Bere titular Andrés Orozco-Estrada maisuaren gidaritzapean, Euskadiko Orkestra Rossiniren "Sevillako Bizargina" entsaiatzen ari da egunotan. 72. Donostiako Musika Hamabostaldiaren programazioaren baitan, opera buffa hau San Lorenzo de El Escorial-eko Jaialdiak eta Musika Hamabostaldiak sustatutako ekoizpen berri batean iritsiko da Kursaalera. Joan Anton Rechi da proposamen berri honen eszena zuzendaria eta bakarlari-taldearen buru José Manuel Zapata (Almaviva) eta Manuela Custer (Rosina) direlarik. Abesbatzarako zatiak, berriz, Easo Abesbatzak interpretatuko ditu.

Orkestraren denboraldi berri honetan Orkestrak jarduera ugariri egingo dio aurre urrian bere Abonu-Denboraldiari heldu aurretik. Honela, irailaren 2an Miarritzen arituko da, Festival de Musique en Côte Basque delakoaren baitan. Jaialdi entzutetsu honen programazioak Nikolay Lugansky eedo Barbara Hendrics bezalako izenak biltzen ditu aurtengoan.

Irailaren 8an Euskadiko Orkestra "Musika Bakearen Alde" izenburupean Bilboko Euskaldunan izango den kontzertuan arituko da. Emanaldi hau Eusko Jaurlaritzak "kulturaren, bakearen eta askatasunaren urtea" izendatu 2012 urtearen hitzaurre izango da. Inma Shararen zuzendaritzapean, Orkestrak Pucciniren Preludio Sinfonikoa, Guridiren Diez Melodías Vascas eta Mozarten Koroatze Meza interpretatuko ditu. Lagun izango ditu Andeka Gorrotxategi tenorea, Damián del Castillo baxua, Marta Ubieta sopranoa, Maite Maruri kontraltua eta Julio Gergelyk zuzentzen duen Bilboko Koral Elkartea.

Irailaren bukaera aldera, Orkestrak OLBEren denboraldia irekiko du Simon Boccanegran arituz eta 29an Orkestrak Manuel Iradier Abesbatzaren 50. urteurrena ospatzeko Gasteizen izango den kontzertuan esku hartuko du.

Kontzertu hauetaz gain, datozen asteotan EOSek bi grabaketa burutuko ditu. Batetik Euskal Konpositoreen Bildumako XIV. alearen bigarren zatia grabatuko du eta, bestetik, Kepa Junkeraren ekoizpen ezagunena bertsio sinfonikoan bilduko duen monografikoa.

Euskadiko Orkestra Sinfonikoa anfitrioia zela, Donostiako Elkartegi Teknologikoan "II. ROCE Topaketa" izan da ekainaren 23, 24 eta 25ean, Kontzertu Hezigarrien Antolatzaileen Sareak (ROCE) antolaturik.

Hiru lanegunetan zehar, bederatzi erkidegotatik etorritako 45 adituk esku hartu zuten. Bertan erakunde ezberdinek sustatutako hamalau hezkuntza-proiektu aurkeztu ziren eta aurkezpen hauen bidez bertaratutakoek musika gizarteratzeko estrategia ezberdinak ezagutu eta eztabaidatzeko aukera izan zuten. Halaber, Europa eta Amerikan garatzen ari diren hainbat jerduera ezagutzeko abagunea izan zen.

Gainera, II. Topaketa honetan Hezkuntza Proiektu bat martxan jartzerakoan eragina duten elementu ezberdiene inguruan sakonki hausnartu da, erakundeek beren jardueraren oinarri izango den proiektu sendo bat finkatzearen beharra azpimarratuz.

Roberto Gómez de la Iglesia ekonomilari eta kultur kudeatzaileak dinamizaturik eta lan-zein ezatabide-talde ezberdinak osatuz, gero eta aurretik ikusezinagoa den testuinguru batean gure hezkuntza-proiektuak etengabean berpentsatzeko formula berriztatzaileak aztertu dira. Koordinazioa, fomakuntza, komunikazioa eta ikerkuntza izango dira eorkizunean ROCE-k burutuko dituen jardueren funtsa.

Topaketan ROCE-ren partaide diren erakundeek burututako hezkuntza zein gizarte jarduerei garrantzia eta ikusgarritasuna emateko esfortzuaren beharra nabarmendu zen. Hauek Espainia mailan milaka pertsonengana heltzen diren jarduerak baitira.

Topaketaren ondoren, ROCE-k bi kide berri ditu, elkarteak guztira jada hamazazpi partaide izango dituelarik - orkestrak, auditorioak, udalak, gobernu autonomoak, fundazioak-. La Caixa Fundazioa eta Adán Martín Tenerifeko Auditorioa dira ROCE-ko partaide berri gisa musika jarduera hezigarriak bultzatzea helburu duen egitasmo honetan murgildu direnak.

ROCEko kide dira:
L'Auditori
Nafarroako Gobernuko Kultur Departamentua
Orquesta Ciudad de Granada
Euskadiko Orkestra
Fundación Municipal de Cultura del Ayuntamiento de Gijón
Bilbao Orkestra Sinfonikoa
Orquesta Filarmónica de Gran Canaria
Orquesta Sinfónica del Vallés
Orquesta Sinfónica de Tenerife
Orquesta Barroca de Sevilla
Kursaal Fundazioa
Orquesta de Cámara Carlos III
Palau Música Catalana
Centro Cultural Miguel Delibes - Orquesta Sinfónica de Castilla y León
Abecedaria - Consejería de Cultura de la Junta de Andalucía
Fundación La Caixa
Auditorio de Tenerife Adán Martín

Ekainaren 23, 24 eta 25ean Donostian izango den ROCE 2011 Topaketa kontzertu pedagogikoen bidez akzio hezigarrien arloan jarduera, erantzunkizun edo konpromezua duen erakunde ororentzat bilgune izango dira. Gainera, gai honengan interesa duen ororentzat irekiak izango dira. Topaketak Donostiako Teknologi elkartean izango da, Euskadiko Orkestra Sinfonikoa anfitrioia dela.

Kontzertu Hezigarrien Antolatzaileen Sarea (ROCE) 2010ean sortu zen, Orquesta Ciudad de Granada, Bartzelonako L'Auditori, Nafarroako Gobernuko Kultur eta Turismo Saila eta Euskadiko Orkestraren ekimenez, Gijón-go Udal Kultur Fundazioaren laguntzaz. Honen helburuak kideek garatutako akzio hezigarriak koordinatu, lankidetza bultzatu eta proiektu hezigarriak sustatzea dira. Sortu zenetik erakunde hauek ROCE modu egonkor batean instituzio berriak berean hartzeko eta partekatutako interes eta beharren arabera lan-dinamika ezberdinak garatzeko gai izatea bideratu duen balorazio eta lantze prozesu bati egin diote aurre. Honela, hasierako erakundeei Bilbao Orkestra Sinfonikoa, Kursaal Fundazioa, Kanaria Handiko Filarmonikoa, Vallés-eko eta Tenerifeko Orkestra Sinfonikoak, Sevillako Orkestra Barrokoa, Carlos III Ganbera Orkestra, Palau de la Música Catalana, Valladolideko Miguel Delibes Kulturgunea eta Gaztela eta Leongo Orkestra Sinfonikoa eta Andaluziako Juntaren Kultur eta Hezkuntza Sailen menpeko Abecedaria Zirkuitua gehitu zaizkie gerora.

Kultur arloaren inguruan jarduten diren erakundeak dira guztiak, forma eta eduki aldetik anitzak, baina guztiek funtsezko ideiak partekatzen dituzte: musika edozein gizartetan tresna hezigarri oinarrizkoa dela eta ikastetxe zein familientzako prestaturiko kontzertu eta jarduerak gure eskaintza artistiko zein sozialaren funtsezko zati direla, esaterako. Egun ROCE proiektu honen kide izateko interesa izan dezaketen erakundeekiko informazio eta zabalkunde prozesuan murgildurik dago

Granadan 2010ean izandako I. ROCE Topaketa hezkuntza proiektuaren kudeaketaren ideiaren eta bere ezaugarrien -hezkuntza, musika zein artearen arlokoak- ingurukoa izan bazen, bigarren topaketa honek proiektuan beste ikuspegi batzuetatik sakontzea izango du helburu: egungo testuinguruaren ezagutzaren garrantzia, lidergo sendo baten beharra edo burutzen dituzten jardueretan erakunde ezberdinen balioak eta filosofiaren benetazko eragina. Batzar honetan esku hartuko dutenak hauek dira, besteak beste: Assumpció Malagarriga (Servei Educatiu L'Auditori-ko zuzendari eta ROCEren presidente), Manuel Cañas Escudero (ROCEren koordinatzailea) Roberto Gómez de la Iglesia (c2+i entrepresaren buru), Mª Camino Barcenilla y Toña Trueba (Nafarroako Gobernuko Kultura Saila), Carmen Huete (Orquesta Ciudad de Granadako Hezkuntza Departamentua), Manuel González (Gijóngo Udaleko Kultur Udal Fundazioko burua), Pedro Sarmiento (Teatro Real eta Fundación SaludArte-k lagundutako LOVA Proiektuaren koordinatzailea) eta Aintzane Cámara (EHUko irakaslea); Topaketaren anfitrioia izango den Euskadiko Orkestratik, Iñigo Alberdi, zuzendari nagusia, Miren Elósegui, komunikazio zuzendaria, eta Mikel Cañada, hezkuntza departamentuaren koordinatzailea arituko dira.

Topaketaren helburuak honako hauek dira:
• Gure inguruan burutzen diren ahalik eta hezkuntza proiektu zein programa gehien ezagutzea.
• Hezkuntza-proiektu baten abiatze, garapen eta ebaluaketan eragina duten alor ezberdinetan sakontzea.
• Jarduera-ildo nagusiak eztabaidatzea.
• Etorkizunerako lan-proiektuak bideratu eta bultzatzea.

II. ROCE Topaketa (Kontzertu Hezigarrien Antolatzaileen Sarea)
Ekainak 23, 24 eta 25: Donostiako Teknologi Elkartegiko Eraikin Nagusia (Mikeletegi Pasealekua, 53)

Bira itxi dugu dugu jada, etxera bidean hegan goaz eta oso pozik gainera, gauzak ongi egin izanaren sentsazioarekin. Bart Düsseldorf-eko Tonhalle aretoa agurtu genuen, entzulegoaren txalo-zaparrada baten artean. Agurra bikoitza izan zen: batetik, kontzertu gogoangarriak utzi dizkigun areto miragarriari agur eta, bestetik, erretiroa hartu izanagatik Andrzej Bak lankideari agurra. Azken agur hau aretoan bildu ginen guztiekin partekatzeko, Andrés Orozco-Estrada maisuak Bak-i Guridiren Amorosa eskaini zion, Orkestraren biolontxelo bakarlari gisa eskainitako azken kontzertuan.

Tonhalle aretoan aurretik bizi izandakoaz aritu gara jada biraren inguruko kronikatan; oso areto berezia da eta bertan gertatutako orok izarrak ukitzen ditu. Andrzej Baken agurrari dagokionez, berriz, zera esan dezakegu, aurretik beste agur ugari bizi izan badugu ere behar bada aretoak berak guztiari eransten dion intentsitatearen ondorioz, agur hau bereziki irekia, partekatua eta emoziozkoa izan zen. Zihur Bakek ere izarrak ukitu zituela!

Alemanian barrena buruturiko zazpigarren birari akabera emateko, hasiera batean esandakoari heltzen diogu, orkestren arteko elkartrukeen erabateko onuragarritasunari, alegia, baina orain gure zuzendari Andrés Orozco-Estradaren eta orkestrako musikarien hitzak gehitzen dizkiogu horri: guztiak oso pozik agertu dira lortutako emaitza onengatik eta baita MUSIKAK, hizki larritan, gure bizitzei ematen dizkien esperientzia handiak biltzen jarraitzeagatik ere.

"Brezel"aren eta "brunch"aren artean

Euskadiko Orkestrak birako hirugarren kontzertua eskaini du, bigarrena Tonhalle aretoan. Orainarte izandakoetatik onena izan dela esan dezakegu. Orkestraren interpretazioa ederra izan da benetan eta oso eroso sentitu da, kontzertua igandean goizeko 11:00etan izan arren, hasiera batean ez ohikoa zaigun ordutegi batean.

Eta hain zuzen ere, igandea izateagatik aretoan bizi zen giroa oso lasaia zen, arratsaldetan bizi ohi dugunaz oso bestelakoa. Horregatik, topaketa alemaniar "Brezel"a (ogi gatzatuzko erroskila) eta egun hiri handietan oso modan dagoen gosaria eta bazkariaren arteko "brunch" delakoaren artean izan zen. Iraganean Behatokiak betetzen zuen espazioa bazkaltzen den bitartean ganbera kontzertu bat edo hitzaldi bat entzuteko aproposa den foyer eder batek betetzen du. Euskadiko Orkestraren kontzertuaren ostean, jazz musika zegoen zuzenean entzungai. Espazioa ederra da benetan, gaurkoan Euskadiko Orkestrarekin bezala, kontzertu bakoitza emnaldi bikain bilakatzeko pentsatua. Birak entzulegoen edo orkestren arteko elkartrukeak dira, baina baita senitartekoekin, atril-kide izandakoekin bat egiteko edo, "Espainiarrak munduan" moduko saioren baten kapitulu bat balitz bezala, gure ezagunak munduan barrena egindako ibilbidearen berri izateko aukera ematen digute.Egunotan horrelako momentuak bizi izan ditugu, musikaren emozioak herriminarekin bat egiten dutenekoak. Gaur adibidez, Lucía Ceberioren txanda izan da: duela urte asko Düsseldorfen bizi da tolosar hau, bere senar Stephan eta Alex eta Martha seme-alabekin, eta ez du Euskadiko Orkestraren kontzertua galdu nahi izan.
Musikaren planetarium-a

Demagun 1926 urtean gaudela, Düsseldorfen, Rhin ibaiaren ertzean, munduko izar-behatoki handienaren aurrean. Jada jatorrian oso toki berezi bat bezala sortu zen: bertan, Wilhelm Kreis arkitektoak gure eguzki sistemako lekurik urrutikoenak lurrarekin lotu nahi izan zituen. Baina Historiak bere galera ekarri zuen Mundu Gerrarekin eta desagertu egin zen, kontzertu-areto gisa berreskuratzeko ideia piztu zen arte. 70ko hamarkadara salto egin dugu jada. Tonhalle aretoak bizkarra ematen die bere iragana izan ziren konstelazioei eta topagune, kontzerturturako, solasaldirako, jateko gune bilakatzen da, beti musikaren inguruan: klasikoa, jazz, chanson, soul edo cabaret-a.

Denboraren poderioz aretoa berritu beharko da eta 2005ean beste maisu batek jatorrizko Behatokia berreskuratuko du eta 70ko hamarkadatik aretoak garatu duen izaerarekin nahastuko du. Emaitza "Musikaren Planetarium-a" izango da. Eta bertan gertatutako oro izarretaraino helduko da.

1800 pertsonentzat prestatuko oin zirkulardun aretoak kontzertuen eszenatokia biltzen du eta ondoren begiradak goruntz egiten du, kristalezko kupula urdin bateraino; kupulan argi eta garbi ikus daitezke Esne-bidea, Hartz Nagusia zein Hartz Txikia. Ez da sentsazioa, benetazkoa da, eta aretoaren kudeatzaileen esanetan gauez ireki ahal izango zen kupula bat eraiki nahi izan zuten, izarrak ukitzen saiatzeko. Hori ere etorriko da.

Parkett-etik, hau da, besaulki-patiotik Arriaga izarretaraino heltzen da; Ran-etik, hau da, anfiteatrotik, eta Guridiren Amorosa bis moduan interpretatuz, Orkestrak izar artean bidaiatuz amaitu du goizeko emanaldia. Bizipen hauek guztiak Düsseldorf-eko kaleetan barrena galduko dira orain eta bira hoentako azken musikazko emanaldia astelehenean izango da.

Düsseldorf-etik bi ordu eta laurdeneko bidaia egin ondoren, Euskadiko Orkestra Güterloh hirira heldu zen larunbatean. Bertan eskaini zuen Alemaniako birari dagokion bigarren emanaldia. 100.000 biztanle dituen Ipar-Renania-Westfalia estatuko hiri hau bertan kokatutako Bertelsmann AG argitaletxe eta komunikabide-entrepresa ospetsuarengatik da ezaguna. Bertako antzokia, STADTHALLE delakoa hiriko kultur-jarduera anitzen bilgune da eta estilo zein diziplina anitzetako emanaldiak hartzen ditu berean: dantza, jazz, antzerkia nahiz musika klasikoa edo, antzokiaren albo batean gure Orkestraren kontzertuaren ordu berean iragartzen zen bezala, "argentinar tangoa".

Gütersloh-ko Stadthalle abangoardiako estilodun eraikina dugu, kanpokaldetik ikusita oin poliedrikoa duena eta barnekaldean lerro zuzen zein apalak nagusi dira. Kontzertu-aretoan, eszenatokiaren atzekaldean kokaturik dagoen organua da nagusi. Erdi-erditik besaulki-patioan dagoen edonoren arreta bereganatzen du. Eta han, 800 bat entzulerentzat prestatutako besaulki-patioan bildu zen Orkestra entzuteko bertaratutako entzulegoa. Honek bezperan Tonhalle-n bizitako errituala errepikatu zuen. Alemaniar auditorioak topagune dira. Jendea kontzertua hasi baino denbora asko lehenago joaten da, bertan lagunekin elkartu, solasaldian aritu, esku-egitaraua erosi, kontzertuaren aurretik afaldu eta, azken finean, kontzertuaren inguruan ordu batzuz gauparte atsegin bat igarotzeko.

Gütersloh-ko kontzertua oso interesgarria gertatu zen, birako kontzertuek izaten duten izaera nomada zein aldakorragatik; beti entzulego zein erreakzio ezberdinak aurkitzen baititugu, estilo, formatu eta erritu askotariko kontzertu-aretoak; baina Orkestra ongi moldatzen da betiere, malgutasun nabarmena erakutsiz. Gaur Düsseldorf-eko Tonhalle aretora itzuliko gara, "Musikaren planetarium"era, baina goizez oraingoan, 11.00etan, hain zuzen ere. Kontzertua zein ordutan den kontutan harturik, hain leku berezian emanaldiak beste izaera bat izango du zihur. Azalduko dugu, Tonhalle aretoak kontakizun honetan bere lekua merezi baitu.

Tonhalle aretoak, Düsseldorfer Symphoniker orkestraren egoitzak, harro erakusten ditu iraganean, 1926an eraiki zutenan munduko planetarium handiena izanaren aztarnak. 2005ean azkenekoz eraberritu zutenetik, aretoa estaltzen duen kupularen kristalaz bestalde zeru-sabaia ikus daiteke oso-osorik. Egitura semiesferikoaz bestalde kokatutako argazkiek eragindako efektu optiko bat da, baina bart izarrak ikusten ziren bitartean musikaz, Euskadiko Orkestraren musikaz gozatzeak eragindako sentsazioa eradokitzailea gertatzen zen erabat.

Musikalki, Orkestrak, bere titular Andrés Orozco-Estradak zuzenduta, bere ibilbidean garrantzizkoa izango den emanaldia eskaini zuen, uneoro guztia emanez agertu zen entzulego batek babesturik. Egitaraua, sakon eta emoziozkoa, alemaniar entzulego adituaren artean ikusmin nabarmena sortua zuen Arriagaren "Esklabu zoriontsuak" obraren Oberturak ireki zuen. Eta jasotako txaloen arabera, ez zuen huts egin. Ondoren Shostakovitchen Biolontxelo eta orkestrarako 1.zki kontzertua izan zen entzungai; honetan Orkestrak Gautier Capuçon biolontxelojotzaile frantziarra izan zuen lankide. Txaloei erantzunez, Capuçon-en Prokofieven "The Walk of the Small Soldiers" obra interpretatu zuen bis gisa. Jada bigarren zatian, Tchaikovsky eta bere Bosgarren Sinfoniak bete zituzten Orkestraren atrilak eta hau bikain aritu zen. Amaiera gisa eta entzulegoaren berotasuna eskertzeko, EOSek Guridiren Amorosa interpretatu zuen. Orkestrak edonora doala ere berakin eramaten duen obra hau hunkigarria gertatzen da beti. Baita bart ere. Azken finean, sentimenduak nagusi gertatu ziren atzoko kontzertuan, norbanakoaren sentimenduak zein unibertsalak, gizakia zeruaren, izarren eta musikaren handitasun ezin besarkatuzkoaren aurrean.

Izan ere, gizatiarra denak funtsezko balioa hartzen du Düsseldorfeko Tonhalle erakundearentzat. Kontzertuak atzo Andrés Orozco-Estradak eskainitakoa bezalako aurretiko-hitzaldien edo ondorengo azalpenen bidez osotzen dituzte. Kontzertu baten edo beste kultur-espresio batek eragindako norbanakoaren esperientzia indibiduala aberastearren, guztiak zentzu dibulgatiboa hartzen du.

Bestalde, Orkestraren kontzertuak erakundeen ordezkari ugari bildu zituen. Bertan izan ziren Eusko Jaurlaritzako Kultura Sailburu eta Orkestraren Presidente Blanca Urgell, Espainiako Enbaxadorea Alemanian, Rafael Dezcallar, Espainiako Kontsula Düsseldorf-en, Manuel Viturro eta Frantziako Kontsul Nagusia Düsseldorf-en, Hugues Nordi. Alemiako biraren babesle den Ingeteam entrepresaren ordezkari gisa, han ziren Ingeteam-en Marketing Korporatiboko Zuzendari Eduardo Giménez, Marketing Arduraduna, Itziar López de Armentia eta Ingeteam-en Ordezkari Alemanian, Josu Egea.

Bi orkestra zerupean. Bart Düsseldorfeko Tonhalle aretoan eskainitakoa, Düsseldorfer Symphoniker orkestrarekin egindako elkartrukeari esker Euskadiko Orkestrak Alemanian barrena eskainiko dituenetatik lehena izan zen. Aldi berean, Düsseldorfer Symphoniker-ek atzo amaitu zuen Euskadin egonaldia, Bilboko Euskalduna Jauregian izandako kontzertuarekin. Honenbestez, Euskadiko Orkestrak eta alemaniar orkestrak zerupean bat egin zutela esan genezake, "musika izarpean" kontzeptua Euskaldunako Auditorioan ere betetzen baita, bertan zuntz optikoko puntu ezberdinez argitutako sapaiak izarrez betetako zerua irudikatzen baitu.

Gaur Orkestra Gütersloh-ra abitatuko da eta bertan Stadthalle aretoan arituko da estreinakoz.

Düsseldorfer Symphoniker orkestra Orkestraren Abonu-Denboraldiaren baitan bere bira osotuz doa eta astelehen eta asteartean Donostiako Kursaalean kontzertu bana eskaini ostean, bart Iruñeko Baluarten aritu zen.

Biartean, Euskadiko Orkestrak bere nazioarteko hamalaugarren biraren lehenbiziko urratsak eman zituen: abiatu baino ordu gutxi batzuk lehenago, Donostiako Victoria Eugenia Antzokian Alemanian eskainiko duenaren aurrerapena egin zuen bart. Bere titular Andrés Orozco-Estradan gidaritzapean, nahiz bakarka, Arriagaren "Esklabu zoriontsuak" obraren Oberturan eta Tchaikovskyren bosgarrenean, nahiz Gautier Capuçon biolontxelojoleak lagundurik, Shostakovitchen Biolontxelo eta orkestrarako 1.zki kontzertuan, Orkestrak argi erakutsi zuen nazioarte mailako irtenaldi berri honetarako aukeratutako egitarauaren konplexutasuna.

Bereziki intentsitate sakonekoa izan zen kontzertua izanik, une hunkigarrienetariko bat bukaeran bizi izan zen, egunotan erretiroa hartu aurretik Euskadiko Orkestrako profesore gisa bere azken programa eskainiko duen Andrjez Bak biolontxelo bakarlariari omenaldia egin zitzaionean.

Gaur Orkestra Düsseldorferantz abiatu da. Han, bihar ostirala Tonhalle areto ospetsuan arituko da, bertan estreinakoz aritu zenetik hemeretzi urte pasa direnean.