Euskadiko Orkestra Sinfonikoak 18/19 Denboraldiaren garapenarekin jarraituko du bere seigarren kontzertu-programarekin, ‘Aire bohemioak’ izenekoa. Kontzertuak ohiko hiriburuetan izango dira: ostiralean eta astelehean, martxoak 8 eta 11, Donostiako Kursaal Auditoriumean; larunbatean, martxoak 9, Bilboko Euskalduna Jauregian; asteartean, martxoak 12, Iruñeko Baluarte Auditoriumean; eta asteazkenean, martxoak 13, Gasteizko Principal Antzokian. Guztiak 20:00etan izango dira.

Orkestrarekin 2017ko martxoan izandako arrakastaren ondoren, Pinchas Zukerman (Tel Aviv, 1948) biolinjole ospetsua euskal oholtzetara itzuliko da, hain ezaguna ez den bere fazeta bat aurkezteko: zuzendari-lana. Zukerman musikaren munduan fenomeno bat izan da lau hamarkada baino gehiagoz. Bere jeinutasun musikala, teknika liluragarria eta estandar artistiko sendoek harrituta utzi dituzte publikoa eta kritikoak. Zukerman ezaguna da hainbat roletan: biolinjole, biolajole, zuzendari, pedagogo eta ganbera-musikari bezala. Israeldarrak hamar urte daramatza Londreseko Royal Philharmonic Orchestraren zuzendari gonbidatu nagusi izaten eta lau Adelaide Symphony Orchestrako artista elkartu gisa. Arteen Domina eskuratu du, baita Isaac Stern saria ere bere Bikaintasun Artistikoagatik. Bere diskografia zabalak 100 grabazio baino gehiago hartzen ditu barne, eta 21 izendapen eta bi Grammy Sari lortu ditu.

Hasteko, garai guztietako kontzertu ospetsuenetako bati aurre egingo dio Zukermanen biolinarekin: Biolinerako kontzertua, Ludwig van Beethovenek 1806an konposatu zuena; haren hirugarren mugimendu pastorala, hain zuzen, haren sorkuntzako atal pozgarrienetakotzat jotzen da.

Ondoren, jada biolinik gabe, Zukerman Dvoraken 8. Sinfonia argitsuan loratzen diren Bohemiako gai folklorikoetan murgilduko da. Txaikovskiren Bosgarrenaren garaikidea den lan honetan (hura denboraldiaren amaieran entzuteko parada izango dugu), Dvorakek pozaren aldeko apustu argia egin zuen, panorama sinfonikoa zertxobait atsekabetua zenean.

Astelehenean, martxoak 11, Pinchas Zukermanek Musikeneko biolin-ikasleei masterclass bat eskainiko die. Ekimen hau Euskadiko Orkestra Sinfonikoak eta Musikenek Aula Jordá Gela izenburupean sinatutako hitzarmenaren baitan kokatzen da. Horri esker, kontserbatorioko ikasleek lehen eskutik ezagutu ditzakete Orkestraren Abonu Denboraldian parte hartzen duten bakarlari handietako batzuk.

Sarrerak salgai (10€tik 35€ra). Kontzertu hauetarako sarrerak salgai daude euskadikoorkestra.eus webgunean eta kontzertu-aretoetako webguneetan zein leihatiletan. "Azken ordu gaztea": 30 urtetik beherako lagunek aukera izango dute gune guztietako sarrerak 10€tan erosteko, kontzertua hasi baino 30 minutu lehenago (leihatilan).

Elkarrizketak. Elkarrizketak eskatzeko prentsa-departamenduarekin harremanetan jar zaitezkete (melosegui@euskadikoorkestra.eus / ilertxundi@euskadikoorkestra.eus, 943013232).

Kontzertuak eta programa

-Martxoak 8 (20:00): Kursaal Auditoriuma, Donostia.
-Martxoak 9 (20:00): Euskalduna Jauregia, Bilbo.
-Martxoak 11 (20:00): Kursaal Auditoriuma, Donostia.
-Martxoak 12 (20:00): Baluarte Auditoriuma, Iruña.
-Martxoak 13 (20:00): Principal Antzokia, Gasteiz.

Ludwig Van Beethoven
Biolin eta Orkestrarako kontzertua, Op.61 [42’]

Antonin Dvorak
8. Sinfonia, Op.88 [34’]

Pinchas Zukerman, zuzendaria eta biolinjolea

Informazio gehiago

Larunbat honetan, otsailak 23, 11:00etan, Miramongo Auditoriumean, Miramongo Matinéeak 18/19 Denboraldiko hamargarren hitzordura iritsiko dira Quintetto Appassionatoren ‘Klarinetea eta haria’ izeneko kontzertuarekin. Taldea Euskadiko Orkestra Sinfonikoko bost musikarik osatzen dute: Itziar Prieto (biolina), Mikel Ibañez (biolina), Natacha Dupuy-Scordamaglia (biola), Gabriel Mesado (biolontxeloa) eta Sara Zufiaurre (klarinetea).

Duela bi urte Quintetto Appassionatok Miramongo Matinéeen zikloan Johannes Brahmsen Klarinete- eta hari-kintetoa interpretatu zuen. Esperientzia positibo horren ostean, kontzertu berri honetan hari- eta klarinete-errepertorioarekin jarraituko dute, eta Wolfgang Amadeus Mozarten Klarinete- eta hari-kintetoa K.581 obra interpretatuko dute. Obra 1789an konposatu zuen (jatorrian corno di bassettoarentzat idatzia) eta bere lagun klarinetista Anton Stadlerri eskaini zion. Klarinetea nahiko instrumentu berria zen artean, eta Mozartek dezentetan erabili zuen bere konposizio-karrera osoan (Klarineterako kontzertua, Trio Kegelstatt, etab.). Kinteto honekin Mozartek klarinete eta hari-laukoterako errepertorioari hasiera eman zion, eta bidea ireki zien Carl Maria von Weber eta Johannes Brahms bezalako beste musikagile batzuei, lan horri jarraipena eman ziezaioten.

Baina aurretik, Quintetto Appassionatok 1772an konposatutako Hari-laukoterako divertimentoa K.136 obrarekin irekiko du kontzertua. Mozartek 16 urte baino ez zituen une horretan, baina ordurako eskarmentu handia zuen, ehun obra baino gehiago idatziak baitzituen. Divertimentoak ez dauka aurrez ezarritako egitura zehatzik eta mugimendu kopuru oso aldakorra du. XVIII. mendean ohikoa zen afalostean jotzea eta batzuetan haize zabalean. Quintetto Appassionatok, ordea, goizez joko du eta areto barruan.

Sarrera solteak (7€) salgai daude euskadikoorkestra.eus webgunean eta Kursaal Auditoriumeko leihatilan. Gainera, leku librerik geratuko balitz, Orkestraren egoitzako leihatilan bertan eros ahal izango lirateke kontzertuaren egunean.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio bertaratu nahi duen orori. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

Euskadiko Orkestra Sinfonikoak ‘Izotz-pokerra’ izenburua duen programa Gasteizen bakarrik eskainiko da ostiral honetan, otsailak 22, 20:00etan, Principal Antzokian izango den kontzertu batean.

Bach, Stravinski eta Sibeliusen obrak ere barne hartuko dituen askotariko programa batean, nabarmentzekoa izango da Xabier Otaolea (Bilbo, 1989) euskal konpositore gaztearen Izozmendi obraren erabateko estreinaldia. Otaoleak konposizioa ikasi zuen Musikenen Ramon Lazkano eta Gabriel Erkorekarekin, besteak beste. Izaerak eta Dolmen lanak estreinatu zituen Bilboko BBVAren musika garaikideko zikloaren barruan. 2016 urtean Gracia Querejetak zuzendutako Kalebegiakeko film laburrari soinu-banda jarri zion. Modu aktiboan hartu du parte Bilboko txistulari-bandan Txistuak hitz egiten duenean ikuskizunaren bidez eta euskal musika herrikoiaren moldaketen bidez.

Euskadiko Orkestra Sinfonikoarekin 2016an estreinatu zuen Agartha bere lanak izandako harrera beroaren ostean, Espainiako Orkestra Sinfonikoen Elkarteak (AEOS) eta SGAE Fundazioak lan berri baterako mandatua eman diote Xabier Otaolea musikagile gazteari. Oraingoan, lurralde izoztuetara egindako bidaia proposatuko digu Izozmendi lanarekin, eta hau ere Euskadiko Orkestra Sinfonikoak estreinatuko du ostiral honetan Gasteizen. Konposizio honetan, Otaoleak glaziarretik bat-batean askatu eta jitoan nabigatu ostean, azkenik ozeanoan urtzen den iceberg baten bidaldia deskribatzen du. Icebergaren bizitza-ibilbide hau “bakardadeari buruzko hausnarketa bilakatu zen batez ere”, ordu asko igaro baitzituen “bakarrik konposatzen eta neure burua ezagutzen”. Bere hitzetan “icebergak bezala, guztiok dugu norberak soilik ezagutzen duen ezkutuko alderdi bat”. Ondoko bideoan entzun daiteke Otaoleak nola azaltzen duen bere obra:

Sibelius, Bach, Stravinski

Izoztuak dira, baita ere, Lemminkäinenek zeharkatzen dituen parajeak. Hura Kalevala finlandiar epopeia nazionaleko heroi bat da, eta Sibeliusek suite ebokatzaile bat egin zuen haren omenez, Lemminkäinen Suite, eta haren lau mugimenduetako hiru entzun ahal izango dira kontzertuan.

Programa konposizioaren beste bi txapeldunekin osatuko da: Johann Sebastian Bach, Musika-eskaintzaren zati batekin, eta Igor Stravinski, 1937an pokerrerako bere grina Jeu de cartes balletean adierazi zuena, non jokalariak eta kartak protagonista zoragarriak bihurtzen diren.

Mélanie Levy-Thiébauten zuzendaritzapean Marie-Antoinette balletaren emanaldiak eskaini ostean Donostian, Iruñean eta Bilbon, Orkestra berriz egongo da Marokon jaio zen eta Frantzian bizi den zuzendariaren gidaritzapean Gasteizko kontzertu honetan. Bere ibilbide luzean, Levy-Thiébaut zuzendari laguntzaile izan da Mulhouseko Orkestra Sinfonikoan, Cadre Noir de Saumur erakundeko aholkulari artistikoa ere bai, Manifesto Orkestraren fundatzailea eta Ensemble Instrumental de la Mayenne taldearen zuzendari musikala, beste kargu batzuen artean. Sarri zuzentzen ditu Nantesko Folles Journéeak. Levy-Thiébautek Euskadiko Orkestra Sinfonikoarekin kolaboratu du lehenago ere. 2017ko urrian izan zen, hain zuzen, Babilonia berria (1929) Kosintseven filmari zuzeneko musika jarri zietenean.

Sarrerak salgai (10€tik 35€ra). Kontzertu hauetarako sarrerak salgai daude euskadikoorkestra.eus webgunean eta Principal Antzokiko webgunean zein leihatilan. "Azken ordu gaztea": 30 urtetik beherako lagunek aukera izango dute gune guztietako sarrerak 10€tan erosteko, kontzertua hasi baino 30 minutu lehenago (leihatilan).

Programa

Johann Sebastian Bach
Eskaintza musikala. Ricercare nº2

Igor Stravinsky
Jeu de cartes

Xabier Otaolea
Izozmendi (erabateko estreinaldia)

Jean Sibelius
Lemminkäinen Suite. 1, 2 eta 4

Informazio gehiago

Berriz itzuli da dantza Euskadiko Orkestra Sinfonikoaren programaziora, Malandain Ballet Biarritz konpainiarekin lankidetzan oraingoan ere. Izan ere, azken urteotan, fruitu ahaztezinak eman ditu, adibidez, Magifique (2011), Errauskine (2013) eta Ederra eta piztia (2015).

Oraingoan, beste emakumezko pertsonaia baten historia bisitatu dugu: Marie-Antoinette. Thierry Malandainen koreografia du eta, horretarako, Joseph Haydnen lau lan hartu ditu musika-oinarri: 6, 7 eta 8. sinfonia goiztiarrak, ezizenez “Goiza”, “Eguerdia” eta “Arratsaldea” hurrenez hurren, baita 73. Sinfonia ere, “Ehiza” deitua. Ikuskizunak Mélanie Levy-Thiébaut orkestra-zuzendaria izango du maistratzat, errepertorio koreografiko eta zinematografikoko espezialista handia.

Obra Euskadiko Orkestra Sinfonikoaren Abonu Denboraldiaren baitan estreinatuko da otsailaren 14 eta 15ean Donostiako Kursaal Auditoriumean, otsailaren 19an Iruñeko Baluarte Auditoriumean eta otsailaren 21ean Bilboko Euskalduna Jauregian. Produkzio berri honek lehen emanaldiak 2018ko azaroan izan zituen Biarritzeko Gare du Midin, Malandainen egoitzan. Abonu Denboralditik pasa ondoren, martxoaren 29tik 31ra, produkzioak bere munduko estreinaldia izango du Opéra Royal: les grands concerts de Versailles ziklo prestigiodunaren baitan, Château de Versailles-en ospatzen dena. Hain zuzen, Luis Augusto delfinaren eta Maria Antonieta artxidukesaren arteko ezteiak ospatzeko 1770. urtean inauguratu zuten Versaillesko Errege Operako eszenatokian antzeztuko da lehen aldiz obra hau. Hirugarren aldia da Malandainek eta Orkestrak Parisko metropoliko hiri honetara batera bidaiatzen dutela. 2013an egin zuen Errauskinerekin eta 2015ean Ederra eta Piztiarekin.

Euskadiko Orkestraren eta Frantziako 19 zentro koreografiko nazionaletako bat den Malandain Ballet Biarritzen arteko harreman estua artistikoki oso baliozkoa da. Elkarlan horrek osagarriak diren jarduerak garatzen dituzten kultur erakundeen artean sinergiak sortzeak duen garrantzia azpimarratzen du, sinergia hoiek gerora eszenatoki garrantzitsuenetan aurkeztuko diren maila goreneko sorkuntzen garapena ahalbidetzen baitute, gure kulturaren ordezkaritza onena bilakatuz.

Sinopsia

Bi erakundeek elkarlanean prestatutako obra honek Marie-Antoinetteren historia kontatzen du. Erresumako maitagarri gaiztotzat eta bere gaitz guztien erruduntzat jo zuten, bere hilotza eskorga baten barruan, burua hankartean zeramala, eraman aurretik. Bere axolagabekeriagatik, Erregina izateko interes faltagatik, Trianonengatik, bere maitale, limurtze edo diamanteengatik, panfleto eta karikaturetan zabaldutako Gortearen sona galtzeengatik, Iraultzarengatik eta isuritako odolak aurrerapena ekarriko zuen sinesmenarengatik ez balitz, Maria Antonietak bizitza sotil bat izango zuen eta ez zen torturatua hilko. Zer gertatu zen, baina, herri guztiak maite zuen erregina bat jendearen estimua galdu eta gorrotatua hil zedin? Zer gertatu zen monarkiaren ikur zenak bere amaiera azkartzen lagun zezan? Ezinezkoa da galdera konplexu horiei ballet batekin erantzutea. Horrenbestez, Maria Antonietaren bizitza osoa antzezteko ezintasun materialak bultzatuta, balletaren narrazioa eta testuingurua Versaillesera mugatzea erabaki dugu.

Protagonistak

Thierry Malandain

80tik gora koreografia egin dituela, dantzaren errepertorio koherentea osatzen jarraitzen du Malandain Ballet Biarritzen zuzendari eta koreografo Thierry Malandainek, Balletari estuki lotua, non gorputz dantzaria, bere indarra, birtuosismo, gizatasun eta sentsualitatea lehenesten dituen. Bere hitzetan: “Konplexurik gabeko ballet klasikoarena da nire kultura eta hori da nik garatzen dudana. Bere kode artistiko eta sozialak beste garai batekoak direla onartzen badut ere, nire ustez lau mendeko historiarengandik jaso dugun material horrek guztiak baliabide paregabeak eskaintzen baitizkio dantzariari. Dibertitzea, maite dudan dantza lortzea da nire nahia, klasikoa izango dena zenbaitentzat, garaikidea bestentzat. Plazeraren arrastoa uzteaz gain, jainkotasunarekin adiskidetu nahi duen dantza, izatearen zailtasunei erantzuteko”.

Malandain Ballet Biarritz

Malandain Ballet Biarritz 1998an sortu zen Kultura eta Komunikazio Ministerioaren eta Biarritzeko hiriaren ekimenez eta Akitania Berria Eskualdearen eta Pirinio Atlantikoen Kontseilu departamentalaren babesarekin. Frantziako hemeretzi Zentro Koreografiko Nazionaletako (ZKN) bat da. Malandain Ballet Biarritzen ezaugarri nagusia, aldiz, honako hau: taldea osatzen duten hogeita bi dantzarien espezializazioa teknika klasikoa bada ere beren espresioa garaikidea dela, Thierry Malandainen koreografien bitartez. Malandain Ballet Biarritz ikusle gehien dituzten Europako konpainien artean dago egun: 100.000 ikusle hartzen ditu urteko eta 100 bat ikuskizun eskaintzen ditu, horietako herena atzerrian delarik.

Mélanie Levy-Thiébaut

Mélanie Levy-Thiébautek (Casablanca, 1964) piano-ikasketak Casablancako Kontserbatorioan hasi zituen, 6 urte zituela, baina orkestra-zuzendari izateko grina zuen harrezkero. Graciane Finzi musikagilearen alaba, Ligeti, Stockhausen eta Messianen lan guztiak entzun zituen haurtzaroan zehar. Eta, halere, errepertorio klasikoarenganako joera agertu zuen. 1996. urtean, Mulhouseko Orkestra Sinfonikoak zuzendari laguntzailea izendatu zuen. 1998 eta 2005 bitartean, Cadre Noir de Saumur erakundeko aholkulari artistikoa izan zen eta bere ikuskizunak Frantzian eta atzerrian zuzendu zituen. 2005. urtean Manifesto Orkestra sortu zuen, metalezko haize-instrumentuen talde bat, Errenazimendutik jazzeraino estaltzen duen errepertorio bat jotzen duena. 2011n “Musique classique pour Tous” ekimeneko zuzendari artistiko izendatu zuten, St Quentin en Yvelinesen, Manifesto Orkestrarekin batera. 2014. urtean, Ensemble Instrumental de la Mayenne (Loirako Eskualdea) taldeak musika-zuzendari izendatu zuen. Eta, honela, erregularki zuzentzen du Nantesko Folles Journées jaialdian. Levy-Thiébautek Euskadiko Orkestra Sinfonikoarekin kolaboratu du lehenago ere. 2017ko urrian izan zen, hain zuzen, Babilonia berria (1929) Kosintseven filmari zuzeneko musika jarri zietenean.

Informazio gehiago

Marie-Antoinette emakume-pertsonaia boteretsua, J. Haydnen musika eta Thierry Malandain koreografoaren jeinutasuna elkartuko dira Malandain Ballet Biarritz konpainiak eta Euskadiko Orkestra Sinfonikoak prestatutako ekoizpen berri honetan. Estreinaldiko obra honek Mélanie Levy-Thiebaut izango du zuzendari, espezialista handia errepertorio koreografiko eta zinematografikoan.

Otsailaren 14a eta 21a bitartean estreinatuko da obra Euskadiko Orkestra Sinfonikoaren Abonu Denboraldian. Sarrera gehienak salduta daudela, produkzio berri honen saio osagarri batera bertaratzeko aukera eskainiko da. Kursaal Auditoriumean izango da ostiralean, otsailak 15, 16:00etan.

Sarrerak salgai daude 20 eurotan Orkestraren webgunean.

Informazio gehiago

Larunbat honetan, otsailak 9, 11:00etan, Miramongo Auditoriumean, Miramongo Matinéeak 18/19 Denboraldiko bederatzigarren hitzordura iritsiko dira Dionysus & Fagoten “Haizea harietan” izeneko kontzertuarekin. Taldea Euskadiko Orkestra Sinfonikoko bost musikarik osatzen dute: Irene Echeveste (biolina), Larraitz Oiartzabal (biolina), Delphine Dupuy (biola), Juan Ignacio Emme (biolontxeloa) eta François Proud (fagota).

Garai bereko, aro klasikoko, hiru obrez osatzen da programa; aitzitik, oso ezberdinak dira konposizioak euren artean.

Horrela, bada, Wolfgang Amadeus Mozarten Fagot eta biolontxelorako sonatarekin hasiko da programa. Normalean obra hau, bere forma originalean interpretatu beharrean, bi biolontxelo edo bi fagotekin jo ohi da, baina Matinée honetan jatorrizko konposizioa errespetatuko da.

Juan Crisóstomo de Arriaga euskal konpositorearen 1. Hari-laukotearen energia bizi eta argitsuaren ostean, Carl Maria Von Weberren Andante & Rondo ongareseko bariazioen jolas espiritualez gozatu ahal izango du publikoak. Kasu honetan, Michael Roten moldaketa bat interpretatuko dute.

Kontzertua Edward Elgar musikagile britainiar autodidaktaren poema batekin borobilduko da, Trevor Cramerren moldaketarekin.

Sarrera solteak (7€) salgai daude euskadikoorkestra.eus webgunean eta Kursaal Auditoriumeko leihatilan. Gainera, leku librerik geratuko balitz, Orkestraren egoitzako leihatilan bertan eros ahal izango lirateke kontzertuaren egunean.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio bertaratu nahi duen orori. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

OLBEren Denboraldian arrakasta osoz parte hartu ostean I Lombardirekin, Euskadiko Orkestra Sinfonikoak berriz ekingo dio Abonu Denboraldiari laugarren programarekin, Handiusteko orroak izenekoa. Kontzertuak Gasteizko Principal Antzokian hasiko dira astelehenean, otsailak 4, eta gainontzeko hirietan jarraituko dute ondoren: asteartean, otsailak 5, Iruñeko Baluarte Auditoriumean; asteazkenean, otsailak 6, Bilboko Euskalduna Jauregian; eta ostegun eta ostiralean, otsailak 7 eta 8, Donostiako Kursaal Auditoriumean. Guztiak 20:00etan izango dira.

Programa Robert Treviño titularrak zuzenduko du. Sakontasunez ezagutzen du berak Estatu Batuetako musika, eta Samuel Barberren figura aldarrikatu nahi du, oparoa baita egin duen lana, baina Harietarako adagioak itzal egin die bere beste lanei. Biolinerako kontzertua, 1939an konposatua, Estatu Batuetako erromantizismo berantiarraren ale ederrenetako bat da, doinu landuz eta adierazkortasun zuzen batez josia. Bakarlari lanetan James Ehnes ibiliko da, Kanadako biolinjole ezagunenetakoa eta partitura honetan aditua, 2006an grabatu baitzuen Vancouverreko Orkestra Sinfonikoarekin batera. Hain zuzen, disko honi esker irabazi zuen 2007ko Grammy saria solista interprete onenari.

James Ehnes (Brandon, 1976), nazioartean eskaera handia duen biolinjolea, bigarren aldiz egongo da Euskadiko Orkestra Sinfonikoarekin, 2007/2008 Denboraldian parte hartu baitzuen solista gonbidatu gisa abonu-programa batean. Birtuosismo izugarria, lirikotasun barea eta musikaltasun ausartaren arteko konbinazio ezohikoa duen artista hau munduko zuzendari onenetako askoren gonbidatu gogokoena da. Honako hauena, adibidez: Ashkenazy, Alsop, Sir Andrew Davis, Denève, Elder, Ivan Fischer, Gardner, Paavo Järvi, Mena, Noseda, Robertson eta Runnicles. Ehnesek orkestra onenetan parte hartu du, besteak beste: Boston, Chicago, Londres, NHK eta Vienako Orkestra Sinfonikoak; Los Angeles, New York, Munich eta Txekiako Orkestra Filarmonikoak; Cleveland eta Filadelfiako Orkestrak eta Berlingo Filarmonikoa eta DSO.

Kontzertuaren bigarren zatia 18/19 Denboraldi honetako egile gakoetako bati eskainiko zaio, Sergei Rakhmaninovi. Estatu Batuetara emigratu zuen Errusiar Iraultzaren ondoren, eta izugarrizko eragina izan zuen Mundu Berriko musikagileen gainean. Treviñok haren 2. Sinfonia aukeratu du, garaipen orro bat, haren Lehenengo sinfoniari emandako harrera ezin okerragoaren ondoren (Rakhmaninov depresio luze batera eraman zuen).

Honela azaldu du Treviñok bi obra hauek programa berean jartzearen erabakia: «Bi konpositoreok Estatu Batuei lotuta zeuden, interpretatzaileek bi lanak baztertu zituzten eta konpositoreak alde batera uztear egon ziren kasik; bi lanok bariazioaren eta bariazio ebolutiboaren ideiak biltzen dituzte, eta biek ala biek maisulanaren kategoria bereganatu dute».   

Kontzertuen astearen amaieran, ostiralean, otsailak 8, James Ehnesek Musikeneko biolin-ikasleei masterclass bat eskainiko die. Ekimen hau Euskadiko Orkestra Sinfonikoak eta Musikenek Aula Jordá Gela izenburupean sinatutako hitzarmenaren baitan kokatzen da. Horri esker, kontserbatorioko ikasleek lehen eskutik ezagutu ditzakete Orkestraren Abonu Denboraldian parte hartzen duten bakarlari handietako batzuk.

Sarrerak salgai (10€tik 35€ra). Kontzertu hauetarako sarrerak salgai daude euskadikoorkestra.eus webgunean eta kontzertu-aretoetako webguneetan zein leihatiletan. "Azken ordu gaztea": 30 urtetik beherako lagunek aukera izango dute gune guztietako sarrerak 10€tan erosteko, kontzertua hasi baino 30 minutu lehenago (leihatilan).

Kontzertuak eta programa

-Otsailak 4 (20:00): Principal Antzokia, Gasteiz.
-Otsailak 5 (20:00): Baluarte Auditoriuma, Iruña.
-Otsailak 6 (20:00): Euskalduna Jauregia, Bilbo.
-Otsailak 7 (20:00): Kursaal Auditoriuma, Donostia.
-Otsailak 8 (20:00): Kursaal Auditoriuma, Donostia.

Samuel Barber
Biolin eta Orkestrarako kontzertua, Op.14 [25’]

Sergei Rakhmaninov
2. Sinfonia, Op.27 [60’]

Informazio gehiago

Jakina da euskaldunek presentzia eta protagonismo nabarmena izan zutela munduari egindako lehen biran. Espedizio hartan, Juan Sebastian Elkanok ezinbesteko rola jokatu zuen, eta bera izan zen bira egiten lehen marinela. 2019ko hasieratik 2022ra arte espedizio haren bosgarren mendeurrena izango denez, Euskadiko Orkestra Sinfonikoak, herrialdean kultur erreferente bat izateko duen bokazioaren baitan, garrantzizkotzat jo du Elkano aztertu, ikertu eta arakatzeko lanean ekarpena egitea, betiere musikaren arlotik.

Ibilbide honetan berebiziko garrantzia izan du Robert Treviño zuzendari titularraren lanak, nork euskal musika garaikidearen sorkuntzan sakontzen jarraitu duen. Gainera, modu berezian murgildu da Eresbilen (Euskal Musikaren Artxibategia) eta bere ikuspegi artistikoa partekatu du gure Elkano eta bere mundubira musikala egituratzeko ahalbidean.

Hausnarketa-prozesu honen emaitza gisa, eta gure historiarekiko konpromisoaren erakusgarri, Euskadiko Orkestrak musika-abentura berri honi ekin dio. Getariako marinelak egindako bidaia gogora ekarriz, bost euskal konpositoreri proposatu die beste hainbeste konposizio sortzeko, argibide bakar bezala emanez bidaiaren zati ezberdinetan zentratzea. Musika-zati guztiak elkartzean, munduaren bira osatuko da, erabat berritzailea den musika-ikuspuntu batetik.

Horrela, bada, 2019/2020, 2020/2021 eta 2021/2022 Denboraldietan barrena estreinatuko ditu Euskadiko Orkestra Sinfonikoak bost enkarguak. Horietako bakoitza programa bereizi banatan aurkeztu eta grabatuko da, eta proiektuaren amaieran CD bakarrean argitaratuko dira guztiak. Ibilbide hau guztia eta emaitza izango da Euskadiko Orkestra Sinfonikoak Elkano eta bere bidaia ezagutzera emateko egingo duen ekarpen nabarmena.

Horixe izango da Mundubira 500: Elkano Fundazioarekin bat egiteko modua Orkestrarentzat. Elkanoren ezagutza sustatzeko eta oraindik ere hainbat alorretan nahiko ezezaguna den bere historiari buruz ikertzen jarraitzeko proiektuak koordinatzeko helburuarekin sortu da fundazio hau.

Bost konposatzaileak honakoak dira, enkargu eta estreinaldi hurrenkeraren arabera: Mikel Chamizo, Mikel Urquiza, Joël Mérah, Teresa Catalán eta Zuriñe F Gerenabarrena. Bost egileak hainbat euskal lurraldetakoak dira eta zenbaki horrek espedizioan abiatu ziren bost ontziei egiten die erreferentzia.

Mikel Chamizo (Tolosa, 1980):

“Espedizioaren irteera, 1519” (estreinaldia 2019ko udazkenean)

Mikel Urquiza (Bilbo, 1988):

“Hego Amerika” (estreinaldia 2020ko udaberrian)

Joël Mérah (Clichy, 1969):

“Ozeano Barea, Asia” (estreinaldia 2020ko udazkenean)

Teresa Catalán (Iruña, 1951):

“India, Afrika” (estreinaldia 2021eko udaberrian)

Zuriñe F Gerenabarrena (Gasteiz, 1965):

“Itzulera, 1522” (estreinaldia 2022ko udaberrian)

Ezker-eskuin: Mikel Chamizo, Teresa Catalán, Oriol Roch, Bingen Zupiria, Robert Treviño, Zuriñe F Gerenabarrena, Joël Mérah, Mikel Urquiza

TESELAri jarraipena ematen

Orkestrak 30 urte bete zituenean gauzatu zen TESELA proiektuak hasi zuen zirkulua marrazten jarraituko du musika-proiektu berri honek.

Orduan jatorri ezberdinetako sona handiko konpositoreei zortzi obra eskatu zitzaizkien. Euskal kultura ideia komun bakartzat hartuta musika garaikidearen mosaiko bat osatzen zuten teselak ziren. Hain justu orain planteatutakoaren kontrakoa izan zen hura. Orduan, nazioarteko konpositoreek Euskal Herrian jarri zuten begirada, oraingoan, berriz, Elkanoren begirada honen bidez, euskal musikagile hauek bidaiatzera eramango gaituzte lehen mundubira hura gogora ekarriz. Bi kasuetan, Euskadiko Orkestra Sinfonikoak argi utzi du sorkuntzaren sustatzaile dela, eta kultur balio handiko musika-ondarea utzi(ko) du.

Bost musikagile, munduari bira bat

Jarraian, munduan barrenako musika-bidaia honen bost musikagile protagonistek proposatzen dizkiguten obren lehen ideia eta hausnarketak doaz, baita euren biografiak ere.

Mikel Chamizo (Tolosa, 1980): Navigare necesse est

Elkanoren ibilerei musika jartzen lehena Mikel Chamizo izango da. Espresuki eskatu zaio berari ahots koralari tarte bat eskaintzeko partituran, eta Bilboko Koral Elkarteak interpretatuko du zati hori. Chamizok 1519ko espedizioaren irteerari erreparatuko dio, eta datorren udazkenean estreinatuko du obra, 2019/2020 Denboraldiaren hasieran.

Hona hemen Mikel Chamizoren azalpena bere obrari buruz:

“Navigare necesse est, vivere non necesse (Nabigatzea beharrezkoa da; bizitzea ez da beharrezkoa) esaldia Plutarkoren Bizitza paraleloak obran agertzen da, nahiz eta Ponpeiorena den; hain zuzen, hitz horiez adoretu zituen bere marinelak, seguruenik beren bizitzak amaituko lituzkeen ekaitz handi baten erdian itsasoratu nahi ez zutenean. Baina esaldi horrek, halaber, bi errealitate biltzen ditu: alde batetik, gizarteen hasiera-hasieratik nabigatzeak zuen garrantzi estrategikoa, eta, bestetik, protagonistek bere gain hartzen zuten arrisku pertsonal ikaragarria.

Magallaesek eta Elkanok munduan zehar egin zuten espedizioa –«bigarren Odisea», Stefan Zweigen arabera–, bizitzari aurre egiteko modu paradigmatikoa da, orain existitu ezin dena. Amerika eta Asiaren arteko igarobide bat bilatzea zen Magallaesen fedeak bultzatutako proiektua; kartografiatu gabe zegoen munduko eremu batean barneratu behar ziren, eta, seguru asko, zoritxarreko amaiera izango zuen. Nola prestatu ziren Elkano eta bere gizonak halako egitandi baterako? Zer ahalmen mentalekin egiten zioten aurre egoera ezezagunen beldurrari?

Navigare necesse est obra Magallaesen eta Elkanoren bidaiaren hasieran oinarritzen da, eta hiru ataletan banatuta dago: abesbatzak protagonizatuko duen erritu erlijioso bat –luzerako ontziratu baino lehen egin ohi zuten–; Sanlúcar de Barramedako portuko soinu-paisaiaren birsortze irudikatu bat, bertatik barneratu baitziren Ozeano Atlantikoan Magallaesen itsasontziak; eta itsasoan nabigatzen eman zituzten lehen minutuak, gero gizadiaren historiako abentura izugarrietariko batera eramango zituztenak.”

Mikel Chamizok Musikenen ikasi zuen konposizioa Ramon Lazkano, Gabriel Erkoreka eta Stefano Scaranirekin. Bere musika Frantzia, Suitza, Italia, Polonia, Suedia edo Txile bezalako herrialdeetan interpretatu dute, La Biennale di Venezia, Donostiako Musika Hamabostaldia eta Musikaste bezalako zikloetan. Bere proiektu berrienetako batzuk hauek dira: Bertso berriyak jartzera nua, Maialen Lujanbiorekin batera bertsolaritza musikalki arakatzeko proiektua, Euskadiko Orkestra Sinfonikoaren Miramongo Matinéeen zikloan estreinatutakoa; Espirals, Ensemble Orquesta de Cadaqués delakoarentzat idatzitakoa; edota Soinua iratzarri musika garaikideko proiektu pedagogikoa, Donostia 2016k Europako Kultur Hiriburutza proiektuaren baitan nabarmendu zuen ekimenetako bat.

Mikel Urquiza (Bilbo, 1988)

Lekukoa Mikel Urquizak hartuko du, eta “Hego Amerikan” zentratuko da. 2020ko udaberrian estreinatuko du bere obra.

Mikel Urquiza beraren hitzetan:

 “Euskadiko Orkestraren zuzendaritzak proiektu handi honetan parte hartzeko proposamena egin dit. Proiektuaren helburu nagusia da Elkanok Lurraren inguruan egin zuen bidaia erakustea. Arreta espedizioaren etapa jakin batean jartzeko eskatu dit; hain zuzen ere, Hego Amerikako etapan, non, oraindik Magallaesen buruzagitzapean, gaur egun Brasil eta Argentina diren lurraldeetan egin zuten geldialdia.

Elkanok Hego Amerikan zehar egin zuen bidaiak nigan pizten du, berehala, geroagoko migrazioen oroitzapena: norabide berean egin diren migrazioak, euskal diasporaren mundu-mugimendu baten parte izanik, eta, oraintsukoak, alderantzizko norabidean, gure artean hegoamerikar ugari bizitzea eragin dutenak.

Kartografiatu gabeko itsaso batean nabigatzeko nahiz herrialde ezezagun eta, maiz, etsaiz beteriko batera lekualdatzeko, adimena, erabakitasuna eta ausardia behar dira. Oraindik ez dakit nola antolatuko ditudan ideia horiek musikalki, baina badakit heroia baino gizona goraipatuko dudala, bere egitandiaren bitartez gure inguruan existitzen diren eta ikusezinak diren beste hainbat omenduz.”

Urquizak ere Gabriel Erkorekarekin eta Ramon Lazkanorekin konposizioa ikasi zuen eta ondoren Parisen jarraitu zuen ikasketekin. Han bizi da gaur egun, eta Frantziako hainbat musikarirentzat idatzi eta lan egiten du: Wilhem Latchoumia pianojolea, Quatuor Diotima, l’Instant Donné eta Ensemble Intercontemporain. Alemanian finkatutako beste artista batzuekin ere aritzen da: Sarah Maria Sun sopranoa, emsemble mosaik, ensemble ascolta eta Catch hirukotea, ECLAT bezalako jaialdietan edo Koloniako Filarmonikoaren denboradian. Euskal musika-erakunde garrantzitsuenekin lankidetzan aritzen da: Euskadiko Orkestra Sinfonikoa, BBVA Fundazioa, Donostiako Musika Hamabostaldia eta Musikagileak.

Joël Mérah (Clichy, 1969)

Joël Mérah Iparraldeko konpositoreak “Asiako Ozeano Bareko” uretan barrena eramango gaitu. 2020ko udazkenean izango da, eta soprano baten ahotsa hartuko du barne.

Horrela deskribatu du berak orain lantzen ari den obra :

“Bi izenburu posible ditu obrak: …un certain parfum de sagesse II edo …Jakinduriaren usaina II.

Bi mugimendutan: 1/ Han - Hor - eta – Hemen; 2/ Zure inguruan.

Juan Sebastian Elkanoren mundu-biraren 500. urteurrena ospatzeko konposatu nahi dudan orkestrarako obra, Euskadiko Orkestra Sinfonikoak enkargatu didana, espazio handiek eta bidaiek pizten duten bake-sentimenduak bideratuko du. Bakearen ideia horrek erreferentzia egiten dio Elkanoren eta Ozeano Barean zehar berarekin joan ziren gizonen espiritua bete zuen sentimenduari. Magallaesek jarri zion «Barea» izena ozeanoari, itsasaldian zehar izan zuten eguraldi onagatik. Kanpo-mundua eta mundu epikoa baino, barne-mundua ekarri nahi dut gogora (Juan Sebastian Elkanorena, seguruenik).

Hori guztia nabarmentzeko, Joxean Artzeren idazluma ere erakuts lezake konposizioak. Bidaia- eta barne-sentimendu hori oroitarazten duen poema bat aukeratu beharko litzateke, nolabaiteko jakinduria-usain bat; eta, beharbada, orkestran sartuko litzatekeen ahots batek kantatuko luke.”

Mérahk Baionan hasi zituen bere ikasketak eta Parisen jarraitu zuen. Paris, Bordele, Baiona, Irun, Tokio eta beste hiri batzuetako talde eta orkestrekin egiten du lan eta musika-genero guztiak jorratzen ditu (ganbera-musika, solista, orkestra, opera, balleta, zinea…). Hainbat konposizio-sari jaso ditu, eta horietako azpimarragarriena Tokioko Toru Takemitsu lehen saria da. L’Ensemble 0 musika-taldearen kidea da, eta Baionako Maurice Ravel Kontserbatorioan irakasle aritzen da.

Teresa Catalán (Iruña, 1951)

Teresa Catalán Elkanoren konpositore-talde honetako kide helduena da. “India, Afrikatik” hasiko du etxerako itzulia, 2021eko udaberrian. Catalánek zenbait sari eskuratu ditu interpretazio, konposizio, musika-ibilbidearen aintzatespen arloetan (2017ko Musikaren Sari Nazionala, adibidez). Kide hautetsia da JAKIUNDEn, Nafarroako Gobernuko Kultura Kontseiluan eta Konposizio eta Instrumentazioko Katedratiko Emeritoa da Madrilgo Musikaren Goi Kontserbatorioan. Bere sorkuntzak jaialdi garrantzitsuetan programatu dituzte, zenbait herrialdetan. Interprete eta bertako zein nazioarteko erakunde ugariren enkarguak jaso ditu, eta sarri eskaintzen ditu ikastaroak eta hitzaldiak hainbat herrialdetako jaialdi, instituzio, unibertsitate eta kontserbatoriotan.

Zuriñe F Gerenabarrena (Gasteiz, 1965)

Arabako konposatzaile Zuriñe F Gerenabarrenak hiru urteko bidaiari amaiera emango dio “1522eko itzulerarekin”. Trabesiaren estreinaldia eta itxiera 2022ko udaberrian izango da.

Gerenabarrenak lantzen ari den obraren zati bat iragarri du:

“Konposizioak 8-10 minutu inguruko iraupena izango du.

Obra bakoitzarekin, teselen antzera, euskal nabigatzaileak munduan zehar egin zuen bidaiaren ikuspegia osatzearen ideiaren barruan (irteera, espedizioan nabigatu zituen tokiak eta izan zituen oztopoak eta itzulera), nik azken etapari helduko diot, alegia, itzulerari.

Magallaesen eta Elkanoren bidaldiak (bai eta bidaia espazialek, aurrerapen zientifiko eta teknologikoek eta naturako fenomenoek ere), garai hartan munduaren inguruan zuten ideia zabaldu zuen, eta horrek gure ziurtasunez duda egitea eragin du eta mugigaitzak ziren ideien inguruan bi aldiz pentsatzera behartzen gaitu. Egintza horiek geure burua zabaltzen dute, eta geure burua berrasmatzen eta gure irudimena areagotzen laguntzen dute. Obra honek bidaiaren metafora bat izan nahi du, bai ezbeharretan gogor eutsi eta aurrera egiteari bai helmugara iristeko energiari dagokienez.

Obra idazteko, obra elektroakustikoekin lortutako esperientzietatik abiatuko naiz, tratamendu instrumentalean nahasi nahi baititut pentsamendu elektronikotik eratorritako soinu-elementuak.

Nire asmoa ez da pieza programatiko edo deskriptibo bat egitea, baina esplorazioa lantzeko desioa dut, iluntasunari eta zailtasunari lotutako soinu-eremutik, eta testura argitsuagoekin aldizkatuta, non perkusioa eta metala nagusitzen diren; batzuetan, erabateko soinu gisa, eta, beste batzuetan, kolore gisa.

Gerenabarrenak Carmelo Bernaola eta Franco Donatonirekin estudiatu zuen. Konposatzaile moldakorra da, eta arlo askotako obrak idatzi ditu: solista-lanak, orkestra sinfonikoa, antzerkia, dantza, zine-musikaren orkestrazioak, elektroakustika eta diziplina anitzeko proiektuak. Egile bezala aurkeztu ohi da Europako eta Ameriketako nazioarteko foro ugaritan. Bere musika orkestra, ensemble eta instrumentujole askok interpretatu dute, eta Euskal Herriko, Europako eta Japoniako erakundeen enkarguak eta laguntzak jaso izan ditu. Musikenen garatzen du bere karrera Gerenabarrenak ere.

Informazio gehiago

Larunbat honetan, urtarrilak 26, 11:00etan, Miramongo Matinéeak 18/19 Denboraldiaren erdira iritsiko dira zortzigarren hitzorduarekin, metalezko boskote bat eta organoa izango dituena protagonista.

Larunbat honetako programak gertakizun historiko garrantzitsu bat ekarri nahi du gogora: 1918ko Armistizioaren sinadura, Lehen Mundu Gerrari amaiera eman ziona lau urte baino gehiagoko Erdialdeko Inperioen eta Aliatuen arteko borroka gogorraren ostean. Bakea 1918ko azaroaren 11n sinatu zuten, aliatuen garaipen argi batekin eta Alemaniari baldintza oso gogorrak ezarriz. Aurrerago Versaillesko Itunean, benetan gerraren amaiera ofizialdu zuen itunean, berretsi ziren baldintza horiek.

Gertakari honen oroitza egiteko, musikariek gatazkaren bi aldeak ordezkatu zituzten herrialdeetan jaiotako autoreen obrak hautatu dituzte egitarauan, herrialdeok izan baitziren azken finean armistizioa sinatzearen arduradunak.

Programa eklektiko alai honetan, Muffat frantsesaren Tocatta prima, Handel alemaniarraren Water Music, Widor frantsesaren Bach’s memento, Delerue frantsesaren Vitrales, Naji Hakim libanotarraren Euskal dantzak, Khachaturian sobietarraren Ezpata-dantza eta Dupré frantsesaren Poema heroikoaren su artifizialak entzun ahal izango dira, Verdunen hil zirenei omenaldi batean.

Metalezko instrumentuen bakarlarien boskoteko kide guztiak Euskadiko Orkestra Sinfonikokoak dira: Jean-Luc Casteret (tronpa), Didier Bousquet (tronpeta), Miguel Echepare (tronpeta), Arnaud Mandoche (tronboia) eta Óscar Abella (tuba). Boskoteak Ana Belén Garcíarekin egin du bat, Donostiako Santa Mariako organo historikoaren titularrarekin, Matinée hau eskaintzeko.

Sarrera solteak (7€) salgai daude euskadikoorkestra.eus webgunean eta Kursaal Auditoriumeko leihatilan. Gainera, leku librerik geratuko balitz, Orkestraren egoitzako leihatilan bertan eros ahal izango lirateke kontzertuaren egunean.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio bertaratu nahi duen orori. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

Beste denboraldi batez, Euskadiko Orkestra Sinfonikoaren Musika Gelak Gasteizen aurkeztuko ditu bere Musika Familian kontzertuak, haurrek familiekin gozatzeko kultur aisialdiko eskaintza bat. Euskadiko Orkestra Sinfonikoak haur eta gazteei eskaintzen dizkien jardueren artean, ibilbide luze eta finkatuena duen atala da Musika Familian kontzertuena, eta 20 urte baino gehiago daramatza Orkestraren egitarauan.

Aurten Gasteizen hiru produkzio propio estreinatuko dira zikloaren baitan, eta askotariko adin-taldeei zuzendutakoak dira, 2 urtetik hasi eta 16 urteraino: Uauatxua, kultura ezberdinetako melodia herrikoiak eta musika klasikoko sehaska-kantak entzuteko aukera emango digun kontzertua (igandean, otsailak 17, 17:00etan eta 18:30ean García Lorca Antzokian, 2 eta 5 urte bitarteko haurrentzat); Pianissimo, musikaren, bere ñabarduren eta bere inplikazio emozionalaren inguruko terminologia espezifikoan sakontzen lagunduko digun emanaldia, Helena Orcoyen soprano paperean izango duena (ostirala, martxoak 22, 19:00etan Principal Antzokian, 10 eta 16 urte bitarteko gazteentzat); eta Isiltasunaren haitzuloa, musika entzuten ez denean non dagoen bilatzean tematuta dagoen gazte-koadrila bat protagonista duen musika-ipuina (igandea, apirilak 14, Principal Antzokian, 6 eta 10 urte bitarteko haurrentzat). Ikuskizun hauek guztiak Gasteizko Udalaren Antzoki-Sarearekin koprodukzioan prestatu dira.

Musika Gelaren Denboraldi honetako produkzio horien guztien gai komuna emakume-ahotsa izango da, baita hark eragiten dizkigun emozioak ere. Ahots hori —kantatua, esana eta musikarena berezkoa dena— forma eta intentsitate ugaritan aurkezten zaigu: haurrei abestutako sehaska-kantatan, botere eta distira osoz ageri den opera-aria handietan, edo bere garaikideen onespen ezaren aurka borrokatu behar izan zuten emakumeen konposizioetan.

Ikuskizun guztietarako sarrerak 6 eurotan daude salgai euskadikoorkestra.eus eta principalantzokia.org webguneen bidez, baita 945161045 telefono-zenbakian eta Principal Antzokiko leihatilan ere. Uauatxuaren kasuan, gainera, García Lorca Antzokiko leihatilan ere eskuratu ahal izango dira tiketak, bertan izango baita emanaldia.

Partaidetza gasteiztarra Eskola Kontzertuetan

Aurtengoan ere, Gasteizko Olabide Ikastolako 115 ikasle Orkestrak antolatutako Eskola Kontzertuetako batean izango dira. Aurten hamar urte beteko dira Eskola Kontzertuak hasi zirenetik, eta ordutik Musika Gelaren ildo nagusietako bat bezala finkatu da. Guztira, aurreko bederatzi edizioetan, 35.000 ikasle baino gehiagok gozatu ahal izan dute kontzertu hauez, eta parte-hartzaileen zifra urtez urte areagotu egin da.

Olabide izango da Denboraldi honetan Eskola Kontzertuez gozatu ahal izango duten 100 ikastetxeetako bat. Zehazki, ikastetxe gasteiztarreko Derrigorrezko Bigarren Hezkuntzako lehen mailako ikasleek Pianissimo kontzertua ikus ahal izango dute. Guztira, Haur Hezkuntzako, Lehen Hezkuntzako eta Derrigorrezko Bigarren Hezkuntzako 9.000 ikasle baino gehiagok hartuko dute parte Denboraldi honetan Eskola Kontzertuetan.

Askoz gehiago Musika Gelan

40 jarduera baino gehiagok osatuko dute Euskadiko Orkestra Sinfonikoaren Musika Gelaren 18/19 Denboraldiko egitaraua, Mikel Cañadak koordinatutakoa. Orkestraren programazioan aspaldidanik erabat sustraituta dagoen hezkuntza-ziklo hau herritarrei, oro har, eta gazteei, bereziki, musika gerturatzeko helburuarekin jaio zen. Bere baitan eskaintzen diren kontzertuek izaera didaktikoa, pedagogikoa eta gertukoa daukate.

Musika Familian kontzertuez eta Eskola Kontzertuez gain, zikloak aurten hainbat entsegu ireki hartuko ditu barne, eta baita pertsonen inklusioa sustatzeko jarduera ugari ere, FEVAS-Plena Inclusión Euskadirekin lankidetzan programatutakoak.

Informazio gehiago