Naturaz gaindiko gaiak dituzten Musorgski eta Dvoraken obrak eta Txaikovskiren ‘Laugarren’ handia Euskadiko Orkestraren biharko Gasteizko kontzertuan
‘Mamuak’ izenburupean, Euskadiko Orkestraren Denboraldiko Gasteizko bigarren kontzertuak barne-gatazkei, beldurrei eta gainditzeari buruz hitz egingo dute Musorgskiren (‘Gaua mendi gorrian’), Dvoraken (‘Eguerdiko sorgina’) eta Txaikovskiren (‘4. Sinfonia’) musikaren bidez, Roberto Foresen zuzendaritzapean.
Azaroaren 3an 19:30ean Gasteizko Principal Antzokian izango den kontzertu honetarako sarrerak salgai daude 10 eurotik aurrera.
Euskadiko Orkestrak pasa den urriaren 28an ekin zion 22-23 Kontzertu Denboraldiko bigarren programari, ‘Mamuak’ izenekoari. Donostian, Iruñean eta Bilbon kontzertuak eskaini ostean, Gasteizko Principal Antzokira ostegun honetan iritsiko da, azaroak 3, 19:30ean, aldaketa txiki bat izan duen programa batekin. Gainontzeko hirietan bezala, orkestrak Musorgskiren Gaua mendi gorrian eta Txaikovskiren 4. Sinfonia interpretatuko ditu, baina Antonin Dvoraken Eguerdiko sorginak Carpenterren Ghost Songs ordezkatuko du Gasteizko egitarauan, izan ere, obra horren dimentsio teknikoak Principal Antzokiko eszenatokian interpretatzea eragozten baitu. Kontzertua Roberto Foresek zuzenduko du, Euskadiko Orkestraren buru lehendabizikoz arituko den Valentziako zuzendariak.
Aldaketa gorabehera, Gasteizko kontzertuak ere naturaz gaindikoaren gai berari jarraituko dio, Santu Guztien Egunari eta Halloween egunari erreferentzia eginez.
Kontzertuaren lehen zatian, ibilbide krepuskular batean murgilduko gaitu Euskadiko Orkestrak. Eta, hasteko, izuaren klasiko errusiar garrantzitsuena izango dugu: Modest Musorgskiren Gaua mendi gorrian, akelarre bat irudikatzen duena. Kontzertuak Antonin Dvorakek idatzitako Eguerdiko sorgina poema sinfoniko ilunarekin jarraituko du. Obra hau 1895ean idatzi zuen Pragan konpositore txekiarrak, bere abentura amerikarra amaitu ondoren, eta Euskadiko Orkestrak lehendabizikoz interpretatuko du pieza hau.
Kontzertu honen ardatza izango den obra bigarren zatian iritsiko da: Txaikovskiren Laugarrena. Obra autobiografikoa da, konpositoreak bertan irauli zituen bere barne-gatazkak, beldurrak eta mamuak, eta emaitza erromantizismoz, indarrez, emozioz, ñabarduraz betetako sinfonia hau da. 4. Sinfonia zorigaiztoko senar-emazte harreman traumatiko bat hasi aurretik, zirauen bitartean eta ondoren idatzia izan zen; 1878n San Petersburgon estreinatu zuten, konpositorea falta zela, eta bere obra ezagunenetako batean bilakatu da.
Fundación Banco Sabadellen laguntzarekin
Fundación Banco Sabadell programa honen laguntzailea da.
Txaikovskiren ‘Laugarren’ ikusgarria eta Easo Abesbatzaren 60 gazte izango dira Euskadiko Orkestraren kontzertu-programa berriaren protagonistak
‘Mamuak’ izenburupean, datozen kontzertuek barne-gatazkei, beldurrei eta gainditzeari buruz hitz egingo dute Musorgskiren (‘Gaua mendi gorrian’), Txaikovskiren (‘4. Sinfonia’) eta Gary Carpenterren musikaren bidez. Azken honen ‘Mamu kantak / Ghost Songs’ obraren estreinaldiak eramango ditu Easo Gazte eta Easo Eskolania eszenatoki gainera.
Roberto Foresek zuzenduko dituen kontzertu hauetarako guztietarako sarrerak salgai daude 10 eurotik aurrera.
Euskadiko Orkestrak ostiral honetatik aurrera 22-23 Kontzertu Denboraldiko bigarren programari aurre egingo dio, ‘Mamuak’ izenekoa. Kontzertuak Roberto Foresek zuzenduko ditu, Euskadiko Orkestraren buru lehendabizikoz arituko den Valentziako zuzendariak, eta datozen egunotan izango dira ohiko lau hiriburuetan: ostiraletan, urriak 28 eta azaroak 4, Donostiako Kursaal Auditoriumean; astelehenean, urriak 31, Iruñeko Baluarte Auditoriumean; asteazkenean, azaroak 2, Bilboko Euskalduna Jauregian; eta ostegunean, azaroak 3, Gasteizko Principal Antzokian. Kontzertu guztiak 19:30ean izango dira.
Easo Abesbatzako 60 gazte igoko dira Euskadiko Orkestraren eszenatokietara Gary Carpenterren Mamu kantak / Ghost Songs obra estreinatzeko. Obra hau hiru orkestra britanikok (Royal Scottish National Orchestra, City of Birmingham Symphony Orchestra eta Royal Liverpool Philharmonic Orchestra) eta Euskadiko Orkestrak elkarrekin enkargatu zuten, eta pandemiagatik atriletara eramatea ezinezkoa izan bazen ere, orain Foresen zuzendaritzapean entzun ahal izango da.
Abesbatzaren zuzendari Gorka Mirandak azaldu duenez, Easo Gazte eta Easo Eskolania abesbatzetako 11 eta 19 urte bitarteko 60 gazte hauek uda aurretik dihardute obra hau prestatzen eta orain iritsi da emaitza aurkezteko unea. “Obra honetako ezaugarri nabarmenena da abesbatza pertsonaia zentrala dela, abesbatzak du boterea eta orkestra bere zerbitzura jartzen da. Esparru sinfoniko-koralean aski zaila da horrelako ezaugarriak dituen obra bat aurkitzea”. Hogei minutuko obra hau osatzen duten sei kantuek kultur ondare anglosaxoieko testuak dituzte, gehienak Marion Angusek eta Robert Louis Stevensonek idatziak, eta mundo oniriko bat marrazten dute, mamuz, ilunabarrez, mitologiaz eta kondairaz osatua. Poemak, jatorrian ingelesez idatziak, euskarara moldatu dira azterketa sakon baten ostean eta lehendabizikoz aurkeztuko dira hizkuntza horretan.
Bestalde, kontzertu hauetako beste ardatzetako bat Txaikovskiren Laugarrena izango da. Obra autobiografikoa da, konpositoreak bertan irauli zituen bere barne-gatazkak, beldurrak eta mamuak, eta emaitza erromantizismoz, indarrez, emozioz, ñabarduraz betetako sinfonia hau da. 4. Sinfonia zorigaiztoko senar-emazte harreman traumatiko bat hasi aurretik, zirauen bitartean eta ondoren idatzia izan zen; 1878n San Petersburgon estreinatu zuten, konpositorea falta zela, eta bere obra ezagunenetako batean bilakatu da.
Obra horien aurretik naturaz gaindiko gaien inguruko beste pieza bat joko du orkestrak: Modest Musorgskik Gaua mendi gorrian konposizioan islatutako akelarrea.
Antonin Dvoraken Eguerdiko sorgina Gasteizen
Kontzertu horien gaiarekin jarraituz, Antonin Dvoraken Eguerdiko sorginak Carpenterren Ghost Songs ordezkatuko du Gasteizko egitarauan. Obra horren dimentsio teknikoak Principal Antzokiko eszenatokian interpretatzea eragozten du. Dvorakek bere abentura amerikarraren ondoren 1895ean Pragan idatzitako poema sinfoniko iluna da Eguerdiko sorgina, eta Euskadiko Orkestrak interpretatzen duen lehen aldia izango da.
Fundación Banco Sabadellen laguntzarekin
Fundación Banco Sabadell programa honen laguntzailea da.
Bilboko Koral Elkarteak eta Euskadiko Orkestrak ‘Lide ta Ixidor’ opera berreskuratu eta disko gisa argitaratu dute
Santos Inchaustik 1910ean idatzitako haurrentzako ipuin liriko honek bi ekitaldi eta epilogoa ditu, eta bere berreskurapen eta erregistro diskografikoa Bilboko Koral Elkarteak bultzatzen duen Euskal Opera proiektuaren barruan kokatzen da.
Bilboko Koral Elkartea buru duen Euskal Opera euskal ondare lirikoa berreskuratzeko proiektuaren barruan, Charles Colinen Maitena eta Jesus Guridiren Mirentxu obrak berreskuratzea bultzatu da. Orain, ekimen beraren baitan, Santos Inchaustiren (1868-1925) Lide ta Ixidor haurrentzako ipuin lirikoa aurkezten da. Bilboko Koral Elkarteak ipuin hori grabatzeko Euskadiko Orkestra izan du lagun, hain zuzen orkestraren helburu nagusietako bat baita euskal musika sortzea eta zabaltzea grabazio diskografikoen bidez.
Lide ta Ixidor haurrentzako ipuin lirikoaren kontzepzioak ez zituen garaiko ideologia nazionalistatik hurbil zegoen antzerki lirikoaren ohiko ezaugarriak jarraitu: galdutako askatasunen aipamena, euskararekiko maitasuna, kondairazko iragan komuna, landa-ingurune idilikoa eta erlijioaren balioa, lan honetan baztertuak izan ziren ezaugarriak. Hala ere, nabarmentzekoa da Bizkaiko Zubialdea jauregitik gertu dagoen baserri batean dagoela kokatuta istorioa eta Jesusen jaiotza eta Errege Magoen etorrera biltzen dituela. Estreinaldian, 1910eko maiatzaren 24an, prentsak, kronikariek eta musika kritikariek era guztietako goraipamenak egin zituzten.
Libretoa Gabonei buruzko doinu eta narratiba herrikoietan inspiratu bazen ere, a priori konplikaziorik gabe, hain zuzen erraztasun horretan datza obraren arrakasta, garai modernoetan berrinterpretatzeak musika berregiteko lan nekeza ekarri du berekin. Euskadiko Orkestrak jotako particella direlakoen collagea Jesus Mari Sagarnak editatu du, Juanjo Ocón maisuaren batutapean eta bai hark bai Ana Huartek berrikusita. Era berean, testuaren egokitzapena Unai Elorriagak egin du, eta Marta Ubieta, Maite Maruri, Olatz Saitua eta Larraitz Navas bakarlariek abestu, Bilboko Koral Elkarteko haurren eta helduen koruek lagunduta, Jose Luis Ormazabalen eta Enrique Azurzaren zuzendaritzapean, hurrenez hurren.
Diskoa Ibs Classical diskoetxearen katalogoan eskura daiteke, 14,95 €-ren truke, eta banaketa digitala urriaren 21ean aurkeztuko da nazioarteko hogeita hamar ataritan baino gehiagotan, besteak beste Spotify, Naxos, YouTube, iTunes, Google play eta eclassical atarietan nabarmengarrietan.
Azerbaijango musika-tradizioa izango da larunbat honetako Miramongo Matinéearen protagonista
Edvard Griegen eta UNESCOk ‘Bakearen aldeko artista’ izendatu zuen Franghiz Ali-Zadeh azerbaijandarraren hari-kuarteto banak osatzen du Le Monde Laukoteak Miramongo eszenatokian larunbat honetan, urriak 22, 11:00etan interpretatuko duen programa.
Duela bi aste Miramongo Matinéeen 31. edizioa arrakastaz inauguratu ostean, larunbat honetan, urriak 22, 11:00etan, Euskadiko Orkestraren ganbera-musika Denboraldiko kontzertuetako bigarrena izango da. Bertan, Le Monde Laukoteak ‘Soinuaren koloreak’ izeneko kontzertua eskainiko du. Taldea orkestrako lau kidek osatzen dute: Kamran Omarli (biolina), Virgile Demillac (biolina), Monika Mazur (biola) eta Gabriel Mesado (biolontxeloa).
Laukoteak bi obra proposatzen dizkigu Matinée honetan: Franghiz Ali-Zadehren Mugam Sayagi eta Edvard Griegen 1. Hari-kuartetoa.
Franghiz Ali-Zadeh 1947an Bakun jaiotako musikagile eta pianojole azerbaijandarra da. Ezaguna da Azerbaijango ‘mugam’ genero folklorikoaren musika-tradizioa eta XX. mendeko mendebaldeko konposizio-teknikak —bereziki Arnold Schoenberg eta Gara Garayevenak—uztartzeagatik. 2008an UNESCOren ‘Bakearen aldeko artista’ ohorezko titulua jaso zuen, eta gaur egun Azerbaijango Konpositoreen Batasuneko presidentea da. Mugam Sayagi obra Kronos estatubatuar laukote ospetsuaren enkarguz idatzi zuen 1993an eta estreinaldia urte berean izan zen New Yorkeko Lincoln Centerrean. Musika mugam azerbaijandarraren doinuetan inspiratuta dago, Europako kuarteto birtuosoaren musikaren esparrura eramanda. Obra biolontxeloaren ahots bakartiarekin hasten da eszenatokian. Gainerako ahotsak elkarren gainean jartzen dira, pertsonaia ugari eta antzerki-efektu ugari erakutsiz. Baina dena hasten den bezala amaitzen da: biolontxeloaren pasarte bakarti batekin, soinuak desagertu egiten dira eta istorioa sonoritatea pixkanaka ezabatuz amaitzen da.
Edvard Griegek hari-kuarteto oso bat bakarrik ekoitzi zuen, 1878an idatzitakoa, hain zuzen Matinée honetan entzungo dena. XIX. mende amaierako hari-kuarteto originaletakoa da, eta itzal handienetakoa utzi duena. Griegen musika-hizkera aurrerakoia izan zen bere garairako, batez ere hari-kuartetoaren genero kontserbadorearen barruan. Oso kromatikoa, harmonia aberatsekin eta modulazio ausartekin, musikak eskala modalak eta pentatonikoak arakatzen ditu, folklore-zapore exotikoarekin, Mendebaldeko Europako tradizioak inbaditzen dituen musika berriaren abangoardian buru izanik.
Sarrera solteak (11€) salgai daude euskadikoorkestra.eus webgunean eta Kursaal Auditoriumeko leihatilan. Gainera, leku librerik geratuko balitz, orkestraren egoitzako leihatilan bertan eros ahal izango lirateke kontzertuaren egunean.
Miramongo Matinéetara eroso joateko, Euskadiko Orkestrak doako autobus-zerbitzua eskainiko dio kontzertua ikustera doazen abonatuei. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.
Miramongo Matinéeek Kutxa Fundazioaren babesa dute sortu zirenetik.
40 jarduera baino gehiago Musika Gela zikloaren 22-23 Denboraldian
Euskadiko Orkestrak lau ekoizpen propio aurkeztu eta estreinatuko ditu hezkuntza-zikloaren Denboraldi berriaren baitan: ‘Ondinaren magia’, musika, magia eta fantasia uztartzen dituen eta egunotan estreinatu dena; ‘Living Room Music’, pasa den Denboraldian bertan behera utzi ostean berreskuratzen dena; ‘Boléro’, Ravelen obra handia plater nagusitzat duena; eta ‘Elkarrekin sortu’, publikoaren eta musikarien elkarlanaren bidez garatuko den ikuskizun teknologiko-musikala.
Zikloaren ardatz nagusi diren Eskola Kontzertu eta Musika Familian kontzertuen eskaintza zabala hiru Entsegu Irekirekin eta beste jarduera batzuekin osatuko da.
Jaitsi prentsa-materiala hemen
Covid-19aren mundu mailako pandemiaren ondorioz programazioa murriztuta izan zuten bi denboraldiren ondoren, indartsu itzuli da Euskadiko Orkestraren hezkuntza-zikloa, Musika Gela, 40 jarduera baino gehiagorekin. Orkestraren programazioan aspaldidanik erabat sustraituta dagoen hezkuntza-ziklo hau herritarrei, oro har, eta gazteei, bereziki, musika gerturatzeko helburuarekin jaio zen. Bere baitan eskaintzen diren kontzertuek izaera didaktikoa, pedagogikoa eta gertukoa daukate, eta askotariko adin-taldeei zuzendutakoak dira, aurtengoan 3 urtetik hasi eta 12 urteraino.
Urtez urte, Euskadiko Orkestrak bere hezkuntza-zikloaren baitan estreinatzeko produkzio propioak prestatzeko apustua egiten du, jatorrizko gidoiak erabiliz.
Denboraldi honetan lau produkzio propio prestatu ditu orkestrak. Lehenik eta behin, gure publiko gazteenarentzat Ondinaren magia izeneko kontzertu bat diseinatu dugu, musika eta magia uztartzen dituena maitagarrien eta ondinen abenturen kontakizun original baten bidez. Living Room Music perkusio-instrumenturik gabeko perkusio-kontzertuak konfinamendura eramango gaitu umorearen bidez krisi garaian giza sormenari balioa emateko. Ondoren, Boléro kontzertu sinfonikoa etorriko da, eta bertan gure ikasleek historiako crescendorik ospetsuenaz gozatzeko aukera izango dute, baita kontzertu honetarako bereziki sortutako koreografia batean parte hartzekoa ere. Eta, azkenik, Elkarrekin sortu, adin guztietarako kontzertu berritzailea, non publikoa entzungo ditugun musiken funtsezko parte izango den.
Lau produkzio hauek bi formatutan aurkezten dira, Eskola Kontzertuetan eta Musika Familian kontzertuetan.
Haur Hezkuntza, Lehen Hezkuntza eta Bigarren Hezkuntzako 11.000 ikasle baino gehiagok parte hartuko dute aurtengo Eskola Kontzertuetan. 100 ikastetxe ingurutik datozen ikasleak dira, dozenaka herri ezberdinetakoak: besteak beste, Alkiza, Azpeitia, Berrobi, Donostia, Gasteiz, Lizartza, Mendaro, Olaberria, Orio, Urretxu, Zerain, Zestoa eta Zumaia. Eskola Kontzertuek Gipuzkoako Batzar Nagusien, Gipuzkoako Foru Aldundiaren, Donostiako Udalaren Hezkuntza Sailaren eta Kursaal Eszenaren lankidetza dute gaur egun.
Bestalde, ekoizpenak Musika Familian kontzertu formatuan eskainiko dira Donostian eta Gasteizen. Euskadiko Orkestrak haur eta gazteei eskaintzen dizkien jardueren artean, ibilbide luze eta finkatuena duen atala Musika Familian kontzertuena da. Haurrek familiekin gozatzeko kultur aisialdiko eskaintza honek 26 urte daramatza orkestraren egitarauan. Donostian egingo diren Musika Familian kontzertuek El Diario Vascoren babesa dute, eta horietatik Kursaalen egingo dena, Elkarrekin sortu, Kursaal Eszenarekin lankidetzan prestatu da. Arabako hiriburuko kontzertuek, bestalde, Gasteizko Udalaren Antzoki Sarearen lankidetza dute. Ikuskizun guztietarako sarrerek 3 eta 8 euro bitarteko prezioa dute eta euskadikoorkestra.eus webgunearen bidez eros ahal izango dira, ikuskizunen datak hurreratu ahala. Dagokion aretoaren leihatiletan eta webguneetan (kursaal.eus, principalantzokia.org) ere egongo dira salgai.
Jarraian ekoizpenei buruzko informazio xehea aurki daiteke, baita Eskola Kontzertuen eta Musika Familian kontzertuen datak ere:
1. ONDINAREN MAGIA
3 < 6 urte
40’
Maite Abasolo*, biola
Ander Erburu*, flauta
Iván Bragado*, harpa
Txan Magoa
Ana Eguiazabal, aurkezlea
Mikel Cañada, gidoia
* Euskadiko Orkestraren kidea
Lehendabiziko aldia da ziklo honetako familientzako kontzertuetan magia txertatzen dela ikuskizun baten protagonista gisa eta, beraz, esperientzia erabat berria izango da Ondinaren magia-k eskainiko duena. Ondinak misterioaren eta herri-kondairen parte dira. Greziar mitologian Mediterraneoan bizi ziren uretako ninfei esaten zitzaien ‘ondinak’. Eta, hain zuzen, ikuskizun honek ondina baten istorioa kontatzen du, arratsaldeetan hondartzan arrain bihurtzen den eta, bere abenturen artean, mago batekin topo egiten duen neska batena. Naturaren elementuekin jolastuz, lau magia-saio eskainiko dira ikuskizunaren baitan. Musika ere oso berezia izango da, eta hiru instrumenturen bidez interpretatuko da: uhinak eta itsas sakona irudikatzen dituen harpa, haizearen misterioak kontatzen dituen flauta eta lurrari eta haren misterioei buruz hitz egiten duen biola. Kontzertu honetarako propio sortutako kontakizun baten bidez, eta Duboit, Jolivet, Ravel edo Debussy bezalako egileen musikarekin, gure sentimenekin jolas egingo dugu arteez gozatzeko.
ESKOLA KONTZERTUAK
Urriak 13, 14, 17, 18, 19, 20
9:45 / 11:15
Miramon
Haur Hezkuntza
MUSIKA FAMILIAN
Donostia
Urriak 15
11:00 / 12:30
Miramon
Gasteiz
Otsailak 26
17:00 / 18:30
García Lorca
2. LIVING ROOM MUSIC
6 < 12 urte
55’
Anthony Lafargue*, perkusioa
Héctor Marqués*, perkusioa
Igor Arostegi*, perkusioa
Gorka Catediano, perkusioa
Ana Hernández Sanchiz, aktorea
Mikel Cañada, gidoia
*Euskadiko Orkestraren kideak
Lau musikari berrogeialdia egin behar izatearen ondorioz harrapatuta geratzen dira urrutiko hiri bateko apartamentu batean. Familiako kideengandik urrun, derrigorrez konfinatuta, nahasita eta urduri samar, musika pixka bat egiteko aukera ematen duten etxeko elementu guztiak aztertzen dituzte: mahaiak, koilarak, haizemaileak, ura, lanparak, loreontziak, eskailerak, zabor-ontziak, eskuak, ahotsak... Kanpoaldearekin duten kontaktu bakarra auzotar indiskretu bat da, beren egoera berean dagoena. Hura auzokideen "zarata" izugarriengatik pazientzia galtzen hasten da eta etengabe gogaitzen jardungo da...
ESKOLA KONTZERTUAK
Urtarrilak 18, 19, 23, 24, 25, 26
9:45 / 11:15
Miramon. Orkestraren egoitza
Lehen eta Bigarren Hezkuntza
MUSIKA FAMILIAN
Donostia
Urtarrilak 21
11:00
Miramon. Orkestraren egoitza
3. BOLÉRO
6 < 12 urte
50’
Euskadiko Orkestra
Nelly Guilhemsans, koreografia
Kilika, txotxongilo-konpainia
Ana Eguiazabal, aurkezlea
Mikel Cañada, gidoia
Jakin izan denez, Boléro balletaren melodia ospetsua Maurice Raveli pijaman zegoela otu zitzaion, bere jaioterri Ziburuko hondartzara igeri egitera joan aurretik. Konpositoreak ez zuen sekula imajinatuko 1928ko udako goiz hartan behin baino gehiagotan pianoan hatz bakar batekin interpretatu zuen melodia hori gaur egun ere, ia 100 urte geroago, mundu osoko kontzertu-aretoetan gehien interpretatzen den piezetako batean bihurtuko zenik. Euskadiko Orkestrak obra hau interpretatuko du gure publiko gaztearentzat, Ravelek konposatutako beste ballet batekin batera, Ma mère l’oye, publiko guztia mugimenduan jarri nahi duen proposamen eszeniko batekin.
ESKOLA KONTZERTUAK
Martxoak 20, 21
9:45 / 11:30
Kursaal
Lehen Hezkuntza
4. ELKARREKIN SORTU
6 < 12 urte
55’
Inoiz galdetu al diozu zeure buruari zein soinu izango lukeen marrazki edo eskultura batek? Zer sonoritatek adieraziko luke hobeto haizea edo euria? Nola deskribatuko zenuke musikarekin mugimendu bat? Lerro bat, marrazki bat? Sentimendu bat? Begirada bat? Kontzertu honetan, Euskadiko Orkestrako musikariek galdera horiei musikarekin jolastuz erantzuteko erronka izango dute, gure publiko gaztearen proposamenak eta gaurkotasun handiko errepertorioa oinarri hartuta. Pantaila batekin, ordenagailu batekin eta musika-teknologia aurreratuenarekin, interpreteek eta ikus-entzuleek musika-konposizioaren sekretuak ezagutzeko jolasa partekatuko dugu.
MUSIKA FAMILIAN
Donostia
Maiatzak 6
18:00*
Kursaal. Ganbera Aretoa
Gasteiz
Maiatzak 7
18:00*
Principal Antzokia
*Kontzertu bakoitzaren aurretik, 16:45ean, sentsibilizazio-tailer bat eskainiko da, osagarria, aukerakoa eta doakoa.
IZEN-EMATEA:
Donostia / San Sebastián
943 00 31 70
Vitoria / Gasteiz
945 16 10 45
Hiru Entsegu Ireki eta beste jarduera batzuk
Kontzertu-eskaintza zabal hau are gehiago osatuko da beste ekintza batzuekin. Musika Gelak berriz helduko die Entsegu Irekiei. Entsegu hauek kolektiboei, ikastetxeei, kontserbatorioei eta unibertsitateei, besteak beste, daude irekiak, eta aukera eskaintzen dute orkestrak kontzertu baten aurretik egiten duen azken lana gertutik ezagutzeko. Denboraldi honetan hiru Entsegu Ireki eskainiko dira:
Otsailak 3 (11:00), Kursaal:
L.V. Beethoven: 5. Sinfonia
Dinis Sousa, zuzendaria
Martxoak 10 (11:00), Kursaal:
J. Adams: Doctor Atomic Symphony
Roderick Cox, zuzendaria
Maiatzak 4 (11:00), Kursaal:
S. Prokofiev: Romeo eta Julieta
Karel Mark Chichon, zuzendaria
Gainera, orkestrak Musika Gelaren azken aldiko ekoizpen arrakastatsuenetako bat berreskuratuko du, Euskadiko Orkestra Cirkus, kasu honetan Durangoko Musika Hamabostaldiaren baitan eskaintzeko, azaroaren 12an, 17:30ean, San Agustin Antzokian. Kontzertu honek malabareak, clowna, ekilibristak eta surrealismoaren eta herrikoiaren artean dagoen musika uztartuko ditu.
Era berean, ikastetxeetako irakasleentzako tailerrak egiten jarraituko da, Eskola Kontzertuak aldez aurretik prestatzeko helburuarekin.
Musika Gela YouTuben
Musika Gelak atal propioa du Euskadiko Orkestraren YouTubeko kanalean, eta bertan zikloko ikuskizun osoak ikus daitezke, besteak beste, Euskadiko Orkestra Cirkus, Living Room Music, Mozart, Nannerl eta Lagunak, Ekomusik eta Isiltasunaren haitzuloa. Gainera, aurtengo Denboraldiko kontzertuen bideoak ere igoko dira bertara, ikuskizunak gauzatu ahala.
Lankidetza-sare zabala
Euskadiko Orkestraren Musika Gelak inguruko erakunde ugarirekin elkarlana sustatzen jarraitzen du. Lankide ditu Gipuzkoako Batzar Nagusiak, Gipuzkoako Foru Aldundia, Donostiako Udalaren Hezkuntza Saila, Gasteizko Udal Antzoki Sarea, Kursaal Eszena eta El Diario Vasco.
Miramongo Matinéeak larunbat honetan itzuliko dira, urriak 8
Akelarre Abesbatza eta Vocalia Taldea abesbatzek, ‘Living Room Music’ perkusio-ikuskizunak, Cuivres en Pays Basque taldearen metalek eta Euskadiko Orkestrako hainbat ganbera-taldek osatzen dute Miramongo Matinéeen ziklo berriko 16 musika hitzorduen sorta, eta abonamenduak salgai daude.
Ensemble Oiassok emango dio hasiera zikloari larunbat honetan, urriak 8, 11:00etan, Beethovenen ‘Septimino’ obrarekin plater nagusi gisa. Sarrerak 11 eurotan daude salgai hitzordu honetarako eta Denboraldiko beste guztietarako.
Urriaren 8an, larunbata, hasiko da Euskadiko Orkestraren egoitzan Miramongo Matinéeen 2022-2023 Denboraldia; hiru hamarkada baino gehiago daramatza zikloak Euskadiko Orkestraren programazioan kalitatezko musika alternatiba bat eskaintzen. Sortu zenetik Kutxa Fundazioaren babesa duen zikloak ekainaren 3ra arte iraungo du, eta guztira hamasei hitzordu hartuko ditu barne.
Euskadiko Orkestrako ganbera-taldeek hartu ohi dute zikloaren programazioaren zati handi bat, eta Denboraldi hau ez da salbuespena izango. Harizko eta haizezko instrumentu ezberdinen zenbait formaziok errepertorio klasikoko eta ganbera-musikako beste altxor ezkutuago batzuetako obrak deskubritzen jarraituko digute: Sexteto Apasionado, Hemiola Laukotea, Belle Époque Laukotea, Haize, Arima Boskotea edo Cuivres en Pays Basque, Iparraldeko orkestretako eta Euskadiko Orkestrako ia hogeita hamar bat metalezko haize instrumentistaz osatutako formazio bitxia.
Hala ere, formatu horretatik aldentzen diren proposamenak ere ikusiko ditugu. Esate baterako, Euskadiko Orkestraren perkusio-sekzioak etxeko elementuekin egindako perkusio-ikuskizunari ekingo dio berriro, Living Room Music. Musika Gela hezkuntza zikloan hain modu arrakastatsuan estreinatu zen ekoizpen hau ezin izan zen aurkeztu Matinéeetako pasa den denboraldian pandemiaren ondorioz. Aipatzekoa da, halaber, lurraldeko bi abesbatza izango direla kontzertu banatan: Akelarre Abesbatza eta Vocalia Taldea. Proposamen horiek guztiek menu erakargarri bat osatzen dute, eta bertan edonork aurki dezake bere altxor berezi eta propioa.
Jaitsi artisten argazkiak hemen.
Hona hemen Miramongo Matinéeen Denboraldiko egutegia:
- Urriak 8: Ensemble Oiasso
- Urriak 22: Le Monde Laukotea
- Azaroak 5: Sexteto Apasionado
- Azaroak 26: Belharra
- Abenduak 3: Minerva Laukotea
- Abenduak 17: Izai
- Urtarrilak 14: Haize
- Urtarrilak 28: Euskadiko Orkestrako Perkusio-Sekzioa
- Otsailak 11: Queentettas
- Martxoak 4: Akelarre Abesbatza
- Martxoak 11: Hemiola Laukotea
- Apirilak 1: Vocalia Taldea
- Apirilak 22: Groupe Damasienne
- Maiatzak 6: Arima Boskotea
- Maiatzak 13: Cuivres en Pays Basque
- Ekainak 3: Belle Époque Laukotea
Ensemble Oiassok inauguratuko du Matinéeen Denboraldi berria larunbat honetan
Euskadiko Orkestraren zazpi musikarik osatzen duten Ensemble Oiassok emango dio hasiera larunbat honetan, urriak 8, 11:00etan, Miramongo Matinéeen ziklo berriari, ‘Danubioko soinuak: Budapestetik Vienara’ izeneko kontzertuarekin. Laura Balboa (biolina), Delphine Dupuy (biola), Gabriel Mesado (biolontxeloa), Paloma Torrado (kontrabaxua), Luis Cámara (klarinetea), François Proud (fagota) eta Cristian Palau (tronpa) dira taldekideak.
Ensemble Oiassok bi obra interpretatuko ditu Matinée honetan: Zoltan Kodalyren Hari triorako intermezzoa eta Ludwig Van Beethovenen Septiminoa.
Kodaly XX. mendeko hungariar konpositore garrantzitsuenetakotzat jotzen da. Bere Intermezzoa, harizko hirukoterakoa, Denboraldiko lehen Matinée honen hasieran entzungo dena, 1905 ingurukoa da. Garai horretan hasi zituen musikagileak isolatutako herriak bisitatzeko bidaiak Hungariako abesti herrikoiak biltzeko xedearekin. Landa-lan horren guztiaren ondorioz, doinu folklorikoak paper garrantzitsua betetzen du Kodalyren musikan. Intermezzoan Hungariako benetako doinu folklorikoen soinuak ugariak dira, eta ez hainbeste ijito-musika, Brahms bezalako austriar eta alemaniar konpositoreek doinu hungariar gisa ezagun egin zuten musika. Mugimendu bakarreko obra honek serenata erlaxatu baten izaera du.
Kontzertu honetako obra nagusia Beethovenen Septiminoa izango da, 1800eko apirilean arrakastaz estreinatu zena haren 1. Sinfoniaren aurkezpena ere barne hartu zuen programa baten baitan. Espirituan eta forman, Septiminoak XVIII. mendeko divertimentoen ereduari jarraitzen dio, entretenimendu arinagoa mugimendu labur batzuetan. Hala ere, mugimendu ia sinfoniko batekin irekitzen da, sarrera geldo batekin, eta ondoren, bakarlarientzat aukera lirikoak eskaintzen dituen adagio batekin. Minuetoa Beethovenen Pianorako 2. Sonatako tema batean oinarritzen da, 1796an konposatua. Tema horretan, eta ondorengo bariazioetan, konpositore alemaniarrak eskura duen barietate instrumental guztia erabiltzen du. Tronpak scherzo landatarrari hasiera ematen dio, eta hirukotearen sekzio kontrastagarriak biolontxelorako melodia xarmanta aurkezten du. Martxa solemne batek amaierari bide ematen dio, presto argitsu eta dotore bat.
Abonamenduak eta sarrerak
16 kontzertuetarako abonamenduak 96 euroko prezioa orokorra du, eta 75,20 euroko tarifa berezia onuradunentzat (65 urtetik gorakoak, 30 urtetik beherakoak, orkestrako beste zikloetako abonatuak, Kursaal Eszenako abonatuak, Kutxabankeko K26 eta K26+ txartelen titularrak, Eureka! Zientzia Museoko lagunak eta Musikene). Jada eskuragarri dago orkestraren bulegoetako telefonora deituz (943 01 32 32) edo euskadikoorkestra.eus webgunean.
Sarrera solteek 11 euroko prezio bakarra dute eta salgai daude euskadikoorkestra.eus webgunean eta Kursaal Auditoriumeko leihatilan. Gainera, eserleku librerik balego, orkestraren egoitzako leihatilan bertan erosi ahal izango dira dagokion kontzertuaren egunean.
Autobus-zerbitzua
Kontzertuak larunbatetan izango dira, goizeko 11:00etan, Euskadiko Orkestraren Miramongo egoitzan. Horietara eroso joateko, Euskadiko Orkestrak doako autobus zerbitzua eskaintzen jarraituko du Matinéetara bertaratu nahi duen ororentzat. 10:25ean abiatzen da Gipuzkoa Plaza 4 zenbakitik eta geldialdiak egiten ditu Antso Jakituna 18an eta Madril Hiribidea 34an.
Salgai sarrerak ‘Ondinaren magia’-rako, Euskadiko Orkestraren Denboraldiko lehen Musika Familian programa
Magia, musika eta fantasia uztartuko dituen ‘Ondinaren magia’ ikuskizunerako sarrerak eskuragai daude 5 eurotik aurrera. Urriaren 15ean Miramonen saio bikoitzean (11:00 eta 12:30) eskainiko den programa hau Musika Gela zikloaren 22/23 Denboraldiko familiei zuzendutako lehena izango da.
Euskadiko Orkestraren Musika Gela hezkuntza-zikloaren Denboraldi berria urriaren 15ean, larunbata, hasiko da, lehen Musika Familian kontzertu batekin. Ondinaren magia izeneko programa batean orkestraren Miramongo egoitzak bi kontzertu hartuko ditu 3 eta 6 urte bitarteko haurrentzat, bata 11:00etan eta bestea 12:30ean, eta biak euskaraz izango dira.
Lehendabiziko aldia da ziklo honetako familientzako kontzertuetan magia txertatzen dela ikuskizun baten protagonista gisa eta, beraz, esperientzia erabat berria izango da Ondinaren magia-k eskainiko duena.
Ondinak misterioaren eta herri-kondairen parte dira. Greziar mitologian Mediterraneoan bizi ziren uretako ninfei esaten zitzaien ‘ondinak’. Eta, hain zuzen, ikuskizun honek ondina baten istorioa kontatzen du, arratsaldeetan hondartzan arrain bihurtzen den eta, bere abenturen artean, mago batekin topo egiten duen neska batena. Naturaren elementuekin jolastuz, lau magia-saio eskainiko dira ikuskizunaren baitan, Txan Magoaren eskutik etorriko direnak.
Musika ere oso berezia izango da, eta hiru instrumenturen bidez interpretatuko da: uhinak eta itsas sakona irudikatzen dituen harpa, haizearen misterioak kontatzen dituen flauta eta lurrari eta haren misterioei buruz hitz egiten duen biola. Kontzertu honetarako propio sortutako kontakizun baten bidez, eta Duboit, Jolivet, Ravel edo Debussy bezalako egileen musikarekin, gure sentimenekin jolas egingo dugu arteez gozatzeko. Euskadiko Orkestrako kide diren hiru musikarik interpretatuko dute musika: Maite Abasolo (biola), Ander Erburu (flauta) eta Iván Bragado (harpa).
Ana Eguiazabalek aurkeztuko du ikuskizuna, zeinaren gidoia Mikel Cañadak idatzia den, Musika Gela zikloaren koordinatzaileak.
Kontzertu hauetarako sarrerak salgai daude 5 euroko prezioan 12 urtetik beherakoentzat, eta 8 eurotan publiko orokorrarentzat, euskadikoorkestra.eus webgunean edo Kursaaleko leihatilan. Kontzertuaren egunean bertan ere eskuratu ahal izango dira Miramongo Egoitzako leihatilan, beti ere leku libreak geratzen badira.
Askotariko proposamenez jositako denboraldia
Musika Gela zikloaren Denboraldi berria adin ugaritako publikoari zuzendutako askotariko proposamenez beteta dator. Zikloaren programazio osoari buruzko xehetasunak urri erdialdera emango dira ezagutzera.
Xostakovitxen ‘Zortzigarren’ tragiko eta harrigarriarekin ekingo dio Euskadiko Orkestrak Kontzertu Denboraldiari
Robert Treviño zuzendari titularrak gidatuko du orkestra ‘Tragedia gainditzea’ goiburu duen 22/23 Denboraldi hasiera honetan. Lehen programa honen plater nagusia Dmitri Xostakovitxen ‘8. Sinfonia’ izango da, bere obra handia, Bigarren Mundu Gerraren izugarrikeriek zirauten bitartean idatzia, eta kontrapuntu atsegina Manuel de Fallaren ‘Espainiako lorategietako gauek’ jarriko dute, Alexei Volodin pianista garrantzitsuaren interpretazioan.
Sarrerak salgai daude irailaren 23tik 29ra ohiko lau hiriburuetan izango diren kontzertu guztietarako, 10 eta 38 euro bitartean.
Euskadiko Orkestrak Kontzertu Denboraldiari ekingo dio ‘Tragedia’ izeneko lehen programarekin, Robert Treviñok zuzenduko duena, eta datozen egunotan ohiko lau hiriburuetan izango dena: ostiralean, irailak 23, Gasteizko Principal Antzokian; astelehen eta asteartean, irailak 26 eta 27, Donostiako Kursaal Auditoriumean; astezkenean, irailak 28, Iruñeko Baluarte Auditoriumean; eta ostegunean, irailak 29, Bilboko Euskalduna Jauregian. Kontzertu guztiak 19:30ean izango dira.
‘Tragedia gainditzea’ da Denboraldi honen goiburua, non Robert Treviñok garrantzi handia eman baitio musika errusiarrari. Ibilbidea Dmitri Xostakovitxen 8. Sinfoniarekin hasiko da, goiburu horren adierazle kanoniko baita. 1943an idatzia, Bigarren Mundu Gerrako izugarrikerien erdian, musikagilearen sinfonien artean gutxien interpretatu denetako bat da, oso fatalista izaki, Europa astintzen zuen sufrimendua islatzen baitu. Aitzitik, eta duen intentsitate tragikoa gorabehera, aparteko sorkuntza da, eragin handikoa.
Gerraren aurkako une horren intentsitate tragikoaren kontrapuntu atsegina Manuel de Fallaren Espainiako lorategietako gauak izango da, hiru orrialde non cadiztarrak Andaluziako beste hainbeste paisaia irudikatu baitzituen. Gaur egungo nazioarteko panoraman aktiboenetakoa den errusiar pianojoleetako batek, Alexei Volodinek, interpretatuko ditu. Errusiako piano-eskolako eragin handieneko irakasleetako baten, Elisso Virssaladze-ren, ikaslea izan zen Volodin Moskun, eta 2003an ospea bereganatu zuen, Zuricheko Geza Anda lehiaketa irabazita. Volodin 2019an aurkeztu zen Euskadiko Orkestraren ikus-entzuleen aurrean Rakhmaninoven 3. kontzertu birtuoso eta indartsuarekin, eta bisita berri honetan musikariak bere moldakortasuna erakutsiko digu, Manuel de Fallaren gaueko irudi horien inpresionismo finari heltzean.
Sarrerak salgai daude saio guztietarako euskadikoorkestra.eus webgunean, baita auditoriumen webgune eta leihatiletan ere, 10 eta 38 euro bitartean.
22-23 Denboraldia: Tragedia Gainditzea
Euskadiko Orkestraren Denboraldi berriak tragediatik hura gainditzera garamatza musikaren eta haren adibide handien bitartez: Xostakovitxen gordintasuna, Txaikovskiren mamuak, Brucknerren sinfoniarik handiena edota Carl Orffen lanik ospetsuena. Robert Treviñok Euskadiko Orkestraren zuzendari titular izaten jarraituko du.
22-23 Denboraldiari buruzko informazio osoagoa hemen
‘Kontzertua & Proiekzioa’ Belodromoan
Zinemaldiaren 70. edizioan Euskadiko Orkestrak eskainiko duen zine-musikako kontzertua aurkezten dute Euskadiko Orkestrak, SGAE Fundazioak eta Donostia Zinemaldiak.
Bi edizioz pandemiagatik falta izan ostean, berriz berreskuratu da hitzordu garrantzitsu hau. Ohikoa izan den moduan, Zinemaldiko lehen larunbatean, eguerdian irekiko da Belodromoa musikazale, zinemazale eta, oro har, ikusleentzat, soinu-banden joaldi sinfonikoa eta horien pelikula-eszenen muntaketa uztartzen dituen ikuskizunerako.
Begi-belarriak plazerez goxatu ahal izango dira ordu eta laurdenez, larunbatean, irailak 17, eguerdiko hamabietan hasita. Sarrera doakoa izango da.
Musika-kontzertua klasiko bihurtu da dagoeneko Donostia Zinemaldian; sendotuta dago Belodromoko proposamenen artean, eta Zinemaldiko eszenatoki gogokoena da dudarik gabe, 3.000 plazako edukieraz. Aurtengoan Juan José Ocón donostiarra izango da orkestra zuzentzearen arduraduna zine eta soinu-banden elkartze jendetsu honetan.
Aurtengo Kontzertua & Proiekzioa zazpi filmetarako musikaren egokitzapenez osatzen da. Oraingo honetan hautatutako musikagile eta filmak honakook dira: Alejandro Amenábarren Mientras dure la guerra; Eva Gancedoren La buena estrella; Carles Casesen El portero; Carmelo Bernaolaren Nueve cartas a Berta; Arturo Cardelúsen Buñuel en el laberinto de las tortugas; Aitor Amezagaren La sombra de nadie; eta Manel Gil-Ingladaren Cher ami. Aipatzekoa da, gainera, aurten Nueve cartas a Berta filma Donostia Zinemaldiaren Klasikoak atalaren baitan ikus ahal izango dela.
Kontzertu berri honetarako, Euskadiko Orkestrak Andra Mari Abesbatza gonbidatu du: haiek arituko dira Buñuel en el laberinto de las tortugas eta La sombra de nadie filmetan.
Joan den urteetan bezala, kontzertuan ikusizko elementu bat gehituko da: musika pelikuletako eszena-muntaketa baten proiekzioarekin uztartuko da 400 m2-ko pantailan, eta muntaketa hori Carlos Rodríguezek (Morgancreakoa) sortu du kontzertu honetarako espresuki. Gainera, musikagileetako batzuk kontzertura bertaratuko dira, Belodromoko oholtzan beren lana aurkeztera.
Sarrera doakoa da, eta nahikoa duzu gonbita irailaren 10etik 16ra Donostia Zinemaldiaren Kursaaleko informazio-puntuan jasotzea, 9:00etatik 20:00etara, edo Donostia Turismoren bulegoan, astelehenetik larunbatera 9:00etatik 20:00etara, eta igandean, 10:00etatik 19:00etara. Azken sarrerak Belodromoko leihatiletan eskuratu ahal izango dira goizeko 10etatik aurrera.
KONTZERTUA & PROIEKZIOA
Larunbata, irailak 17, 12:00
Donostiako Belodromoa
Programa
Alejandro Amenábar: Mientras dure la guerra (Zuzendaria: Alejandro Amenábar)
Eva Gancedo: La buena estrella (Zuzendaria: Ricardo Franco)
Carles Cases: El portero (Zuzendaria: Gonzalo Suárez)
Carmelo Bernaola: Nueve cartas a Berta (Zuzendaria: Basilio Martin Patino)
Arturo Cardelús: Buñuel en el laberinto de las tortugas* (Zuzendaria: Salvador Simó)
Aitor Amezaga: La sombra de nadie* (Zuzendaria: Pablo Malo)
Manel Gil-Inglada: Cher ami (Zuzendaria: Miquel Pujol)
Juan José Ocón, zuzendaria
Andra Mari Abesbatza*
Euskadiko Orkestra
Kontzertuaren gutxi gorabeherako iraupena: 1h15
Euskadiko Orkestra Zinemaldiarekin
Euskadiko Orkestraren zuzendari nagusi Oriol Rochen hitzetan:
Urteetan zehar, Euskadiko Orkestrak modu askotan parte hartu du Donostia Zinemaldian. Bere parte-hartze nabarmenetako bat 2012ko edizioan egin zuen, orkestrak mundu osoan ospetsua den Juan Antonio Bayonaren The Impossible filmaren soinu-bandaren zuzeneko estreinaldian parte hartu zuenean (Fernando Velazquezek sinatutako partitura). Hurrengo urtetik aurrera, 2013tik aurrera, orkestra zuzeneko zine-musikako kontzertu bat eskaintzen hasi zen, lehenik Miramongo egoitzan, eta 2015etik aurrera Belodromoan, aurten arte mantendu duen eszenatoki handian. Zine-musikako kontzertuen hamarkada honetan, orkestrak Handia, Errementari, Arrugas, Pájaros de Papel, You’re the One, Los crímenes de Oxford, Frío sol de invierno, Alatriste, Tadeo Jones 2… bezalako film luzeen soinu-bandak interpretatu ditu. Guztira 58 soinu-banda interpretatu eta ikusarazi ditu denbora honetan Euskadiko Orkestrak. Gainera, aipatzekoa da orkestrak Zinemaldiaren sintonia grabatu zuela 1991 eta 1992ko edizioetan. Aurten ere Zinemaldiaren sintonia berria grabatu da, eta Óscar Abella Euskadiko Orkestrako tuba bakarlariaren parte-hartzea izan du.
Zinemaldian daukan parte-hartze oparoaz gain, Euskadiko Orkestrak film-musikaren arloan lan handia egin du. Aipagarriak dira Patria eta Maixabelen soinu-banden azken grabazioak, baita aurreko batzuk ere, hala nola A Monster Calls —Fernando Velázquezek 2016ko soinu-banda onenaren Goya saria jaso zuen—, Ocho Apellidos Vascos, Contratiempo, Submergence, eta abar.
SGAE Fundazioa Donostia Zinemaldian
SGAE Fundazioak lankidetza eta laguntza harreman estua du Donostia Zinemaldiarekin. Hiru hamarkadatan zehar, Autore eta Argitaratzaileen Elkarte Nagusiaen fundazioak jaialdiaren ekimenetan zein ekitaldi eta deialdi propioen garapenean hartu du parte, eskuzabal beti.
Erakundeak ia hiru hamarkadatan zehar egin dituen jarduera nabarmenen artean honako hauek izan ditzakegu aipagai: Made In Spain saila antolatzen laguntzea, alegia, gure ikus-entzunezko ekoizpen berrienarentzako nazioarteko erakusleihoa. Gainera, Madrilgo Berlanga aretoan (berau fundazioak berak kudeatzen duen aretoa izanik) sail edo emanaldi honetan lehiatzen diren filmen erakusketa bat programatzen dugu jaialditik egun batzutara. Era berean, topaketa profesionalak, aurkezpenak eta, bereziki, gidoilarien kolektiboari eskainitako sariak bultzatzen ditu, hala nola, Julio Alejandro SGAE Gidoia Saria, fikziozko film luzeeentzat, Euskal Herriko Gidoigile Profesionalen Elkarteren euskal produkzioa duen Gidoi Onenari Saria, eta, genero-berdintasunaren aldeko Dunia Ayaso Saria. Honakoa irailaren 22an banatuko da aurten. Azkenik, ez dugu ahaztu behar, Kontzertua & Proiekzioa deritzon ekimenari esker Zinemaldiak beste ezinbesteko hitzordu bat duela soinu-bandekin eta musikagintzarekin. Abagune honetan, Anoetako Belodromoak kontzertu bat hartzen du, Euskadiko Orkestrak interpretatutako soinu-banden aukeraketa batekin, non erreferentziazko filmen zati bereziek berorren programazioa osatzen duten. 70. Donostia Zinemaldian SGAE Fundazioak garatuko dituen ekimen guztiak fundazioaren webgunean ikus daitezke.
Musikagileak
Alejandro Amenabar (Mientras dure la guerra, Sergio Jiménez Lacinaren orkestrazioa)
Zuzendari, gidoilari, ekoizle, aktore eta konpositore musikala, programazio honetan nabarmentzen den alderdia, alegia, bere ibilbideari joan den mendeko 90eko hamarkadaren hasieran ekin zion, hainbat film labur eginez, nahiz eta zuzendari gisa lehen arrakasta 1996an iritsi zitzaion, Tesis filmarekin. Mientras dure la guerra da, hain zuzen ere, bere azken filma, eta gidoi, zuzendaritza zein soinu-banda propioak ditu: 17 izendapen eta 5 Goya Sari lortu zituen beronekin 2020an, zuzendaritza eta ekoizpen onenarena, besteak beste. Bata bestearen artean, beste bost film eta hainbat telesail egin ditu, azkena, La Fortuna, Paco Roca eta Guillermo Corralen komiki batean oinarritutako nazioarteko ekoizpena. Madrilen bizi den sortzailea bere film luzeetako soinu-banden gidoilaria eta konpositorea izateagatik nabarmentzen da, eta, bide batez, enkarguz ere eginak ditu banda sonoroak bestelako zuzendarientzat. Javier Bardem protagonista duen Mar adentro filmarengatik Oscar bat eta Urrezko Globo bat irabazi ditu, eta mundu osoko zinemaldi nagusietan lortutako hogei bat sari eskuratu ditu: Venezian edo Tokion, tartean. Mar adentro filmarekin Soinu Banda Onenari Goya Saria lortu zuen 2005ean ere. Guztira, Espainiako Zinema Akademiak emandako 9 Goya sari jaso ditu.
Eva Gancedo (La buena estrella)
Madrilgo Goi Mailako Musika Kontserbatorioan eta Bostongo Berklee College of Music zentroan egin zituen musika-ikasketak. Zinemako musikako konpositore gisa, Rafael Gordon, Manuel Palacios edo Ricardo Franco bezalako zuzendariekin lan egin du, zeinarekin ohiko konpositorea izatera iritsi baitzen. Eszena-arloan ere baditu obrak, besteak beste, José Monleón (antzerkia) zuzendariarekin edo Carmen Senra (dantza) bezalako zuzendariekin. Bere obrak, besteak beste, Espainiako Irrati Telebistako Orkestrak eta Pragako Orkestra Sinfonikoak interpretatu dituzte. Espainiako Zinema Akademiaren Soinu Banda Onenari Goya Saria jaso zuen La Buena Estrella filmaren musikagatik, eta lan horrekin Zinema Idazleen Zirkuluaren Saria ere irabazi zuen. Gaur egun, konpositore gisa duen jarduera lan pedagogikoarekin partekatzen du. Eskolak ematen ditun Ikus-entzunezko Komunikabideetarako Konposizioko Masterrean eta Musika Pedagogiako Graduan Katarina Gurska Goi Mailako Zentroan, baita Madrilgo Goi Mailako Kontserbatorioan ere.
Carles Cases (El portero)
Carles Casesek 25 urte eman ditu zinemarako soinu-bandak prestatzen eta egiten, bai Europan, bai Amerikan. Gonzalo Suárez, Ventura Pons, Jaume Balagueró, Eduardo Rossoff, Jaime Chavarri edo Stuart Gordon bezalako zuzendarien filmen ohiko musikagilea da, eta 70 soinu-banda zein 50 disko inguru argitaratu ditu, tartean, hiru mila kontzertu inguru interpretatu dituela. Ondare artistiko itzela, alegia. Gaur egun, hainbat ekoizpen konposatzen eta grabatzen dihardu, bere obren kontzertuen errealizazioarekin parekatuz, piano, dueto, hirukote edo orkestra formatuetan. 2021ean Minimal argitaratu zuen, bere lehen obra minimalista. 80ko hamarkadan Lluís Llach kantariaren musika-zuzendaritzan aritu zen, era esklusiboan, bai disken grabazioetan bai zuzeneko emanaldietan, guztira, 800 kontzertu eginez. Charles Cross Akademiak (Paris) Album onenari Saria eman zion Lluís Llachen T 'Estimo lanagatik, hain zuzen ere.
Carmelo Alonso Bernaola (Nueve cartas a Berta)
Espainiako XX. mendearen bigarren erdiko konpositore handienetakotzat jotzen da. Armonia eta klarinetea ikasi zuen Burgos eta Madrilgo Goi Mailako Eskolatan. Bartók, Stravinski eta Hindemithen musikaren eragin handia izan zuen. Cuarteto para cuerda deritzon obrarekin Musikako Sari Nazionala irabazi zuen 1962an jada. Sienako Chigiana Akademian jarraitu zituen ikasketak, eta, horri esker, bere soinu-hizkuntza modernizatu zuen, erabateko berritzaile indartsua bilakatuz, ez polemikarik gabe, halaber, orkestra handirako bere estraineko emanaldietan. Obra luzea dauka: 100 film-banda baino gehiago, 50 antzerki-ekoizpen inguru, zortzi telesail gehi programak eta sintoniak egin zituen barra-barra. Zinema Musikako Sari Nazionala da (1969an eta 1973an), Musika zinematografiko Onenari Goya Saria (1989an) edota Espainiar Zinemako Akademiaren Urrezko Domina (2002an). Sari horiei eta unibertsitate zein kontserbatorioetan irakasle eta dibulgatzaile gisa egindako lanari honako aintzatespen hauek gehitu behar zaizkie: Arte Ederretako Merezimenduaren Urrezko Domina (1987), Musikako Sari Nazionala (1992), San Fernandoko Arte Ederren Erret Akademian sarrera (1993), Madrilgo Udalaren Meritu Artistikoaren Domina (1993) eta Madrilgo Complutense Unibertsitateko honoris causa doktoretza (1997), besteak beste.
Arturo Cardelús (Buñuel en el laberinto de las tortugas, Amparo Edo Biol eta Arturo Cardelúsen orkestrazioa)
Arturo Cardelús Los Angelesen bizi den musikagile madrildarra da. The Wrap-ek “urteko soinu-banda onenatzat” jo zuen bere Buñuel en el laberinto de las tortugas lana, Goya Sarietan nominatua izan zen eta Malagako Zinemaldian zein Annecykoan Mussika Onenari Sariak irabazi zituen. Egile honen beste lan batzuk honakoak ditugu: In a Herartbeat, Frida Kahloren erakusleiho inmersiboa den Black Beach, Netflix Originaleko Call Me Francis miniseriea, Los Descendientes, Frank Marshallen The People' s Fighters eta José Luis López Linaresen Altamira. 2016an Royal Academy of Music deritzon prestigiozko erakundeak bertoko bazkide izendatu zuen Cardelús, kontzertu-musikagintzari egindako ekarpenengatik. Londresko Royal Academy of Music delakoan piano ikasketak burutu zituen, hala nola Budapesteko Franz Liszt Akademian, Salamancako Goi Mailako Musika Eskolan eta Guadalajarako Kontserbatorio Profesionalean. 2008an beste norabide bat hartu eta Bostongo Berklee College of Music delakoan konposizioa eta zinema aztertzera joan zen. Bertan, Summa Cum Laude aintzatespena erdietsi zuen, berau musikagintza sailaren aitorpen gorenena izanik han.
Aitor Amezaga (La sombra de nadie)
Bilbon jaioa eta Goi Mailako Eskolan formatua, Arthur Bersteinekin musika modernoko eta jazzeko L 'aula deritzon gunean bere prestakuntza osatzerik izan du, eta Guildhall School Music of London ospetsuaren Certificate of Keyboards errezitaldia lortu du. 1973az geroztik, 80 disko baino gehiagotan kolaboratu du moldatzaile eta grabaketa-musikari gisa; sei disko ditu merkatuan eta telebistarako, irratirako eta hainbat komunikabidetarako musika egin du bere ibilbide emankorrean. Sortutako doinuak Argentinan, Frantzian, Alemanian, Israelen edo Suitzan entzun dira, besteak beste, baina film luzeetarako soinu-banden esparruan lau proiektu egin ditu: Joseba Salegiren Ione sube al cielo, Pablo Maloren Frío sol de invierno, Jesús Ponceren Skizo eta Pablo Maloren La sombra de nadie berau. Gaur egun, pedagogiarekin tartekatzen du bere sormen-jarduera Donostiako Musika Eskolan klaseak emanez. Musikenen ezezik, Irungo Kontserbatorioarekin eta Udako Euskal Unibertsitatearekin ere lankidetza lanak burutzen ditu. Honez gain, dibulgatzaile gisa pianorako hiru partitura-liburu argitaratu ditu.
Manel Gil-Inglada (Cher ami)
Manel Gil-Inglada soinu-banden konpositore ospetsu eta maiz saritua dugu, eta nazioarte mailako 45 aintzatespen baino gehiago ditu izendapenen eta sarien artean, soilik azken hamar urteotan. 30 urte baino gehiagoko eskarmentua dauka ikus-entzunezkoaren sektorean, interprete gisa beste hainbeste ezezik. Bartzelonako Musika Moderno eta Jazzdeko Gelan egin zituen ikasketak, Film Scoring-en hainbat mintegi eta ikastarotan espezializazioa erdietsiz, José Nieto, Armando Trovaioli eta Ennio Morriconeren eskutik. Telebista-sintonia eta zinemarako soinu-banda askoren egilea da (film luzeak eta laburrak), eta animaziorako soinu-bandarekin lotutako hainbat masterretako irakasle ere badugu. Gaur egun, zinemagintza, orkestra eta bideojokoen musikagintzan dihardu; besteak beste, duela gutxi sortutako Endling - Extinction is Forever delakoa horren adierazgarri (hemen Tina Guo handiak eta Rusanda Panfilik parte hartu dute, biak Hans Zimmerren ohiko kolaboratzaileak izanik). Honakoa kritika on ugari zein bikainak jasotzen ari den soinu-banda dugu.
Salgai 22-23 Denboraldiko kontzertuetarako sarrerak
Dagoeneko eros daitezke ohiko salguneetan Euskadiko Orkestraren 22-23 Kontzertu Denboraldiko hitzordu guztietarako sarrerak.
Irailaren 1etik salgai daude Euskadiko Orkestraren 22-23 Denboraldiko kontzertuetarako sarrerak. Irailaren 23an Gasteizen emango duen kontzertuarekin ekingo dio orkestrak ohiko lau hiriburuetan eskainiko duen abonu-kontzertuen denboraldiari.
Sarrerak salgai 10 eurotik aurrera
Bilbo, Iruña, Donostia eta Gasteizko kontzertu guztietarako sarrerak euskadikoorkestra.eus-en eros ahal izango dira, baita aretoen webguneetan (euskalduna.eus, baluarte.com, kursaal.eus y principalantzokia.org) eta euren leihatila eta ohiko salguneetan ere.
Irekita jarraitzen du Denboraldiko abonu-eskaera egiteko aukerak ere, hemen (80 eurotik aurrera).
Tarifa bereziak eta deskontuak
Euskadiko Orkestrako abonatu, ikasle, 30 urtetik beherako, 65 urtetik gorako, langabetu eta beste kolektibo batzuek (Artium, Kursaal Eszena...) tarifa bereziekin gozatu ahal izango dute kontzertuez. Gainera, Azken Ordu Gazteari esker, 30 urtetik beherako lagunek aukera izango dute gune guztietako sarrerak 10 eurotan erosteko, kontzertua hasi baino 30 minutu lehenago dagokion aretoko leihatilan.
22-23 Denboraldia: Tragedia Gainditzea
Euskadiko Orkestraren Denboraldi berriak tragediatik hura gainditzera garamatza musikaren eta haren adibide handien bitartez: Xostakovitxen gordintasuna, Txaikovskiren mamuak, Brucknerren sinfoniarik handiena edota Carl Orffen lanik ospetsuena.
Orkestrak pandemian bertan behera utzitako egitasmoak berreskuratuko ditu; Carpenterren ‘Mamu kantak’ lanaren estreinaldia esaterako, hiru orkestra britainiarrekin batera agindutako lana.
Euskal Herriko sorkuntzak ere hartuko du garrantzia Ramon Lazkanori agindutako ‘Mare Marginis’ lanaren estreinaldiari esker, bai eta ‘Elkano: Mundubira musika bidelagun’ proiektuaren amaierarekin –Zuriñe F. Gerenabarrenaren ‘Lorratz’ lanaren bitartez–, munduari gure konpositoreen iruditeriaren bitartez bira egin ondoren.
Euskadiko Orkestrak oso gutxitan interpretatutako lan bitxiak, entzutea merezi dutenak, ezagutaraztea bultzatuko du, orobat, hala nola Adamsen ‘Doctor Atomic Symphony’ lana, bai eta Euskal Herrian oso ezagunak ez diren Veprik eta Dzenitis musikagileen lanak ere, besteak beste.
Asmo hori bete nahian, sona handiko artistak egongo dira gurekin: Alexei Volodin, Alena Baeva, Yulianna Avdeeva, Dinis Sousa, Roderick Cox eta Frank Peter Zimmermann, adibidez. Bai eta gure lurraldeko artista handi batzuk ere, hala nola Donostiako Orfeoia –haren 125. urteurrenean–, Easo Gazte eta Easo Eskolania, Carlos Mena eta Jone Martínez sopranoa.
Robert Treviñok Euskadiko Orkestraren zuzendari titular izaten jarraituko du.
22-23 Denboraldiari buruzko informazio osoagoa hemen