Donostian ospatu berri den Euskal Gizataldeen V. Batzarrean esku hartu duten ehundik gora partehartzaile Orkestrak Miramonen duen egoitzan izan ziren azaroaren 5 larunbatean. Bertan Orkestrak egunotan eskaintzen ari den hirugarren Abonu-programaren entsegu orokor irekiaaz gozatzeko aukera izan zuten. Jardueraz betetako aste beteren ondoren, amaiera bikaina izan zen kontzertua. Hau izan zen, izan ere, Batzarraren egitarauan programatutako azken talde-ekintza.

Miramongo Matinéearen baitan, 24 herrialdetako 178 euskal etxeetako ehun ordezkariek Orkestra entzutzeko aukera izan zuten,Wolfram Christen zuzendaritzapean eta, bide batez, baita Judith Jáureguiren bakarlari interpretazioa ere. Emanaldiaren ondoren, guztiak eszenatokira igo ziren talde-argazkia egiteko.

Wolfram Christ, bi hamarkadatik gora Berlingo Orkestra Filarmonikoko biola bakarlari izandakoak, Euskadiko Orkestraren III. Musika Laborategia zuzentzen ari da gaur goizean. Guztira Musikeneko (Euskal Herriko goi Mailako Musika Ikastegia) 27 musikari izango dira interprete alemaniar entzutetsu honek zuzenduko duen maisu-eskolan. Horietatik sei, Musikenen biolako ikasketatan 3. eta 4. mailako ikasle direnak, aktiboki arituko dira eta gainerakoak entzule moduan izango dira. Aukera ederra da beren ibilbide profesionalari heltzear dauden musikari gazte hauentzat, beren kezkak partekatu eta nazioarte mailan biola-bakarlari gailenetariko baten esprientzia ezagutzeko aukera izango baitute. Hirugarren Laborategi hau Musikene-rekin lankidetzan egingo da, erakunde honekin bizi den harreman estuari esker.

Wolfram Christ nazioarte mailako ospea duen biola bakarlaria dugu. Sarriki herrialde ezberdinetan aritzen da eta bere errepertorioak barrokotik hasi eta abangoardiarainoko lanak biltzen ditu. Berlingo Orkestra Filarmonikoaren lehenbiziko biola izan zen hogei urtetik gora eta honekin hirurogei bat kontzertu eskaini zituen bakarlari gisa, besteak beste Claudio Abbado, Lorin Maazel, Bernhard Haitink eta Seiji Ozawa misuen zuzendaritzapean. Lucernako Jaialdiko Orkestraren kide sortzaile da eta honen bakarlari gisa aritu ohi da Lucernan eta baita nazioarte mailako biratan ere. Hainbat sari merezi izan dituzten DK grabaketek bere lankidetza emankorren adierazle dira. Horien artean, Debussyren flauta, biola eta harparako trioen grabaketak Grand Prix du Disques saria eskuratu zuen eta Hindemithen Biola eta ganbera orkestrarako 5. Kammermusik lanak Grammy saria merezi izan zuen.

Irakaskuntzaren arloan, Christ biola irakaslea da Freiburg Musikhochschule-n (Alemania) 1999tik. Bere jardueraren bidez profesional nahiz ikasleak elkarrekin aritzen dira musika sortu eta musikarekin esperimentatzeko. Gainera 2005ean Claudio Abbadok Ferrara eta Potenzako (Italia) Gustav Mahler Akademietako zuzendari artistiko izendatu zuen.

Musika Laborategia Orkestraren zuzendari titular Andrés Orozco-Estradaren ekimenez sortu zen, musikari gazteei beren ibilbide profesionalaren hasieran laguntza ematea helburu harturik. Lehenbiziko edizioan, 2010eko apirilean, Euskal Herriko Gazte Orkestrako (EGO) hainbat bakarlarik Andrés Orozco-Estrada maisuarekin lan egiteko aukera izan zuten. Zenbait lan-aldiren ostean, Euskadiko Orkestrarekin debuta egin zuten Miramongo egoitzan izandako kontzertu batean. Bigarren Laborategian, aurtengo martxoan, jatorri ezberdinetako zuzendari gazte talde batek Andrés Orozco-Estradarekin lan egin zuen hainbat egunetan eta ondoren Orkestra zuzendu zuten Miramongo Matinéeak zikloaren baitan.

Abonu Denboraldiaren hasierarekin batera, Euskadiko Orkestraren iragarki berria emititu zen ETBn. Baina orduan ikusi ez zuen ororentzat gure webgunean eskegi dugu orain. Izaera kontzeptual sakona duen pieza da, karga metaforiko nabarmenduna, baina zalantzarik gabe Orkestraren nortasunaren ezaugarriak hizpide dituena.

Hogei segundu eskas irauten dituen narrazio bisuala da, gure begien aurrean intepretazio-paleta zabala aurkezten duena. Irakurketa ugari egin daitezke, baina dudarik gabe kalitatea, zehaztasuna, taldea, Orkestra kultura-motore gisa ditu argudio nagusiak. Baina kontatu baino hobe ikusi...

Bere agertokien artean ezohikoak diren lekuetara heltzea helburu duen Orkestra Herrietan bere ekimenaren baitan, Euskadiko Orkestra urriaren 28an Markina-Xemeingo parrokian eta 31ean Durangoko Uribarriko Basilikan izango da.

Markina-Xemeinen Izarbidean elkartearen eskutik. Andrés Orozco-Estradak zuzendurik Orkestra Markina-Xemein eta Etxebarriako adimen urritasuna duten haur, gazte eta helduak biltzen dituen Izarbidean elkartearekin lankidetzan sustatutako kontzertuan arituko da. Ekimen honi esker Lea-Artibai eskualdeko biztanleek goi mailako kontzertu batean gozatzeko aukera bikaina izango dute: izan ere, bertan eskainiko den egitaraua, Orkestraren titularraren zuzendaritzapean eta Orkestrako kide Sara Zufiaurre eta Juan Navarro bakarlari direla, Abonu-Denboraldian eskaini berri da. EOS estreinako aldiz arituko da Markina-Xemeinen. Hitzordua hilaren 28an izango da, 20.00etan Markinako parrokian. Sarrerak Udaletxean eta Liburutegian eros daitezke (5€).

Durangon, Jesús Egiguren durangarraren musika interpretatuz. Urriaren 31ean, Nacho de Pazek zuzenduta, XXII. Durangoko Musika Hamabostaldia irekiko du. Arriaga eta Mendelssohnen obrez gain, Jesús Egiguren durangarrak Orkestraren beraren enkarguz idatzi eta joan zen otsailean Abonu-Denboraldian estreinatu zen Kindly Symphony interpretatuko du. Kontzertua Uribarriko basilikan izango da, 21.00etan eta sarrera doakoa da.

Larunbatean, hilak 22, Jesús Guridi eta Aita Donostia izango dira Miramongo Matinéen emanaldi bateko protagonista. Aurten 125 urte betetzen dira biak jaio zirela eta Erro hari laukoteak ez du haiek omentzeko aukera galdu nahi izan eta beren ganbera-musika ekoizpeneko aukeraketa interesgarri bat ekarriko dute Euskadiko Orkestraren egoitzako eszenatokira.

Erro hari-laukotea Euskadiko Orkestrako lau musikarik ganbera-musikaren alorrean nagusi den generoarekiko, hari-laukotearekiko, alegia, duten interesaren ondorioz sortu da. Alor honetan, Nahatalie Dabadie eta Irene Echeveste biolinjotzaileak, Arkaitz Martínez biolajotzaileta eta Jon Larraz biolontxelojoleak, guztiak Euskal Herrian jaioak, apostu argia egiten dute euskal musikaren alde, beren erroetara jotzearen alde (hortik Erro izena aukeratu izana).

Kontzertu goiztiar honen egitaraua Aita Donostiaren Hari-laukoterako Lied-a eta Kuartetoa Min eta Jesús Guridiren 1. Kuartetoa sol-en obrek osatzen dute. Musikagile hauek leku garrantzitsua dute euskald musikaren historian, izan ere bertako XX. mendeko musika konpositorerik garrantzitsuenetakoak ditugu. Aita Donostia, hau da, Gonzalo Zulaika konpositore, organujotzaile eta musikologoa euskal folklorista handienetakotzat hartua izan da eta Jesús Guridi Fallaren belaunaldiko konpositore-taldeko kide izan zen, Conrado del Campo, Joaquín Turina, Julio Gómez eta Oscar Esplá-rekin batera. Orduko abangoardietatik at, erromantizismo sinfonikoaren ildoa euskal sinfonismoarekin uztartzen jakin zuen.

Kontzertua goizeko 11etan hasiko da eta honetarako eta Miramongo Matinéeak zikloko kontzertu guztietarako sarrerak www.kutxa.net, Servikutxa eta Telekutxa (943 00 12 00) bidez eros daitezke eta kontzertu egunean baita Orkestraren egoitzan ere, 10.30etatik aurrera.

Ostegunean, hilak 20an zabaltzen da Euskadiko Orkestraren III. Eskola-haurrentzako Kontzertuetarako izena emateko epea. Oraingoan Orkestrak Diego Martín Etxeberriak zuzenduta eskainiko duen kontzertuak, Sheherazade eta beste ahots batzuk izenburu harturik, multikulturalitatea eta bizikidetza izango ditu hizpide, horretarako Rimsky-Korsakov, Borodin, Guridi, Brahms, Rossini eta abarren musikaz baliatuz. Kontzertu hau Lehen Hezkuntzako bigarren eta hirugarren zikloetako ikasleentzat izan da diseinatua.

Sheherazade eta beste ahots batzuk 2012ko maiatzaren 8, 9 eta 10ean helduko da Orkestrak Miramonen duen egoitzara, eguneko bi emanaldi izango direlarik. Eskola-haurrentzako Kontzertu hauetara joateko, ezinbesteko baldintza izango da ikastetxeko musika-irakaslea aurrez, 2012ko martxoak 9 ostiralean 12.00etan, Orkestraren egoitzan izango den Irakasleentzako Tailerrera bertaratzea.

Kontzertu hauetara etorri nahi duten ikastetxeek Donostiako Udalaren Hezkuntza Sailaren bidez eman behar dute izena 2011ko urriaren 20tik abenduaren 19ra bitartean (tel: 943 48 3384; posta elektronikoa: hezkuntza_educacion@donostia.org; www.donostiahezkuntza.org). Ikasle bakoitzeko prezioa 2,50 € izango da.

Euskadiko Orkestraren 2011/2012 denboraldia izan da eitb kultura gaua saioaren argumentua. Kultura eta tendentziak hizpide dituen ETBren saio honetan, datozen hilabeteotan Orkestraren jardueraren ildo nagusiak izango diren programazio osoa, proiektu diskografikoak eta abar azaltzeaz gain, elkarrizketak ere izan dira. Honela, guzti honen inguruan aritu dira Iñigo Alberdi, Orkestraren zuendari nagusia, orkestrako kide den eta aurtengoan Abonu-Denboraldian bakarlari lanetan arituko den Sara Zufiaurre eta baita Kirmen Uribe idazlea ere, bera izango baita beste Abonu-programa batean Bilbao. New York. Bilbao bere elaberri famatuko hitzei ahotsa jarriko diena.

ETBren kanal ezberdinetan emititu ostean, saioa sarean ikus daiteke orain, oso osorik EITBren webguneko "nahieran" atalean.