‘Kontzertua & Proiekzioa’ Belodromoan
Zinemaldiaren 70. edizioan Euskadiko Orkestrak eskainiko duen zine-musikako kontzertua aurkezten dute Euskadiko Orkestrak, SGAE Fundazioak eta Donostia Zinemaldiak.
Bi edizioz pandemiagatik falta izan ostean, berriz berreskuratu da hitzordu garrantzitsu hau. Ohikoa izan den moduan, Zinemaldiko lehen larunbatean, eguerdian irekiko da Belodromoa musikazale, zinemazale eta, oro har, ikusleentzat, soinu-banden joaldi sinfonikoa eta horien pelikula-eszenen muntaketa uztartzen dituen ikuskizunerako.
Begi-belarriak plazerez goxatu ahal izango dira ordu eta laurdenez, larunbatean, irailak 17, eguerdiko hamabietan hasita. Sarrera doakoa izango da.
Musika-kontzertua klasiko bihurtu da dagoeneko Donostia Zinemaldian; sendotuta dago Belodromoko proposamenen artean, eta Zinemaldiko eszenatoki gogokoena da dudarik gabe, 3.000 plazako edukieraz. Aurtengoan Juan José Ocón donostiarra izango da orkestra zuzentzearen arduraduna zine eta soinu-banden elkartze jendetsu honetan.
Aurtengo Kontzertua & Proiekzioa zazpi filmetarako musikaren egokitzapenez osatzen da. Oraingo honetan hautatutako musikagile eta filmak honakook dira: Alejandro Amenábarren Mientras dure la guerra; Eva Gancedoren La buena estrella; Carles Casesen El portero; Carmelo Bernaolaren Nueve cartas a Berta; Arturo Cardelúsen Buñuel en el laberinto de las tortugas; Aitor Amezagaren La sombra de nadie; eta Manel Gil-Ingladaren Cher ami. Aipatzekoa da, gainera, aurten Nueve cartas a Berta filma Donostia Zinemaldiaren Klasikoak atalaren baitan ikus ahal izango dela.
Kontzertu berri honetarako, Euskadiko Orkestrak Andra Mari Abesbatza gonbidatu du: haiek arituko dira Buñuel en el laberinto de las tortugas eta La sombra de nadie filmetan.
Joan den urteetan bezala, kontzertuan ikusizko elementu bat gehituko da: musika pelikuletako eszena-muntaketa baten proiekzioarekin uztartuko da 400 m2-ko pantailan, eta muntaketa hori Carlos Rodríguezek (Morgancreakoa) sortu du kontzertu honetarako espresuki. Gainera, musikagileetako batzuk kontzertura bertaratuko dira, Belodromoko oholtzan beren lana aurkeztera.
Sarrera doakoa da, eta nahikoa duzu gonbita irailaren 10etik 16ra Donostia Zinemaldiaren Kursaaleko informazio-puntuan jasotzea, 9:00etatik 20:00etara, edo Donostia Turismoren bulegoan, astelehenetik larunbatera 9:00etatik 20:00etara, eta igandean, 10:00etatik 19:00etara. Azken sarrerak Belodromoko leihatiletan eskuratu ahal izango dira goizeko 10etatik aurrera.
KONTZERTUA & PROIEKZIOA
Larunbata, irailak 17, 12:00
Donostiako Belodromoa
Programa
Alejandro Amenábar: Mientras dure la guerra (Zuzendaria: Alejandro Amenábar)
Eva Gancedo: La buena estrella (Zuzendaria: Ricardo Franco)
Carles Cases: El portero (Zuzendaria: Gonzalo Suárez)
Carmelo Bernaola: Nueve cartas a Berta (Zuzendaria: Basilio Martin Patino)
Arturo Cardelús: Buñuel en el laberinto de las tortugas* (Zuzendaria: Salvador Simó)
Aitor Amezaga: La sombra de nadie* (Zuzendaria: Pablo Malo)
Manel Gil-Inglada: Cher ami (Zuzendaria: Miquel Pujol)
Juan José Ocón, zuzendaria
Andra Mari Abesbatza*
Euskadiko Orkestra
Kontzertuaren gutxi gorabeherako iraupena: 1h15
Euskadiko Orkestra Zinemaldiarekin
Euskadiko Orkestraren zuzendari nagusi Oriol Rochen hitzetan:
Urteetan zehar, Euskadiko Orkestrak modu askotan parte hartu du Donostia Zinemaldian. Bere parte-hartze nabarmenetako bat 2012ko edizioan egin zuen, orkestrak mundu osoan ospetsua den Juan Antonio Bayonaren The Impossible filmaren soinu-bandaren zuzeneko estreinaldian parte hartu zuenean (Fernando Velazquezek sinatutako partitura). Hurrengo urtetik aurrera, 2013tik aurrera, orkestra zuzeneko zine-musikako kontzertu bat eskaintzen hasi zen, lehenik Miramongo egoitzan, eta 2015etik aurrera Belodromoan, aurten arte mantendu duen eszenatoki handian. Zine-musikako kontzertuen hamarkada honetan, orkestrak Handia, Errementari, Arrugas, Pájaros de Papel, You’re the One, Los crímenes de Oxford, Frío sol de invierno, Alatriste, Tadeo Jones 2… bezalako film luzeen soinu-bandak interpretatu ditu. Guztira 58 soinu-banda interpretatu eta ikusarazi ditu denbora honetan Euskadiko Orkestrak. Gainera, aipatzekoa da orkestrak Zinemaldiaren sintonia grabatu zuela 1991 eta 1992ko edizioetan. Aurten ere Zinemaldiaren sintonia berria grabatu da, eta Óscar Abella Euskadiko Orkestrako tuba bakarlariaren parte-hartzea izan du.
Zinemaldian daukan parte-hartze oparoaz gain, Euskadiko Orkestrak film-musikaren arloan lan handia egin du. Aipagarriak dira Patria eta Maixabelen soinu-banden azken grabazioak, baita aurreko batzuk ere, hala nola A Monster Calls —Fernando Velázquezek 2016ko soinu-banda onenaren Goya saria jaso zuen—, Ocho Apellidos Vascos, Contratiempo, Submergence, eta abar.
SGAE Fundazioa Donostia Zinemaldian
SGAE Fundazioak lankidetza eta laguntza harreman estua du Donostia Zinemaldiarekin. Hiru hamarkadatan zehar, Autore eta Argitaratzaileen Elkarte Nagusiaen fundazioak jaialdiaren ekimenetan zein ekitaldi eta deialdi propioen garapenean hartu du parte, eskuzabal beti.
Erakundeak ia hiru hamarkadatan zehar egin dituen jarduera nabarmenen artean honako hauek izan ditzakegu aipagai: Made In Spain saila antolatzen laguntzea, alegia, gure ikus-entzunezko ekoizpen berrienarentzako nazioarteko erakusleihoa. Gainera, Madrilgo Berlanga aretoan (berau fundazioak berak kudeatzen duen aretoa izanik) sail edo emanaldi honetan lehiatzen diren filmen erakusketa bat programatzen dugu jaialditik egun batzutara. Era berean, topaketa profesionalak, aurkezpenak eta, bereziki, gidoilarien kolektiboari eskainitako sariak bultzatzen ditu, hala nola, Julio Alejandro SGAE Gidoia Saria, fikziozko film luzeeentzat, Euskal Herriko Gidoigile Profesionalen Elkarteren euskal produkzioa duen Gidoi Onenari Saria, eta, genero-berdintasunaren aldeko Dunia Ayaso Saria. Honakoa irailaren 22an banatuko da aurten. Azkenik, ez dugu ahaztu behar, Kontzertua & Proiekzioa deritzon ekimenari esker Zinemaldiak beste ezinbesteko hitzordu bat duela soinu-bandekin eta musikagintzarekin. Abagune honetan, Anoetako Belodromoak kontzertu bat hartzen du, Euskadiko Orkestrak interpretatutako soinu-banden aukeraketa batekin, non erreferentziazko filmen zati bereziek berorren programazioa osatzen duten. 70. Donostia Zinemaldian SGAE Fundazioak garatuko dituen ekimen guztiak fundazioaren webgunean ikus daitezke.
Musikagileak
Alejandro Amenabar (Mientras dure la guerra, Sergio Jiménez Lacinaren orkestrazioa)
Zuzendari, gidoilari, ekoizle, aktore eta konpositore musikala, programazio honetan nabarmentzen den alderdia, alegia, bere ibilbideari joan den mendeko 90eko hamarkadaren hasieran ekin zion, hainbat film labur eginez, nahiz eta zuzendari gisa lehen arrakasta 1996an iritsi zitzaion, Tesis filmarekin. Mientras dure la guerra da, hain zuzen ere, bere azken filma, eta gidoi, zuzendaritza zein soinu-banda propioak ditu: 17 izendapen eta 5 Goya Sari lortu zituen beronekin 2020an, zuzendaritza eta ekoizpen onenarena, besteak beste. Bata bestearen artean, beste bost film eta hainbat telesail egin ditu, azkena, La Fortuna, Paco Roca eta Guillermo Corralen komiki batean oinarritutako nazioarteko ekoizpena. Madrilen bizi den sortzailea bere film luzeetako soinu-banden gidoilaria eta konpositorea izateagatik nabarmentzen da, eta, bide batez, enkarguz ere eginak ditu banda sonoroak bestelako zuzendarientzat. Javier Bardem protagonista duen Mar adentro filmarengatik Oscar bat eta Urrezko Globo bat irabazi ditu, eta mundu osoko zinemaldi nagusietan lortutako hogei bat sari eskuratu ditu: Venezian edo Tokion, tartean. Mar adentro filmarekin Soinu Banda Onenari Goya Saria lortu zuen 2005ean ere. Guztira, Espainiako Zinema Akademiak emandako 9 Goya sari jaso ditu.
Eva Gancedo (La buena estrella)
Madrilgo Goi Mailako Musika Kontserbatorioan eta Bostongo Berklee College of Music zentroan egin zituen musika-ikasketak. Zinemako musikako konpositore gisa, Rafael Gordon, Manuel Palacios edo Ricardo Franco bezalako zuzendariekin lan egin du, zeinarekin ohiko konpositorea izatera iritsi baitzen. Eszena-arloan ere baditu obrak, besteak beste, José Monleón (antzerkia) zuzendariarekin edo Carmen Senra (dantza) bezalako zuzendariekin. Bere obrak, besteak beste, Espainiako Irrati Telebistako Orkestrak eta Pragako Orkestra Sinfonikoak interpretatu dituzte. Espainiako Zinema Akademiaren Soinu Banda Onenari Goya Saria jaso zuen La Buena Estrella filmaren musikagatik, eta lan horrekin Zinema Idazleen Zirkuluaren Saria ere irabazi zuen. Gaur egun, konpositore gisa duen jarduera lan pedagogikoarekin partekatzen du. Eskolak ematen ditun Ikus-entzunezko Komunikabideetarako Konposizioko Masterrean eta Musika Pedagogiako Graduan Katarina Gurska Goi Mailako Zentroan, baita Madrilgo Goi Mailako Kontserbatorioan ere.
Carles Cases (El portero)
Carles Casesek 25 urte eman ditu zinemarako soinu-bandak prestatzen eta egiten, bai Europan, bai Amerikan. Gonzalo Suárez, Ventura Pons, Jaume Balagueró, Eduardo Rossoff, Jaime Chavarri edo Stuart Gordon bezalako zuzendarien filmen ohiko musikagilea da, eta 70 soinu-banda zein 50 disko inguru argitaratu ditu, tartean, hiru mila kontzertu inguru interpretatu dituela. Ondare artistiko itzela, alegia. Gaur egun, hainbat ekoizpen konposatzen eta grabatzen dihardu, bere obren kontzertuen errealizazioarekin parekatuz, piano, dueto, hirukote edo orkestra formatuetan. 2021ean Minimal argitaratu zuen, bere lehen obra minimalista. 80ko hamarkadan Lluís Llach kantariaren musika-zuzendaritzan aritu zen, era esklusiboan, bai disken grabazioetan bai zuzeneko emanaldietan, guztira, 800 kontzertu eginez. Charles Cross Akademiak (Paris) Album onenari Saria eman zion Lluís Llachen T 'Estimo lanagatik, hain zuzen ere.
Carmelo Alonso Bernaola (Nueve cartas a Berta)
Espainiako XX. mendearen bigarren erdiko konpositore handienetakotzat jotzen da. Armonia eta klarinetea ikasi zuen Burgos eta Madrilgo Goi Mailako Eskolatan. Bartók, Stravinski eta Hindemithen musikaren eragin handia izan zuen. Cuarteto para cuerda deritzon obrarekin Musikako Sari Nazionala irabazi zuen 1962an jada. Sienako Chigiana Akademian jarraitu zituen ikasketak, eta, horri esker, bere soinu-hizkuntza modernizatu zuen, erabateko berritzaile indartsua bilakatuz, ez polemikarik gabe, halaber, orkestra handirako bere estraineko emanaldietan. Obra luzea dauka: 100 film-banda baino gehiago, 50 antzerki-ekoizpen inguru, zortzi telesail gehi programak eta sintoniak egin zituen barra-barra. Zinema Musikako Sari Nazionala da (1969an eta 1973an), Musika zinematografiko Onenari Goya Saria (1989an) edota Espainiar Zinemako Akademiaren Urrezko Domina (2002an). Sari horiei eta unibertsitate zein kontserbatorioetan irakasle eta dibulgatzaile gisa egindako lanari honako aintzatespen hauek gehitu behar zaizkie: Arte Ederretako Merezimenduaren Urrezko Domina (1987), Musikako Sari Nazionala (1992), San Fernandoko Arte Ederren Erret Akademian sarrera (1993), Madrilgo Udalaren Meritu Artistikoaren Domina (1993) eta Madrilgo Complutense Unibertsitateko honoris causa doktoretza (1997), besteak beste.
Arturo Cardelús (Buñuel en el laberinto de las tortugas, Amparo Edo Biol eta Arturo Cardelúsen orkestrazioa)
Arturo Cardelús Los Angelesen bizi den musikagile madrildarra da. The Wrap-ek “urteko soinu-banda onenatzat” jo zuen bere Buñuel en el laberinto de las tortugas lana, Goya Sarietan nominatua izan zen eta Malagako Zinemaldian zein Annecykoan Mussika Onenari Sariak irabazi zituen. Egile honen beste lan batzuk honakoak ditugu: In a Herartbeat, Frida Kahloren erakusleiho inmersiboa den Black Beach, Netflix Originaleko Call Me Francis miniseriea, Los Descendientes, Frank Marshallen The People' s Fighters eta José Luis López Linaresen Altamira. 2016an Royal Academy of Music deritzon prestigiozko erakundeak bertoko bazkide izendatu zuen Cardelús, kontzertu-musikagintzari egindako ekarpenengatik. Londresko Royal Academy of Music delakoan piano ikasketak burutu zituen, hala nola Budapesteko Franz Liszt Akademian, Salamancako Goi Mailako Musika Eskolan eta Guadalajarako Kontserbatorio Profesionalean. 2008an beste norabide bat hartu eta Bostongo Berklee College of Music delakoan konposizioa eta zinema aztertzera joan zen. Bertan, Summa Cum Laude aintzatespena erdietsi zuen, berau musikagintza sailaren aitorpen gorenena izanik han.
Aitor Amezaga (La sombra de nadie)
Bilbon jaioa eta Goi Mailako Eskolan formatua, Arthur Bersteinekin musika modernoko eta jazzeko L 'aula deritzon gunean bere prestakuntza osatzerik izan du, eta Guildhall School Music of London ospetsuaren Certificate of Keyboards errezitaldia lortu du. 1973az geroztik, 80 disko baino gehiagotan kolaboratu du moldatzaile eta grabaketa-musikari gisa; sei disko ditu merkatuan eta telebistarako, irratirako eta hainbat komunikabidetarako musika egin du bere ibilbide emankorrean. Sortutako doinuak Argentinan, Frantzian, Alemanian, Israelen edo Suitzan entzun dira, besteak beste, baina film luzeetarako soinu-banden esparruan lau proiektu egin ditu: Joseba Salegiren Ione sube al cielo, Pablo Maloren Frío sol de invierno, Jesús Ponceren Skizo eta Pablo Maloren La sombra de nadie berau. Gaur egun, pedagogiarekin tartekatzen du bere sormen-jarduera Donostiako Musika Eskolan klaseak emanez. Musikenen ezezik, Irungo Kontserbatorioarekin eta Udako Euskal Unibertsitatearekin ere lankidetza lanak burutzen ditu. Honez gain, dibulgatzaile gisa pianorako hiru partitura-liburu argitaratu ditu.
Manel Gil-Inglada (Cher ami)
Manel Gil-Inglada soinu-banden konpositore ospetsu eta maiz saritua dugu, eta nazioarte mailako 45 aintzatespen baino gehiago ditu izendapenen eta sarien artean, soilik azken hamar urteotan. 30 urte baino gehiagoko eskarmentua dauka ikus-entzunezkoaren sektorean, interprete gisa beste hainbeste ezezik. Bartzelonako Musika Moderno eta Jazzdeko Gelan egin zituen ikasketak, Film Scoring-en hainbat mintegi eta ikastarotan espezializazioa erdietsiz, José Nieto, Armando Trovaioli eta Ennio Morriconeren eskutik. Telebista-sintonia eta zinemarako soinu-banda askoren egilea da (film luzeak eta laburrak), eta animaziorako soinu-bandarekin lotutako hainbat masterretako irakasle ere badugu. Gaur egun, zinemagintza, orkestra eta bideojokoen musikagintzan dihardu; besteak beste, duela gutxi sortutako Endling - Extinction is Forever delakoa horren adierazgarri (hemen Tina Guo handiak eta Rusanda Panfilik parte hartu dute, biak Hans Zimmerren ohiko kolaboratzaileak izanik). Honakoa kritika on ugari zein bikainak jasotzen ari den soinu-banda dugu.
Salgai 22-23 Denboraldiko kontzertuetarako sarrerak
Dagoeneko eros daitezke ohiko salguneetan Euskadiko Orkestraren 22-23 Kontzertu Denboraldiko hitzordu guztietarako sarrerak.
Irailaren 1etik salgai daude Euskadiko Orkestraren 22-23 Denboraldiko kontzertuetarako sarrerak. Irailaren 23an Gasteizen emango duen kontzertuarekin ekingo dio orkestrak ohiko lau hiriburuetan eskainiko duen abonu-kontzertuen denboraldiari.
Sarrerak salgai 10 eurotik aurrera
Bilbo, Iruña, Donostia eta Gasteizko kontzertu guztietarako sarrerak euskadikoorkestra.eus-en eros ahal izango dira, baita aretoen webguneetan (euskalduna.eus, baluarte.com, kursaal.eus y principalantzokia.org) eta euren leihatila eta ohiko salguneetan ere.
Irekita jarraitzen du Denboraldiko abonu-eskaera egiteko aukerak ere, hemen (80 eurotik aurrera).
Tarifa bereziak eta deskontuak
Euskadiko Orkestrako abonatu, ikasle, 30 urtetik beherako, 65 urtetik gorako, langabetu eta beste kolektibo batzuek (Artium, Kursaal Eszena...) tarifa bereziekin gozatu ahal izango dute kontzertuez. Gainera, Azken Ordu Gazteari esker, 30 urtetik beherako lagunek aukera izango dute gune guztietako sarrerak 10 eurotan erosteko, kontzertua hasi baino 30 minutu lehenago dagokion aretoko leihatilan.
22-23 Denboraldia: Tragedia Gainditzea
Euskadiko Orkestraren Denboraldi berriak tragediatik hura gainditzera garamatza musikaren eta haren adibide handien bitartez: Xostakovitxen gordintasuna, Txaikovskiren mamuak, Brucknerren sinfoniarik handiena edota Carl Orffen lanik ospetsuena.
Orkestrak pandemian bertan behera utzitako egitasmoak berreskuratuko ditu; Carpenterren ‘Mamu kantak’ lanaren estreinaldia esaterako, hiru orkestra britainiarrekin batera agindutako lana.
Euskal Herriko sorkuntzak ere hartuko du garrantzia Ramon Lazkanori agindutako ‘Mare Marginis’ lanaren estreinaldiari esker, bai eta ‘Elkano: Mundubira musika bidelagun’ proiektuaren amaierarekin –Zuriñe F. Gerenabarrenaren ‘Lorratz’ lanaren bitartez–, munduari gure konpositoreen iruditeriaren bitartez bira egin ondoren.
Euskadiko Orkestrak oso gutxitan interpretatutako lan bitxiak, entzutea merezi dutenak, ezagutaraztea bultzatuko du, orobat, hala nola Adamsen ‘Doctor Atomic Symphony’ lana, bai eta Euskal Herrian oso ezagunak ez diren Veprik eta Dzenitis musikagileen lanak ere, besteak beste.
Asmo hori bete nahian, sona handiko artistak egongo dira gurekin: Alexei Volodin, Alena Baeva, Yulianna Avdeeva, Dinis Sousa, Roderick Cox eta Frank Peter Zimmermann, adibidez. Bai eta gure lurraldeko artista handi batzuk ere, hala nola Donostiako Orfeoia –haren 125. urteurrenean–, Easo Gazte eta Easo Eskolania, Carlos Mena eta Jone Martínez sopranoa.
Robert Treviñok Euskadiko Orkestraren zuzendari titular izaten jarraituko du.
22-23 Denboraldiari buruzko informazio osoagoa hemen
‘¡De película!’, zine-musika Hollywoodeko izarrekin irailaren 1ean
Hamar egun baino ez dira geratzen Euskadiko Orkestra zinemaz jantz dadin Kursaal Auditoriumean (20:00) film arrakastatsuenetako batzuen soinu-bandak interpretatzeko: ‘Karibeko piratak’, ‘Titanic’, ‘Deabruzko panpina’, ‘The Mask’, ‘Erregearen hitzaldia’, ‘Bizitza ederra da’ eta beste asko. Bi aktore bikoiztailek Jack Sparrow, Forrest Gump, Jurgi VI.a eta Chucky bezalako pertsonaiei ahotsa jarriko diete eta zine-kontzertu zirraragarri honi benetakotasun handia emango diote.
Sarrerak salgai daude 25 eurotan euskadikoorkestra.eus-en eta Kursaaleko leihatilan.
¡De película! zine-musikako ikuskizuna da, adin guztientzakoa, eta zinema-proiekzio orotan ‘ikusezinak’ diren elementuekin jolasten du: musika eta pertsonaien ahotsak. Bertan Jack Sparrow kapitaina ezagutuko dugu —ordurako bere Perla Beltza Kontxan ainguratua izango du—, banku batean eseriko gara Forrest Gumpen ondoan bere bonboi-kaxa eskuetan duela, eta Mrs. Doubtfire in fraganti harrapatuko dugu, merengezko aurpegiko maskararekin.
Mundu guztiak ezagutzen dituen filmetako eszena mitiko horiek eta beste askok bizia hartuko dute Jordi Brau eta Luis Posada aktore bikoiztaileei ahotsen, Euskadiko Orkestraren musika interpretazioaren eta pantaila handi bateko irudien proiekzioaren bidez.
Valleseko Orkestra Sinfonikoak sortu zuen proiektua, harekin batera joateko propio idatzitako gidoi batekin, eta arrakasta handia izan du dagoeneko aurkeztu den kontzertu-areto guztietan. Orain Euskadiko Orkestrak kontzertu-formatu original eta desberdin hau hartuko du bere gain Donostian irailaren 1ean egingo den hitzordu bakar honetarako.
Jordi Brau Sean Penn, Nicolas Cage, Kenneth Branagh, Dennis Quaid, Robin Williams, Tom Cruise, Daniel Day-Lewis, Roberto Benigni eta Tom Hanks aktoreen bikoizlea da, besteak beste. Bestalde, Luis Posadaren ahotsak Johnny Depp, Jim Carrey, Adrien Brody, John Cusack edo Leonardo Di Caprio aktoreak interpretatzen ditu. Beren lokuzioa gaztelaniaz izango da, euskarazko azpitituluekin.
Kontzertuak Ruben Gimeno EGOren (Euskal Herriko Gazte Orkestra) zuzendaria izango du buru eta Laboral Kutxaren babesa izango du.
Sarrerak 25 eurotan daude salgai, euskadikoorkestra.eus webgunean eta Kursaaleko leihatilan. Euskadiko Orkestrako abonatuek 20 euroko prezio murriztuan eskuratu ahal izango dituzte sarrerak (gehienez bi).
Kontzertuaren fitxa
Irailak 1
Kursaal, 20:00
Sarrerak: 25€
euskadikoorkestra.eus / Kursaaleko leihatila
Euskadiko Orkestra
Aktore bikoiztaileak: Jordi Brau, Luis Posada
Zuzendaria: Rubén Gimeno
Egitaraua
- Good morning Vietnam!: ‘What a wonderful world’, Bob Thiele / George Weiss
- Deabruzko panpina: Joe Renzetty
- The Mask: ‘Hey Pachuco’, Randy Edelman
- Erregearen hitzaldia: ‘7. Sinfonia’, Ludwig Van Beethoven
- Titanic: James Horner
- Uztailaren lauan jaioa: John Williams
- Mission: Impossible: Lalo Schiffrin
- Mrs. Doubtfire: ‘Sevillako bizargina (Figaroren aria)’, Gioachino Rossini
- Harrapa Nazak Ahal Baduk: 'Escapades', John Williams
- Bizitza ederra da: Niccola Piovani
- Karibeko piratak: Hans Zimmer
- Forrest Gump: Alan Silvestri
'¡De película!'-ren babeslea
Hezkuntza eta Gizarte Kontzertuen Antolatzaileen Sarearen (ROCE) XIII. Topaketa
‘Ekosistema musikala: lidergoa, aniztasuna eta berrikuntza kudeaketa-ereduetan' izenburua duen aurtengo edizioa ekainaren 30etik uztailaren 2ra egingo da Musikenen, Donostia. Gai horien inguruan diharduten diziplina anitzeko profesionalei zuzenduta dago, eta ekainaren 20ra arte egongo da izena emateko aukera.
Euskadiko Orkestra ROCEren sortzaileetako bat da, eta Mikel Cañada Euskadiko Orkestrako Musika Gelako koordinatzailea sarearen presidenteordea da.
Ekainaren 30etik uztailaren 20ra, Hezkuntza eta Gizarte Kontzertuen Antolatzaileen Sarearen (ROCE) XIII. Topaketa egingo da Musikene Euskal Herriko Goi Mailako Musika Ikastegian, eta honako hauei zuzenduta egongo da: musikako profesionalei, ikertzaileei, musikologoei, gizarte-kolektiboetako arduradunei, hezitzaileei, gizarte-langileei, kultura-bitartekariei, psikologoei, pedagogoei, psikopedagogoei eta gaian interesa duten beste pertsona batzuei. Topaketak nazioarteko ponentziak, solasaldiak, lan-mahaiak eta komunikazioak barne hartuko ditu, etorkizuneko proiektu eta estrategia komunak ezagutzeko, bateratzeko eta abiapuntu bat proposatzeko helburuarekin.
ROCE irabazi-asmorik gabeko elkartea da, 2010ean sortu zuten hainbat erakundek, tartean Euskadiko Orkestrak, eta gaur egun hogei bat erakunde ditu kide. Haren helburuen artean daude, besteak beste, elkartutako erakundeen hezkuntza- eta gizarte-ekintzak koordinatzea eta lankidetza sustatzea, kultura-erakundeetan hezkuntza- eta gizarte-sailak sor daitezen bultzatzea edo arlo horretako diziplinarteko proiektuen diseinua eta garapena sustatzea. Gaur egun, elkarteko presidenteordea da Mikel Cañada, Euskadiko Orkestrako Musika Gelako koordinatzailea ere badena.
Topaketari buruzko informazio guztia rocemusica.org-en. Izen-ematea doakoa izango da eta ekainaren 20a baino lehen egin beharko da webgune horren bitartez.
Informazio gehiago
ROCEren webguneaMiramongo Matinéeak Denboraldi amaierara iritsiko dira larunbat honetan Galerna Haizeak taldearekin
Euskadiko Orkestrako haize-boskoteak Barber, Villa-Lobos, Cage eta Medagliaren obrak interpretatuko ditu larunbat honetan, ekainak 4, 11:00etan, Miramongo Auditoriumean, eta sarrerak 10 eurotan daude salgai.
Miramongo Matinéeak 21/22 Denboraldiaren amaierara iritsiko dira Galerna Haizeak taldeak eskainiko duen ‘XX. mendea Ameriketan’ izeneko kontzertuarekin, larunbat honetan, ekainak 4, 11:00etan, Euskadiko Orkestraren Miramongo egoitzan. Euskadiko Orkestrako kide diren bost musikarik osatzen dute taldea: Ander Erburu (flauta), Silvia Esain (oboea), Luis Camara (klarinetea), Yuan Dai (fagota) eta Adrian Garcia Carballo (tronpa).
Kontzertu honetan XX. mendeko kontinente amerikarrera bidaiatuko dugu, zehazki Estatu Batuetara eta Brasilera, Barber, Villa-Lobos, Cage eta Medagliaren eskutik, haize-boskoterako konposatu zuten jatorrizko musikaren bidez.
Lehenik eta behin, Samuel Barber estatubatuarraren Summer Music entzungo da, 1955ean konposatua. Barber azken erromantiko estatubatuartzat jo ohi da, bere lengoaia harmoniko kontserbadoreari eta dohain lirikoari esker, izan ere, abeslari-formazioa baitzuen. Obra honen musikak, bere sekziorik geldoenetan, udako erlaxazioa eta moteltasuna adierazten ditu.
Ondoren, Heitor Villa-Lobosen Quinteto em forma de chôros etorriko da, Parisen 1928an konposatua musikagilea hamalau choroko serie batean lanean aritu zen garaian. Choro (portugesez ‘negar’) Brasilgo musika-estilo urbanoa izan zen, 1870eko hamarkadan sortua, eta inprobisazioa, bariazioak eta kontrapuntua ditu ezaugarri.
Kontzertuaren hirugarren pieza John Cageren Music for Wind Strings izango da. 1938an idatzitako obra da, konpositorearen lehen etapan. Garai horretan bere lanak formula matematiko konplexuetan oinarritzen ziren eta hori da kinteto honen kasua. Oso izaera perkusiboa du obrak eta musika minimalistaren adibide garbia da.
Kontzertua amaitzeko, Galerna Haizeak taldeak Julio Medaglia brasildarraren Belle Epoque en Sud-América suitea joko du. Konpositore honek Alemanian lortu zuen ospea, ez bakarrik bere konposizioengatik, baita orkestra-zuzendari eta film eta telebistarako musika-moldatzaile bezala ere. 21-22 Denboraldiko azken Miramongo Matinéea itxiko duen lan hau Berlingo Filarmonikako Haize Boskotearen enkargua izan zen.
Sarrera solteak (10€) salgai daude euskadikoorkestra.eus webgunean eta Kursaal Auditoriumeko leihatilan. Gainera, leku librerik geratuko balitz, orkestraren egoitzako leihatilan bertan eros ahal izango lirateke kontzertuaren egunean.
Miramongo Matinéetara eroso joateko, Euskadiko Orkestrak doako autobus-zerbitzua eskainiko dio kontzertua ikustera doazen abonatuei. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.
Miramongo Matinéeek Kutxa Fundazioaren babesa dute sortu zirenetik.
Pinchas Zukerman ospetsuak amaituko du Euskadiko Orkestraren Kontzertu Denboraldia
Zukerman, biolinaren eta biolaren nazioarteko izarretako bat, duela berrogeita hamar urtetik jardunean dabilena, Bartoken ‘Biolarako kontzertua’ interpretatzen arituko da Euskadiko Orkestraren Denboraldiko azken programan. Robert Treviñok zuzenduko dituen kontzertuok Erromantizismoan errotutako bi obrekin osatuko dira: Wagnerren ‘Lohengrin’ operaren lehen ekitaldiaren preludioa eta Elgarren ‘1. Sinfonia’ entzutetsua.
Ekainaren 2tik 8ra Donostian, Iruñean, Gasteizen eta Bilbon izango diren kontzertu guztietarako salgai daude sarrerak.
Euskadiko Orkestra 21/22 Kontzertu Denboraldiaren amaierara iritsi da azken programarekin, Robert Treviñok zuzendua eta Elgar + Bartok / Wagner izenekoa, ohiko lau hiriburuetan: ostegun eta ostiralean, ekainak 2 eta 3, Donostiako Kursaal Auditoriumean; astelehenean, ekainak 6, Iruñeko Baluarte Auditoriumean; asteartean, ekainak 7, Gasteizko Principal Antzokian; eta asteazkenean, ekainak 8, Bilboko Euskalduna Jauregian. Kontzertu guztiak 19:30ean izango dira.
Pinchas Zukerman izango da azken kontzertu-programa honetako protagonista nagusia. Israeldarrak XX. mendeko musikari onenetako askorekin batera jo du. Harreman bereziki estua izan zuen Zubin Mehta, Daniel Barenboim, Jacqueline du Pre eta beste artista batzuekin. Bere diskografia egundokoa da; ehun obra baino gehiago grabatu ditu eta bi Grammy sari irabazi ditu. Kontzertuotan interpretatuko duen Bela Bartoken Biolarako kontzertua 1990ean grabatu zuen eta, askoren ustez, erreferentziako bertsioa da. Nahiko lan polemikoa da, egilea amaitu aurretik hil baitzen, eta Tibor Serly bere lagunak osatu baitzuen. Bartokek utzitako zirriborro eta materialen artean nabigatu behar izan zuen, eta hil aurretik dena ondo lotuta utzi zuela aldarrikatu zuen arren, zenbaitek uste dute Serlyk obran utzi zuela bere arrastoa. Nolanahi ere, kontzertu handia da, energiaz betea, Hungariako folkloreari keinu asko egiten dizkiona, bakarlariarentzat oso zaila eta kolorez betetako orkestra erabiltzen duena.
Bartoken Biolarako kontzertuarekin batera, Erromantizismoan sakon errotutako bi obra interpretatuko ditu Euskadiko Orkestrak.
Orkestrak Richard Wagnerren Lohengrin operaren lehen ekitaldiko ‘Preludioa’ interpretatuko du. Funtsezko opera da, Wagnerrek opera erromantiko tradizionaletik drama musikalerako trantsizioa markatu zuelako obra honekin. 1848an amaitu zuen alemaniarrak, Europak urte hartan bizi izan zituen konbultsio eta iraultzen erdian, non Wagner ere tartean izan zen. Horren ondorioz Suitzara ihes egin zuenean, Wagnerrek Franz Liszti opera estreinatzeko eskatu zion, eta honek 38 musikariko orkestra txiki batekin egin zuen. Gau hartan, Weimarren, Wagnerren mito eta mirespena hasi zen.
Kontzertuak Edward Elgarren 1. Sinfoniarekin biribilduko dira. Hainbat eta hainbat maisulanek ez bezala, zeinek hasieran osperik jaso ez baitzuten, sinfonia paregabe honek estreinaldi arrakastatsua izan zuen, musika klasikoaren historiako arrakastatsuenetakoa: estreinatu eta lehenengo urtean laurogei aldiz baino gehiago interpretatu zen munduko sei herrialdetan.
Sarrerak salgai daude saio guztietarako euskadikoorkestra.eus-en, baita auditorioen webgune eta leihatiletan ere, 10 eurotik 35 eurora.
Euskadiko Orkestrak Musikasteren 50. edizioa itxiko du larunbat honetan
Errenteriako jaialdiaren amaiera-kontzertua larunbatean izango da, maiatzak 28, 19:00etan Lekuona Fabrikan, eta Andra Mari Abesbatzaren parte-hartzea izango du.
Musikaste, Euskal Musikaren Astea, 50. edizioa eskaintzen ari da egunotan Errenterian. Jaialdia urrezko ezteiak ospatzen ari da, eta ospakizuna mugarri garrantzitsua da antolatzaile den Eresbilentzat. Aurtengo edizioaren ezaugarriak dira kontzertuak egiteko programatutako obren kalitatea, deitutako interpreteak eta berrogeita hamargarren urteurrenaren ospakizun bera.
Euskadiko Orkestrak euskal musikaren ekoizpenaren hedapenean ekarpena egiten jarraitu nahi du, eta euskal interpreteei bultzada emateko plataforma izaten ere jarraitu nahi du, hortaz, aurtengo edizioan ere parte hartuko du jaialdi honetan. Hogeita bosgarren parte-hartzea izango du orkestrak Musikasten.
Larunbat honetan, maiatzak 28, 19:00etan Lekuona Fabrikan izango den amaiera-kontzertuan, orkestra izango da Andra Mari Abesbatzarekin batera musikaz betetako aste honi bukaera bikaina emateaz arduratuko dena. Kontzertu hau Euskadiko Orkestraren zuzendari elkartu Jaume Santonjak zuzenduko du, eta berak eramango ditu atriletara Carmelo Bernaola, Valentin Zubiaurre, Aita Donostia, Francisco Escudero, Saskia Venegas, Pedro Sanjuan eta Pablo Sorozabal.
Auskalo Quartet taldea izango da larunbat honetako Miramongo Matinéearen protagonista
Euskadiko Orkestrako musikariz osatutako laukoteak Haydn eta Schumannen obrak interpretatuko ditu larunbat honetan, maiatzak 21, 11:00etan, Miramongo Auditoriumean, eta sarrerak 10 eurotan daude salgai.
Miramongo Matinéeak 21/22 Denboraldiaren amaierara gerturatzen ari dira azken-aurreko hitzorduarekin, kasu honetan Auskalo Quartet taldeak eskainiko duena, ‘Schumann eta txoria’ izenburupean, larunbat honetan, maiatzak 21, 11:00etan, Euskadiko Orkestraren Miramongo egoitzan. Honako musikariek osatzen dute taldea: Larraitz Oiartzabal (biolina), Laura Balboa (biolina), Maite Abasolo (biola) eta Gabriel Mesado (biolontxeloa).
Joseph Haydnek opus 33 katalogaziopean 1781ean idatzi zituen harirako sei kuartetoetako batekin abiatuko du Miramongo Matinéea Auskalo Quartetek. Harirako 3. kuartetoaz dihardugu, ‘Txoria’ ezizenarekin ezagutzen dena, obrako zenbait doinuk hegaztien kantua gogorarazten dutelako. Lau mugimendu ditu, non Haydnek elementu kultuak eta herrikoiak, mugimendu azkarrak eta geldoak konbinatu zituen, umorea eta sorpresa praktikatuz eta entzuleari ‘keinu’ eginez. Obra honek oihartzun handia izan zuen garaiko konpositoreen artean opus bereko beste kuartetoekin batera. Izan ere, kuarteto multzoa nahiko imitatua izan zen bere originaltasunagatik eta genero bereko obren oinarriak ezarri zituen. Horren adibiderik argiena da argitaratu eta lau urtera, 1785ean, Mozartek sei Haydn kuartetoak konposatu zituela, lan horien aintzatespen gisara.
Robert Schumannek, bere aldetik, genero bakar bati bete-betean dedikatzeko ohitura zuen eta, 1842an, ganbera-musikari eskaini zion urtean, idatzi zuen Auskalo Quartetek Matinéean interpretatuko duen bigarren lana: Harirako 3. kuartetoa. Urte berekoak dira, baita ere, bere beste bi harirako kuarteto bakarrak, pianodun kinteto bat eta pianodun kuarteto bat. Haydn, Mozart eta Beethovenen lan homologoak ondo aztertu ondoren idatzi zituen Schumannek bere kuartetoak. Zehazki, hirugarren kuarteto hau bi astetan idatzi zuen, eta urte horretako irailaren 13an interpretatu zuten lehen aldiz Clara Schumann emaztearentzat urtebetetze-opari gisa. 1843an argitaratu zen eta Felix Mendelssohni eskaini zion. Egiturari dagokionez, lau mugimendu kontrastatzaile ditu eta eduki musikal oso aberatsa du. Nostalgiaz betea, logikagatik, ausardiagatik eta berritasunagatik nabarmentzen da kuartetoa.
Sarrera solteak (10€) salgai daude euskadikoorkestra.eus webgunean eta Kursaal Auditoriumeko leihatilan. Gainera, leku librerik geratuko balitz, orkestraren egoitzako leihatilan bertan eros ahal izango lirateke kontzertuaren egunean.
Miramongo Matinéetara eroso joateko, Euskadiko Orkestrak doako autobus-zerbitzua eskainiko dio kontzertua ikustera doazen abonatuei. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.
Miramongo Matinéeek Kutxa Fundazioaren babesa dute sortu zirenetik.
2022-2023 Denboraldia: Tragedia gainditzea
Euskadiko Orkestraren Denboraldi berriak tragediatik hura gainditzera garamatza musikaren eta haren adibide handien bitartez: Xostakovitxen gordintasuna, Txaikovskiren mamuak, Brucknerren sinfoniarik handiena edota Carl Orffen lanik ospetsuena.
Orkestrak pandemian bertan behera utzitako egitasmoak berreskuratuko ditu; Carpenterren ‘Mamu kantak’ lanaren estreinaldia esaterako, hiru orkestra britainiarrekin batera agindutako lana.
Euskal Herriko sorkuntzak ere hartuko du garrantzia Ramon Lazkanori agindutako ‘Mare Marginis’ lanaren estreinaldiari esker, bai eta ‘Elkano: Mundubira musika bidelagun’ proiektuaren amaierarekin –Zuriñe F. Gerenabarrenaren ‘Lorratz’ lanaren bitartez–, munduari gure konpositoreen iruditeriaren bitartez bira egin ondoren.
Euskadiko Orkestrak oso gutxitan interpretatutako lan bitxiak, entzutea merezi dutenak, ezagutaraztea bultzatuko du, orobat, hala nola Adamsen ‘Doctor Atomic Symphony’ lana, bai eta Euskal Herrian oso ezagunak ez diren Veprik eta Dzenitis musikagileen lanak ere, besteak beste.
Asmo hori bete nahian, sona handiko artistak egongo dira gurekin: Alexei Volodin, Alena Baeva, Yulianna Avdeeva, Dinis Sousa, Roderick Cox eta Frank Peter Zimmermann, adibidez. Bai eta gure lurraldeko artista handi batzuk ere, hala nola Donostiako Orfeoia –haren 125. urteurrenean–, Easo Gazte eta Easo Eskolania, Carlos Mena eta Jone Martínez sopranoa.
Robert Treviñok Euskadiko Orkestraren zuzendari titular izaten jarraituko du.
Abonu Denboraldiko programazioa
Arte-sorkuntzarako inspirazio-iturri arras handia izan da beti Historiaren bilakabidea. Baita musikarako ere; arimaren ispilu bihurtu baita maiz, zoritxarrarena eta tragedia gordinenarena, baina baita hura gainditzearen ispilu ere. Eta premisa horien gainean diseinatu eta eraiki da, hain zuzen ere, Kontzertu Denboraldi berriaren ardatza. Ezbeharrean oinarrituta nork bere burua hobetzearen gaineko kontakizunaz mintzo gara, eta hor musikak, arte gorena izanik, adibide bikainak eman ditu historian zehar; horietako batzuk izango ditugu gurekin 2022-2023 Denboraldian. Hizpide ditugu, hain zuzen ere, Xostakovitxek bere noten bitartez adierazten duen gordintasun –batzuetan ezkutatu– hori (8. Sinfonia), Txaikovskiren mamuak (4. Sinfonia), Brucknerren sinfoniarik handiena (8. Sinfonia) eta mundu osoan oraindik aditzen den Carl Orffen lanik ospetsuena (Carmina Burana) –Donostiako Orfeoiarekin batera haren 125. urteurrenean–.
Euskadiko Orkestraren 2022/2023 abonu-denboraldia irailaren 23an hasiko da Gasteizen, eta 2023ko ekainaren 9an amaituko da Donostian. Guztira 10 abonu-programa izango dira, Gasteizen (10), Bilboren (10), Donostiaren (10x2) eta Iruñearen (10) artean banatuta; orotara 50 kontzertu egongo dira, hortaz. Abonu-denboraldiari dagokionez bakarrik. Azaldu berri dugunari jarraikiz, Xostakovitxek 8. Sinfonian azaleratzen duen tragediak emango dio abiapuntua denboraldiari. Lan hori 1943. urtean sinatu zuen, eta Bigarren Mundu Gerran izandako milioika hildakoek eragin zioten zirrararen emaitza da. Xostakovitxek emango dio amaiera, halaber, 15. Sinfoniaren bidez; tragedia gainditzea begiztatzen da bertan, baikortasuna baitario 1971n idatzitako lanari.
Denboraldi honetan errealismo- eta ezbehar-dosi eskergak daude, baita, halere, haien gainditzea, baikortasuna, energia eta grina ere.
Robert Treviñok jarraituko du zuzendari titular
2021-2022 Denboraldia amaituta, Robert Treviñok zuzendari titular gisako bosgarren eta azken denboraldia amaitu du. Orkestrak azken urteotan lortu dituen emaitza artistiko handiak eta kritikaren babes orokorra direla-eta, haren titulartasunari jarraipena eman eta hura luzatzea erabaki da, hura amaitzeko egunik zehaztu gabe.
Orkestraren zuzendari titularrak bere gain hartuko ditu Denboraldiko hamar programetatik lau. Denboraldiko lanik sinbolikoenetako batzuk zuzenduko ditu, Xostakovitxen 8. Sinfonia eta 15. Sinfonia kasu, Denboraldiari hasiera eta amaiera ematekoak, hurrenez hurren. Baita Brucknerren Zortzigarrena, katedral sinfonikoetan nagusitzat hartua, eta Mahlerren Bosgarrena, beste gainditze-istorio bat bihurtua, ere. Hura arduratuko da, orobat, Zuriñe F. Gerenabarrena (Lorratz) eta Ramon Lazkano (Mare Marginis) euskal musikagileen estreinaldiez; Alexandre Tharaud pianojolea bakarlari arituko da bigarrenean.
Estreinaldi partekatuak eta errepertorio berria
Gary Carpenterren Mamu kantak (Ghost Songs) Erresuma Batuko hiru orkestrak (Royal Scottish National Orchestra, City of Birmingham Symphony Orchestra eta Royal Liverpool Philharmonic Orchestra) eta Euskadiko Orkestrak agindutako lan bat da, azken biek Robert Treviñoren bitartez duten harremanaren emaitza. Partiturak Marion Angus poetaren testu batzuk ditu, eta, euskaratuta, EASO Gaztek eta EASO Eskolaniak kantatuko dituzte.
Mare Marginis da Ramon Lazkanok ondutako pianorako kontzertuaren izena. Radio Francek, Euskadiko Orkestrak eta WDR orkestrak (Koloniako Irratiaren Orkestra) batera agindutako lan bat da. Lan hori Radio Franceren 2023ko Présences jaialdian estreinatuko da otsailaren 11n, François-Xavier Rothek zuzendutako Frantziako Orkestra Nazionalarekin. Astebete geroago Euskadiko Orkestrak joko du eta, maiatzaren 20an, berriz, WDR orkestrak aurkeztuko du.
Denboraldiko hirugarren erabateko estreinaldia Zuriñe F. Gerenabarrena gasteiztarraren Lorratz lana izango da, Elkano: Mundubira musika bidelagun proiektuaren barruan. Mikel Chamizoren, Mikel Urquizaren, Joel Merahren eta Teresa Catalanen ondotik, Gerenabarrenak emango dio amaiera lehen mundubiraren oroitzapena gure musikagileen iruditeriaren bitartez egiteko ekimenari.
Estreinaldiez gain, orkestrak lehen aldiz interpretatuko ditu hamar lan gehiago, eta errepertoriora gehituko ditu horrenbestez. Entzuleek aurkikuntza handia ere egin ahal izango dute interpretazio horiei esker. Haietako bi nabarmentzen dira oroz gain: batetik, Doctor Atomic Symphony (John Adams), zeinak begirada etsia erakusten baitu Mexiko Berriko Los Alamos en Bigarren Mundu Gerran lehen bonba atomikoaren lehenengo proba prestatzen ari zirenek pairatutako estresaren, larritasunaren eta minaren aurrean, eta, bestetik, 2 poèmes (Alexander Veprik). Musikagile errusiar hori Gulagera bidali zuten 1950etik 1954ra arte nazionalista judua izatea egotzita; askatu zutenean, hiltzear zegoelarik, bi poema horiek idatzi zituen.
Errepertorio berri horrekin batera orkestrak honako lan hauek ere joko ditu: Biolinerako 2. kontzertua (Xostakovitx), Alena Baevak interpretatuta; Biolinerako kontzertua (Elgar), Frank Peter Zimmermann biolinjolearekin; Biolontxelorako kontzertua (Korngold), Anne Gastinel biolontxelistarekin; eta Pianorako 2. kontzertua (Chopin), Yulianna Avdeevaren eskutik. Beethovenen eta Mahlerren Bosgarrenak ere egongo dira kantoreetan eta, guztira, 28 lanek osatuko dute kontzertuen denboraldi berria.
Zuzendariak, bakarlariak eta abesbatzak
Orkestrak hainbat artista hartuko ditu berriz ere bere programazioan, baina nabarmentzekoa da hark bakarrik helduko diela hiru programari, bakarlari gonbidaturik gabe; interpretazio-protagonismo handia izango du, beraz, haiei esker.
ZUZENDARIAK: Robert Treviñok hasiera eta amaiera emango dio Kontzertu Denboraldiari, eta lau programa jorratuko ditu guztira. Gainerako programetan honako hauen artean banatuko da podiuma: Roberto Fores, Dinis Sousa, Roderick Cox, Christoph-Mathias Mueller eta Karel Mark Chichon; lehen aldiz arituko dira guztiak Euskadiko Orkestra zuzentzen. Zuzendarien zerrenda osatuko du, halaber, Pablo Gonzalez espainiarrak.
BAKARLARIAK: Atal honetan lehen aldiz hartuko ditugu Alexandre Tharaud (pianoa) eta Anne Gastinel (biolontxeloa). Berriz gurekin egongo dira Alexei Volodin eta Yulianna Avdeeva (pianoa), bai eta Alena Baeva eta Frank Peter Zimmermann (biolina) ere. Ahotsei dagokienez, lehenik Jone Martinez arituko da, eta, haren ondotik, Carlos Mena tenorra eta Javier Franco baritonoa. Hiru solista horiek abestuko dute, Donostiako Orfeoiarekin batera, Carl Orffen Carmina Burana.
ABESBATZAK: Jaialdi eta abarretako emanaldi batzuetan batera aritu bagara ere, abonu-denboraldian lehen aldiz hartuko ditugu Easo Gazte eta Easo Eskolania. Ghost Songs lanaren euskarazko bertsioaren estreinaldiaz arduratuko dira: Mamu Kantak. Donostiako Orfeoiak, haren 125. urteurrenean, orkestrarekin batera interpretatuko du Carmina Burana lana.
Orkestraren beste jarduera batzuk
Poloniako bira
Euskadiko Orkestra 2020ko martxoaren 9an atera zen azkenekoz nazioartera, erabateko itxialdia baino lehentxeago. Iaz bertan behera utzi behar izan zuen Salzburgorako bidaia, Austriaren ustekabeko itxialdiaren ondorioz, eta kontzertu horiek 2024ko otsailerako geroratu ziren. Baina, hori baino lehen, Beethoven Jaialdiaren gonbidapenaren berri eman behar dugu. Polonian egiten da jaialdi hori, eta 2023ko martxoan joango da hara orkestra. Bira horretan hiri hauek daude: Krakovia, Varsovia, Katowice eta Wroclaw.
Grabazioak
Kontzertu-jarduera biziarekin batera, asmo handiko grabazio-proiektu batean murgilduta dago orkestra. Denboraldi honetan Maurice Ravelen orkestra-lanen bigarren bolumena nabarmenduko da. Euskadiko Orkestrak Ondine diskoetxearekin eta Robert Treviño zuzendariarekin hasitako bideari jarraituko dio. Ravel eta Americascapes egin ondotik –zeinak oso kritika onak eta sariak jasotzen ari baitira oraindik izenik handieneko hedabide espezializatuen aldetik (Gramophone, France Musique, BBC Music Magazine, Diapason, The New Yorker…)–, bigarren Ravel bat baieztatuta dago. Grabazioa erregistratuta dago jada, eta udaren bururako dago aurreikusia nazioartean kaleratzea.
Proiektu partekatuak
Orkestrak eutsi egingo die aurretik zituen konpromisoei, hala nola ABAO Bilbao Operaren denboraldiarekin, Bilboko Musika-Músicarekin, BBVA Fundazioaren Ezagutzaren Mugak Sarien galarekin, Donostiako Musika Hamabostaldiarekin eta Musikasterekin. Eta atzera egingo du, pandemiaren ondorioz bi urte bertan behera utzi ondotik, belodromoan Donostia Zinemaldiaren eskutik egin ohi duen soinu-banden kontzertua. Konpromisoetara zita berriak gehitu ditu, halaber: Viralgen, Donostiako Orfeoiaren bazkideen kontzertua, EITBren 40. urteurrena eta El Diario Vascoren Eguberrietako kontzertua.
Miramongo Matinéeak eta Musika Gela zikloak, berriz, geroago aurkeztuko dira.
Abonuak eta sarrerak
Abonuak salgai ekainaren 15etik aurrera
Ikusle-kopuruaren murrizketak kenduta, heldu ahal diogu Kontzertu Denboraldirako abonu berrien kudeaketari. Oraingo abonatuak berritzeko aldiaren ondotik, abonu berriak salgai jarriko dira ekainaren 15etik aurrera. Erreserba helbide honen bidez egin daiteke: ABONATU ZAITEZ. Abonuak eskaera jaso ahala kudeatuko dira. Abonuek 80 eurotik 235 eurora arteko salneurria dute 10 kontzerturako.
Sarrera solteak salgai irailaren 1etik aurrera
Sarrera guztiak salgai egongo dira irailaren 1etik aurrera euskadikoorkestra.eus helbidean, bai eta auditoriumen webguneetan eta txarteldegietan ere.
Mezenasgoa
Euskadiko Orkestrak, gizartean oso beharrezkoa den kultura-tresna delako uste osoa izanik, ikusleekin lotura izateko tresna berri bat abiarazi du mezenasgoaren bitartez. Hori horrela, herri-proiektu kultural honen garapena lagundu nahi duten pertsonek aukera izango dute beren ekarpenen bitartez hala egiteko.
Mezenasgoa etorkizuneko tresna beharrezko bat da, administrazio publikoek diruz laguntzeko politiken osagarria, eta kultura eta gizartea laguntzeko eta garatzeko bitarteko bilakatuko da aurrerantzean. Orkestrari egindako ekarpenek, haien modalitatea dena dela, kenkari fiskalerako aukera emango dute. Informazio gehiago hemen: euskadikoorkestra.eus
Esker onak
Azkenik, orkestrak bere jardueren garapenean parte hartzen duten erakunde guztien laguntza eta babesa eskertu nahi du: abonatuei eta ikusleei oro har, erakunde babesle eta laguntzaileei, kultur eragileei, hedabideei eta abarrei, Euskadiko Orkestraren jarduera ahalbidetzen baitute.
Informazio gehiago
Denboraldiaren irudia (.jpg)Prentsaurrekoaren argazkia (.jpg)Denboraldiaren aurrerapena (.pdf)Prentsa-txostena euskaraz (.pdf)22/23 Denboraldiaren programazioa (.pdf)22-23 Denboraldiko spotaPrentsaurreko osoa ikusi YouTuben (jatorrizko bertsioan)Prentsaurreko osoa ikusi YouTuben (itzulpenarekin)Teresa Catalanen obra baten estreinaldia eta Asier Polo biolontxelojole bilbotarra izango dira Euskadiko Orkestraren kontzertu-programa berriaren protagonistak
Kontzertu-programa berri honek oso obra ezagun bat, Asier Polok interpretatuko duen Elgarren ‘Biolontxelorako kontzertua’, bi obraren deskubrimenduarekin uztartuko du: Teresa Catalanen ‘La Victoria Vacía’, Elkano proiektuaren baitakoa; eta Henri Dutilleuxen ‘1. Sinfonia’, XX. Mendeko funtsezko egilea, bere musika oso sarri interpretatzen ez bada ere.
Maiatzaren 13tik 20ra Bilbon, Donostian, Iruñean eta Gasteizen izango diren kontzertu guztietarako salgai daude sarrerak.
Mahlerren 2. Sinfonia, ‘Berpizkundea’-ren interpretazioan izandako arrakasta handiaren ostean, Euskadiko Orkestrak Denboraldiko azken-aurreko kontzertu-programa aurkezten du, Dutilleux + Elgar/Catalán izenekoa, ohiko lau hiriburuetan: ostiralean, maiatzak 13, Bilboko Euskalduna Jauregian; astelehen eta asteartean, maiatzak 16 eta 17, Donostiako Kursaal Auditoriumean; ostegunean, maiatzak 19, Iruñeko Baluarte Auditoriumean; eta ostiralean, maiatzak 20, Gasteizko Principal Antzokian. Kontzertu guztiak 19:30ean izango dira.
Kontzertu-programa Teresa Catalanen La Victoria Vacía obraren estreinaldiarekin hasiko da, eta eskaintza honekin ekiten dio konpositoreak partiturari: «Orduan itzuli ez zirenei eta orain joan direnei». Elkano: Mundubira musika bidelagun proiektuaren laugarren kapituluaren obra da. Proiektua 2019an hasi zen, munduari egindako lehen biraren 500. urteurrena oroitzeko, eta ordutik hainbat geldialdi egin dira abentura horretan, Mikel Chamizo, Mikel Urquiza eta Joel Merah konpositoreen eskutik. Egun hauetan, baina 1522an, Espainiara itzultzeko bidean zegoen Elkano; India eta Afrika inguratu zituen eta, beraz, Portugalgo urak ere zeharkatu zituen. Harrapatu egingo ote zituzten beldurrez, Getariako itsasgizonak Victoria itsasontzia aurretik inoiz egon gabeko latitude australetara eraman zuen, eta nabigazioa amesgaizto bihurtu zuen itsaso arriskutsu batean barneratu ziren. Elkanok etxera itzultzea lortu zuen, baina eskifaiaren zati handi bat infernuko bidaia horretan hil zen, gaixotasunen, nekearen eta hornidura faltaren ondorioz. Eta, hain zuzen ere, errealitate gazi-gozo horren gainean ezarri nahi izan du Teresa Catalanek bere sorkuntza. Bere hitzetan, «Elkanok lehen globalizazioa hasi zuen, baina pertsona askoren heriotzaren kontura, eta horrek justifikatzen du obraren eskaintza. Gaur egun, globalizazioa burututa, pandemia batek milioika pertsonari eragiten die, eta asko eta asko ari dira berriro desagertzen. Gogoeta horretatik abiatuta, egoera zailetan desagertu zirenak eta desagertzen ari direnak omentzen ditut».
Obra honek SGAE Fundazioaren eta AEOSen babesa dauka, ‘Incentivos a la Creación Musical’ programaren baitan. Elkanoren bidaiaren amaierari Zuriñe F. Gerenabarrena konpositore arabarrak jarriko dio musika udazkenean.
Duela egun batzuk Humanitateak, Kultura, Arteak eta Gizarte Zientzien Saria eman zion Eusko Ikaskuntzak Teresa Catalani. Konpositore nafarra musika sinfoniko garaikidearen sortzailea da duela berrogei urte baino gehiagotik. Besteak beste, 2017an Musikaren Sari Nazionala jaso zuen, eta 2021ean Nafarroako Gobernuaren Kulturaren Vianako Printzea Saria eta Espainiako Gobernuaren Arte Ederren Urrezko Domina.
Haren ondotik etorriko da Musikaren Sari Nazionala jasotako beste bat, Asier Polo biolontxelista. 21 urte zituela orkestra batekin solista gisa lehendabizikoz aritu zenean intepretatu zuen eta ordutik beti bidelagun izan duen obra interpretatuko du: Edward Elgarren Biolontxelorako kontzertua. Errepertorio britainiarreko kontzerturik ezagunenetako bat dugu, intentsitate emozional handikoa, lirismo gartsua eta intimismo ia mistikoa uztartzen dituela.
Kontzertuak amaitzeko, Robert Treviñok XX. mendeko bigarren zatiko sinfonia frantses ezagun bat zuzenduko du: Henri Dutilleuxen 1. Sinfonia. Lan horrek egileari ospea eman zion nazioartean, eta haren bidez hasi zen tinbre-fintasun paregabeko bere soinu-unibertso berezia taxutzen.
Sarrerak salgai daude saio guztietarako euskadikoorkestra.eus-en, baita auditorioen webgune eta leihatiletan ere, 10 eurotik 35 eurora.