Miramongo Matinéeak Denboraldiaren amaierara iritsiko dira larunbat honetan, ekainak 8, 11:00etan, Miramongo Auditoriumean, Barrococok eskainiko duen ‘Baxua argitara aterako da’ kontzertuarekin. Taldea Euskadiko Orkestra Sinfonikoaren sei kidek eta klabezin-interprete Charo Indartek osatzen dute. Orkestrako kideak honakook dira: Itziar Prieto (biolina), Anne-Marie Harmat (biolina), Mikel Ibañez (biolina), Delphine Dupuy (biola), Jon Larraz (biolontxeloa) eta Anne Charlote Lacroix (fagota).

Kontzertuan protagonismo berezia izango du fagotak. Instrumentu grabe hau baxu jarraitua jotzeko eta lidergoa daramaten instrumentuei laguntzeko sortu zen hasiera batean. Pixkanaka, ordea, instrumentu hau musikaren historian onarpen nabarmenagoa lortzen joan da izen handiko konpositoreen artean, eta obra askotan instrumentu nagusiaren rola jokatzera iritsi da.

François Deviennek konposatu zituen hiru Fagot, biolin, biola eta biolontxelorako kuartetoak, zeintzuetako hirugarrena entzungo den Matinée honetan, fagoterako idatzitako solista literaturaren adibide egokienetakoak dira. Mozarten Flauta eta harirako kuartetoen eredua oinarri hartuta eraikita daude obra hauek, eta horrek erakusten du besteak beste zergatik jaso izan zuen Deviennek sarritan ‘Mozart frantsesa’-ren goitizena.

Errepertorioko hurrengo obra Antonin Reichenauerren Biolin, biolontxelo, fagot eta continuorako kuartetoa izango da. Musikagile txekiarraren musika nahiko ezezaguna izan da gaur arte, baina gaur egun Txekiako musika barrokoaren egile nagusietakotzat hartzen da eta ‘Vivaldi txekiarra’ bezala izendatu izan dute.

Miramongo Matinéea Antonio Vivaldiren Biolin, biolontxelo (edo fagot), hari eta continuorako kontzertuarekin amaituko da. Ia seguru bera izan zen fagoterako bakarrik idatzitako lehendabiziko kontzertua sortu zuena, eta instrumentu horrentzat obra gehien egin dituen autorea ere bada: guztira 39, guztiak kalitate bikainekoak. Beste instrumentu batentzat bakarrik idatzi zituen lan gehiago: biolinarentzat. Hain zuzen, kontzertu honetako instrumentu solistak biolina eta fagota izango dira, nahiz eta ohikoagoa den obra honetako fagotaren zatia biolontxelo batek interpretatzea.

Sarrera solteak (7€) salgai daude euskadikoorkestra.eus webgunean eta Kursaal Auditoriumeko leihatilan. Gainera, leku librerik geratuko balitz, Orkestraren egoitzako leihatilan bertan eros ahal izango lirateke kontzertuaren egunean.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio bertaratu nahi duen orori. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Azken kontzertu honekin Miramongo Matinéeen zikloak agur esango dio kalitate musikal altuko hitzorduz beteriko Denboraldi bati. Aipatzekoak izan dira, adibidez, duela gutxi Dúo Ferrándezek eskaini duen biolontxelo eta biola errezitala eta Euskadiko Orkestra Sinfonikoak Robert Treviñoren batutapean eta Mojca Erdmann sopranoa ondoan zuela Austria eta Alemaniara biran abiatu aurretik eskaini zuen entsegu orokor irekia. Udako geldialdiaren ostean, Matinéeak irailaren 28an itzuliko dira.

Programa

François Devienne

Fagot eta harirako 3. kuartetoa [18’]

I. Allegro con espressione
II. Adagio, non troppo
III. Rondo. Allegretto poco moderato

Antonin Reichenauer

Biolin, biolontxelo, fagot eta continuorako kuartetoa [13’]

            I. Adagio
            II. Allegro
            III. Adagio
            IV. Finale. Allegro

Antonio Vivaldi

Biolin, biolontxelo (edo fagot), hari eta continuorako kontzertua [9’]

            I. Adagio
            II. Andante
            III. Allegro molto

Informazio gehiago

Euskadiko Orkestra Sinfonikoa 18/19 Denboraldiaren amaierara iritsi berri da bere azken kontzertu-programarekin, ‘Porrota ala garaipena’ izenekoa. Kontzertuak ohiko hiriburuetan izango dira: ostegun eta ostiralean, ekainak 6 eta 7, Donostiako Kursaal Auditoriumean; astelehenean, ekainak 10, Bilboko Euskalduna Jauregian; asteartean, ekainak 11, Iruñeko Baluarte Auditoriumean; eta ostegunean, ekainak 13, Gasteizko Principal Antzokian. Guztiak 20:00etan izango dira.

Robert Treviñok errusiar musikaren aldeko hautua egin du Denboraldia ixteko, Rakhmaninov eta Txaikovskirekin, eta Alexei Volodin pianojoleari egin dio gonbita abentura honetan bidelagun izateko. Alexei Volodin Errusiako piano-eskolako eragin handieneko irakasleetako baten ikaslea izan zen Moskun –Elisso Virssaladze-rena, alegia–, eta 2003an ospea bereganatu zuen, Zuricheko Géza Anda lehiaketa irabazita. Ordutik, Errusiako errepertorioko gaur egungo espezialista handienetako bat izatearen sona erdietsi du, bereziki, besteak beste, Prokofiev eta Rakhmaninov autoreei dagokienez. 2013an bere diskorik txalotuenetako bat izan zena Rakhmaninoven pianorako musikari eskaini zion.

Rakhmaninoven espezialista handia dela erakutsiz, Volodinek piano-errepertorioko obra konplexuenetako bati egingo dio aurre kontzertuaren lehen zatian: konpositore errusiarraren Pianorako 3. kontzertuari. Rakhmaninovek, pianista bikaina bera, kontzertua bere buruarentzat idatzi zuen, eta Volodinek egundoko teknika eta erresistentzia fisiko handia izan beharko ditu, ia ez baitio jotzeari utziko berrogei minutuz.

Kontzertuaren bigarren erdirako Treviñok Txaikovskiren 5. Sinfonia hautatu du, XIX. mende amaierako sinfonia original eta gogoangarrienetako bat. Hura sortzea gogorra izan zen, eta hainbeste non errusiarrak adierazi ere egin zuen “nire sorgortutako burmuinetik zukutu egin behar” zuela. Haren barruan, Txaikovskik forma sinfoniko handia eta literatura-programa ezkutu bat uztartu zituen eta, tentsio horretatik, baita eslaviar folkloretik eta baleteko lengoaiatik ere, gaur egungo sinfonia eder eta ezagunenetako bat sortu zuen.

Sarrerak salgai (10€tik 35€ra). Kontzertu hauetarako sarrerak salgai daude euskadikoorkestra.eus webgunean eta kontzertu-aretoetako webguneetan zein leihatiletan. "Azken ordu gaztea": 30 urtetik beherako lagunek aukera izango dute gune guztietako sarrerak 10€tan erosteko, kontzertua hasi baino 30 minutu lehenago (leihatilan).

18/19 Denboraldiaren amaiera, 19/20aren ‘zain’. Kontzertu-programa honekin Euskadiko Orkestra Sinfonikoak Abonu Denboraldia amaitutzat joko du. Ekainaren 17an, Bilboko Euskalduna Jauregian, orkestra nagusi elkartu bezala, BBVA Fundazioaren Jakintzaren Mugak Sarien kontzertua eskainiko du. 19/20 Abonu Denboraldia uda ostean hasiko da ‘Zain’ izeneko programa batekin. Publikoa ezezagunean barrenako bidaia batean eramango du, ia guztiz ezkutukoa izango den eta kontzertuaren egunera arte ezagutaraziko ez den programa batekin. Horren aurretik, Orkestrak Musika Hamabostaldiaren edizio berri batean parte hartuko du, baita Soriako Musika Jaialdian eta Zinemaldian ere, besteak beste.

Kontzertuak eta programa

-Ekainak 6 (20:00): Kursaal Auditoriuma, Donostia.
-Ekainak 7 (20:00): Kursaal Auditoriuma, Donostia.
-Ekainak 10 (20:00): Euskalduna Jauregia, Bilbo.
-Ekainak 11 (20:00): Baluarte Auditoriuma, Iruña.
-Ekainak 13 (20:00): Principal Antzokia, Gasteiz.

Sergei Rakhmaninov
Pianorako 3. kontzertua [39’]

Piotr Ilyich Txaikovski
5. Sinfonia [44’]

Robert Treviño, zuzendaria
Alexei Volodin, pianojolea
Euskadiko Orkestra Sinfonikoa

Informazio gehiago

Miramongo Matinéeak Denboraldiaren amaierara iristear daude hamabosgarren kontzertuarekin, azken-aurrekoa, larunbatean, maiatzak 25, izango dena, 11:00etan, Miramongo Auditoriumean. ‘Biola eta biolontxelo errezitala’ izango da Dúo Ferrándezek eskainiko duen kontzertuaren izenburua. Duo hau Pablo Ferrández biolontxelojoleak eta Sara Ferrández biolajoleak osatzen dute, tradizio musikal handia duen familia batean jaioak biak.

Euskadiko Orkestra Sinfonikoaren Abonu Denboraldian egunotan Dvoraken Biolontxelorako kontzertuaren interpretazioa egiten ari den Pablo Ferrández nazioarteko ibilbide oso azkarra izaten ari da. Hiru urte zituela hasi zen biolontxeloa jotzen eta hamahirurekin Reina Sofía Goi Mailako Musika Eskolan sartu zen. Nazioarteko figura bezala finkatua, Ferrándezek sona handiko orkestrekin kolaboratu du, tartean Londreseko Filarmonikoarekin eta Israelgoarekin, eta uztail honetan Los Angeleseko Filarmonikoarekin eta Gustavo Dudamelekin egingo du debuta. Bere talentua hainbat sariren bidez aintzatetsi dute; bereziki gertukoa zaigu 2016an jaso zuen “Urteko artista gaztea” kategoriako ICMA saria, Euskadiko Orkestra Sinfonikoak eta Donostia 2016ko Europako Kultur Hiriburutzak antolatutako banaketa-galan.

Espainiako interprete gazteen artean erreferente bilakatu den Sara Ferrández biolajoleari buruz kritikak nabarmendu ditu bere soinu epela, naturaltasuna eta eszenatoki gainean erakusten duen segurtasuna. Berak ere hiru urterekin hartu zuen lehen aldiz biola eta zazpi urte zituenerako Estatuko eszenatoki garrantzitsuenetan jotzen hasia zen. Azken urteotan nazioarteko dimentsio nabarmena duen ibilbidea ari da garatzen, eta aipagarria da Berlingo Philharmonie edo Genevako Victoria Hall bezalako eszenatoki enblematikoetan jo duela.

Anai-arrebek Johann Sebastian Bachen obrez osatutako kontzertu hau eskainiko digute: Biolontxelorako 1. Suitea, Biolontxelorako 4. Suitea (biolarako transkripzioarekin) eta 15 asmakari (klabezinerako idatzitako obra, biola eta biolontxelorako transkribatua).

Sarrera solteak (7€) salgai daude euskadikoorkestra.eus webgunean eta Kursaal Auditoriumeko leihatilan. Gainera, leku librerik geratuko balitz, Orkestraren egoitzako leihatilan bertan eros ahal izango lirateke kontzertuaren egunean.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio bertaratu nahi duen orori. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Programa

Johann Sebastian Bach (1685-1750)

• Biolontxelorako 1. Suitea [18’]
• Biolontxelorako 4. Suitea [24’]
• 15 asmakari [23’]

Informazio gehiago

Euskadiko Orkestra Sinfonikoa 18/19 Denboraldiaren amaierara iristen ari da, eta bere azken aurreko kontzertu-programarekin dator oraingoan, ‘Heriotza jauregian’ izenekoa. Kontzertuak ohiko hiriburuetan izango dira: ostegunean, maiatzak 23, Bilboko Euskalduna Jauregian; ostiralean, maiatzak 24, eta astelehenean, maiatzak 27, Donostiako Kursaal Auditoriumean; asteartean, maiatzak 28, Iruñeko Baluarte Auditoriumean; eta ostegunean, maiatzak 30, Gasteizko Principal Antzokian. Guztiak 20:00etan izango dira.

Euskadiko Orkestra Sinfonikoaren zuzendari titular Robert Treviñok zuzenduko duen kontzertu-programa honetan protagonista argia Pablo Ferrández izango da, nazioarteko ibilbide oso azkarra izaten ari den biolontxelojolea. Hiru urte zituela hasi zen biolontxeloa jotzen eta hamahirurekin Reina Sofía Goi Mailako Musika Eskolan sartu zen. Nazioarteko figura bezala finkatua, Ferrándezek sona handiko orkestrekin kolaboratu du, tartean Londreseko Filarmonikoarekin eta Israelgoarekin, eta uztail honetan Los Angeleseko Filarmonikoarekin eta Gustavo Dudamelekin egingo du debuta. Bere talentua hainbat sariren bidez aintzatetsi dute; bereziki gertukoa zaigu 2016an jaso zuen “Urteko artista gaztea” kategoriako ICMA saria, Euskadiko Orkestra Sinfonikoak eta Donostia 2016ko Europako Kultur Hiriburutzak antolatutako banaketa-galan.

Zalantzarik gabe une honetako biolontxelojole bilatuenetako bat dena Euskadiko Orkestra Sinfonikoaren Denboraldian haren erakusgarrietako batekin estreinatuko da: Antonin Dvoraken Biolontxelorako kontzertua, pasioz jositako partitura bat, Mundu Berriko Sinfoniaren justu ondoren konposatua.

Dvoraken obraren ostean, eta ordurako Ferrández ondoan izan gabe, Robert Treviñok Orkestraren buru jarraituko du Edward Elgarren 2. Sinfoniari heltzeko. Konpositore ingelesak segurtatu zuenez, “nire arima utzi dut hor idatzita”. Ordubete irauten duen mihise-lana da, Erdialdeko Europako musikaren trinkotasuna erakusten duena, baina nortasun ingeles batez argi eta garbi.

Sarrerak salgai (10€tik 35€ra). Kontzertu hauetarako sarrerak salgai daude euskadikoorkestra.eus webgunean eta kontzertu-aretoetako webguneetan zein leihatiletan. "Azken ordu gaztea": 30 urtetik beherako lagunek aukera izango dute gune guztietako sarrerak 10€tan erosteko, kontzertua hasi baino 30 minutu lehenago (leihatilan).

Kontzertuak eta programa

-Maiatzak 23 (20:00): Euskalduna Jauregia, Bilbo.
-Maiatzak 24 (20:00): Kursaal Auditoriuma, Donostia.
-Maiatzak 27 (20:00): Kursaal Auditoriuma, Donostia.
-Maiatzak 28 (20:00): Baluarte Auditoriuma, Iruña.
-Maiatzak 30 (20:00): Principal Antzokia, Gasteiz.

Antonin Dvorak
Biolontxelorako kontzertua [40’]

Edward Elgar
2. Sinfonia [53’]

Robert Treviño, zuzendaria
Pablo Ferrández, biolontxelojolea
Euskadiko Orkestra Sinfonikoa

Informazio gehiago

Miramongo Matinéeek azken txanpari ekingo diote Denboraldiko hamalaugarren kontzertuarekin, larunbatean, maiatzak 11, izango dena, 11:00etan, Miramongo Auditoriumean. ‘Hirukotetik boskotera’ izeneko kontzertu hau Dumka boskoteak eskainiko du. Honako musikariek osatzen dute taldea: Birgit Kolar (Euskadiko Orkestra Sinfonikoaren kontzertino iraunkor gonbidatua), Julia Siciliano (pianoa) eta Euskadiko Orkestra Sinfonikoaren kide diren Irene Echeveste (biolina), Delphine Dupuy (biola) eta Juan Ignacio Emme (biolontxeloa).

Matinée honen programa itzal handiko bi egileren obrez osatzen da, biak ala biak oso ezagunak errepertorio bereziki joria izateagatik: Dmitri Xostakovitx eta Antonin Dvorak.

Bi biolinentzako eta pianorako bost piezarekin hasiko da Miramongo Matinéea, Dmitri Xostakovitxen obra ezberdinak (1955eko The Gadfly filmaren soinu-bandaren zatiak eta sobietar egilearen Jazz-suiteak, kasu) uztartzearen bidez Lev Atovmianek sortutako moldaketarekin. Pieza labur hauetan Xostakovitxen beste alderdi bat ikus daiteke, lirismo epel eta xarma eslaviarrekoa, ohiko iluntasun itzaltsu eta zorroztasun sardonikotik urrun.

Goizeko bigarren eta azken obra Antonin Dvorakena izango da. Brahmsen ostean, autore txekiarrari zor zaio gehien XIX. mendeko bigarren erdiko ganbera-musikaren arloan. Eta gainera, aditu askoren arabera, Pianorako 2. kintetoa (1887), Dumkak Matinéean eskainiko duena, da bere ganbera-obra onenetako bat. Musika folklorikoaren bira eta erritmo ohikoez osatutako piezak osatzeko Dvoraken abileziaren adibide argienetako bat da obra hau. Edertasun handikoa da, egitura finekoa, zabaltasun emozionalekoa eta maisulan batek bakarrik izan dezakeen sakontasunekoa.

Sarrera solteak (7€) salgai daude euskadikoorkestra.eus webgunean eta Kursaal Auditoriumeko leihatilan. Gainera, leku librerik geratuko balitz, Orkestraren egoitzako leihatilan bertan eros ahal izango lirateke kontzertuaren egunean.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio bertaratu nahi duen orori. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Programa

Dmitri Xostakovitx (Lev Atovmianen moldaketa)

Bi biolinentzako eta pianorako bost pieza [10’]

I. Prelude. Moderato
II. Gavotte. Tranquillo, molto leggiero
III. Elegy. Andantino
IV. Waltz. Tempo di valse, moderato
V. Polka. Vivace

Antonin Dvorak

Pianorako 2. kintetoa la maiorrean [35’]

            I. Allegro ma non tanto
            II. Dumka. Andante con moto
            III. Scherzo (Furiant). Molto vivace
            IV. Finale. Allegro

Informazio gehiago

Euskadiko Orkestra Sinfonikoa 18/19 Denboraldiaren amaierara iristen ari da, eta bere zortzigarren kontzertu-programarekin dator oraingoan, ‘Bihotz mindua’ izenekoa. Kontzertuak ohiko hiriburuetan izango dira: astelehenean, maiatzak 6, eta ostiralean, maiatzak 10, Donostiako Kursaal Auditoriumean; asteartean, maiatzak 7, Iruñeko Baluarte Auditoriumean; asteazkenean, maiatzak 8, Bilboko Euskalduna Jauregian; eta ostegunean, maiatzak 9, Gasteizko Principal Antzokian. Guztiak 20:00etan izango dira.

Azken urteotan, Euskadiko Orkestra Sinfonikoaren zuzendari titularra, Robert Treviño, aintzatetsia izaten ari da mundu osoan Mahlerren musikaren zuzendari nabarmen gisa; izan ere, haren sinfoniekin egin du debuta London Symphony, Zuricheko Tonhalle Orchester eta Municheko Filarmonikoa orkestren buru.

Aipatzeko modukoa da, baita ere, Denboraldi honetan bertan, 2018ko abenduan, Treviñok bohemiar musikagilearen Laugarren sinfonia zuzendu zuela Euskadiko Orkestra Sinfonikoarekin eta Mojca Erdmann soprano alemaniarrarekin batera Austriako Linz eta Bregenzera eta Alemaniako Munichera egindako bira arrakastatsu batean.

Oraingoan, Treviñok Gustav Mahlerren sorkuntza-lan konplexuenetako bat hautatu du, 9. Sinfonia, Alban Berg konpositore vienarrak “Mahlerrek inoiz idatzitako gauza zoragarriena” bezala goretsi zuena. Hil baino bi urte lehenago amaitu zuen, eta azken lan handia du Lurraren abestiarekin (19/20 Denboraldian Euskadiko Orkestra Sinfonikoak interpretatuko duena) eta amaitu gabeko Hamargarren sinfoniarekin batera. Horietan bezala, heriotzaren kontzientzia sumatzen da soinu-mataza liluragarri baten ondoren, eta agerian uzten du Mahlerrek bizitzaren azkenetan erdietsitako parerik gabeko orkestrarako maisutza.

Sarrerak salgai (10€tik 35€ra). Kontzertu hauetarako sarrerak salgai daude euskadikoorkestra.eus webgunean eta kontzertu-aretoetako webguneetan zein leihatiletan. "Azken ordu gaztea": 30 urtetik beherako lagunek aukera izango dute gune guztietako sarrerak 10€tan erosteko, kontzertua hasi baino 30 minutu lehenago (leihatilan).

Kontzertuak eta programa

-Maiatzak 6 (20:00): Kursaal Auditoriuma, Donostia.
-Maiatzak 7 (20:00): Baluarte Auditoriuma, Iruña.
-Maiatzak 8 (20:00): Euskalduna Jauregia, Bilbo.
-Maiatzak 9 (20:00): Principal Antzokia, Gasteiz.
-Maiatzak 10 (20:00): Kursaal Auditoriuma, Donostia.

Gustav Mahler
9. sinfonia  [75’]

Robert Treviño, zuzendaria
Euskadiko Orkestra Sinfonikoa

Informazio gehiago

Larunbat honetan, apirilak 13, 11:00etan, Miramongo Auditoriumean, Miramongo Matinéeak 18/19 Denboraldiko hamahirugarren hitzordura iritsiko dira Alma Hirukotearen ‘Beethoven miresgarria eta Dohnányi zoragarria’ izeneko kontzertuarekin. Taldea Euskadiko Orkestra Sinfonikoko hiru kidek osatzen dute: Mikel Ibañez (biolina), Justyna Janiak-Krymer (biola) eta Flore Lefevre (biolontxeloa).

Matinéea Ludwig Van Beethovenen 3. harirako trioarekin hasiko da; obra-sorta hau osatzen duten hiru trioetako indartsuena da. Obrak aberastasun tematiko handia du mugimendu azkarretan eta ia sinfonikoak diren elaborazioetan, batez ere hasierako ‘Allegro’-an. ‘Adagioa’, bestalde, bere atmosfera malenkoniatsuarekin, edertasun handikoa da. Trioa ‘Presto’ distiratsu eta birtuoso batekin amaitzen da.

Kontzertuko bigarren eta azken obra Ernö Dohnányiren Serenata izango da, Hungariako musikagilearen maisulan nabarmenena ganbera-musikaren eremuan. Mozart eta Haydni begi-keinu ugari egiten dizkion arren, lan honek pertsonalitate handia du. Berrikuntza ugari ditu eta musika erromantikoko melodia herrikoiak ditu inspirazio-iturri, nahiz eta ‘Scherzo’-an eragin honetatik aldentzen den. Amaierako ‘Rondo’-an Haydni omenaldia egin zion honen Pianorako eta harirako 39. trioaren (“Trio zingaroa” izenez ere ezagutzen dena) ‘Rondo all’Ungarese’ ezaguneko motiboa gogora ekarriz. Dohnányi sona handiko pianojolea ere izan zen eta Brahms miretsi izan zuen beti. Bela Bartokek honakoa esan zuen berari buruz: “Hungariako musika pertsona bakarrean laburbildu daiteke: Dohnányi”.

Sarrera solteak (7€) salgai daude euskadikoorkestra.eus webgunean eta Kursaal Auditoriumeko leihatilan. Gainera, leku librerik geratuko balitz, Orkestraren egoitzako leihatilan bertan eros ahal izango lirateke kontzertuaren egunean.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio bertaratu nahi duen orori. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Programa

Ludwig Van Beethoven
3. Harirako trioa

I. Adagio – Allegro con brio
II. Adagio, ma non tanto, e cantabile
III. Scherzo. Allegro
IV. Presto

Ernö Dohnányi
Serenata
            I. Marcia. Allegro
            II. Romanza. Adagio non troppo
            III. Scherzo. Vivace
            IV. Tema con variazioni. Andante con moto
            V. Rondo

Informazio gehiago

Ezezagunean barrena bidaia, baita horrek eragiten dizkigun emozioetan, beldurretan, ametsetan eta errealitateetan barrena ere. Denboraldi berriaren ardatza ideia horixe izango da, programa ugaritan egongo da presente eta bereziki nabarmenduko da lehen kontzertu-sortan, ezkutuko programa bat izango baitu. Bakarrik ezagutuko dugu Mikel Chamizoren obraren estreinaldia eta programak izango dituen protagonistak: Bilboko Koral Elkartea, Mojca Erdmann eta Treviño bera. Hasiera hau aparteko esperientzia izango da, kontzertuaren amaierara arte argituko ez den inkognita.

Elkano proiektuak bere zeharkaldia hasiko du. Orkestrak munduari egindako lehen biraren bosgarren mendeurrenaren oroitzan parte hartu nahi izan du bidaia honi lotutako bost obra alegorikoren enkargu eta estreinaldiarekin. Hiru denboralditan barrena garatuko da proiektua, zeharkaldiak iraun zuen bezainbeste denboran. Lehen estreinaldia Denboraldiaren lehen programan iritsiko da, Mikel Chamizoren obrarekin. Denboraldiko bigarrena Mikel Urquizarena izango da.

Bidaia horiek guztiek irudi propioa izango dute. Espresuki sortutako konposizio grafiko hauek programa bakoitzaren gaiari edo obra nagusiari oso lotuta daude. Ezezagunerantz doan bidaia baterako ontziratzeko txartelak izango dira.

Euskadiko Orkestra Sinfonikoaren 2019/2020 Abonu Denboraldia irailaren 27an hasiko da Gasteizen eta hiri berean amaituko da 2020ko ekainaren 4an. Orkestrak hamarna kontzertu eskainiko ditu bere egoitzetako bakoitzean, Bilbo, Donostia (saio bikoitza), Gasteiz eta Iruñean, alegia. Guztira berrogeita hamar kontzertu baino gehiago emango ditu Abonu Denboraldiaren baitan.

Denboraldi bakoitzeko Abonuko kontzertuak ez ezik, horiek baitira denboraldi bakoitzeko oinarrizko ardatza, Euskadiko Orkestra Sinfonikoaren jarduera kontzertuen katalogo oso anitz batez osatzen da eta, bertan, badira etxeko ekoizpen-zikloak zein beste festibal garrantzitsuei eta kultur ekintza eta erakundeei lotutakoak. 50 kontzertuko Abonu Denboraldiaren eta atal garrantzitsu honen uztarketari esker, euskal talde honek ehun ekintzatik gora egingo ditu Denboraldi osoan. Programatzen diren musika-formatuetako bakoitzera egokitzeko gaitasun horri esker, Orkestrak harremanak lotzen ditu askotariko estilo, interes eta adinak dituzten entzuleekin eta, ondorioz, ondo errotuta dago gizartean. 

Informazio gehiago

Euskadiko Orkestra Sinfonikoak 18/19 Denboraldiaren garapenarekin jarraituko du bere hurrengo kontzertu-programarekin, ‘Jeinu korala’ izenekoa. Kontzertuak ohiko hiriburuetan izango dira: astelehenean, apirilak 8, eta ostiralean, apirilak 12, Donostiako Kursaal Auditoriumean; asteartean, apirilak 9, Iruñeko Baluarte Auditoriumean; ostegunean, apirilak 11, Gasteizko Principal Antzokian; eta larunbatean, apirilak 13, Bilboko Euskalduna Jauregian. Guztiak 20:00etan izango dira.

Beethoven berriz bihurtuko da protagonista gure hurrengo abonu-programan, gau-emanaldi sinfoniko-koral handi honetan, Hans Grafek gidatutakoa. Orkestrak eta Andra Mari Abesbatzak elkar hartuko dute Beethovenen hiru pieza koral bizkortzeko: Itsasoa bare eta bidaia oparoa, Elegia-kantua eta oraindik ere benetan originala den Fantasia korala, Alfonso Gómez gasteiztarrarekin pianoan.

Gasteizen jaio arren Friburgon bizi den Alfonso Gómez birtuosismo eta moldaerraztasun handiko pianojolea da eta, errepertorio kanonikoa izateaz gain, musika garaikideari arreta handia eskaintzen dio; Espainian erreferente handia da arlo horretan. Kontzertu ugari eskaini ditu Frantzian, Belgikan, Herbehereetan, Austrian, Alemanian, Italian, Ukrainan, Estatu Batuetan, Kanadan, Mexikon, Taiwanen eta Hego-Korean. Gainera, estatuko zein nazioarteko lehiaketetan 11 alditan saritu dute, besteak beste, honako lehiaketetan: J. Françaix (Paris), Ciudad de Guernika, Alter Musici (Cartagena) eta Gerardo Diego (Soria).

Gaueko beste gonbidatu handia Errenteriako Andra Mari Abesbatza izango da, Euskadiko Orkestra Sinfonikoaren ezinbesteko kolaboratzailea. 2016an mende erdia bete zuen abesbatza hau ahots-kalitate aldetik une gorenean dago.

Bigarren zatia Dmitri Xostakovitxen 1. Sinfoniara dedikatuta dago, konposizioko birtuosismo ariketa borobila. Errusiarra haren bidez graduatu zen, artean nerabea zela, Leningradeko Kontserbatorioan. Geroko sinfonietan ez bezala, espekulazio ugari egon baita horien asmo politikoaz, Xostakovitx garbi eta talentuz gainezka agertzen da hemen.

Hans Graf Euskadiko Orkestra Sinfonikoaren zuzendaria izan zen bi denboralditan (1994tik 1996ra). Grafen ibilbidea Mozarten figurari oso lotuta dago, eta horren adibide garbia da 1984 eta 1994 bitartean Salzburgoko Mozarteum Orkestrarekin batera konpositore austriarraren sinfonien integrala grabatu zuela. Euskadiko Orkestra Sinfonikoan egon ondoren, Graf Calgaryko Filarmonikaren (1995-2003) eta Bordele-Akitaniako Orkestra Nazionalaren (1998-2004) titular izan zen, besteak beste, baina harreman estuena eta luzeena Houston Symphonyarekin izan du; 2001etik 2013ra arte izan zen horren zuzendaria. Grafek diskografia zabala du, sari garrantzitsuak eskuratzea ahalbidetu diona, aipagarrienak Echo Klassik saria 2017an eta Grammy bat 2018an.

Sarrerak salgai (10€tik 35€ra). Kontzertu hauetarako sarrerak salgai daude euskadikoorkestra.eus webgunean eta kontzertu-aretoetako webguneetan zein leihatiletan. "Azken ordu gaztea": 30 urtetik beherako lagunek aukera izango dute gune guztietako sarrerak 10€tan erosteko, kontzertua hasi baino 30 minutu lehenago (leihatilan).

Kontzertuak eta programa

-Apirilak 8 (20:00): Kursaal Auditoriuma, Donostia.
-Apirilak 9 (20:00): Baluarte Auditoriuma, Iruña.
-Apirilak 11 (20:00): Principal Antzokia, Gasteiz.
-Apirilak 12 (20:00): Kursaal Auditoriuma, Donostia.
-Apirilak 13 (20:00): Euskalduna Jauregia, Bilbo.

Ludwig Van Beethoven
Itsasoa bare eta bidaia oparoa [10’]
Elegia-kantua [7’]
Fantasia korala [19’]

Dmitri Shostakovich
1. Sinfonia [28’]

Hans Graf, zuzendaria
Alfonso Gómez, pianoa
Andra Mari Abesbatz

Informazio gehiago