Ohikoa den moduan, Euskadiko Orkestrak aurtengoan ere Bilboko Musika-Música jaialdian parte hartuko du, hogei urte bete dituen honetan. Bi hamarkada hauetan jaialdiak musika-uholde bat ekarri du Bilbora eta erreferente izatera iritsi da mundu guztiko musikazaleen artean.

Bilboko Udalak 36 kontzertu programatu ditu martxoaren 5etik 7ra izango den aurtengo ediziorako. Vienako hiria, musikaren hiriburu nagusia, aukeratu dute edizio honetako protagonista izateko. Hala, 2019an Londresekin eta New Yorkekin hasi eta 2020an Parisekin segitu zuen zikloa itxi da. Bilbo Vienaren pareko bihurtuko da eta martxoko lehen asteburuan musikaren hiriburu bilakatuko da. Mozart, Beethoven, Schubert, Haydn, Brahms eta Mahler, besteak beste, ‘egongo dira’ hirian hiru egunez, musikaren festa ospatzen.

Euskadiko Orkestrak edizio honetako ezinbesteko hitzorduetako bat eskainiko du, larunbatean, martxoak 6, 19:30ean, Euskalduna Jauregian. Semyon Bychkov zuzendari ospetsuaren agindupean eta Serena Saenz sopranoarekin batera, Gustav Mahlerren 4. Sinfoniari aurre egingo dio orkestrak.

Aurretik, ostiralean, martxoak 5, Euskadiko Orkestrak programa bereko kontzertu bikoitza eskainiko du Abonu Denboraldiaren baitan Iruñeko Baluarte Auditoriumean, 18:00etan eta 20:15ean.

Bychkov duela gutxi igo zen Euskadiko Orkestraren podiumera, 2020ko abuztuan, Beethovenen 3. Sinfonia, ‘Eroica’ zuzentzeko, bai Donostiako Musika Hamabostaldian, bai Santanderko Jaialdian. Zuzendariaren eta orkestraren artean harreman bikaina sortu ostean, Bychkovek hilabete batzuk geroago errepikatuko du Euskadiko Orkestraren zuzendari gisa.

Informazio gehiago eta sarreren salmenta

Sarrerak zenbakituta egongo dira eta 6 eta 12 euro artean jarriko dira salgai, otsailaren 24an, asteazkena, Euskalduna Jauregiko leihatiletan eta webgunean, baita Kutxabanken zerbitzu anitzeko kutxazainetan eta kontzertu-aretoetan ere, emanaldi bakoitza hasi baino ordu erdi lehenago.

Jaialdiaren antolakuntzak zorrotz beteko du covid-19aren aurkako osasun-araudia, artisten eta ikusleen segurtasuna bermatzeko helburuarekin.

Jaialdiari eta 36 hitzorduei buruzko informazio guztia hemen.

Informazio gehiago

Satorjator, Astonauta, Eneko eta Nerea, ETB3 kateko Ene Kantak saioko protagonistak, Euskadiko Orkestraren egoitzan izan ziren duela aste batzuk. Gure musikariekin elkartu ziren bertan, modu hezigarri eta dibertigarri batean gure orkestra nolakoa den azaltzeko helburuarekin.

Une horretan orkestra zuzentzen ari zen Juanjo Ocónekin elkarrizketatu ziren, baita orkestrako sekzio ezberdinetako hainbat musikarirekin ere: Itziar Prieto (biolina), Sara Zufiaurre (klarinetea), Igor Arostegi (perkusioa) eta Xabier Peña (perkusioa). Orkestraren zuzendari tekniko Joxe Inazio Usabiagak egin zien Ene Kantak saioko protagonistei ongietorria.

Orain, bisita hartan grabatutakoa emango dute ETB3 katean, aste honetan, astelehenetik ostegunera, 20:00etan, zazpi minutuko lau ataletan:

• Otsailak 22 (20:00): Satorjator Joxe Inazio Usabiaga eta Juanjo Oconekin: Trisch Trasch Polka.
• Otsailak 23 (20:00): Eneko Itziar Prieto eta hari-sekzioarekin: St. Paul‘s Suite.
• Otsailak 24 (20:00): Nerea Sara Zufiaurre eta haize-sekzioarekin: When the Saints Go Marching In.
• Otsailak 25 (20:00): Astonauta Igor Arostegi, Xabier Peña eta perkusio-sekzioarekin: Maite zaitut.

Behin telebistan emitituta, Ene Kantak-en YouTubeko kanalean ikusgai jarriko dira atal guztiak.

Informazio gehiago

Hasiera batean bide ezberdinetatik doazen bi munduk bat egin dute une batean eta Gutizia eman dute emaitza gisa. Delicatessen moduko lan honek modu naturalean uztartu ditu euskal kulturan hain sustraituta dagoen instrumentu bat, txistua, eta orkestra sinfoniko bat. Horretan dihardute lanean egunotan Garikoitz Mendizabal eta Euskadiko Orkestra Miramonen, txistu eta orkestrarako idatzitako obra-sorta baten grabazioa egiten eta ondorengo hedapena prestatzen. Xedea da, instrumentu honen defendatzaile handienetako Garikoitz Mendizabalen hitzetan, “literatura areagotzea, txistuak modu naturalean nazioarteko zabalkunde nabarmenagoa izan dezan munduko orkestretan”.

Grabazioak guztira zortzi obra hartzen ditu barne, batzuk berriki idatziak eta besteak bertsio berri gisa aurkeztuak. Jatorri ezberdinetako musikagileek idatzitako lanak diren heinean, musika-bilduma hau bidaia bat da bere horretan. Lan hauetako gehienek honako hau estreinaldia dute, eta historia eta motibazio ezberdinak dituzte: Kenyari omenaldi bat (Karibu Peponi); gizakiak bizitza osoan barrena bizitzen dituen emozioen erakustaldi bat (Leyenda); txistuaren aldarrikapena orkestrarekin parekatzen den instrumentu gisa (Symphony-Concerto); edo Libanoko konpositore Naji Hakimena, euskal doinuak izan dituena inspirazio-iturri txistua instrumentu-bakarlari gisa aurkezteko hiru mugimenduko kontzertu baten forma klasikoan (Txistu eta orkestrarako kontzertua).

Proiektuko parte-hartzaileak

Euskadiko Orkestraren zuzendari elkartu Jaume Santonja arduratuko da Gutiziaren musika-zuzendaritzaz. Garikoitz Mendizabal, orkestra eta konpositoreez gain, proiektu honetan honakook ere parte hartuko dute: Naroa Intxausti sopranoa, Francisco Escudero Kontserbatorioko haur abesbatza (Eva Ugaldek zuzentzen duena), eta Iñaki Telleria eta Marc Blanes produkzioan eta soinuan.

Nazioarteko diskoetxe Orpheus Classical-ek hartuko du bere gain proiektu honen grabazioa, CD formatuan editatuko dena, eta Spotify eta iTunesen ere eskuragai jarriko dena. Uda osterako programatu da merkaturatzea.

Garikoitz Mendizabal (Zestoa, 1973) txistuaren interpretazioan, defentsan eta sustapenean pertsonaia oso garrantzitsua da. Azken urteetan lankidetza-sorta nabarmena egin du musikagile garaikideekin errepertorio berriak jorratzeko asmotan. Esan daiteke Gutizia horren guztiaren fruitua dela. Bere hitzetan: “Ukaezina da musika berria den neurrian, txistu eta orkestrarako literatura areagotu eta aberasten duela, zalantzarik gabe. Eta hori izan da, urte hauetan guztietan, nire nahia eta nire saiakera ondorengo belaunaldiei begira. Bistakoa da, baita ere, euskal musikagileek zein atzerrikoek idatzi dutela hain gurea den instrumentuarentzat. Etorkizunean izango diren txistulariei utzi nahi nieke orkestra handi batez lagundurik jotzeko aukera eta material gehiago. Bide batez, oso ohikoak ez diren musika-tresna batzuekin egiten ari diren moduan (akordeoia, gitarra, etab.), txistuak ere izango du, naturaltasunez, orkestra sinfoniko batekin aritzeko aukera gehiago, bai Euskal Herrian bai atzerrian. Euskal kulturaren nazioartekotze-prozesuan tresna eta baliabide ezin hobea izan daitekeela sinetsita nago, baieztatu ahal izan baitut zeinen erreakzio zirraragarria izan ohi duten entzuleek gure txistua entzutean orkestra baten laguntzaz. Besterik gabe, zuen eskuetan jartzen dut nire denbora, gogoa eta ilusioa”.

Euskadiko Orkestrarentzat bi munduok uztartzea euskal kultura sustatu eta hedatzeko bokazioari jarraipena emateko abagunea da, oraingo honetan nabarmen sustraitutako eta tradizio handiko instrumentu baten bidez. 2002an egin zuen lehen gerturaketa instrumentu honetara, Tomas Aragues Bernarden Txistu eta orkestrarako kontzertuarekin, Joxe Ignazio Ansorena solista izan zuena. Lankidetza berri honek bat egiten du aurreko beste batzuekin: txalaparta (Oreka TX / Kalakan), gaita (Gaiteros de Elciego) eta trikitixa (Kepa Junkera), besteak beste. Proiektu-sorta horren guztiaren xedea euskal kulturaren ondare aberatsa jaso, defendatu eta bultzatzea izan da.

Fitxa teknikoa

Obrak (grabazio hurrenkeran):

• Leyenda....................................................... Eduardo Moreno [17’]
• Txistu eta orkestrarako kontzertua.............. Naji Hakim [12’]
• Hora stacatto............................................... Grigoras Dinicus (Orkestrazioa: Iñaki Urkizu) [2’]
• Iruten ari nuzu.............................................. Herrikoia (Orkestrazioa: Kepa de Miguel) [4’]
• Atzo ttun ttun............................................... Herrikoia (Orkestrazioa: Kepa de Miguel) [4’]
• Karibu Peponi.............................................. Javier Martinez Campos [10’]
• Symphony-Concerto.................................... David Johnstone [27’]
• Fandango Zaharra....................................... Ezezaguna (Orkestrazioa: Pierre Wekstein) [4’]

Parte-hartzaileak:

• Garikoitz Mendizabal, txistularia.
• Euskadiko Orkestra.
• Naroa Intxausti, sopranoa.
• Francisco Escudero Kontserbatorioko Haur Abesbatza. Zuzendaria: Eva Ugalde.
• Jaume Santonja, orkestra-zuzendaria.
• Iñaki Telleria eta Marc Blanes, produkzioa eta soinua.

Gutizia osatzen duten obra batzuei buruzko oharrak

Leyenda (Eduardo Moreno)

Argi eta garbi, partitura hau gizakiak bizitzan zehar izaten dituen emozioak erakusteko saiakera bat da. Transmititzeko bozeramailea izaki txiki bat besterik ez da, gutako edozein bezalakoa edo, hobeto esanda, instrumentu xume bat: txistua.

Berari bere hizkuntza, gauzak esateko modua kentzen diogu, bere nortasuna kentzen diogu bere testuingurutik ateraz eta edozein pertsonak sentitzen dituen sentimenduak erakusteko aukera ematen diogu: poza, maitasuna, mina, borroka, eta… zergatik ez? Etsipena.

Leyendak istorio bat kontatzen du, baina txistuari tradizioak sortutako artifizio guztiak kentzen dizkio, bere soinuarekin gizaki guztiek mende luzez sentitzen dituzten bizipen sakonenak erakutsi ahal izateko.

Txistu eta orkestrarako kontzertua (Naji Hakim)

Hiru mugimenduko forma klasiko batean oinarritutako kontzertua da. Naji Hakim konpositore libanoarrak euskal genero eta doinuak hartu ditu inspirazio-iturri. Lehenengo mugimenduan mazurka bat eta minueto dantzagarri bat ditu, bigarrenak Pablo Sorozabalen Gernika hileta-martxari egiten dio erreferentzia eta hirugarren eta azkenak dantzari.

Hora Staccato (Grigoras Dinicus, Iñaki Urkizuren orkestrazioa)

Obra ezaguna eta birtuosoa. Lehendabizikoz txistu eta orkestrarako aurkeztuko da.

Iruten ari nuzu / Atzo Ttun ttun (Herrikoia, Kepa de Miguelen orkestrazioa)

Euskal abesti ezagunak, egile ezezagunekoak eta orkestrazioa Kepa de Miguel Garbizuk eginak. Garikoitz Mendizabalentzat 25 urte ondoren kontserbatorioko ikasle zeneko garaietara bueltatu eta oroitzapen ederrak berriro bizitzea dakarte bi obra hauek. Horretarako bere irakasle kuttun izan zenak, Kepa de Miguelek, prestatu ditu orkestrazioak. Pianoan Amaia Zipitria (bere ikasketetan izan zuen pianojolea) eta abesten Naroa Intxausti sopranoa izango dira bidelagun. Ziklo honen itxiera bat bezala bizi du Mendizabalek, emozioz beteta.

Karibu Peponi (Javier Martínez Campos)

Karibu Peponi 2021ean konposatutako lana da, txistu bakarlari eta orkestra sinfonikorako, Garikoitz Mendizabalen enkarguz idatzia. Hari dago eskainia, konpositorea eta txistularia elkartzen dituzten adiskidetasun, esperientzia eta kolaborazio profesionalengatik eskainia.

Kenyari, bertako jendeari, florari eta faunari egindako omenaldi txiki bat da, eta hortik dator izenburua: 'Karibu Peponi'-k euskarara itzulita ‘Ongietorri paradisura’ esan nahi du. Martínez Campos 2019an herrialde horretan egon zenean, Samburuko tribu bateko gerlari bat ezagutu zuen, hiru zuloko flauta batekin inprobisatzen zuena. Instrumentu horrek txistua gogorarazi zion ezinbestean eta, beraz, egokia iruditu zitzaion omenaldi honetan protagonista izatea.

Musikalki, Makru erritmo afrikarra erabiltzen du lanak, eta aldakuntza erritmiko, harmoniko eta melodikoen bidez garatzen diren bi gaietatik abiatuta eraikia dago. Bakarlariaren eta orkestraren arteko etengabeko elkarrizketan, emaitza bezala bakarlariarentzako exijentzia tekniko eta espresibo handiko konposaketa bat ematen du (bai notengatik eta abiaduragatik, bai fraseo eta musikalitateagatik). Konposizioa kolorista, efektista eta zati orkestralean handizalea da.

Symphony – Concerto (David Johnstone)

Konpositorearen helburu nagusia txistu bakarlariaren errepertorioari gehikuntza garrantzitsu bat egitea izan da, bai idazketaren zailtasunean, bai egitura sinfonikoan, bakarlaria orkestrarekin maila berean lehia baitaiteke eraldaketa sinfonikoa eta garapen organikoa erakusten duen musika-sorkuntza batean, hortik datorkio izenburua. Lana espirituala da, zalantzarik gabe, baina ez 'erlijiosoa', ez behintzat zentzu tradizionalean.

Lehenengo mugimendua 'Otoitza' bezala hasten da, film erromantikoaren girotzea, bakarlari zati bat batzuetan kantabilea eta beste batzuetan deklamatorioagoa duena; hala ere, orkestra-akonpainamenduak gero eta gehiago txertatzen du bakarlari zatia etsituta eta abailduta iraultzen den tentsioa.

Bigarren unean sartzen garenean, orkestrak bakarlari osoa ‘uzten’ du, bere bidea kadentzia luze baten forman aurkituz. Atsedenik gabe, Johnstone-k hirugarren mugimendu azkarra egin du, ‘Liberazioa’ izenekoa. Geroago, bakarlariak, neurri handi batean, garapenaren sekzioko prozedura gehienak menderatzen ditu; propultsio handiko uneak daude, tentsio eta erlaxazio nahasketa handi bat, bakarlariaren eta orkestrako hari-sekzioko bakarlarien kadentzia sotil baina kementsu bat, eta obra amaiera distiratsu zirraragarri batera eramateko koda loriatsu eta garaile bat.

Felix Palomerorentzat dago eskainia obra, ‘nigan sinesteagatik’, konpositorearen hitzetan.

Informazio gehiago

Pasa den abenduaren 7an Iruñean programatuta zituen 20/21 Denboraldiko hirugarren programako bi kontzertuak bertan behera utzi behar izan zituen Euskadiko Orkestrak Nafarroako Gobernuak ezarritako 100 laguneko gehieneko edukiera-mugaren ondorioz. Programan eta artisten zerrendan aldaketak egon diren arren, orain kontzertu horiek berreskuratuko ditu orkestrak otsailaren 15 eta 16an, 19:30ean, Baluarte Auditoriumean.

Bi musikari bikain arituko dira Euskadiko Orkestrarekin kontzertuotan: zuzendari bat eta bakarlari bat. Biak ala biak gazteak dira oraindik, baina ibilbide sendoa dute. Batetik, Jaume Santonja zuzendaria; orain dela gutxi izendatu dute Euskadiko Orkestrako zuzendari elkartu eta, 2018az geroztik, Erresuma Batuko City of Birmingham Orkestra Sinfonikoko zuzendari laguntzailea da. Bestetik, Judith Jauregui pianojole donostiarra; hamar urte baino gehiago daramatza nazioartean buru-belarri lanean.

Jaureguik bikain ezagutzen du kontzertuok irekiko dituen obra, bere aurkezpen-gutunetako bat izan baitzen bakarlari gisa hasi zenean. Beethovenen Pianorako 1. Kontzertuaz dihardugu, konpositore alemaniarraren hasierako obretako bat, erabat klasikoa, nahiz eta etorkizunean konpositorea Erromantizismoaren atarira eraman zuten zenbait ezaugarri estilistiko sumatzen zaizkion jada. Beethovenek berak piano-kontzertista gisa erabiltzeko idatzi zuen, izan ere, 1796an konposatu zuenean ezagunagoa baitzen pianojole gisa konpositore gisa baino. Guztira pianorako bost kontzertu idatzi zituen bere bizitzan Beethovenek.

Jarraian, Euskadiko Orkestrak ‘Enigmatikoa’ programaren baitan abenduan beste ohiko hiriburuetan eman zituen kontzertuetan interpretatu zuen obra bat joko du: Robert Schumannen 2. Sinfonia. Do maiorrean idatzi diren sinfonia erromantiko handi urrienetako bat dugu. Tonalitate horrek, hemen, konpositore alemaniarraren aurreko obra guztitik bereizten du lan hau. Schumannek krisi mental bat izan zuen 1844ko abuztuan. Ezinegona, depresioa, bertigoak eta soinu-haluzinazioak izan zituen, eta musika entzuteari ere utzi behar izan zion. Bigarren sinfonia hau da, hain zuzen, krisi horren ondoren Schumannek abiarazi zuen lehen obra garrantzitsua.

Sarrerak salgai daude 10 €tik aurrera. Datei, ordutegiei, programei eta sarreren salmentari buruzko informazio guztia Euskadiko Orkestraren webgunean dago eskuragarri: euskadikoorkestra.eus.

Informazio gehiago

Miramongo Matinéeek 20/21 Denboraldiaren erdialdea atzean utzi dute dagoeneko eta bederatzigarren hitzorduarekin datoz, kasu honetan Roda Hirukoteak eskainiko duena, ‘Klarinetea, biolontxeloa eta pianoa’ izenburupean, larunbat honetan, otsailak 13, 11:00etan, Miramongo egoitzan. Taldeko hiru musikarietako bi Euskadiko Orkestrako kideak dira: Gabriel Mesado (biolontxeloa) eta Luis Cámara (klarinetea). Rinaldo Zhok pianojoleak osatuko du taldea.

Miramongo Matinée honetan klarinete, biolontxelo eta pianorako idatzitako obren artean garrantzitsuenetakoak diren bi entzun ahal izango dira.

Alde batetik, Ludwig Van Beethovenek Klarinete, biolontxelo eta pianorako trioa 1797an konposatu zuen eta Vienan argitaratu zen urtebete geroago. Ganbera-musikaren esparruko bere lehen konposizioetako bat izan zen, eta berrikuntza bezala, formazioan haize-instrumentu bat sartu zuen, garai hartan batere ohikoa ez zen arren. Si bemol maiorrean idatzia dago, ziur aski klarineteari pasarte azkarrak errazteko, artean instrumentu hau mekanikoki oso gutxi garatua baitzegoen.

Bestalde, ia ehun urte geroago, 1891n, Johannes Brahmsek Matinée honetan entzungo den Klarinetedun trioa konposatu zuen. Musikagileak klarineteari eskaini zizkion lau lanetatik lehena da. Brahmsek konposatzeari uztea pentsatu zuen 1890 urtean, baina 1891n Meiningeneko gorteko klarinetejole handi Richard Mühlfeld ezagutu zuen, eta musika idazten jarraitzeko grina piztu zion hark instrumentua zein ondo menderatzen zuen ikusteak. Topaketa horren ondorioz, trio hau konposatu zuen, baita hari-laukote eta klarineterako kinteto bat eta klarinete eta pianorako bi sonata ere. Horiek izango ziren, hain zuzen, bera bizi zela publikatu ziren azken obrak.

Indarrean dauden edukiera-mugen ondorioz, ez da sarrerarik salgai jarriko kontzertu honetarako, izan ere, dagoeneko zikloak dituen abonatuekin auditoriumaren edukiera beteta baitago.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio kontzertua ikustera doazen abonatuei. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

Urtarrilaren 29tik Donostian, Bilbon eta Gasteizen zortzi kontzertu eman ostean, Euskadiko Orkestrak ‘Bizirik’ programako hamar kontzertuen zikloa itxiko du Iruñeko Baluarte Auditoriumean kontzertu bikoitza eskainiz astearte honetan, otsailak 9, 18:00etan eta 20:15ean.

Ruth Reinhardt zuzendari alemaniar gazteak zuzenduko du kontzertu bikoitz hau. 17 urte besterik ez zituela, bere opera propioa konposatu eta zuzendu zuen Saarbrücken, bere jaioterrian. Azken urteotan Cleveland, Seattle, Dallas edo Malmö bezalako orkestra garrantzitsuen podiumera igotzen ari da. Denboraldi honetarako programatutako hiru emakume zuzendari gonbidatuetatik lehena izango da Reinhardt debuta egiten. Denboraldi honetarako programatutako hiru zuzendari gonbidatuetatik lehena izango da Reinhardtek orkestran egingo duen debuta. Reinhardten ondoren, Gemma New eta Anja Bihlmaierrek hartuko dute Euskadiko Orkestraren batuta datozen hilabeteetan.

Johannes Brahmsen 1880ko sorkuntza bat interpretatuko du orkestrak kontzertuak hasteko: Obertura tragikoa. Lan independente bat izan arren, diptiko saihestezin bat osatzen du Jaialdi Akademikoaren Oberturarekin; aldi berean konposatu ziren bi obra horiek, Brahmsek maiz lantzen baitzituen bi pieza aldi berean. Obertura akademikoa Brahmsen alderdi klasikoenaren muina da, eta Obertura tragikoak, berriz, dramatismo‑erakustaldi handia egiten du musika intzidentaleko oberturen tradizioan (horren adibide dira Beethovenen Egmont eta Schumannen Manfred).

Ondoren, Bedrich Smetana txekiar konpositore garrantzitsuaren Ma vlast (Nire aberria) obrako ‘Sarka’ pieza interpretatuko du orkestrak. Nire aberria, bere orkestra‑lanik garrantzitsuena, bere jaioterriko historia, folklorea eta paisaiak aztertzen dituzten sei poema sinfonikoz osatutako zikloa da. Kontzertu hauetan ziklo horretako hirugarren pieza entzungo da: ‘Sarka’.

Kontzertuen itxiera Antonin Dvoraken 5. Sinfoniaren eskutik etorriko da. Lan hau Bohemiako musikagilearen heldutasuneko lehen lan handitzat hartzen da eta "konposatzaile txiroentzako" sari bat irabazi ondoren idatzi zuen. Apenas sei astetan konposatua, Bosgarrena urrats handia izan zen Dvoraken bilakaeran, batik bat adierazgarritasun naturalagatik eta argitasun formalagatik. Dena modu izugarri naturalean igarotzen da sinfonia horretan, konposatze‑prozesuan segurtasun eta kontrol handiz jardun baitzuen Dvorakek.

20:15eko saiorako sarrerak salgai daude 10 €tik aurrera. Datei, ordutegiei, programei eta sarreren salmentari buruzko informazio guztia Euskadiko Orkestraren webgunean dago eskuragarri: euskadikoorkestra.eus.

Denboraldiaren birdiseinua

Euskadiko Orkestrak ekainera arteko programazioa birdiseinatu du, Denboraldiko kontzertu kopuru handiena mantentzeko asmoz. Iruñeko Baluarteko Auditoriumean, azaroan eta abenduan covid-19ak eragindako edukiera murrizketengatik bertan behera utzi behar izan zituen programetako bi berreskuratuko ditu orkestrak, eta programa berri bat ere prestatu du. Iruñeko kontzertu berritu hauetan artista garrantzitsuak gonbidatu ditu orkestrak: Semyon Bychkov zuzendari handia, Jaume Santonja Euskadiko Orkestrako zuzendari elkartua eta Judith Jáuregui pianojolea. Informazio gehiago hemen.

Informazio gehiago

Miramongo Matinéeak 20/21 Denboraldiaren erdialdera hurbiltzen ari dira zortzigarren hitzorduarekin, kasu honetan Queentettas taldeak eskainiko duena, ‘Eskaintza’ izenburupean, larunbat honetan, urtarrilak 30, 11:00etan, Miramongo egoitzan. Taldeko bost musikarietako lau Euskadiko Orkestrako kideak dira: Maialen Rezabal (biolina), Itziar Prieto (biolina), Monika Mazur (biola) eta Beatriz Linares (biolontxeloa). Amaia Zipitria pianojoleak osatuko du taldea.

Matinéeko lehen obra Robert Schumannen Pianodun kintetoa izango da, 1842an idatzitakoa eta XIX. mendeko ganbera-musikako konposiziorik onenetakotzat jotzen dena. Garrantzitsua da obra hau kontrabaxu gabeko hari-laukote eta pianorako lehen lana izan zelako. Emazte Clara Schumanni eskaini zion konposizio hau, eta hura izan zen, hain zuzen, 1843ko urtarrilean Leipzigeko Gewandhausean obra honen lehen interpretazio publikoa egin zenean pianoa jo zuena. Clara Schumannek obra bikain, indartsu eta fresko gisa deskribatu zuen kinteto hau.

Kontzertuko bigarren eta azken obra Elena Kats-Cherninen The Offering izango da, Flinders Quartetek enkargatu zuena 2016an, eta musikagileak pianodun boskoterako idatzitako lehen obra dena. Lan kaleidoskopiko honek garai guztietako elementuak nahasten ditu, lehenengo mugimenduaren dotorezia barrokotik hirugarrengoaren ragtime erritmoetara. Elena Kats-Chernin Australiako musikagile nabarmenenetako bat da. Uzbekistanen jaioa 1957an, Errusia, Australia eta Alemanian jaso zuen prestakuntza. Kats-Cherninek ia genero guztietako obrak sortu ditu eta bere musika, koloretsua eta energiaz betea, mundu guztian barrena koreografiatu dute. Bere askotariko ekoizpenek barne hartzen dituzte operak, orkestrarako lanak, ganbera-piezak, bakarlarientzako obrak, edota dantza, zine eta antzerkirako musika.

Indarrean dauden edukiera-mugen ondorioz, ez da sarrerarik salgai jarriko kontzertu honetarako, izan ere, dagoeneko zikloak dituen abonatuekin auditoriumaren edukiera beteta baitago.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio kontzertua ikustera doazen abonatuei. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

Urtarrilak 29tik otsailaren 9ra arte Euskadiko Orkestrak 10 kontzertuko programa berria aurkeztuko du. Sei saio izango dira Donostiako Kursaalen (urtarrilaren 29an, otsailaren 1ean eta 2an, 17:30ean eta 19:30ean); bat hilaren 3an, Bilboko Euskaldunan (19:30ean); bat otsailaren 4an, Gasteizko Principal Antzokian (19:30ean); eta bi otsailaren 9an, Iruñeko Baluarte Auditorioan (18:00etan eta 20:15ean). 

Programa berria egungo murrizketetara egokituta dator, hirien eta saioen arabera hiru konbinazio desberdinekin. Donostiako, Bilboko eta Gasteizko kontzertuetan berebiziko garrantzia izango du Sibeliusen Biolinerako kontzertuak. Musikagile finlandiarrak instrumentu honetarako ezer gutxi idatzi zuen arren, lan hau bere errepertorioko obrarik ezagun eta interpretatuenetako batean bihurtu da. Augustin Hadelich biolinista aukeratu du Euskadiko Orkestrak lan hau interpretatzeko. Interpretazio bakarlari onenaren 2016ko Grammy Saria eskuratu zuen eta Musical America aldizkariak 2018ko interprete onenaren saria eman zion. Hadelichek bere herrialdeko orkestra handi guztiekin jo du dagoeneko, New Yorkeko Filarmonikoa, Chicagokoa eta Clevelandekoarekin, besteak beste, eta europarren artean, Bavariako Irratiko Orkestrarekin, Amsterdamgo Royal Concertgebouw-ekin eta London Philharmonic-ekin egin du debuta, besteak beste.

Sibeliusen obraz gain, Donostiako 19:30eko kontzertuetan, Mikel Urquiza musikagile bilbotarraren Mis monstruos marinos entzuteko aukera izango da. Lan hau, Mikel Chamizoren hasieraren ondoren, Elkano: Mundubira musika bidelagun proiektuaren bigarren enkargua da, orkestrak sortutako ekimena, munduko lehen itzuliaren 500. urteurrena gogora ekartzeko. Jazoera historiko horri buruz, Urquizari ez zaio hainbeste interesatzen balentria fisikoa, ondorio kultural eta psikologikoak baizik. Hots, «gure mundua amaiduna zela egiaztatzea aurrerapauso izugarria izan zen “terra incognita” kontzeptuaren desagerpenean; izan ere, Errenazimentuko kartografian apurka-apurka txikiagotu zen munstroak eta herensugeak ageri ziren mapetako tarte hori, eta esplorazio modernoak, azkenik, desagerrarazi egin zuen». Musikagileak hau esan digu: «Hiletsitako munstro haiek babesteko orrialde bat da nire pieza, atlasetan sartzen ez den mundu zahar bat gordetzeko alegiazko leku bat».

Iruñeko kontzertuetan, arestian aipatutako lanen ordez, Brahmsen Obertura Tragikoa eta Smetanaren Nire aberria obrako 'Sarka' izango dira entzungai.

Hiru modalitate desberdineko lehen zatiaren ondoren, 10 kontzertuen bigarren zatia berbera izango da: Antonin Dvoraken 5. sinfonia. Lan hau Bohemiako musikagilearen heldutasuneko lehen lan handitzat hartzen da eta "konposatzaile txiroentzako" sari bat irabazi ondoren idatzi zuen.

Ruth Reinhardt zuzendari alemaniar gazteak zuzenduko ditu hamar kontzertuak. 17 urte besterik ez zituela, bere opera propioa konposatu eta zuzendu zuen Saarbrücken, bere jaioterrian. Azken urteotan Cleveland, Seattle, Dallas edo Malmö bezalako orkestra garrantzitsuen podiumera igotzen ari da. Denboraldi honetarako programatutako hiru emakume zuzendari gonbidatuetatik lehena izango da Reinhardt debuta egiten.

Saio guztietarako sarrerak egongo dira salgai 10 €tik aurrera. Datei, ordutegiei, programei eta sarreren salmentari buruzko informazio guztia Euskadiko Orkestraren webgunean dago eskuragarri: euskadikoorkestra.eus.

Informazio gehiago