Musika Gelaren 19/20 Denboraldiko bigarren Eskola Kontzertu sorta, Urrutiko Lurraldeak izenekoa, bihar eta etzi, azaroak 21 eta 22, eskainiko da, 9:45ean eta 11:30ean, Kursaaleko Ganbera aretoan. Euskara hutsean izango diren kontzertuok 6 eta 10 urte bitarteko haurrei zuzenduta daude.

Duela 500 urte Juan Sebastian Elkanok egin zuen bidaia epikoan ontziratuko da Orkestra osoa. Abentura hori abiapuntu, ikasleek gozatu ahal izango dute Elkanoren jaioterriko folkloreaz eta bere bidaiaren soinu-banda osatu ahal izan zezaketen melodia ezberdinez (Beethoven, Strauss, Rossini, etab.).

Kontzertuaren une gorena Elkano. Lehen mundu bira animaziozko filmaren irudien proiekzioa izango da, Joseba Beristainek film luzerako konposatutako musikaren suite batek lagunduta.

Kontzertua Euskadiko Orkestra Sinfonikoak eskainiko du Bilboko Juan Crisóstomo de Arriaga Musika Kontserbatorioaren zuzendari Maite Aurrekoetxearen zuzendaritzapean. Ana Eguiazabalek egingo ditu aurkezle-lanak Mikel Cañadak idatzitako gidoia duen programa honetan.

Guztira, ia 2.500 ikasle pasako dira egunotan Kursaaletik programa honetaz gozatzeko. Milaka ikasleok hogeita hamar bat ikastetxetatik datoz, lurralde osoko udalerrietakoak: Ataun, Azpeitia, Berastegi, Donibane-Lohitzune, Donostia, Elgoibar, Eibar, Errenteria, Lizartza, Ordizia, Zarautz eta Zestoa. 19/20 Denboraldi osoan zehar, 9.000 ikasle baino gehiago espero dira Musika Gelak barne hartzen dituen Eskola Kontzertuetan.

Kontzertuen programa
 

Gioacchino Rossini (1792-1868):
Sevillako bizargina. Obertura [8’]

Fernando Velázquez (1976):
Zipi y Zape y la isla del capitán. Tema [3’]

Jesús Guridi (1886-1961):
Hamar euskal melodia. 1, 5, 6, 7, 8 eta 10 [11’]

Joseba Beristain (1978):
Elkano. Lehen mundu bira. Suitea [15’]

Ludwig Van Beethoven (1770-1827):
12 Kontradantza. VII y VIII [1’]

Johannes Brahms (1833-1897):
5. Dantza hungariarra [2’]

Josef Strauss (1827-1870):
Ohne Sorgen! Polka [2’]

Informazio gehiago

Larunbat honetan, azaroak 9, 11:00etan, Miramongo Matinéeen, Euskadiko Orkestra Sinfonikoaren ganbera-musika zikloaren, Denboraldiko laugarren kontzertua izango da. Bertan, Hemiola Laukoteak ‘Itsasorako bistak’ izeneko kontzertua eskainiko du. Taldeko kide guztiak Orkestrako musikariak dira: Larraitz Oiartzabal (biolina), Laura Balboa (biolina), Pawel Krymer (biola) eta Gabriel Mesado (biolontxeloa).

Matinée honetan garai oso ezberdinetako hiru obra aurkeztuko dira, jatorri askotako egileenak. Giacomo Pucciniren Crisantemi lana izango da abiapuntu, mugimendu bakar batez osaturiko obra, 1890ean gau bakar batean Amadeo Savoiakoaren heriotzaren errespontsu bezala idatzia izan zena. Askotan harizko orkestraz interpretatu ohi den arren, jatorriz harizko laukoterako konposatua izan zen obra hau, eta oraingo honetan hala joko du Hemiola Laukoteak.

Bigarrenik, Eduardo Toldráren Vistes al mar interpretatuko du laukoteak. 1921ean Renaixement laukoteak Bartzelonako Palau de la Músican estreinatu zuen obra hau Joan Maragallen hiru olerkitan oinarrituta dago: La ginesta altra vegada, Allà a les llunyanies de la mar eta La mar estava alegre, hurrenez hurren kuartetoaren hiru mugimenduei dagozkienak.

Matinéea Ludwig Van Beethovenen 4. hari-kuartetoarekin itxiko da. Egile alemaniarraren 18. opus kuartetoen laugarren tokian kokatzen den arren (guztira 6 dira), azkena konposatua izan zela esaten da. Lan hau, uste denez, Beethovenek berak aurretik sortutako materialean oinarrituta egin zuen. Ondoren, 1801ean, editatu egin zuen 18. opus osoarekin batera eta Joseph Franz von Lobkowitzi eskaini zion.

Sarrera solteak (7€) salgai daude euskadikoorkestra.eus webgunean eta Kursaal Auditoriumeko leihatilan. Gainera, leku librerik geratuko balitz, Orkestraren egoitzako leihatilan bertan eros ahal izango lirateke kontzertuaren egunean.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio bertaratu nahi duen orori. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

Nazioartean oihartzun handiena lortu duen euskal orkestra zuzendarian bilakatuta, Juanjo Mena Euskadiko Orkestra Sinfonikoaren podiumera itzuliko da, eta Planetak izeneko programarekin egingo du, zeinaren obra nagusiak Gustav Holsten lan homonimoa eta Gabriel Erkoreka euskal musikagilearen Zuhaitz izango diren. Kontzertuak ohiko hiriburuetan izango dira: Gasteizko Principal Antzokian astelehenean, azaroak 4; Iruñeko Baluarte Auditoriumean asteartean, azaroak 5; Donostiako Kursaal Auditoriumean asteazken eta ostegunean, azaroak 6 eta 7; eta Bilboko Euskalduna Jauregian ostiralean, azaroak 8. Guztiak 20:00etan izango dira.

Kontzertu-programari titulua eman dion obra Gustav Holsten Planetak da. 1918an kontzertu pribatu batean eta handik urtebetera entzuleen aurrean estreinatu zuten obra honek bete du jada bere lehen mendeurrena, errepertorio klasikoko lan entzutetsuenetako bat bilakatuta ospatu ere. Badirudi izugarri zabala izan gabe oparoa baden Holst britainiarraren obra sorkuntza karismatiko eta distiratsu bakar horren gerizpean geratu dela; paradoxikoki, gainera, ezaugarriok konpositorearen beraren nortasunaren kontrakoak dira, musikaria gizon lotsati eta hotza izan baitzen. Holsten beste lan bat ere entzun ahal izango da Iruña, Donostia eta Bilbon (ez, ordea, Gasteizen, teknikoki ezinezkoa izango delako): Rig Vedaren ereserkia koralen bigarren taldea, kontzertuaren irekiera moduan eskainiko dena. Holsten bi obren abesbatza-rola Vocalia Taldeak hartuko du bere gain. Emakumezkoen abesbatza gasteiztar honek 2000 urtean hasi zuen bere ibilbidea eta Basilio Astúlezek zuzentzen du gaur egun.

Kontzertu-programaren beste eragingarria Gabriel Erkorekaren Zuhaitz obraren Euskadiko estreinaldia izango da. Obra honen erabateko estreinaldia 2016ko martxoan izan zen Madrilen, Juanjo Mena beraren zuzendaritzapean. Lan honetan Erkorekaren naturaren fenomenoekiko eta musika-tresna ezohikoekiko interesa argi nabaritzen da. Hala dio berak: «Obrak ez du bere oinarri ekologista sakona ezkutatzen. Naturaren defentsan egindako kantu bat, hobe esanda, oihu bat dela esan daiteke». Gainera, 2000 urtearen inguruan bilbotarrarentzat funtsezkoa izan zen eta azkenaldian bigarren planoan utzi duen lan-lerro bat ere landu zuen obra honetan: musika “kultuaren” eta folklorearen arteko lotura. Folklorerako itzulera Kalakan abeslari-perkusionista hirukotearekin egindako elkarlanak eragin du; izan ere, Jamixel Bereau, Xan Errotabehere eta Bixente Etchegaray euskal musikariek hainbat instrumentu jotzen dituzte Zuhaitz obraren baitan, txalaparta, alboka, xirula eta adarra kasu. Lanak oso bestelako bi soinu-mundu uztartzen ditu: batetik, abeslari-solistak daude, ahozko tradiziotik datozenak eta batzuetan nolabaiteko askatasun mailarekin inprobisatzen dutenak eta, bestetik, orkestra, azken ñabardura arte idatzita dagoen partitura bat interpretatzen duena.

1997 eta 1999 bitartean Euskadiko Orkestraren zuzendari elkartu izan ostean, Juanjo Menaren (Gasteiz, 1965) lehen titulartasuna Bilbao Orkestra Sinfonikoarekin izan zen. 1998tik 2008ra zuzendu zuen aipatu orkestra, eta bien arteko harreman luzea funtsezkoa izan zen bai zuzendariarentzat bai orkestrarentzat haien garapen artistikoan mugarri berriak erdiesteko. Ondoren Menak nazioartera jo zuen: 2007an Genovako Carlo Fenice antzokira et Bergeneko Filarmonikara, zuzendari gonbidatu bezala lan egitera eta, 2010ean, Manchesterko BBCren Filarmonikara, non zuzendari titularra izan zen 2018ra arte. Gaur egun, maila goreneko nazioarteko konpromisoetan buru-belarri murgilduta dago. Hainbeste esperotako gure Denboraldirako itzulera hau amaitu bezain laster, Lucernako Sinfonikoaren, Chicagoko eta Detroiteko orkestren edo Espainiako Orkestra Nazionalaren aginduetara jarriko da.

Bestalde, Musikeneko goi mailako ikasketetako hamabost ikaslek parte hartuko dute kontzertu-programa honetan, Aula Jordá Gelaren baitan, Euskal Herriko Goi Mailako Musika Ikastegiak eta Euskadiko Orkestra Sinfonikoak sinatutako lankidetza-hitzarmenaren baitan, alegia.

Sarrerak salgai (10€tik 35€ra). Kontzertu hauetarako sarrerak salgai daude euskadikoorkestra.eus webgunean eta kontzertu-aretoetako webguneetan zein leihatiletan. "Azken ordu gaztea": 30 urtetik beherako lagunek aukera izango dute gune guztietako sarrerak 10€tan erosteko, kontzertua hasi baino 30 minutu lehenago (leihatilan).

Informazio gehiago

Larunbat honetan, urriak 26, 11:00etan, Miramongo Matinéeen, Euskadiko Orkestra Sinfonikoaren ganbera-musika zikloaren, Denboraldiko hirugarren kontzertua izango da. Bertan, Josu Okiñenak piano-errezital bat eskainiko du, zeinaren programa pianistak berak prestatu duen “euskal musika klasikoa eta nazioarteko errepertorioa eskaintzearen konpromisoari” erantzunez. Horretarako, Euskal Herriko XX. eta XXI. mendeetako konposizio esanguratsuenetako batzuk aukeratu ditu, baita Franz Liszt handiaren XIX. mende amaierako konposizio batzuk ere, bere ustez “XX. mendeko lengoaia konpositiboaren aurrekari diren obrak”.

Okiñenak errepertorioa Aldave, Aita Donostia, Garbizu eta Erkoreka bezalako euskal konpositoreetan ardaztu du. Garbizu barne hartzeak balioko du bere heriotzaren 30. urteurrena gogora ekartzeko, azaroaren 27an gertatuko dena.

Bestalde, Erkorekaren Hodeiak obrak, Okiñenaren hitzetan “obra paregabea” denak, lotura ezarriko du Franz Liszten Hodei tristeak lanarekin. Azken honen bidez, pianistak autore austriarraren errepertorioaren hautaketa bati helduko dio, bereziki bere bizitzaren amaierako obrei.

Josu Okiñenaren (Donostia, 1971) jarduera profesionaleko bi ardatzak ikerketa eta interpretazioa dira, beti ere diziplina arteko ikuspegidun jarduera zientifikoa oinarri gisa hartuta. Nazioarteko formakuntza zabal eta intentsu baten ostean, bere lan pedagogikoaz Musikene Euskal Herriko Goi-Mailako Musika Ikastegian parte hartzen jardun da 2001etik, eta munduko unibertsitate ugaritan graduondoko ikastaroak eskaini ditu. Munduko ospe handietako aretoetan jo eta nazioarteko jaialdirik ezagunenetan parte hartu du Okiñenak; izen handiko orkestretan kolaboratu ere bai.

Kontzertu honekin Euskadiko Orkestra Sinfonikoak bere Miramongo egoitzaren inaugurazioaren 30. urteurrena ospatu nahi du, 1989ko urriaren 21ean izan zena. Egoitzaren eraikuntza Orkestraren garapenaren gakoetako bat izan zen eta, besteak beste, Miramongo Matinéeen zikloaren jatorri izan zen. Gaur egun areto berezia izaten jarraitzen du eta bi altxor nagusi hartzen ditu barne: Rafael Ruiz Balerdik margotutako olio-pinturak eta organoa, Robert Chauvinek eraikitakoa.

Sarrera solteak (7€) salgai daude euskadikoorkestra.eus webgunean eta Kursaal Auditoriumeko leihatilan. Gainera, leku librerik geratuko balitz, Orkestraren egoitzako leihatilan bertan eros ahal izango lirateke kontzertuaren egunean.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio bertaratu nahi duen orori. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

50 jarduerak osatuko dute Euskadiko Orkestra Sinfonikoaren Musika Gelaren Denboraldi berriaren egitaraua. Orkestraren programazioan aspaldidanik erabat sustraituta dagoen hezkuntza-ziklo hau herritarrei, oro har, eta gazteei, bereziki, musika gerturatzeko helburuarekin jaio zen. Bere baitan eskaintzen diren kontzertuek izaera didaktikoa, pedagogikoa eta gertukoa daukate, eta askotariko adin-taldeei zuzendutakoak dira, 2 urtetik hasi eta 16 urteraino.

Orkestraren 19/20 Denboraldiko leitmotivaren —Bidaia ezezagunean barrena— ildotik, kondairazko bidaia eta maitasunak proposatzen ditu Musika Gelaren Denboraldi berriak musika epikoen bidez, besteak beste: Griegen Peer Gynt edo bidean galdu ziren beste musika batzuk, Maria Anna Mozart konpositorearen obrak, austriar egile ezagunaren ahaztutako arrebarenak, alegia. Musikaren eta ekologiaren arteko harremanak begirada ezberdinen bidez arakatzearen aldeko apustua ere egingo dugu mundu garbiago baten aldarrikapenarekin bat egiteko asmotan.

Musika Gelaren Denboraldi berrian bere koordinatzaile Mikel Cañadak diseinatutako lau produkzio propio berri estreinatuko dira: Mozart, Nannerl eta lagunak, Wolfgang Amadeus Mozart konpositore ezaguna eta bere arreba Maria Anna ‘Nannerl’ protagonista izango dituen obra; Urrutiko lurraldeak, Orkestra osoak egingo duen bidaia epikoa, Juan Sebastian Elkanok duela 500 urte egin zuena gogora ekarriz; Ekomusik, musika-tresnak artisau eran eraikitzea eta musikaren esentzia naturan bilatzea proposatuko duena; eta Maitasun epikoak, hau ere Orkestra osoarekin, bidaia bat Europako iparraldera musikaren bidez penintsula eskandinaviarraren paisaia naturalak eta kultura ezagutzeko.

Lau ekoizpen berri hauek bi formatu ezberdinetan aurkezten dira, Eskola Kontzertuak eta Musika Familian kontzertuak, eta ondoren aurkeztuko dugu horien egitarau zehatza.

Eskola Kontzertuak

Dagoeneko hamar urte baino gehiago pasa dira Eskola Kontzertuak hasi zirenetik, eta ordutik Musika Gelaren ildo nagusietako bat bezala finkatu da. Guztira, aurreko hamar edizioetan, 44.000 ikasle baino gehiagok gozatu ahal izan dute kontzertu hauez, eta parte-hartzaileen zifra urtez urte areagotu egin da.

Haur hezkuntza, lehen hezkuntza eta bigarren hezkuntzako 9.000 ikasle baino gehiagok parte hartuko dute aurtengo Eskola Kontzertuetan. 100 ikastetxe ingurutik datozen ikasleak dira, dozenaka herri ezberdinetakoak: besteak beste, Aduna, Aizarnazabal, Alkiza, Ataun, Azkoitia, Azpeitia, Beasain, Berrobi, Deba, Donostia, Elgoibar, Errenteria, Gabiria, Itsasondo, Lasarte, Lizartza, Oiartzun, Ordizia, Orio, Urnieta, Urretxu, Zarautz eta Zestoa.

Musika Gelak barne hartzen dituen aurtengo programa guztiek izango dituzte Eskola Kontzertuak, eta Donostian izango dira guztiak, Miramonen eta Kursaalen. Horietako lehenengoak, Mozart, Nannerl eta lagunakek, urriaren 16tik 24era 2 eta 5 urte bitarteko 2.300 haur bilduko ditu Orkestraren egoitzan. Gainontzeko programak datozen hilabeteotan joango dira garatzen: Urrutiko lurraldeak Kursaaleko Ganbera aretoan eskainiko da azaroaren 21 eta 22an 6 eta 10 urte bitarteko gazteei zuzendutako kontzertuekin;  Ekomusik, hau ere 6 eta 10 urte bitartekoei zuzendua, otsailaren 13tik 18ra Orkestraren egoitzan; eta Maitasun epikoak, Kursaal Auditoriumean programatu dena otsailaren 26 eta 27an 10 eta 16 urte bitarteko gazteentzat.

Eskola Kontzertuek Gipuzkoako Batzar Nagusien, Donostiako Udalaren Hezkuntza Sailaren eta Kursaal Eszenaren lankidetza dute gaur egun.

Musika Familian

Euskadiko Orkestra Sinfonikoak haur eta gazteei eskaintzen dizkien jardueren artean, ibilbide luze eta finkatuena duen atala Musika Familian kontzertuena da. Haurrek familiekin gozatzeko kultur aisialdiko eskaintza honek 20 urte baino gehiago daramatza Orkestraren egitarauan.

Aurtengo lau programetatik hiruk, Urrutiko lurraldeak ez beste guztiek, Musika Familian kontzertuak izango dituzte, eta Donostia zein Gasteizen izango dira. Lehen programa, Mozart, Nannerl eta lagunak, Orkestraren Miramongo egoitzan eskainiko da Musika Familian kontzertu formatuan larunbat honetan, urriak 19, eta baita Gasteizko García Lorca Antzokian ere, martxoaren 1ean. Ondoren, Maitasun epikoaken txanda izango da, Gasteizko Principal Antzokian otsailaren 28an izango duena Musika Familian kontzertua. Eta, amaitzeko, Ekomusikek ere izango ditu bi Musika Familian kontzertu: maiatzaren 16an Donostian Kursaaleko Ganbera Aretoan eta maiatzaren 17an Gasteizen Principal Antzokian.

Donostian egingo diren Musika Familian kontzertuek El Diario Vascoren babesa dute, eta horietatik Kursaalen egingo dena, Ekomusik, Kursaal Eszenarekin lankidetzan prestatu da. Arabako hiriburuko kontzertuek, bestalde, Gasteizko Udalaren Antzoki Sarearen lankidetza dute.

Ikuskizun guztietarako sarrerek 3 eta 7 euro bitarteko prezioa dute eta euskadikoorkestra.eus webgunearen bidez eros ahal izango dira. Dagokion aretoaren leihatiletan eta webguneetan (kursaal.eus, principalantzokia.org) ere egongo dira salgai.

Beste jarduera batzuk: Entsegu Irekiak eta gizarteratzea ahalbidetzeko ekintzak

Jarduera-eskaintza zabal hau are gehiago osatuko da Entsegu Irekiekin. Entsegu hauek kolektiboei, ikastetxeei, kontserbatorioei eta unibertsitateei, besteak beste, daude irekiak, eta aukera eskaintzen dute Orkestrak kontzertu baten aurretik egiten duen azken lana gertutik ezagutzeko. Aurten bi Entsegu Ireki eskainiko dira: bata abenduaren 4an eta bestea maiatzaren 7an, biak ala biak Donostiako Kursaal Auditoriumean. Horietako lehenengoan, Robert Treviño zuzendari titularraren agindupean, Orkestrak Maurice Ravelen lau obra joko ditu, Orkestraren Abonu Denboraldiko hirugarren programarako prestatutakoak. Eta bigarrenean, Georg Marken zuzendaritzapean Mikel Urquizari Elkano: Mundubira musika bidelagun proiekturako enkargatu zaion obra eta Antonin Dvoraken 9. Sinfonia, “Mundu berriarena” entzungo dira, 19/20 Denboraldiko bederatzigarren abonu-programarako prestatutako obrak.

Azkenik, Orkestrak FEVAS-Plena Inclusión Euskadirekin koordinazioan gizarteratzea ahalbidetzeko jarduerak egiten jarraituko du, inor baztertu gabe musika egiteko xedearekin. Aurtengo tailerrak apirilaren 21ean Bilboko Kontserbatorioan eta maiatzaren 19an Orkestraren Donostiako egoitzan izango dira.

Lankidetza-sare zabala

Euskadiko Orkestraren Musika Gelak inguruko erakunde ugarirekin elkarlana sustatzen jarraitzen du. Lankide ditu Gipuzkoako Batzar Nagusiak, Donostiako Udalaren Hezkuntza Saila, Gasteizko Udal Antzoki Sarea, Kursaal Eszena, El Diario Vasco, eta FEVAS-Plena Inclusión Euskadi.

Informazio gehiago

Robert Treviñok, gaur egun eskaera gehien jasotzen ari diren zuzendari gazte estatubatuarretako batek, Ondinerekin asmo handiko eta epe luzeko grabazio-akordio bat sinatu berri du. Treviño Euskadiko Orkestra Sinfonikoaren eta Malmöko Orkestra Sinfonikoaren zuzendari titularra da, eta bi orkestra horiekin egingo ditu akordio horren baitan gauzatuko diren lehen grabazioak: Beethovenen sinfonien ziklo oso bat, Malmön aurten egingo den Beethoven Festibaletik eratorritakoa, eta, euskal orkestrarekin, Howard Hansonen ahaztutako obrak barne hartuko dituen errepertorio estatubatuarraren azterlan bat. Hitzarmenak argitalpen digitalak ere aurreikusten ditu.

Ondine, Naxos taldearen parte dena, munduko diskoetxe independente prestigiotsuenetakoa da eta sarri egin ditu grabazioak Christoph Eschenbach, Vladimir Ashkenazy, Esa-Pekka Salonen eta Hannu Lintu bezalako zuzendari garrantzitsuekin. “Ondinek soinez soin lan egiteko aukera eskaintzen duten artistak baino ez ditu hautatzen”, dio diskoetxearen zuzendari fundatzaile Reijo Kiilunen-ek, “Artista gutxi batzuk bakarrik aukeratzen ditugu, ohiko errepertorioaren interpretazio ameslari eta irudimentsuak egiteko gaitasuna dutenak, baita obra musikal ezezagunagoak publiko aurrean ezagutzera emateko gogamen abenturazalea dutenak ere. Robert Treviñok zalantzarik gabe baldintza horiek betetzen ditu, botere musikal handiko zuzendaria baita eta jakin-min handiko adimen originala baitauka. Oso pozgarria da niretzat Ondine familiara ongietorria ematea”.

Treviñok, diskozale amorratua eta grabazio-prozesuaren maitalea, aitortzen du “aspalditik zuela begirada jarria Ondinerekin kolaboratzeko helburuan. Leif Segerstamekin egindako Sibeliusen grabazioek, historia osoko nire gogokoen direnek, modu paregabean erakusten dute produkzioak eta intepretazioak bat egin dezaketela balio handiko emaitza bat eskaintzeko. Betidanik jakin izan dut tradizio horren parte izan nahi nuela. Reijo pertsonan ezagutu ostean are pozikago nago Ondine artista batean bilakatuko naizela jakiteaz. Desiratzen nago Ondinerekin eta nire orkestrekin lan bikain bat egiteko. Plazera da maila honetako kideekin lan egin ahal izatea”.

Malmöko Orkestra Sinfonikoarekin egingo duen Beethovenen sinfonia guztien grabazioa Treviñok berak hiri suediarrean denboraldi honetan zuzenduko duen Beethoven Festibaletik sortu da. Kiilunenen hitzetan, grabazio hau elkarlan honen abiapuntu naturala da. Bederatzigarren Sinfonian parte hartuko duten bakarlariak honakook dira: Kate Royal (sopranoa); Christine Rice (mezzosopranoa); Tuomas Katajala (tenorra); eta Derek Welton (baxua). Abesbatza MSO Festival Chorus izango da. Beethovenen grabazioak goraipatua izan den Malmö Live Concert Hall berrian egingo dira.

Euskadiko Orkestra Sinfonikoarekin egingo den lehen grabazioa 2020ko abuzturako dago aurreikusita. Grabazio guztien ekoizlea Ingo Petry izango da.

Informazio gehiago

Euskadiko Orkestra Sinfonikoaren Denboraldi berriko Musika Gela hezkuntza-zikloa urriaren 19an, larunbata, hasiko da, Musika Familian ataleko lehen kontzertu batekin. Mozart, Nannerl eta Lagunak izeneko programa batean Orkestraren Miramongo egoitzak bi kontzertu hartuko ditu 2 eta 5 urte bitarteko haurrentzat, bata 11:00etan eta bestea 12:30ean, eta biak euskaraz izango dira.

Kontzertuak bi protagonista nagusi izango ditu: musika klasikoaren pertsonaia entzutetsuenetako bat, Wolfgang Amadeus Mozart, eta bere arreba Maria Anna Mozart hura ere konpositorea, baina zeinaren obra gehienak galdu egin diren historian barrena. Nannerl —Maria Annaren goitizena— berpiztu egingo da bere burua eszenatokian ezagutzera emateko eta bere anaiaren musikara hurbiltzeko. Martxa turkiarraren eta beste obra ezagun batzuen erritmora eta bere obrak musika-estilo ezberdinen bidez eraldatzeko jolasekin, haurrek deskubrituko dute Mozarten musika gaurkotasun osokoa dela.

Kontzertua honako interpreteek emango dute: Laura Balboa (biolina), Nathalie Dabadie (biolina), Justyna Janiak-Krymer (biola), Jon Larraz (biolontxeloa) eta Sara Zufiaurre (klarinetea), bostak Euskadiko Orkestra Sinfonikoaren kideak; eta Pedro José Rodriguez (pianoa). Obraren aurkezlea Ana Eguiazabal izango da eta lanaren gidoia Musika Gelaren koordinatzaile Mikel Cañadak sortu du.

Lehen kontzertu honetarako sarrerak salgai daude 4 euroko prezio bakarrean, euskadikoorkestra.eus webgunean edo Kursaaleko leihatilan. Kontzertuaren egunean bertan ere eskuratu ahal izango dira Miramongo Egoitzako leihatilan, beti ere leku libreak geratzen badira.

Askotariko proposamenez jositako Denboraldia

Musika Gela zikloaren Denboraldi berria adin ugaritako publikoari zuzendutako askotariko proposamenez beteta dator. 2 eta 5 urte bitarteko haurrentzat diseinatu den Mozart, Nannerl eta Lagunak programa honez gain, zikloak 6 eta 16 urte bitarteko gaztetxoentzat pentsatutako proposamen gehiago ere hartuko ditu barne. Musika Familian ataleko kontzertuez aparte, Denboraldi honetan Eskola Kontzertu asko emango dira, baita elkarte, ikastetxe, kontserbatorio eta unibertsitateentzako Entsegu Irekiak ere.

Zikloaren programazio osoari buruzko xehetasunak urri erdi aldera emango dira ezagutzera.

Informazio gehiago

‘Bidaia ezezagunean barrena’ leitmotivarenpean, Euskadiko Orkestra Sinfonikoaren Denboraldi hau bidaiaren ideian ardaztuta egongo da, behin betiko bidaian, eta bidaiaren esperientzia horrek dakartzan jakin-min, emozio eta beldur guztietan. Eta hain zuzen atzo Iruñean bosgarren kontzertuarekin amaitu zen inaugurazio-programak erakutsi zuen modu argienean itxaropenaren eta ezezagunean barreneko bidaiaren ideia hori.

Milaka ikuslek onartu dute gonbidapena Orkestrarekin ontziratzeko bidaia liluragarri eta arriskutsu honetan, jarrera irekiarekin eta gogo onenarekin. Zalantzarik gabe, konfiantza handia eskatzen zuen programa zen, baita arrisku handikoa ere, baina, ikusleen gehiengoaren erantzuna ikusita, badirudi programaren xede nagusiak bete direla: iradokitzea, probokatzea eta inspiratzea.

Publikoa, kontzertuaren babesleak (Vital Fundazioa, Kutxa Fundazioa, BBK eta Laboral Kutxa) eta Euskadiko Orkestra Sinfonikoaren inguruko gainontzeko eragileak beharrezko konplizeak izan dira prozesu honetan eta ezkutuko programaren sekretua gorde dute kontzertu sortaren amaierara arte. Hori ezinbestekoa izan da hiri guztietako kontzertuetako ikusleek baldintza beretan gozatu ahal izanteko deskubrimendurako bidaia musikal hau.

Robert Treviñoren hitzetan, “esperientziaren helburua izan da musikaren bidez irudikatzea edonork Ezezagunean barrena itxaropenez beteta murgiltzean sentitzen duen hori”. Ikusleak kontzertura programa ezagutu gabe eta itxaropen zehatzik gabe joan izanak balio izan du entzuleek euren azalean sentitzeko artistek musika bizitzeko duten modua: “momentu bakoitzean benetan presente egotea”.

Kontzertuaren programa

Hona hemen kontzertuaren programa:

John Corigliano:
Promenade overture [8’]

Edgard Varèse:
Tuning Up [5’]

Steve Reich:
Clapping Music [4’]

Mikel Chamizo:
Navigare Necesse Est [20’]

Arnold Schoenberg:
Erwartung [30’]

José María Usandizaga:
Dans la mer [6’]

Informazio gehiago

‘Zain’ da Euskadiko Orkestra Sinfonikoa hastear den Denboraldiaren lehen programaren titulua. Bidaiaren ideian ardaztuta egongo da, behin betiko bidaian, eta bidaiaren esperientzia horrek dakartzan jakin-min, emozio eta beldur guztietan. Ideia hau presente egongo da Denboraldiko programa askotan errepertorio sinfonikoko maisulan handien bidez. Baina inaugurazio-programa honek erakutsiko du modu argienean itxaropenaren eta ezezagunean barreneko bidaiaren ideia hori. 

Kontzertuaren formatua oso berezia izango da, interpretatuko den programa ezkutukoa izango baita amaierara arte, kontzertua bukatzean baino ez baita banatuko esku-programa. Gure inguru hurbilean ez dago horrelako esperientziarik aurrekari gisa. Programaren baitan ezagutuko den obra bakarra Mikel Chamizok Elkano: mundubira musika bidelagun hiru urteko proiektua abiatzeko konposatu duena izango da. Proiektu honen baitan bost konposizio enkargatu zaizkie beste hainbeste euskal musikagileri Juan Sebastián Elkano euskal marinelak duela 500 urte egin zuen bidaiaren zatiei musika jartzeko. Aipatzekoa da ekimen honetan Teresa Catalán nafarrak parte hartuko duela. Bidaia horren laugarren zatiari, India eta Afrikakoari, jarriko dio berak musika, eta bere obra Euskadiko Orkestra Sinfonikoaren 2020/2021 Abonu Denboraldiaren barruan estreinatuko da.

Aurkikuntzarako bidaia musikal hau Orkestraren ia 7000 abonatuek gozatu ahal izateko, laguntza eskatu zaie ikusle eta eragile guztiei, sekretua kontzertu guztiak amaitu arte manten dadin. Orain arte lortu da helburu hori, eta gaurko Iruñekoa izango da azken kontzertua, zirkulua osatzeko eta isilpeko edukia argitzeko balioko duena.

Mikel Chamizo musikagile tolosarra eta Elkano

Testuinguru honetan, nahita erabaki da Elkano: mundubira musika bidelagun proiektuaren lehen obra hau programa honen baitan txertatzea. Euskadiko Orkestra Sinfonikoak lehen mundubiraren bosgarren mendeurrenaren ospakizunekin bat egin nahi izan du eta horretarako bidaia haren zati ezberdinei lotutako bost obra enkargatu ditu proiektu honen baitan. Datozen hiru denboraldietan barrena estreinatuko dira obra horiek, Elkanoren bidaiak iraun zituen hiru urteei keinu bat eginez.  

Mikel Chamizoren Navigare necesse est lanak odisea hartako lehen pasarteetan jarriko du begirada, eta ezezaguneranzko bidaia hori ekitear zeuden marinel haien beldur, esperantza eta itxaropenak irudikatuko ditu. Zera dio Chamizo berak:

“Navigare necesse est obra Magallaesen eta Elkanoren bidaiaren hasieran oinarritzen da, eta hiru ataletan banatuta dago: Abesbatzak protagonizatuko duen erritu erlijioso bat —luzerako ontziratu baino lehen egin ohi zuten—; Sanlúcar de Barramedako portuko soinu-paisaiaren birsortze irudikatu bat, handik barneratu baitziren Ozeano Atlantikoan Magallaesen itsasontziak; eta itsasoan nabigatzen eman zituzten lehen momentuak, gizadiaren historiako aventura harrigarrienetako batera bidean”.

Bidaideak

Mikel Chamizoren obraz gain, partitura honen zati korala Bilboko Koral Elkarteak defendatuko duela ere badakigu. Orkestrak izango duen beste bidaide bat Mojca Erdmann soprano alemaniarra izango da. Eta ez da lehen aldia izango, izan ere, pasa den urteko abenduan Orkestrarekin batera Alemania eta Austrian barrena kontzertu-bira bat egin baitzuen sopranoak. Robert Treviñok honakoa dio:

“Hau da unea izaera honetako programa bat aurkezteko. Publikoak ondo ezagutzen du Orkestra, baita Bilboko Koral Elkartea ere, eta badaki Mojca Erdmannekin kontzertu-bira bat egin berri dugula. Gainera, hau da nire hirugarren denboraldia Orkestrarekin eta publikoak ni ere ezagutzen nau dagoeneko”.

Horregatik, eta “bertigo eta beldur” pixka bat ematen badu ere, publikoari “konfiantza” eskatu nahi dio

Informazio gehiago

Pasa den larunbatean Miramongo Matinéeen 28. edizioa arrakastaz inauguratu ostean, larunbat honetan, urriak 5, 11:00etan, Euskadiko Orkestra Sinfonikoaren ganbera-musika Denboraldiko kontzertuetako bigarrena izango da. Bertan, Mefisto Laukoteak ‘Kuarteto erromantikoa’ izeneko kontzertua eskainiko du. Taldeko kide guztiak Orkestrako musikariak dira: Laura Balboa (biolina), Virgile Demillac (biolina), Yann Seyrac (biola) eta Jon Larraz (biolontxeloa).

Matinée honetan bi musikagile handiren bi obra aurkeztu nahi ditu hari-laukoteak, guztiak ardatz tematiko beraren pean: gaztaroko kartsutasuna.

Horietako lehena Ludwig Van Beethovenen 3. Hari-kuartetoa izango da, erromantizismoa hastapenetan zen unean idatzitako lana. Obra honetan argi eta garbi nabari daiteke Haydn eta Mozart bezalako musikagileen eragina, Beethovenentzat erreferente handiak biak. Kontrasteak eta tentsioak, Beethovenen ezaugarri propioak, oso presente daude kuarteto honetan.

Bestalde, Felix Mendelssohnen 4. Hari-kuartetoa eskainiko du laukoteak, 1847an idatzitako obra, konpositorearen bizitza laburreko azkenetan. Heldutasunean idatzitako lana izan arren, gaztaroko pasioak eta ezegonkortasunak dira nagusi, batez ere lehen eta laugarren mugimenduetan. Konpositorearen inspirazio oniriko ohikoa bigarren mugimenduan sumatzen da gehien, eta hirugarrena lirismoz betea agertzen da.

Horrela, bada, nahiz eta konpositoreen estiloen artean ezberdintasun nabarmenak egon, bi obra hauen artean bada lotura argi bat alderdi emozionalean.

Sarrera solteak (7€) salgai daude euskadikoorkestra.eus webgunean eta Kursaal Auditoriumeko leihatilan. Gainera, leku librerik geratuko balitz, Orkestraren egoitzako leihatilan bertan eros ahal izango lirateke kontzertuaren egunean.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio bertaratu nahi duen orori. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago