2019ko azaroan ateak itxita grabatu ziren bideo hauek Miramongo egoitzan, Fernando Velázquezen agindupean. Getxoko musikagile, zuzendari eta musikaria arduratu zen Huntzaren Lasai lasai, Olatu bat eta Aldapan gora kanten moldaketa sinfonikoak egiteaz, baita proiektu berri honen zuzendaritza artistiko osoaz ere. Ikus-entzunezko zuzendaritza Pausoka Entertainmenteko Jabi Elortegiren esku geratu zen oraingoan ere. Orduan egin zen grabazioa eta orain inoiz baino zentzu gehiago hartzen du eremu digitalean argitara emateak, uda hasiera honetan, Huntzaren kontzertuez gozatzeko aukera ez baitugu izango.

Beste publiko batzuetara iristeko Euskadiko Orkestraren proiektu digital estrategikoa

Euskadiko Orkestrak erreferentziazko euskal artistak eremu sinfonikora eramateko ekimen digital hau duela bi urte jarri zuen abian, Zea Maysen hiru bideoklip eta Doctor Deseoren beste hainbeste grabatu eta zabaldu zituenean. Ekimena fenomeno biral batean bilakatu zen eta oraindik orain bideo hauek milaka bistaratze biltzen jarraitzen dute sareetan. Formatu horren estreinaldia arrakasta handikoa izan zen orkestrarentzat, eta orain dela gutxi eskaera gehien jasotzen ari diren euskal artistetako batekin errepikatu du, Izarorekin, alegia (milioi erdi bat baino bistaratze gehiago izan dituzte harekin grabatutako bideoek). Orain Huntza euskal talde ezagunarekin egin du modu bereko lankidetza.

Ekimen honekin orkestrak beste publiko batzuentzako eskaintza musikala zabaldu du, arlo sinfonikoan ezohikoagoak diren errepertorioetan murgiltzearen bidez. Norabide honetan arrakasta handiko beste esperientzia batzuk ere baditu orkestrak bere ibilbidean, esaterako, Ken Zazpi, Michel Camilo, Kepa Junkera eta Benito Lertxundirekin garatutako proiektuak. Horiek guztiak kontzertu-formatuan eman ziren, baina duela pare bat urte orkestrak haratago joatea erabaki zuen eta bideoklip formatura egin zuen jauzi.

Josune Arakistain (Huntza): “Sorkuntza-prozesua oso polita izan da”

Huntza taldeak, Bilboko unibertsitate- eta gazte-girotik sortutakoak, bere agerpen guztiak arrakasta eta jai-giro bihurtzen ditu. Gaur egungo talde euskaldun arrakastatsuenetako bat da, instrumentu tradizionalak (trikitixa, panderoa…) eta pop rock musika uztartzen dituena. Josune Arakistainek eta Uxue Amonarrizek jartzen dizkiote ahotsa eta trikitixa beren kanta ezagunenetako hiruri: Lasai lasai, Olatu bat eta Aldapan gora.

Josune Arakistain, Huntza taldeko trikitilari eta abeslaria: “Euskadiko Orkestrarekin gure hiru abesti grabatzeko proposamena iritsi zitzaigunetik abestiak osatu arteko prozesua oso oso polita izan da. Alde batetik, Fernando Velazquezen moldaketak zoragarriak dira eta, beste alde batetik, hainbeste pertsonako orkestra bat atzean edukitzeak abestiei beste forma bat eman die. Besterik gabe eskerrak eman nahi dizkiot bai Fernandori bai orkestrako guztiei, eta ea gustatzen zaizkizuen”.

Fernando Velázquez: “Huntzaren kanta ezagunen bertsio berezi eta dibertigarriak dira”

Fernando Velázquez proiektuaren zuzendariaren hitzetan: "Oso pozik nago orkestrarekin eta Huntzarekin egin dugun proiektu honekin, beren kanta ezagunenetako batzuekin. Bertsio berezi samar bat da, originala bezain dibertigarria, orkestrak duen izaera, tinbre eta gaitasun horrekin. Asko gozatuko duzuela espero dut, eta topikoa dirudien arren, guk grabatzean bezain ondo pasako duzuela espero dut”.

Proiektu hau da Fernando Velázquezek eta Euskadiko Orkestrak orain dela gutxien partekatu duten proiektua, baina askoz gehiago egin dituzte batera. Errepertorio berriak jorratzeko eta publiko berrietara iristeko ariketa horretan, tandem bikaina osatu dute Velázquezek eta Euskadiko Orkestrak duela hainbat urtetatik, eta emaitza oparoak ekartzen jarraitzen du aliantza honek. Ken Zazpirekin egindako kontzertu-ziklo ezagun haietatik hasi eta getxotarraren agindupean egindako zine-munduko kolaborazio sorta zabalera arte. Azken aldian egindako proiektuen artean nabarmentzekoak dira pantailara eraman diren eleberrien soinu-banda originalak, Fernando Arambururen Patria —laster estreinatuko dena— eta Bernardo Atxagaren Soinujolearen semea kasu. Aipagarria da, baita ere, duela gutxi berreskuratutako Truffauten The Bride Wore Black filmaren musikaren grabazioa. Atzeragora jotzen badugu, beste soinu-banda ugari aurki ditzakegu: Juan Antonio Bayonak zuzendutako A Monster Calls filmarena, zeinaren bidez Velázquezek musika original onenaren Goya saria eskuratu zuen; Wim Wendersen Submergence filmarena; Bayonaren The Impossible filmaren soinu-bandaren zuzeneko erabateko estreinaldia Donostia Zinemaldian; Ocho apellidos vascosena; Contratiemporena; etab.

Bideoklipen aurkezpena

Uztailaren 2, 3 eta 4an aurkeztuko dira hiru bideoklip berri hauek, lehendabizi ETBn eta ondoren Euskadiko Orkestraren sare sozialetan (Youtube, Instagram, Facebook eta Twitter).

Uztailak 2: Lasai lasai

• ETB2: Qué me estás contando programaren amaieran (20:15).
• ETB1: Eguraldiaren amaieran (21:05).
• 22:30: argitalpena Euskadiko Orkestraren sare sozialetan.

Uztailak 3: Olatu bat

• ETB2: En Jake programaren amaieran (14:10).
• ETB1: Eztabaidan programaren amaieran(22:30).
• 22:30: argitalpena Euskadiko Orkestraren sare sozialetan.

Uztailak 4: Aldapan gora

• ETB2: Teleberriaren aurretik(14:55)
• ETB1: Eguraldiaren ondoren (21:05).
• 22:30: argitalpena Euskadiko Orkestraren sare sozialetan.

Informazio gehiago

Maiatzaren erdialdean iragarri genuen Euskadiko Orkestra Estatuko lehen orkestra izan zela, baita Europako bakanetakoa ere, martxan jarri eta agertokian berriro biltzen. Robert Treviño zuzendari titularraren gidaritzapean elkartu zen, eta egungo egoerara egokitutako lehen proiektu bat martxan jartzeko helburuarekin: Euskadiko Orkestra Martxan!, zortzi kontzertuko denboraldi txikia, ETB ematen ari dena, eta ondoren orkestraren YouTube kanalean ere gozatu ahal dena.

Berrogeita hamar bat musikariko formazio murriztuarekin, eta betiere egungo egoerak eskatzen dituen segurtasun-neurriak zorrotz betez, orkestrak zortzi kontzertu horiek bere Miramongo egoitzan entseatu eta grabatu zituen maiatz erdialdea eta ekain erdialdea bitartean. Sortako bosgarren kontzertua larunbat honetan, ekainak 27, 11:00etan, eskainiko du ETB2k. Richard Straussen Metamorphosen eta Mozarten 41. Sinfonia, ‘Jupiter’ bezala ezagunagoa dena, dira programako errepertorioa osatuko duten obrak.

Lau kontzertu ikusgai YouTuben

Kontzertu horiek guztiak, maiatzaren 30etik uztailaren 18ra bitartean ETB2n 11:00etan emateaz gain, orkestraren YouTubeko kanalean daude ikusgai telebistako emanaldien ondoren. Dagoeneko eskuragarri daude orain arte emandako lau kontzertuak, baita bosgarren kontzertuaren estreinaldirako esteka ere:

• Euskadiko Orkestra Martxan! #1: Agur Jaunak / Mendelssohn, ‘3. Sinfonia’
• Euskadiko Orkestra Martxan! #2: Haydn, ’49. Sinfonia’ / Mendelssohn, ‘1. Sinfonia’
• Euskadiko Orkestra Martxan! #3: Mozart, ’31. Sinfonia’ / Mendelssohn, ‘4. Sinfonia’
• Euskadiko Orkestra Martxan! #4: Brahms, ‘1. Serenata’
• Euskadiko Orkestra Martxan! #5: R. Strauss, ‘Metamorphosen’ / Mozart, ’41. Sinfonia’

Informazio gehiago

Euskadiko Orkestrak duela aste batzuk iragarri zuen instrumentujoleak hautatzeko hainbat lehiaketa irekiko zituela bere musikari taldea osatzeko. Egutegia egokitu ondoren, entzunaldi horietako batzuen datak aldatu egin dira eta, azkenean, abuztuan egingo dira. Hona hemen data berriak:

Kontrabaxu tutti eta bakarlari kolaboratzaileak aukeratzeko entzunaldia:
- Entzunaldiaren data: abuztuak 21.
- Hautagaitzak aurkezteko data: abuztuak 14.

Flauta tutti bat kontratatzeko entzunaldia, piccoloa jotzeko obligazioarekin:
- Entzunaldiaren data: abuztuak 26/27.
- Hautagaitzak aurkezteko data: abuztuak 17.
- Kontratu mugagabea, 6 hilabeteko probaldiarekin.

Bi biola tutti kontratatzeko entzunaldia:
- Entzunaldiaren data: abuztuak 28/29.
- Hautagaitzak aurkezteko data: abuztuak 17.
- Kontratu mugagabea, 6 hilabeteko probaldiarekin.

Aitzitik, harpa bakarlari bat hautatzeko entzunaldiaren datak mantendu egin dira:

Harpa bakarlari bat kontratatzeko entzunaldia:
- Entzunaldiaren data: urriak 2/3.
- Hautagaitzak aurkezteko data: irailak 18.
- Kontratu mugagabea, 6 hilabeteko probaldiarekin.

Bukatzeko, tronboi baxu kolaboratzaileak hautatzeko lehiaketa ere abian jarri berri du orkestrak:

Tronboi baxu kolaboratzaileak hautatzeko entzunaldia:
-Entzunaldiaren data: abuztuak 14.
-Hautagaitzak aurkezteko data: abuztuak 6.

Hemen dago entzunaldi hauei buruzko informazio guztia.

Informazio gehiago

Martxo erdialdean covid-19aren pandemiaren ondorioz ateak itxi behar izan ostean, Euskadiko Orkestraren Miramongo egoitzak jendaurreko kontzertu bat hartuko du berriz gaur, ekainak 11, 18:00etan.

Euskadiko Orkestraren Miramongo Matinéeen zikloko berrogeita hamar abonatuk —haiek dira orkestraren egoitza ondoen ezagutzen dutenak, baita bertan programatzen dena gertutik jarraitzen dutenak ere— izango dute berriz aukera beren orkestra martxan ikusteko

Keinu honen bidez, Euskadiko Orkestrak bere ohiko jarduera berreskuratzeko bidean beste urrats bat eman du. Keinu hau orkestraren aktibo garrantzitsuenari zuzenduta ere badago: abonatu-komunitate zabalari, alegia. Izan ere, Euskadiko Orkestrak bere baldintzarik gabeko babesa eskertu nahi baitio abonatuei, nahiz eta egoera honetan haien zati txiki eta sinboliko baten presentzia baino ez den izan posible.

Kontzertua jendearen osasuna bermatuko duten segurtasun-neurriak zorrotz betez egingo da: tenperatura hartzea, maskara erabiltzea eraikineko joan-etorrietan eta besaulkien arteko bi metroko segurtasun-distantzia, besteak beste.

Aurrerapen berria

Maiatzaren erdialdean, Euskadiko Orkestra Estatuko lehen orkestra izan zen eszenatokira itzultzen, baita Europako lehen orkestretako bat ere. Orain, egoerara egokitzen jakin duela berriz erakutsiz, jendaurreko emanaldi bat egiten duen lehen orkestretako bat ere izango da.

Kontzertuaren programa Maurice Ravelen bi obra ezagunek osatuko dute: Le tombeau de Couperin eta Ma mère l’oye. Kontzertua ETB2k emango du uztailaren 18an, goizeko 11:00etan, eta ondoren Euskadiko Orkestraren YouTubeko kanalean ere izango da ikusgai.

Horrela amaituko da zortzi kontzertuko denboraldi txiki honen grabazioa, konfinamendu aldiaren ostean orkestra agertokira itzultzea ahalbidetu duen ekimen honetan. Euskadiko Orkestrak Mozart, Brahms, Haydn, Mendelssohn, Lazkano eta Urquiza bezalako egileen lanak interpretatu ditu, betiere eszenatoki gainean gehienez 50 musikarirekin eta indarrean dauden segurtasun neurriak zorrotz betez.

Denboraldi txiki honetako lehen eta bigarren kontzertuak ETB2k eman ditu dagoeneko, eta orkestraren YouTubeko kanalean eskuragarri daude; gainerako kontzertuen emisioa (hirugarrenetik zortzigarrenera) datozen larunbatetan (11:00) gauzatuko da, uztailaren 18ra arte (azken emisio-eguna).

Informazio gehiago

Gure zuzendari titular Robert Treviñok dioen moduan, gauza garrantzitsu bat ikasi dugu pandemia-garai hauetan, “etxea ez dagoela leku jakin batean, pertsonengan baizik. Berriki bizitako trauma sakona izan da, eta gure arteko banaketa beste galera modu bat bezala pairatu dugu. Orkestra-kontzertu bat ez da ekitaldi bat bakarrik, kultura, pasioa, artea, entretenimendua eta zaletasuna bizitzeko aukera bat ere bada; horrek GUZTIAK gizateria irudikatzen baitu”. Horregatik, orain Euskadiko Orkestraz hitz egin nahi dizuegu, guztiok elkar aurkitzeko leku komun gisa. Gure programazioa ezagutzera eta gozatzen hastera gonbidatzen zaituztegu. Aurretik, hemendik aurrera nolakoak izango garen eta datozen hilabeteetan gure jarduera nola kudeatuko dugun azalduko dizuegu.

Marka berria, Euskadiko Orkestra: Elkartzen gaituen zirrara

Gogoeta honek barne hartu du, baita ere, digital-osteko aroan orkestrak publiko ezberdinen aurrean aurkezteko eta haiekin harremantzeko duen modua. Izen bakarrarekin egingo du: Euskadiko Orkestra. Orain arte erabili diren izendatzeko modu guztiak (EO, OSE, EOS, etab.) ordezkatuko ditu, izan ere, oso modu aldakorrean erabili baitira eta ez baitira erabilgarriak izan markaren aintzatespena indartzeko. Aldi berean, eta nazioarteko zabalkundea lortzeko, ingelesezko ‘Basque National Orchestra’ izendapena ere mantendu da, kanpo-esparruan erabiltzeko. Gainera, gure marka berria eta gure izaera aurkezteko egin dugun hausnarketa guztiak "sentitzea", "ulertzea", "bizitzea" bezalako terminoetara eraman gaitu, zirrara komun bat sortuz: musikazaleen familia handiarekin elkartzen gaituen zirrara.

Antolaketa-planteamendua

Lehen antolaketa-planteamendu bat egin dugu edukiera %50ean murrizteko premisari eta covid-19ren pandemiak ezarritako segurtasun-neurriak betetzeko premisari helduz. Gainera, hasieran diseinatutako programazioa aldatu eta antolaketa-planteamendua egokitu dugu. Lehen bi abonu-programak honela egingo dira: lehenengoan, Schubert, saio bikoitza eskainiko dugu arratsaldean (18:00 eta 20:15), saio bakoitzean gure publikoaren erdia izatea ahalbidetzeko. Bigarrenean, Wagner, hiri bakoitzaren arabera desberdinak izango dira hartutako neurriak, baina formula nagusia izango da kontzertu-egun bat gehiago ematea egitarauari. Bi kasuetan, gure abonatuei esleituko diegu beren kontzertuaz gozatu ahal izango duten eguna eta ordua. Abuztuaren amaieran, kontzertu-aretoetan aplikatu beharreko neurriak ziurtasun handiagoz ezagutzea espero dugu; beraz, ordura arte itxarongo dugu neurri horiek egokiak direla baieztatzeko. Gure publikoari ulermena, pazientzia eta inplikazioa eskatuko diogu, baina, batez ere, orain arte bezalako jarraitzaile sutsu izaten jarraitzeko eskatuko diogu. Horrela bakarrik kudeatu ahal izango dugu arrakastaz ziurgabetasun hori, eta 7000 abonatu dituen aparteko komunitate honen laguntzaz.

Kontzertuen ordutegia

Euskadiko Orkestraren abonatu guztiei kontzertuak hasteko ordutegiari eta beste gai interesgarri batzuei buruz Denboraldi honetan egindako inkesta baten emaitzak aztertu ondoren, Bilbo, Donostia eta Iruñeko kontzertuak 19:30era aurreratzea erabaki da (lehenengo bi programetan izan ezik, covid-19aren eragina izango baitute horiek). Hiru hiri horietan jasotako erantzunen %62 ordutegia aurreratzearen aldekoak ziren eta, beraz, neurri hori hartu da publikoaren asistentzia eta abonatuen antolaketa hobetzeko. Hala ere, Gasteizen betiko 20:00etako ordutegiari eustea erabaki da, abonatuen %39k bakarrik eskatu baitzuen ordutegia aurreratzea.

Abonu Denboraldiaren programazioa

Euskadiko Orkestraren 2020/2021 Abonu Denboraldia irailaren 25ean hasiko da Gasteizen eta 2021eko ekainaren 17an amaituko hiri berean.

Denboraldiaren ideia Nagusia: Erromantizismoa

Denboraldi honetan, aspalditik orkestrak egin ez zuen begirada bat dago: protagonismoa erromantizismoan zentratzea. Hau Schuberten sinfonia guztiak barne hartzen dituen programan nabarmenduko da gehien, Denboraldia jaialdi bat balitz bezala irekiko dutenak. Schumann ere garrantzizko figura izango da. Denboraldi honetan Erromantizismoaren aro horren zati bat erakutsiko dugu, baina, era berean, Wagnerrek ideia eta mugimendu kultural hori nola hautsi zuen ere ikusiko dugu.

Denboraldiko proiektu berezia: Schubert maratoia

Aurreko Denboraldiaren inaugurazioan, ‘Zain’ izeneko proiektu berezi batek piztu zuen arreta; ez zen aldez aurretik jakitera orkestrak zer interpretatuko zuen programa horretan, eta hori izan zuen berezitasun. Denboraldi berri hau ere formato berezi batekin hasi nahi dugu: Schuberten sinfonien maratoia, orkestraren egoitza diren lau hirien artean banatuko den maratoia. Zergatik ekingo diogu Denboraldiari horrelako proiektu batekin? Hainbeste ziurgabetasunen aurrean, jaialdiaren kontzeptuaren aldeko apustua egin nahi genuelako. Izan ere, jaialdiek hain berezkoa duten jai-espiritua, bizi-espiritua eta espiritu kementsua oso beharrezkoa baitugu garai hauetan. Astebetean sinfonia batzuk prestatu eta interpretatzea lan gogorra da, eta erronka berria izango da orkestrarentzat.

Ibilbide luzeko ildoak

Ibilbide luzeko zenbait ildorekin ere jarraituko dugu Denboraldi honetan, horietako asko Robert Treviñoren titulartasunarekin argi eta garbi lotuta:

• Treviño aintzatespen nabarmena eskuratzen ari da nazioartean Mahlerren kontura, eta Denboraldi honetan ere oso presente egongo da konpositore bohemiarra.  Orkestrak haren 5. eta 7. sinfoniak interpretatuko ditu Denboraldi honetan, baita ahots-lan bat ere: Lieder eines fahrenden Gesellen.
• Joan den denboralditik, Bartok orkestraren errepertorioan presentzia nabarmena izaten ari da. Orain Gazteak programan izango du, Birgit Kolar orkestraren kontzertino iraunkor gonbidatuaren eskutik etorriko den Biolinerako 1. kontzertuarekin.
• Antzeko zerbait gertatuko da Rakhmaninovekin. Aurreko denboraldietan 2. eta 3. sinfoniak entzun ondoren, bere hiru sinfonien zikloa osatzen duen 1. sinfonia sartu dugu aurtengo programazioan.
• Elkano: Mundubira musika bidelagun proiektua ibilbide luzeko beste ekimen bat da, bere ibilbidea jarraituko duena. Mikel Chamizok ireki zuen bidaia musikala, eta oraingoan Mikel Urquizak hartuko du lekukoa, maiatzean estreinatu ezin izan zen Nire itsas munstroak obrarekin.
• Musika-obren trukea. Denboraldi honetako beste gertaera garrantzitsu bat Gary Carpenter britainiarraren Ghost Songs obra Espainian estreinatzea izango da. Royal Scottish National Orchestra, Royal Liverpool Philharmonic Orchestra, City of Birmingham Symphony Orchestra eta Euskadiko Orkestra dira obraren enkargua egin duten lau orkestrak. Enkargu hori gure orkestrak Liverpooleko taldearekin duen harreman estuaren ondorio da. Bidaia horrek alderantzizko ibilbidea ere izango du, eta Elkano: Mundubira musika bidelagun proiektuko lanak eta beste euskal konpositore batzuk beren orkestretan interpretatzea eta publiko britainiarrak ezagutzea adostu da.
• Errepertorio berriaren aurkezpena: Elkano: Mundubira musika bidelagun proiektukoak bezalako obra berriak eta Carpenterren enkarguzko obra izango ditugu, batetik, eta, bestetik, lehendik existitzen ziren baina orkestrak lehen aldiz bere errepertorioan txertatuko dituen obrak ere bai.

Zuzendariak, solistak eta abesbatzak

Orkestrak berriz ere artista sorta ederra izango du bere programazioan, baina aipatzekoa da hiru programari bakarka helduko diela, gonbidatutako bakarlaririk gabe. Zalantzarik gabe, interpretazioan protagonismo handia emango diote hiru programa horiek orkestrari. Gainontzean, hona hemen Denboraldiko gonbidatuak:

• SOLISTAK: Atal honetan lehenago gure artean izan ditugun artista handiak izango ditugu berriz gurean: Pablo Ferrández biolontxelojolea, Vadim Gluman biolinjolea eta Nikolai Lugansky pianojolea. Lehendabizikoz egingo diegu harrera Behzod Abduraimov pianojoleari eta Manuel Walser baritonoari. Birgit Kolar, Euskadiko Orkestraren kontzertino iraunkor gonbidatua, estreinakoz ariko da solista paperean orkestra honetan.
• ZUZENDARIAK: Robert Treviñok presentzia nabarmena izaten jarraituko du, bost programarekin, eta gainontzeko programetan Hans Graf eta Michel Tabachnik beteranoak eta Ruth Reinhardt, Gemma New eta Anja Bihlmaier gazteak izango ditugu.
• ABESBATZAK: Easo Abesbatzako gazteek Carpenterren Ghost Songs enkarguzko obra interpretatuko dute eta Iruñeko Orfeoiak Lorenzo Ondarraren Salve Regina eta Berliozen Tristia jorratuko ditu.

Orkestraren beste jarduera batzuk

Nazioarteko bira berria

Azken hiru urteetan Austriara (Linz eta Bregenz), Alemaniara (Munich), Frantziara (Paris) eta Turkiara (Istanbul) joan da Euskadiko Orkestra. Orain, Italiara eramango duen nazioarteko bira berri bat diseinatu du, non Udine, Bergamo eta Brescia hiri italiarretan lehen aldiz aurkeztuko den, baita Kroaziako hiriburu Zagreben ere. Bira hau baieztatuta dago eta 2021eko apirilean egitea espero da, Robert Treviño zuzendari titularrarekin berriz ere.

Grabazioak

KALAKAN. Lehenik eta behin, joan den Denboraldiko programa batean Gabriel Erkorekaren Zuhaitz interpretatu zuen Iparraldeko hirukote honek orkestrarekin. Orduan, elkarrekin proiektu bat abiatzeko nahia sortu zen, eta orain Xalbador bertsolariaren irudia ardatz duen grabazio bat dator, eta haren bilobek, Aire Ahizpak izenekoak, eta Amets Arzallusek ere parte hartuko dute. Unai Urretxok zuzenduko du grabazioa. 21/22 Denboraldian kontzertu batzuk egitea espero da. Orkestrak Izaro, Zea Mays, Dr. Deseo, Ken Zazpi edo Benito Lertxundi bezalako artista eta taldeekin egindako crossover sortako ekintza berri bat izango da Kalakanekin egingo den hau.

Beste erakunde batzuekin lankidetzak

Orkestrak ABAO Bilbao Operaren denboraldiarekin, Bilboko Musika-Música jaialdiarekin eta BBVA Fundazioaren Jakintzaren Mugak Sariekin duen konpromisoari eutsiko dio. Ezin izango du Donostia Zinemaldian parte hartu filmen soinu-banden ohiko kontzertuarekin Belodromoan, baina Donostiako Musika Hamabostaldian eta Musikasten egingo du agerpena.

Miramongo Matinéeen zikloak eta orkestraren Musika Gela aurten ere egingo dira, baina aurrerago aurkeztuko dira.

Denboraldi berriaren irudia

ACC Komunikazio Agentzia izan da 20/21 Denboraldi honetako irudiaren sortzailea. Denboraldiaren irudi nagusia collagen collage bat izatea proposatu dute, gainerako programetatik aukeratutako elementuz osatutako irudi bat, bere osotasunean konposizio adierazgarri bat sortzeko asmoz. 10 irudien multzoa filosofiaren ikerketa-lan garrantzitsu baten ondoren lortu da, balio sinboliko eta estetikoa duten irudiak eta konposizioak dira, atzean mezu eta esanahiez beteak. Osotasun bat osatzen duen dimentsio bisual batekin beti, eta Erromantizismoa programazioaren argumentu nagusitzat hartuta.

Eskerrak

Azkenik, orkestrak bere jardueren garapenean parte hartzen duten erakunde guztien lankidetza eta laguntza eskertu nahi du: 7.000 abonatuak eta publikoa oro har, erakunde babesleak eta laguntzaileak, kultur eragileak, komunikabideak, etab., Euskadiko Orkestraren jarduera ahalbidetzen dutenak guztiak.

Euskadiko Orkestra ez da musika bakarrik, bizitzaren ospakizuna ere bada, gure komunitatearen ospakizuna. Horregatik ematen dizugu ongietorria zure orkestrara, zure etxera. Espero dugu Denboraldi berria zuen gustukoa izatea, orain inoiz baino gehiago gure jarraitzaile baldintzagabeena izatea, eta gure kontzertu guztietan gurekin jarraitzea.

Euskadiko Orkestra: elkartzen gaituen zirrara

Abonu eta sarreren salmentari buruzko informazioa

Gaur egungo egoera dela-eta, oraindik ezin dugu bermatu abonatu berrien izen-ematea, ezta denboraldi osoko kontzertuetarako sarrera solteen salmenta ere. Unean-unean informatuko dugu. Edonola ere, eskaerak orkestraren webgunean (euskadikoorkestra.eus) eta telefonoz (943 01 32 32) jaso ahal izango dira.

Informazio gehiago

Euskadiko Orkestra 1982an sortu zen helburu honekin: musika ondasun unibertsal eta ondare kultural bezala sustatu eta garatzea. 38 urte hauetan, ordea, gure gizartea goitik behera eraldatu da: kultura ulertzeko modua erabat aldatu da, musikarekin harremantzeko eta hura kontsumitzeko moduak ere aldatu egin dira, baita markek euren audientziekin komunikatzeko dituzten moduak ere. Gaur egun, euskal gizartea garatzen doan hein berean Euskadiko Orkestrak misio honekin konprometituta jarraitzen du, eta gizartearekin batera gauzatu nahi du eboluzio hau.

Arrazoi horregatik egin nahi izan dugu hausnarketa- eta elkarrizketa-ariketa hau orkestrako musikarien zein kanpoko kolaboratzaileen eta orkestraren lagunen lankidetzarekin, haien ekarpen baliotsuekin. Prozesu horrek guztia helburu nabarmen batekin egin da: pertsonekin gehiago konektatzea eta eragin nabarmenagoa izatea orkestrak eragile kultural eta sozial gisa duen rol horretan.

Testuinguru berri honetan, Euskadiko Orkestrak irudi eraberritua estreinatuko du gaur, eta honek islatuko ditu bere identitatea, eraldaketa sozialerako sentsibilitatea eta, bereziki, gizarte elkartuago eta aberatsago baten aldeko ikuskera, bere musikaren botere unibertsal eta deskribaezinaren bidez.

Izen bakarra: Euskadiko Orkestra

Gogoeta honek barne hartu du, baita ere, digital-osteko aroan orkestrak publiko ezberdinen aurrean aurkezteko eta haiekin harremantzeko duen modua. Izen bakarrarekin egingo du: Euskadiko Orkestra. Orain arte erabili diren izendatzeko modu guztiak (EO, OSE, EOS, etab.) ordezkatuko ditu, izan ere, oso modu aldakorrean erabili baitira eta ez baitira erabilgarriak izan markaren aintzatespena indartzeko. Izen hau bere nortasun eta esentzia aldaezinen isla fidela da: tradizioa eta etorkizuna, dotoretasuna eta garaikidetasuna, artea eta izaera, batasuna eta aurrerabidea.

Aldi berean, eta nazioarteko zabalkundea lortzeko, ingelesezko ‘Basque National Orchestra’ izendapena ere mantendu da, kanpo-esparruan erabiltzeko.

Elkartzen gaituen zirrara

Euskadiko Orkestraren marka berriak lema berri bat ere badakar: ‘Elkartzen gaituen zirrara’. Orkestraren musikak pizten duen sentimendua jasotzen ditu goiburu horrek, baita arte eta kultura propioak sortzen duen pasioa, bere lurraldearekin lotura ahalbidetzen duen sentimendua eta afektua, bere tradizioa eta bere bizitzeko eta existitzeko modua ere.

‘Sentitzea’, ‘ulertzea’ eta ‘bizitzea’ zirrara partekatua dira: elkartzen gaituen zirrara.

Ekingo al diogu elkarrekin?

Baina ikuspegi berri hau ez da nahikoa izango bere horretan. Bidearen hasiera baino ez da. Bide hau elkarrekin egin beharko da eta gizartearen (komunikabideen, abonatuen, publikoaren, babesleen, kultur eragileen, erakundeen, eragile ekonomiko eta sozialen...) inplikazioa beharrezkoa izango da. Guztion artean bakarrik eraiki ahal izango baitugu gure ametsetako marka. Ekingo al diogu elkarrekin?

Informazio gehiago

Martxoaren 9an Istanbulen arrakastaz baina zailtasun ugarirekin emandako azken kontzertuaren ondoren, Euskadiko Orkestrako kideek itxialdia hasi zuten, gainerako herritarrek bezala. Bi hilabetez elkarrekin lan egin ezinik eta 19/20 Denboraldiko azken kontzertu programatuak bertan behera utzi behar izan ondoren, orkestrak egungo egoerara egokituta jarduerari ekin dio berriro Miramongo egoitzan, antolaketarako lehen planteamendu batekin: zortzi kontzertuko denboraldi txiki bat, ETBk emango duena. Estatuko lehen orkestra da abian jartzen eta eszenatokian elkartzen, baita Europako bakanetakoa ere.

Euskadiko Orkestra martxan!

Izenburu horrekin zortzi kontzertuko denboraldi txiki bat aurkezten dugu, berrogeita hamar bat musikako formazio murriztuarekin. Orkestra Miramongo bere egoitzan entseatzen ari da dagoeneko, eszenatokian sakabanatzeko probak egin dituzte eta ezarritako segurtasun-protokoloek funtzionatzen dutela baieztatu dute. Kolektibo handia da eta fisikoki ondo trinkotua egon behar du programak interpretatzeko, baina egoera honetan musikariek bi metroko segurtasun-tartea gordeko dute. Hori dela-eta, musika beste modu batera interpretatzen ikasi behar dute, elkarren artean entzuteko beste erritmo eta denbora batzuekin, musika jaria dadin. Orkestra bateratzeko Robert Treviño zuzendari titularra dago, gehienez ordubeteko iraupena duten zortzi kontzertu hauek martxan jartzeaz arduratuko dena, eta maiatzaren 30etik aurrera, beste hainbeste larunbatetan, ETB2n emateko grabatuak izango direnak, beti goizeko 11:00etan.

Kontzertu-denboraldi txiki honetarako aukeratutako konpositoreen artean, Ramon Lazkano eta Mikel Urquiza euskaldunez gain, Mendelssohn, Haydn, Mozart, Richard Strauss eta Brahms daude, horien partituratako asko 50 musikari baino gutxiagoko orkestra murritzerako idatzita baitaude. Horrela, eraldaketekin bada ere, bere jarduera berreskuratu ahal izango du orkestrak, oraingoz, telebistaren zein bere kanal digitaletako streamingaren bidez publikoari zuzentzen zaion orkestra gisa.

Interpretatuko diren lehen bi programak honakook izango dira:

Lehen programa: maiatzak 30. ETB2n, goizez.
Agur Jaunak eta Andreak.
F. Mendelssohn: 3. Sinfonia, “Eskoziarra”
Orkestra-formazioa: 50 instrumentujole: 35 harietan, 14 haizeetan eta tinbal 1.
Zuzendaria: Robert Treviño.

Bigarren programa: ekainak 6. ETB2n, goizez.
J.Haydn: 49. Sinfonia, “La passione”
Orkestra-formazioa: 40 musikari: 35 harietan, 5 haizeetan.
F.Mendelssohn: 1. Sinfonia.
Orkestra-formazioa: 48 musikari: 35 harietan, 12 haizeetan eta tinbal 1.
Zuzendaria: Robert Treviño.

Hurrengo programak Euskadiko Orkestraren webgune eta sare sozialen bidez iragarriko dira.

Segurtasun-neurriak

Egungo egoerak segurtasun-protokoloetan ezarritako prebentzio-neurri guztiak zorrotz betetzera behartzen du. Lehentasuna musikari eta administrazioko langile guztiak seguru egotea da. Eraikinera sartzen diren langile guztiei tenperatura hartzen zaie eta eszenatokian sartu arte maskara erabiltzeko betebeharra ezartzen zaie. Eraikinean bertan, eta auditorioan bertan sartzeko, joan-etorriak modu zirkularrean diseinatu dira, langileak ez gurutzatzeko eta mugimendua beti norabide berean egiteko. Ez dira kamerino kolektiboak erabiliko, eta tresnen estutxeak modu ordenatuan utzi beharko dira besaulki-patioan. Auditoriumeko eszenatokian musika guztiek bi metroko tartea gordetzen dute. Eta haizearen eta perkusioaren sekzioa babesteko manparaz inguratuta dago.

Amaia Asurmendik (biolina) eta Juan Ignacio Emmek (biolontxeloa) eszenatokirako itzulera nola bizi duten azaltzeko adierazpenak hemen dituzue:

Bertan behera geratutako kontzertuak eta errealitate berria

Orkestrak ezin izan zuen ekainaren hasierara arte Gasteiz, Bilbo, Donostia eta Iruñeko egoitza guztietan programatutako kontzertuen denboraldia amaitu. Honek 30 kontzertu baino gehiago bertan behera uztea ekarri zuen. Konfinamendu-garai honetan, bere kanal digitalen bidez aktiboki mantendu da hainbat ekimenekin: musikariek euren etxeetatik elkarrekin ‘Agur Jaunak eta Andreak’ interpretatzea gizarteari omenaldi gisa, #EuskadikoOrkestraEtxean ekimena, non musikari askori ikusgarritasuna eman ahal izan zaien musika-piezak interpretatzearen bidez, edo Izaro abeslariarekin aurkeztutako bideoklipak. Horrek guztiak milaka bistaratzetan jarri du orkestra. Aldi berean, lanean hasi da berriz ere, eta apustu sendoa egin du erreferente kultural izaten jarraitzeko eta gizartean presente egoteko. Oraingoz, eta publikoarekin topo egin ezin duen bitartean, ETBren eta orkestraren kanal digital propioen bidez egingo du.

Denboraldi txiki honen nazioarteko zabalkundea

Euskadiko Orkestraren kontzertu-sorta hau Stage Accessen ere egongo da eskuragarri. Harpidetza bidezko plataforma digital hau laster kaleratuko da eta kontzertuak, opera, dantza eta antzerkia hartuko ditu barne. Aliantza horri esker, Euskadiko Orkestra Ipar Amerikako merkatuan ezagutaraziko da.

Interpretatuko diren obrak entsegu- eta grabazio-hurrenkeran

Informazio gehiago