Euskadiko Orkestrak Musika Gela zikloaren baitan haur eta gazteei eskaintzen dizkien jardueren artean, ibilbide luze eta finkatuena duen atala Musika Familian kontzertuena da. Haurrek familiekin gozatzeko kultur aisialdiko eskaintza honek 25 urte daramatza orkestraren egitarauan.

Atal honen barruan bi ekoizpen eskainiko dira Donostian 21-22 Denboraldian: Living Room Music, urtarrilaren 22an Miramonen izango dena saio bikoitzean (11:00 / 12:30), eta Euskadiko Orkestra Cirkus, urtarrilaren 29an Kursaaleko ganbera-aretoan (18:00). Ikuskizun hauetarako sarrerek 3 eta 7 euro bitarteko prezioa dute eta euskadikoorkestra.eus webgunearen bidez eros ahal izango dira. Kursaalen leihatilan eta webgunean ere egongo dira salgai.

Batetik, 6 eta 10 urte bitarteko haurrei zuzendutako Living Room Music ikuskizunak honako istorio hau kontatzen du: lau musikari berrogeialdia egin behar izatearen ondorioz harrapatuta geratzen dira urrutiko hiri bateko apartamentu batean. Familiako kideengandik urrun, derrigorrez konfinatuta, nahasita eta urduri samar, musika pixka bat egiteko aukera ematen duten etxeko elementu guztiak aztertzen dituzte. Anthony Lafargue, Hector Marques, Igor Arostegi eta Gorka Catediano perkusiojoleak izango dira protagonistak, Ana Hernandez Sanchiz aktorearekin batera.

Bestetik, 3 eta 6 urte bitarteko haurrentzako Euskadiko Orkestra Cirkus ikuskizuna alaitasun eta fantasiazko eztanda bat da, XIX. mende amaierako eta XX. mende hasierako musiken bidez sortutakoa. Pieza txiki eta dibertigarriak, horien estiloaren adierazgarri bikainak direnak eta kolorez, exotismo melodiko eta tinbrikoz beterik daudenak. Kontzertu honek gure entzule txikiei musikaren magia helaraziko die, zirkuaren magiari lotuz. Orkestrako musikariek osatutako talde instrumentalak interpretatuko du musika, eta lagun izango ditu Irati Gonzalez Jaimerena eta Koldo Arakistain akrobatak eta ‘Pituxa’ clowna (Itziar Saenz de Ojer).

Donostian egingo diren Musika Familian kontzertuek El Diario Vascoren babesa dute, eta horietatik Kursaalen egingo dena, Euskadiko Orkestra Cirkus, Kursaal Eszenarekin lankidetzan prestatu da

Musika Familian kontzertuak Gasteizen

Bestalde, Euskadiko Orkestrak beste bi Musika Familian kontzertu eskainiko ditu Gasteizen: urtarrilaren 30ean (17:00 / 18:30) Garcia Lorca Antzokiak arestian aipatutako Euskadiko Orkestra Cirkus hartuko du, eta apirilaren 10ean Principal Antzokian Botadun katuaren txanda izango da, Per Poc txotxongilo-taldearen ekoizpena, lehendabizikoz euskaraz emango dena. Ikuskizun hauetarako sarrerak urtarrilean zehar jarriko dira salgai.

Arabako hiriburuko kontzertuek, bestalde, Gasteizko Udalaren Antzoki Sarearen lankidetza dute.

Informazio gehiago

21-22 Denboraldiko Miramongo Matinéeen seigarren hitzordua, urteko azkena, berezia izango da; izan ere, ohiko ganbera-talde txikien ordez, kontzertura bertaratzen direnek orkestra osoaz gozatu ahal izango dute Maurice Ravelen obrak interpretatzen, Robert Treviñoren gidaritzapean. Hitzordua larunbat honetan izango da, abenduak 11, 11:00etan, Euskadiko Orkestraren Miramongo egoitzan.

Maurice Ravel, Ziburun jaiotakoa eta mundu osoan interpretatua, Euskadiko Orkestrak bere bezala aldarrikatzen duen musikagilea da. Haren musikan murgildu nahi izan zuen Robert Treviñok orkestraren titulartasuna hartu zuenean, eta ordutik askotan zuzendu ditu bere obrak, bai Denboraldiko kontzertuetan, bai Parisko Théâtre des Champs-Élyséesen orkestrak 2020ko urtarrilean egin zuen estreinaldi handian ere.

Orain dela gutxi, Treviñok eta Euskadiko Orkestrak Ravelen orkestra-obrak barne hartzen dituen disko bat grabatu eta argitaratu dute Ondine diskoetxearen zigilupean, egilearen euskal nortasuna sakon aztertzeko helburuarekin, baita orkestrak konpositorearen hizkuntzaz dakiena eta ulertzen duena munduarekin partekatzeko ere. Disko honek —La Valse, Alborada del gracioso, Rapsodie espagnole, Une barque sur l'océan, Pavane pour une infante défunte eta Boléro obrak barne hartzen dituenak— hain kritika onak jaso ditu nazioarteko prentsa espezializatuaren aldetik, ezen Euskadiko Orkestrak bigarren grabazio bat egitea erabaki baitu, hain bere sentitzen duen konpositore honen orkestra-lan gehiago bilduko dituena.

Miramongo Matinée honetan entzungo diren lau lanak Ravel sinfonikoenaren grabazio berri honetan sartuko dira: Shéhérazade, Menuet Antique, Valses nobles et sentimentales eta Ma mère l'oye. Disko hau ere Ondine diskoetxeak argitaratuko du, 2022 urtean zehar.

Edukiera-arrazoiak direla-eta, larunbat honetako Matinéerako ez da sarrerarik salduko. Hala ere, euskadikoorkestra.eus webgunean eros daitezke Denboraldiko gainerako Matinéetarako sarrerak.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio kontzertua ikustera doazen abonatuei. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

EiTBk eta Euskadiko Orkestrak aurrera jarraitzen dute pasa den Denboraldian ekindako Denboraldiko kontzertuen grabazio eta zabalkunderako konpromiso partekatuarekin. Horri esker, bihartik aurrera (abenduak 4) eta larunbatetan, 11:00etan, ETB2k orkestraren 21-22 Denboraldiko kontzertuak emango ditu. Honako hauek dira datozen kontzertuak:

• Abenduak 4: Brahms Fest. Zuzendaria: Robert Treviño. Piano-solista: Tom Borrow.
• Abenduak 11: Tchaikovsky + Gaigne 1. Zuzendaria: Jaume Santonja.
• Abenduak 18: Tchaikovsky + Gaigne 2. Zuzendaria: Jaume Santonja.
• Abenduak 25: Shostakovich + Ginastera. Zuzendaria: Robert Treviño. Harpa-solista: Xavier de Maistre.

Kontzertuak Euskalduna Jauregian grabatu ditu ETBk. Hurrengo emisioen egutegia aurrerago emango da ezagutzera.

Informazio gehiago

Euskadiko Orkestrak bihartik aurrera 21/22 Denboraldiko hirugarren kontzertu-programari egingo dio aurre, Dmitri Xostakovitx eta Alberto Ginastera konpositoreei eskainitakoa, Robert Treviño titularra zuzendari izango duena eta Xavier de Maistre harpista handia protagonista gisa izango duena. Kontzertuak abenduaren 3tik 10era izango dira ohiko lau hiriburuetan, guztiak 19:30ean:

• Abenduak 3, ostirala: Gasteizko Principal Antzokia.
• Abenduak 7, asteartea: Iruñeko Baluarte Auditoriuma.
• Abenduak 8, asteazkena: Bilboko Euskalduna Jauregia.
• Abenduak 9, osteguna: Donostiako Kursaal Auditoriuma.
• Abenduak 10, ostirala: Donostiako Kursaal Auditoriuma.

EROSI SARRERAK HEMEN

Xavier de Maistre azken hamarkadetako eragin handieneko harpajolea da, segur aski. Hastapen profesionalak miragarriak izan ziren, zalantzarik gabe: 16 urte besterik ez zituela hasi zen nazioarteko lehiaketa garrantzitsuak irabazten eta 22 urte zituela lortu zuen harpa bakarlariaren postua Bavierako Irratiaren Orkestran. Hiru urte geroago, Vienako Orkestra Filarmonikoko harpajole solista bihurtu zen, eta hamaika urtez aritu zen postu horretan. Hala ere, De Maistrek Vienari agur esatea erabaki zuen, bakarlari-ibilbideari ekiteko. Ordutik aurrera, munduko orkestra eta zuzendari onenekin batera jo du eta gainera, musika-tresnaren ordezkari onena bihurtu da mundu klasikoaren barruan. Horrez gain, publikoaren artean ezagutarazteko ahalegin handia egin du.      

De Maistrek askotan parte hartu du Euskadiko Orkestrarekin. Orkestrak 1997tik 2012ra Claves Records diskoetxearekin grabatu zuen Euskal Konpositoreen Bilduma ospetsuan izan zuen parte-hartzeetako bat De Maistrek, 15 euskal egileren beste hainbeste album monografikoko bilduman, alegia. Harpajolea Tomas Garbizu eta Aita Madinari eskainitako diskoetan izan zen, Cristian Mandealek zuzendu zituenak, eta 2004an eta 2005ean argitaratuak, hurrenez hurren. Gainera, 2007an orkestraren Abonu Denboraldian parte hartu zuen Aita Madinaren eta Carl Reineckeren lanak interpretatzen, eta, bisita hori aprobetxatuz, harpa-errezitaldia eskaini zuen Miramongo Matinéeetan. Hamalau urte geroago, Euskadiko Orkestraren kontzertu-programa batean parte hartuko du berriz, azken urteotan arrakasta ugari pilatu ostean. De Maistrek Salzburgora ere joan behar zuen orkestrarekin batera, abenduaren erdialdean Grosses Festspielhaus-en hiru kontzertu emateko, baina duela gutxi iragarri den bezala, Covidak eragindako egungo egoerak bidaia hori bertan behera uztera behartu du orkestra.

Harparen eskutik, Alberto Ginastera konpositore argentinarren musikara hurbilduko gara. Harparako kontzertua 1956an konposatu zuen, eta 1965ean estreinatu zuten Nicanor Zabaletak eta Filadelfiako Orkestrak. Musika-tresnaren ia alderdi guztiak erakusten ditu partiturak: dantza-erritmo boteretsuak ezartzeko gaitasunetik hasita, melodia liriko delikatuetara, idiomatismoz eta birtuosismoz betetako edozein harpajoleren nahitaezko orri bihurtu da kontzertua.

Dmitri Xostakovitxen 10. Sinfonia, kontzertuak amaitzeko entzungo duguna, 1953ko udan idatzi zuen, Stalin hil eta hilabete gutxira, eta ez dakigu zenbaterainoko inspirazioa hartzen duen harengandik. Herbert von Karajanek hamargarren hau Xostakovitxen 15 sinfonietatik perfektuenentzat jotzen zuen.

Sarrerak salgai daude saio guztietarako euskadikoorkestra.eus-en, baita auditorioen webgune eta leihatiletan ere, 10 eurotik 35 eurora.

Informazio gehiago

Robert Treviño titularraren zuzendaritzapean, orkestrak solista gisa Xavier de Maistre sona handiko harpajolea eramateko asmoa zuen abenduan Salzburgora, hiru egunez jarraian programa bikoitza eskaintzeko, aurreikuspen guztien arabera beteta egongo zen areto baten aurrean. Xavier de Maistre programatuta dago datozen egunetan (abenduaren 3tik 10era) eskainiko ditugun kontzertuetan, Salzburgon aurkeztuko zenaren aurrerapen izango zirenetan.

Salzburgoko bisita aspaldidanik ari zen antolatzen orkestra, pandemia baino denbora dezente lehenago. Hiri austriarreko Udako Jaialdia eta ‘Jaialdien Areto Handia’-ren programazioa Europaren erdiguneko musika klasikoko hitzordu garrantzitsu eta prestigiodunenetakoen artean daude. Berriki eszenatoki horren gainean aritu dira Berlingo Filarmonikoa, Vienako Filarmonikoa eta Chicagoko Orkestra Sinfonikoa, besteak beste. Euskadiko Orkestra 80ko hamarkadaren hasieran aritu zen estreinakoz Salzburgon, baina ordutik ez da itzuli izan. Duela bi urte jaso zuen gonbidapena hiru kontzertu eskaintzeko bi programa ezberdinekin Robert Treviñoren batutapean, baina pixkanaka okerrera egin duen pandemiagatiko egoerak eraman du desplazamendu hau azken unean bertan behera uztera. Antolatuta zeuden kontzertuen sustatzaileak orkestrari atzeratutako hitzordu hauek berrartzeko ordezko datak proposatu dizkio, 2023 edo 2024an, eta horretan ari dira lanean sustatzaile eta orkestra.

Salzburgoko hitzordu musikal garrantzitsu hau zela-eta, Euskadiko Orkestrak bere agenda aldatu eta ohiko konpromiso batzuk alde batera utzi behar izan zituen, esaterako, El Diario Vascoren Gabon Kontzertu tradizionala, datorren abenduaren 16an Nafarroako Orkestra Sinfonikoak bere gain hartuko duena. Hitzordu horren faltan, Euskadiko Orkestrak Austriarako bidaiaren ordez abenduko egun horietan Raveli buruzko bigarren disko bat grabatuko du. Ideia hau duela hilabete batzuetatik zegoen mahai gainean, kontuan hartuz Raveli eskainitako orkestraren lehen lana, Ondine diskoetxeak aurten argitaratutakoa, nazioartean arrakasta handia izaten ari dela.

Informazio gehiago

Miramongo Matinéeek aurrera jarraitzen dute 21-22 Denboraldiko bosgarren hitzorduarekin, Arima Boskoteak eskainiko duena larunbat honetan, azaroak 27, 11:00etan, Euskadiko Orkestraren Miramongo egoitzan. Taldea osatzen duten bost musikariak Euskadiko Orkestrako kideak dira: Laura Balboa (biolina), Nathalie Dabadie (biolina), Delphine Dupuy (biola), Natacha Dupuy-Scordamaglia (biola) eta Pascale Michaud (biolontxeloa).

Hitzordu berri hau Mozarten 2. Hari-kintetoarekin hasiko da. 1787ko transkripzio bat da, bost urte lehenago idatzi zuen Haize-oktetorako Serenatarena. Mozartek arrazoi ekonomikoengatik egin zuen antza transkripzio hau, baina ez zuen ausaz aukeratu obra dramatiko hau, izan ere, serenata honen tonalitate tragikoa eta kontrapuntuaren erabilera hariaren sonoritate kameristiko hutsei oso ondo egokitzen baitzaie. Horregatik, oso gutxi aldatu zuen jatorrizko obra bertsio honetan.

Ondoren, Mendelssohnen 1. Hari-kintetoa eskainiko du taldeak. Gaztaroko obra bat da, 1826an konposatua, 17 urte besterik ez zituenean. Kintetoa 1830-1832an berrikusi zuen konpositoreak Europan egin zuen bira batean: hasierako minuetoaren ordez intermezzo bat jarri zuen, 1832ko hasieran tuberkulosiak jota hil zen Eduard Rietz bere lagun biolinistaren omenez idatzia.

Sarrera solteak (10€) salgai daude euskadikoorkestra.eus webgunean eta Kursaal Auditoriumeko leihatilan. Gainera, leku librerik geratuko balitz, orkestraren egoitzako leihatilan bertan eros ahal izango lirateke kontzertuaren egunean.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio kontzertua ikustera doazen abonatuei. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

Hasiera batean bide ezberdinetatik doazen bi munduk bat egin dute une batean eta Gutizia eman dute emaitza gisa. Delicatessen moduko lan honek modu naturalean uztartu ditu euskal kulturan hain sustraituta dagoen instrumentu bat, txistua, eta orkestra sinfoniko bat. Horretan jardun ziren lanean otsailean Miramonen Garikoitz Mendizabal eta Euskadiko Orkestra, txistu eta orkestrarako idatzitako obra-sorta baten grabazioa egiten eta ondorengo hedapena prestatzen. Lan hau Orpheus Classical zigilupeko disko bikoitz batean argitaratu berri da, eta dagoeneko eskuragarri dago saltoki nagusietan eta Spotify eta iTunes bezalako plataforma digitaletan. Gainera, Durangoko Azokan ere eskuratu ahal izango da.

Grabazioak guztira bederatzi obra hartzen ditu barne, batzuk berriki idatziak eta besteak bertsio berri gisa aurkeztuak. Jatorri ezberdinetako musikagileek idatzitako lanak diren heinean, musika-bilduma hau bidaia bat da bere horretan. Lan hauetako gehienek honako hau estreinaldia dute, eta historia eta motibazio ezberdinak dituzte: Kenyari omenaldi bat (Karibu Peponi); gizakiak bizitza osoan barrena bizitzen dituen emozioen erakustaldi bat (Leyenda); txistuaren aldarrikapena orkestrarekin parekatzen den instrumentu gisa (Symphony-Concerto); edo Libanoko konpositore Naji Hakimena, euskal doinuak izan dituena inspirazio-iturri txistua instrumentu-bakarlari gisa aurkezteko hiru mugimenduko kontzertu baten forma klasikoan (Txistu eta orkestrarako kontzertua).

Bilboko Txistulari Bandaren zuzendari Garikoitz Mendizabal (Zestoa, 1973) txistuaren interpretazioan, defentsan eta sustapenean pertsonaia oso garrantzitsua da. Azken urteetan lankidetza-sorta nabarmena egin du musikagile garaikideekin errepertorio berriak jorratzeko asmotan. Esan daiteke Gutizia horren guztiaren fruitua dela. Horrela dio berak:

“Ukaezina da musika berria den neurrian, txistu eta orkestrarako literatura areagotu eta aberasten duela, zalantzarik gabe. Eta hori izan da, urte hauetan guztietan, nire nahia eta nire saiakera ondorengo belaunaldiei begira. Bistakoa da, baita ere, euskal musikagileek zein atzerrikoek idatzi dutela hain gurea den instrumentuarentzat. Etorkizunean izango diren txistulariei utzi nahi nieke orkestra handi batez lagundurik jotzeko aukera eta material gehiago. Bide batez, oso ohikoak ez diren musika-tresna batzuekin egiten ari diren moduan (akordeoia, gitarra, etab.), txistuak ere izango du, naturaltasunez, orkestra sinfoniko batekin aritzeko aukera gehiago, bai Euskal Herrian bai atzerrian. Euskal kulturaren nazioartekotze-prozesuan tresna eta baliabide ezin hobea izan daitekeela sinetsita nago, baieztatu ahal izan baitut zeinen erreakzio zirraragarria izan ohi duten entzuleek gure txistua entzutean orkestra baten laguntzaz. Besterik gabe, zuen eskuetan jartzen dut nire denbora, gogoa eta ilusioa”.

Euskadiko Orkestrarentzat bi munduok uztartzea euskal kultura sustatu eta hedatzeko bokazioari jarraipena emateko abagunea da, oraingo honetan nabarmen sustraitutako eta tradizio handiko instrumentu baten bidez. Lankidetza honek bat egiten du aurreko beste batzuekin: txalaparta (Kalakan), gaita (Gaiteros de Elciego) eta trikitixa (Kepa Junkera), besteak beste. Proiektu-sorta horren guztiaren xedea euskal kulturaren ondare aberatsa jaso, defendatu eta bultzatzea izan da.

Proiektuko gainontzeko parte-hartzaileak

Euskadiko Orkestraren zuzendari elkartu Jaume Santonja izan da Gutizia-ren zuzendaritza musikalaz arduratu dena. Bere hitzetan:

“CDaren grabazio honek hasieratik egin zidan ilusio berezia, Euskadiko Orkestraren zuzendari elkartu gisa egindako lehen kolaborazio profesionaletako bat izan baitzen. Plazer handia izan da Garikoitz ezagutzea, baita euskal musika tradizionalaren munduan pixka bat sartzea ere. Historikoki, instrumentuen bilakaera horizonteak hedatzea eskatzen zuten instrumentista birtuosoei lotuta egon da, bai teknikoki, bai intelektualki. Eta hori da, argi eta garbi, proiektu honetan gertatzen dena, Garikoitzen birtuosismoak ez ezik, bere ikuspegiak eta behar intelektualek ere txistuaren horizonteak zabaltzera eramaten baitute. Errepertorioa zabaltzearen bidez egiten du, ia obra guztiak propio horretarako sortuak izan baitira, eta instrumentu tradizional hau solista paperean agertzea ahalbidetzen baitute. Emaitza paregabea da, zeharkako eraginak ditu eta parte-hartzaile guztientzat izan da aberasgarria. Poztekoa da proiektu hau grabazio bat ere izatea, jasota uzten baitu egindako lana. Espero dezagun ez dela horretan bakarrik geratuko eta benetan pizgarria izatea formatu hori zuzenean esperimentatu ahal izateko etorkizuneko emanaldietan, bai bertan, bai atzerrian”.

Jaume Santonja, Garikoitz Mendizabal, konpositore eta orkestraz gain, proiektu honetan honakook ere parte hartuko dute: Naroa Intxausti sopranoa, Francisco Escudero Kontserbatorioko haur abesbatza (Eva Ugaldek zuzentzen duena), eta Iñaki Telleria eta Marc Blanes produkzioan eta soinuan.

Fitxa teknikoa

CD 1: 40’

• Txistu eta orkestrarako kontzertua.............. Naji Hakim [13’]
• Symphony-Concerto................................... David Johnstone [22’]
• Reflexiones sobre la longitud del viento..... Fernando Velázquez [5’]

CD 2: 44´

• Karibu Peponi............................................. Javier Martinez Campos [11’]
• Zaharra....................................................... Anonimoa (Orkestrazioa: Pierre Wekstein) [4’]
• Leyenda...................................................... Eduardo Moreno [17’]
• Iruten ari nuzu............................................. Anonimoa (Orkestrazioa: Kepa de Miguel) [4’]
• Atzo ttun ttun............................................... Anonimoa (Orkestrazioa: Kepa de Miguel) [5’]
• Hora stacatto............................................... Grigoras Dinicus (Orkestrazioa: Iñaki Urkizu) [3’]

Parte-hartzaileak:

• Garikoitz Mendizabal, txistularia.
• Euskadiko Orkestra.
• Naroa Intxausti, sopranoa.
• Francisco Escudero Kontserbatorioko Haur Abesbatza. Zuzendaria: Eva Ugalde.
• Jaume Santonja, orkestra-zuzendaria.
• Iñaki Telleria eta Marc Blanes, produkzioa eta soinua.

Informazio gehiago

Covid-19aren mundu mailako pandemiaren ondorioz programazioa murriztuta izan zuen trantsizio-denboraldi baten ondoren, indartsu itzuli da Euskadiko Orkestraren hezkuntza-zikloa, Musika Gela. Orkestraren programazioan aspaldidanik erabat sustraituta dagoen hezkuntza-ziklo hau herritarrei, oro har, eta gazteei, bereziki, musika gerturatzeko helburuarekin jaio zen. Bere baitan eskaintzen diren kontzertuek izaera didaktikoa, pedagogikoa eta gertukoa daukate, eta askotariko adin-taldeei zuzendutakoak dira, aurtengoan 3 urtetik hasi eta 12 urteraino.

Urtez urte, Euskadiko Orkestrak bere hezkuntza-zikloaren baitan estreinatzeko produkzio propioak prestatzeko apustua egiten du, jatorrizko gidoiak erabiliz.

Denboraldi honetan Euskadiko Orkestra Cirkus estreinatuko dugu, gure publiko gazteenari zuzendutako kontzertu-ikuskizuna. Alaitasun eta fantasiazko eztanda izango da, musika dibertigarrien eta zirkuaren magiaren bidez. Urtarrilean Living Room Music iritsiko da, pasa den denboraldian arrakasta handia izan zuen ekoizpen propioa, aurten ere jarraituko duena. Lau perkusiojolek eta aktore batek munduko edozein hiritako apartamentu batera eramango gaituzte bertan, konfinamenduari umore-ukitua emateko eta edozein objekturekin musika sortzea posible dela erakusteko. Perraulten Botadun katua lanarekin emango diogu amaiera Denboraldiari; literatura unibertsaleko klasiko honek Luis XIV.aren gorteko giroan murgilduko gaitu ikuskizun bisual eta poetiko baten bidez. Per Poc txotxongilo-taldeak sortutako ekoizpen hau lehendabizikoz moldatu da euskarara Musika Gelaren baitan aurkezteko.

Hiru produkzio hauek bi formatutan aurkezten dira, Eskola Kontzertuetan eta Musika Familian kontzertuetan.

Haur Hezkuntza, Lehen Hezkuntza eta Bigarren Hezkuntzako 9.000 ikasle baino gehiagok parte hartuko dute aurtengo Eskola Kontzertuetan. 100 ikastetxe ingurutik datozen ikasleak dira, dozenaka herri ezberdinetakoak: besteak beste, Astigarraga, Azpeitia, Berrobi, Donostia, Ezkio-Itsaso, Gasteiz, Lizartza, Olaberria, Orio, Urretxu, Zestoa eta Zumaia. Eskola Kontzertuek Gipuzkoako Batzar Nagusien, Donostiako Udalaren Hezkuntza Sailaren eta Kursaal Eszenaren lankidetza dute gaur egun.

Bestalde, ekoizpenak Musika Familian kontzertu formatuan eskainiko dira Donostian eta Gasteizen. Euskadiko Orkestrak haur eta gazteei eskaintzen dizkien jardueren artean, ibilbide luze eta finkatuena duen atala Musika Familian kontzertuena da. Haurrek familiekin gozatzeko kultur aisialdiko eskaintza honek 25 urte daramatza orkestraren egitarauan. Donostian egingo diren Musika Familian kontzertuek El Diario Vascoren babesa dute, eta horietatik Kursaalen egingo dena, Euskadiko Orkestra Cirkus, Kursaal Eszenarekin lankidetzan prestatu da. Arabako hiriburuko kontzertuek, bestalde, Gasteizko Udalaren Antzoki Sarearen lankidetza dute. Ikuskizun guztietarako sarrerek 3 eta 7 euro bitarteko prezioa dute eta euskadikoorkestra.eus webgunearen bidez eros ahal izango dira. Dagokion aretoaren leihatiletan eta webguneetan (kursaal.eus, principalantzokia.org) ere egongo dira salgai. Donostiako kontzertuen sarrerak abenduaren 14an jarriko dira salgai eta Gasteizkoenak urtarrilaren amaieran.

Jarraian ekoizpenei buruzko informazio xehea aurki daiteke, baita Eskola Kontzertuen eta Musika Familian kontzertuen datak ere:

1. EUSKADIKO ORKESTRA CIRKUS

3 < 6 urte
40’
Itziar Prieto*, biolina
Didier Bousquet*, tronpeta
Amaia Zipitria, pianoa
‘Pituxa’ Itziar Saenz de Ojer, clowna
Irati Gonzalez Jaimerena, akrobaziak
Koldo Arakistain, akrobaziak
Mikel Cañada, gidoia

*Euskadiko Orkestraren kideak

Jazza, musika herrikoia, aretoetako musika eta musika kultua nahasten dituzten XIX. mende amaierako eta XX. mende hasierako musiken bidez sortutako alaitasun eta fantasiazko eztanda bat da Euskadiko Orkestra Cirkus. Pieza txiki eta dibertigarriak, horien estiloaren adierazgarri bikainak direnak eta kolorez, exotismo melodiko eta tinbrikoz beterik daudenak. Kontzertu honen helburua gure entzule txikiei musikaren magia helaraztea da, zirkuaren magiari lotuz; malabareak, magia jokoak, clownak, ekilibristak eta surrealismoaren eta herrikoiaren artean dagoen musika. Hau guztia gure orkestrako musikariek osatutako talde instrumentalaren eta arte eszenikoetako beste kolaboratzaile batzuen bitartez sortua.

ESKOLA KONTZERTUAK

Azaroak 18, 19, 22, 23, 24, 25
9:45 / 11:15
Miramon. Orkestraren egoitza
Haur Hezkuntza

MUSIKA FAMILIAN

Donostia
Urtarrilak 29
18:00
Kursaal. Ganbera aretoa

Gasteiz
Urtarrilak 30
17:00 / 18:30
García Lorca Antzokia

2. LIVING ROOM MUSIC

6 < 10 urte
50’
Anthony Lafargue*, perkusioa
Héctor Marqués*, perkusioa
Igor Arostegi*, perkusioa
Gorka Catediano, perkusioa
Ana Hernández Sanchiz, aktorea
Mikel Cañada, gidoia

*Euskadiko Orkestraren kideak

Lau musikari berrogeialdia egin behar izatearen ondorioz harrapatuta geratzen dira urrutiko hiri bateko apartamentu batean. Familiako kideengandik urrun, derrigorrez konfinatuta, nahasita eta urduri samar, musika pixka bat egiteko aukera ematen duten etxeko elementu guztiak aztertzen dituzte: mahaiak, koilarak, haizemaileak, ura, lanparak, loreontziak, eskailerak, zabor-ontziak, eskuak, ahotsak...  Kanpoaldearekin duten kontaktu bakarra auzotar indiskretu bat da, beren egoera berean dagoena. Hura auzokideen "zarata" izugarriengatik pazientzia galtzen hasten da eta etengabe gogaitzen jardungo da...

ESKOLA KONTZERTUAK

Urtarrilak 19, 21, 24, 25, 26, 27
9:45 / 11:15
Miramon. Orkestraren egoitza
Lehen eta Bigarren Hezkuntza

MUSIKA FAMILIAN

Donostia
Urtarrilak 22
11:00 / 12:30
Miramon. Orkestraren egoitza

3. BOTADUN KATUA

6 < 10 urte
55’
Euskadiko Orkestraren talde instrumentala
Per Poc, txotxongilo-taldea
Aarón Zapico, zuzendari artistikoa
Rakel Ezpeleta, narratzailea

Euskadiko Orkestrako talde instrumental barroko batek eta Per Poc txotxongilo-taldeak Botadun katua literatura unibertsalaren klasikoan oinarritutako ikuskizuna proposatzen dute, Luis XIV.aren gortean eta bere garaiko musikan murgiltzen gaituena. Kontzertu bisual eta poetikoa izango da, formatu handiko eta musika barrokoko antzerki victoriarrarekin, haur eta gazteek kulturalki garai distiratsu baten aberastasun musikala deskubritu dezaten. Per Poc taldearen ekoizpen hau lehendabizikoz eskainiko da euskaraz.

ESKOLA KONTZERTUAK

Martxoak 30, 31
9:45 / 11:30
Kursaal
Lehen Hezkuntza

MUSIKA FAMILIAN

Gasteiz
Apirilak 10
18:00
Principal Antzokia

Entsegu Ireki bat eta beste jarduera batzuk

Kontzertu-eskaintza zabal hau are gehiago osatuko da beste ekintza batzuekin. Musika Gelak berriz helduko die Entsegu Irekiei. Entsegu hauek kolektiboei, ikastetxeei, kontserbatorioei eta unibertsitateei, besteak beste, daude irekiak, eta aukera eskaintzen dute orkestrak kontzertu baten aurretik egiten duen azken lana gertutik ezagutzeko. Denboraldi honetako Entsegu Irekia martxoaren 10ean izango da, 11:00etan, Kursaal Auditoriumean, eta bertan orkestrak Berliozen Sinfonia Fantastikoa interpretatuko du, Pinchas Steinbergen batutapean.

Gainera, orkestrak Musika Gelaren azken aldiko ekoizpen arrakastatsuenetako bat berreskuratuko du, Mozart, Nannerl eta Lagunak, kasu honetan Durangoko Musika Hamabostaldiaren baitan eskaintzeko, azaroaren 27an, 19:00etan, San Agustin Antzokian. Wolfgang Amadeus Mozart konpositore ezaguna eta bere arreba Maria Anna Mozart ‘Nannerl’ protagonista izango dituen ikuskizuna da, 3 eta 6 urte arteko haurrei zuzendua.

Era berean, ikastetxeetako irakasleentzako tailerrak egiten jarraituko da, Eskola Kontzertuak aldez aurretik prestatzeko helburuarekin.

Musika Gela YouTuben

Musika Gelak atal propioa du Euskadiko Orkestraren YouTubeko kanalean, eta bertan zikloko ikuskizun osoak ikus daitezke, besteak beste, Mozart, Nannerl eta Lagunak, Ekomusik eta Isiltasunaren haitzuloa. Gainera, aurtengo Denboraldiko kontzertuen bideoak ere igoko dira bertara, ikuskizunak gauzatu ahala.

Lankidetza-sare zabala

Euskadiko Orkestraren Musika Gelak inguruko erakunde ugarirekin elkarlana sustatzen jarraitzen du. Lankide ditu Gipuzkoako Batzar Nagusiak, Donostiako Udalaren Hezkuntza Saila, Gasteizko Udal Antzoki Sarea, Kursaal Eszena eta El Diario Vasco.

Informazio gehiago

Euskadiko Orkestrak eta Kalakanek Elkar diskoetxearekin grabatutako diskoa merkaturatu ostean, lana aurkezteko lau kontzertu eskaini zituzten urriaren 18ko astean Iruñeko Baluarte Auditoriumean, Gasteizko Principal Antzokian, Bilboko Arriaga Antzokian eta Donibane Lohizuneko Jai Alain. Aurkezpen-bira hau amaitze aldera, bosgarren eta azken zuzeneko bat eskainiko dute bi euskal taldeek bihar, azaroak 5, 19:30ean, Donostiako Kursaal Auditoriumean.

Azken sarrera batzuk jarri berri dira salgai Donostiako kontzerturako, 25 euroan, eta euskadikoorkestra.eus webgunean eros daitezke, baita Kursaalen webgune eta leihatilan ere. Aipatutako prezioen gainean Euskadiko Orkestraren abonatuek %25erainoko deskontua izango dute kontzertuaren sarreretan.

EROSI SARRERAK HEMEN

Euskal musika tradizionala oinarri duen proiektua

Kalakan eta Euskadiko Orkestraren arteko elkarlan honen muina euskal musika tradizionala da. Urte luzeetan Kalakan taldeak euskal folklorea berritzen egin duen saiakera mundu klasikoarekin uztartzea da proiektuaren helburu nagusia.

Hirukoteak argitaratu dituen hainbat kanta orkestraren mintzairara ekarri ditu Jagoba Astiazaran konpositoreak, tartean, euskal kantagintzan aski ezagun diren Iruten ari nuzu edo Kantuz. Kalakan taldeak erabili ohi dituen hainbat instrumentu tradizionalek ere presentzia nabarmena dute, txalaparta, txirula edo alboka esaterako, zeintzuk beste instrumentuekin batera orkestran txertatu diren.

Horretaz guztiaz gain, Xalbador eta Bilintx bertsolarien hainbat hitz jaso dira, propio proiektu honetarako sortu diren pieza batzuetan, baita Mikel Laboa eta Joxean Artzeren Txoria txori kantaren bertsio guztiz ezberdin bat ere.

Diskoko kantak

1. KLKN (Kalakan). Erabateko estreinaldia.
2. Andria alargune (Herrikoia / Kalakan)
3. Iruten ari nuzu (Herrikoia)
4. Rebeleon (Herrikoia / Kalakan)
5. Loriak udan (Herrikoia / Bilintxen hitzak). Erabateko estreinaldia.
6. Bereterretxeren Kantoria (Herrikoia / Kalakan)
7. Ikusten duzu goizean (Herrikoia /Jean-Baptiste Elissambururen hitzak). Erabateko estreinaldia.
8. Montebideoko berriak (Herrikoia / Kalakan)
9. Egun bakea zutaz (Herrikoia / Xalbadorren hitzak). Erabateko estreinaldia.
10. Txoria Txori (Mikel Laboa / Joxean Artze)
11. Belatzarenak (Kalakan)
12. Kantuz / Sagarra jo (Herrikoia / Kalakan)

Kontzertuetan diskoko kanta hauek interpretatzeaz gain, beste hainbat sorpresa ere eskainiko dituzte Kalakanek eta Euskadiko Orkestrak.

KlasikAT: Kalakanen jauzia esparru sinfonikora

Diskoa eta aurkezpen-kontzertuak barne hartzen dituen proiektu honetan Jamixel Bereau, Xan Errotabehere eta Bixente Etchegarayek osatzen duten hirukoteak esparru sinfonikora jauzi egin du Euskadiko Orkestraren eskutik eta Juanjo Oconen zuzendaritzapean. Grabazioa osatzen duten euskal tradizioko hamabi kanten orkestrarako moldaketak Jagoba Astiazaranek egin ditu.

Proiektu hau orkestrak hainbat urtez abian izan duen KlasikAT ekimenaren baitan kokatzen da. Duela bi hamarkada baino gehiagotik egitasmo honen bidez Euskadiko Orkestrak apustu irmoa egin du ohiko errepertorioetatik haratago doazen beste generotako musika-ekoizpenaren alde. Besteak beste, esparru sinfonikokoak ez diren honako artistekin egin du lan orkestrak: Benito Lertxundi, Golden Apple Quartet, Michel Camilo, Emilio Aragón, Kepa Junkera, Mike Oldfield, Ken Zazpi, Dr. Deseo, Zea Mays, Huntza eta Izaro.

Informazio gehiago

Miramongo Matinéeek aurrera jarraitzen dute 21-22 Denboraldiko laugarren hitzorduarekin, Izai Ganbera Taldeak eskainiko duena, ‘Allegro e Spiritoso’ izenburupean, larunbat honetan, azaroak 6, 11:00etan, Euskadiko Orkestraren Miramongo egoitzan. Taldea osatzen duten zazpi musikariak Euskadiko Orkestrako kideak dira: Xabier de Felipe (biolina), Monika Mazur (biola), Paloma Torrado (kotrabaxua), Silvia Esain (oboea), Marco Caratto (fagota), Marcos Garrido (tronpa) eta Cristian Palau (tronpa).

Izai ganbera-taldeak Matinée honetan bereziki XVIII. mendean eta orokorrean musika klasikoaren historian garrantzitsuenetako eta oparoenetako bi diren konpositoreen obrak eskainiko ditu: Wolfgang Amadeus Mozart eta Joseph Haydn. Divertimentoak eta serenatak ohikoak ziren entretenimendu-musika gisa egile hauen bizi-garaian Europako erdiguneko gorteetan. Oro har, serenatak haize zabalean interpretatzeko pentsatuak zeuden eta divertimentoak, aldiz, lokal itxietarako idatzi ohi ziren. Sarri bi konposizio-mota hauen aurretik martxak jo ohi zituzten garaiko musikariek.

Areto barruan gertatuko den Matinée honetan, garai hartako logika bera jarraituz, saioa Mozarten Bi tronpa, fagot eta harirako martxa laburrarekin hasiko da. Kontzertuak izango duen festa-giroa ezartzeaz gain, obra horrek egile beraren K.205 Divertimentoari emango dio bide. Divertimento hau Mozarten lehen ekoizpen-garaikoa da eta egin zen urteagatik seguraski Salzburgon estreinatu zuten konpositorea Hieronymus von Colloredo artzapezpikuarentzat lanean ari zen bitartean.

Matinéea amaitzeko ganbera-taldeak Joseph Haydnen Fa maiorreko kasazioa divertimentoa interpretatuko du, Nikolaus I Esterházyko Printzearen kapera-maisu zeneko garaian idatzitakoa.

Bi divertimentoak originaltasun handikoak dira, festa-girokoak eta garairako birtuosismo handikoak, eta horrek argi erakusten du estreinatu zituzten musikariek zer nolako kalitatea zuten. Bi obrek proposatzen duten formazio musikala ez da oso ohikoa, eta XVIII. mendetik aurrera oso konpositore gutxik erabili zuten.

Sarrera solteak (10€) salgai daude euskadikoorkestra.eus webgunean eta Kursaal Auditoriumeko leihatilan. Gainera, leku librerik geratuko balitz, orkestraren egoitzako leihatilan bertan eros ahal izango lirateke kontzertuaren egunean.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio kontzertua ikustera doazen abonatuei. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago