduan eskarmentu handiduna, Sara Zufiaurreren irakasle izan zen honek 8 urterekin klarinetea jotzen hasi eta hamalau urte geroago goi mailako ikasketak amaitu bitartean. Kontzertu hauen egitaraua osotuz, alemaniar musikagilearen 5. Sinfonia, "Erreformarena", eta 3.a, "Eskoziarra" izango dira atriletan.
2. Abonu-programa, A taldea
Urriak 20: Kursaal Auditorioa. Donostia-San Sebastián. 20:00h.
Urriak 24: Euskalduna Jauregia, Bilbao. 20:00h.
Urriak 27: Principal Antzokia. Vitoria-Gasteiz. 20:00h.
F. Mendelssohn: 1. Sinfonia
P.I. Tchaikovsky: Rococo bariazioak
F. Mendelssohn: 4. Sinfonia
Andrés Orozco-Estrada, zuzendaria
Gabriel Mesado, biolontxeloa (EOSeko kidea)
2. Abonu-programa, B taldea
Urriak 21: Kursaal Auditorioa. Donostia-San Sebastián. 20:00h.
Urriak 26: Baluarte Auditorioa, Iruñea. 20:00h.
F. Mendelssohn
5. Sinfonia
Klarinete, corno di bassetto eta orkestrarako bi pieza
3. Sinfonia
Andrés Orozco-Estrada, zuzendaria
Juan Navarro, klarinetea (EOSeko kidea)
Sara Zufiaurre, corno di bassetto (EOSeko kidea)
EITB Kultura Gaua saioak Euskadiko Orkestraren 2011/2012 denboraldia hizpide
Euskadiko Orkestraren 2011/2012 denboraldia izan da eitb kultura gaua saioaren argumentua. Kultura eta tendentziak hizpide dituen ETBren saio honetan, datozen hilabeteotan Orkestraren jardueraren ildo nagusiak izango diren programazio osoa, proiektu diskografikoak eta abar azaltzeaz gain, elkarrizketak ere izan dira. Honela, guzti honen inguruan aritu dira Iñigo Alberdi, Orkestraren zuendari nagusia, orkestrako kide den eta aurtengoan Abonu-Denboraldian bakarlari lanetan arituko den Sara Zufiaurre eta baita Kirmen Uribe idazlea ere, bera izango baita beste Abonu-programa batean Bilbao. New York. Bilbao bere elaberri famatuko hitzei ahotsa jarriko diena.
ETBren kanal ezberdinetan emititu ostean, saioa sarean ikus daiteke orain, oso osorik EITBren webguneko "nahieran" atalean.
Opus 64 taldeak Beethoven ekarriko du Miramongo Matinéetara
Larunbat honetan, hilak 8an, Euskadiko Orkestraren egoitzan Miramongo Matinéen bigarren emanaldia izango da. Bere osotasunean orkestrako kideez osatua dagoen Opus 64 haize-taldeak Ludwig van Beethovenek musikari-koupuru ezberdinez osatutako haize-taldetarako hiru obra interpratuko ditu: Sextetoa mi bemol maiorrean, Oktetoa mi bemol maiorrean eta Nonetoa flauta eta haize-oktetorako fa maiorrean.
Sextetoan Beethovenek ez du oboerik erabiltzen eta lehenbiziko klarinetearentzat paper nabarmena konposatu zuen lehenengo mugimenduan, sarrerako andante maestoso ohikoaren ondorengo allegroan. Oktetoan instrumentu-talde klasikoa darabil: batak bestea osotu eta kontrajartzen diren bikoiztutako lau ahots, idazkera mota honetan maisuak ziren Mozart eta Haydnek egindakoaren modura. Nonetoan, aldiz, oktetoari flauta bakar bat gehitu zion; honela flauta bakarlari gisa aritzen da, gainerako instrumentuek ahalbidetutako ehun harmonikoaren gainetik.
Monografiko honen bidez, Opus 64 taldeak alemaniar konpositorearen jeinutik sortutako ganbera-musikako pieza hauen gailentasuna aldarrikatu nahi du. Izan ere, etorriaren aldetik bere sinfonia handienekin aldaragarriak diren arre, ez baitira horiek bezain sarri interpretatzen.
Hitzordua goizeko 11etan izango da, beti bezala, eta sarrerak www.kutxa.net, Servikutxa eta Telekutxa bidez eros daitezke eta kontzertu egunean baita Orkestraren egoitzan ere.
Informazio gehiago
2. Miramongo Matinéearen esku-egitarauaUrriaren 7an hasiko da Euskadiko Orkestraren Abonu-Denboraldia
Urriaren 7 ostiralean Donostiako Kursaal Auditorioan Euskadiko Orkestraren Abonu-Denboraldiaren lehehnbiziko konpasak entzungo dira. Andrey Boreyko, Orkestraren zuzendari printzipal gonbidatua izango da estreinako kontzertu hauetan zuzenduko duena. Gainera, Alice Sara Ott pianojotzailearen birtuosismoaz gozatzeko aukera izango da, Ravelen Piano eta orkestrarako kontzertua sol maiorrean interpretatuko duelarik.. Egitaraua osotuz, Rautavaara finlandiarraren Cantus Arcticus, Haydnen 67. Sinfonia eta Bartoken Mandarin Miragarriaren suitea izango dira entzungai. Hilak 7an Donostian izango den kontzertuaren ostean, astelehenean Gasteizko Principal Antzokian, Iruñeko Baluarten, 13an berriz ere Donostian eta 13an Bilboko Euskaldunan izango dira lehenbiziko programa osotuko duten kontzertuak.
Alice Sara Ott pianojotzaile gaztea (Munich, 1988) Londres, Tokyo, San Francisco edo Vienako orkestrekin eta Philharmonia Orchestra delakoarekin aritu izan da jada, besteak beste. 2010ean Lang-Lang ordezkatuz Londreseko Barbican Center-en aritu zen, bere emanaldiak kritikaren harreta piztu zuelarik, eta joan den abuztuan BBC Proms jaialdian debuta egin zuen. EOSen Abonu-Denboraldiaren irekierara duela egun gutxi Pragan Txekiar Orkestra Filarmonikoarekin batera eta baita Pisako Anima Mundi jaialdian ere, Sir John Eliot Gardiner-en zuzendaritzapean aritu ostean helduko da. 2008.etik Deutsche Gramophon diskoetxearentzat grabatzen du bakarrik. Euskadiko Orkestrarekin debuta egiterakoan Maurice Ravelen Piano eta orkestrarako kontzertua sol maiorrean interpretatuko du. Lapurdiko konpositoreak sortutako kontzertuen artean argitsuenatzat jotzen da eta bere notek George Gershwin amerikarraren jazz zantzuak ezkutatzen dituzte. Egitaraua osotzeko Rautavaara finlandiarraren Cantus Arcticus, txori eta orkestrarako kontzertua, Haydnen 67. Sinfonia eta Bartoken Mandarin miragarriaren suitea izango dira entzungai.
55 kontzertu 30. denboraldian. 2012ko ekaina bitartean, guztira 55 izango dira Orkestrak bere Abonu-Denboraldiaren baitan eskainiko dituen kontzertuak, 14 programatan banatuak. Orkestra garai klasikoko obrak izango ditu hizpide nagusi eta errepertorio sinfonikoko obra gailenak interpretatuko ditu eta, halaber, Rimsky-Korsakoven Sheherazade, Mendelssohnen Udako gau bateko ametsa (obertura) edo Bernstein-en West Side Story interpretatuko ditu. Horretaz gain, modu berezian nazioarte mailako lau musikagileren lau obra estreinatuko ditu eta beste 14 obra interpretatuko ditu lehenbiziko aldiz. EOSen Abonu-Denboralditik igaroko diren izenen artean, Andrés Orozco-Estrada eta Andrey Boreykoz gain, Jesús López Cobos, Gerd Albrecht, Yan Pascal Tortelier, Lawrence Renes, Diego Matheuz, Judith Jáuregui, Joaquín Achúcarro, Arabella Steinbacher, Leticia Moreno, Daniel Müller Schott, Maxim Rysanov, Martin Grübinger, Sophie Koch eta abar luze bat izango ditugu.
Informazio gehiago
1. Abonu-programaren esku-egitarauaManuel Iradier Abesbatzarekin bere 50. urteurrena ospatuko dugu
Gasteizko abesbatzarik zaharrena den Manuel Iradier Abesbatzak 50 urte betetzen ditu aurten. Sortu zenetik Emilio Ipinza Gilek zuzendua, 3.000tik gora kontzertu eskaini ditu Araba, estatu mailan zein Europa, Ekialde Hurbila zein Hegoamerikako hainbat herrialdetan. 50 urte musikaren bidez kultura eta ohitura zaharrak zabaltzen, euskal kulturaren zabalkuntzari arreta berezia eskainiz, ospatzekoak dira eta horretarako hainbat ekitaldi izango dira urte osoan zehar. Horien artean irailaren 29an Gasteizko Principal Antzokian izango den kontzertua. Diego Martín Etxebarriaren zuzendaritzapean, Orkestra Manuel Iradier Abesbatzarekin berarekin eta Raquel Andueza, Barbara Koselj, Juan Sancho eta Pau Bordas bakarlariekin arituko da.
Bachen musika Miramongo Matinéeak zikloari hasiera emateko
Larunbat honetan, hilak 24, abian jarriko da Euskadiko Orkestraren egoitzan Miramongo Matinéeak zikloaren denboraldi berria. Eta Bach Ensemble taldearen eskutik hasiko da. Talde hau Euskadiko Orkestrako hainbat kidek eta Pedro José Rodríguez pianojotzaile eta klabezinistak osatzen dute. Guztiak atsegin handiz hartu dute aurretik, beren musika-ibilbidearen une ezberdinetan, jada interpretatu dituzten Bachen bi obra berrinterpretatu eta Matinéen entzulegoarekin partekatzeko aukera izatea. Orkestraren egoitzan, bere etxean izango da gainera.
Lehenbizi Johann Sebastian Bachen 2. Suitea si minorrean izango da entzungai. Alemaniar konpositore handiak Orkestrarako lau Suite idatzi zituen. Hauetako bakoitzak "Obertura" izena ere hartu izan du, lehenbiziko mugimendu honek obren osotasunean zuen garrantzia dela eta. Suite hau dantza ezberdinez osatutako segida bat da eta pasarte nagusia zeharkako flautak interpretatzen du, gaur Héléne Billard Alirolek, EOSeko flauta bakarlariak joko duena.
Jarraian, Brandenburgoko 5. kontzertua (BWV 1050) ezagutu edo berriro entzuteko aukera izango da. J.S. Bachen sei kontzertu ezagunenen artean kokatzen da. 5. Kontzertua flauta, biolina eta klabezinarekin interpretatzeko izan zen konposatua. Gaurkoan, Hélène Billard Alirolek, Raquel Cortinas EOSeko 2. biolinen bakarlariak eta Pedro José Rodríguez-ek, klabezinean dela, interpretatuko dute.
Hau izango da irailaren 24tik 2012ko ekainaren 2ra bitartean gipuzkoar kultur eskaintzari askotariko musikazko, klasikoa zein abangoardiako 16 proposamen gehituko dizkion zikloaren estreinako emanaldia.
Kontzertu honetarako sarrerak Servikutxa, Telekutxa (943 00 12 00), www.kutxa.net eta www.euskadikoorkestra.es bidez eta larunbatean 10.30etatik aurrera Egoitzako leihatilan eros daitezke.
Egitaraua
J. S. Bach
Orkestrarako 2. Suitea si minorrean, BWV 1067 [20']
Brandenburgoko 5. kontzertua re maiorrean, BWV 1050 [21']
Bach Ensemble
Hélène Billard-Alirol*, flauta; Irene Echeveste*, Oscar López*, Itziar Prieto*, Raquel Cortinas*, biolinak; Yann Seyrac*,Jean Michel Nougue*, biolak; Natalia Díaz*, biolontxeloa; Arkadiusz Maciejski*, kontrabaxua ; Pedro José Rodríguez, klabezina
*EOSeko kidea
Informazio gehiago
1. Miramongo Matinéeko esku-egitarauaEuskadiko Orkestra OLBEren denboraldiaren irekieran arituko da
Irailaren 24 larunbatean OLBEren denboraldiaren irekiera-funtzioa izango da eta bertan arituko da Euskadiko Orkestra. Donato Renzettik zuzenduta, Orkestrak Verdiren "Simon Boccanegra" interpretatuko du zulogunetik. Bilboko Operaren Lagunen Elkartearen "Tutto Verdi" egitasmoaren baitako opera.
Bilbon aurkeztuko dena Parmako Teatro Regio antzokiaren ekoizpena da, Hugo de Ana argentinarra eszena-zuzendari duena. Bakarlarien artean bereziki aipagarriak dira Ainhoa Arteta sopranoa eta George Gagnidze tenorea. "Simon Boccanegra"k XIV. mendeko Italiako bizitza politikoa islatzen du, plebeioen eta patrizioen arteko gatazkak nagusi zirenekoa. Egunotan antzeztuko dena egileak berak berrikusitako bertsioa izango da, 1881. urtean estreinatu zena.
Estreinaldiaren aurretik, hilak 23 ostiralean atariko hitzaldi bat izango da opera aurkezteko. Bertan Andrea Merli izango da hizlari. Lirikan aditua den musika kritiko honek L'Opera, Scherzo, Opera Actual edo Orpheus aldizkarietan eta www.mundoclasico.com webgunean da lankide.
24ko funtzioaz gain, "Simon Boccanegra" irailaren 27an eta 30ean eta urriaren 3an izango da Bilboko Euskalduna Jauregian.
Euskadiko Orkestraren doinu berriak www.osetunes webgunean
Denboraldi berria hastearekin batera, Euskadiko Orkestraren 19 doinu berri gehitu ditugu www.osetunes.es webgunean, dohain telefono mugikorrerako doinu gisa erabilgarri. Orkestrak interpretaturiko obren zatiak dira guztiak, jada argitaratutakoak batzuk, "Auhen Sinfonikoa" diskatik ateratakoak esaterako, eta zuzeneko grabaketetatik ateratakoak besteak. Kepa Junkera, Mikel Laboa, Benito Lertxundi edo Brahms, Vivaldi eta Offenbach Euskadiko Orkestrak interpretatuak zure mugikorrean entzuteko prest.
Aplikazio hau telefono mugikorraren bidez zein ordenagailu bidez da erabilgarria. Ordenagailua erabiliz, doinuak jaitsi eta gordetzeko aukera dago, gero Bluetooth teknologia erabiliz edo kable bidez mugikorrera pasa ahal izateko. Telefono mugikorra erabiliz, aldiz, melodiak zuzenean dei-tonu gisa ezartzeko gorde ahal izango dira.