Egunotan Euskadiko Orkestrak eta Düsseldorfer Symphoniker orkestrak beren atrilak trukatuko dituzte. Ekainaren 13tik 17ra EOSen printzipal gonbidatu den Andrey Boreyko buru duen alemaniar orkestra Donostia, Iruñea, Gasteiz eta Bilbon arituko da, Euskadiko Orkestraren 2010/2011 Abonu-Denboraldiko azken programaren baitan. Espainiar estatuan bere debuta izango diren kontzertu hauetan Düsseldorfer Symphoniker orkestrarekin bakarlari gonbidatu gisa Khatia Buniatishvili georgiar pianojotzailea arituko da. Elkarrekin Brhamsen Piano eta orkestrarako 2. kontzertua interpretatuko dute eta, egitaraua osotzeko, Düsseldorfer Symphoniker-en lehenbiziko musika zuzendarietariko bat izandako Robert Schumannen 2. Sinfonia izango da entzungai.

Aldi berean, hilak 15ean biraren atariko moduan Donostiako Victoria Eugenia Antzokian kontzertu bat eskaini ostean, Orkestra Alemaniara abiatuko da, Düsseldorfeko Tonhalle aretoan, Symphiker-aren Abonu-Denboraldiaren baitan hiru kontzertu (hilak 17, 19 eta 20an) eta Güterloshko Stadthalle-n kontzertu bat eskaintzeko (hilak 18an). Andrés Orozco-Estrada zuzendari titularra izango da Orkestraren 14. nazioarteko bira honetako lau emanaldiak zuzenduko dituena. Italiara burutuakoaren ostean, Alemanian barrena Orkestrak egingo duen zazpigarren bira hau nazioarte mailako bigarrena izango du zuzendari kolonbiarrak EOSen buru gisa. Irtenaldi honetarako aukeratutako egitaraua Arriagaren "Esklabu zoriontsuak", Shotakovitchen Biolontxelo eta orkestrarako 1. kontzertua, bakarlari gisa Gautier Capuçon frantziarrak interpretatuko duena, eta Tchaikovskyren 5. Sinfoniak osatzen dute.

Urtetan Orkestrak burututako elkartruke-politika emankorraren baitan, nazioartean orkestrekin harremanek gero eta garrantzi nabarmanagoa dute, horren erakusle Orchestre National de Bordeuax-Aquitaine delakoarekin egindako elkartrukeen eta 2009an Orchestra Sinfonica di Milano Giussepe Verdi orkestrarekin egindakoaren ondoren, Düsseldorfer Symphoniker orkestra alemaniarrarekin egindako trukea.

Informazio gehiago

Ekainaren 23, 24 eta 25ean Donostian izango den ROCE 2011 Topaketa kontzertu pedagogikoen bidez akzio hezitzaileen arloan jarduera, erantzunkizun edo konpromezua duen erakunde ororentzat bilgune izango dira. Gainera, gai honengan interesa duen ororentzat irekiak izango dira.

ROCE 2010 Topaketa hezkuntza proiektuaren kudeaketaren ideiaren eta bere ezaugarrien -hezkuntza, musika zein artearen arlokoak- ingurukoa izan bazen, bigarren topaketa honek proiektuan beste ikuspegi batzuetatik sakontzea izango du helburu: egungo testuinguruaren ezagutzaren garrantzia, lidergo sendo baten beharra edo burutzen dituzten jardueretan erakunde ezberdinen balioak eta filosofiaren benetazko eragina.

Topaketaren helburuak honako hauek izango dira:
gure inguruan burutzen diren ahalik eta hezkuntza proiektu zein programa gehien ezagutzea.
- Hezkuntza-proiektu baten abiatze, garapen eta ebaluaketan eragina duten alor ezberdinetan sakontzea.
- Jarduera-ildo nagusiak eztabaidatzea.
- Etorkizunerako lan-proiektuak bideratu eta bultzatzea.

Izen ematea. Topaketan esku-hartzeko beharrezkoa izango da aurretik pertsonalki izen ematea, ROCEren webgunean eskuragarri dagoen formularioa betez. Izen emate-kuota 30 eurokoa izango da. Tokiak mugatuak direnez, lehentasuna izango dute ekainaren 15a baino lehenago jasotako eskariek. Antolatzaileek espreski baieztatutako eskariak soilik emango dira onartutzat.

Informazio gehiago

Orkestraren Miramongo egoitzak "Swing Gaua" ikuskizunaren aurkezpena hartu du berean. Entseguen atsedenaldi batean izan den prentsaurrekoan izan dira Enrique Ugarte zuzendaria eta kontzertuetan Orkestrarekin batera arituko diren bakarlari gonbidatu guztiak.

Ekainaren 4 tik 8ra Euskadiko Orkestrak KlasikAT ekimenaren kontzertu-sorta berri bat aurkezten du. Egitasmo honekin Orkestrak bere musika eskaintza publiko anitzei zabaltzea du helburu, musika klasikoaz urrun geratzen diren eta orkestra baten ibilbide sinfonikoan arrotzak diren errepertorioak landuz. Horretarako Orkestrak beren musika-alorrean nabarmenak diren artista ospetsuekin bat egingo du. "Swing Gaua" izango da ekainaren 4an Gasteizko Principal Antzokian, astelehena hilak 6 Donostiako Kursaalean, 7an Bilboko Arteria Campos Elíseos Antzokian eta 8an Iruñeko Baluarten.

Joan zen irailan Michel Camilo pianojotzaile gailena izan bagenuen gurean, oraingoan Orkestrak Swing Gaua proposatzen du, XX. mendeko lehenbiziko erdiko amerikar musika herrikoia, Piazzollaren tangoa, pop musika, jazza eta kubatar son-a bilduko dituen ikuskizuna. Jada badatorren udaren atariko izango den gau baterako, erritmoz eta bibrazio onez beteriko gau baterako nahasketa ezin hobea.

Swing gaua... fusio gaua. Euskadiko Orkestrak, Enrique Ugarte zuzendari izango duenak, Susana Raya kantari kordobartarrarekin eta Iñaki Salvador Trío eta Golden Apple Quartet-ekin partekatuko du eszenatokia. Estilo, ahots eta musikaren ikuspegi anitz guzti hauen eskutik, Cole Porter, Astor Piazzolla, Gershwin, Ruiz Quevedo edo Chick Corearen obrek azentu ezberdina izango dute, zihur.

Sarrerak 15€-tako salneurri bakarrean daude salgai. Kontzertu hauetarako sarrerek 15 euroko prezio bakarra dute eta ohiko salmenta-bideetan eta "Swing Gaua" berean hartuko duten lau aretoetako leihatiletan daude salgai.

Aldi berean klasikat.euskadikoorkestra.es webgunean gero eta gehiago dira kontzertuetan arituko diren artisten zein entzungai izango dugunaren inguruko edukiak, egunoroko post berrien, bideoen eta abarren bidez; eta Swing Gaua eta KlasikAT-en komunitateko kide bihurtu eta gure lehiaketetan parte hartu nahi izanez gero joan Facebook-eko profilera edo http://twitter.com/Klasik_AT gunera.

Informazio gehiago

Euskadiko Orkestra Sinfonikoaren Miramongo egoitzan, Donostian, Orkestraren 2011/2012 Denboraldia aurkeztu berri da. Kultur Sailburu eta Orkestrako Presidente Blanca Urgell, Zuzednari Nagusi Iñigo Alberdi eta Zuzendari Titular Andrés Orozco-Estrada izan dira denboraldi berriaren xehetasunak azaltzeaz arduratu direnak.

Blanca Urgell, Kultura Sailburu eta Orkestrako Presidenteak Andrés Orozco-Estradak Zuzendari Titular gisa 2013-2014 denboraldira arte berritu duela jakitera eman du. Berritze honek orain arte lortutakoaren eta bi aldeek norabide berean lan egiten jarraitzeko duten borondatearen baieztapena suposatzen du. Gainera, Orkestrak gizartearekin duen lotura hestua goraipatu du, erakunde honek duen garrantizaren erakusle.

Andrés Orozco-Estradak, halaber, Orkestrarekin 2014. urtera bitartean lotuko duen berritzeagatik bere zoriona agertu du eta datorren denboraldiaren ardatzetariko bat izango den errepertorio klasikoa lantzearen garrantzia azpimarratu du.

Programazio berriari dagokionez, Euskadiko Orkestra Sinfonikoaren Abonu-Denboraldiak bere jardueraren funtsa izaten darrai, denboraldi bakoitzean bere egitekoaren %50a suposatzen duen musikazko espazio sendoenari bere ahalegin gehiena eskaintzen dio. Horregatik, Abonu-denboraldia kontu, logika eta koherentzia handiz programatu behar da. Zentzu honetan, zuzendari titular gisa emango duen hirugarren denboraldian, Andrés Orozco-Estradak finkatutako lerroak erabakiorrak gertatzen dira Orkestra kalitate, dinamismo eta malgutasun maila gorenago batera eramateko apostuan koherentziaz aurrera egiteko. Hiru bertute handi nazioarte mailan ere bide egiten duen orkestra batentzat: erreferentziazko aretoetan aritzeaz gain (Vienako Konzerthausera itzuliko da), nazioarteko elkartrukeak (Bordele eta Milan Düsseldorf) eta naziorte mailako obren enkarguak biltzen dituen egitasmo berria esfortzu horren erakusle dira.

Baina gainera, Abonu-Denboraldia eta nazioarteko ikuspegi estrategikoaz gain, Euskadiko Orkestra Sinfonikoak bere izakera osotzen duten jarduera multzo zabala garatzeko gaitasuna du: Miramongo Matinéen Orkestraz, bere Musika Gelaren bidez haur eta familiarteko entzulegoarengana heltzeko gai den Orkestraz (zuzenean edo telebistaren bidez, Sinfokidsekin) ari gara; 2500 eskola-haurrentzako jarduerak burutzen dituen Orkestraz, "Musika Laborategia"ren bidez ikasle gazteei aukera ematen dien Orkestraz, bere bideaz urrundu eta KlasikATen bide ezberdinak lantzen dituenaz, gizartegintzaz arduraturik, bere musikaren bidez babes gutxien duten gizataldeak gizarteratzea helburu duen Orkestraz (FEVASekin lankidetzan egindako tailerrak edo Arrasate eta Zamudioko psikiatrikoetan kontzertuak, esaterako); grabaketen bidez euskal sorkuntza sinfonikoaren ondarea biltzen duen Orkestraz ari gara. Hau da Euskadiko Orkestraren izaera, gure gizartearengandik hurbilen dagoen orkestra, uhin konzentriko baten moduan, bere musika-jerduera zabaldu eta askotariko eszenatokietan barneratzen den Orkestra. Hau da 2012 urten 30 urte beteko duten Orkestraren izaera.

Informazio gehiago

Maiatzaren 28 larunbatean Orkestraren egoitzako auditorioan Miramongo Matinéeak zikloaren 2010/2011 denboraldiko azken kontzertua izango da. Euskadiko Orkestraren ganbera zikloa iraila bitartean agurtuko duen emanaldi honetan, Gorka Mirandak zuzenduriko EASO Araoz Gazte Abesbatzak izaera liturgikodun edo gai erlijiosoak hizpide dituzten Gounod, Fauré, Franck eta d'Indy-ren lanak biltzen dituen egitaraua aurketzuko du. Araoz Gazte Abesbatzarekin batera Ana Otxoa sopranoa, Oscar Candendo pianoan eta Ana belén García izango ditu lagun. Azken honek Orkestrak duela gutxi erositako XIX. mende amaierako Christophe & Eiténne harmoniuma joko du, berrikuntza lanen ondoren estreinakoz.

EASO Araoz Gazte Abesbatza, 2004. urtean sortu zen Easo Abesbatzaren baitan, Easo Musika Eskolarekin batera. 12 eta 16 urte bitarteko neskek osatzen dute. Bere sorreratik Gorka Mirandak zuzentzen duen abesbatzak, kontzertu musiko-koral ugari eman ditu Pasaia, Oiartzun, Tolosa, Lasarte-Oria, Zumarraga, Donostia eta abarretan. Aipatzekoak dira gainera Santanderreko 55. Nazioarteko Festibalean parte hartzea Amilcare Ponchielliren "La Gioconda" opera abestuz, eta Donostiako Musika Hamabostaldiko 68. eta 69. ediziotako inaugurazio eta haurren egunen barruan eskainitako kontzertuak. Musikari eta zuzendari handiekin egin ahal izan du lan, esaterako Günter Neuhold, Jose Luis Estelles, Antonio Pirolli eta Juan Jose Ocon.

Araozek Matinéerako prestatu duen egitaraua XIX. mendeko frantziar egile nabarmenenetako batzuk ahots zurientzat idatzitako musika erlijiosoak osatzen du, ia osotasunean. Charles Gounoden 4. Meza laburra. César Franckek duo koralentzat idatzitako musika, Gabriel Fauréren obra erlijioso zoliaren aukeraketa bat eta amaitzeko, C. Francken ikasle eta jarraitzaile sutsu Vincent d'Indyren kantata koral bat. D'Indy Jesús Guridi edo José María Usandizaga euskal musikagileen formakuntzan hainbesteko garrantzia izan zuen Parisko Schola Cantorum delakoaren sortzaile eta alma mater izan zen.

Informazio gehiago