Mahlerren ‘Hirugarren’ ikaragarriarekin ekingo dio Euskadiko Orkestrak Kontzertu Denboraldiari
Robert Treviñok zuzenduko du Mahlerren ‘3. Sinfonia’, Euskadiko Orkestraren Denboraldi berria —bizi-esperientzien bidez mundua sortzen eta eraldatzen duen gizakia erdigunean jartzen duena— inauguratzeko lan ezin hobea. Bilboko Koral Elkarteko emakume- eta haur-abesbatzek eta Justina Gringyte mezzosopranoak jarriko diote ahotsa obra handi honi.
Sarrerak salgai daude irailaren 29tik urriaren 4ra ohiko lau hiriburuetan izango diren kontzertu guztietarako, 10 eta 38 euro bitartean.
Euskadiko Orkestrak Kontzertu Denboraldiari ekingo dio Gustav Mahlerri eta haren Hirugarren Sinfoniari oso-osoki eskainitako programa batekin, Robert Treviñok zuzenduko duena, eta datozen egunotan ohiko lau hiriburuetan izango dena: ostiralean, irailak 29, Gasteizko Principal Antzokian; larunbatean, irailak 30, Bilboko Euskalduna Jauregian; astelehen eta asteazkenean, urriak 2 eta 4, Donostiako Kursaal Auditoriumean; eta asteartean, urriak 4, Iruñeko Baluarte Auditoriumean. Kontzertu guztiak 19:30ean izango dira.
Gustav Mahlerrek honako hau idatzi zuen bere 3. Sinfoniari buruz: “Imajina ezazu unibertso osoa islatzeko gaitasuna duen obra handi bat”. Obra honekin Robert Treviñok beste urrats bat egin du bere helburuan: Mahlerren ziklo sinfonikoa zenbait denboralditan osatzea. Izan ere, bohemiarraren musika bere espezialitate bihurtu baitu azken urte hauetan Treviñok, bere orkestra ondoan duela. Konpositore guztien artean, Mahler izan zen musikaren botere eraldatzailea hobekien ulertu zuenetako bat, eta gizakiaren bizitzako ibilbidea eta haren etapak, nahiak eta kezkak islatzen dituzten sinfonia zabaletan gauzatu zuen. Treviñoren hitzetan, Mahlerren sinfonia hau “konpositorearen lanik luzeena eta erromantizismoaren garaiko luzeenetakoa da. Sei mugimenduren bidez, Mahlerrek norbanakoaren eta taldearen erantzukizuna hartzera gonbidatzen gaitu, bizitza betierekotasuna balitz bezala bizi dezagun; materia fisikotik maitasunerako bidaia filosofikoa da, Nietzscheri eta gizakiari omenaldi argia eginez”.
Bilboko Koral Elkarteko ehun emakume eta haurrek bat egingo dute orkestrarekin Mahlerren Hirugarrenari aurre egiteko. Obra honek koru labur baina zorrotza du emakumeen ahotsentzat, lau zatitan banatuta. Mahlerrek ahots-baliabide sorta bat zabaltzen du, hala nola muturreko tesiturak pianisimoan, erregistro eta bolumen aldaketa konstanteak, eta modulazio azkarrak. Emakumezkoen ahotsekin orekatu behar den haurren abesbatza bat ere badago, eta emaitza amaierako koru zirraragarri bat da, argiz eta alaitasunez betea, indarrez dardaratzen dena.
Nola tamainaz hala iraupenez itzela den Hirugarren Sinfoniak naturako indarrei, landareei, animaliei eta gizakiari egiten die kantu, eta horretan laguntzeko Justina Gringyte mezzosopranoa izango du ondoan Euskadiko Orkestrak. Lituaniarrak duela gutxi parte hartu zuen orkestraren Kontzertu Denboraldian, aldi hartan Mahlerren Bigarrenaren interpretazioan.
Sarrerak salgai daude saio guztietarako euskadikoorkestra.eus-en, baita auditoriumen webgune eta leihatiletan ere, 10 eta 38 euro bitartean.
Musikeneko ikasleak kontzertuetan
Aipatzeko moduko beste kontu bat da kontzertu-programa honetan Musikeneko Graduko hainbat ikaslek parte hartuko dutela bi erakundeek sinatuta duten Jordá Gela lankidetza-hitzarmenari esker.
Felix Ayoren omenezko kontzertuak
Euskadiko Orkestrak Felix Ayo biolinjole euskaldunaren heriotza deitoratzen du. 30 aldiz baino gehiagotan jo zuen gure orkestrarekin, taldearen historiako lehen hamarkadan, besteak beste 1984an Alemanian barrena egindako zortzi kontzertuko bira batean. Horregatik, haren omenez egingo dira Denboraldiaren lehen programa honetako kontzertu guztiak.
23/24 Denboraldia: Artea lehen pertsonan
Euskadiko Orkestraren Kontzertu Denboraldi berri honetan sortzen eta eraldatzen duen gizakiarengan jarri nahi dugu arreta. Pertsona aktibo eta arduratsua jarriko dugu erdigunean, bere bizi-esperientzien –nola espiritualen hala mundukoien– bidez mundua mugitzen duen pertsona, hain justu.
23/24 Denboraldiari buruzko informazio osoagoa hemen
Euskadiko Orkestraren argazki ofizial berria
Euskadiko Orkestrak argazki ofiziala berritu berri du. Hemen deskargatu dezakezue irudi berria. Informazio gehiago hemen.
Kontzertu-programa honen gainontzeko artisten argazkiak 'Informazio gehiago' atalean aurkituko dituzue.
Euskadiko Orkestrak argazki ofiziala berritu du
Argazki-saioa Alex Abrilek egin zuen abuztuan Azkoitiko Jorge Oteiza Pilotalekuetan.
Aurrerantzean orkestrako gizonezko musikariek eramango duten jantzi berriaren estreinaldia eta aurkezpena ere bada irudi berri hau. Amarenak arropa euskal etxeak egin du jantzien diseinu eta ekoizpena.
23/24 Denboraldi berriaren hasierarekin batera, Euskadiko Orkestrak argazki ofizial berria aurkeztu du orkestra osoarekin. Argazkia Alex Abrilek atera zuen Azkoitiko Jorge Oteiza Pilotalekuetan, eta orkestra osoa eta orkestrako musikariek osatutako beste talde txikiago batzuk biltzen dituen irudi-sorta handiago baten parte da (ikus behean).
Irudi ofizial berri hau orkestra hainbat esparrutan aurkezteko asmoarekin egin da: orkestraren argitalpenak eta webgunea, komunikabideak, kontzertu-zikloak, jaialdiak (Musika Hamabostaldia, ABAO Bilbao Opera, etab.), bira nazionalak eta nazioartekoak, etab.
Oteizaren ideiak eta herriko tradizio pilotazalea bateratuz, Oteizak berak pentsatutako obra da orkestrarentzat eszenatoki izan diren frontoien sorta, eta Carlos Ceballos arkitektoak eta Antton Mendizabal eskultoreak diseinatu zuten. Euskal Herriko zazpi lurralde historikoen sinbolo diren zazpi pilotaleku dira, eta pilotan jokatzeko moduen adierazgarri ere bai. Tradizioa eta modernitatea uztartzen dituen lekua da, euskal kulturaren funtsa bikain jasotzen duena eta Euskadiko Orkestraren jite eta izaerarekin bat egiten duena.
Euskadiko Orkestraren musikarien jantzi berria
Aurrerantzean orkestrako gizonezko musikariek eramango duten jantzi berriaren estreinaldia eta aurkezpena ere bada irudi berri hau. Amarenak arropa euskal etxeak egin du jantzien diseinu eta ekoizpena. Diseinua berariaz gure orkestrarentzat egin da, musikarien jantzia modernizatzeko eta fraketik janzkera modernoago, erosoago eta dotoreago baterantz aurrera egiteko.
Diseinu minimalista baten aldeko apustua egin da, non ekarpenik egiten ez duen guztia ezabatu den. Zuri-beltzeko estetika tradizionala mantendu da, nahiz eta berriago, modernoago eta unibertsalagoa den orain. Ehun berritzaileak aukeratu dira, hala nola poliester birziklatua, musikariei eguneroko joan-etorrietan erosotasuna eta praktikotasuna ematen diena.
Informazio gehiago
Argazki guztiak ikusiSalgai Miramongo Matinéeen 23/24 Denboraldiko kontzertuen sarrerak
Ohiko salmenta-kanalen bidez eros daitezke jada 23-24 denboraldiko Miramongo Matinéeen zikloko kontzertu guztietarako sarrerak.
Euskadiko Orkestraren ganbera-musikako zikloaren Denboraldi berria osatzen duten hamasei hitzorduetarako abonamenduak ere salgai daude.
Euskadiko Orkestraren Miramongo egoitza beste Denboraldi batez, larunbat goizetan, musikaren mila aurpegiak ezagutzeko kaleidoskopio batean bihurtuko da. Urriaren 7tik 2024ko ekainaren 8ra bitartean, hamasei hitzordu eskainiko dira guztira Euskadiko Orkestraren ganbera-musikako zikloaren barruan.
Dagoeneko eskuragarri dago programazio osoa, baita Euskadiko Orkestraren webgunearen bidez online salmenta ere. Gainera, sarrera fisikoak bi modutara erosi ahal izango dira: batetik, Kursaaleko leihatilan; eta, bestetik, kontzertuaren egunean bertan, 10:30etik aurrera, Euskadiko Orkestraren Miramongo egoitzan (baldin eta leku libreak badaude). Kontzertu guztietarako sarrerak 11 €koak dira.
Bestalde, kontzertu guztietarako sarrera ematen duten abonamenduak ere eros daitezke, 96€ko prezioan (tarifa orokorra), edo 75,20€ko prezioan deskonturako eskubidea duten kolektiboetan (65 urtetik gorakoak, 30 urtetik beherakoak, orkestrako beste ziklo batzuetako abonu-titularrak, Kursaal Eszenakoak, Kutxabankeko K26 eta K26+ txartelen titularrak, Eureka! Zientzia Museoko lagunak eta Musikene).
Informazio gehiago
Kontzertuak & Sarrerak‘Kontzertua & Proiekzioa’ Belodromoan irailaren 23an
Zinemaldiaren 71. edizioan Euskadiko Orkestrak eskainiko duen zine-musikako kontzertua aurkezten dute Euskadiko Orkestrak, SGAE Fundazioak eta Donostia Zinemaldiak.
Zinemaldiko lehen larunbatean eguerdian irekiko da Belodromoa musikazale, zinemazale eta, oro har, ikusleentzat, soinu-banden joaldi sinfonikoa eta horien pelikula-eszenen muntaketa uztartzen dituen ikuskizunerako.
Begi-belarriak plazerez goxatu ahal izango dira ordu eta laurdenez, larunbatean, irailak 23, eguerdiko hamabietan hasita. Sarrera doakoa izango da.
Zinemaldiaren 71. edizioan Euskadiko Orkestrak eskainiko duen zine-musikako kontzertua aurkezten dute Euskadiko Orkestrak, SGAE Fundazioak eta Donostia Zinemaldiak. Ohikoa den moduan, Zinemaldiko lehen larunbatean, eguerdian irekiko da Belodromoa musikazale, zinemazale eta, oro har, ikusleentzat, soinu-banden joaldi sinfonikoa eta horien pelikula-eszenen muntaketa uztartzen dituen ikuskizunerako. Begi-belarriak plazerez goxatu ahal izango dira ordu eta laurdenez, larunbatean, irailak 23, eguerdiko hamabietan hasita. Sarrera doakoa izango da.
Musika-kontzertua klasiko bihurtu da dagoeneko Donostia Zinemaldian; sendotuta dago Belodromoko proposamenen artean, eta Zinemaldiko eszenatoki gogokoena da dudarik gabe, 3.000 plazako edukieraz. Aurtengoan Juan Jose Ocon donostiarra izango da orkestra zuzentzearen arduraduna zine eta soinu-banden elkartze jendetsu honetan.
Aurtengo Kontzertua & Proiekzioa sei filmetarako musikaren egokitzapenez osatzen da. Oraingo honetan hautatutako musikagile eta filmak honakook dira: Ivan Palomaresen Las niñas de cristal; Victor Reyesen Love gets a room; Julio de La Rosaren Modelo 77; Maite Arroitajauregi eta Arantzazu Callejaren Irati; Paula Olazen Nora; eta Fernando Velazquezen Momiak.
Kontzertu berri honetarako, Euskadiko Orkestrak Oñatiko Ganbara Abesbatza gonbidatu du: haiek arituko dira Las niñas de cristal, Love gets a room, Modelo 77 eta Irati filmen musikaren ahots-interpretazioan.
Joan den urteetan bezala, kontzertuan ikusizko elementu bat gehituko da: musika pelikuletako eszena-muntaketa baten proiekzioarekin uztartuko da 400 m2-ko pantailan, eta muntaketa hori Morgancrea taldeak sortu du kontzertu honetarako espresuki. Gainera, musikagileetako batzuk kontzertura bertaratuko dira, Belodromoko oholtzan beren lana aurkeztera.
Sarrera doakoa da, eta nahikoa duzu gonbita irailaren 16tik 22ra Donostia Zinemaldiaren Kursaaleko informazio-puntuan jasotzea, 9:00etatik 20:00etara, edo Donostia Turismoren bulegoan, astelehenetik larunbatera 9:00etatik 20:00etara, eta igandean, 10:00etatik 19:00etara. Azken sarrerak Belodromoko leihatiletan eskuratu ahal izango dira goizeko 10etatik aurrera.
KONTZERTUA & PROIEKZIOA
Larunbata, irailak 23, 12:00
Donostiako Belodromoa
Programa
Ivan Palomares: Las niñas de cristal* (Zuzendaria: Jota Linares)
Víctor Reyes: Love gets a Room* (Zuzendaria: Rodrigo Cortés)
Julio de La Rosa: Modelo 77* (Zuzendaria: Alberto Rodríguez)
Maite Arroitajauregi / Arantzazu Calleja: Irati* (Zuzendaria: Paul Urkijo)
Paula Olaz: Nora (Zuzendaria: Lara Izagirre)
Fernando Velazquez: Momiak (Zuzendaria: Juan Jesús García Galocha)
Juan Jose Ocon, zuzendaria
Oñatiko Ganbara Abesbatza
Euskadiko Orkestra
Kontzertuaren gutxi gorabeherako iraupena: 1h15
Euskadiko Orkestra Zinemaldiarekin
Urteetan zehar, Euskadiko Orkestrak modu askotan parte hartu du Donostia Zinemaldian. Bere parte-hartze nabarmenetako bat 2012ko edizioan egin zuen, orkestrak mundu osoan ospetsua den Juan Antonio Bayonaren The Impossible filmaren soinu-bandaren zuzeneko estreinaldian parte hartu zuenean (Fernando Velazquezek sinatutako partitura). Hurrengo urtetik aurrera, 2013tik aurrera, orkestra zuzeneko zine-musikako kontzertu bat eskaintzen hasi zen, lehenik Miramongo egoitzan, eta 2015etik aurrera Belodromoan, aurten arte mantendu duen eszenatoki handian. Zine-musikako kontzertuen hamarkada honetan, orkestrak Handia, Errementari, Arrugas, Pájaros de Papel, Los crímenes de Oxford, Alatriste, Tadeo Jones 2, Mientras dure la guerra, Buñuel en el laberinto de las tortugas… bezalako film luzeen soinu-bandak interpretatu ditu. Guztira 60 soinu-banda baino gehiago interpretatu eta ikusarazi ditu denbora honetan Euskadiko Orkestrak. Gainera, aipatzekoa da orkestrak Zinemaldiaren sintonia grabatu zuela 1991 eta 1992ko edizioetan.
Zinemaldian daukan parte-hartze oparoaz gain, Euskadiko Orkestrak film-musikaren arloan lan handia egin du. Aipagarriak dira Patria eta Maixabelen soinu-banden azken grabazioak, baita aurreko batzuk ere, hala nola A Monster Calls —Fernando Velázquezek 2016ko soinu-banda onenaren Goya saria jaso zuen—, Ocho Apellidos Vascos, Contratiempo, Submergence, eta abar.
SGAE Fundazioa zinearekin
2012az geroztik, SGAE Fundazioak Made in Spain sail ez-lehiakorra antolatzen du. Ekimen honek azken urtean ekoitzitako film espainiarren sorta bat osatzen du, estreinatuak izan ala ez, eta zinemaldiak plataforma bikaina eskaintzen die film horiei guztiei nazioartean hedatzeko. Obrak, bide batez, irailaren 26tik 30era bitartean proiektatuko dira Madrilgo Berlanga Aretoan.
Bestalde, Autore eta Argitaratzaileen Elkarte Nagusiak sortutako Fundazioak berak ere, Dunia Ayaso Saria ematen du Zinemaldiaren baitan, genero-ikuspegidun gidoi onenari hain zuzen ere. Aurten zazpigarren urtea beteko du 2012an hildako kanariar zinemagilearen omenez.
Azkenik, SGAEren Euskadiko Lurralde Kontseiluak Euskal Produkzioko Gidoi Onenaren Saria babesten du, Euskal Herriko Gidoigileen Elkarte Profesionalak urteroko jaialdian bertan ematen duena.
Konpositoreak
Ivan Palomares (Las niñas de cristal)
Madrilen jaioa, Madrilgo Goi Mailako Musika Kontserbatorioan egin zituen musika ikasketak, Orkestra Zuzendaritza eta Konposizio espezialitateetan, kalifikazio gorenak eta Karrera-amaierako Saria lortuz.
Bruselan, Eskozian, Berlinen eta Estatu Batuetan ikastaro eta eskola magistralekin osatu zuen zuzendari eta konpositore prestakuntza, Philippe Gérard, Enrique García Asensio, Samuel Adler, Benet Casablancas, Ertugrul Sevsay, Hummie Mann edo Teresa Catalanen eskutik. Berlinale Talent Campusean parte hartzeko hautatua izan zen, eta, bide batez, 2015ean Kaliforniako Los Angeles hirian garatutako Ascap Film Scoring Workshop ospetsuan parte hartu zuten mundu osoko 12 konpositore bakarretako bat izateko hautatua izan zen.
Bere ibilbide profesionala kontzertu-musikaren esparruan (konpositore eta zuzendari gisa) nahiz ikus-entzunezko komunikabideetarako konposizioaren esparruan garatu du. Halaber, zinemarako, antzerkirako eta telebistarako proiektu askotan parte hartzen du sarritan, Estatu barruko zein nazioarteko sari ugari eman dizkiotela. 2005etik berrogeita hamar konposizio baino gehiago sortu ditu zinemarako (BSOak), telebistarako eta publizitaterako. Diziplina anitzeko proiektu artistikoen zale amorratua, En las Estrellas filmerako sortutako partitura sentikorrarekin, 33. Goya Sarietarako izendatua izan zena, alegia, Valentziako Ikus-entzunezko Akademiaren Saria irabazi zuen, Espainiako Soinu Banda Onenaren Mundo BSO Saria, bai eta bertan zein kanpoan erdietsitako beste hainbeste aintzatespen eta izendapen batzuk ere, hala nola, Zinema Musika Kritikarien Nazioarteko Elkartearen Konpositore Errebelazioarena (IFMCA).
Victor Reyes (Love gets a room)
Victor Reyes (Salamanca, 1962) musikari eta konpositore oso ezaguna da, zineman eta telebistan egindako lanengatik, batez ere. Bere obrarik ezagunenetako batzuk Buried (Enterrado) edo Grand Pianoren soinu-bandak dira, biak Soinu Banda Onenaren IFMCAren irabazleak, edo The Night Manager (El infiltrado), 2016an Emmy Saria eman zion partitura.
Formakuntza klasikoarekin, musika ikasketak Madrilgo Opera Kontserbatorioan amaitu zituen, 90eko hamarkadan moldatzaile bezala ibilbide dinamikoa garatuz nazioarteko artistentzat, hala nola, Julio Iglesias, Placido Domingo, Ricky Martin edo Montserrat Caballe, eta Mecano, La Decada edo Complices bezalako taldeentzat.
Aldi horretan, eta batez ere 2000ko hamarkadaren hasieratik, ikus-entzunezko baliabideekin harremanetan jarri zen eta bere ibilbideko soinu-banda nabarmenenak idatzi zituen, azkenak: Luces Rojas, 2012an, Down a Dark Hall (Blackwood), 2018an, eta Love a Room (El amor en su lugar), 2021ean. Musikagileak bertoko eta nazioarteko hainbat ekoizpen egin ditu, besteak beste, El Internado - Las Cumbres seriea edo eta Mediaseteko Entrevíasen ekoizpena.
Paula Olaz (Nora)
Paula Olaz (Iruñea, 1989) zinema, telebista, antzerki, dantza eta bideojokoetarako soinu-banden musikagilea dugu. Bere ikasketak Berklee College of Music-en egin zituen, non cum laude aipamena duen graduondokoa lortu zuen. Aldi berean, neuropsikologia klinikoko ikasketak egiten ditu, berau soinu-banden psikologia kognitiboaren munduan espezializatzeko aukera ematen dion esparrua izanik. Espainian, Estatu Batuetan, Suitzan eta Alemanian ikasi ondoren, hots, Javier Asín, Bingen Mendizabal, Cornelius Schwehr, Lucio Godoy eta Wolfgang Rihm konpositore ospetsuen babespean, Pascal Gaignerekin elkarlanean hasi zen 2017an. United Love Movement mugimendu unibertsalaren sortzaileetako bat da, eta, koru eta orkestra-musikaren bidez, giza izaerari eta egungo gizartean musikak duen aldaketa-ahalmenari buruzko hausnarketa bultzatzen du mugimendu honekin.
Hainbat filmetako musika konposatu du: Verano en Rojo (Belen Macias), Alguien que cuide de mí (Elvira Lindo eta Daniela Fjerman), Las Buenas Compañías (Silvia Munt)... Beste horrenbesteko filmen musika sailetan ere lan egin du, besteak beste, honakoetan: Handia, La Trinchera Infinita, Errementari, Remember me, Dantza, Ilargi guztiak, Malpaso, etab. Astronomia zalea eta unibertsoko soinu munduaren ikertzailea, 2017an Londresko Air Studios ospetsuetan grabatu eta zuzentzen du Hubble teleskopioak Europako Espazio Agentziarentzat dituen benetako irudietan oinarritutako obra. Orduz geroztik, "data sonification" deritzon arloan ikertzen du, CERN eta HEAD direlakoekin (Geneva, Suitza) elkarlanean, Europako fisikariekin eta astronomoekin batera. Gainera, Larrotxenen (Donostia) soinu bandak eta musika teknologia irakasten ditu, eta musika zein zientzian aditua da EITBn.
Julio de La Rosa (Modelo 77)
Julio de la Rosa soinu-banda sendo eta fidagarrienen espainiar konpositore eta ekoizleetako bat bilakatu zaigu. Egiten duen guztiari buruz duen ikuspuntu bereziak, beti filmaren edo telesailaren asmoetatik aldendu gabe, era guztietako sariak lortzea ekarri dio, besteak beste, La Isla Mínima filmarengatik Jatorrizko musika onenaren Goya Saria eta beste sari eta izendapen batzuk. Thriller-az gain, lan dexente egiten du komedia erromantikoetan, drametan, garaiko zineman edo eta fantasiazkoan.
Jerez de la Fronteran jaioa eta Sevillako Unibertsitatean Ikus-entzunezko Komunikazioan lizentziatua, Madrilen bizi da. 2005ean eman zuen bere burua ezagutzera ikus-entzunezkoen munduan, Siete Vírgenes filmarekin, Alberto Rodríguez zine-zuzendari handiaren eskutik. Bere ohiko konpositorea bihurtu da gaur arte. Harrezkero, dozenaka soinu-banda egin ditu Espainiako, Latinoamerikako eta Europa erdialdeko beste zuzendari batzuentzat, telebistarako eta plataformetarako telesailez gain, eta Goya Sarirako hiru aldiz izendatu dute: Grupo 7, El Hombre de las Mil Caras eta La Isla Mínima lanen musikagintzagatik, hain zuzen. Azken lan honekin “buru-handia” lortu zuen, Zinematografiako Idazleen Domina eta Kritikaren Feroz Saria ere. Bere azken soinu-bandarekin, Modelo 77, Goya, Feroz, Carmen eta CEC sarietarako izendatuta egon da, besteak beste. Halaber, Urteko soinu-banda onenaren Saria eskuratu du, Días de Cine Saria konkretuki.
Arantzazu Calleja (Irati)
Arantzazu Calleja Arte Ederretan lizentziatua eta biolin irakaslea da. Zinemarako musika idazten hasi zen Borja Cobeagarekin batera. Bere lehen kolaborazioa Goya Sarietarako izendatua egon zen (La primera vez, 2001) eta bigarrena Akademiaren Oscar Sarirako (Éramos pocos, 2005). Bere filmografiaren baitan Psiconautas bezalako izenburuak nabarmentzen dira (Alberto Vazquez eta Pedro Riveroren lana, 2017an Animaziozko Film onenaren Goya Saria), El Hoyo (Galder Gaztelu-Urrutia) edo Akelarre (Pablo Agüero), zeinaren bidez, Maite Arroitajauregirekin batera, Jatorrizko musika onenaren Goya Saria eta 2020ko Platino Saria jaso zituen. Bere azken lanak ditugu Alauda Ruiz de Azuaren Cinco Lobitos, Paul Urkijoren Irati (Maite Arroitajauregiren eskutik ere) eta Borja Cobeagaren No me gusta conducir. Gaur egun, Rich Flu filmaren soinu-banda sortzen dihardu, hots, Galder Gaztelu-Urrutiak zuzendutako nazioarteko koprodukzio batean.
Maite Arroitajauregi (Irati)
1977an Eibarren jaioa, Maite Arroitajauregi Biolontxeloan Lizentziatua da Gasteizko Goi Mailako Kontserbatorioan, eta Erdi mailako Gradua dauka Gambako Biolan, Bilboko Juan Crisostomo de Arriaga Kontserbatorioan. Anari, Lisabö edo Xabier Montoia bezalako taldeetan parte hartu ondoren, 2009an Mursego sortu zuen, bere bakarkako proiektua. Bertan, hainbat disko argitaratu ditu, eta abangoardia, folklorea eta musika klasikoa uztartzen dituen musika-lengoaia propioa definitu du. Horren ondorioz, 200 kontzertu baino gehiago eman ditu Paristik Erromara doazen agertokietan.
Dantza eta antzerkiaren munduarekin noizbehinkako kolaborazioez gain, ikus-entzunezkoen munduan ibilbide emankorra hasi zuen, hainbat film laburri musika jarriz, besteak beste, El rito, 2012 eta Herencia (Isaki Lakuesta) edo Colera (Aritz Moreno), baita Invisible (Victor Iriarte) eta Emak Bakia (Oskar Alegria) film luzeen soinu-banda konposatuz ere. Azken hori Zinemaldiaren 2012ko edizioko Zabaltegi sailean aurkeztu zen. 2015ean, Asier Altunaren Amamaren soinu-banda konposatu zuen Javi Pez musikariarekin batera, Zinemaldiko sail ofizialean ere aurkeztua, eta, ondoren, Montpellierreko Zinemaldian Musika onenaren Saria irabazi zuen. Fernando Francoren Morir filmaren soinu-bandaz arduratu ondoren, 2018an Myriam Perez Cazabonen Mutu pieza eszenikorako musika konposatu zuen.
Fernando Velazquez (Momiak)
Fernando Velazquez (Getxo, 1976) zinema, telebista eta antzerkirako euskal musikagilea da, kontzertu-musikaren sortzailea, orkestra-zuzendaria eta euskal biolontxelojolea. Ekimen bateratu honen sustatzaile intelektualetako bat dugu. Bere lanik ezagunenen artean Juan Antonio Bayonaren El orfanato, Lo imposible eta Un monstruo viene a verme filmak daude. Azken honen soinu-bandarekin Jatorrizko Musika Onenaren Goya Saria irabazi zuen 2017an. Musika ikasketak Getxo, Bilbo eta Gasteizko kontserbatorioetan hasi zituen, eta gero Madrilera edo Parisera joan zen. Espainiar Estatuko edo Erresuma Batuko orkestrarik onenetan biolontxelo-jotzaile eta orkestra-zuzendari gisa nabarmendu bada ere, 2000. urtetik aurrera bere konpositore ibilbidea Koldo Serra, Nacho Vigalondo edo Juan Antonio Bayona errealizadoreen eskutik erabat handitzen da. Harrezkero, arrakasta zinematografiko handietarako (Mamá, Ocho apellidos vascos, Hércules, El secreto de Marrowbone, Superlópez, Poderoso Victoria...) eta telesailetarako (Diablero, La otra mirada, Patria, El inocente, Alma...) konposatzen jarraitzeaz gain, antzerkigintzan egindako lana areagotu du, eta Alfredo Sanzol (El Gollem, El bar que se tragó a todos los españoles, La ternura...) antzerkigile eta Zentro Dramatiko Nazionaleko zuzendariarekin izandako esperientzia nabarmena bezain oparoa izan da.
Salgai 23-24 Denboraldiko kontzertuetarako sarrerak
Dagoeneko eros daitezke ohiko salguneetan Euskadiko Orkestraren 23-24 Kontzertu Denboraldiko hitzordu guztietarako sarrerak.
Irailaren 1etik salgai daude Euskadiko Orkestraren 23-24 Denboraldiko kontzertuetarako sarrerak. Irailaren 29an Gasteizen emango duen kontzertuarekin ekingo dio orkestrak ohiko lau hiriburuetan eskainiko duen abonu-kontzertuen denboraldiari.
Sarrerak salgai 10 eurotik aurrera
Bilbo, Donostia, Gasteiz eta Iruñeko kontzertu guztietarako sarrerak euskadikoorkestra.eus-en eros ahal izango dira, baita aretoen webguneetan (euskalduna.eus, kursaal.eus, principalantzokia.org y baluarte.com) eta euren leihatila eta ohiko salguneetan ere.
Irekita jarraitzen du Denboraldiko abonu-eskaera egiteko aukerak ere, hemen (80 eurotik aurrera).
Tarifa bereziak eta deskontuak
Euskadiko Orkestrako abonatu, ikasle, 30 urtetik beherako, 65 urtetik gorako, langabetu eta beste kolektibo batzuek (Artium, Kursaal Eszena...) tarifa bereziekin gozatu ahal izango dute kontzertuez. Gainera, Azken Ordu Gazteari esker, 30 urtetik beherako lagunek aukera izango dute gune guztietako sarrerak 10 eurotan erosteko, kontzertua hasi baino 30 minutu lehenago dagokion aretoko leihatilan.
23-24 Denboraldia: Artea lehen pertsonan
Euskadiko Orkestraren Kontzertu Denboraldi berri honetan sortzen eta eraldatzen duen gizakiarengan jarri nahi dugu arreta. Pertsona jarriko dugu erdigunean, pertsona ekintzaile eta arduratsua, mundua mugitzen duena bere bizi-esperientzien bidez, batzuetan espiritualak eta beste batzuetan mundutarrak.
Mahler eta bere Hirugarren Sinfoniaren eskutik, betierekotasuna eta maitasuna bezalako kontzeptuak izango ditugu, eta esperientzia erlijiosoa bezalako gaiek Brucknerren izena izango dute, bere Zazpigarren Sinfoniarekin. Alde espiritualago horrekin kontrastean, badira autore batzuk unibertso desberdinetatik bizitza pribatuari eta mundutarrari kolore paleta ahalik eta zabalena jartzen diotenak, hala nola Dutilleux, bere Correspondances lanarekin, eta Strauss, Aus Italien eta Etxeko Sinfoniarekin. Rakhmaninovek Hirugarren Sinfonian eta Pianorako Bigarren Kontzertuan erakusten du jaioterriaren nostalgia zein pisutsua izan daitekeen. Prokofieven Alexander Nevskik heroiaren gorazarrea irudikatzen du, eta horrek Dvoraken Zazpigarren Sinfoniarekin konekta gaitzake, herriaren borrokaren eta nahien aldarrikapena hartzen baitu oinarri txekiarraren lanak. Identitatearen kontzeptuak bere adierazpen gorena Die ersten Menschenen izango du, Stephanen opera, Adam eta Eva Paradisutik bota osteko giza izaeraren disekzio freudiarrarekin urratzen gaituena.
Giza kontzeptu horiek guztiak artean oinarritzen dira, aliatu iradokitzaile gisa. Horregatik pozten gaitu, besteak beste, bide honetan Aaron Coplandekin Giza Eskubideen Aldarrikapenaren 75. urteurrena ospatzeak, baita Eduardo Chillidaren jaiotzaren mendeurrena ere, Antonio Lauzurikari enkargatutako lan batekin.
Denboraldi honetan, eta agian beti Euskadiko Orkestran, gizakia eta artea etengabeko gogoetan daude.
Robert Treviñok Euskadiko Orkestraren zuzendari titular izaten jarraituko du.
23-24 Denboraldiari buruzko informazio osoagoa hemen
Euskadiko Orkestra Erkorekaren disko bat grabatzen ari da euskal artista handiek lagunduta
Juanjo Mena, Asier Polo, Alfonso Gomez eta Carlos Mena artista bikainak Euskadiko Orkestrarekin batera ari dira grabatzen egunotan Miramonen Gabriel Erkoreka musikagile bilbotarraren hiru obra. Grabazioa datozen hilabeteetan argitaratuko da.
Denboraldiaren hasiera honetan Euskadiko Orkestra Miramongo egoitzan Gabriel Erkoreka bilbotar konpositorearen hiru obra barne hartuko dituen album bat grabatzen ari da. Horretarako, orkestraren ohiko kolaboratzaileekin elkartu da, lehen mailako eta nazioartean aritutako euskal artistekin, eta grabazio-prozesu honen emaitza herrialde honen musika-ondare aberatsaren isla izango da.
Ekaitza, Piscis eta Tres sonetos para Michelangelo Gabriel Erkorekaren azken aldiko konposizio-katalogoko hiru obra dira, eta orain bilduko dira hirurak hainbat egunetako lanaren ostean bihar amaituko den grabazio batean. Erkorekak hiru lanok hiru bakarlari hauentzat idatzi zituen beren-beregi, haiek estreinatu zituzten eta orain haiek grabatuko dituzte, baita ere. Gainera, grabazio honen beste bertute handi bat zera izango da, lagun onen artean egingo dela.
Lagun onak, artista handiak
Asier Polo Ekaitza biolontxelorako kontzertuaren buru, Alfonso Gomez Piscis pianorako kontzertuaren buru eta Carlos Mena Tres sonetos para Michelangeloren buru, erantzukizun handiarekin ari dira aurre egiten grabazio honi, jakitun izanda obra hauen erreferentziazko lehen erregistroa izango dela. Proiektuaren musika-zuzendaritza Juanjo Menaren lanak koroatuko du. Zuzendari gasteiztarrak ezin hobeto ezagutzen ditu artista hauek guztiak, baita Gabriel Erkorekaren obra guztia ere. Musikagileak honako hau dio proiektu berriari buruz: “Interpreteok kalitate-bermea dira, lan eskerga egin dugu, zoragarriak dira, eta Juanjo Menak ere oso ondo ezagutzen du nire musika eta nire obra asko estreinatu ditu. Emozio asko bildu ditugu proiektu honetan”.
Musika-ondarea
Garrantzi handiko proiektu musikal honek oso modu argian islatzen du Euskadiko Orkestraren esentzia eta misioa. Orkestrak Euskadiren kultur zabalkundean laguntzen du, euskal musika-balioak kanpoan hedatzen ditu, euskal interprete eta konpositoreentzat bultzada eta plataforma da eta grabazioen bidez musika-ekoizpenaren funts dokumentala osatzen du. Arabako, Bizkaiko eta Gipuzkoako foru aldundien babesa jaso du datozen hilabeteotan argitaratuko den grabazio honek.
Euskadiko Orkestrak 23/24 Denboraldiari hasiera emango dio Mahlerren ‘Sinfonia milakoena’ handian parte hartuz Musika Hamabostaldian
Abuztuaren 18an (20:00) musika klasikoko jaialdiak Kursaal Auditoriumeko eszenatoki gainean bilduko ditu, Robert Treviñoren zuzendaritzapean, Euskadiko Orkestra eta Nafarroako Orkestra Sinfonikoa arlo instrumentalean; Donostiako Orfeoia, Iruñeko Orfeoia, Easo Eskolania eta Easo Gazte Abesbatza abesbatza-pasarteetarako; eta bakarlarien pasarteetarako punta-puntako ahots ugari.
Arranditsua, itzelezkoa, sekulakoa, egundokoa, ikaragarria, berebizikoa, izugarria, neurrigabea, eskerga edo berealdikoa dira datorren abuztuaren 18an (20:00) Kursaaleko eszenatokian laurehundik gora interpretatzaile bilduko dituen Gustav Mahlerren 8. Sinfoniari jar dakizkioken izenondoetako batzuk. Kontzertu honetarako sarrerak bukatuta daude.
Bere tamaina izugarria dela-eta, “Milakoena” bezala ere ezaguna dena gutxitan sartzen da auditorio edo jaialdien programazioan. Hain zuzen, bigarren aldia baino ez da Musika Hamabostaldiaren historia osoan sinfonia hau programatzen dela. Sinfonia etenik gabeko bi zatik osatzen dute: lehenengoan, latinez abestutako erlijio-ereserki bat, eta, bigarrenean, Goetheren Faustoren azken eszenak, alemanez abestuak. Hori interpretatzeko, Hamabostaldiak bildu ditu, Robert Treviñoren zuzendaritzapean, Euskadiko Orkestra eta Nafarroako Orkestra Sinfonikoa arlo instrumentalean; Donostiako Orfeoia, Iruñeko Orfeoia, Easo Eskolania eta Easo Gazte Abesbatza abesbatza-pasarteetarako eta ahots bakarlarien pasarteetarako Sarah Wegener, Mojca Erdmann eta Miren Urbieta-Vega sopranoak, Justina Gringyte mezzosopranoa, Claudia Huckle kontraltoa, Aj Glueckert tenorra, José Antonio López baritonoa eta Mikhail Petrenko baxua.
Aste honetan hasi dira ekoizpen handi honen entseguak Euskadiko Orkestraren Miramongo egoitzan, Robert Treviñoren batutapean joko duten bi orkestren lehen elkartzearekin, eta laster egingo dute bat entseguekin hiru abesbatzek.
Hitzordu handiez betetako Denboraldia Euskadiko Orkestrarentzat
Horrela, Euskadiko Orkestrak garrantzi handiko musika-hitzorduez betetako Denboraldi berri bati ekingo dio. Abonu Denboraldia irailaren 29an hasiko da, Mahlerren beste sinfonia handi batekin, Hirugarrena. Aurretik, abuztu eta irailean, hainbat grabazio egingo ditu, Columbus Fundazioak antolatutako Arantzazu Jaialdiaren bigarren edizioan parte hartuko du kontzertu bikoitz batekin, eta Zinemaldiaren barruko ohiko Kontzertua & Proiekzioa eskainiko du Donostiako Belodromoan. Euskadiko Orkestraren hurrengo hitzorduei buruzko informazio guztia hemen
Informazio gehiago
Musika HamabostaldiaSarrerak salgai Bilboko Arriaga Antzokiko ‘Die ersten Menschen’-erako
Euskadiko Orkestrak Abonu Denboraldiaren baitan eskainiko duen lehen opera Arriaga Antzokiaren ekoizpena da eta 2024ko apirilaren 18an eta 20an izango da.
Dagoeneko salgai daude publiko orokorrarentzat ikuskizunaren sarrerak. Euskadiko Orkestraren abonatuek %25eko deskontua eskuratuko dute sarreren erosketan.
23/24 Denboraldiaren barruan, Euskadiko Orkestrak Arriaga Antzokiaren ekoizpen berri batean parte hartuko du, Die ersten Menschen operan, alegia. Rudi Stephanek sinatutako opera baten antzezpena izango da, Calixto Bieitoren escena-zuzendaritzarekin eta Robert Treviñoren musika-zuzendaritzarekin. Bibliako lehen familiaren historia kontatzen duen konposizio bikain hau Bilboko Arriaga Antzokian taularatuko da 2024ko apirilaren 18an eta 20an, eta sarrerak salgai daude jada.
Die ersten Menschen paisaia primitibo zabal batean gauzatzen da. Bertan, gizateriaren Bibliako historiaren lehen familia da protagonista: Eva, Adan, Kain eta Abel.
Otto Borngräber alemaniar egileak «Erotisches Mysterium» (Misterio erotikoa) azpititulua jarri zion bere lan batean oinarrituta sortu zuen libretoari. Bibliako historiaren interpretazio sinboliko hura bere garaian goia jo zuen psikoanalisian oinarritu zen, argi eta garbi: Freud entzuten da hondoan. Borngräberrek erakusten du familia primitiboa urratuta dagoela bi muturren arteko tentsioagatik; aurrez aurre daude, alde batetik, sexu-bulkada eta bizitza gutiziatsua eta, bestetik, espiritualtasunari eskainitako bizitza.
%25eko deskontua Euskadiko Orkestraren abonatuentzat
Euskadiko Orkestraren Bilboko abonatuek operarako gordeta izango dute besaulkia, euren abonamenduaren barruan. Aurrerago jakinaraziko zaie nola eskuratu sarrera. Era berean, hiri guztietako (Bilbo, Donostia, Gasteiz, Iruña) abonatuek sarrera solteak eros ditzakete prezio orokorraren gaineko %25eko deskontuarekin. Deskontudun sarrera eros ahal izango da leihatilan (NAN eta abonu-txartelarekin) edo Arriaga Antzokiaren webgunearen bidez (‘deskontuak dituzten taldeak’ atala aukeratu).
Miramongo Matinéeak Denboraldi amaierara iritsiko dira larunbat honetan Belle Époque Laukotearekin
Hari- eta piano-taldeak Gabriel Fauré eta Robert Schumannen garai Erromantikoko kuartetoak interpretatuko ditu larunbat honetan, ekainak 3, 11:00etan, Miramonen. Sarrerak salgai daude 11 eurotan.
Miramongo Matinéeak 22/23 Denboraldiaren amaierara iritsiko dira Belle Époque Laukoteak eskainiko duen ‘Kuarteto erromantikoak’ izeneko kontzertuarekin, larunbat honetan, ekainak 3, 11:00etan, Euskadiko Orkestraren Miramongo egoitzan. Taldeak Gabriel Fauré eta Robert Schumannen pianodun kuarteto bana eskainiko du, biak Erromantizismo garai betean konposatuak, XIX. mendean. Lau musikarietatik hiru Euskadiko Orkestrako kideak dira: Virgile Demillac (biolina), Pawel Krymer (biola) eta Gabriel Mesado (biolontxeloa). Javier Perez Azpeitia pianojoleak osatuko du laukotea.
Kontzertuari hasiera emango dion pianodun kuartetoa Faurék idatzi zituen genero bereko bietako lehenengoa da. Bere ganbera-lan ospetsuenetakotzat jotzen da, eta generoko obra erreferentea ere bada. 1880ko otsailean estreinatu zen Parisko Musikaren Sozietate Nazionalean eskainitako kontzertu batean, baina 1884ra arte ez zen argitaratu bere azken errebisioa. Nahiz eta do minorrean idatzita egon, berotasunez eta baikortasunez beteriko obra da.
Matinéea ixteko taldeak Schumannen Pianodun kuartetoa aukeratu du. Lana 1842an konposatu zuen, oso garai emankorrean, non konpositore alemaniarrak eskala handiko ganbera-musikako hainbat obra idatzi zituen. Kontzertu honetan entzungo den obra bere Pianodun kintetoaren sorkuntza bikotetzat hartzen da, astebete lehenago bakarrik idatzi baitzuen hura. Schumannek bere emazte Clara buruan zuela idatzi zuen kuartetoa, eta hark estreinatu zuen pianoan 1844ko abenduaren 8an Leipzigen.
Sarrera solteak (11€) salgai daude euskadikoorkestra.eus webgunean eta Kursaal Auditoriumeko leihatilan. Gainera, leku librerik geratuko balitz, orkestraren egoitzako leihatilan bertan eros ahal izango lirateke kontzertuaren egunean.
Miramongo Matinéetara eroso joateko, Euskadiko Orkestrak doako autobus-zerbitzua eskainiko dio kontzertua ikustera doazen abonatuei. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.
Miramongo Matinéeek Kutxa Fundazioaren babesa dute sortu zirenetik.
Robert Treviño eta Euskadiko Orkestra Kontzertu Denboraldiaren gailurrera iritsiko dira ‘Gainditzea’ programarekin
Chopinen ‘Pianorako 2. Kontzertua’-rekin, Yulianna Avdeevaren eskuetan, eta Xostakovitxen ‘15. Sinfonia’-rekin amaituko du orkestrak ‘Tragediatik gainditzera’ eraman duen Denboraldia.
Kontzertuak ekainaren 2tik 9ra izango dira Donostia, Iruña, Bilbo eta Gasteizen, eta sarrerak salgai daude 10 eurotik aurrera.
Musikaren adibide handien bidez gizakiaren zokorik ilunenetan barrena ibili ondoren, Euskadiko Orkestra Denboraldiaren amaierara iritsiko da kontzertu-programa berri batekin, Xostakovitxen ‘tragediarekin’ hasi zen eta ‘gainditzearekin’ bukatzen den ibilbide musikal bati amaiera emango diona. Bost kontzertu eskainiko ditu orkestrak: ostiraletan, ekainak 2 eta 9, Donostiako Kursaal Auditoriumean; astelehenean, ekainak 5, Iruñeko Baluarte Auditoriumean; asteartean, ekainak 6, Bilboko Euskalduna Jauregian; ostegunean, ekainak 8, Gasteizko Principal Antzokian. Kontzertu guztiak 19:30ean izango dira.
Denboraldia amaitzeko, Robert Treviñok egungo pianojole nabarmenenetako baten presentzia eskatu du berriz: Yulianna Avdeeva. Joan den denboraldian Euskadiko Orkestrarekin debuta egin eta gero, Leonard Bernsteinen Antsietatearen aroa lana interpretatuz, Errusiako pianorako errepertorioaren interpretatzaile handietako bat den Avdeeva Euskadira itzuliko da bere beste espezialitateetako baten erakustaldia egitera: Chopinen musika. Izan ere, ezin daiteke ahaztu berak irabazi zuela 2010ean konpositore poloniarraren izena daraman Txapelketa prestigiotsua. Chopinek Pianorako 2. kontzertua konposatu zuen berak jotzeko biretan; bel canto italiarra du inspirazio nagusi lan horrek. Sorkuntza kementsua da, gazte-kutsukoa, eta pianojole bizi-bizien, hala nola Yulianna Avdeevaren, dohainik onenak ustiatzen ditu. Pianojoleak disko bat atera berri du, Resilience, ezegonkortasun handiko garaietan indartsu agertu diren konpositoreei eskainitakoa: Xostakovitx, Prokofiev, Szpilman eta Weinberg.
Euskadiko Orkestrak hasi bezala amaituko du Kontzertu Denboraldia: Xostakovitxen musikarekin. Zortzigarren Sinfonia tragiko eta izugarria ez bezala, hemen entzungo dugun 15. Sinfonia askatasunez eta baikortasunez betetako pieza da. Konpositorearen azken sinfonia izan zen, Stalin jada ez zegoenean idatzia, eta Xostakovitxek bere bizitzaren eta eraginen atzerabegirako bat egin zuen bertan nolabait, Wagner eta Rossiniren obren zatiak ez ezik, eta Xostakovitxen beraren aurreko musikaren zatiak ere hartuz.