Irailaren 27an ekin zion Euskadiko Orkestrak Iruñean 'Brahms Fest' programari, Johannes Brahms musikagile alemaniar handiari eskainitako jaiari. Ordutik, Euskadiko Orkestra maratoi hau osatzen duten hamar kontzertuetako lehen bostetan, Robert Treviñoren gidaritzapean, Dmitri Makhtin biolinista eta Alexey Stadler biolontxelojolea izan ditu lagun Brahmsen Biolin eta biolontxelorako kontzertu bikoitzaren interpretazioan. Orkestrak bere 1. eta 2. sinfoniak ere interpretatu ditu hitzordu hauetan.

Jaialdiaren erdialdera iritsita, Euskadiko Orkestrak 'Brahms Fest' jaialdiaren bigarren kontzertu-blokeari ekingo dio orain, eta Tom Borrow pianojole israeldarra hartuko du lehen aldiz, Pianorako 1. eta 2. kontzertuak interpretatzeaz arduratuko dena. Kontzertu horietan, orkestrak Brahmsen sinfonien integrala biribilduko du, Hirugarren eta Laugarrenarekin.

21 urterekin, Borrow (Tel Aviv, 2000) pianoaren nazioarteko bakarlari handien artean lekua egiten ari da. International Piano argitalpen ospetsuaren arabera, Borrow 'hurrengo urteetan jarraitu beharrekoa den pertsona baten definizio perfektua da'. Borrow bere jatorrizko herrialdeko orkestra handiekin estreinatu da, eta dagoeneko nazioarteko beste orkestra ospetsu batzuekin kolaboratzen ere ari da. Hurrengo konpromisoak Royal Philharmonic Orchestra, Londresko Filarmonika, Txekiar Filarmonika eta New Jersey eta Sao Pauloko Sinfonikoak hartzen ditu barne.

Bost kontzertu 'Brahms Fest'-en bigarren zatian

​

• Urriak 5 (19:30): Principal, Gasteiz. 3. Programa
• Urriak 6 (19:30): Euskalduna, Bilbo. 3. Programa
• Urriak 8 (19:30): Kursaal, Donostia. 4. Programa
• Urriak 11 (19:30): Baluarte, Iruña. 4. Programa
• Urriak 13 (19:30): Kursaal, Donostia. 4. Programa

Johannes Brahms, XIX. mendeko ezinbesteko konpositorea

Brahms adeitsua, gustu xume eta sentimendu handiko gizona zen, burges txiki onbera, eta Beethoven, Berlioz edota Liszt gaztearen muturreko pasioekin alderatuta, bizitzaren aurrean jarrera erabat ezberdina zuen. Hala eta guztiz ere, XIX. mendeko musika-obra bikainenetako batzuk sortu zituen. Nabarmentzekoak dira bere lau sinfoniak, ezinbestekoak munduko orkestra guztietan.

Brahmsen musika hautatu zuen Robert Treviñok titular gisa gure orkestran egin zuen lehenengo kontzertuan, eta Brahms oraindik ere indarrean dagoela erakutsiko du Brahms Fest jaialdi honetan. Nazioartean sona handi duten hiru solista gonbidatu ditu abagune honetarako: Dmitri Makhtin biolinjolea, Alexey Stadler biolontxelojolea eta Tom Borrow pianojolea.

Brahms Fest-en programari buruzko informazio gehiago hemen.

Sarrerak salgai 10 eurotik aurrera

Iruñeko, Donostiako, Gasteizko eta Bilboko hamar kontzertuetarako sarrerak salgai daude dagoeneko, 10 eta 35 euro artean, euskadikoorkestra.eus webgunean, eta baita auditoriumetako leihatiletan eta webguneetan ere.

Gure orkestrako abonatuei, ikasleei, 30 urtetik beherakoei, 65 urtetik gorakoei, langabetuei eta beste kolektibo batzuei (Artium, Kursaal Eszena…) tarifa bereziak aplikatuko zaizkie sarrerak erostean. Horrez gain, 30 urtetik beherako lagunek aukera izango dute gune guztietako sarrerak 10 eurotan erosteko, kontzertua hasi baino 30 minutu lehenago dagokion aretoko leihatilan, beti ere eserlekuak libre badaude.

Informazio gehiago

Americascapes grabazioko lau konpositore amerikarrek ospe handiko musika idatzi zuten, baina horietako batek ere ez zuen ‘arrakasta’ handi bat izan, Bernstein, Gershwin edo Coplandek bezala. Gutxi ezagutzen diren lanak dira, zirkuitu handietatik urruntzen den errepertorioa, eta Euskadiko Orkestrak Robert Treviño titular estatubatuarraren agindupean grabatu ditu.

Adituek diotenez, Charles Martin Loeffler, Henry Cowell, Carl Ruggles eta Howard Hanson egileen musika album berean aurkitzea oso ezohikoa bada ere, Treviñok egokitzat jo du errepertorio berri hau biltzea. Bere esplorazioa oso urrutira eraman du eta Hansonen pieza bat aurkitu du, Before the Dawn, mende bat itxaron behar izan duena bere errekonozimendu eta lehen mundu mailako grabaziorako. Aipatzekoa da, baita ere, Charles Martin Loefflerren La Mort de Tintagiles obran viola d’amore instrumentuak duen bakarlari-papera, Delphine Dupuy orkestrako solistak bere gain hartu duena.

Obren zerrenda:

1. Before the Dawn (Howard Hanson). Lehen grabazioa mundu mailan.
2. La Mort de Tintagiles  (Charles Martin Loeffler). Solista: Delphine Dupuy.
3. Orkestrarako bariazioak (Henry Cowell).
4. Evocations (Carl Ruggles).

Non eskuratu disko hau

Diskoa Spotify, Apple Music, iTunes eta antzerako beste plataforma digital nagusietan eskuragai dago urriaren 1etik aurrera.

Bestalde, ale fisikoak ere jarri dira salgai merkataritza-establezimendu ugaritan.

Informazio gehiago

Larunbat honetan, urriak 2, hasiko da Euskadiko Orkestraren egoitzan Miramongo Matinéeen 2021/2022 Denboraldia, hogeita hamargarrena, eta zenbaki biribil hori ospatzeko berritasunez betea dator. Ganbera-musikako ziklo hau klasikoa da asteburuko musika-eskaintzan eta Kutxa Fundazioaren laguntza du sortu zenetik.

Edizio berezi honetako plater nagusietako bat orkestraren Abonu Denboraldiko kontzertuetan parte hartuko duten bakarlarien presentzia izango da. Dmitri Makhtin biolinistak eta Alexey Stadler biolontxelojoleak Euskadiko Orkestrak 21/22 Kontzertu Denboraldiari hasiera emateko prestatu duen Brahms Jaialdiaren hedapen bat eskainiko dute lehen bi Matinéeetan (urriak 2 eta 9), Julia Siciliano pianista ondoan dutela. Kategoria horretan bertan, Varvara pianojole handia ere izango dugu otsailean errezital bat eskaintzen, sona handiko gonbidatu gisa.

Aipamen berezia merezi duten beste proposamen batzuk honako hauek dira: orkestra osoak pasa den denboraldian eskaini behar zuen Ravelen obren Entsegu orokor irekiaren berreskuratzea, eta Living Room Music Musika Gelaren ekoizpen arrakastatsua, orkestraren perkusio-sailak egokitzapen batzuekin Miramongo Matinéeetara eramango duena.

Eta, nola ez, orkestrako musikariek osatutako zenbait musika-taldek, tartean Arima Boskotea eta Auskalo Quartet, errepertorio klasikoko obrak eskainiko dizkigute, baita ganbera-musikaren altxor ezkutuagoak ere.

Hona hemen Miramongo Matinéeen Denboraldiko egutegia:

1. Urriak 2: Dmitri Makhtin / Alexey Stadler / Julia Siciliano
2. Urriak 9: Dmitri Makhtin / Alexey Stadler / Julia Siciliano
3. Urriak 23: Hirusta Trio
4. Azaroak 6: Izai Ganbera-Taldea
5. Azaroak 27: Arima Boskotea
6. Abenduak 11: Euskadiko Orkestra (Entsegu orokor irekia)
7. Urtarrilak 15: Euskadiko Orkestra Quartet
8. Urtarrilak 29: Euskadiko Orkestraren Perkusio-Saila
9. Otsailak 12: Varvara
10. Otsailak 26: Barrococo
11. Martxoak 12: Minerva Laukotea
12. Apirilak 2: Ensemble Moderne Érard
13. Apirilak 23: Euterpe Boskotea
14. Maiatzak 7: Kuadrilla Lagunak
15. Maiatzak 21: Auskalo Quartet
16. Ekainak 4: Galerna Haizeak

Brahms Fest ganbera-musikan larunbat honetako lehen Matinéean

Euskadiko Orkestrak Johannes Brahmsi eskainitako jai handi batekin hasi du 21-22 Kontzertu denboraldia. Irail amaieran eta urri hasieran konpositore alemaniarraren errepertorio sinfoniko zabala eskainiko du bere ohiko lau hiriburuetan. Tour de force horretan Euskadiko Orkestra lagunduko duten Dmitri Makhtin biolinjolea eta Alexey Stadler biolontxelojolea Miramongo Matinéeen hasiera honetan egongo dira, Julia Siciliano pianojolearekin batera, musika-maratoi hau bi larunbatetan zehar ganbera-errepertoriora ere zabaltzeko asmoarekin.

Lehen Matinéeari hasiera emango dion Biolinerako 2. Sonata 1886an idatzi zuen Brahmsek Suitzako Thun hirian, bertan uda pasatzen ari zen bitartean, eta une oso emankor eta oparo batean zegoenean. Bertako edertasun naturalean oinarrituta dagoen sonata honetaz gain, uda horretan beste hainbat obra ere idatzi zituen: Kontzertu bikoitza, Biolontxelorako 2. Sonata, Pianodun 3. Trioa eta Biolinerako 3. Sonata. Brahmsek Thunen Hermine Spies kontraltoa ezagutu zuen eta erabat maitemindu zen berataz; horregatik, sonata hau, maitasun-gutun bat bezala hartzen da, eta konpositoreak inoiz idatzi dituen melodia jainkotiarrenetako batzuez betea dago.

Bestalde, 1880 eta 1882 artean idatzitako eta kontzertu hau itxiko duen Pianodun 2. Trioak lau mugimendu ditu: lehenengoan, pianoa laguntzaile soil gisa hasten da eta aurrerago protagonismoa hartzen du, eta engainagarriki, obra azken kodan amaierara iristen dela dirudi; bigarrena, malenkoniatsuagoa, Brahmsek hungariar estiloarekiko zuen liluraren adibide bat da; hirugarrena bere intentsitateagatik da nabarmengarria, nahiz eta intentsitate isila izan; eta azkenak estasizko 'finale' distiratsu batera garamatza.

Abonamenduak eta sarrerak

Iaz bere historiako ediziorik zalantzagarriena eta zailena izan ondoren, Miramongo Matinéeen zikloak baikortasun handiagoarekin ekingo dio 21-22 Denboraldiari.

Oraindik indarrean jarraituko dute segurtasun-neurriek, hala nola musukoa nahitaez erabiltzea eta gel hidroalkoholikoarekin eskuen higienea mantentzea, baina edukiera %75era handitu da eta besaulkiak zenbakitu gabe izatera pasako dira berriz. Aurreko denboraldiarekin alderatuta, beste berrikuntzetako bat da esku-programak formatu fisikoan egongo direla berriz ere eskuragai auditoriumeko sarreran.

Edukiera-murrizketak malgututa ere, ezin izango da sarrerarik saldu Denboraldiaren hasiera honetan (eta kontrakorik esaten ez den bitartean), egungo abonatuekin aretoaren edukiera bete egiten baita. Egoera hori aldatzea espero da eta, hala bada, salgai jartzen diren sarrera solteak 10 euroko prezio bakarrean eskuratu ahal izango dira, euskadikoorkestra.eus webgunean, Kursaal Auditoriumeko leihatilan eta orkestraren Miramongo egoitzako leihatilan (kontzertuaren egunean bertan, 10:30etik aurrera).

Autobus-zerbitzua indarrean

Kontzertuak larunbatetan izango dira, goizeko 11:00etan, Euskadiko Orkestraren Miramongo egoitzan. Horietara eroso joateko, Euskadiko Orkestrak doako autobus zerbitzua eskaintzen jarraituko du Matinéetara bertaratu nahi duen ororentzat. 10:25ean abiatzen da Gipuzkoa Plaza 4 zenbakitik eta geldialdiak egiten ditu Antso Jakituna 18an eta Madril Hiribidea 34an.

Informazio gehiago

Joan den Denboraldiari Schubert musikagilearen obrekin eman genion hasiera, eta Euskadiko Orkestraren aurtengo ekitaldiari, berriz, Johannes Brahms konpositoreari eskainitako festa handi batekin ekingo zaio. Orkestrak, kasu honetan, maratoi musikal bat proposatzen du, egilearen sinfoniak, Biolin eta biolontxelorako kontzertu bikoitza eta pianorako bere bi kontzertuak barne hartuko dituena. Hori guztia Robert Treviño titularrak zuzendutako hamar hitzordutan, ohiko lau hiriburuetan, irailaren 27tik urriaren 13ra bitartean (ikus datak, orduak eta auditorioak beherago).

Johannes Brahms, XIX. mendeko ezinbesteko konpositorea

Brahms adeitsua, gustu xume eta sentimendu handiko gizona zen, burges txiki onbera, eta Beethoven, Berlioz edota Liszt gaztearen muturreko pasioekin alderatuta, bizitzaren aurrean jarrera erabat ezberdina zuen. Hala eta guztiz ere, XIX. mendeko musika-obra bikainenetako batzuk sortu zituen. Nabarmentzekoak dira bere lau sinfoniak, ezinbestekoak munduko orkestra guztietan.

Brahmsen musika hautatu zuen Robert Treviñok titular gisa gure orkestran egin zuen lehenengo kontzertuan, eta Brahms oraindik ere indarrean dagoela erakutsiko du Brahms Fest jaialdi honetan. Nazioartean sona handi duten hiru solista gonbidatu ditu abagune honetarako: Dmitri Makhtin biolinjolea, Alexey Stadler biolontxelojolea eta Tom Borrow pianojolea.

Brahms Fest-en programari buruzko informazio gehiago hemen.

Lau programa ezberdin hamar kontzertutan

Hiri guztietako hitzorduak batuta, orkestrak lau programa ezberdin eskainiko ditu guztira, eta nahi duten ikusleek kontzertu-maratoi oso bat egin ahal izango dute.

• Irailak 27 (19:30): Baluarte, Iruña. 1. Programa
• Irailak 28 (19:30): Kursaal, Donostia. 1. Programa
• Irailak 29 (19:30): Kursaal, Donostia. 2. Programa
• Irailak 30 (19:30): Principal, Gasteiz. 2. Programa
• Urriak 2 (19:30): Euskalduna, Bilbo. 2. Programa
• Urriak 5 (19:30): Principal, Gasteiz. 3. Programa
• Urriak 6 (19:30): Euskalduna, Bilbo. 3. Programa
• Urriak 8 (19:30): Kursaal, Donostia. 4. Programa
• Urriak 11 (19:30): Baluarte, Iruña. 4. Programa
• Urriak 13 (19:30): Kursaal, Donostia. 4. Programa

Sarrerak salgai 10 eurotik aurrera

Iruñeko, Donostiako, Gasteizko eta Bilboko hamar kontzertuetarako sarrerak salgai daude dagoeneko, 10 eta 35 euro artean, euskadikoorkestra.eus webgunean, eta baita auditoriumetako leihatiletan eta webguneetan ere.

Gure orkestrako abonatuei, ikasleei, 30 urtetik beherakoei, 65 urtetik gorakoei, langabetuei eta beste kolektibo batzuei (Artium, Kursaal Eszena…) tarifa bereziak aplikatuko zaizkie sarrerak erostean. Horrez gain, 30 urtetik beherako lagunek aukera izango dute gune guztietako sarrerak 10 eurotan erosteko, kontzertua hasi baino 30 minutu lehenago dagokion aretoko leihatilan, beti ere eserlekuak libre badaude.

21-22 Denboraldia

Erronkaz betetako Denboraldi baten hasiera

Duela urtebete programatutako artista eta obren berreskuratzea, musika asko eta ona deskubritzea eta euskal gizartean dugun rol garrantzitsua berrestea izango dira Kontzertu Denboraldi berri honen ardatz nagusiak.

Helburu hau bete ahal izateko, gure auditoriumetara sona handiko artista garrantzitsu ugari bertaratuko dira: Pinchas Steinberg, Pinchas Zukerman, Pietari Inkinen, Mei-Ann Chen, Varvara, Yulianna Avdeeva eta Dmitri Makhtin. Gure lurraldeko artista handiak ere izango ditugu gurean, besteak beste, Ainhoa Arteta, Asier Polo, Donostiako Orfeoia eta Iruñeko Orfeoia.

Euskal sorkuntzaren alde egiten jarraituko dugu eta Pascal Gaigne, Joël Mérah eta Teresa Catalanen obrak estreinatuko ditugu. Azken bi sorkuntza hauek Euskadiko Orkestrak enkargatutakoak dira Elkano: Mundubira musika bidelagun proiektuaren baitan, 2022ko udazkenean azken helmugara iritsiko den ekimena.

Denboraldiko mugarri garrantzitsuenen artean aipatzekoak dira hasierako Brahms jaialdia, Brahmsen Requiema eta Mahlerren 2. Sinfonia bezalako obra handien presentzia (azken hau gure berpizte kolektiboa irudikatzeko) eta Zhou eta Dutilleux bezalako konpositore ez hain ezagunen musikaren deskubrimendua.

21-22 Denboraldiari buruzko informazio gehiago eta materialak hemen.

Informazio gehiago

Euskadiko Orkestrak erronka berriekin datorkion Denboraldiari ekiteko prestatu duen 'Brahms Fest' jaialdirako sarrera solteen salmenta dagoeneko abian dago, irailaren 27an Iruñean hasiko dena eta ondoren Donostian, Gasteizen eta Bilbon jarraituko duena.

Robert Treviñok zuzenduko duen hamar kontzertuko musika-festa handi honetan Johannes Brahmsen gaurkotasuna eta eragina defendatuko ditu. Bere lau sinfoniekin batera, XIX. mendeko musika monumentu garrantzitsuenetakotzat hartzen direnak, Biolin eta biolontxelorako kontzertu bikoitza eta pianorako bi kontzertuak ere jorratuko ditu orkestrak, bakarlari garrantzitsuak ondoan dituela: Dmitri Makhtin biolinista, Alexey Stadler biolontxelojolea eta Tom Borrow pianojolea.

EROSI SARRERAK HEMEN

Sarrerak salgai 10 eurotik aurrera

Iruñeko, Donostiako, Gasteizko eta Bilboko hamar kontzertuetarako sarrerak salgai daude dagoeneko, 10 eta 35 euro artean, euskadikoorkestra.eus webgunean, eta baita auditoriumetako leihatiletan eta webguneetan ere. Hiri guztietako hitzorduak batuta, orkestrak lau programa ezberdin eskainiko ditu guztira, eta nahi duten ikusleek kontzertu-maratoi oso bat egin ahal izango dute.

• Irailak 27 (19:30): Baluarte, Iruña. 1. Programa
• Irailak 28 (19:30): Kursaal, Donostia. 1. Programa
• Irailak 29 (19:30): Kursaal, Donostia. 2. Programa
• Irailak 30 (19:30): Principal, Gasteiz. 2. Programa
• Urriak 2 (19:30): Euskalduna, Bilbo. 2. Programa
• Urriak 5 (19:30): Principal, Gasteiz. 3. Programa
• Urriak 6 (19:30): Euskalduna, Bilbo. 3. Programa
• Urriak 8 (19:30): Kursaal, Donostia. 4. Programa
• Urriak 11 (19:30): Baluarte, Iruña. 4. Programa
• Urriak 13 (19:30): Kursaal, Donostia. 4. Programa

Tarifa bereziak eta Azken ordu gaztea

Gure orkestrako abonatuei, ikasleei, 30 urtetik beherakoei, 65 urtetik gorakoei, langabetuei eta beste kolektibo batzuei (Artium, Kursaal Eszena…) tarifa bereziak aplikatuko zaizkie sarrerak erostean.

Horrez gain, 30 urtetik beherako lagunek aukera izango dute gune guztietako sarrerak 10 eurotan erosteko, kontzertua hasi baino 30 minutu lehenago dagokion aretoko leihatilan, beti ere eserlekuak libre badaude.

Noiz jarriko dira 21-22 Denboraldiko gainontzeko programen sarrerak salgai?

Covid-19 pandemiaren aurkako neurrien arabera, 21/22 Denboraldiko sarrera solteak kontzertu-egunak hurreratu ahala jarriko dira salgai. Informazio eguneratua euskadikoorkestra.eus webgunean.

Informazio gehiago

Apiril amaieran Miramonen lehen entseguak egiten hasi zirela iragarri zenetik, grabazioaren fase guztiak bete dituzte eta dagoeneko prest daude Euskadiko Orkestra eta Kalakan euskal tradizioko hamabi kanta barne hartzen dituen diskoa argitaratu eta ezagutzera emateko. Elkar diskoetxearen zigilupean kaleratuko da lana urrian, eta zuzenean aurkeztuko dute Euskal Herrian barrena bost kontzertutan: urriaren 20an Iruñeko Baluarte Auditoriumean (19:30); urriaren 21ean Gasteizko Principal Antzokian (19:30); urriaren 22an Bilboko Arriaga Antzokian (19:30); urriaren 23an Donibane Lohizuneko Jai Alaien (20:00); eta azaroaren 5ean Donostiako Kursaal Auditoriumean (19:30).

Kontzertu guztietarako sarrerak salgai daude 10 eta 26 euro bitartean euskadikoorkestra.eus webgunean, baita aretoen webgune eta leihatiletan ere.

Euskal musika tradizionala oinarri duen proiektua

Kalakan eta Euskadiko Orkestraren arteko elkarlan honen muina euskal musika tradizionala da. Urte luzeetan Kalakan taldeak euskal folklorea berritzen egin duen saiakera mundu klasikoarekin uztartzea da proiektuaren helburu nagusia.

Hirukoteak argitaratu dituen hainbat kanta orkestraren mintzairara ekarri ditu Jagoba Astiazaran konpositoreak, tartean, euskal kantagintzan aski ezagun diren Iruten ari nuzu edo Kantuz. Kalakan taldeak erabili ohi dituen hainbat instrumentu tradizionalek ere presentzia nabarmena dute, txalaparta, txirula edo alboka esaterako, zeintzuk beste instrumentuekin batera orkestran txertatu diren.

Horretaz guztiaz gain, Xalbador eta Bilintx bertsolarien hainbat hitz jaso dira, propio proiektu honetarako sortu diren pieza batzuetan, baita Mikel Laboa eta Joxean Artzeren Txoria txori kantaren bertsio guztiz ezberdin bat ere.

Diskoko kantak

1. KLKN (Kalakan). Erabateko estreinaldia.
2. Andria alargune (Herrikoia / Kalakan)
3. Iruten ari nuzu (Herrikoia)
4. Rebeleon (Herrikoia / Kalakan)
5. Loriak udan (Herrikoia / Bilintxen hitzak). Erabateko estreinaldia.
6. Bereterretxeren Kantoria (Herrikoia / Kalakan)
7. Ikusten duzu goizean (Herrikoia /Jean-Baptiste Elissambururen hitzak). Erabateko estreinaldia.
8. Montebideoko berriak (Herrikoia / Kalakan)
9. Egun bakea zutaz (Herrikoia / Xalbadorren hitzak). Erabateko estreinaldia.
10. Txoria Txori (Mikel Laboa / Joxean Artze)
11. Belatzarenak (Kalakan)
12. Kantuz / Sagarra jo (Herrikoia / Kalakan)

Kontzertuetan diskoko kanta hauek interpretatzeaz gain, beste hainbat sorpresa ere eskainiko dituzte Kalakanek eta Euskadiko Orkestrak.

Kontzertuak

• Urriak 20, asteazkena (19:30), Iruña, Baluarte.
• Urriak 21, osteguna (19:30), Gasteiz, Principal.
• Urriak 22, ostirala (19:30), Bilbo, Arriaga.
• Urriak 23, larunbata (20:00), Donibane Lohizune, Jai Alai.
• Azaroak 5, ostirala (19:30), Donostia, Kursaal.

Prezioak

• Iruña: 18<25€
• Gasteiz: 18<25€
• Bilbo: 10<25€
• Donibane Lohizune: 10<26€
• Donostia: 18<25€

Aipatutako prezioen gainean Euskadiko Orkestraren abonatuek %25erainoko deskontua izango dute kontzertuen sarreretan, Donibane Lohizunen izan ezik.

KlasikAT: Kalakanen jauzia esparru sinfonikora

Diskoa eta aurkezpen-kontzertuak barne hartzen dituen proiektu honetan Jamixel Bereau, Xan Errotabehere eta Bixente Etchegarayek osatzen duten hirukoteak esparru sinfonikora jauzi egin du Euskadiko Orkestraren eskutik eta Juanjo Oconen zuzendaritzapean. Grabazioa osatzen duten euskal tradizioko hamabi kanten orkestrarako moldaketak Jagoba Astiazaranek egin ditu.

Proiektu hau orkestrak hainbat urtez abian izan duen KlasikAT ekimenaren baitan kokatzen da. Duela bi hamarkada baino gehiagotik egitasmo honen bidez Euskadiko Orkestrak apustu irmoa egin du ohiko errepertorioetatik haratago doazen beste generotako musika-ekoizpenaren alde. Besteak beste, esparru sinfonikokoak ez diren honako artistekin egin du lan orkestrak: Benito Lertxundi, Golden Apple Quartet, Michel Camilo, Emilio Aragón, Kepa Junkera, Mike Oldfield, Ken Zazpi, Dr. Deseo, Zea Mays, Huntza eta Izaro.

Informazio gehiago

Americascapes grabazioko lau konpositore amerikarrek ospe handiko musika idatzi zuten, baina horietako batek ere ez zuen ‘arrakasta’ handi bat izan, Bernstein, Gershwin edo Coplandek bezala. Gutxi ezagutzen diren lanak dira, zirkuitu handietatik urruntzen den errepertorioa, eta Euskadiko Orkestrak Robert Treviño titular estatubatuarraren agindupean grabatu ditu.

Adituek diotenez, Charles Martin Loeffler, Henry Cowell, Carl Ruggles eta Howard Hanson egileen musika album berean aurkitzea oso ezohikoa bada ere, Treviñok egokitzat jo du errepertorio berri hau biltzea. Bere esplorazioa oso urrutira eraman du eta Hansonen pieza bat aurkitu du, Before the Dawn, mende bat itxaron behar izan duena bere errekonozimendu eta lehen mundu mailako grabaziorako. Aipatzekoa da, baita ere, Charles Martin Loefflerren La Mort de Tintagiles obran viola d’amore instrumentuak duen bakarlari-papera, Delphine Dupuy orkestrako solistak bere gain hartu duena.

Robert Treviño: “Proiektu zoragarria da hau”

Treviñoren hitzetan: "Proiektu zoragarria da hau. Denbora asko behar izan genuen lau lan egokiak aukeratzeko. Musika estatubatuarraren kalitate bikaineko erreferentzia-puntuak aurkitu nahi nituen, Loefflerren tapiz epikotik eta Rugglesen distiratik hasi eta Hansonen aurkikuntza zoragarri edo Cowellen asmakuntza txundigarrietaraino. Eta beti konpositore estatubatuarrek Europatik jaso duten eraginari buruz hitz egiteko joera dugun bitartean, kontrako norabidean Atlantikotik haratago eragina izan duten lau figura estatubatuar ditugu hemen. Eta lan horietako bakoitzean sorkuntza- eta berrikuntza-zentzu hori entzun dezakezu. Zalantzarik gabe, lau pieza hauek benetan ederrak dira, eta belarri gehiagotara iritsi beharko lukete".

Grabatutako obrak:

1. La Mort de Tintagiles  (Charles Martin Loeffler). Solista: Delphine Dupuy.
2. Evocations (Carl Ruggles).
3. Before the Dawn (Howard Hanson). Lehen grabazioa mundu mailan.
4. Orkestrarako bariazioak (Henry Cowell).

Non eskuratu diskoa urriaren 1etik aurrera

Diskoa Spotify, Apple Music, iTunes eta antzerako beste plataforma digital nagusietan egongo da eskuragai urriaren 1etik aurrera.

Bestalde, ale fisikoak ere jarri dira salgai merkataritza-establezimendu ugaritan.

Ondine

Ondine Finlandiako diskoetxea da, eta datozen urteetarako grabazio-akordioa du Treviñok. Naxos taldearen parte den zigilu hau munduko diskoetxe independente prestigiotsuenetakoa da eta sarri egin ditu grabazioak Christoph Eschenbach, Vladimir Ashkenazy, Esa-Pekka Salonen eta Hannu Lintu bezalako zuzendari garrantzitsuekin. “Ondinek soinez soin lan egiteko aukera eskaintzen duten artistak baino ez ditu hautatzen”, dio diskoetxearen zuzendari fundatzaile Reijo Kiilunen-ek, “Artista gutxi batzuk bakarrik aukeratzen ditugu, ohiko errepertorioaren interpretazio ameslari eta irudimentsuak egiteko gaitasuna dutenak, baita obra musikal ezezagunagoak publiko aurrean ezagutzera emateko gogamen abenturazalea dutenak ere”.

Americascapesekin batera doan liburuxkak Pulitzer saria irabazi zuen Tim Page kazetariaren saiakera bat eta Treviñoren ohar pertsonal bat biltzen ditu.

‘Ravel’ diskoaren harrera bikaina

Euskadiko Orkestrak eta Robert Treviñok Ondinerako egindako aurreko diskoari harrera ona egin dio nazioarteko kritikak. Radio France, ABC Classic FM, Record Geijutsu eta Limelight bezalako argitalpen eta hedabideetan 'Asteko disko nabarmena' bezalako erreferentziak daude, baita kritika bikainak ere Gramophone, BBC Music Magazine eta beste argitalpen entzutetsu askotan. Duela gutxi, Classica Frantziako aldizkari nagusiaren hilabete honetako edizioak bost izarrekin saritu du albuma eta honako hau dio: "Treviño, 37 urterekin, goranzko bidean dagoen izar bat bezala aurkezten da. Ravelen hautaketa hau konpositore ziburutarraren espezialista handien ondoan koka daiteke. Euskadiko Orkestra kalitate handikoa da, tonu sendo baina finarekin, eta ezin hobeto sintonizatuta dauden musikariekin".

Informazio gehiago

Euskadiko Orkestrako musikariak eszenatokira igoko dira berriz merezitako oporraldi baten ostean. Eta, beste urtebetez, Denboraldiari ekingo diote Donostiako Musika Hamabostaldian parte hartuz, abuztuko agendako hitzordu nagusia izango den kontzertu batekin. Kursaal Auditoriumean izango da abuztuaren 21ean, larunbata, 19:30ean.

Victor Pablo Perezek eta Euskadiko Orkestrak, 80ko hamarkadatik gaur egun arte elkarrekin emandako 50 kontzertu baino gehiagoko historia luzea duen formulak, Donostiako Orfeoiarekin bat egingo dute, askotariko obrak biltzen dituen programa batean. Jose Antonio Sainz Alfaro zuzendari izango duen Orfeoiaz gain, Iwona Sobotka sopranoak, Airam Hernandez tenorrak eta Frederic Jost baxuak hartuko dute parte ahotsen atalean.

Dagoeneko sarrerak agortuak dituen kontzertu honen programak honako obrak hartuko ditu barne: Francis Poulenc-en Birjin beltzaren letaniak, Gabriel Fauréren Arrantzaleen meza eta Ludwig Van Beethovenen Kristo olibondoen mendian.

Grabazio- eta entsegu-asteak

Musika Hamabostaldiko kontzertuaz gain, zeinaren entseguak datorren astean izango diren, aste honetatik aurrera orkestra martxan da grabazio batzuk prestatzen, eta horien emaitza datozen hilabeteetan emango da ezagutzera.

Donostiako jaialdian kontzertua eskaini ondoren, orkestrako musikariek irailaren 27tik aurrera gertatuko den Abonu Denboraldiaren hasiera handiaren entseguei ekingo diete. Aurten Brahms Jaialdia egingo da Denboraldia inauguratzeko, konpositore ospetsuaren sinfonien integrala, Biolin eta biolontxelorako kontzertua eta Pianorako kontzertuak barne hartuko dituen jaialdia.

Beste hitzordu garrantzitsu bat etorkizun hurbilean: AECCren 50. urteurrenaren inaugurazio-kontzertua

Denboraldi-hasiera honetan Minbiziaren Aurkako Espainiako Elkartearen 50. urteurrenaren inaugurazio-kontzertua ere aipatzeko modukoa da. Kontzertua Bilboko Euskalduna Jauregian izango da, irailaren 11n, 19:30ean.

Euskadiko Orkestrak eta Donostiako Orfeoiak Ludwig van Beethovenen 9. Sinfonia, ‘Korala’ interpretatuko dute, konpositore alemaniarraren azken sinfonia osoa. 65 minutuko iraupena duen lan hau Juanjo Menak zuzenduko du, eta Minbiziaren Aurkako Espainiako Elkartearen "Minbiziaren ikerketaren 50. urteurrena" ospatzeko 2022 urtean Espainiako hainbat tokitan egingo diren kontzertu-zikloa inauguratuko du.

Sarrerak salgai daude 25 eurotik aurrera. Informazio guztia hemen.

Informazio gehiago

Euskal sorkuntzaren alde egiten jarraituko dugu eta Pascal Gaigne, Joël Mérah eta Teresa Catalanen obrak estreinatuko ditugu. Azken bi sorkuntza hauek Euskadiko Orkestrak enkargatutakoak dira Elkano: Mundubira musika bidelagun proiektuaren baitan, 2022ko udazkenean azken helmugara iritsiko den ekimena.

Denboraldiko mugarri garrantzitsuenen artean aipatzekoak dira hasierako Brahms jaialdia, Brahmsen Requiema eta Mahlerren 2. Sinfonia bezalako obra handien presentzia (azken hau gure berpizte kolektiboa irudikatzeko) eta Zhou eta Dutilleux bezalako konpositore ez hain ezagunen musikaren deskubrimendua.

21-22 Denboraldia optimismo gehiagorekin datorren arren, normaltasunerako itzulera patxadaz hartu nahi du orkestrak eta, horregatik, lehen bi programak 600eko gehienezko edukierarekin daude prestatuta, hurrengoetan zabaltzeko aukera egongo den esperoan.

Abonu Denboraldia

Itxaropen- eta hobekuntza-garai bat ireki da. Gure helburua baikortasuna eta konfiantza berreskuratu eta kontzertu-aretoetara lasai itzultzea da. Denboraldi zail bat utzi berri dugu atzean. Jarduera ugaritu egin dugu eta kontzertuak maratoi-saio bihurtu ditugu publiko guztiarengana iristeko. Guztira 131 kontzertu eskaini ditugu, horietatik 98 Abonu Denboraldikoak (ohiko 50 abonu-kontzertuen ia bikoitza). Musika sinfoniko asko programatu dugu eta orkestra txikiago batentzako errepertorio oso bat planteatu dugu, agertokian ere segurtasun-distantziak mantendu behar izan direlako. Eta lortu dugu. Orain baikortasunaz eta programazio onaz hitz egin behar dugu.

Euskadiko Orkestraren 2021/2022 Abonu Denboraldia irailaren 27an hasiko da Iruñean eta 2022ko ekainaren 8an amaituko da Bilbon. Lehenengo bi programetan saioak bikoizten jarraituko dugu, 20/21 Denboraldian egin dugun bezala: Brahms Fest izeneko lehen saioan 10 kontzertu eskainiko ditugu hamar egunetan ohiko lau hiriburuetan; bigarrenean, Tchaikovsky, arratsalde berean saio bikoitzak programatu dira hiri bakoitzean. Hirugarren programatik aurrera, edukierari dagokionez normaltasun handiagoa lortzea aurreikusten da.

Ildo nagusiak: baikortasuna, aurkikuntza eta ibilbide luzea

Brahmsen sinfonismo handia bezalako adibideek dakarten baikortasunean jarri nahi izan dugu arreta, haren sinfonia guztiak interpretatuz. Beethoven 7. sinfonia eta Berliozen Sinfonia Fantastikoa dira optimismo horren beste adibide batzuk. Denboraldi honetako beste ildo garrantzitsu bat publiko orokorrarentzat hain ezagunak ez diren obren aurkikuntza izango da, Zhou amerikarra eta Dutilleux frantziarraren obrekin. Gainera, Elkano: Mundubira musika bidelagun proiektuari lotutako lanak ere estreinatuko ditugu (Joël Mérah eta Teresa Catalan), baita pandemiari lotutakoak ere (Pascal Gaigne), deskubrimenduaren lan-lerro hori jarraituz.

Ibilbide luzea aipatzen dugunean Robert Treviño orkestrara iritsi zenetik egiten ari den lanaz dihardugu. Adibide garbienetakoa Mahler da: haren 1. Sinfoniarekin estreinatu zen gure orkestraren batutan eta, ordutik, musikagilearen sinfonia eta obra ugari ekarri ditu Treviñok orkestrara. Aurtengoan 2. Sinfonia handiari helduko dio, ‘Berpizkundea‘ izenez ezaguna, berez 19/20 Denboraldirako aurreikusita zegoena baina pandemiaren ondorioz bertan behera geratu zena. Orain inoiz baino zentzu gehiago du lana berreskuratzea, gure bizitzen berpizkundea irudikatzen baitu, Denboraldiaren irudi den larrosak egiten duen modu berean.

Brahms Fest hasteko

20/21 Denboraldiari hasiera eman zion Schuberten sinfonia-maratoiaren ondoren, orkestrak formula errepikatuko du eta Brahms Fest delakoa aurkeztuko du. Konpositore alemaniarraren sinfonia guztiak, Biolin eta biolontxelorako kontzertua eta Pianorako 1. eta 2. Kontzertuak interpretatuko ditu orkestrak ohiko lau hiriburuetan eskainiko duen inaugurazio-programako 10 kontzertuetan banatuta. Robert Treviñok, batutan, hiru bakarlarik eta orkestrak berak emango diote forma lurralde osoa zeharkatuko duen eta erronka musikal berria izango den jaialdi honi.

Robert Treviño Denboraldian

Denboraldiko hamaika programetatik seiri helduko die orkestrako zuzendari titularrak. Brahms Fest bereziaren irekieraren ostean, Xavier de Maistreren harpa protagonista duen programa originala eskainiko du, Treviñoren bidaide izan den Xostakovitxen 10. Sinfonia ere barne hartuko duen programa. Otsailean Bernstein ezagunena eta Zhouren musikaren aurkikuntza uztartuko dituen programa amerikar batek jarraituko dio. Azken txanpan Mahlerren 2. Sinfonia iritsiko da, 'Berpizkundea' izenekoa. Robert Treviño Elkano: Mundubira musika bidelagun zeharkaldira igoko da maiatzean, Vianako Printzea saria jaso berri duen Teresa Catalanen La victoria vacía obraren estreinaldiarekin. Gainera, Denboraldiko aurkikuntzetako bat ere hartuko du programak: Dutilleuxen 1. Sinfonia. Treviñok Wagner, Elgar eta Bartoken obrak ere jorratuko ditu, kasu honetan Pinchas Zukermanekin, eta biolajoleak bere ibilbidean bidelagun izan duen Bartoken Biola kontzertuarekin.

Estreinaldiak eta errepertorio berria

Lehen mundubira egin zenetik 500 urte igaro direla gogora ekartzen duen Elkano: Mundubira musika bidelagun proiektua ibilbide luzeko beste ekimen bat da, Denboraldi honetan jarraipena izango duena eta 2022ko udazkenean amaierara iritsiko dena. Joël Mérahren Jakinduriaren usaina eta Teresa Catalanen La victoria vacíak hartuko dute Denboraldi honetan aurrekoetan Mikel Chamizok eta Mikel Urquizak utzitako lekukoa.

Elkano: Mundubira musika bidelagun proiektuko bi obrei gaineratuko zaie Pascal Gaigneren Urrutiko arimak eta Urruneko azalaken estreinaldia.

Gainera, orkestrak lehendabizikoz interpretatuko ditu hiru obra, publikoarentzat aurkikuntza handia izango direnak: Ginasteraren Harparako kontzertua, Zhouren Orkestrarako kontzertua eta Dutilleuxen 1. Sinfonia.

Zuzendariak, solistak eta abesbatzak

Orkestrak artista mordoa jasoko du berriz ere bere programazioan, baina azpimarratzekoa da berriro ere bakarkako hiru programari helduko diela, bakarlari gonbidaturik gabe, interpretazioan protagonismo handia emango diotenak orkestrari berari.

ZUZENDARIAK: Robert Treviñok presentzia nabarmena izaten jarraituko du sei programarekin eta podiuma beste zuzendari batzuekin partekatuko du gainontzeko programetan: 19/20 Denboralditik berreskuratutako Mei-Ann Chen, Pinchas Steinberg eta Georg Mark; gure orkestraren buru lehendabizikoz arituko den Pietari Inkinen; eta orkestraren zuzendari elkartu Jaume Santonja.

SOLISTAK: Atal honetan, 19/20 Denboraldirako programatutako Yulianna Avdeeva eta Varvara pianistak, Tom Borrow (pianoa) eta Alexey Stadler (biolontxeloa) hartuko ditugu lehen aldiz. Dmitri Makhtin (biolina), Pinchas Zukerman (biola), Xavier de Maistre (harpa) eta ilusio berezia egiten digun Asier Polo (biolontxeloa) bezalako artista handiak berriz izango ditugu gurean. Ahotsetan Ainhoa Arteta sopranoa dugu, Michael Nagy baritonoa, Sarah Fox sopranoa eta Justina Gringyte mezzosopranoa.

ABESBATZAK: Martxoan eta maiatzean bi obra sinfoniko-koral handi eskainiko ditugu. Brahmsen Requiem alemaniarrean Iruñeko Orfeoia izango dugu bidelagun. Bestalde, Mahlerren obra handia, 2. Sinfonia, ‘Berpizkundea’ Donostiako Orfeoiaren ahotsetan entzungo dugu.

Orkestraren beste proiektu batzuk

Udazken diskografikoa

Bere jarduera kontzertistiko garrantzitsuarekin batera, orkestra estilo eta zeregin oso desberdineko grabaketa sorta proiektu batean murgilduta dago. Ekoizpen guztiek dute kalitate-zigilua, eta ingurune desberdinetan eta interes dokumental handiarekin kokatzeko asmoa dute.

AMERICAN COMPOSERS: Udazkenean, Ravelen ondoren, Robert Treviñorekin egindako bigarren grabazio diskografikoa argitaratuko du Euskadiko Orkestrak. Oso ezagunak ez diren konpositore amerikarren ekoizpen sinfonikoan oinarritutako grabazioa da. Dagoeneko egina dago grabazioa eta urriaren hasieran kaleratuko da nazioartean, Ondine diskoetxe finlandiarrarekin, zeinarekin Treviñok grabazio-hitzarmena sinatua duen datozen urteetarako.

KALAKAN: Ipar Euskal Herriko taldearekin izandako lankidetza berria maiatzean erregistratu zen. Orain Elkar diskoetxea editatzen ari da eta azken emaitza urriaren amaierarako eta azaroaren hasierarako programatutako kontzertuetan erakutsiko da, duela urte batzuetatik orkestrak KlasikAt izenpean aurkezten duen crossover zikloaren zeinupean. Orkestrak Izaro, Huntza, Zea Mays, Dr. Deseo edo Ken Zazpi bezalako euskal egileekin partekatzen dituen proiektu horien guztien jarraipena izango da kolaborazio berri hau.

GUTIZIA: Txistuaren unibertso sinfonikoa ardatz duen beste proiektu diskografiko baten izenburua da eta Garikoitz Mendizabal du protagonista. Gutizia txisturako idatzitako lanen bilduma bat da, 80 minutuko musikan bildu dira eta emaitza udazkenerako egongo da prest Orpheus zigilupean.

SOINU-BANDAK: Asko dira Fernando Velazquezen eskutik orkestrak egiten dituen soinu-bandak, hala nola, Patria, Hil Kanpaiak, El inocente telesaila eta Poderoso Victoria film mexikarra. Horiez guztiez gain, datozen egunetan Iciar Bollainek zuzendutako Maixabel filmaren soinu-bandaren grabazioari ekingo dio orkestrak Miramonen, Alberto Iglesias musikariak idatzi duena eta zuzenduko duena.

LIDE TA IXIDOR: Santos Inchaustiren musika daraman haurrentzako ipuin liriko bat da Lide ta Ixidor. Obra honen berreskurapena Bilboko Koral Elkartearen Euskal Opera proiektuaren barruan kokatzen da. Proiektu horren helburua XX. mendearen hasieran Elkarteak enkargatutako euskarazko operen partiturak editatzea eta grabatzea da. Haurrentzako opera hau Bilbon grabatuko dute, eta haur abesbatza eta SCBko abesbatza mistoa izango dira bertan.

RAVEL: Puntu honetan ezinbestekoa da apirilaren hasieran argitaratutako CD hau aipatzea, Ravelen katalogoko lan sinfoniko esanguratsuenekin. Ondine zigiluaren finlandiar egikera darama grabazio honek, eta une honetan Euskadiko Orkestraren nazioarteko pasaporterik onenean bihurtu da. Oihartzun handia izaten ari da planetako toki askotan, Japoniatik eta Australiatik AEBetara, Europatik pasatuz, eta oso kritika onak jaso ditu hedabide espezializatu ospetsuenengandik (Gramophone, France Musique, BBC Music Magazine, Diapason…). Konpositorearen alde euskaldunenaren irakurketa musikalari esker, Treviñok eta orkestrak Ravelen lanaren begirada berri bat eskaini dute grabazio honetan eta, ondorioz, nazioartean oso erakargarri bihurtu dute proposamena.

Partekatutako proiektuak

Orkestrak bere konpromisoa mantenduko du ABAO Bilbao Operaren Denboraldiarekin, Bilboko Musika-Músicarekin eta BBVAko Jakintzaren Mugak Sarien Galarekin. Pandemiaren ondorioz ezin izango du berreskuratu Donostia Zinemaldian Belodromoak eskaini ohi zuen soinu-banden kontzertu tradizionala, baina Donostiako Musika Hamabostaldian eta Musikasten parte hartuko du.

Orkestraren Miramongo Matinéeak eta Musika Gela zikloek aurrera jarraituko dute aurten ere eta aurrerago aurkeztuko dira.

Abonamenduak eta sarrerak

Indarrean dauden edukiera-murrizketek abonamendu berriak egitea eragozten digute, baina itxaron-zerrenda batera pasako diren erreserbak har ditzakegu. Baimendutako edukiera handitzen den heinean, abonatu berriak hartzen hasiko gara. Erreserba horiek orkestraren webgunean (euskadikoorkestra.eus) eta telefonoz (943 01 32 32) egin ahal izango dira.

Orain amaitzen ari garen Denboraldian bezala, sarrera solteen salmenta kontzertuak hurbiltzen diren heinean joango da irekitzen, beti ere eserleku librerik geratuko balitz. Abonamenduen eta sarreren prezioak mantentzea erabaki da Denboraldi honetan.

Mezenasgoa

Gizartean oso beharrezkoa den tresna kulturala dela sinetsita, Euskadiko Orkestrak mezenasgoaren bidez publikoarekin konektatzeko tresna berri bat aktibatu du. Horri esker, lurraldeko proiektu kultural hau garatzen lagundu nahi duten pertsonek beren ekarpenekin egin ahal izango dute.

Mezenasgoa etorkizuneko tresna beharrezko eta osagarria da administrazio publikoen diru-laguntzen politikentzat, eta kultura eta gizartea garatzeko eta laguntzeko bitarteko gisa ezartzen joango da. Orkestrari egindako ekarpenek, edozein modalitatetan, zerga-kenkaria jasotzeko aukera emango dute.

Eskertza

Azkenik, orkestrak eskerrak eman nahi dizkie bere jardueren garapenean parte hartzen duten erakunde eta eragile guztiei: abonatuei eta, oro har, publikoari, erakunde babesleei eta laguntzaileei, kultur eragileei, komunikabideei eta abarri, Euskadiko Orkestraren jarduera ahalbidetzen baitute.

Informazio gehiago