Maurice Ravel, Ziburun jaiotakoa eta mundu osoan interpretatua, Euskadiko Orkestrak bere bezala aldarrikatzen duen musikagilea da. Haren musikan murgildu nahi izan du hasieratik Robert Treviñok eta, Denboraldiko kontzertu ugaritan eta Parisko Théâtre des Champs-Élyséesen orkestrak izan zuen estreinaldian protagonismo handiz zuzendu ondoren, Ravelen euskal nortasuna sakon aztertu nahi izan du, baita orkestra honek konpositore horren hizkuntzaz dakiena eta ulertzen duena munduarekin partekatu ere.

Treviñoren hitzetan: “Euskadiko Orkestrarentzako Ravelen disko oso bat grabatzea erronka handia da. Izan ere, errepertorioa oso-oso ezaguna da eta oso grabaketa onak egin dira. Interpretazio bikainak egin izan dira historian zehar. Beraz, (…) zergatik egin behar dugu? Bada, Oso garrantzitsua iruditzen zait aitortzea Euskadiko Orkestrak lotura estua duela Maurice Ravelen musikarekin”.

Lan-prozesu horren emaitza Ravel sinfonikoaren forman iritsi da orain, eta hitz hauekin deskribatu du Treviñok: "Ravelen musikan pasarte asko daude, bereziki euskaldun bezala atzeman ditzakezunak, bere musika osoak ezkutatzen dituen erritmo edo esamolde herrikoiak. Ravel frantziar-euskalduna zen eta, nahiz eta bere musikan frantses kolore asko egon, euskal zintzotasuna eta determinazioa ere nabarmen igarri daitezke. Bere musikan murgildu gara eta konpositore magistral hau birpentsatu dugu, agian euskaldunak ez diren orkestrentzat hain nabarmenak ez diren egiak aurkituz. Esperientzia bikaina izan da".

Hau da Treviñok Ravel grabatzen duen lehen aldia, ez ordea orkestrak, bere fonoteka zabalean 2000 urtean orduko titular Gilbert Vargarekin eta Joaquin Achucarrorekin grabatutako Ravelen beste monografiko bat baitauka. Grabazio hark Ravelen pianorako bi kontzertuak erregistratu zituen pianista bilbotarraren eskutik eta baita Alborada del gracioso lana ere, zeina oraingo grabazioan berreskuratuko den La Valse, Boléro, Rapsodie Espagnole, Pavane pour une infante défunte eta Une barque sur l'océanekin batera.

Grabazioa Kursaal Auditoriumean egin zuten pasa den urrian eta eszenatoki zabalari plataforma gehigarri bat gehitu zitzaion, Ravel sinfoniko handia interpretatu behar zuten 90 musika inguruk gaur egun indarrean dauden segurtasun-distantziak zorrotz manten zitzaten.

Lehen erreakzioak nazioartean

Spotify, Amazon eta Apple Music bezalako plataforma handien bidez CD formatuan eta formatu digitalean aurkeztua, Ravel berri honek mundu osoan oso ezagunak diren lanen bilduma biltzen du. Beharbada horregatik, gaur egun Ravelen monografiko bat egitean bereziki zaila da arreta erakartzea, 

baina orkestrak eta zuzendariak grabazio honetan helarazi nahi izan duten begirada desberdin horretatik abiatuta, duela egun batzuk nazioartean kaleratutako diskoak merkatu honetako erreferentziazko plataforma handien arreta bereganatu du eta posizionamendu nabarmena lortu du.

Hona hemen erreakzio nabarmen batzuk:

• Spotify-n ‘Very best classical new releases’ (Musika klasikoko disko berririk onenak) zerrendan sartu dute diskoa.
• Gramophone argitalpen prestigiodunak  Apple Music-eko bere ‘Essential new albums of the week’ zerrendan (Asteko ezinbesteko disko berriak) sartu du diskoa.
• Apple Music-en, baita ere, Pavane pour une infante défunte Musika Klasikoko A Zerrendako lehen obra bezala jarri dute.
• Australiako Limelight argitalpenak hilabeteko diskotzat jo du.

Ondine Recordsi buruz

Ondine finlandiar diskoetxe ospetsuaren egikera du grabazio honek. Treviñok etxe diskografiko honekin urteroko grabazio hitzarmen bat sinatu du eta konpromiso horri duela hilabete batzuk eman zion hasiera Beethovenen sinfonien integrala grabatu zuenean Malmöko Orkestra Sinfonikoarekin (orkestra horren titularra ere bada Treviño). Orain, Ravel sinfonikoenaren eta hain ezagunak ez diren konpositore estatubatuarren grabazio bikoitzarekin hasi du bere ibilbide diskografikoa Euskadiko Orkestrarekin.

Ondine, Naxos taldearen parte dena, munduko diskoetxe independente prestigiotsuenetakoa da eta sarri egin ditu grabazioak Christoph Eschenbach, Vladimir Ashkenazy, Esa-Pekka Salonen eta Hannu Lintu bezalako zuzendari garrantzitsuekin.

“Ondinek soinez soin lan egiteko aukera eskaintzen duten artistak baino ez ditu hautatzen”, dio diskoetxearen zuzendari fundatzaile Reijo Kiilunen-ek, “Artista gutxi batzuk bakarrik aukeratzen ditugu, ohiko errepertorioaren interpretazio ameslari eta irudimentsuak egiteko gaitasuna dutenak, baita obra musikal ezezagunagoak publiko aurrean ezagutzera emateko gogamen abenturazalea dutenak ere. Robert Treviñok zalantzarik gabe baldintza horiek betetzen ditu, botere musikal handiko zuzendaria baita eta jakin-min handiko adimen originala baitauka”.

Reijo Kiilunenek jarraitzen du esanez: “Robert Treviñok eta Euskadiko Orkestrak oso ikuspegi berezko eta bereizgarria dute eta soinu bikaina. Zuzendari estatubatuarrak orkestra euskal jeinu honen musikan barrena gidatzearen ideia bikaina iruditu zitzaidan. Lehen disko honek modu zoragarrian erakusten du Treviñoren batutapean orkestrak zeinen ondo interpretatzen duen Maurice Ravelen musika. Hasierako nazioarteko erantzuna bikaina izan da eta kritika oso onak espero direla uste dut. Orkestrari eta Treviñori zorionak eman nahi dizkiet hasiera zirraragarri honengatik eta hurrengo grabazioak gogo handiz espero ditut”.

Non eskuratu diskoa

Diskoa Spotify, Apple Music, iTunes eta antzerako beste plataforma digital nagusietan eskuragai dago jada.

Bestalde, ale fisikoak ere jarri dira salgai merkataritza-establezimendu ugaritan.

Informazio gehiago

Euskadiko Orkestrak kontzertino lanposturako hautaketa-prozesua ireki berri du. Orkestra sinfoniko baten barruan postu garrantzitsua da kontzertinoarena, lehen biolinen ataleko bakarlaria baita. Hautaketa-prozesua zabalik dago eta ekainaren 9a baino lehen eman beharko da izena. Lehiaketa abuztuaren 10 eta 11n gauzatuko da.

Hautaketa-prozesu berri honek bat egin du duela gutxi iragarritako beste lehiaketa batzuekin: tronpa tutti batena eta bi biolin tuttirena, zeintzuen izen-emate epeak maiatzaren 13 eta 14an amaituko diren, hurrenez hurren. Plaza huts horiek betetzeko lehiaketa ekainaren 1ean eta 2an izango da biolin tutti postuetarako, eta ekainaren 3an tronpa tutti posturako.

Hiru lehiaketei buruzko informazio, oinarri eta izen-emateak orkestraren webgunean daude eskuragarri.

Informazio gehiago

Azken hilabeteetan Euskadiko Orkestrak Erromantizismoaren hasieretan, garairik oparoenean eta amaieran jarri du arreta, eta mugimendu hori da, hain zuzen, Denboraldi honen ardatza. Apirilaren 8an hasi eta 22ra arte luzatuko den kontzertu-programa berri batean egile paregabe eta berezi batean jarriko dugu arreta, zeinaren musika Erromantizismoaren muina den, baina edozein korronte bateratutik kanpo ere sailka daitekeen: Anton Bruckner. Orkestrak guztira hamar kontzertu emango ditu, guztiak 19:30ean: apirilaren 8, 9, 19 eta 21ean Donostiako Kursaal Auditoriumean; apirilaren 10 eta 16an Bilboko Euskalduna Jauregian; apirilaren 13 eta 22an Iruñeko Baluarte Auditoriumean; eta apirilaren 14 eta 20an Gasteizko Principal Antzokian.

Musikari austriar honen musika maiz eskaini du orkestrak azken denboraldietan; izan ere, Bruckner da Robert Treviño zuzendari titularraren musikagile kutunetako bat. Hain zuzen, Treviñok Brucknerren sinfonia batekin egin zuen debuta Euskadiko Orkestran, Zazpigarren sinfoniarekin, duela bost urte, 2016ko martxoan. Aurrerago, 2020 urte hasieran, Treviñok Bederatzigarren sinfoniaren bertsio gogoangarri bat zuzendu zuen; bertsioak azken mugimendua berregiten zuen, eta lehen aldiz entzun zen Euskadin. Oraingoan, bi saiotan, Brucknerren zikloaren barruan gutxien jo diren bi sinfonia aurkeztuko dizkigu Treviñok: Bosgarrena eta Seigarrena.

Batetik, apirilaren 8tik 14rako kontzertuetan, Euskadiko Orkestrak egile austriarraren 5. Sinfonia interpretatuko du. 1875 eta 1876 artean idatzitako lana da, eta aldaketa txikiak jasan zituen hurrengo urteetan. Hala ere, bere lehen orkestra-interpretazioa 1894ko apirilak 9ra arte ez zen iritsi, Franz Schalk zuzendariaren eskutik, Grazen, Brucknerrek gaixorik egoteagatik joan ezin izan zuen kontzertu batean. Inoiz ez zuen bere sinfonia orkestra batek interpretatuta entzuterik izan.

Bestalde, apirilaren 16tik 22ra bitartean Euskadiko Orkestrak Brucknerren 6. Sinfoniari egingo dio aurre. Seigarrenak badu aurreko Brucknerren sinfonien monumentaltasuna, baina diskurtso dinamikoagoa du, apetatsuagoa, erritmo eta harmonia askeagoak; orkestrazioak koloretsuagoa dirudi. Era berean, musikagilearen heldutasuneko sinfoniarik laburrena da, bai eta egitura klasikoena duena ere.

Kontzertuak:

• Apirilak 8 (19:30): Kursaal Auditoriuma (Donostia). 5. Sinfonia.
• Apirilak 9 (19:30): Kursaal Auditoriuma (Donostia). 5. Sinfonia.
• Apirilak 10 (19:30): Euskalduna Jauregia (Bilbo). 5. Sinfonia.
• Apirilak 13 (19:30): Baluarte Auditoriuma (Iruña). 5. Sinfonia.
• Apirilak 14 (19:30): Principal Antzokia (Gasteiz). 5. Sinfonia.
• Apirilak 16 (19:30): Euskalduna Jauregia (Bilbo). 6. Sinfonia.
• Apirilak 19 (19:30): Kursaal Auditoriuma (Donostia). 6. Sinfonia.
• Apirilak 20 (19:30): Principal Antzokia (Gasteiz). 6. Sinfonia.
• Apirilak 21 (19:30): Kursaal Auditoriuma (Donostia). 6. Sinfonia.
• Apirilak 22 (19:30): Baluarte Auditoriuma (Iruña). 6. Sinfonia.

Euskadiko Orkestrak Denboraldiaren azken txanpari helduko dio

Aste Santuan atseden txiki bat hartu ondoren, 20/21 Denboraldiaren azken zatiari ekingo dio Euskadiko Orkestrak kontzertu berri hauekin. Brucknerri eskainitako programa honen ondoren, Euskadiko Orkestrak maiatza eta ekaina artean azken hiru programak eskainiko ditu: Gazteak, Hans Graf zuzendariarekin eta Birgit Kolar biolinjolearekin, maiatzaren 3tik 10era; Noragabeko adiskidea, Anja Bihlmaierren batutapean eta Manuel Walser baritono gonbidatuarekin; eta New York, berriz ere Robert Treviño titularrarekin eta Nikolai Lugansky pianojolearekin, ekainaren 11tik 17ra.

Edukiera eta mugikortasuna

Gaur egun, eta osasun-agintariek bestelakorik agintzen ez badute, Bilboko Euskalduna Jauregiak, Donostiako Kursaal Auditoriumak eta Iruñeko Baluarte Auditoriumak 600 ikusle har ditzakete, eta Gasteizko Principal Antzokiak 400. Abiapuntuko edo helmugako udalerriak eremu gorrian dauden kasuetan izan ezik, euskal probintzietan bizi diren abonatu eta jarraitzaileak dagozkien hiriburuetara joan daitezke Euskadiko Orkestraren kontzertuez gozatzera.

Sarrerak salgai

Sarrerak salgai 10 €tik aurrera. Datei, ordutegiei, programei eta sarreren salmentari buruzko informazio guztia Euskadiko Orkestraren webgunean dago eskuragarri: euskadikoorkestra.eus. 

Informazio gehiago

Miramongo Matinéeek Kup Taldea izango dute gonbidatu 20/21 Denboraldiko hamabigarren hitzorduan, larunbat honetan, martxoak 27, 11:00etan, orkestraren egoitzan. Musika sakratuko bederatzi obra eskainiko ditu abesbatzak. Gabriel Baltés izango da zuzendaria, Jaurne Gaminde eta Juan Laboreria arituko dira soprano eta baritono lanetan eta Alize Mendizabal organistak lagunduko dio abesbatzari.

2003ko udaberrian ekin zion bere ibilbideari Baltés maisuak zuzentzen duen abesbatza honek. Formazioko taldekideak, gazteak izan arren, abesbatzen munduan maila guztietan esperientzia eta musika-prestakuntza handia duten musikariak dira.

Programa honetan abesbatzak garai guztietako musika sakratuan barrena bidaia bat proposatzen du: Berpizkundea Desprez, Gombert, Morales eta Sweelinckekin; Barrokoa Homiliusekin; XIX. mendea Faurérekin; eta XXI. mendea Matsushita, Randall Stroope eta Bec-ekin. Horrela, idazketa koralaren aniztasun guztia eta denboran izan duen bilakaera deskubrituko ditugu. Baita ere, ikusiko dugu nola garai guztietan, idazketa-teknika oso desberdinak erabiliz, konpositoreek giza sentimenduen paleta osoa elokuentziaz adierazten jakin izan duten.

Kontzertuko plater nagusia Gabriel Fauréren Requiem-a izango da, zeinaren lehen bertsioa 1888an aurkeztu zuen egileak Parisko Madelaine elizan. Bere debozioak, atmosfera etereoak, barne kantuaren edertasun sinpleak eta batzuetan dramatikoak diren azentuek publikoa konkistatu dute aspalditik. Partituraren azken bi bertsioak 1893an (tronpa, tronpeta eta tronboiek aberastua) eta 1900ean sortu ziren. Fauréren obra osoan nabarmentzen den maisulana da. Requiem hau ez da beste horrelako obren antzekoa, eta bere lasaitasun distiratsu eta baketsuagatik bereizten da hildakoentzako meza arruntengatik, askotan ilunagoak izaten baitira horiek. ‘Libera me’ mugimenduaren egonezinak eta matxinada laburrak apenas eragiten diote obran nagusi den lasaitasunari, eta horregatik heriotza argitasunerako eta zorionerako bide gisa irudikatzen da gehienbat lan honetan. ‘Ofertorioa’, polifonia fin nabarmenekoa, da obrako une ezagunena.

Indarrean dauden edukiera-mugen ondorioz, ez da sarrerarik salgai jarriko kontzertu honetarako, izan ere, dagoeneko zikloak dituen abonatuekin auditoriumaren edukiera beteta baitago.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio kontzertua ikustera doazen abonatuei. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

Euskadiko Orkestraren Musika Gelako bi jarduera nagusi diren Musika Familian kontzertu eta Eskolentzako Kontzertuetatik, lehenengoak Donostian eta Gasteizen mantendu dira Denboraldi honetan, baina bigarrenen jarduera nabarmen murriztu da gaur egungo osasun-krisia dela eta. Hain da hala, ezen Denboraldi honetan Eskola Kontzertuen jarduera ekoizpen bakarrera mugatuko baita: Beethoven 250, Lehen eta Bigarren Hezkuntzako ikasleentzat (10-16 urte), martxoaren 23an eta 24an (9:45 eta 11:30), Donostiako Kursaal Auditoriumean. Saio hauetan Beethoven musikagilea omenduko dute, jaio eta 250 urtera publikoa liluratzen jarraitzen baitu.

Jaume Santonjaren zuzendaritzapean eta Natalia Sanchez Abaden aurkezpenarekin, Euskadiko Orkestrak Beethovenen sinfonien unerik gogoangarrienetako batzuk proposatuko dizkio publiko gazteari. Kontzertuen gidoia Musika Gelaren koordinatzaile Mikel Cañadak idatzi du. Saio horien 60 minutuko iraupenean, Beethovenen obra sinfonikoak kulturari egindako ekarpena balioetsiko da. Lan hori mundu osoko auditorioetan indarrean dago eta, bi mende eta erdi baino gehiago igaro ondoren, askatasunari eta pertsonen arteko elkartasunari buruzko kantu bat izaten jarraitzen du.

Kontzertuen aurretik, ikasleek hainbat zeregin egiten dituzte ikastetxe bakoitzean, modu independentean. Kontzertuek zenbait helburu dituzte, hala nola sormen-gaitasuna garatzea eta entzumen-gaitasuna sustatzea. Horrela, kontzertua azken urratsa baino ez da lan-prozesu luze horretan. Aldez aurretiko prozesu hori errazte aldera, Musika Gelak gidoi didaktiko espezifiko bat egiten du proiektu bakoitzerako, eta irakasleentzako tailerrak antolatzen ditu. Bestalde, ikasleek Beethoveni buruzko bideoak prestatu dituzte, eta kontzertuan zehar proiektatuko dituzte ikus-entzunezkook.

Covid protokoloa

Probintzia osoko 1.000 ikasle inguru joan dira kontzertu horietara, eta esperientzia oso atsegina eta segurua izan dadin behar diren neurri guztiak hartuko dira. Taldeak lau saiotan banatuta daude. Eskola bakoitza burbuila bat da, eta horrela banatuko da Kursaal Auditoriumean parte hartzen duten ikastetxeetako gainerako taldeekin. Legazpitik, Eskoriatzatik, Errenteriatik, Itsasondotik, Oñatitik, Urnietatik eta Donostiatik etorritako 42 klase-burbuilak ordu desberdinetan sartu eta irtengo dira, modu mailakatuan.

Informazio gehiago

2020ko urria eta azaroa bitartean Euskadiko Orkestrak 'Wagner' programako hamar kontzertu eskaini zituen Donostian, Gasteizen eta Bilbon, Michel Tabachniken gidaritzapean. Orkestrak gauza bera egiteko asmoa zuen Iruñean, baina Nafarroako Foru Erkidegoan ezarritako edukiera-murrizketen ondorioz, bertan behera utzi behar izan zituen bertako kontzertuak.

Oraingo honetan Jaume Santonjaren gidaritzapean, Euskadiko Orkestrak 'Wagner' programari berrekingo dio Baluarte Auditoriumean kontzertu bikoitz batekin, bihar, asteartea, martxoak 23, 18:00etan eta 20:15ean. Santonja maisu gaztea da oraindik, baina gorabidean da bere karrera. Euskadiko Orkestrako zuzendari elkartu izendatu dute Denboraldi honetarako zein hurrengorako eta, gainera, 2018tik Erresuma Batuko City of Birmingham Symphony Orchestrako zuzendari laguntzailea da. Santonjak estatuko orkestra garrantzitsuekin egin du debuta (RTVEko Orkestra, Valentziako Erkidegoko Orkestra edo Asturiasko Printzerriko Orkestra Sinfonikoa), baita nazioarteko orkestra garrantzitsuekin ere (BBC National Orchestra of Wales, Anberesko Orkestra Sinfonikoa edo Maltako Orkestra Filarmonikoa).

Santonjak Wagnerren bi obrari egingo die aurre Euskadiko Orkestrarekin batera. Alde batetik, Sigfridoren idilioa poema sinfonikoa, zeinaren musika urte batzuk geroago Wagnerrek Sigfrido operarako erabiliko zuen, eta, bestetik, Wesendonck Lieder, 1857an idatzitakoa Tristan eta Isolda operan lanean ari zen bitartean. Bi obrek ezkontzaz kanpoko harremanekin lotutako historia dute atzean. Wagnerrek Sigfridoren idilioa 1870ean idatzi zuen, Franz Liszten alaba zen Cosimarekin ezkondu eta handik hilabete gutxitara. Cosimarekin hainbat urtez maitasun-harremana izan zuen, artean emakumea Wagnerren musikaren defendatzaile sutsua zen Hans von Bülow zuzendariarekin ezkonduta zegoela. Wesendonck Lieder aurretik idatzi zuen Wagnerrek, 1858an, ezkontzaz kanpoko harreman batean murgilduta zegoenean, oraingoan Mathilde Wesendonckekin, Minna Planer emazte zuen bitartean. Mathilde Wesendonckek olerki sorta bat idatzi zuen eta Wagnerrek musika jarri zien (lan horrek Tristan eta Isoldaren zati batzuetarako balio izan zion).

Maitasun debekatua islatzen duten Wesendonck Lieder kantuak interpretatzeko, mezzosoprano aparta dugu, Rinat Shaham, Bizeten Carmenen interpretatzailerik onenetako bat. Mundu osoko 45 antzokitan baino gehiagotan abestu du rol hori. Baina, Shahamen errepertorioa oso zabala da; sarritan, Lully, Purcell, Marcello eta beste autore barroko batzuk eta Gershwin, Bartok eta XX. mendeko beste konpositore batzuk barnean hartzen ditu. Azken horren opera batekin (Bizarrurdinen gaztelua), debuta egin zuen gure orkestrarekin batera 2019ko udan. Besteak beste, Simon Rattle, Christoph Eschenbach, Mark Elder, William Christie, André Previn eta Leonard Slatkin zuzendariekin kolaboratu du Shahamek.  

Wagnerren musikari ohore egin ondoren, kontzertuak oso tonu desberdin batean amaituko dira, lan klasiko eta askoz arinago batekin: Mozarten 35. Sinfonia, «Haffner». Mozartek musika noble, distiratsu eta arranditsua konposatu zuen sinfonia honetarako; baina, originaltasun batzuk eta espiritu dramatikoa ere eman zizkion, Vienako garaian garatuko zituen interesen (bereziki antzerkikoen) aurrekari.

Sarrerak salgai

20:15eko saiorako salgai daude sarrerak euskadikoorkestra.eus-en, baita Baluarte Auditoriumeko leihatilan ere, 10 eurotik hasita.

Fundación Banco Sabadell lankide

Kontzertu-programa honek Fundación Banco Sabadellen lankidetza du.

Informazio gehiago

Matinéeak 20/21 Denboraldiko hamaikagarren hitzorduarekin datoz, kasu honetan Bach Camerata Miramonek eskainiko duena, ‘Brandenburgeko kontzertuak. 300. urteurrena’ izenburupean, larunbat honetan, martxoak 13, 11:00etan, orkestraren egoitzan. Taldea hamasei musikarik osatzen dute, horietako gehienak Euskadiko Orkestrako kideak: sei biolin, hiru biola, hiru biolontxelo, kontrabaxu bat, bi flauta eta klabezin bat.

Matinée honetan, aurten 300 urte beteko dituzten Johann Sebastian Bachen sei Brandenburgeko kontzertu hauetako hiru entzun ahal izango dira: hirugarrena, sol maiorrean, harizko instrumentuek (biolin-, biola- eta biolontxelo-trio banak) eta baxu jarraituak, kontzertu guztietan agertzen denak, osatzen dute; laugarrenak, hau ere sol maiorrean, hiru instrumentu solista, bi moko-txirula eta biolin bat ditu; eta bosgarrenak, re maiorrean, protagonismoa zeharkako flautari, biolinari eta klabezinari ematen die.

Bachen ekoizpen kontzertante eta instrumentala, Köthenen egon zen bitartean (1717tik 1723ra), oso hizkuntza berritzaile eta abstraktua lantzeagatik nabarmendu zen. Bachen ustez, musika konposatzeak teknika harmonikoak eta kontrapuntistikoak ikertzea esan nahi zuen, horiek ahalik eta gehien zukutzea. Eta Köthen, non Anhalt-Kötheneko Leopoldo printzearen gortean kapera-maisu izan zen, horretarako toki egokia izan zen. Izan ere, printzeak musikarekiko zuen gogoberotasunaz gain, Bachek musikari gisa zuen funtzioa ez zen inoiz erlijio-errepertoriora mugatu bertan izan zen bitartean.

Christian Ludwigek, Brandenburgeko Margraveak, Bachen jotzeko moduarekin eta bere konposizioekin liluratuta, gorteko bere musika-taldearentzat pieza batzuk idazteko eskatu zion. 1721ean, Bachek kontzertu-bilduma bat eskaini eta dedikatu zion Ludwigi eta Margravea hil ondoren aurkitu zituzten kontzertuok partituraz betetako kutxa batean.

Indarrean dauden edukiera-mugen ondorioz, ez da sarrerarik salgai jarriko kontzertu honetarako, izan ere, dagoeneko zikloak dituen abonatuekin auditoriumaren edukiera beteta baitago.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio kontzertua ikustera doazen abonatuei. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

Iruñean eta Bilboko Musika-Musika Jaialdian Semyon Bychkoven zuzendaritzapean eskainitako kontzertu handien ondoren, orkestrak Denboraldiarekin jarraituko du Donostiako Kursaal Auditoriumean (martxoaren 11, 12 eta 18an, 17:30ean eta 19:30ean) hasiko den hamar kontzertuko programa berri batekin. Gainontzeko kontzertuak datorren astean izango dira: Gasteizko Principal Antzokian (martxoaren 15ean, 19:30ean), Iruñeko Baluarte Auditoriumean (martxoaren 16an, 19:30ean), eta Bilboko Euskalduna Jauregian (martxoaren 17an, 19:30ean).

Gemma New, Sir Georg Solti Sari ospetsua jaso berri duen egungo zuzendari gazte oparoenetako bat, izango da hitzordu hauen zuzendaria. Aintzatespen horrek AEBetako diru-laguntzarik handiena ematen die zuzendari estatubatuar gazteei. Hamiltongo Orkestra Filarmonikoko musika-zuzendaria da New, eta Saint Louisko Orkestra Sinfonikoko egoiliarra. Horrez gain, pandemiaren aurretik, Dallasko Orkestra Sinfonikoko zuzendari gonbidatu nagusi izendatu zuten. Estatu-mailan bere debuta izango da Gemma Newentzat Euskadiko Orkestraren Denboraldian egingo duena. Ruth Reinhardt eta Anja Bihlmaierrekin batera, Denboraldi honetan orkestra bisitatuko duten hiru emakume zuzendarietako bat da.

Gemma Newekin batera munduko biolinista ospetsuenetako bat igoko da oholtzara kontzertu hauen lehen zatian: Vadim Gluzman. Nazioarteko orkestra ospetsuenen bakarlari (Berlingo Orkestra Filarmonikoa, Bostongo Orkestra Sinfonikoa, Clevelandeko Orkestra, Chicagoko Orkestra Sinfonikoa eta Londresko Orkestra Filarmonikoa, besteak beste), birtuoso israeldarrak orkestrari lagundu zion duela bi urteko Europa erdialdeko biran, Robert Treviñoren zuzendaritzapean. Kasu hartan egin zuen bezalaxe, oraingoan ere Prokofieven Biolinerako 2. Kontzertua interpretatuko du Gluzmanek. Sobietar Batasunera bizitzera joan baino lehen idatzi zuen konpositore errusiarraren lanik liriko eta sentimentalenetako bat da. Biolinerako kontzertu hau interpretatzeko bakarlari oso bertutetsu bat behar da, horregatik orkestrak Vadim Gluzman aukeratu du. Euskadiko Orkestrarekin hamar kontzertu eman ostean, Gluzman Toulouseko Orchestre National du Capitolerekin arituko da Tugan Sokhieven aginduetara.

Kontzertuaren bigarren zatian, Gemma Newek Schumannen 3. Sinfoniari, "Renaniarra" izenez ezagutzen denari, helduko dio. Konpositore alemaniarrak, Dusseldorfera joan eta gutxira idatzi zuen, Koloniako katedrala ezagutu ondoren. Sinfoniaren harietako bat Rhin ibaia da, Renania zeharkatzen duena. Sinfonia handia da eta oso originala garai hartarako, eta beti merezi du berriro entzutea.

Mugikortasuna eta edukiera zabaltzea

EAEko osasun-dekretu berriak udalen eta lurraldeen mugikortasuna irekitzen du eta edukiera 400etik 600era zabaltzen du 1600 eserlekutik gorako aretoetan. Dekretu horrek eragin zuzena du Euskadiko Orkestraren kontzertuetan, izan ere, euskal probintzietan bizi diren abonatuak hiriburuetara joan ahal izango baitira eta, beraz, asistentzia nabarmen handituko da. Gainera, Euskalduna Jauregian eta Kursaal Auditoriumean sarrera gehiago jarriko ditugu salgai.

Sarrerak salgai 10 €tik aurrera. Datei, ordutegiei, programei eta sarreren salmentari buruzko informazio guztia Euskadiko Orkestraren webgunean dago eskuragarri: euskadikoorkestra.eus. 

Informazio gehiago

Irailaren 25ean Principal Antzokian kontzertuen Denboraldia hasi zenetik, Euskadiko Orkestrak aurrera jarraitu du programazio osoarekin, pandemiaren bilakaeraren baldintzetara etengabe egokituz eta osasun-agintariek ezarritako arauak betez. Orain orkestrak beste urrats bat eman du, eta orain dela 23 urte hasi zen eta sustraituta dagoen Musika Familian zikloko kontzertuen ospakizunari eutsi dio. Ziklo hori familiei eta gizarteko gazteenei zuzenduta dago. 20 urte baino gehiagoko ibilbide hori guztia Gasteizko Udal Antzoki Sarearekin elkarlanean antolatu izan da beti.

Martxo, apiril eta maiatzean orkestrak bi produkzio propio estreinatuko ditu (Ekomusik eta Living Room Music) eta berriz eskainiko du Mozart, Nannerl eta lagunak, pasa den urteko martxoaren 1ean Garcia Lorca Antzokian eskaini zena. Hiru ekoizpenak haurrei zuzenduta daude, 3 eta 5 urte bitartekoei Mozart, Nannerl eta lagunak-en kasuan, eta 6 eta 10 urte bitartekoei, Ekomusik eta Living Room Music-en kasuan.

Ekomusik musika barrokoko programa bat da eta ekologiaren garrantziari buruzko kontzientzia hartzearen alde egiten du. Harizko eta perkusiozko instrumentuez eta klabezinaz osatutako formazio bat, gehienbat Euskadiko Orkestrako musikariez osatua eta antzinako musikan aditu Enrike Solinisek zuzendua, errepertorio barrokoan barneratuko da, instrumentuen eta naturaren, musikaren eta ekologiaren arteko harreman estua erakusteko. Ekomusik ikuskizunak, musikaren bidez, gure planeta zaintzeko premian jartzen du arreta. Kontzertua martxoaren 7an izango da, 18:00etan, Antzoki Zaharrean, eta 6 eta 10 urte bitarteko haurrei zuzenduta dago.

Bi protagonista nagusi izango ditu Mozart, Nannerl eta lagunak ikuskizunak: musika klasikoaren pertsonaia entzutetsuenetako bat, Wolfgang Amadeus Mozart, eta bere arreba Maria Anna Mozart, hura ere konpositorea, baina zeinaren obra gehienak galdu egin diren historian barrena. Nannerl —Maria Annaren goitizena— berpiztu egingo da gure aurrean ezagutzera emateko eta gu bere anaiaren musikara hurbiltzeko. Martxa turkiarraren erritmora eta bere obrak musika-estilo ezberdinen bidez eraldatzeko jolasekin, haurrek deskubrituko dute Mozarten musika gaurkotasun osokoa dela. Hitzordu hau igandean izango da, apirilak 18, 18:00etan, Principal Antzokian, 3 eta 5 urte bitarteko haurrentzat.

Living Room Music parodia moduan aurkezten da eta bertan lau musikari berrogeialdiaren ondorioz harrapatuta geratzen dira urrutiko hiri bateko apartamentu batean. Familiako kideengandik urrun, derrigorrez konfinatuta, nahasita eta urduri samar, musika pixka bat egiteko aukera ematen duten etxeko elementu guztiak aztertzen dituzte: mahaiak, koilarak, haizemaileak, ura, lanparak, loreontziak, eskailerak, zabor-ontziak, eskuak, ahotsak... Kanpoaldearekin duten kontaktu bakarra auzotar indiskretu bat da, beren egoera berean dagoen soprano bat. Hura auzokideen "zarata" izugarriengatik pazientzia galtzen hasten da eta etengabe gogaitzen jardungo da... Hirugarren hitzordu hau maiatzaren 9an izango da, igandea, 18:00etan, Principal Antzokian, 6 eta 10 urte bitarteko haurrei zuzenduta.

Hiru ekoizpen hauetarako sarrerek 6 euroko prezioa dute eta euskadikoorkestra.eus eta principalantzokia.org webguneen bidez eros daitezke, baita 945161045 telefono-zenbakira deituz eta Principal Antzokiko leihatilan ere. Mozart, Nannerl eta lagunak eta Living Room Music-erako sarrerak martxoaren 30etik aurrera erosi ahal izango dira. Gainera, martxoaren 25etik aurrera, Principal Antzokiko udaberriko abonamenduak jarriko dituzte salgai, eta azken bi ikuskizunok barne hartuko ditu.

Eskola Kontzertuak

Euskadiko Orkestraren Musika Gela zikloaren bi jarduera nagusiak Musika Familian kontzertuak eta Eskola Kontzertuak dira. Denboraldi honetan lehenengoei eutsiko zaie, baina bigarrenei nabarmen murriztuko zaie jarduera, pairatzen ari garen osasun-krisiaren ondorioz. Horregatik, Denboraldi honetan, Beethoven 250 ekoizpenera mugatuko da Eskola Kontzertuen jarduera, Lehen eta Bigarren Hezkuntzako ikasleentzat, martxoaren 23an eta 24an, Donostiako Kursaal Auditoriumean. Saio hauetan Beethoven musikagilea omenduko dute, jaio eta 250 urtera liluratuta jarraitzen baitugu haren musikarekin.

Informazio gehiago

Semyon Bychkov eta Euskadiko Orkestra duela hilabete batzuk elkartu ziren lehenengo aldiz, Musika Hamabostaldian eta Santandergo Nazioarteko Jaialdian emandako bi kontzertutan. Aurreikusi gabeko lankidetza bat izan zen nolabait, zorioneko topaketa bat, aurreikusi ezin zen egoera pandemiko korapilatsu baten erdian. Bychkovek, Iparraldeko Getarian bizi denak, konfinamendutik irten ahal izan zuen 2020ko martxotik aurrenekoz zuzentzeko. Lehen entseguan jada nabarmena izan zen Euskadiko Orkestraren eta errusiar zuzendariaren artean sortutako kimika. Hain argia izan zen, ezen zuzendari eta orkestrak beren bideak bereizi baino lehen hitzordu berri bat adostu baitzuten.

Aste honetan elkartu dira berriro eta Bychkoven konpositore kuttunetako bat, Gustav Mahler, da emankizunaren ardatza, Erromantizismoko figura nagusietako bat ere badena, eta mugimendu artistiko horri eskainia dago Euskadiko Orkestraren Denboraldia. Konpositore bohemiarraren 4. Sinfonia interpretatuko da, bere gainontzeko sinfoniak baino laburragoa dena, baita orkestrako instrumentu kopuru neurritsuagokoa ere, eta kontraste handia dago abentura sinfoniko berri honi ekin aurretik idatzi zuen Hirugarren sinfoniarekin. Laugarrena 1901. urtean estreinatu zen Munichen, konpositorea bera zuzendari zela.

Bychkov, munduko zuzendari onenetako bat, 2018tik Txekiar Orkestra Filarmonikoaren titularra, Euskadiko Orkestrarekin eta Serena Saenz soprano gaztearekin batera arituko da sinfonia hau interpretatzen. Bi saiotan entzun ahal izango da: ostiralean, martxoak 5, 18:00etan eta 20:15ean, Iruñeko Baluarte Auditoriumean, eta larunbatean, martxoak 6, Bilboko Euskalduna Jauregian, 19:30ean.

Martxoak 5: abonu-kontzertu bikoitza Iruñean

Denboraldiko ahalik eta kontzertu gehien mantentzeko eta 2020ko azarotik abendura bitartean Baluarteko Auditoriumean hainbat hitzordu galdu izana konpentsatzeko asmoz, Euskadiko Orkestrak saio bikoitza programatu du Iruñean, Bychkovek zuzenduko duena, ostiral honetan, martxoak 5 (18:00 eta 20:15), Abonu Denboraldiaren baitan.

Kontzertu bikoitz honetarako sarrerak salgai daude euskadikoorkestra.eus-en 10 eurotik aurrera.

Martxoak 6: Musika-Música Bilbon

Ohi bezala, Euskadiko Orkestrak Bilboko Musika-Musika Jaialdian parte hartuko du aurten ere. Bilboko Udalak 36 kontzertu programatu ditu martxoaren 5etik 7ra egingo den eta Viena hiriari eskaini zaion aurtengo jaialdirako. Euskadiko Orkestrak edizio honetako ezinbesteko hitzorduetako bat eskainiko du, larunbatean, martxoak 6, 19:30ean, Euskalduna Jauregian.

Kontzertu honetarako sarrerak agortuta daude.

Informazio gehiago