Euskadiko Orkestra Cirkus Euskadiko Orkestraren Musika Gela hezkuntza-zikloaren baitako ekoizpena da, eta azaroaren erdialdean estreinatu zen orkestraren Miramongo egoitzan dozena bat Eskola Kontzertutan.

Aste honetan, 3 eta 6 urte bitarteko haurrei zuzendutako ekoizpen hau, zirkuaren magiari lotutako musikarekin alaitasun eta fantasiazko eztanda bat proposatzen duena, Donostian (Kursaalen, urtarrilaren 29an, 18:00etan) eta Gasteizen (Garcia Lorca Antzokian, urtarrilaren 30ean, 17:00etan eta 18:30ean) eskaini behar zitzaien familiei hasiera batean. Gasteizko hitzordua, Gasteizko Udalarekin koprodukzioan antolatua, aurreikusitakoaren arabera mantenduko da; hala ere, Donostiako kontzertua, Kursaal Eszenarekin koprodukzioan antolatua, atzeratu egin behar izan da, gaur egungo osasun-egoerak edukierari nabarmen eragin diolako. Kursaaleko data berria martxoaren 19an izango da, 18:00etan, ganbera-aretoan.

Donostiako kasuan, hasiera batean iragarri zen datarako erositako sarrera guztiak baliagarriak izango dira data berrirako, inolako aldaketarik egin beharrik gabe. Hala ere, euren sarreren zenbatekoa itzultzeko eskatu nahi duten lagunek kursaaleszena@kursaal.eus email helbidera idatziz egin dezakete euren eskaria (itzulketa-eskariak otsailaren 25a baino lehen egin beharko dira). Sentitzen ditugu atzerapen honek sor ditzaken eragozpenak.

Informazio gehiago

Denboraldi honetako Miramongo Matinéeen zazpigarren hitzordua, Gabonetako etenaldiaren ondorengo urteko lehena, larunbat honetan izango da, urtarrilak 15, 11:00etan, orkestraren egoitzan, eta ARAH taldea izango du protagonista. Ganbera-musikariak eta dantzariak biltzen dituen talde honek Bazen Behin izeneko ikuskizuna eskainiko du, Garazi Zabaleta konpositore eta pianistak idatzi eta/edo moldatutako obrekin. Zabaleta bera Miramongo Matinée honetan pianoaren buru jarriko da eta ikuskizun honen sorkuntza-prozesua eta obrak azalduko ditu.

Zabaletak Euskadiko Orkestrako kide diren musikariek osatzen duten ganbera-boskotea izango du alboan: Sara Zufiaurre (klarinetea eta klarinete baxua), Gabriel Mesado (biolontxeloa), Delphine Dupuy (biola), Raquel Cortinas (bigarren biolina) eta Larraitz Oiartzabal (lehen biolina). Euskadiko Orkestrako perkusiojole Igor Arostegik, Arantxa Gastesi pianistak eta Garazi Etxaburu eta Miren Lizeaga dantzariek ere parte hartuko dute ikuskizunean.

Emanaldi honek euskal tradizioa abangoardiara ekartzeaz gain obra berriak aurkeztea du helburu, eta sorkuntza-prozesua aldarrikatzea. Hein handi batean, euskal kultura josi duten musika-obren moldaketan oinarritzen da ikuskizuna. Tradizioaren elementuak abiapuntu hartzen ditu eta dantza garaikidearekin eta perkusioarekin fusionatzen.

‘Bazen behin’ tituluak oso antzinako iragana gogora ekartzeko haurtzaroko ipuinetan erabili izan den esamolde herrikoiari erantzuten dio. Horrela, ARAHren ideia kultur tradiziotik abiatuta fikzio bat sortzea da; orainetik abiatu eta entzuleak bere soinu-paisaien mugetarainoko bidaia moduko bat izango da, norberaren memoria adierazlearen, oroitzapenen, bidez. Kontua da, beraz, herri-kantak gehiago arakatzea, nolabaiteko berrikuntzaz bustitzea, eta sustraiak begirunez tratatzea.

Hasiera batean, Miramongo Matinée hau Euskadiko Orkestra Quartetek eskaini behar zuen, baina kideetako batek positibo eman du Covid-19n eta, ondorioz, azken orduko ordezkapena bilatu behar izan da.

Pandemiaren ondorioz edukiera-murrizketak daudenez, ez da Matinée honetarako sarreren salmentarik izango.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio kontzertua ikustera doazen abonatuei. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

Urtarrilean Donostian egitekoa zen Living Room Music produkzioa bertan behera utzi da pandemiaren ondoriozko murrizketengatik. Dozena bat Eskola Kontzertu, bi Musika Familian kontzertu eta Miramongo Matinée bat geratu dira bertan behera.

Une honetako egoerak ez du ahalbidetzen Eskola Kontzertuak segurtasun nahikoarekin gauzatzea, izan ere, Miramonetik 4.300 ikasle ziren igarotzekoak datozen egunotan, eta hori ezinezkoa da une honetako egoera ikusita. Hortaz, produkzioaren ardatz nagusia direnez gero Eskola Kontzertuok eta antolakuntza-baliabide asko eskatzen dituen proiektua denez gero, Living Room Music-eko ekintza guztiak 2022 urte amaierara atzeratzea erabaki du Euskadiko Orkestrak. Musika Familian kontzertuetarako sarrerak erosi dituztenei diru guztia itzuliko zaie.

Miramongo Matinéeen urtarrilaren 29ko 11:00etako hitzordua gorde egingo da, baina programa guztiz berriarekin. Living Room Music bertan behera utzi ondoren, Easo Abesbatzak hartuko du Matinée honen gidaritza Romantik izeneko kontzertu batekin. Elgar, Brahms eta Mendelssohnen obrek osatuko dute Matinée berriaren egitaraua.

Musika Gelako gainontzeko kontzertuak mantendu egingo dira

Living Room Music bertan behera geratu bada ere, Euskadiko Orkestrak bere horretan mantenduko ditu Musika Gelaren Denboraldi honetako veste bi ekoizpenak: Euskadiko Orkestra Cirkus, zeina, azaroan Eskola Kontzertu formatuan aurkeztu ostean orain Musika Familian kontzertu gisa eskainiko den Donostian (urtarrilaren 29an) eta Gasteizen (urtarrilaren 30ean); eta Botadun katua, martxo amaieran Donostian Eskola Kontzertuak izango dituena eta apirilaren 10ean Musika Familian kontzertua Gasteizen.

Gasteizen urtarril eta apirila bitartean antolatutako Musika Familian kontzertuak gaur aurkeztu dira prentsaurrekoan. Informazio guztia hemen.

Informazio gehiago

Musika Gela hezkuntza-zikloaren barruan, urtarriletik apirilera bitartean Euskadiko Orkestrak bi ekoizpen estreinatuko ditu Gasteizen, Musika Familian formatuan: Euskadiko Orkestra Cirkus eta Botadun katua.

Euskadiko Orkestra Cirkus, 3 eta 6 urte bitarteko haurrei zuzendua, azaroan orkestraren egoitzan estreinatu zen dozena bat Eskola Kontzertutan, eta orain Gasteizen familiei irekiko zaie bi kontzerturekin urtarrilaren 30ean (17:00 eta 18:30) Garcia Lorca Antzokian. Alaitasun eta fantasiazko eztanda izango da, musika dibertigarrien eta zirkuaren magiaren bidez.

Botadun katua, 6 eta 10 urte bitarteko haurrei zuzendua, Per Poc txotxongilo-taldearen ekoizpena da, lehen aldiz euskaraz eskaintzen dena, eta Gasteizko kontzertua apirilaren 10ean izango da (18:00) Principal Antzokian. Perraulten Botadun katua lanean oinarritzen da; literatura unibertsaleko klasiko honek Luis XIV.aren gorteko giroan murgilduko gaitu ikuskizun bisual eta poetiko baten bidez.

Euskadiko Orkestrak haur eta gazteei eskaintzen dizkien jardueren artean, ibilbide luze eta finkatuena duen atala Musika Familian kontzertuena da. Haurrek familiekin gozatzeko kultur aisialdiko eskaintza honek 25 urte daramatza orkestraren egitarauan. Gasteizko kontzertuek Gasteizko Udalaren Antzoki Sarearen lankidetza dute.

Bi ekoizpen hauetarako sarrerek 6 euroko prezioa dute eta euskadikoorkestra.eus eta principalantzokia.org webguneen bidez eros daitezke, baita 945161045 telefono-zenbakira deituz eta Principal Antzokiko leihatilan ere. Euskadiko Orkestra Cirkus-en kontzertu bikoitzerako sarrerak urtarrilaren 18tik aurrera jarriko dira salgai eta Botadun katua ikuskizunekoak urtarrilaren 28tik aurrera.

Jarraian Musika Familian kontzertuei buruzko informazio xehea aurki daiteke:

EUSKADIKO ORKESTRA CIRKUS
Urtarrilak 30
17:00 / 18:30
Garcia Lorca Antzokia
3 < 6 urte
40’

Jazza, musika herrikoia, aretoetako musika eta musika kultua nahasten dituzten XIX. mende amaierako eta XX. mende hasierako musiken bidez sortutako alaitasun eta fantasiazko eztanda bat da Euskadiko Orkestra Cirkus. Pieza txiki eta dibertigarriak, horien estiloaren adierazgarri bikainak direnak eta kolorez, exotismo melodiko eta tinbrikoz beterik daudenak. Kontzertu honen helburua gure entzule txikiei musikaren magia helaraztea da, zirkuaren magiari lotuz; clowna, ekilibristak eta surrealismoaren eta herrikoiaren artean dagoen musika. Hau guztia gure orkestrako musikariek osatutako talde instrumentalaren eta arte eszenikoetako beste kolaboratzaile batzuen bitartez sortua.

Interpreteak:
Itziar Prieto*, biolina
Didier Bousquet*, tronpeta
Amaia Zipitria, pianoa
‘Pituxa’ Itziar Saenz de Ojer, clowna
Irati Gonzalez Jaimerena, akrobaziak
Koldo Arakistain, akrobaziak
Mikel Cañada, gidoia
*Euskadiko Orkestrako kideak

Programa:
C. Debussy: Le petit nègre [5']
M. de Falla: Siete canciones populares españolas: El paño moruno, Nana [3']
E. Satie: Parade. Ragtime [2']
M. Ravel: Pavane pour une infante défunte, arreglo para violín y piano. Zatia / Fragmento [6']
E. Chabrier: 10 Pièces pittoresques. 6. Idylle [3']
I. Urbieta: Udaberrian kantuz [1']
E. Satie: Choses Vues à Droite et à Gauche (Sans Lunettes). II.- Fugue à tâtons [2']
M. de Falla: Siete canciones populares españolas: Canción [1']

BOTADUN KATUA
Apirilak 10
18:00
Principal Antzokia
6 < 10 urte
55’

Euskadiko Orkestrako talde instrumental barroko batek eta Per Poc txotxongilo-taldeak Botadun katua literatura unibertsalaren klasikoan oinarritutako ikuskizuna proposatzen dute, Luis XIV.aren gortean eta bere garaiko musikan murgiltzen gaituena. Kontzertu bisual eta poetikoa izango da, formatu handiko eta musika barrokoko antzerki victoriarrarekin, haur eta gazteek kulturalki garai distiratsu baten aberastasun musikala deskubritu dezaten. Per Poc taldearen ekoizpen hau lehendabizikoz eskainiko da euskaraz.

Interpreteak:
Euskadiko Orkestraren talde instrumentala
Per Poc, txotxongilo-taldea
Aarón Zapico, zuzendari artistikoa
Rakel Ezpeleta, narratzailea

Programa:
J.B. Lully
M. Marais
A. Vivaldi
G.P. Telemann
-en obrak

Living Room Music ekoizpena bertan behera Donostian

Musika Gela zikloaren Denboraldi honetan Gasteizen antolatutako kontzertu guztiak aurreikusi bezala gauzatu ahal izango diren arren, urtarrilean Donostian egitekoa zen Living Room Music produkzioa bertan behera utzi da pandemiaren ondoriozko murrizketengatik. Dozena bat Eskola Kontzertu, bi Musika Familian kontzertu eta Miramongo Matinée bat geratu dira bertan behera.

Une honetako egoerak ez du ahalbidetzen Eskola Kontzertuak segurtasun nahikoarekin gauzatzea, eta produkzioaren ardatz nagusia direnez gero eta antolakuntza-baliabide asko eskatzen dituen proiektua denez gero, Living Room Music-eko ekintza guztiak 2022 urte amaierara atzeratzea erabaki du Euskadiko Orkestrak.

Informazio gehiago hemen.

Musika Gela YouTuben

Musika Gelak atal propioa du Euskadiko Orkestraren YouTubeko kanalean, eta bertan zikloko ikuskizun osoak ikus daitezke, besteak beste, Mozart, Nannerl eta Lagunak, Ekomusik, Isiltasunaren haitzuloa eta laster aipatu berri dugun Living Room Music ere bai. Gainera, aurtengo Denboraldiko kontzertuen bideoak ere igoko dira bertara, ikuskizunak gauzatu ahala.

Informazio gehiago

Ravel eta Americascapes albumek jasotako kritika bikainen ondoren, Euskadiko Orkestra ‘Hileko orkestra’ bezala nabarmendu dute Gramophone musika klasikoko aldizkari ospetsuaren 2022ko urtarrileko edizioan. Andrew Mellorrek honako hau dio aipamen horretan: "Euskadiko Orkestra kalitatezko kontzertuak eskaintzeko baino zerbait gehiagorako existitzen da”, herrialde-orkestra gisa euskal kulturaren hedapen eta sustapenean jokatzen duen rolari erreferentzia eginez, eta gaineratu du: "Edozein dela ere bere DNA musikala, talde moderno eta moldakorra da". Horrela, Euskadiko Orkestra aintzatespen hau lortu duen Espainiako lehen taldea da.

Argitalpenak Euskadiko Orkestrak bere lurralde zabalean kontzertu ugari eskaintzeko egiten duen ahalegina nabarmentzen du, baita bertan duen publiko leiala eta euskal musikaren erregistro eta hedapenean egiten duen lana ere. Horrez gain, azpimarratzen du Euskadiko Orkestra izan zela “Europako lehenengo orkestretako bat pandemian eszenatokietara itzultzeko irtenbideak bilatzen”.

‘Hileko orkestra’-ren errekonozimendu hau, gainera, Robert Treviñoren zuzendaritzapean eta Ondine diskoetxearekin grabatutako bi disko arrakastatsuren argitalpenaren testuinguruan ulertu behar da. Lehenengoa Ravel izan zen, sona handiko argitalpenetan aipamen ugari lortu zituena: ‘Eguneko diskoa’ Radio France Musique-n; ‘Kritikaren hautaketa’ Record Geijutsu aldizkari japoniarrean; ‘Hileko grabazioa’ Australiako arte-aldizkari nagusi Limelight-en; ‘Asteko grabazioa’ Australiako ABC Classic irratian; eta ‘Musika klasikoko disko berri onenen’ artean jarri zuen Apple Music-ek. Azken asteotan Americascapes-ekin antzeko aintzatespen-uholdea iritsi da. Bereziki ezagunak ez diren konpositore estatubatuarren obrekin Robert Treviñok osatutako errepertorioa biltzen duen disko honek izendapen ugari izan ditu: ‘Editorearen hautaketa’ eta ‘Bereziki gomendatutako diskoa’ Gramophone-n; ‘Urteko grabazioa’ Presto Music-en; ‘Editorearen hautaketa’ Limelight-en; eta bost izar eman dizkio Classics-ek. The New Yorker-ek ‘bikain’-tzat jo du; eta MusicWeb International-ek aitortu du ‘2021eko musika klasikoko CD onenetako eta berezienetako bat’ dela.

Euskadiko Orkestraren zuzendari titular Robert Treviñoren hitzetan: "Gramophone-n editorearen hautaketa gisa izendatua izatea ohore handia da, eta orkestrak talde gisa errekonozimendua jasotzea zoragarria da benetan. Ordezkatzen duen nazioarentzat garrantzi handia duen orkestra da hau eta nik, gertutik ezagutzen dudanez, baieztatu dezaket nire musika-familian bihurtu dela pertsona-talde zoragarri hau. Azken bi album horiek gure arteko harreman bikain hori bere adierazpen gorenean erakutsi dute. Americascapes-ekin, estatubatuar gisa, orkestrari nire lurraldeko musika garrantzitsua eskaini nahi izan diot, zoritxarrez oso ezaguna ez dena. Eta orkestrak aukera eman dit Ravel, talde honen odolean dagoen konpositorea, hurbilagotik ezagutzeko. Poztasun osoz iragarri nahi dizuet, gainera, lehen disko arrakastatsu baten ondoren, Ravelen orkestra-lanen bigarren bilduma bat osatzeko grabazio-saioak egin ditugula eta orkestra eta ni lan hau publikoarekin partekatzeko irrikan gaudela".

Bestalde, Oriol Roch Euskadiko Orkestrako zuzendari nagusiak honako hau adierazi du: "Espainiako orkestrei ez zaie erraza egiten nazioarteko arreta lortzea eta, beraz, ez dugu arinki hartzen Gramophone eta beste hedabide batzuen aintzatespen zoragarri hauen ohorea. Inspirazio eta erabakitasun handiagoa izatera bultzatzen gaitu, baita horrelako garai zailetan ere, eta Euskal Herria munduaren aurrean ordezkatzera bultzatzen gaitu, ahal dugun ondoen musika ona interpretatuz".

Informazio gehiago

Lau hamarkada inguruko ibilbide oparoaren ondoren, 70 disko baino gehiagok osatzen dute Euskadiko Orkestraren disko propioen fonoteka, eta zabaldu eta aberastu besterik ez da egiten ari azken bolada honetan. Atzean uztear gauden 2021 honetan lau titulu berri gehitu zaizkio grabazio diskografikoen bilduma handi honi: Ravel, Americascapes, Kalakan+Euskadiko Orkestra eta Gutizia.

‘Ravel’ eta ‘Americascapes’, lehen grabazioak Robert Treviño titularrarekin

Euskadiko Orkestrak eta Robert Treviño zuzendari titularrak kontratu bat sinatu zuten duela bi urte Finlandiako Ondine Records diskoetxearekin eta, horren bidez, datozen urteetan hainbat disko grabatzea adostu zuten. Akordio garrantzitsu honen lehen emaitza aurten etorri da bi disko oso ezberdinen argitalpenarekin: Ravel eta Americascapes.

Alde batetik, urtearen lehen zatian Ravel argitaratu zen, Ziburun jaiotako konpositorearen obren bilduma bat. Euskadiko Orkestrak bere bezala aldarrikatzen du mundu osoan ezaguna den musikagilea. Hau da Treviñok Ravel grabatzen duen lehen aldia, ez ordea orkestrak, bere fonoteka zabalean 2000 urtean orduko titular Gilbert Vargarekin eta Joaquin Achucarrorekin grabatutako Ravelen beste monografiko bat baitauka. Grabazio hark Ravelen pianorako bi kontzertuak erregistratu zituen pianista bilbotarraren eskutik eta baita Alborada del gracioso lana ere, zeina oraingo grabazioan berreskuratu den La Valse, Boléro, Rapsodie Espagnole, Pavane pour une infante défunte eta Une barque sur l'océanekin batera.

Bestalde, bigarren grabaziorako, Americascapes, Robert Treviñok eta Euskadiko Orkestrak ospe handiko musika idatzi zuten baina ‘arrakasta’ handirik izan ez zuten lau konpositore estatubatuarren aldeko apustua egin dute: Charles Martin Loeffler, Henry Cowell, Carl Ruggles eta Howard Hanson. Horietatik gutxi ezagutzen diren lanak hautatu dira, zirkuitu handietatik urruntzen den errepertorio batean. Urriaren hasieran argitaratu zen album honek kritika bikainak jaso ditu mundu osoko argitalpen espezializatuen aldetik. Horietako batzuk nabarmentzearren, joan den astean musika klasikoko diskoak saltzen dituen nazioarteko atari garrantzitsuenetako batek, Presto Music-ek, 2021eko musika klasikoko hamar disko onenen zerrendara eraman zuen Americascapes; eta Gramophone eta Limelight aldizkari garrantzitsuek aipamen bereziak egin dituzte berriki.

Euskal tradizioa protagonista ‘Kalakan+Euskadiko Orkestra’ eta ‘Gutizia’-n

Euskadiko Orkestrak aurten publikatu dituen beste bi diskoetan euskal tradizioko errepertorioa berreskuratzean jarri du indarra.

Batetik, orkestra Kalakanekin aliatu da euskal tradizioko obrak biltzeko eta esparru sinfonikora eramateko, Jagoba Astiazaranen orkestrazio-lanari esker, Elkar diskoetxepean urrian argitaratutako disko honetan. Kalakan taldeak erabili ohi dituen hainbat instrumentu tradizionalek ere presentzia nabarmena dute, txalaparta, txirula edo alboka esaterako, zeintzuk beste instrumentuekin batera orkestran txertatu diren. Gainera, disko hau kontzertu-bira batean aurkeztu zen euskal geografia osoan barrena urri eta azaroan.

Bestetik, hasiera batean bide ezberdinetatik doazen bi munduk bat egin dute une batean eta Gutizia eman dute emaitza gisa. Delicatessen moduko lan honek modu naturalean uztartu ditu euskal kulturan hain sustraituta dagoen instrumentu bat, txistua, eta orkestra sinfoniko bat. Horretan jardun dira lanean Garikoitz Mendizabal eta Euskadiko Orkestra, txistu eta orkestrarako idatzitako obra-sorta baten grabazioa egiten eta ondorengo hedapena prestatzen. Grabazioak guztira bederatzi obra hartu ditu barne, batzuk berriki idatziak eta besteak bertsio berri gisa aurkeztuak. Jatorri ezberdinetako musikagileek idatzitako lanak diren heinean, musika-bilduma hau bidaia bat da bere horretan. Lan hauetako gehienek honako hau estreinaldia izan dute, eta historia eta motibazio ezberdinak dituzte.

Orkestra aste honetan ere grabatzen ari da

Goian aipatutako lau diskoak argitaratu ondoren, orkestraren jarduera diskografikoak ez du etenik. Aste honetan bertan, musikariak Robert Treviñoren agindupean jarri dira, Maurice Ravelen orkestra-lanen bigarren disko bat grabatzeko. Lan hori ere Ondine Records diskoetxepean argitaratuko da, 2022an zehar. Grabazio berri honetan, Shéhérazade, Menuet Antique, Valses nobles et sentimentales, Ma mère l’oye eta Frontispice lanak bilduko dira.

Informazio gehiago

Euskadiko Orkestrak Musika Gela zikloaren baitan haur eta gazteei eskaintzen dizkien jardueren artean, ibilbide luze eta finkatuena duen atala Musika Familian kontzertuena da. Haurrek familiekin gozatzeko kultur aisialdiko eskaintza honek 25 urte daramatza orkestraren egitarauan.

Atal honen barruan bi ekoizpen eskainiko dira Donostian 21-22 Denboraldian: Living Room Music, urtarrilaren 22an Miramonen izango dena saio bikoitzean (11:00 / 12:30), eta Euskadiko Orkestra Cirkus, urtarrilaren 29an Kursaaleko ganbera-aretoan (18:00). Ikuskizun hauetarako sarrerek 3 eta 7 euro bitarteko prezioa dute eta euskadikoorkestra.eus webgunearen bidez eros ahal izango dira. Kursaalen leihatilan eta webgunean ere egongo dira salgai.

Batetik, 6 eta 10 urte bitarteko haurrei zuzendutako Living Room Music ikuskizunak honako istorio hau kontatzen du: lau musikari berrogeialdia egin behar izatearen ondorioz harrapatuta geratzen dira urrutiko hiri bateko apartamentu batean. Familiako kideengandik urrun, derrigorrez konfinatuta, nahasita eta urduri samar, musika pixka bat egiteko aukera ematen duten etxeko elementu guztiak aztertzen dituzte. Anthony Lafargue, Hector Marques, Igor Arostegi eta Gorka Catediano perkusiojoleak izango dira protagonistak, Ana Hernandez Sanchiz aktorearekin batera.

Bestetik, 3 eta 6 urte bitarteko haurrentzako Euskadiko Orkestra Cirkus ikuskizuna alaitasun eta fantasiazko eztanda bat da, XIX. mende amaierako eta XX. mende hasierako musiken bidez sortutakoa. Pieza txiki eta dibertigarriak, horien estiloaren adierazgarri bikainak direnak eta kolorez, exotismo melodiko eta tinbrikoz beterik daudenak. Kontzertu honek gure entzule txikiei musikaren magia helaraziko die, zirkuaren magiari lotuz. Orkestrako musikariek osatutako talde instrumentalak interpretatuko du musika, eta lagun izango ditu Irati Gonzalez Jaimerena eta Koldo Arakistain akrobatak eta ‘Pituxa’ clowna (Itziar Saenz de Ojer).

Donostian egingo diren Musika Familian kontzertuek El Diario Vascoren babesa dute, eta horietatik Kursaalen egingo dena, Euskadiko Orkestra Cirkus, Kursaal Eszenarekin lankidetzan prestatu da

Musika Familian kontzertuak Gasteizen

Bestalde, Euskadiko Orkestrak beste bi Musika Familian kontzertu eskainiko ditu Gasteizen: urtarrilaren 30ean (17:00 / 18:30) Garcia Lorca Antzokiak arestian aipatutako Euskadiko Orkestra Cirkus hartuko du, eta apirilaren 10ean Principal Antzokian Botadun katuaren txanda izango da, Per Poc txotxongilo-taldearen ekoizpena, lehendabizikoz euskaraz emango dena. Ikuskizun hauetarako sarrerak urtarrilean zehar jarriko dira salgai.

Arabako hiriburuko kontzertuek, bestalde, Gasteizko Udalaren Antzoki Sarearen lankidetza dute.

Informazio gehiago

21-22 Denboraldiko Miramongo Matinéeen seigarren hitzordua, urteko azkena, berezia izango da; izan ere, ohiko ganbera-talde txikien ordez, kontzertura bertaratzen direnek orkestra osoaz gozatu ahal izango dute Maurice Ravelen obrak interpretatzen, Robert Treviñoren gidaritzapean. Hitzordua larunbat honetan izango da, abenduak 11, 11:00etan, Euskadiko Orkestraren Miramongo egoitzan.

Maurice Ravel, Ziburun jaiotakoa eta mundu osoan interpretatua, Euskadiko Orkestrak bere bezala aldarrikatzen duen musikagilea da. Haren musikan murgildu nahi izan zuen Robert Treviñok orkestraren titulartasuna hartu zuenean, eta ordutik askotan zuzendu ditu bere obrak, bai Denboraldiko kontzertuetan, bai Parisko Théâtre des Champs-Élyséesen orkestrak 2020ko urtarrilean egin zuen estreinaldi handian ere.

Orain dela gutxi, Treviñok eta Euskadiko Orkestrak Ravelen orkestra-obrak barne hartzen dituen disko bat grabatu eta argitaratu dute Ondine diskoetxearen zigilupean, egilearen euskal nortasuna sakon aztertzeko helburuarekin, baita orkestrak konpositorearen hizkuntzaz dakiena eta ulertzen duena munduarekin partekatzeko ere. Disko honek —La Valse, Alborada del gracioso, Rapsodie espagnole, Une barque sur l'océan, Pavane pour une infante défunte eta Boléro obrak barne hartzen dituenak— hain kritika onak jaso ditu nazioarteko prentsa espezializatuaren aldetik, ezen Euskadiko Orkestrak bigarren grabazio bat egitea erabaki baitu, hain bere sentitzen duen konpositore honen orkestra-lan gehiago bilduko dituena.

Miramongo Matinée honetan entzungo diren lau lanak Ravel sinfonikoenaren grabazio berri honetan sartuko dira: Shéhérazade, Menuet Antique, Valses nobles et sentimentales eta Ma mère l'oye. Disko hau ere Ondine diskoetxeak argitaratuko du, 2022 urtean zehar.

Edukiera-arrazoiak direla-eta, larunbat honetako Matinéerako ez da sarrerarik salduko. Hala ere, euskadikoorkestra.eus webgunean eros daitezke Denboraldiko gainerako Matinéetarako sarrerak.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio kontzertua ikustera doazen abonatuei. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

EiTBk eta Euskadiko Orkestrak aurrera jarraitzen dute pasa den Denboraldian ekindako Denboraldiko kontzertuen grabazio eta zabalkunderako konpromiso partekatuarekin. Horri esker, bihartik aurrera (abenduak 4) eta larunbatetan, 11:00etan, ETB2k orkestraren 21-22 Denboraldiko kontzertuak emango ditu. Honako hauek dira datozen kontzertuak:

• Abenduak 4: Brahms Fest. Zuzendaria: Robert Treviño. Piano-solista: Tom Borrow.
• Abenduak 11: Tchaikovsky + Gaigne 1. Zuzendaria: Jaume Santonja.
• Abenduak 18: Tchaikovsky + Gaigne 2. Zuzendaria: Jaume Santonja.
• Abenduak 25: Shostakovich + Ginastera. Zuzendaria: Robert Treviño. Harpa-solista: Xavier de Maistre.

Kontzertuak Euskalduna Jauregian grabatu ditu ETBk. Hurrengo emisioen egutegia aurrerago emango da ezagutzera.

Informazio gehiago

Euskadiko Orkestrak bihartik aurrera 21/22 Denboraldiko hirugarren kontzertu-programari egingo dio aurre, Dmitri Xostakovitx eta Alberto Ginastera konpositoreei eskainitakoa, Robert Treviño titularra zuzendari izango duena eta Xavier de Maistre harpista handia protagonista gisa izango duena. Kontzertuak abenduaren 3tik 10era izango dira ohiko lau hiriburuetan, guztiak 19:30ean:

• Abenduak 3, ostirala: Gasteizko Principal Antzokia.
• Abenduak 7, asteartea: Iruñeko Baluarte Auditoriuma.
• Abenduak 8, asteazkena: Bilboko Euskalduna Jauregia.
• Abenduak 9, osteguna: Donostiako Kursaal Auditoriuma.
• Abenduak 10, ostirala: Donostiako Kursaal Auditoriuma.

EROSI SARRERAK HEMEN

Xavier de Maistre azken hamarkadetako eragin handieneko harpajolea da, segur aski. Hastapen profesionalak miragarriak izan ziren, zalantzarik gabe: 16 urte besterik ez zituela hasi zen nazioarteko lehiaketa garrantzitsuak irabazten eta 22 urte zituela lortu zuen harpa bakarlariaren postua Bavierako Irratiaren Orkestran. Hiru urte geroago, Vienako Orkestra Filarmonikoko harpajole solista bihurtu zen, eta hamaika urtez aritu zen postu horretan. Hala ere, De Maistrek Vienari agur esatea erabaki zuen, bakarlari-ibilbideari ekiteko. Ordutik aurrera, munduko orkestra eta zuzendari onenekin batera jo du eta gainera, musika-tresnaren ordezkari onena bihurtu da mundu klasikoaren barruan. Horrez gain, publikoaren artean ezagutarazteko ahalegin handia egin du.      

De Maistrek askotan parte hartu du Euskadiko Orkestrarekin. Orkestrak 1997tik 2012ra Claves Records diskoetxearekin grabatu zuen Euskal Konpositoreen Bilduma ospetsuan izan zuen parte-hartzeetako bat De Maistrek, 15 euskal egileren beste hainbeste album monografikoko bilduman, alegia. Harpajolea Tomas Garbizu eta Aita Madinari eskainitako diskoetan izan zen, Cristian Mandealek zuzendu zituenak, eta 2004an eta 2005ean argitaratuak, hurrenez hurren. Gainera, 2007an orkestraren Abonu Denboraldian parte hartu zuen Aita Madinaren eta Carl Reineckeren lanak interpretatzen, eta, bisita hori aprobetxatuz, harpa-errezitaldia eskaini zuen Miramongo Matinéeetan. Hamalau urte geroago, Euskadiko Orkestraren kontzertu-programa batean parte hartuko du berriz, azken urteotan arrakasta ugari pilatu ostean. De Maistrek Salzburgora ere joan behar zuen orkestrarekin batera, abenduaren erdialdean Grosses Festspielhaus-en hiru kontzertu emateko, baina duela gutxi iragarri den bezala, Covidak eragindako egungo egoerak bidaia hori bertan behera uztera behartu du orkestra.

Harparen eskutik, Alberto Ginastera konpositore argentinarren musikara hurbilduko gara. Harparako kontzertua 1956an konposatu zuen, eta 1965ean estreinatu zuten Nicanor Zabaletak eta Filadelfiako Orkestrak. Musika-tresnaren ia alderdi guztiak erakusten ditu partiturak: dantza-erritmo boteretsuak ezartzeko gaitasunetik hasita, melodia liriko delikatuetara, idiomatismoz eta birtuosismoz betetako edozein harpajoleren nahitaezko orri bihurtu da kontzertua.

Dmitri Xostakovitxen 10. Sinfonia, kontzertuak amaitzeko entzungo duguna, 1953ko udan idatzi zuen, Stalin hil eta hilabete gutxira, eta ez dakigu zenbaterainoko inspirazioa hartzen duen harengandik. Herbert von Karajanek hamargarren hau Xostakovitxen 15 sinfonietatik perfektuenentzat jotzen zuen.

Sarrerak salgai daude saio guztietarako euskadikoorkestra.eus-en, baita auditorioen webgune eta leihatiletan ere, 10 eurotik 35 eurora.

Informazio gehiago