Linzeko Brucknerhausen lehen kontzertu bat eta Salzburgoko Grosses Festspielhausen beste bi eman ondoren, Euskadiko Orkestrak amaitutzat emango du gaur Austriako lurretan egiten ari den bira arrakastatsua, Mozarten jaioterriko areto handian eskainiko duen azken hitzordu batekin.

Salzburgoko lehen egunean sumatu zen arrakasta, Reinhold Gliereren Harparako kontzertuarekin, Xavier de Maistre bakarlari frantsesaren esku magikoetan, eta Dmitri Xostakovitxen Hamargarrenarekin. Baina atzo, otsailak 8, garaipena nabarmena izan zen Euskadiko Orkestra eta Robert Treviño titularrak Ravel hautatu zutenean programaren plater nagusi gisa. Jakina da Ziburuko konpositoreari eskainitako azken bi grabazioek arrakasta handia lortu dutela mundu osoan zehar. Sekretua honakoa izan da: orkestrak Ravel bere begirada propioaz aurkeztu du, bere alderik euskaldunena nabarmenduz. Kontzertuaren lehen zatian Bizeten Carmenen lehenengo suitea eta Maistrek maisutasunez Alberto Ginasteraren Harparako kontzertua eskaini ondoren, Euskadiko Orkestrak eta Treviñok Salzburgoko Grosses Festspielhausen Ravelen Alborada del gracioso, Rapsodie espagnole eta Pavane pour une infante défunte interpretatu zituzten, Boléro ospetsu eta unibertsalera iritsi arte. Eta azken obra honetan orkestrak dena eman zuen, Ravelen kapritxoei erantzunez, familia instrumental ezberdinek partiturak markatzen duen in crescendo hori gorenera emanez.

Txalo-zaparrada handia entzun zen areto osoan minutu luzez, Thomas Heissbauer programatzailearen zorionerako. Hau esan zuen berak kontzertua amaitzean: “ez da batere ohikoa hain publiko apartaren erantzun hori. Garrantzitsua eta interesgarria da hirira hain ezagunak ez diren beste kultura eta orkestra batzuk ekartzea, maila handia ematen baitute eta beren herrialdeetako enbaxadore handi bihurtzen baitira”. Ildo beretik mintzatu zen Andoni Iturbe Eusko Jaurlaritzako Kultura sailburuordea ere, Salzburgoko lehen bi kontzertuetan egon zena: “Oso harro nago euskalduna naizelako eta Euskadi ordezkatzen duzuelako —esan zion orkestra osoari arratsaldeko entseguan— oso zirraragarria izaten ari da; kultur enbaxadore handiak izaten ari zarete”.

Robert Treviñok eta Oriol Rochek zorion-mezuak jaso zituzten bertaratutako publikoaren aldetik. Orkestrak eskaini zituen hiru bisek ikusentzuleen interesa piztu zuten, zalantzarik gabe: Jesus Guridiren Hamar euskal melodiatako Amorosa, Brahmsen bosgarren Hungariar dantza eta Geronimo Gimenezen Luis Alonsoren ezteien pausaldia.

Linz, Danubioren ibaiertzean

Euskadiko Orkestrak otsailaren 6an, asteartea, eman zion hasiera Austriako birari Linzeko Brucknerhaus aretoan. Linz Brucknerren lurraldea da, baita musika tradizio handikoa ere. Bere aretoak Europako akustika onenetako bat dauka eta bertan, Danubio ibaiaren ertzean, Ravelen katalogo zabal bat entzun ahal izan zen, baita Ginasteraren Harparako kontzertua ere, berriz ere Xavier de Maistre harpajole frantziarraren eskuetan, bidaide izan duguna bira osoan barrena.

Salzburgo, Mozarten baimenarekin

Gaur Euskadiko Orkestrak programa errepikatuko du Salzburgon, Ravelen Bolero plater nagusitzat hartuta. Eta, horrekin, maila eta exijentzia handiko nazioarteko bira berri bati amaiera emango dio. Bira honetara musika klasikoaren tokirik garrantzitsuenetako batean aurkezteak eskatzen duen errespetuarekin iritsi ziren orkestraren musikariak, eta maila bikaina eman dute. Salzburgok hainbat superlatibo biltzen dituela jakina da, izan ere, munduko hiririk ezagunenetakoa eta garrantzitsuenetakoa da artistikoki eta kulturalki. Wolgang Amadeus Mozarten sorlekua da, historiako musikari garrantzitsu eta garrantzitsuenetako bat, eta munduko musika klasikoko jaialdi jendetsu eta garrantzitsuenetako bat hartzen du bere baitan. Jaialdi hau kontzertu-areto bikain batean ospatzen da, Grosses Festspielhaus (Jaialdien Etxe Handia), Mönchsberg mendiaren hegal ikusgarriari irabazitakoa eta 100 metroko zabalerarekin munduko handienetako bat den kutxa eszeniko handi bat duena. Gainera, hiria Gizateriaren Kultur Ondare izendatu dute.

Euskal zuhaitz bat Austriako basoetan

Grosses Festspielhaus aretoak 2.200 lagunentzako lekua du. Hiru hitzorduak batuta, sei mila lagunek baino gehiagok entzungo dute Euskadiko Orkestra Salzburgora egindako bisita honetan (zazpi mila inguru, Linzeko publikoa gehituz gero). Heren bat bertako herritarrak, beste heren bat eskualdekoak eta azken herena Alemaniakoak, Salzburgok eskaintzen dituen kontzertuetara joateko desplazatzeko arazorik izan ohi ez dutenak. Sarrerek 99 €-rainoko prezioa izan dute.

Datu bitxi gisa balio dezala emanaldiaren ondoren artistei lorerik ez zaiela ematen; horren ordez, denboraldi honetatik aurrera, eta Salzburgotik igaro izanaren oroigarri gisa, artista edo orkestra bakoitzak bere izena eramango du zuhaitz batean, Austriako basoak basoberritzeko eta kontserbatzeko plan baten parte gisa.

Euskadi Basque Country / Baskenland

Kontzertu hauetan presente egon da Euskadi Basque Country markaren alemaniar bertsioa, Baskenland. Hala, Turismoaren Euskal Agentziak bat egin du bira honekin, Euskadi bultzatzeko eta aktibo kultural gisa posizionatzeko; kasu honetan, Euskadiko Orkestraren bidez.

Informazio gehiago

Larunbat honetan, otsailak 10, 11:00etan, Euskadiko Orkestraren ganbera-musika ziklo Miramongo Matinéeen Denboraldiko hurrengo hitzordua izango da. Bertan, Landarbaso Abesbatzak ‘Zorion bideak’ izeneko kontzertua eskainiko du. Eszenatoki gainean 41 ahots bilduko dituen abesbatzak honako kide hauek izango ditu protagonista: Iñaki Tolaretxipi (zuzendaria), Josetxo Brey (bakarlaria), Maddalen Dorronsoro (bakarlaria), Iñaki Mendizabal (bakarlaria). Gainera, Oihana Eizagirre eta Ane Franciscoren laguntza izango dute flautan eta Jon Padillarena perkusioan.

Errenteriako Landarbaso Abesbatza 1991n sortu zuten 16 eta 36 urte bitarteko hainbat gaztek. Gaur egun elkartea hiru taldek osatzen dute eta ehundik gora kide dauzka: Kontari (8-14 urte), Landarbasoko Dizdizka Taldea (15-21 urte) eta Landarbaso Abesbatza bera (17-45 urte). Gure herrialdeko erreferente musikal argia da abesbatza. Euskal kulturarekiko duen konpromisoa ukaezina da: galdutako obrak berreskuratzen ditu eta moldaketa berriak eta grabazioak egiten ditu, gure aberastasun musikalaren adibide diren obrekin. Lorpen handienen artean, nazioarteko 17 sari ditu, dagoeneko bostehundik gora emanaldi eskaini ditu bere ibilbide oparoan eta 11 diskotan parte hartu du edo/eta ekoizpen-lanetan aritu da.

Kontzertu honetan Landarbaso Abesbatzak aurkeztuko duen egitarauak zailtasun tekniko handia du. Aro barrokotik hasi eta gaur egunera arte, Victoriatik abiatu eta Guridiraino, konpositore baltikoetatik igaroz, emozioz betetako kontzertua izango da. Obra sakro sakonenetan, ametsik gozoenetan, barne begiradetan zein maitasunean, denetan aurki ditzake edonork zorionerako bideak. Eta Landarbaso Abesbatzak bide horiek arakatuko ditu hain garai eta ibilbide ezberdinetakoak diren musikagile hauek gurutzatuz.

Hona hemen abesbatzak interpretatuko duen egitarau osoa:

• Robert Lucas de Pearsall: Lay a Garland
• Tomas Luis de Victoria: Lauda Sion Salvatorem
• Franz Biebl: Ave Maria koru bikoitzean
• Part Uusberg: Kyrie
• Jekabs Jancevskis: Atsalums
• Eriks Esenvalds: Long Road
• Laura Jekabsone: Div dujinas Gaisa Skreja
• Eriks Esenvalds: Only in Sleep
• Javier Busto: Ametsetan
• Laura Jekabsone: Oi Nere Zoragarria
• Victor Zubizarreta: Ama Begira Zazu
• Jesus Guridi: Akerra ikusi degu

Kontzertu honetarako sarrerak bukatu egin dira.

Miramongo Matinéetara eroso joateko, Euskadiko Orkestrak doako autobus-zerbitzua eskainiko du. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

  PRENTSA-MATERIALA JAITSI

Euskadiko Orkestra nazioarteko bira berri batean murgilduko da datorren astean. Oraingo honetan, Austriara joango da. Otsailaren 6an izango da lehenengo kontzertua, Linzeko Brucknerhaus aretoan; duela bost urte ere izan zen han. Eta Salzburgon jarraituko du; hiru kontzertu egingo ditu han, otsailaren 7an, 8an eta 9an, Grosses Festspielhaus areto ospetsuan. Orkestrak hiru programa ezberdin eskainiko ditu, eta Ravel, Xostakovitx, Bizet, Ginastera eta Gliere musikagileen obrak hartuko ditu barne.

Salzburgorako bisita 2021erako zegoen programatuta, baina orkestrak ezin izan zuen joan, pandemia zela eta. Kontzertuen sustatzaileak beste data batzuk proposatu zizkion orkestrari, eta azkenean iritsi da hiriari bisita egiteko unea. Orkestra Salzburgon zein Linzen egon zen 80ko urteetako lehenengo biretan. Orain, 40 urteren ostean, Salzburgora itzuliko da. Linzera ere itzuliko da, baina 2018an ere izan zen hiri hartan.

Oriol Roch zuzendari nagusiaren hitzetan:  “Euskadiko Orkestra Salzburgon eta Linzen egoteak, batetik, Europako talde sinfonikoen parean gaudela esan nahi du; eta, bestetik, herrialdearen ordezkaritza kulturalerako jarduera bat da. Errepertorio anbiziotsua, sendoa eta formatu handikoa eramango dugu. Europa erdiguneko programatzaileek, Salzburgoren gisako leku ospetsuetakoek, nazioarteko errepertorioko (adibidez, Xostakovitx) obra ukaezinak guri eskatzeak agerian uzten du orkestrak egiten duen lana eta gure mugetatik kanpo duen inpaktua. Nazioarteko banaketako presentzia diskografikoak zerikusi handia izan du. Ez da ezusteko bat orkestra Ravelekin aurkeztea. Bi disko grabatu ditu haren musikarekin, Ondine diskoetxearekin, eta kritika bikainak jaso ditu Ziburuko konpositore unibertsalaren gaineko interpretazioengatik”.

Bira berri honetan, Robert Treviño zuzendari titularrak zuzenduko du berriz ere Euskadiko Orkestra. Haren arabera, “Europako aretorik garrantzitsuenetakoa da Linzekoa, eta gure itzuleraren zain daude asko, 2018an Austrian eta Alemanian egin genuen biraren ondoren. Zalantzarik gabe, publikoa gure orkestra berriz entzuteko gogo handiz dago. Eta zer esan Salzburgoz? Mozarten jaioterria eta musika klasikoaren sorguneetako bat, munduko jaialdirik garrantzitsu eta ospetsuenetako bat duena. Niretzat oso une berezia da orkestraren zuzendari titular gisa”.

Bidaia honetan orkestrak ondoan izango du Xavier de Maistre, azken hamarkadetako eragin handieneko harpajolea dena, segur aski. Hastapen profesionalak miragarriak izan ziren, zalantzarik gabe: 16 urte besterik ez zituela hasi zen nazioarteko lehiaketa garrantzitsuak irabazten eta 22 urte zituela lortu zuen harpa bakarlariaren postua Bavierako Irratiaren Orkestran. Hiru urte geroago, Vienako Orkestra Filarmonikoko harpajole solista bihurtu zen, eta hamaika urtez aritu zen postu horretan. Hala ere, De Maistrek Vienari agur esatea erabaki zuen, bakarlari-ibilbideari ekiteko. Ordutik aurrera, munduko orkestra eta zuzendari onenekin batera jo du eta gainera, musika-tresnaren ordezkari onena bihurtu da mundu klasikoaren barruan. Horrez gain, publikoaren artean ezagutarazteko ahalegin handia egin du.      

De Maistrek askotan parte hartu du Euskadiko Orkestrarekin. Orkestrak 1997tik 2012ra Claves Records diskoetxearekin grabatu zuen Euskal Konpositoreen Bilduma ospetsuan izan zuen parte-hartzeetako bat De Maistrek, 15 euskal egileren beste hainbeste album monografikoko bilduman, alegia. Harpajolea Tomas Garbizu eta Aita Madinari eskainitako diskoetan izan zen, Cristian Mandealek zuzendu zituenak, eta 2004an eta 2005ean argitaratuak, hurrenez hurren. Gainera, 2007an orkestraren Abonu Denboraldian parte hartu zuen Aita Madinaren eta Carl Reineckeren lanak interpretatzen eta, bisita hori aprobetxatuz, harpa-errezitaldia eskaini zuen Miramongo Matinéeetan. 2021ean berriz izan zen Euskadiko Orkestraren kontzertu-programa batean, kasu hartan Ginasteraren Harparako kontzertua eskaintzen. Hain zuzen ere, obra hori joko du bira honetan, Gliereren Harparako kontzertuarekin batera.

Bidaia-plana eta kontzertuak

Orkestra astelehenean irtengo da, otsailaren 5ean, Linzeko lehen kontzertuaren bezperan. Lehenengo hitzordu horren ondoren, otsailaren 7an Salzburgora joango da, eta hiru kontzertu eskainiko ditu han, ondoz ondoko hiru egunetan: otsailak 7, 8 eta 9. Larunbatean, otsailaren 10ean, Euskal Herrira itzuliko da.

Austriako ipar-ekialdeko hiri hau Danubio ibaiak zeharkatzen du. Austria Garaiko (Oberösterreich) hiriburua da eta hirugarren herrialde jendetsuena da, Viena eta Grazen ostean. 203.000 biztanle ditu hiriak eta 700.000 biztanle baino gehiago metropoli-eremuak.

Brucknerhaus

Brucknerhaus Linzeko kongresu-zentroa da eta hiri horretako auzo batean jaiotako Anton Bruckner konposatzaileari zor dio izena. Eraikina Heikki eta Kaija Siren arkitekto finlandiarrek diseinatu zuten, eta 1974an inauguratu zuten.

200 bat emanaldi hartzen ditu urtero, eta horietan 180.000 ikusle baino gehiagok hartzen dute parte. Barne hartzen dituen jaialdi garrantzitsuenak dira Ars Electronica Festival (irail hasieran urtero izaten den musika digital, arte eta teknologia jaialdia) eta Brucknerfest (irail eta urri bitartean 1974tik antolatzen den musika klasiko jaialdia, egoitza nagusi Brucknerhausa duena).

Duen akustika bikainagatik da ezaguna aretoa eta nazioartean musika klasikoaren instituzio nagusietako bat bezala aintzatesten da.

Ezaguna da Wolfgang Amadeus Mozarten jaioterria delako eta munduko musika-jaialdirik jendetsuenak eta garrantzitsuenak dituelako. Gainera, hiriko erdigune historikoa Gizateriaren Kultura Ondarea da. 

Grosses Festspielhaus, Salzburgoko Jaialdia

Orkestrak Grosses Festspielhausen (Jaialdien Etxe Handia) eskainiko ditu hiru kontzertuak, Salzburgoko jaialdi ospetsuen egoitzan. 1956an hasi ziren areto hori eraikitzen. 55.000 m³ harri atera zuten Mönchsberg mendiaren hegaletik, kaxa eszeniko erraldoiarentzat lekua egiteko. Izan ere, 100 metroko zabalera du eta munduko handienetakoa da. Auditoriumaren oinplanoa karratua da, 35 metrokoa aldea duena, eta 2.179 eserleku ditu. Sarrera nagusitik, publikoa brontzezko bost ate handitatik sartzen da aretora. Muranoko kristalez egindako lanparek argiztatzen dute aretoa. 1960ko uztailaren 26an inauguratu zuten antzokia. Vienako Orkestra Filarmonikoak El caballero de la rosa interpretatu zuen, Herbert von Karajanek zuzenduta.

Salzburgoko Jaialdia (Salzburger Festspiele) musika eta antzerki jaialdi garrantzitsua da, 1920az geroztik egiten dutena. Munduko musika eta antzerki jaialdirik garrantzitsuenetakoa eta jendetsuenetakoa da. Udan egiten dute jaialdia, urtero, uztailean eta abuztuan. 1973az geroztik jaialdiaren luzapen bat ere ospatzen dute Mendekostean, musika klasikoari eta barrokoari zuzenduta. Eta, 1967az geroztik, beste jaialdi bat ere egiten dute pazko garaian, Richard Wagnerren presentzia handiarekin.

Datak, hiriak eta programak

Ondoz ondoko lau egunetan lau kontzertu egingo ditu Euskadiko Orkestrak, eta hiru programa ezberdin eskainiko ditu, Ravel, Ginastera, Gliere, Xostakovitx eta Bizeten obrak konbinatuta.

• Otsailak 6: Linz, Brucknerhaus (1. programa), 19:30
• Otsailak 7: Salzburgo, Grosses Festpielhaus (2. programa), 19:00
• Otsailak 8: Salzburgo, Grosses Festpielhaus (3. programa), 19:00
• Otsailak 9: Salzburgo, Grosses Festpielhaus (3. programa), 19:00

Robert Treviño, zuzendaria
Xavier De Maistre, harpa
Euskadiko Orkestra

1. PROGRAMA (Linz)

M. Ravel: La valse, poema koreografikoa [12']
A. Ginastera: Harpa eta Orkestrarako Kontzertua [23']
M. Ravel: Alborada del gracioso [8'], Rapsodie espagnole [16'], Pavane pour une infante défunte [6'], Boléro [13']

2. PROGRAMA (Salzburgo, otsailak 7)

R. Gliere: Harpa eta Orkestrarako Kontzertua [27']
D. Xostakovitx: 10. Sinfonia [57']

3. PROGRAMA (Salzburgo, otsailak 8 eta 9)

G. Bizet: Carmen. 1. suitea [12']
A. Ginastera: Harpa eta Orkestrarako Kontzertua [23']
M. Ravel: Alborada del gracioso [8'], Rapsodie espagnole [16'], ], Pavane pour une infante défunte [6'], Boléro [13']

Euskadi Basque Country / Baskenland

Kontzertu horietan presente egongo da Euskadi Basque Country markaren alemaniar bertsioa, Baskenland. Hala, Turismoaren Euskal Agentziak bat egingo du bira honekin, Euskadi bultzatzeko eta aktibo kultural gisa posizionatzeko; kasu honetan, Euskadiko Orkestraren bidez.

Informazio gehiago

Musika Gela hezkuntza-zikloaren barruan, urtarrila eta apirila bitartean Euskadiko Orkestrak bi ekoizpen estreinatuko ditu Gasteizen, Musika Familian formatuan: Pantomima eta Misterioa.

Pantomima, 3 eta 6 urte bitarteko haurrei zuzendua, egunotan ari da estreinatzen orkestraren egoitzan dozena bat Eskola Kontzertutan, eta Gasteizen familiei irekiko zaie bi kontzerturekin urtarrilaren 28an (17:00 eta 18:30) Garcia Lorca Antzokian. Ikuskizun honetan, barroko garaiko musikak fantasiazko mundu batera eramango gaitu, non "artearen komediaren" estetikatik irtendako pertsonaia batek publikoarekin jolastuko duen objektu, erritmo eta doinu erreal zein irudimenezkoak deskubritzera.

Misterioa, 6 eta 10 urte bitarteko haurrei zuzendua, produkzio propioa da, baita ere, eta Gasteizen apirilaren 14an eskainiko da (18:00) Principal Antzokian. Proiektu honek askotariko musika eskaintzen du: intrigazko filmen musika, modu misteriotsuan famatu egin diren melodia xumeak (gure Beethoven maitearen alaitasunaren ereserkia kasu)… Musikaren alde enigmatikoa arakatuko du ikuskizun honek.

Euskadiko Orkestrak haur eta gazteei eskaintzen dizkien jardueren artean, ibilbide luze eta finkatuena duen atala Musika Familian kontzertuena da. Haurrek familiekin gozatzeko kultur aisialdiko eskaintza honek 27 urte daramatza orkestraren egitarauan. Gasteizko kontzertuek Gasteizko Udalaren Antzoki Sarearen lankidetza dute.

Musika Familian kontzertuez gain, Musika Gela zikloaren baitan denboraldiro jarduera ugari antolatzen dira: 30 Eskola Kontzertu inguru, haur, lehen eta bigarren hezkuntzako 10.000 ikasle baino gehiagorentzat, hainbat entsegu ireki, sentsibilizazio-tailer eta beste zenbait ekintza.

Pantomima eta Misterioaren sarrerek 6 euroko prezioa dute eta euskadikoorkestra.eus eta principalantzokia.org webguneen bidez eros daitezke, baita 945161045 telefono-zenbakira deituz eta Principal Antzokiko leihatilan ere.

Misterioak aurretik sentsibilizazio-tailer bat izango du (16:45ean). Tailer hori doakoa izango da kontzerturako sarrera dutenentzat, baina aldez aurretik izena eman beharko da (30 lagunentzako lekua izango du). Horretarako, 945161045 telefonora deitu beharko da.

Jarraian Musika Familian kontzertuei buruzko informazio xehea aurki daiteke:

PANTOMIMA
40’
Raquel Cortinas*, biolina
Pascal Laffont*, oboea
François Proud*, fagota
Pedro José Rodríguez, klabezina eta pianoa
Gorka Ganso, aktorea
Mikel Cañada, gidoia
*Euskadiko Orkestraren kidea

Barroko garaiko musikak fantasiazko mundu batera eramango gaitu, non "artearen komediaren" estetikatik irtendako pertsonaia batek publikoarekin jolastuko duen objektu, erritmo eta doinu erreal zein irudimenezkoak deskubritzera. Gidoirik gabeko kontzertua izango da, baina elementu musikalek eta jolas sinboliko eta ludikoek markatuko dute bidea. Pantomima honetan musikak aukera emango dio gure pertsonaiari publikoarekin eta gure musikariekin elkarreraginean aritzeko, antzerki-inprobisazioen bidez.

PROGRAMA:
G.F. Haendel: 1. Trio sonata
J.S. Bach: Arioso
W.A. Mozart: Aria ‘Soy el cazador de pájaros’ (La flauta mágica)
E. Grieg: 2. Dantza norvegiarra
A. Vivaldi: Kontzertua biolin, oboe, hari-orkestra eta baxurako
H. Mancini: Pantera arrosa
E. Grieg: Peer Gynt suite nº1, ‘En la gruta del rey de la montaña’
E. Morricone: Gabriel’s oboe
L. Delibes: Dúo de las flores (Lakmé)

MUSIKA FAMILIAN
3 < 6 urte
Gasteiz
Urtarrilak 28
17:00 / 18:30
Garcia Lorca

MISTERIOA
50’
Nathalie Dabadie*, biolina
Anne-Marie Harmat*, biolina
Justyna Janiak-Krymer*, biola
Jon Larraz*, biolontxeloa
Hélène Billard-Alirol*, flauta
La Piel, antzerki-taldea
Mikel Cañada, gidoia
*Euskadiko Orkestraren kidea

Proiektu honek askotariko musika eskaintzen du: intrigazko filmen musika, modu misteriotsuan famatu egin diren melodia xumeak (gure Beethoven maitearen alaitasunaren ereserkia kasu)… Musika enigmatikoa izan daiteke!

PROGRAMA:
L.V. Beethoven: Serenata, Op.25
J. Buys: Gabonetako kintetoa
W.A. Mozart: Flauta eta harirako kuartetoa, K.285

MUSIKA FAMILIAN
6 < 10 urte
Gasteiz
Apirilak 14
18:00*
Principal
*Kontzertuaren aurretik, 16:45ean, sentsibilizazio-tailer bat eskainiko da, osagarria, aukerakoa eta doakoa. Izen-ematea: 945161045

Musika Gela barneratzailea

Pasa den denboralditik, FEVAS-Plena Inclusión Euskadirekin lankidetza estuan programatutako pertsonak gizarteratzeko jarduerak, Euskadiko Orkestrak Donostian eta Bilbon programatzen dituenak duela urte batzuetatik, Gasteizera ere zabaldu dira. Aurtengoan ere hiru hiriburuetan hainbat tailer egingo dira maiatzean.

2009 urtetik, aniztasun funtzionalaren testuingurura gerturatzeko lana garatzen da Musika Gelaren baitan, musika gaitasun, ahalmen eta talentu ezberdineko pertsonetara gerturatuz soinu-sorkuntzako tailerren, kontzertuetara joateko aukeren edo proiektu ezberdinetan parte hartzeko aukeren bidez. Orkestrako musikariek aktiboki parte hartzen dute, gaitasun ezberdineko pertsona horiek zuzeneko musikarekin gozatzeko eta esperimentatzeko aukera izan dezaten.

Musika Gela YouTuben

Musika Gelak atal propioa du Euskadiko Orkestraren YouTubeko kanalean, eta bertan zikloko ikuskizun osoak ikus daitezke, besteak beste, Elkarrekin sortu; Boléro; Living Room Music; Mozart, Nannerl eta Lagunak, Ekomusik eta Isiltasunaren haitzuloa. Gainera, aurtengo Denboraldiko kontzertuen bideoak ere igoko dira bertara, ikuskizunak gauzatu ahala.

Informazio gehiago

Musika Gelaren bigarren programa aste honetan eta hurrengoan egiten ari da, 2.500 ikasle baino gehiagori zuzendutako Eskola Kontzertu ugarirekin eta datorren asteko asteburuan Donostian eta Gasteizen programatutako lau Musika Familian kontzerturekin.

Barroko garaiko musikak fantasiazko mundu batera eramango gaitu, non "artearen komediaren" estetikatik irtendako pertsonaia batek publikoarekin jolastuko duen objektu, erritmo eta doinu erreal zein irudimenezkoak deskubritzera. Gidoirik gabeko kontzertua izango da, baina elementu musikalek eta jolas sinboliko eta ludikoek markatuko dute bidea. Pantomima honetan musikak aukera emango dio gure pertsonaiari publikoarekin eta gure musikariekin elkarreraginean aritzeko, antzerki-inprobisazioen bidez.

Mikel Cañadaren —Musika Gelaren koordinatzailearen— gidoia duen eta Gorka Ganso aktoreak gidatuko duen ikuskizun honetan, ganbera-talde batek Bach, Haendel, Vivaldi eta Mozart bezalako musikagileen lanak interpretatuko ditu. Ganbera-taldea lau musikariz osatuta dago, eta horietatik hiru Euskadiko Orkestraren kideak dira: Raquel Cortinas (biolina), Pascal Laffont (oboea) eta François Proud (fagota). Pedro Jose Rodriguezek osatuko du laukotea pianoan eta klabezinean.

3 eta 6 urte bitarteko haurrei zuzendutako Musika Familian kontzertuak izango dira larunbatean, urtarrilak 27, 11:00etan eta 12:30ean Miramonen, eta igandean, urtarrilak 28, 17:00etan eta 18:30ean Gasteizko Garcia Lorca Antzokian. Kontzertu hauetarako sarrerak salgai daude. Miramonen sarreren prezioa 5 eurokoa izango da 12 urtetik beherakoentzat, eta 8 eurokoa publiko orokorrarentzat, eta euskadikoorkestra.eus webgunean edo Kursaaleko leihatilan eskuratu ahal izango dira. Kontzertuaren egunean bertan ere eskuratu ahal izango dira Miramongo Egoitzako leihatilan, beti ere leku libreak geratzen badira. Gasteizen sarrerak 6 euroko prezio bakarrean atera dira salgai, principalantzokia.org webgunean eta Principal Antzokiko leihatilan.

Gertu Kultura: jarduera inklusiboa

Euskadiko Orkestrak Donostiako Musika Familian Kontzertuak Gertu Kultura sarearen programazioan sartu ditu. Kultur programatzaileen sare honek helburu du zaurgarritasun egoeran dauden pertsonek kultura eskura izaten laguntzea. Informazio gehiago Gertu Kultura sarearen webgunean.

Informazio gehiago

Larunbat honetan, urtarrilak 13, 11:00etan, Euskadiko Orkestraren ganbera-musika ziklo Miramongo Matinéeen Denboraldiko hurrengo hitzordua izango da. Bertan, Ritmus Laukoteak ‘Zailtasunak bidean’ izeneko kontzertua eskainiko du. Taldea orkestrako lau kidek osatzen dute: Laura Balboa (biolina), Irene Echeveste (biolina), Delphine Dupuy (biola) eta Jon Larraz (biolontxeloa).

EROSI SARRERAK HEMEN

Matinée hau irekiko duen Zoltan Kodaly hungariarraren Serenata 1919 eta 1920 artean idatzitako obra da. Hari-hirukoterako konposatua dagoen arren, ‘serenata’ bezala izendatu zuen. XVIII. mendean ezagun egin zen termino hau gaualdi bat girotzea helburu zuen eta ‘trio’-ak baino pisu emozional txikiagoa duen konposizio instrumental bat izendatzeko. Hiru instrumentuek lehen mugimendua irekitzen dute, Allegramente, zapateatze indartsuko gai batekin; Kodalyk behin eta berriz erabiltzen du biolaren beheko hari irekia kolore tonal bereizgarri bat eta soinu-aberastasun bat sortzeko. Bigarren mugimendua biolaren eta lehen biolinaren arteko elkarrizketa da, eta ia entzunezina den hasperen batekin ixten da. Hirugarren eta azken mugimendua erritmo taupadatsu baten gainean egindako dantza folklorikoen sekuentzia da.

Bestalde, Dmitri Xostakovitxek “faxismoaren eta gerraren biktimei” eskaini zien bere Harirako 8. Kuartetoa. Egilearen ohar hori 1960an suntsitutako Dresden hiriaren irudiekin lotu izan da sarritan, baina gaur egun badakigu lanak askoz ere oinarri pertsonalagoa duela. Xostakovitxek izaera autobiografikoa azpimarratu zuen d-s-c-h (D. Sch inizialen baliokide musikala) sekuentzia tonala erabiliz, obra modu esanguratsuan irekitzen duena. Antolaketa ziklikoa obraren ezaugarri argia da, non bost mugimenduek bat egiten duten modu bikainean: hasierako Largoa bi mugimendu azkar izatera igarotzen da —Allegro molto agresiboa eta Allegretto sotila—, hasierako giro ilunera itzultzeko beste azken bi Largorekin. Obra 1960an estreinatu zen Leningraden eta konpositorearen kuartetorik interpretatuena da.

Sarrera solteak (11€) salgai daude euskadikoorkestra.eus webgunean eta Kursaal Auditoriumeko leihatilan. Gainera, orkestraren egoitzako leihatilan bertan ere eros ahal izango dira kontzertuaren egunean, leku libreak geratzen badira.

Miramongo Matinéetara eroso joateko, Euskadiko Orkestrak doako autobus-zerbitzua eskainiko du. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

EITBren eta Euskadiko Orkestraren arteko elkarlan berri batekin gozatu ahal izango dugu aurtengo Eguberri jaietan. Ekimen berezi eta hunkigarria izango da, EITBko hainbat profesionalek gabon-kanta ezagunak grabatu baitituzte Euskadiko Orkestrarekin batera. Fernando Velazquez konpositoreak moldatu ditu obra horiek, eta Juanjo Ocon zuzendariaren esanetara interpretatu dituzte, Leioa Kantika Koralak eta Errenteriako Landarbaso Abesbatzako kideek lagunduta. 

Ekimen berezian parte hartu duten profesionalak hauek dira: Xabier Ormazabal Teleberri albistegiko aurkezlea; Mikel Reparaz EITBko Nazioarteko burua; Esto No Es Normal saioko Egoitz Txurruka; SOS Kantak Arriskuan saioko Klara Mendizabal, Iker Lauroba eta Lide Hernando; eta Sua Enparantza eta Ainhoa Larrañaga aktoreak. 

Haien ahotsean entzungo ditugu Birjina maite; Hator hator; Horra, Mari Domingi; Olentzero; Gabon gauean eta Haurtxo maite/Noche de paz/Stille nacht; abesbatzetako kideek kantatuko dituzte, berriz, Gabaren erdian, Mesias sarritan eta Oi Bethleem. 

Emanaldi osoarekin gozatzeko aukera izango dugu abenduaren 23an, 22:00etan, ETB1en eta eitb.eus-en.

Kontzertu sinfonikoak Gabonetan

Gainera, ETB2k Euskadiko Orkestraren Denboraldiko kontzertuak ematen jarraituko du, larunbat goizetan, ohi bezala, eta baita abenduaren 25ean ere, Eguberri Egunean. Hauek dira katean ikusi ahal izango diren orkestraren kontzertuak, guztiak 11:00etan.

• Abenduak 23: (Berremisioa) MAMUAK (22/23). Roberto Fores / Easo Gazte eta Easo Gaztelania
• Abenduak 25 (astelehena): RAVEL / FALLA (23/24). Juanjo Mena / Clara Mouriz / Alfonso Gómez
• Abenduak 30: (Berremisioa) BOLÉRO, Eskola Kontzertua (22/23)
• Urtarrilak 6: COPLAND / MAHLER (23/24). Juraj Valcuha

Informazio gehiago

Larunbat honetan, abenduak 16, 11:00etan, Euskadiko Orkestraren ganbera-musika ziklo Miramongo Matinéeen Denboraldiko seigarren hitzordua izango da. Alfonso Gomez pianojole handiak eskainiko du errezitaldia, Ravel, Messiaen eta Albenizen obrekin.

EROSI SARRERAK HEMEN

Gomez errepertorioa etapa jakin batera mugatzen ez duten interpreteen belaunaldi batekoa da; aitzitik, barrokotik hasi eta gaur egungo musikara arte dauden estiloen zabaltasuna hartzen saiatzen da.

1978an Gasteizen jaioa, Gomezek nazioarteko karrera oparoa du atzean, eta mundu osoan barrena errezitaldi ugari eskaini ditu. Hamaika aldiz saritu dute estatuko eta nazioarteko lehiaketetan, eta bere errepertorioaren ugaritasuna, aniztasuna eta konplexutasuna erakusten duten hamar bat disko grabatu ditu. Gaur egun, irakasle katedraduna da Freiburgeko Musika Unibertsitatean, eta irakasle laguntzailea Stuttgarteko Musikaren eta Arte Eszenikoen Estatuko Unibertsitatean.

Gomezek duela bi aste eskas parte hartu zuen Euskadiko Orkestraren Abonu Denboraldian. Maurice Ravelen Kontzertua Solen ospetsuaren interpretazioa eskaini berri du, Juanjo Menaren agindupean, hau ere gasteiztarra eta nazioartean ospe handiduna. Eta, hain zuzen ere, Lapurdiko musikagilearen bi lanekin abiatuko da ganbera-kontzertu hau ere: Pavane pour une infante défunte eta Sonatine.

Oliver Messiaenen Le loriot interpretatu ondoren, Matinée honen lan nagusia iritsiko da: Isaac Albenizen Iberia, agian espainiar piano-literaturako lanik garrantzitsuena. Obra honi buruz Messiaenek berak honakoa esan zuen: “pianoaren miraria da, beharbada postu gorena du errege instrumentu honen erakusgarririk distiratsuenen artean”. 1905 eta 1909 artean konposatutako pianorako suite hau osatzen duten hamabi piezetatik bost joko ditu Gomezek.

Sarrera solteak (11€) salgai daude euskadikoorkestra.eus webgunean eta Kursaal Auditoriumeko leihatilan. Gainera, orkestraren egoitzako leihatilan bertan ere eros ahal izango dira kontzertuaren egunean, leku libreak geratzen badira.

Miramongo Matinéetara eroso joateko, Euskadiko Orkestrak doako autobus-zerbitzua eskainiko du. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

Euskadiko Orkestrak datorren astelehenetik aurrera 23/24 Kontzertu Denboraldiko laugarren programari aurre egingo dio, ‘Copland / Mahler’ izenekoa. Juraj Valcuha eslovakiarrak zuzenduko dituen kontzertuak datozen egunetan izango dira ohiko lau hiriburuetan: astelehenean, abenduak 11, Bilboko Euskalduna Jauregian; asteartean, abenduak 12, Iruñeko Baluarte Auditoriumean; asteazken eta ostegunean, abenduak 13 eta 14, Donostiako Kursaal Auditoriumean; ostiralean, abenduak 15, Gasteizko Principal Antzokian. Kontzertu guztiak 19:30ean izango dira.

EROSI SARRERAK HEMEN

Abenduaren 10ean, Giza Eskubideen Aldarrikapen Unibertsalaren 75. urteurrena izango da eta, ospakizun horrekin bat etorriz, Euskadiko Orkestrak kontzertu-programa berriari ekiteko 1949an Copland inspiratu zuen obra hautatu du (Aldarrikapenaren lehen urteurrena ospatzeko sortu zuen). ‘Nazio Batuen ereserkia’ izenaz ere ezaguna den Abagune solemne baterako hitzaurreak Aldarrikapenetik bertatik ateratako testu batzuk daramatza, eta Mireia Gabilondo (Bilbon, Iruñean eta Donostian) eta Dorleta Urretabizkaiak (Gasteizen) errezitatuko dituzte, historian lehen aldiz, euskaraz. Lan laburra, oso solemnea eta berezia da, eta lehen aldiz entzungo da Euskadin. Lanaren aurreneko interpretazioan, narratzailea Laurence Olivier britainiar aktore bikaina izan zen eta, orduz geroztik, aukera berezietan edo, izenburuak dioen bezala, solemneetan, programatu izan da maiz.

Ondoren, Euskadiko Orkestrak Gustav Mahlerren 1. Sinfonia interpretatuko du, «Titan» ezizenaz ezagun dena, iluntasunetik argirako igarobide heroiko bat izaki. Sinfonia honek leku berezia du Euskadiko Orkestraren azken aldiko historian, Robert Treviñok obra horrekin aurkeztu baitzuen bere burua euskal ikusleen aurrean, 2016ko irailean titular gisa emandako aurreneko kontzertuan. Horren ostean, Mahlerren beste sinfonia ugari eskaini dira, AEBko maisuak zuzenduta. Gaurkoan, aitzitik, beste zuzendari batek Mahler nola ikusten duen jakingo dugu. Zuzendari hori, Juraj Valcuha, Bratislavan sortu zen, konpositorearen jaioterritik (Kaliste) 200 kilometro eskasera. Houstongo Sinfonikoko eta Napoliko San Carlo Antzokiko zuzendari titularra da, eta oraingoa haren bigarren aldia izango da gure orkestrarekin, 2015/2016 denboraldian estreinatu zen eta.

Sarrerak salgai daude saio guztietarako euskadikoorkestra.eus-en, baita auditoriumen webgune eta leihatiletan ere, 10 eta 38 euro bitartean.

Informazio gehiago

Larunbat honetan, abenduak 2, 11:00etan, Euskadiko Orkestraren ganbera-musika ziklo Miramongo Matinéeen Denboraldiko bosgarren hitzordua izango da. Azken orduko aldaketa baten ondorioz, kontzertu honen taldea eta programa aldatu egin behar izan dira. Presaren ondorioz, ganbera-orkestra formazio berri honek Subito izena hartu du, eta horrela aurkezten da kontzertu honetan, Re tonalitatean idatzitako obrei osotasunean eskainitako programa batekin.

Taldea hamaika kidek osatzen dute: Larraitz Oiartzabal (kontzertinoa eta lehen biolina), Irene Echeveste (lehen biolina), Nathalie Dabadie (lehen biolina), Raquel Cortinas (bigarren biolina), Ricardo Ruiz (bigarren biolina), Amaia Asurmendi (bigarren biolina), Justyna Janiak-Krymer (biola), Pawel Krymer (biola), Javier Escrihuela (biolontxeloa), Gabriel Mesado (biolontxeloa) eta Marc Sirera (kontrabaxua). Escrihuela ez beste guztiak Euskadiko Orkestraren kideak dira.

EROSI SARRERAK HEMEN

Matinéea Peter Warlocken Capriol Suitearekin hasiko da. Philip Arnold Heseltine konpositore eta musika-kritikari ingelesaren izengoitia da Peter Warlock. Bere ibilbidean zehar, antzinako musikan interes handia erakutsi zuen, eta horrek errepertorio mota honekin lotutako lan batzuk idaztera eraman zuen, hala nola ahots eta pianorako hogei abesti eta kontzertuan entzungo dugun suite ospetsu hau. Jatorrian piano-bikoterako idatzia badago ere, Warlockek orkestratu egin zuen geroago, hari-ensemblerako eta orkestra osorako.

Kontzertuaren bigarren obra Gyula Beliczay konpositore hungariarraren Harirako Serenata izango da. Hasiera batean ingeniari izateko estudiatu zuen Vienan, baina gero leku berean konposizioa ikasi zuen, modu pribatuan, besteak beste, Joachim Hoffmann eta Franz Krennekin. Richard Wagner eta Franz Liszten laguna zen Beliczay, eta horiek eragin nabarmena izan zuten bere konposizio-estiloan.

Azkenik, ganbera-orkestrak John Rutter britainiar konpositore, abesbatza-zuzendari, orkestra-zuzendari, moldatzaile eta musika-ekoizlearen Harirako Suitea interpretatuko du. Lan hau britainiar folkloreko abestietan oinarrituta dago.

Sarrera solteak (11€) salgai daude euskadikoorkestra.eus webgunean eta Kursaal Auditoriumeko leihatilan. Gainera, orkestraren egoitzako leihatilan bertan ere eros ahal izango dira kontzertuaren egunean, leku libreak geratzen badira.

Miramongo Matinéetara eroso joateko, Euskadiko Orkestrak doako autobus-zerbitzua eskainiko du. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago